དེ་རིང་བོད་ཀྱི་ཆབ་སྲིད་བཙོན་ཟུར་གྲྭ་བག་གྲོ་ལགས་ཀྱིས་ཁོང་ལྡི་ལིར་ཡོད་པའི་མཉམ་འབྲེལ་རྒྱལ་ཚོགས་ཡན་ལག་ལས་ཁུངས་སོགས་ཀྱི་ནང་བོད་དོན་ཞུ་གཏུག་བྱེད་དུ་འགྲོ་རྒྱུ་ཡིན་པའི་གསལ་བསྒྲགས་གནང་སོང་།
དེ་རིང་ཉིན་རྒྱབ་ཆུ་ཚོད་ ༣།༠༠ སྟེང་དྷ་ས་ཐེག་ཆེན་གཙུག་ལག་ཁང་གི་སྒོ་ཆེན་གྱི་ཁ་གཏད་ལམ་འགྲམ་དུ། བོད་ཀྱི་ཆབ་སྲིད་བཙོན་ཟུར་གྲྭ་བག་གྲོ་ལགས་ཀྱིས། ལྡི་ལི་མཉམ་འབྲེལ་རྒྱལ་ཚོགས་ཡན་ལག་ལས་ཁུངས་གྱིས་གཙོས་རྒྱལ་ཁབ་འདྲ་མིན་གྱི་གཞུང་ཚབ་ཁང་ལ་བོད་དོན་ཞུ་གཏུག་བྱེད་དུ་སོང་སྟེ། རྒྱབ་སྐྱོར་འཚོལ་ཐབས་བྱ་རྒྱུ་ཡིན་སྐོར་གསར་འགོད་གསལ་བསྒྲགས་གནང་སོང་བ་དང་བསྟུན། རྒྱ་གཞུང་གིས་བོད་མིར་སྡུག་སྦྱོང་མནར་གཅོད་ཚད་ལས་བརྒལ་བ་བཏང་བའི་པར་རིས་དང་རྒྱ་ནག་གི་དཔོན་རིགས་ཉེས་ཅན་གཏེ་པོ་ཁག་ཅིག་གི་འདྲ་པར་འགྲེམས་སྟོན་གནང་སོང་།
ཁོང་གིས་ཡིག་ཐོག་ནས་བསྒྲགས་གཏམ་སྒྲོགས་སྦྱངས་གནང་བའི་ནང་། ལྡི་ལིར་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཡན་ལག་ལས་ཁུངས་དང་། ཕྱི་རྒྱལ་གྱི་གཞུང་ཚབ་ཁག་ལ་ཕྱིན་ནས་ད་ལྟ་འཚོ་བཞིན་བཞུགས་པའི་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་བླ་སྤྲུལ་དགེ་བཤེས། བཙོན་དུ་བཞུགས་པའི་བོད་ཀྱི་ཆབ་སྲིད་བཙོན་པའི་ཚེ་སྲོག་གི་བདེ་འཇགས་ལ་འཛམ་གླིང་མཉམ་འབྲེལ་རྒྱལ་ཚོགས་དང་ཕྱི་རྒྱལ་གཞུང་ཚབ་ཁག་ལ་རོགས་རམ་ཡོང་ཐབས་ཀྱི་སྙན་ཞུ་འབུལ་རྒྱུ་དང་། གལ་ཏེ་ཁོང་ཚོ་བཙོན་ཁང་ནང་གྲོངས་པའམ། ཡང་ན་བཙོན་ཁང་གི་ཕྱི་རུ་གྲོངས་པ་ལ་སོགས་པའི་གནད་དོན་བྱུང་ཚེ། དེའི་ཉེན་འགན་ཡོངས་རྫོགས་རྒྱ་དམར་གཞུང་གིས་འཁྱེར་དགོས། པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གཙོས་པའི་བོད་ཀྱི་ཆབ་སྲིད་བཙོན་པ་ཡོངས་རྫོགས་གློད་བཀྲོལ་ཡོང་རྒྱུར་ངས་ད་རེས་རྒྱབ་སྐྱོར་འཚོལ་བར་འགྲོ་གི་ཡོད་ལ། རྒྱ་དམར་གཞུང་གིས་ཀྱང་༧ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གཙོས་པའི་བོད་ཀྱི་ཆབ་སྲིད་བཙོན་པ་ཡོངས་རྫོགས་འཕྲལ་དུ་གློད་བྱེད་དགོས། བཙན་བྱོལ་གཞུང་དང་། གཞུང་འབྲེལ་མ་ཡིན་པའི་ཚོགས་པ་ཁག བཙན་བྱོལ་བོད་མི་ཡོངས་ཀྱིས་བོད་ཀྱི་རྩ་དོན་ཆེད་སྔར་ལས་ལྷག་པའི་ལས་འགུལ་སྤེལ་ཤུགས་ཆེ་རུ་གཏོང་དགོས་པ་དང་། བོད་ཀྱི་རྩ་དོན་སེལ་ཆེད་བོད་མི་རང་གིས་རང་རང་ལ་དྲི་བ་བཏོན་ཏེ་སོ་སོའི་ལྟ་གྲུབ་གང་ཞིག་བཟུང་མིན་ལ་མ་བལྟོས་པར། དོན་དངོས་ཐོག་སྐད་ཆ་རྫིག་པོ་དང་སྟོང་གཏམ་ཁོ་ན་བཤད་ནས་མ་བསྡད་པར། བོད་ནང་གི་རྒྱལ་གཅེས་མི་མང་མིག་དཔེར་བཟུང་ནས་རང་ཉིད་ཀྱི་ཡོད་ཚད་བློས་གཏོང་གིས་དཀའ་ལས་རྒྱག་དགོས། ༧རྒྱལ་བ་རིན་པོ་ཆེ་མཆོག་སྐུ་ཚེ་བརྟན་པ་དང་། བོད་ཀྱི་གནད་དོན་བོད་མི་རང་གིས་འབད་བརྩོན་བྱས་ཏེ་གྲུབ་དགོས་པ་ལས་གཞན་རེ་བར་བརྟེན་ནས་འབྱུང་རྒྱུ་མེད་པའི་ངེས་ཤེས་བརྙེད་པའི་རེ་བ་དང་། བོད་དོན་འཐབ་རྩོད་དེ་ལྟ་གྲུབ་ཀྱི་འགལ་ཟླའི་རྩིག་གྱང་མེད་པར་འཐབ་རྩོད་ཀྱི་ཁ་ཕྱོགས་དགྲ་བོ་རྒྱ་དམར་གྱི་ཕྱོགས་སུ་ནུས་པ་མཉམ་སྤུངས་ཡོང་བའི་རེ་འདུན་ཤུགས་དྲག་ཞུ་རྒྱུ་ཡིན། ཞེས་བརྗོད་སོང་།
ཡང་ཁོང་གིས་གསར་འགོད་གསལ་བསྒྲགས་ཀྱི་དགོས་དམིགས་སྐོར་བརྗོད་དོན། རྒྱ་དམར་གྱིས་བོད་བཙན་འཛུལ་བྱས་ནས་ལོ་ ༥༠ ལྷག་འགྲོ་བཞིན་ཡོད་པ་དང་། བོད་ཞི་བའི་བཅིངས་འགྲོལ་བཏང་ཡིན་ཟེར་གྱི་ཡོད་ཀྱང་བོད་ཞི་བའི་བཅིངས་འགྲོལ་བཏང་པ་ཡིན་ན་འདི་འདྲའི་གདུག་རྩུབ་བྱ་དགོས་དོན་མེད་སྟབས། རྒྱ་ནག་སྲིད་འཛིན་ཟུར་བ་ཧུའུ་ཅིན་ཐོ་དང་ཅང་ཙེ་མིན། ལི་ཕིན། ཀྲང་ཅི་ལིན་མི་འདི་དག་བོད་མིར་མནར་གཅོད་གཏོང་མཁན་ཉེས་ཅན་གཏེ་པོ་ཆགས་ཡོད་དུས། དེ་འཛམ་བུ་གླིང་ཡོངས་ནས་ཧ་གོ་དགོས་པའི་ཆེད་དུ། དེ་རིང་པར་འདི་དག་ཕྱི་ལོགས་ལ་འགྲེམས་སྟོན་བྱས་པ་ཡིན། ངའི་ཀ་ལི་ས་ལ་མ་ཐུག་པར་དུ་གུང་ཁྲན་ཏང་ལ་མུ་མཐུད་ནས་ཁ་གཏད་གཅོག་རྒྱུའི་དམ་བཅའ་ཡོད། སྔོན་ནས་ད་བར་དུ་ང་ཚོ་ཆབ་སྲིད་བཙོན་པ་ཡོངས་ལ་ནག་ཉེས་མེད་པར་བཙོན་འཇུག་བྱས་ཡོད་པ་དང་། བོད་དེ་ང་ཚོའི་ཕ་མེས་ཡང་མེས་ནས་ང་ཚོའི་ས་ཆ་ཆགས་ཡོད་པའི་བདེན་དོན་གྱི་ཆེད་དུ་ང་ཚོ་བཙོན་ཁང་ལ་བཅུག་པ་རེད་མ་གཏོགས་ང་ཚོར་ནག་ཉེས་རྩ་བ་ནས་མེད། ནག་ཉེས་ཡོད་མཁན་དེ་གུང་ཁྲན་ཏང་གི་སྲིད་ཇུས་དེ་ཡིན་པ་དང་། ལྷག་པར་དུ། སྲིད་འཛིན་ཞི་ཅིན་ཕིན་གྱིས་འགན་ཁུར་ནས་ལོ་གཅིག་གཉིས་ཤིག་འགྲོ་བཞིན་ཡོད་ཀྱང་། བོད་ནང་ལ་འགྱུར་བ་རྩ་བ་ནས་བཏང་མ་སོང་། ལྐོག་ཟ་རུལ་སུངས་རྐྱང་རྐྱང་ལ་ལས་ཀ་བྱས་པ་དེ་ཁོ་རང་གི་གསང་བ་སྲུང་སྐྱོབ་བྱེད་པའི་ཆེད་མ་གཏོགས་ད་ལྟ་བར་དུ་བོད་ཀྱི་མི་གཅིག་གི་སྲོག་བསྐྱབས་པ་དང་། བཙོན་པ་གཅིག་ཀྱང་ཀློད་གྲོལ་བཏང་མ་སོང་། ད་ལྟ་ཀློད་གྲོལ་བཏང་པ་དེ་དག་བཙོན་འཇུག་གི་ལོ་ཚད་སོན་པ་རེད། ཅེས་དང་། བོད་མིའི་འཐབ་རྩོད་ལ་བོད་མི་རང་གིས་འགན་ཁུར་དགོས་པ་ལས་གཞན་སུ་གཅིག་གིས་སྐྱོབ་མི་ཐུབ་སྐོར་བརྗོད་སོང་།
གསར་འགོད་པ། འཇིགས་མེད་རྒྱ་མཚོ།
དགའ་ལྡན་བག་གྲོས་བཙོན་པ་གཅིག་ཀྱང་ཀློད་གྲོལ་བཏང་མ་སོང་ཟེར། སྟོན་མོ་ག་ཚོད་འཁྲབ་ཀྱང་དྲང་པོ་ཤོད་རྒྱུ་དེ་གལ་ཆེན་པོ་རེད། རོང་རྒྱལ་ཨ་གྲགས་ཉེ་དུས་རང་བཙོན་གྲོལ་བཏང་སོང་ང་།