དཔལ་ལྡན་སྲིད་སྐྱོང་མཆོག་གིས་མུ་མཐུད་སྲིད་སྐྱོང་གི་འགན་བཞེས་རོགས།

ཕྱི་ལོ་ ༢༠༡༡ ཟླ་ ༨ ཚེས་ ༨ ཉིན་འབུམ་རམས་པ་མཁས་དབང་བློ་བཟང་སེང་གེ་མཆོག་གིས་བཀའ་བློན་ཁྲི་པའི་དམ་འབུལ་མཛད་དེ་བཙན་བྱོལ་བོད་གཞུང་གི་ཆབ་སྲིད་དང་འཛིན་སྐྱོང་གཉིས་ཀའི་ཐུགས་འགན་བཞེས་པ་ནས་བཟུང། འདས་པའི་མི་ལོ་བཞི་རིང་ཆིག་སྒྲིལ་དང། གསར་གཏོད། རང་ཁ་རང་གསོའི་སྲིད་བྱུས་རྩ་དོན་དུ་ཟིན་ཏེ། བོད་ཀྱི་ཆབ་སྲིད་དང། དཔལ་འབྱོར། ཤེས་ཡོན། སྤྱི་ཚོགས་གང་གི་ཆ་ནས་གྲུབ་འབྲས་གཟེངས་སུ་ཐོན་པའི་ཕྱག་ལས་གནང་ཡོད་པ་མ་ཟད། རྒྱལ་སྤྱིའི་སྲིད་སྟེགས་གང་དུའང་བོད་མིའི་སྒྲིག་འཛུགས་ཀྱི་སྲིད་སྐྱོང་གི་གཟུགས་བརྙན་མཇལ་རྒྱུ་ཡོད་པའི་ཆབ་སྲིད་ཀྱི་རྣམ་པ་གསར་པའི་ལེའུ་ཞིག་གཏོད་ཡོད།
    ལྷར་བཅས་སྲིད་ཞིའི་གཙུག་རྒྱན་འཇིག་རྟེན་ཞི་བདེའི་དེད་དཔོན། ས་སྟེང་༧རྒྱལ་བསྟན་ཡོངས་རྫོགས་ཀྱི་མངའ་བདག བོད་མི་ཡོངས་ཀྱི་མགོན་སྐྱབས། བླ་ན་མེད་པའི་དབུ་འཁྲིད་༧སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས། ཐོག་མར་ཆབ་སྲིད་དང་འཛིན་སྐྱོང་གཉིས་ཀའི་སྐུ་དབང་མང་ཚོགས་ཀྱི་འོས་འདེམས་བྱེད་པའི་འགོ་འཁྲིད་ལ་རྩིས་སྤྲོད་གནང་བའི་རླབས་པོ་ཆེའི་མཛད་པ་བསྐྱངས་སྐབས། བོད་ཕྱི་ནང་གཉིས་སུ་གནས་པའི་རྒྱ་ཆེའི་མང་ཚོགས་ཀྱི་སེམས་ཁོངས་སུ་དངངས་འཚབ་དང་ཅི་འདྲ་ཞིག་ཡོང་ངམ་སྙམ་པའི་དོགས་སློང་ཆེན་པོ་ཞིག་ཡོད་རུང། དཔལ་ལྡན་སྲིད་སྐྱོང་མཆོག་གིས་འདས་པའི་མི་ལོ་བཞིའི་རིང་ཁྲི་ཟུར་ཟམ་གདོང་རིན་པོ་ཆེ་མཆོག་དམིགས་དཔེར་དུ་བཟུང་། ཕྱག་སྦྲེལ་བཀའ་བློན་རྣམ་པ་དང་སྲི་ཞུ་བའི་ལྷག་བསམ་རྣམ་དག་གི་རོགས་འདེགས་བཅས་ཀྱིས་ལས་དོན་འཐུས་ཤོར་མེད་པའི་འགན་འཁུར་སྟངས་དང།  ཡར་རྒྱས་ཕུན་སུམ་ཚོགས་པོ་བཏང་གནང་ཐུབ་པ་བཅས་ཀྱིས་མང་ཚོགས་ཀྱི་དངངས་འཚབ་དང་དོགས་སློང་ཁག་རང་བཞིན་དུ་ཡལ་བའི་ལྷིང་འཇགས་ཀྱི་སྤྱི་ཚོགས་ཤིག་སྐྲུན་ཏེ་གཤམ་གསལ་འབུར་དུ་ཐོན་པའི་གྲུབ་འབྲས་ཆེན་པོ་བཅུ་ཐོབ་ཡོད། 
    དེ་ལྟར་ཡིན་རུང། ཁོང་ལ་མཚོན་ན་ད་དུང་ལས་འཆར་མང་དག་ཅིག་སྒྲིག་ཡོད་པ་མུ་མཐུད་མཇུག་སྐྱོང་ཚད་དང་ལྡན་པ་གནང་དགོས་རྒྱུ་ནི་གལ་འགངས་ཆེ་ཤོས་ཤིག་ཆགས་ཀྱི་ཡོད་པ་མ་ཟད། མ་འོངས་པའི་ལོ་ལྔ་ནི་འདས་པའི་ལོ་བཞིའི་ཕུགས་རྒྱང་རིང་བའི་སྲིད་བྱུས་གཏན་འབེབས་གནང་བ་ཁག་གྲུབ་འབྲས་རྨད་དུ་བྱུང་བ་ཐོན་རྒྱུའི་དུས་སྐབས་གལ་གནད་ཅན་ཞིག་ཆགས་ཀྱི་ཡོད་སྟབས། སྤྱིར་བོད་ཕྱི་ནང་གཉིས་ཀྱི་བོད་མིའི་མངོན་འདོད་དང། ཡང་སྒོས་རྒྱལ་ཁབ་དང་མི་རིགས་ཤིག་གི་རྩ་དོན་སྒྲུབ་ཆེད་ཀྱི་སྲིད་བྱུས་ཁག་རྒྱུན་གནས་དགོས་པ་སོགས་ལ་བརྟེན། དཔལ་ལྡན་སྲིད་སྐྱོང་མཁས་དབང་བློ་བཟང་སེང་གེའི་མཆོག་མུ་མཐུད་སྲིད་སྐྱོང་གི་འགན་དབང་སྐབས་གཅིག་བསྐྱར་དུ་བཞེས་དགོས་རྒྱུ་དུས་ཀྱི་དགོས་མཁོར་མཐོང་སྟེ། གུས་ཅག་ << མི་དམངས་ཀྱི་སྲིད་སྐྱོང་བློ་བཟང་སེང་གེར་རྒྱབ་སྐྱོར་ཚོགས་པ་>> ནས་གཞིས་བྱེས་བོད་རྒྱ་ཆེའི་མི་མང་གི་ཚབ་བྱས་ནས་ཁྱེད་རང་མུ་མཐུད་སྲིད་སྐྱོང་གི་ཐུགས་འགན་བཞེས་རོགས་ཞེས་འབོད་སྐུལ་ཞུ་རྒྱུ་ཡིན་ལགས་ན། རྒྱ་ཆེའི་མང་ཚོགས་ཀྱིས་ཀྱང་ཐུགས་ཞིབ་ནན་པོ་གནང་སྟེ་རྒྱབ་སྐྱོབ་གནང་རོགས་ཞེས་ཞུ་རྒྱུ་ཡིན།

དང་པོ། ༧གོང་ས་མཆོག་དང་གཞིས་བྱེས་མི་མང་གི་གཟེངས་བསྟོད་ཐོབ་པ།

ཕྱི་ལོ་ ༢༠༡༡ ཟླ་ ༨ ཚེས་ ༨ ཉིན་དཔལ་ལྡན་སྲིད་སྐྱོང་མཆོག་གིས་དམ་འབུལ་མཛད་སྒོར། ༧གོང་ས་སྐྱབས་མགོན་ཆེན་པོ་མཆོག་གིས་ “སྲིད་སྐྱོང་གི་འགན་དབང་བཞེས་མཁན་སྟག་བྲག་རིན་པོ་ཆེའི་སྐུ་མདུན་ནས་ངས་རྩིས་ལེན་ཞུས་པ་འདི། སྲིད་སྐྱོང་བློ་བཟང་སེང་གེ་ལ་ངོས་ཀྱིས་རྩིས་སྤྲོད་བྱ་རྒྱུ་ཡིན། ངོས་ཀྱི་མི་ཚེའི་ནང་རིང་ནས་སྙིང་དུ་བརྣག་པའི་འདོད་པའི་དོན་ཞེས་བརྗོད་པའི་འདོད་དོན་གཅིག་དེ་རིང་དངོས་སུ་འགྲུབ་ཐུབ་པ་བྱུང་” ཞེས་དང་། ༢༠༡༤ ཟླ་ ༣ པར་སྤྱི་འཐུས་ལྷན་ཚོགས་ཀྱི་ཚོགས་ཁང་དབུ་འབྱེད་བཀའ་དྲིན་གནང་སྐབས། “ངོས་ཀྱི་ཆབ་སྲིད་ཀྱི་ལས་འགན་ཆ་ཚང་སྲིད་སྐྱོང་ལ་རྩིས་འབུལ་ཞུས་ཡོད། ང་མི་གཅིག་གི་མི་ཚེ་ལ་བསྟུན་མི་དགོས་པ་ཆགས་ཡོད་” ཅེས་དང་། ༢༠༡༤ ཟླ་ ༨ ཚེས་ ༢༧ ཉིན་འཇར་མན་དུ། “ངོས་ཀྱི་ཆབ་སྲིད་ཀྱི་འགན་དབང་ཆ་ཚང་འོས་འདེམས་བྱས་པའི་ཕུལ་དུ་བྱུང་བའི་ན་གཞོན་འགོ་ཁྲིད་བློ་བཟང་སེང་གེ་ལ་གནང་ཡོད་” ཅེས་དང་། ༢༠༡༥ ཟླ་ ༣ ཚེས་ ༢༣ ཉིན་ལྡི་ལིར་རྒྱལ་སྤྱིའི་མང་གཙོའི་འགོ་འཁྲིད་ལྷན་འཛོམས་སར། བོད་པའི་མང་གཙོའི་ལམ་ནས་འོས་འདེམས་བྱུང་བའི་སྲིད་སྐྱོང་གིས། འགན་དབང་ཡོངས་རྫོགས་ཚད་དང་ལྡན་པའི་ཐོག་ནས་འཁུར་བཞིན་ཡོད་པའི་སྐོར་བཀའ་བཟང་ཕེབས་ཡོད། ཆབ་སྲིད་ཀྱི་འགན་དབང་ཆ་ཚང་མར་གནང་བ་དང་རྩིས་ལེན་ཞུས་པའི་དུས་ཚོད་འགྱུར་ལྡོག་ཆེན་པོ་དེའི་ཁྲོད་ནས། སྲིད་སྐྱོང་མཆོག་གིས་བོད་མི་མང་གི་སྲི་ཞུ་ནུས་པ་དང་ལྡན་པའི་ཐོག་ནས་སྒྲུབ་བཞིན་པ་དེའང་། གཙོ་བོ་༧གོང་ས་མཆོག་གི་ལམ་སྟོན་བཀའ་སློབ་དང་། ཁོང་གི་ཐུགས་བརྩེ་བ་ཆེན་པོས་རྒྱལ་སྤྱིའི་སྡིང་ཆ་གང་སར་སྲིད་སྐྱོང་ངོ་སྤྲོད་གནང་པ་སོགས་ཀྱི་ཐུགས་རྗེ་བྱིན་རླབས་དང་ཐུགས་རེ། ལས་དང་བསོད་ནམས་ཀྱི་འབྲས་བཟང་སྨིན་པ་བཅས་ལ་བརྟེན་ནས་བྱུང་བ་ཡིན་པ་ནི་སྨོས་ག་ལ་དགོས། 

གཉིས་པ། བོད་ནང་གི་ཛ་དྲག་གི་གནས་སྟངས་ལ་རྒྱལ་སྤྱིའི་ཐོག་ཁྱབ་བསྒྲགས་དང་རྒྱབ་སྐྱོར་ཐོབ་པ།

བོད་ཀྱི་བྱུང་རབས་ལོ་རྒྱུས་ནང་སྔར་བྱུང་མ་མྱོང་བའི་རང་ལུས་མེར་སྲེག་གི་ལས་འགུལ་རིམ་བྱུང་དང་། བོད་མི་སྤྱི་ཡོངས་ཀྱི་ཛ་དྲག་གི་གནས་སྟངས་ཐད། དཔལ་ལྡན་སྲིད་སྐྱོང་མཆོག་གིས་རྒྱལ་སྤྱིའི་དཔོན་རིགས་བློན་ཆེན་དང་གྲོས་ཚོགས་འཐུས་མི་ཁག རྒྱལ་སྤྱིའི་བརྒྱུད་ལམ་སོགས་གླེང་སྟེགས་ཆེ་ཁག་ཏུ་བོད་ནང་གི་དངོས་ཡོད་གནས་ཚུལ་འགྲེལ་བརྗོད་དང་དྲིལ་བསྒྲགས་ཧ་ཅང་ཆེན་པོ་གནང་ཡོད་པ་དང་། འདས་པའི་མི་ལོ་བཞི་ཙམ་གྱི་རིང་ལ་དཔལ་ལྡན་སྲིད་སྐྱོང་མཆོག་བྱང་ཨ་རི་དང་ཡུ་རོབ། ཨེ་ཤེ་ཡ་བཅས་རྒྱལ་ཁབ་ ༢༠ ལྷག་ཙམ་ནང་ཆིབས་སྒྱུར་གནང་སྟེ། སྟོབས་ལྡན་གྱི་རྒྱལ་ཁབ་ཁག་གི་བློན་ཆེན་རིམ་པ་དང་དྲུང་ཆེ་རིམ་པ། གྲོས་ཚོགས་ཀྱི་ཚོགས་གཙོ་དང་འཐུས་མི། ཞི་བདེའི་གཟེངས་རྟགས་བཞེས་མྱོང་མཁན། བོད་དོན་རྒྱབ་སྐྱོར་ཚོགས་པ་སོགས་དང་མཇལ་འཕྲད་དང་བོད་དོན་གླེང་སློང་། འཛམ་གླིང་གི་མཁས་དབང་ཁག་དང་བསྟི་གནས་ཁག སྙན་གྲགས་ཆེ་བའི་བརྒྱུད་ལམ་ཁག་<< CNN.BBC.NDTV.NewYorkTimes.Globe mail.Time.Wall Street Journal.Economic Times. Washington Post. >> ནང་གསུང་བཤད་རབ་དང་རིམ་པ་གནང་བ་མ་ཟད། བརྒྱུད་ལམ་དེ་དག་གིས་སྲིད་སྐྱོང་མཆོག་གི་ལོ་རྒྱུས་དངོས་སུ་བཀོད་ནས་ཁྱབ་སྤེལ་བཏང་བ་དང་། སྲིད་སྐྱོང་རང་ཉིད་ཀྱིས་ལྗགས་རྩོམ་གནང་བའི་བོད་དོན་དཔྱད་གླེང་གི་རྩོམ་ཡིག་ཁག་འཛམ་གླིང་གྲགས་ཅན་གྱི་དུས་དེབ་དང་ཚགས་པར་ཁག་ནང་རྒྱ་ཁྱབ་སོང་ཡོད། དེ་དག་ལ་བརྟེན་ནས་རྒྱལ་སྤྱིའི་ཐོག་བོད་དོན་ལ་རྒྱབ་སྐྱོར་དང་གླེང་སློང་གི་རྣམ་པ་ཤུགས་ཆེ་རུ་ཐོན་ཡོད།  ཕྱི་ལོ་ ༢༠༡༢ ལོར་བོད་ནང་གི་ཛ་དྲག་གནས་སྟངས་ལ་དམིགས་ནས་བོད་གཞུང་མང་དམིགས་བསལ་ཚོགས་ཆེན་འཚོགས་པ་དང་། དེ་འབྲེལ་གྱིས་ལྡི་ལིར་བཀའ་སྤྱི་གཉིས་ཀྱི་ལས་འགུལ་ཆེན་པོ་དང་། ༢༠༡༥ ལོར་ཧྥེ་རི་སི་ལ་མི་འབོར་སྟོང་ཕྲག་ ༧ ལྷག་འདུ་འཛོམས་ཀྱིས་ལས་འགུལ། ཨོ་སི་ཁྲིར་ཡ་ཝི་ན་དུའང་དེ་ལྟར་ལས་འགུལ་སྤེལ་བ་སོགས། བོད་ནང་གི་ཛ་དྲག་གི་གནས་སྟངས་ལ་རྒྱལ་སྤྱིའི་ཐོག་ཁྱབ་བསྒྲགས་དང་རྒྱབ་སྐྱོར་ཚད་མཐོན་པོ་ཐོབ་སྟེ།  བོད་ནང་གི་བོད་མི་ཚོས་བོད་མིའི་སྒྲིག་འཛུགས་དང་སྲིད་སྐྱོང་གི་སྐོར་ལ་གོ་རྟོགས་དང་རྒྱབ་སྐྱོར། ཡིད་ཆེས་སོགས་ཚད་མཐོ་པོ་སླེབས་ཡོད་ཅེས་ཞུ་ཐུབ། དེ་ལྟར་ཞུ་ཐུབ་པའི་རྒྱུ་མཚན་ཡང་བོད་བཞུགས་གཞས་པ་གཞས་མ་ཚོས་བསྟོད་པའི་གླུ་དབྱངས་ལེན་པ་དང་། རྩོམ་པ་པོ་ཚོས་རྩོམ་ཡིག་བྲིས་པ། དགོན་སྡེ་ཁག་དང་མི་མང་གིས་སྨོན་འདུན་ཞུས་པ་སོགས་ལས་ཤེས་ཐུབ།

གསུམ་པ། དབུ་མའི་ལམ་གྱི་གོ་རྟོགས་ལས་འགུལ་རྒྱ་ཁྱབ་དུ་སྤེལ་ཏེ་དོ་སྣང་དང་རྒྱབ་སྐྱོར་ཤུགས་ཆེ་ཐོབ་པ།

བོད་དོན་བདེན་མཐའ་གསལ་བའི་རྩ་བའི་སྲིད་བྱུས་ནི་༸གོང་ས་མཆོག་གི་དགོངས་པ་གཞིར་བཟུང་མང་གཙོའི་ལམ་ནས་གཏན་འབེབས་གནང་བའི་དབུ་མའི་ལམ་ཡིན་ཞིང། དཔལ་ལྡན་སྲིད་སྐྱོང་མཆོག་ཐོག་མ་དམ་འབུལ་མཛད་སྐབས་ནས་དབུ་མའི་ལམ་གྱི་སྲིད་བྱུས་བཀའ་ཤག་གོང་མ་ཁྲི་ཟུར་ཟམ་གདོང་རིན་པོ་ཆེ་མཆོག་གིས་ཕྱག་བསྟར་གནང་པ་རྣམས། མུ་མཐུད་མཇུག་སྐྱོང་གནང་རྒྱུའི་ཞལ་བཞེས་གནང་ཡོད་པ་ལྟར། བཀའ་ཤག་གི་ཐུགས་འགན་མཛད་མ་ཐག་བདེ་སྲུང་བོད་གནས་ཉམས་ཞིབ་ཁང་དེ་བཞིན་རྒྱ་བསྐྱེད་དུ་བཏང་སྟེ་ཐད་ཀར་བཀའ་ཤག་འོག་སྟངས་འཛིན་ཡོད་པའི་བོད་ཀྱི་སྲིད་བྱུས་ཉམས་ཞིབ་ཁང་གི་ངོ་བོར་བསྒྱུར་གནང་མཛད་དེ། རྒྱ་གར་གཙོས་རྒྱལ་སྤྱིའི་ཚད་ལྡན་ཉམས་ཞིབ་ཁང་དང་མཉམ་དུ་དབུ་མའི་ལམ་གྱི་སྲིད་བྱུས་གཙོས་བོད་དོན་དང་འབྲེལ་བའི་བགྲོ་གླེང་ཚོགས་འདུ་དང་གཏམ་བཤད་སྣ་མང་སྤེལ་ཡོད་པ་དང།  བོད་མིའི་སྒྲིག་འཛུགས་ཁྱབ་ཁོངས་གཞིས་སྒར་ཁག་དང། དགོན་སྡེ་གྲྭ་ཚང། སློབ་གྲྭ་ཁག་སོགས་སུ་ཆེད་ལས་ཉམས་ཞིབ་པ་བཏང་སྟེ་དབུ་མའི་ལམ་གྱི་གོ་རྟོགས་ལས་འགུལ་སྤེལ་བ་མ་ཟད། ཕྱི་ལོ་ ༢༠༡༤ ལོར་དཔལ་ལྡན་སྲིད་སྐྱོང་མཆོག་དང་ཕྱག་སྦྲེལ་བཀའ་བློན་རྣམ་པ། དྲུང་ཆེ་རྣམ་པ་བཅས་ཀྱང་ཆེད་དུ་གཞིས་ཆགས་དང་སློབ་གྲྭ། དགོན་སྡེ་གཅིག་ཀྱང་མ་ལུས་པར་རིམ་ཕེབས་གནང་སྟེ་དབུ་མའི་ལམ་གྱི་གོ་རྟོགས་ལས་འགུལ་རྒྱ་ཁྱབ་བརྩམས་ཡོད། དེ་མཚུངས་ཕྱི་ལོ་ ༢༠༡༤ ཟླ་ ༦ ནང་རྒྱལ་སྤྱིའི་སྟེང་དབུ་མའི་ལམ་གྱི་གོ་རྟོགས་ལས་འགུལ་རྒྱ་སྐྱེད་གཏོང་རྒྱུའི་ལས་གཞི་དང་འབྲེལ་བའི་ཡིག་ཆ་ཁག་༧གོང་ས་མཆོག་གིས་དབུ་འབྱེད་གནང་བ་དང་། དབུ་མའི་ལམ་གྱི་དྲ་རྒྱ་དང་སྐར་མ་བརྒྱད་ཅན་གྱི་བརྙན་ཐུང་། ཡིག་ཆ་ཁག་བཅས་བོད་ཡིག་དང་ཨིན་ཡིག རྒྱ་ཡིག་སོགས་སྐད་རིགས་འདྲ་མིན་ཐོག་འགྲེམས་སྤེལ་གྱིས། རྒྱལ་སྤྱིའི་གྲགས་ཆེ་བའི་བརྒྱུད་ལམ་ཁག་ ༣༠ ལྷག་ཙམ་ནང་ཤུགས་ཆེ་ཐོན་ཡོད་པ་དང།  ཨ་རིའི་ཕོ་བྲང་དཀར་པོ་གཙོས་རང་དབང་སྟོབས་ཆེན་རྒྱལ་ཁབ་ཁག་གིས་དབུ་མའི་ལམ་གྱི་སྲིད་བྱུས་ལ་བསྔགས་བརྗོད་དང་རྒྱབ་སྐྱོར་སྔར་ལས་ཆེ་བ་ཐོབ་ཡོད།

བཞི་པ། བོད་རྒྱ་འབྲེལ་མོལ་གྱི་ལས་དོན་ལ་མངོན་ལྐོག་བརྒྱུད་གསུམ་ནས་ཤུགས་རྒྱག་བཞིན་པ།

བོད་རྒྱའི་དཀའ་རྙོག་སེལ་བའི་ཐབས་ལམ་བཟང་ཤོས་ནི་བོད་རྒྱའི་དབར་འབྲེལ་མོལ་གནང་རྒྱུ་དེ་ཆགས་ཀྱི་ཡོད་པར་བརྟེན། བོད་རྒྱ་འབྲེལ་མོལ་ཚོགས་ཆུང་རྒྱ་སྐྱེད་ཐོག་ཚོགས་འདུ་ཐེངས་ལྔ་འཚོགས་ཏེ་དམིགས་བསལ་སློབ་སྟོན་པ་མཁས་དབང་ཟམ་གདོང་རིན་པོ་ཆེ་གདན་ཞུ་བྱས་པ་དང་། སྔོན་དུས་དམིགས་བསལ་སྐུ་ཚབ་ཡོད་པའི་ཐོག་ནས་འབད་བརྩོན་དང་། དེང་སྐབས་མེད་པའི་ཐོག་ནས་འབད་བརྩོན་བྱེད་བཞིན་པར། རྒྱ་ནག་དབུས་གཞུང་གི་ཏང་སློབ་སྤྱི་ཚོགས་ཚན་རིག་སློབ་དཔོན་ Jin Wei ཇིན་ཝུས་ཀྱིས། བོད་རྒྱའི་དབར་གྲོས་མོལ་བསྐྱར་འཛུགས་དགོས་སྐོར་གཞུང་འབྲེལ་དུས་དེབ་དང་ས་གནས་གང་སར་གསུང་བཞིན་པ་དང་། དེ་འབྲེལ་གྱི་རྩོམ་ཡིག་རྒྱ་ནག་གི་དྲ་རྒྱ་ཁག་ལ་བཀྲམ་པ། ༢༠༡༥ ཟླ་ ༡ ཚེས་ ༢༩ ཉིན་ BBC དྲ་རྒྱའི་ཐོག་རྒྱ་ནག་གཞུང་གི་ཆེས་མཐོའི་དཔོན་རིགས་ཟུར་པ་ཞའོ་ཝོ་ལན་ Xiao Wu nan ཞུས་པ། རྡ་སར་ཕེབས་ནས་༧གོང་ས་མཆོག་དང་གནད་ཡོད་མི་སྣ་ཚོ་མཇལ་སྐོར་དང་། བོད་རྒྱའི་གནས་སྟངས་ལ་འགྱུར་བ་འགྲོ་བཞིན་ཡོད་སྐོར་བཀོད་པ། ༢༠༡༤ ཟླ་ ༨ ཚེས་ ༢༥ ཉིན་ The Hindu དྲ་རྒྱའི་ཐོག་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་གཞོན་པ་ཝུག་དབྱིང་ཇེ་ Wu Ying jie ཟེར་བས། བོད་རྒྱ་གཞུང་དབར་སྐད་ཆ་ཤོད་བཞིན་ཡོད་ཅེས་རྒྱ་གར་གྱི་གསར་འགོད་སྡེ་ཚན་ལ་བརྗོད་པ། དེ་བཞིན་ཡུ་རོབ་གནའ་འབྲེལ་ཚོགས་པའི་ཚོགས་གཙོ་ European council President Donald Tusk མཆོག་གིས། རྒྱ་ནག་གི་སྲིད་བློན་ལི་ཁེ་ཆང་Li keiqijang རྒྱལ་དོན་འཚམ་གཟིགས་ལ་ཕེབས་སྐབས། བོད་རྒྱ་འབྲེལ་མོལ་སྐོར་ཡོངས་གྲགས་གླེང་སློང་གནང་བ་དང་། ད་དུང་ཨ་རིའི་ཕྱི་སྲིད་ལས་ཁུངས་དང་ཡུ་རོབ་སོགས་སྟོབས་ལྡན་རྒྱལ་ཁབ་ཁག་ནས་བོད་རྒྱ་འབྲེལ་མོལ་དང་འབྲེལ་བོད་དོན་སྐོར་ཡོངས་གྲགས་གླེང་སློང་དང། གྲོས་ཆོད། བསྒྲགས་གཏམ་ཁག་ ༡༥ ཙམ་བཞག་ཡོད་པ།  རྣམ་ཀུན་དཔལ་ལྡན་སྲིད་སྐྱོང་མཆོག་ནས་ཕྱིའི་རྣམ་པ་ལས་ནང་གི་དོན་སྙིང་གལ་ཆེ་བ་དང་། བོད་ཕྱོགས་ནས་དུས་ཚོད་དང་ས་གནས་གང་དུའང་༧གོང་ས་མཆོག་གི་སྐུ་ཚབ་དང་རྒྱ་ནག་གཉིས་དབར་འབྲེལ་མོལ་མུ་མཐུད་ནས་བྱ་རྒྱུའི་གྲ་སྒྲིག་ཨང་སར་ཡོད་པའི་རྣམ་པ་ཐོན་བཞིན་པ་བཅས་ལས། ད་དུང་དེ་འབྲེལ་གྱི་གནད་དོན་མང་པོ་ཡོད་ངེས་དང་། ལས་དོན་འགྲུབ་པའི་རེ་བ་ཆེན་པོ་ཡོད་པ་ཟུར་བལྟས་ལེབ་མཐོང་བྱེད་ཐུབ་ཀྱི་ཡོད།

ལྔ་པ། རྒྱ་གར་གཞུང་གི་འབྲེལ་ཡོད་དབར་མཛའ་བརྩེའི་འབྲེལ་ལམ་བཙུགས་པ།

བོད་ཀྱི་གནད་དོན་ལ་གལ་འགངས་ཆེ་ཤོས་རྒྱ་གར་གཞུང་ཆགས་ཀྱི་ཡོད་པར་བརྟེན། བོད་མིའི་སྒྲིག་འཛུགས་དང་རྒྱ་གར་གཞུང་དབར་འབྲེལ་ལམ་སྲ་བརྟན་ཆགས་དགོས་པ་དེ་བས་ཀྱང་གནད་འགག་ཆགས་ཡོད་སྟབས། དཔལ་ལྡན་སྲིད་སྐྱོང་མཆོག་དང་། འབྲེལ་ཡོད་རྒྱ་གར་གཞུང་གི་ལྷན་ཁང་ཁག་གི་བློན་ཆེན་དབར་སྒེར་གྱི་མཛའ་བརྩེའི་འབྲེལ་བ་གསར་པ་ཞིག་བཙུགས་ཏེ་གསར་གཏོད་རང་བཞིན་གྱི་ལས་གཞི་མང་དག་ཅིག་སྤེལ་དང་སྤེལ་མུས་དང་། དེ་ཡང་༧གོང་ས་མཆོག་དགུང་གྲངས་ ༨༠ ཕེབས་པའི་འཁྲུངས་སྐར་སྐབས། རྒྱ་གར་དབུས་ཀྱི་བློན་ཆེན་གཉིས་རྡ་སར་ཆེད་བཅར་གནང་ཡོད་པ་དེ།  འདས་པའི་མི་ལོ་ ༥༥ ནང་བློན་ཆེན་རྡ་སའི་གཞུང་འབྲེལ་མཛད་སྒོར་ཆེད་ཕེབས་གནང་བ་ཐེངས་དང་པོ་ཆགས་ཡོད་འདུག  ད་དུང་རྒྱ་གར་གྱི་སྲིད་བློན་མཆོག་གི་དམ་འབུལ་མཛད་སྒོར་དཔལ་ལྡན་སྲིད་སྐྱོང་མཆོག་གདན་འདྲེན་ཞུས་པ་སོགས་ནི། ཆབ་སྲིད་ཀྱི་ཐོག་ནས་ཀྱང་གནད་འགག་ཆགས་ཀྱི་ཡོད། དེ་བཞིན་བོད་མི་འདུས་སྡོད་ཀྱི་ས་གནས་ལྷོ་ཕྱོགས་ཀར་ན་ཀྲ་ཀ་དང་ཨོ་རི་ས། ཨུ་ཊར་ཁཱན་། ཨུར་ན་ཅལ། ཧི་མ་ཅལ་སོགས་ཀྱི་མངའ་སྡེའི་སྤྱི་ཁྱབ་བློན་ཆེན་སོགས་མཇལ་འཕྲད་ཐེངས་མང་དང་། བོད་མི་འདུས་སྡོད་སོ་སོའི་དཀའ་ངལ་རིམ་ཞུས་ཀྱིས་གྲུབ་འབྲས་ཀྱང་འབུར་ཐོན་བྱུང་ཡོད། རྒྱ་གར་གཞུང་གིས་བོད་མིར་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་ “Tibetan Rehabilitation Policy 2014 གཏན་འབེབས། བོད་མི་རྣམས་རྒྱ་གར་དུ་གནས་སྡོད་ཆོག་པའི་ལག་ཁྱེར་ R.C ལོ་ལྔའི་དུས་ཚོད་ཕར་འགྱངས། ད་དུང་སྲིད་སྐྱོང་མཆོག་རྒྱ་གར་གྱི་མཐོ་སློབ་སོགས་སུ་མི་ཁྲི་ཚོ་འཛོམས་སར་གསུང་བཤད་གནང་བར་གདན་འདྲེན་མང་པོ་ཞུས་པ་བཅས་ནི། སྲིད་སྐྱོང་གིས་དབུ་འཁྲིད་པའི་བོད་མིའི་སྒྲིག་འཛུགས་ལ་རྒྱ་གར་གཞུང་གིས་རྒྱབ་སྐྱོར་ཚད་མཐོན་པོ་གནང་བ་ཞིག་མཚོན་ཐུབ་ཀྱི་ཡོད་ལ། ཐ་ན་རྡ་ཤོད་ནས་གངས་སྐྱིད་ཁུལ་བརྒྱུད་རྡ་སྟེང་བར་༸གོང་ས་མཆོག་ཕེབས་བཞུད་གྱི་འགྲུལ་ལམ་གཙོ་བོ་དེ་བཞིན་འབྲེལ་ཡོད་གཞུང་ལ་སྔ་གཞུག་ཐེངས་མང་ཞུས་ཏེ་ད་ཆ་ཨར་འདམ་སྤུས་ལེགས་བཏིངས་དང་འདིང་བཞིན་པ་དང། གཞུང་ལམ་དེའི་མིང་ཚུན་ཆད་ “པོ་ཏཱ་ལ་གཞུང་ལམ་” Potala Road ཞེས་མིང་བསྒྱུར་ཐོབ་སྟེ་༸གོང་ས་མཆོག་ཕེབས་ལམ་དེ་བརྒྱུད་བོད་གངས་ཅན་ཁ་བའི་ལྗོངས་སུ་ཆིབས་ཞལ་བསྒྱུར་རྒྱུའི་རྟགས་དང་རྟེན་འབྲེལ་སྒྲིག་པ་སོགས་གསར་གཏོད་དང་རྒྱ་སྐྱེད་སྣ་མང་གནང་ཡོད་པ་རེད།

དྲུག་པ། ཤེས་ཡོན་ཡར་རྒྱས་ཀྱི་ལས་གཞི་ལ་གྲུབ་འབྲས་འབུར་ཐོན་བྱུང་བ།

དཔལ་ལྡན་སྲིད་སྐྱོང་མཆོག་གིས་ཤེས་ཡོན་གྱི་ལས་གཞི་གལ་ཆེའི་ནང་གི་དོན་ཆེན་དུ་བརྩིས་ཀྱི་ཡོད་ཅེས་ཡོངས་གྲགས་གསུངས་པ་ལྟར།  དང་ཐོག་རྒྱ་གར་གཞུང་འོག་ཡོད་པའི་བོད་སློབ་ཁག་རྩིས་ལེན་གྱི་ལས་གཞི་དང་། མཁས་དབང་ཟམ་གདོང་རིན་པོ་ཆེ་མཆོག་གིས་གསར་གཏོད་གནང་བའི་ཤེས་ཡོན་སྲིད་ཇུས་ལག་བསྟར་ཚུལ་བཞིན་ཡོང་ཆེད་དུ་འགྲོ་སོང་སྔར་ལྷག་གཏོང་བཞིན་པ་མ་ཟད། ཆེད་དུ་དགེ་རྒན་འོས་སྦྱོང་ཁང་གསར་འཛུགས་གནང་སྟེ་དགེ་རྒན་ཚོར་དམིགས་བསལ་ཟབ་སྦྱོང་མཐིལ་ཕྱིན་ཕུལ་བ། ཤེས་ཡོན་ལྷན་ཚོགས་ཚགས་ཚུད་དུ་བཏང་བ། སྐུ་ངལ་འཛེམས་མེད་ཀྱིས་བོད་པའི་སློབ་གྲྭ་ཁག་ཡོངས་རྫོགས་ལ་སྐོར་སྐྱོད་ཀྱིས་རྟོགས་ཞིབ་གནང་བ་དང་། བརྩེ་བ་ཆེན་པོས་དགེ་རྒན་དང་ལས་བྱེད། ཕ་མ་སོགས་དང་མཉམ་འཛོམས་ཀྱིས་ཤེས་ཡོན་སྐོར་བསམ་ཚུལ་བསྡུ་ལེན་དང་ལམ་སྟོན་བཀའ་སློབ་གནང་བ། ཤེས་ཡོན་གྱི་ཆེད་དུ་འགྲོ་སོང་ཕོན་ཆེན་གཏོང་བཞིན་པ་བཅས་ལ་གྲུབ་འབྲས་འབུར་ཐོན་བྱུང་ཡོད། དེ་ཡང་དཔེར་མཚོན་ཙམ་དུ་ཞུས་ན། ཕྱི་ལོ་ ༢༠༡༠ ལོར་ཤེས་རིག་ལས་ཁུངས་ཀྱིས་སློབ་ཕྲུག་གྲངས་ (༡༣༠) ཙམ་ལ་སློབ་ཡོན་ཧིན་སྒོར་འབུམ་ (༩༠) ཙམ་སྤྲོད་ཀྱི་ཡོད་པ་དང་། དེང་སྐབས་སློབ་ཕྲུག་གྲངས་ (༦༠༠) ལ་སློབ་ཡོན་ཧིན་སྒོར་འབུམ་ (༤༠༠) ཙམ་གཏོང་གི་ཡོད་པའི་ཁྲོད་མི་ཉུང་བ་ཞིག་ཁྱད་ལས་པ་ཡིན་སྟབས། སློབ་མའི་གྲངས་དང་སློབ་ཡོན་སོགས་ཧ་ཅང་ཕོན་ཆེ་འཕར་ཡོད། དེ་ལ་བརྟེན་ནས་འཛིན་གྲྭ་བཅུ་གཉིས་བརྒྱ་ཆ་ (༧༥) ལྷག་ཐོན་མཁན་ལ་མཚོན་ན། ཕྱི་ལོ་ ༢༠༡༠ ལོར་སློབ་ཕྲུག་གྲངས་ (༡༢༧) དང་། ཕྱི་ལོ་ ༢༠༡༤ ལོར་སློབ་ཕྲུག་གྲངས་ (༣༢༡) ཆགས་ཡོད་པ་དང་། ཕྱི་ལོ་ ༢༠༡༥ ལོར་སློབ་ཕྲུག་གྲངས་ (༤༤༣) ཆགས་ཡོད། ད་དུང་ཕྱི་ལོ་ ༢༠༡༣ དང་ ༢༠༡༥ ལོར་བརྒྱ་ཆ་ ༩༥ སོན་ནས་སྲིད་སྐྱོང་སློབ་ཡོན་རག་མཁན་ཡང་བྱུང་ཡོད། ལས་གཞི་དེ་དག་ལ་བརྟེན་ནས། ཕྱི་ལོ་ ༢༠༡༥ ཟླ་ ༦ པར་རྡ་སྟེང་བོད་ཁྱིམ་དུ་༧གོང་ས་མཆོག་གིས་ནང་ཆོས་ངོ་སྤྲོད་བཀའ་དྲིན་སྩལ་སྐབས། “འདས་པའི་ལོ་མང་པོའི་རིང་ཤེས་ཡོན་འཐུས་ཤོར་སོང་ཡོད་ཀྱང་། དེང་སྐབས་ཡར་རྒྱས་འགྲོ་གི་འདུག་པས། ཤེས་རིག་ལས་ཁུངས་ཀྱི་ལས་བྱེད་ཚོས་ཧུར་ཐག་བྱོས་” ཞེས་བཀའ་བཟང་ཕེབས་ཡོད་པ་ནི་ཚང་མས་མཁྱེན་གསལ་ལྟར་དང་། ད་དུང་ཡང་ཡར་རྒྱས་ལ་ཚད་མེད་པས་ཤེས་ཡོན་མཐོར་འདེགས་ཀྱི་གོ་སྐབས་འདི་མ་ཤོར་བ་བྱེད་དགོས།

བདུན་པ། དཔལ་འབྱོར་འདུ་འགོད་ཐད་ལྡབ་འགྱུར་གྱི་གྲུབ་འབྲས་ལེགས་ཐོན་བྱུང་བ།

བོད་པའི་རྩ་དོན་གྱི་ཆེད་དུ་ལས་གཞི་གང་སྤེལ་ཡང་དཔལ་འབྱོར་གྱི་གནས་བབ་ཡག་པོ་དགོས་པ་དང་། སྔོན་དུས་ཕྱི་ལོ་ ༡༩༩༩ ནས་ལོ་ ༡༥ ཙམ་གྱི་རིང་ལ། བོད་མིའི་སྒྲིག་འཛུགས་ཀྱི་ལོ་གཅིག་གི་འགྲོ་སོང་ཧིན་སྒོར་ས་ཡ་ (༡༠༠༠) ཡས་མས་ཡིན་པ་དང་། ཕྱི་ལོ་ ༢༠༡༥ ལོར་ས་ཡ་ (༢༠༠༠) བརྒལ་ཡོད་པ་དེ་དཔལ་འབྱོར་འདུ་འགོད་ལྡབ་འགྱུར་གྱི་འཕར་ཡོད་པ་མ་ཟད། ཨ་རིའི་གྲོས་ཚོགས་བརྒྱུད་ནས་རྒྱ་བལ་འབྲུག་གསུམ་གྱི་བོད་མིའི་ཆེད་དུ་སྔོན་དུ་ཨ་སྒོར་ས་ཡ་( ༢ ) ཙམ་ལས་མེད་ཀྱང་། ད་ཆ་ལོ་རེར་ས་ཡ་ ( ༧ ) ཙམ་འཕར་ཡོད་འདུག  ཁེ་ན་ཌ་ནས་ཁེ་སྒོར་ས་ཡ་ ( ༢ ) དང་ཡུ་རོབ་ནས་ཡུ་སྒོར་ས་ཡ་( ༡ ) ། དེ་དང་འབྲེལ་བའི་གཞན་རྒྱལ་ཁབ་ཁག་ནས་རོགས་དངུལ་འདྲ་མིན་འཚོལ་ཐབས་གནང་ཐུབ་པ་དེ། ཆབ་སྲིད་ཐོག་ནས་ཀྱང་གནད་འགག་ཆགས་ཀྱི་ཡོད། དེ་དག་གཏོང་ས་གཙོ་བོ་ནི། ཤེས་ཡོན་སློབ་གསོ་དང་། གཞིས་ཆགས་སྲ་བརྟན། ཆབ་སྲིད་ཀྱི་གོ་རྟོགས་ལས་གཞི། ཆོས་རིག་གཞུང་དང་སྐད་ཡིག་ཡར་རྒྱས། ཚོང་རིགས་ལས་གཞི། སུད་ཚོང་པ། དགེ་རྒན་དང་ལས་བྱེད་ཀྱི་ཕོག རྒས་ཕོག་སྤར་བ། གངས་སྐྱིད་ཚོགས་ཁང་དང་ལས་ཁུངས་རྒྱ་སྐྱེད་དང་ལེགས་བཅོས། འཕྲུལ་ལས་ཡར་རྒྱས།  རྩེད་རིགས་རྒྱ་སྐྱེད་སོགས་གནང་ཡོད། ད་དུང་ཨ་རིའི་དོན་གཅོད་རྒྱལ་ས་ཝ་ཤིན་ཊོན་དུ་གནས་སྤོས་ཀྱིས་ཨ་སྒོར་ས་ཡ་ (༢ ) ལྷག་གིས་དོན་གཅོད་ཁང་གསར་ཉོ། ཉི་ཧོང་དོན་གཅོད་ཁང་ཀྱང་ཨ་སྒོ་ས་ཡ་( ༡ ) ལྷག་ཙམ་གྱིས་གསར་ཉོ་གནང་ཡོད་པ་ཡོངས་གྲགས་དང་། ད་དུང་ཡང་དཔལ་འབྱོར་གྱི་གནས་སྟངས་ཇི་ཙམ་བཟང་པོ་ཡོད་ན་དེའི་ཚོད་ཀྱིས་ལས་གཞི་མང་པོ་ལག་བསྟར་ཐུབ་ངེས་དང་། དེང་སྐབས་ལས་གཞི་མང་པོ་གསར་གཏོད་དང་ལག་བསྟར་བྱེད་བཞིན་པའང་འདི་ལ་བརྟེན་ནས་ཡོང་གི་ཡོད། དཔལ་འབྱོར་འདུ་འགོད་དེ་ཡང་མི་དང་མིའི་དབར་གྱི་འབྲེལ་བ་ལ་ཤིན་ཏུ་རག་ལས་པས། མ་འོངས་པར་དཔལ་འབྱོར་གྱི་གནས་སྟངས་སྡུག་ཏུ་མི་འགྲོ་བ་དང་། ད་དུང་མུ་མཐུད་ནས་ཡར་རྒྱས་འགྲོ་བར་བསམ་བློ་ངེས་པར་དུ་གཏོང་དགོས།

བརྒྱད་པ། གཞིས་ཆགས་སྲ་བརྟན་གྱི་ལས་གཞི་སྣ་མང་སྤེལ་བ།

 དཔལ་ལྡན་སྲིད་སྐྱོང་མཆོག་གིས། གཞིས་ཆགས་དང་གཞིས་མི་སྲ་བརྟན་ཆགས་པ་ལ་དང་པོ་གཞིས་ས་སྲ་བརྟན་དགོས་ཞེས་སྲིད་བྱུས་ཟིན་པ་ལྟར། རྒྱ་གར་གཞུང་གིས་བོད་མིར་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་ “Tibetan Rehabilitation Policy 2014 ཞེས་པ་གཏན་འབེབས་གནང་བ་དེ་མངའ་སྡེ་ཁག་གིས་རིམ་གྱིས་ལག་བསྟར་གནང་འཆར་དང་།  གཞིས་ཆགས་དང་ཁ་འཐོར་བོད་མི་ཚོའི་ས་ཆ་ཁྲིམས་མཐུན་མིན་པ་ཁག་ཁྲིམས་མཐུན་གྱི་ཡིག་ཆ་བཟོས་པ། ས་ཆ་རྣམས་བོད་མིར་བདག་དབང་ཆ་ཚང་ཡོང་ཐབས་གནང་བཞིན་པ། སྲོལ་རྒྱུན་དང་རྫས་ལུད་གཉིས་ཀ་འདེབས་མཁན་ལ་བུན་གཡར་གྱི་ལས་གཞི། གཞོན་སྐྱེས་ཚོང་ལས་གསར་པར་བུན་གཡར་གྱི་ལས་གཞི། དེ་སྔ་ལྡི་ལི་བོད་སྒར་བསམ་ཡས་གླིང་གནས་སྤོ་དགོས་པའི་དཀའ་ངལ་དེ། ད་ལྟའི་ཆར་ཨ་རུ་ནཱ་གྷར་ཞེས་མིང་བསྒྱུར་གནང་སྟེ་ལྷིང་འཇགས་ཆགས་དང་དཀའ་ངལ་གང་འཚམས་སེལ་ཐུབ་ཡོད།  དྷ་རམ་ས་ལའི་ཁུལ་ཁྱིམ་ཚང་ ༢༡༠ དང་། སིམ་ལ་དང་མཚོ་པདྨ་ཁུལ་ཁྱིམ་ཚང་ཁག་ཅིག་གི་དཀའ་ངལ་ཞུ་གཏུགས་མང་པོ་བྱས་མཐར། ཧིལ་མ་ཅལ་མངའ་སྡེ་གཞུང་ནས་ ༢༠༡༤ ལོའི་རྒྱ་གར་གཞུང་གི་གཏན་འབེབས་བྱས་པ་གཞིར་བཟུང་མངའ་སྡེ་རང་ནས་བོད་པའི་ཆེད་དུ་སྲིད་ཇུས་ཤིག་གཏན་འབེབས་བཟོས་ཟིན་པ་དང།  ཤིང་ནགས་ཀྱི་ས་ཆའི་རྩོད་རྙོག་ནང་ལྷུང་བཞིན་པ་རྣམས་ཀྱི་དཀའ་ངལ་གཙང་སེལ་ཞུ་ཐབས། འདས་པའི་མི་ལོ་བཞི་ཙམ་རིང་དཔལ་ལྡན་སྲིད་སྐྱོང་མཆོག་གིས་གཞིས་ཆགས་ཁག་དང་སློབ་གྲྭ་ཁག་ཡོངས་རྫོགས་བསྐོར་བསྐྱོད་ཟིན་པ་མ་ཟད། ལ་དྭགས་སོགས་གཞིས་ཆགས་ཐག་རིང་དང་། དཀའ་ངལ་ཅན་གྱི་ས་ཁུལ་ཁག་ལ་ཆིབས་སྒྱུར་ཐེངས་མང་གནང་སྟེ་མང་ཚོགས་ཀྱི་དཀའ་སྡུག་རྒྱུས་ལོན་དང་དཀའ་སེལ་སྣ་མང་གནང་ཡོད།
    དེ་ག་ནང་བཞིན་དཔལ་ལྡན་སྲིད་སྐྱོང་མཆོག་ནས་རྒྱ་བལ་འབྲུག་གསུམ་ཕུད་ཕྱི་རྒྱལ་ཡུལ་གྲུ་གཞན་ཁག་ཏུ་གནས་སྡོད་བོད་མི་རྣམས་བོད་མིའི་སྒྲིག་འཛུགས་དང། གཞིས་ཆགས་ཁག་དབར་རྒྱུན་གནས་སྲ་བརྟན་གྱི་འབྲེལ་ལམ་འཛུགས་ཆེད། རྒྱལ་ཁབ་གཞན་ཁག་ཏུ་གནས་སྡོད་བོད་མི་དང་གཞིས་ཆགས་དབར་གཅེན་གཅུང་སྤུན་སྲིང་གི་འབྲེལ་བ་གསར་གཏོད་གནང་བ་དང། དང་ཞབས་ཀྱི་ངོ་བོ་ཐོག་ནས་བོད་མི་ཁྱད་ལས་པ་དང་མཁས་དབང་གང་ཡང་རུང་བ་བོད་མིའི་སྒྲིག་འཛུགས་གཞུང་གི་ལྷན་ཁང་ཁག་ཏུ་ཞབས་ཞུ་དང་ཉམས་མྱོང་སྤེལ་རེས་ཀྱི་སྲིད་བྱུས་ཟིན་པ། ཁོང་རྣམ་པའི་དང་བླངས་དཔྱ་དངུལ་ལག་དེབ་གསར་བཟོ་དང་ནོར་བཅོས་གཏོང་ཐབས་སྐོར་སྟབས་བདེ་རུ་བཏང་བ། བོད་ཀྱི་བརྙན་འཕྲིན་དྲ་བ་ Tibet Onling TV དང། བོད་མིའི་སྒྲིག་འཛུགས་ཀྱི་དྲ་རྒྱ་ Tibet.net བརྒྱུད་དེ་འཛམ་གླིང་ཡུལ་གྲུ་གང་སར་གནས་པའི་བོད་མི་རྣམས་ཀྱིས་ཐད་ཀར་བོད་མིའི་སྒྲིག་འཛུགས་ཀྱི་སྲིད་བྱུས་དང་གནས་སྟངས་ཁག་ཤེས་རྟོགས་ཐུབ་པ་བཟོས་པ་སོགས། མདོར་ན་སོ་སོར་ཤེས་འཇོན་ཡོད་ན་ས་གནས་གང་དུ་གནས་རུང་ཁ་ཕྱོགས་བོད་མིའི་སྒྲིག་འཛུགས་གཞུང་དང་གཞིས་ཆགས་ཁག་ལ་བསྐོར་ཆོག་པའི་ལམ་ཁ་གསར་པ་ཞིག་གཏོད་ཡོད་སྟབས་སྤྱི་སྒེར་ཚང་མར་ཕན་ཐོགས་ཆེན་པོ་བྱུང་བ་མ་ཟད། ཆབ་སྲིད་ཐད་ནས་བཤད་ཀྱང་གནད་འགག་ཆེན་པོ་ཞིག་ཆགས་ཡོད།

    དེ་མཚུངས་སྤྱི་ཚོགས་ཡར་རྒྱས་ཡོང་བའི་འགག་རྩ་གཙོ་བོ་ཞིག་ནི་མི་མང་གི་འཕྲོད་བསྟེན་ལ་རག་ལས་པས། མི་དམངས་ཀྱི་འཕྲོད་བསྟེན་ཉེན་སྲུང་ཡོང་ཐབས་སུ་སྨན་བཅོས་ལྟ་སྐྱོང་གི་ལས་གཞི་ལ་འགྲོ་གྲོན་ཕོན་ཆེན་བཏང་པ་དང་། དེ་དག་གཙོ་བོ་འཚོ་ཐབས་སྐྱོ་པོ་དང་ཉམ་ཐག་རིགས་ལ་དམིགས་ཏེ། ལོ་སྔོན་མ་འདིའི་ནང་འཛུལ་ཞུགས་བྱེད་མཁན་མི་གྲངས་ (༡༠༠༠༠ ) ཙམ་ལས་མེད་ཀྱང། ད་ལྟ་མི་གྲངས་ ( ༢༠༠༠༠ ) ལས་བརྒལ་ཟིན་པ་དང། ལོ་ལྔའི་ནང་མི་གྲངས་ ( ༥༠༠༠༠ ) ཆགས་ཐུབ་རྒྱུའི་དམིགས་ཚད་ཟིན་ཏེ་བཙན་བྱོལ་བོད་མིའི་ཁྲོད་འཚོ་ཐབས་སྐྱོ་པོ་དང་ཉམ་ཐག དཔལ་འབྱོར་འབྲིང་བའི་མི་དམངས་མང་ཆེ་བའི་དཀའ་ངལ་སེལ་ཐུབ་རྒྱུའི་སྲིད་བྱུས་ཟིན་འདུག་པ་མ་ཟད། ད་དུང་བོད་པའི་སྤྱི་ཚོགས་སུ་ཕྲུ་གུ་གསུམ་ལས་མང་བ་སྐྱེས་ན་བོད་མིའི་སྒྲིག་འཛུགས་ཀྱི་དམིགས་བསལ་ལྟ་སྐྱོང་གི་ལས་གཞི་དང་། མ་དང་བྱིས་པའི་འཕྲོད་བསྟེན་གོ་རྟོགས་གཙོས་འགོས་ནད་འདྲ་མིན་དང། མྱོས་རྫས་ངན་གོམས་སོགས་སྔོན་འགོག་གི་ལས་གཞི་རྒྱ་ཁྱབ་ཏུ་བརྩམས་ཡོད་པ་མ་ཟད། སྔོན་ཆད་ ༢༠༡༢ ལོར་བོད་མིའི་སྒྲིག་འཛུགས་ཁྱབ་ཁོངས་འཕྲོད་བསྟེན་སྨན་ཁང་ཁག་ཏུ་སྨན་པ་ ༧ ལས་མེད་ཀྱང། ད་ལྟ་སྨན་པ་ ༡༦ ཙམ་ཡོད་པ། དེ་བཞིན་སྨན་ཞབས་པ་ ༡༠༠ ལྷག་ཡོད་པ་དེ་དག་གིས་བོད་པའི་སྨན་ཁང་འདྲ་མིན་ནང་ཕྱག་ལས་གནང་བཞིན་ཡོད་འདུག དམིགས་བསལ་ ༢༠༡༤ ལོར་འཕྲོད་བསྟེན་ལ་སྨན་པའི་ཕྱིའི་རོགས་དངུལ་ཨ་སྒོར་ས་ཡ་ ༣ ལྷག་ཐབས་འཚོལ་བྱུང་སྟེ་འཕྲོད་བསྟེན་གྱི་ལས་འཆར་འདྲ་མིན་ཐོག་བཏང་དང་གཏོང་འཆར་ཡོད་འདུག

དགུ་པ། བོད་ནས་གསར་དུ་ཕེབས་མཁན་ཚོར་མཐུན་རྐྱེན་ལེགས་སྐྲུན་གྱི་སྲིད་བྱུས་ཟིན་པ།

བོད་ནས་གསར་དུ་ཕེབས་མཁན་མང་པོ་ཞིག་དེང་སྐབས་བོད་མི་འདུས་སྡོད་ཆེ་སའི་གཞིས་ཆགས་ཁག་སོགས་སུ་བཞུགས་ཀྱི་ཡོད་པ་དང་། དེ་དག་གི་དཀའ་ངལ་སེལ་ཐབས་དང་མཐུན་རྐྱེན་ལེགས་སྐྲུན་གྱི་ལས་གཞི།  དཔེར་ན། སྦིར་ཅོན་ཏ་ར་གནས་སྡོད་བོད་ནས་གསར་ཕེབས་ནང་མི་ ༧༣ ལ་གཞིས་ས་གསར་ཉོ་དང་སྡོད་ཁང་གསར་རྒྱག་གི་ལས་གཞི། སྦེལ་ཀོབ་དང་མོན་གྷོ་གཉིས་སུ་གནས་སྡོད་བོད་ནས་གསར་ཕེབས་ཚོར་གཞིས་ས་མཁོ་སྤྲོད་ཀྱི་ལས་གཞི་ལག་བསྟར། ཆབ་སྲིད་བཙོན་ཟུར་ཚོར་སྡོད་ཤག་གསར་རྒྱག  བཙོན་ཟུར་དང་འབྲེལ་ཡོད་འབྲེལ་ཆགས་རྣམས་ཀྱི་འཚོ་སྣོན་ལྡབ་འགྱུར་སྤར་བ། དུས་གཅིག་ལ་ཆབ་སྲིད་བཙོན་ཟུར་ཕོན་ཆེན་ཨོ་སི་ཁྲིར་ཡ་ལ་བཏང་པ་སོགས་ལས་གཞི་ལག་བསྟར་བྱེད་བཞིན་པ། ཤེས་རབ་དགའ་ཚལ་སློབ་གླིང་གི་ཡུན་ཚད་ལོ་ ༥ ནས་ ༨ བར་སྤར་བ་དང།  དེའི་ནང་འཚེམ་ལས་སོགས་ལག་ཤེས་ཀྱི་རིགས་དང་གློག་ཀླད་སྦྱང་ས་རྒྱ་བསྐྱེད་བཏང་བ། སློབ་སྦྱོང་མུ་མཐུད་ནས་བྱེད་མཁན་ཁྲོད་ནས་འཛིན་གྲྭ་ ༡༢ ལ་འགྲོ་མཁན་སློབ་ཕྲུག་གྲངས་ ༡༢ དང། འཛིན་གྲྭ་ ༡༢ ཐོན་མཁན་སློབ་ཕྲུག་གྲངས་ ༤ བྱུང་ཡོད་པ་མཐོ་སློབ་ཏུ་འགྲིམ་བཞིན་པ། རྗེས་ལོར་འཛིན་གྲྭ་བཅུ་གཉིས་ཐོན་མཁན་གྲངས་ ༡༠ ཡོད་པ་བཅས། དེ་དག་ལ་མཐོ་སློབ་དང་མ་འོངས་པར་མཐོ་སློབ་འགྲིམས་མཁན་ཚོར་སློབ་ཡོན་ཆ་ཚང་འབུལ་འཆར་ཡོད་འདུག་པ་མ་ཟད། དགོན་སྡེ་གྲྭ་ཚང་དང་སྦིར་སུ་ཇ་སོགས་ནས་ས་ཆུ་མ་འཕྲོད་པའམ་འཕྲོད་བསྟེན་རྐྱེན་གྱིས་ཕྱིར་དོན་དགོས་པ་དཀའ་ངལ་ཅན་རྣམས་ལ་མཐུན་རྐྱེན་གོ་སྐབས་གཉིས་པ་འབུལ་རྒྱུའི་སྲིད་བྱུས་ལག་བསྟར་དོན་འཁེལ་བྱེད་པ་སོགས། མདོར་ན་བོད་ནས་གསར་ཕེབས་རྣམས་ལ་བདག་སྐྱོར་རོགས་རམ་སྔ་ལས་ལྷག་པ་གནང་ཡོད།

བཅུ་པ། གལ་གནད་ཆེ་བའི་སྐུ་ཕྱཱའི་ལས་དོན་དང་། ཆོས་དང་རིག་གཞུང་དང་འབྲེལ་བའི་ལས་གཞི་རྒྱ་ཆེ་སྤེལ་བ།

བོད་ཀྱི་བླ་ན་མེད་པའི་དབུ་ཁྲིད་༧གོང་ས་སྐྱབས་མགོན་ཆེན་པོ་མཆོག་གི་སྐུ་ཕྱཱའི་ལས་དོན་ནི་སྐབས་བཅུ་བཞི་པའི་བཀའ་ཤག་གི་ལས་དོན་ཡོངས་རྫོགས་ཀྱི་གནད་འགག་མཐོ་ཤོས་ལ་ངོས་འཛིན་གནང་སྟེ། རྒྱ་གར་གཞུང་དང་འབྲེལ་ལམ་དམ་ཟབ་ཐོག་མི་དང་འཕྲུལ་ལས་གཉིས་ཆ་ཡར་རྒྱས་བཏང་ཡོད་པ་དང། རྒྱལ་ཁབ་གང་དུ་ཆིབས་སྒྱུར་གནང་ཡང་ཡུལ་དེ་དང་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་དབར་འབྲེལ་བ་དམ་ཟབ་ཚགས་ཚུད་ཡོང་བཞིན་པ། སྐུའི་ཞབས་རིམ་གསོག་སྒྲུབ་ཀྱི་ལས་གཞི་རྒྱ་ཆེ་ཞུས་པ་སོགས་མདོར་ན་སྐུ་ཕྱྭའི་ལས་དོན་དེ་བཞིན་ལས་དོན་གལ་འགངས་ཆེ་ཤོས་སུ་རྩིས་ཏེ་ཕྱི་ནང་གི་རྐྱེན་དང་བར་ཆད་ཕྲ་མོ་ཙམ་ཡང་མི་ཡོང་བའི་ལས་དོན་བསྒྲུབས་དང་སྒྲུབ་མུས་ཡིན་པ་ཚང་མས་མཁྱེན་གསལ་ལྟར་ལས། བོད་མིའི་སྒྲིག་འཛུགས་ཀྱི་བདེ་སྲུང་ལས་དོན་མང་དག་ཅིག་གསང་རྒྱ་ཅན་ཡིན་པས་ད་དུང་དེ་བས་ཚད་མཐོ་བའི་ལས་དོན་བཀོད་སྒྲིག་ཞུ་བཞིན་ཡོད་པ་ནི་ཚང་མས་སྤོབས་ཐུབ་པ་ཞིག་རེད། དམིགས་བསལ་དོལ་རྒྱལ་བསྟེན་སྲོལ་བྱེད་མཁན་ཉུང་ཤས་ཤིག་གིས་༧གོང་ས་སྐྱབས་མགོན་ཆེན་པོ་མཆོག རྒྱལ་ཁབ་གང་དུ་ཆིབས་སྒྱུར་གནང་ཡང་གཞི་མེད་ཀྱི་སྐྱོན་འཛུགས་དང་ངོ་རྒོལ་གྱི་ལས་འགུལ་སྤེལ་བཞིན་པར། སྲིད་སྐྱོང་གིས་དབུ་འཁྲིད་པའི་བཀའ་ཤག་གིས་ངོ་རྒོལ་མཐའ་གཅིག་ཏུ་བྱས་དང་བྱེད་བཞིན་པའང་མཐོང་གསལ་ཡིན།
    བཀའ་ཤག་སྐབས་ ༡༤ པས་ ༢༠༡༤ ལོ་དེ་བཞིན་༧གོང་ས་སྐུ་ཕྲེང་ ༡༤ པའི་བཀའ་དྲིན་རྗེས་དྲན་གྱི་ལོར་གཏན་འབེབས་གནང་སྟེ་ལོ་འཁོར་མོ་གཅིག་རིང་དམིགས་བསལ་དགེ་སྒྲུབ་སྡིག་སྤོང་སོགས་ཀྱི་ལས་གཞི་སྤེལ་བ་དང་། རིས་མེད་ཆོས་རྒྱུད་ཁག་གི་བགྲོ་གླེང་ཚོགས་འདུ། དགེ་བཤེས་མའི་རྒྱུགས་སྤྲོད། གཞུང་ཆེན་རིག་གཅིག་རྐང་འཛིན་གྱི་ལས་གཞི། ཟློས་གར་དང་བོད་ཀྱི་འཁྲབ་གཞུང་སྒྱུ་རྩལ། ས་གནས་ལྷ་མོའི་རུ་ཁག་ལ་མཐུན་རྐྱེན་སྦྱར་བ། ལྷག་དོན་ཕྱི་ལོ་ ༢༠༡༥ ལོར་བོད་གཞུང་མང་གཉིས་ནས་༧སྐུའི་གྱ་སྟོན་སྲུང་བརྩིའི་བརྟན་བཞུགས་བསྟར་འབུལ་ཞུས་སྐབས། ༧གོང་ས་སྐྱབས་མགོན་ཆེན་པོ་མཆོག་གིས་དགུང་གྲངས་ ༡༡༣ བཞུགས་རྒྱུའི་ཞལ་བཞེས་སླར་ཡང་གནང་སྟེ་དགུང་ལོ་ ༩༠ ཕེབས་པའི་གོ་སྟོན་གྲ་སྒྲིག་བྱེད་ཤོག་ཅེས་བཀའ་བཟང་ཕེབས་པ་དེས། བོད་ཕྱི་ནང་གཉིས་སུ་བཞུགས་པའི་བོད་མི་ཚོར་དགའ་བ་བརྗོད་ཀྱིས་མི་ལང་བ་བྱུང་ཡོད་པ་བཅས།
    མདོར་ན་འབུམ་རམས་པ་མཁས་དབང་བློ་བཟང་སེང་གེ་མཆོག་གིས་བོད་ཀྱི་སྲིད་སྐྱོང་གི་འགན་དབང་བཞེས་ནས་མི་ལོ་ཧྲིལ་པོ་བཞི་འཁོར་བའི་དུས་ཡུན་རིང། གཞན་ཡུལ་དུ་ལས་དོན་མང་པོ་ཞིག་གཞན་དབང་སྟབས་བསྟུན་ཡིན་རུང་། ཁོང་གི་ཕྱག་སྦྲེལ་བཀའ་བློན་རྣམ་པ་དང་སྲི་ཞུ་བ་ཚོའི་ལྷག་བསམ་རྣམ་དག་གི་རོགས་འདེགས་བཅས་ལ་བརྟེན་ནས། གོང་བཀོད་འབུར་དུ་ཐོན་པའི་གྲུབ་འབྲས་ཆེན་པོ་བཅུ་ཐོན་ཡོད་པ་རྒྱ་ཆེའི་མི་མང་གིས་མཁྱེན་རྟོགས་ཆེད་དུ་སྤེལ་ཡོད་ན། དེ་ལྟ་བུའི་ཤེས་འཇོན་ལྷག་བསམ་གསུམ་ལྡན་ཅན་གྱི་ན་གཞོན་ཕུལ་བྱུང་ཅན་ཞིག་བསྐྱར་དུ་བོད་ཀྱི་སྲིད་སྐྱོང་ལ་འོས་ཤོག་འཕང་དགོས་མིན་ཚང་མས་དཔྱད་ཞིབ་ནན་པོ་གནང་སྟེ་ཐག་གཅོད་གནང་རོགས་ཞེས་འབོད་སྐུལ་སྙིང་ཐག་པ་ནས་ཞུ་གི་ཡོད། ཅེས་ << མི་དམངས་ཀྱི་སྲིད་སྐྱོང་བློ་བཟང་སེང་གེར་རྒྱབ་སྐྱོར་ཚོགས་པ་>> ནས། ཕྱི་ལོ་ ༢༠༡༥ ཟླ་ ༨ ཚེས་ ༡༠ ཉིན་སྤེལ་བ་དགེའོ།།
           
(གོང་འཁོད་གནད་དོན་རྣམས། བོད་མིའི་སྒྲིག་འཛུགས་ཀྱི་དྲ་རྒྱ་དང་། གྲོས་ཚོགས་ཀྱི་འོད་སྡེར་དང་བརྙན་འཕྲིན་ཁག  ཕ་ཡུལ་དྲ་རྒྱ། བོད་སྐད་རླུང་འཕྲིན་དང་བརྙན་འཕྲིན་ཁག་གི་དྲ་རྒྱ། དགའ་ལྡན་ཕོ་བྲང་གི་དྲ་རྒྱ། བོད་ཀྱི་དུས་བབ་དང་བང་ཆེན་གྱི་དྲ་རྒྱ་དང་ཚགས་ཤོག བོད་ཡིག་ཐོག་ཡོད་པའི་དུས་དེབ་ཁག རྒྱལ་སྤྱིའི་བརྒྱུད་ལམ་ཆེ་ཁག་བཅས་ལ་ཞིབ་འཇུག་གིས་བཤུས་སྒྲིག་བྱས།)