ཡུ་རོབ་སྤྱི་འཐུས་གཉིས་ཆོལ་ཁ་ཆོས་ལུགས་ཐུན་མོང་གི་སྤྱི་འཐུས་ཡིན།

“ད་ལྟ་སྲིད་སྐྱོང་འོས་མིར་ལངས་མཁན་ ༥ བྱུང་ཡོད་པ་དག་ལ་སྡོམ་ཚིག་ཅིག་བཀོད་པ་ཡིན་ན། འུལ་ཤོབ་ཤོད་མཁན་གྱི་རྒྱལ་བློན་རྣམ་པ་གཉིས་དང་། ཉམས་མྱོང་དང་འཇོན་ཐང་ངོམ་མཁན་གྱི་དཔའ་རྒོལ་རྣམ་པ་གཉིས། རྟེན་འབྲེལ་བརྩི་བའི་རྒད་པོ་གླེན་པ་གཅིག་བཅས་རེད།” ཟེར།

གཟའ་ཉི་མའི་ཉིན་རྒྱབ་ཆུ་ཚོད་ ༣།༠༠ སྟེང་། བོད་ཀྱི་དུས་བབ་གསར་ཁང་གི་གོ་སྒྲིག་འོག ཧྥ་རན་སིའི་རྒྱལ་ས་ཕ་རི་སིའི་རིགས་པ་ཆོས་ཚོགས་ཀྱི་ཚོགས་ཁང་དུ།༼ཡུ་རོབ་སྤྱི་འཐུས་དང་སྲིད་སྐྱོང་སྐོར་ལ་བགྲོ་གླེང་།༽ཞེས་པའི་བགྲོ་གླེང་གཏམ་བཤད་ཅིག་ཚོགས་ཡོད་པ་དང་། གཏམ་བཤད་གནང་མཁན་ཧྥ་རན་སིར་བཅའ་སྡོད་བོད་ཀྱི་སྐུ་ཚབ་དོན་གཅོད་འབྲེལ་མཐུད་པ་ཚེ་རིང་དོན་གྲུབ་ལགས་དང་། ཧྥ་རན་སི་བོད་རིགས་ཚོགས་པའི་ཚོགས་གཙོ་ངག་དབང་བསྟན་པ་ལགས། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་སྐྱེས་ལས་རྣམ་གྲོལ་ལགས། བོད་རང་བཙན་སློབ་ཕྲུག་ཚོགས་པའི་ཚོགས་གཙོ་དོན་གྲུབ་ཕུན་ཚོགས་ལགས། ཆུ་བཞི་སྒང་དྲུག་ཚོགས་པའི་ཚོགས་གཙོ་གངས་སེང་བསྟན་འཛིན་ལགས། དེ་བཞིན། པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཙོ་སྤྱི་ཟུར་ཆབ་བྲག་ལྷ་མོ་སྐྱབས་ལགས་བཅས་རེད།

བགྲོ་གླེང་དབུ་འཛུགས་སྟེང་བོད་ཀྱི་དུས་བབ་གསར་ཁང་གི་ས་གནས་གསར་འགོད་པ་ཟླ་བ་ཚེ་རིང་ལགས་ཀྱིས་ངོ་སྤྲོད་གནང་བར། ཐེངས་འདིར་བོད་ཀྱི་དུས་བབ་གསར་ཁང་གི་དབུས་ལས་ཁུངས་ནས་རྩོམ་སྒྲིག་པ་དོན་འགྲུབ་བཀྲ་ཤིས་ལགས་དང་འགྲེམ་སྤེལ་བ་བློ་བཟང་དབང་ཕྱུགས་ལགས་རྣམ་གཉིས་ཆེད་དུ་ཡུ་རོབ་རྒྱལ་ཁབ་ཁག་ཅིག་ནང་སྐོར་སྐྱོད་གནང་གི་ཡོད་པ་དང་། དེ་ནི་ད་ལྟའི་ཆར་ཡུ་རོབ་ནང་བོད་པ་ཇེ་མང་དུ་འགྲོ་བཞིན་ཡོད་པ་དང་། ཡུ་རོབ་ནང་བོད་པའི་ཆབ་སྲིད་ལས་འགུལ་ཡང་ཤུགས་ཆེ་རུ་འགྲོ་བཞིན་ཡོད་པ། དེ་བཞིན་བཀའ་ཤག་སྐབས་ ༡༥ པའི་སྲིད་སྐྱོང་དང་། སྐབས་ ༡༦ པའི་བོད་མི་མང་སྤྱི་འཐུས་འོས་བསྡུ་བསླེབ་ལ་ཉེ་བ་སོགས་ལ་བརྟེན་ཏེ། ཡུ་རོབ་བོད་མིའི་སྤྱི་ཚོགས་སྐོར་ལ་རྒྱུས་ལོན་དང་དུས་བབ་ཚགས་པར་འགྲེམ་སྤེལ་བཅས་ཀྱི་ཆེད་ཡིན་སྐོར་སོགས་ངོ་སྤྲོད་གནང་།

བགྲོ་གླེང་གི་ཐོག་མར་བོད་པའི་སྐུ་ཚབ་དོན་གཅོད་འབྲེལ་མཐུད་པ་ཚེ་རིང་དོན་གྲུབ་ལགས་ཀྱིས་༼བོད་མི་མང་སྤྱི་འཐུས་སྐབས་ ༡༦ དང་བཀའ་ཤག་སྐབས་ ༡༥ པའི་འོས་བསྡུ་ཆེན་མོར་ཡུ་རོབ་མི་མང་གིས་འགན་འཁུར་ལེན་ཕྱོགས།༽ཞེས་པའི་བརྗོད་གཞིའི་ཐོག་གཏམ་བཤད་གནང་དོན། བོད་ཀྱི་དུས་བབ་གསར་ཁང་གིས་འདི་ལྟ་བུའི་བགྲོ་གླེང་ཞིག་གོ་སྒྲིག་གནང་བ་དེ་ཧ་ཅང་སྐབས་སུ་བབ་པ་ཞིག་ཆགས་འདུག་སྟབས་ཐུགས་རྗེ་ཆེ་ཞུ་རྒྱུ་ཡིན། བོད་ཀྱི་དུས་བབ་ལ་མཚོན་ན་བཙན་བྱོལ་བོད་མིའི་སྤྱི་ཚོགས་ནང་གི་གསར་ཁང་ཧ་ཅང་གལ་ཆེན་པོ་ཞིག་ཆགས་ཀྱི་ཡོད་པ་རེད། ད་དུང་ཁོ་རང་ཚོ་ཡུ་རོབ་རྒྱལ་ཁབ་གཞན་ཁག་ཅིག་ནང་དུའང་ཕེབས་འཆར་ཡོད་སྟབས། ས་གནས་ཀྱི་གནས་ཚུལ་རྒྱུས་ལོན་དང་མི་མང་ལ་གོ་རྟོགས་ཡག་པོ་ཞིག་སྤེལ་ཐུབ་པའི་རེ་བ་ཡོད། དུས་རྒྱུན་ང་ཚོས་དམངས་གཙོ་ཞེས་མང་པོ་ཞིག་བཤད་ཀྱི་ཡོད་པ་དེ་མཐར་གཏུག་ན་མང་ཚོགས་ལ་ཐུག་ཡོད་པ་རེད། ཨ་རིའི་སྲིད་འཛིན་ཞིག་གིས་ ‘མི་མང་གི་ཆེད་དུ་མི་མང་གིས་བདམས་པའི་མི་མང་གི་སྲིད་གཞུང་།’ ཞེས་གསུངས་པ་དེ་དམངས་གཙོའི་འགྲེལ་བཤད་གོ་བདེ་ཤོས་དེ་རེད། དེར་བརྟེན། དམངས་གཙོའི་སྤྱི་ཚོགས་ནང་གི་གལ་ཆེ་ཤོས་མི་མང་གི་འགན་འཁུར་ལ་ཐུག་ཡོད། བོད་མི་སུ་ཞིག་ཡིན་ཡང་འོས་བསྡུའི་ཆ་ཤས་བླངས་པ་དེ་བོད་པའི་རྩ་དོན་འཐབ་རྩོད་ཀྱི་ཆ་ཤས་ཤིག་ཆགས་ཡོད་པ་རེད།

འོས་བསྡུའི་ལས་རིམ་ནང་འཛུལ་ཞུགས་བྱེད་པའི་རྩ་བའི་ཆ་རྐྱེན་དེ་བཙན་བྱོལ་བོད་མིའི་དང་བླངས་དཔྱ་ཁྲལ་ལག་དེབ་དེ་རེད། ལག་དེབ་ཡོད་པ་ཙམ་གྱིས་འགྲིག་གི་ཡོད་པ་མ་རེད། དཔྱ་དངུལ་ཏག་ཏག་ཕུལ་ཟིན་པ་དང་། འོས་བསྡུའི་དེབ་སྐྱེལ་བྱེད་དགོས་པ་རེད། སྔོན་འགྲོའི་འོས་བསྡུ་དེ་ ༢༠༡༥ ཟླ་ ༡༠ ཚེས་ ༡༨ རེད། ཉིན་དེ་ལ་ ༢༠༡༤ ལོའི་དཔྱ་ཁྲལ་ཆ་ཚང་ཕུལ་ཟིན་པ་ཞིག་དང་། ༢༠༡༦ ཟླ་ ༣ ཚེས་ ༢༠ ཉིན་དངོས་གཞིའི་འོས་བསྡུའི་སྐབས་ལ་ ༢༠༡༥ ལོའི་དཔྱ་ཁྲལ་ཆ་ཚང་ཕུལ་ཟིན་པ་ཞིག་དགོས་ཀྱི་ཡོད་པ་རེད། ཅེས་བརྗོད་སོང་།

ཁོང་གིས་མུ་མཐུད་དུ་འོས་བསྡུའི་ལས་རིམ་སྐོར་བརྗོད་དོན། ད་རེབ་སྤྱི་འཐུས་དང་སྲིད་སྐྱོང་གི་འོས་བསྡུའི་ལས་རིམ་སྐོར་ལ་ཉེ་ལམ་ཕྱི་ཟླ་ ༧ ཚེས་ ༡༥ ཉིན་དབུས་འོས་བསྡུ་ལྷན་ཁང་གིས་སྒྲིག་གཞི་ཞིག་གསལ་བསྒྲགས་གནང་ཡོད་པ་རེད། དེའི་ནང་དུ་འོས་མིར་ལངས་མཁན་དང་འོས་མིར་རྒྱབ་སྐྱོར་བྱེད་མཁན་གཉིས་ཀྱི་འགྲོ་སྟངས་གསལ་བོར་འཁོད་ཡོད་པ་རེད། དེའི་ནང་གི་གནད་དོན་གལ་ཆེན་པོ་ཁག་ཅིག་ཟུར་དུ་ཞུས་པ་ཡིན་ན། སྤྱི་འཐུས་དང་སྲིད་སྐྱོང་གི་འོས་མི་ཁྱབ་བསྒྲགས་བྱེད་སྐབས། ངེས་པར་དུ་དོ་བདག་ཁོ་རང་གི་ཆོག་མཆན་ཐོབ་དགོས་པ་དང་། ཁྱབ་བསྒྲགས་བྱེད་མཁན་སུ་ཡིན་པ་དེའི་མིང་གསལ་བོར་དགོས་པ། ཁྱབ་བསྒྲགས་ནང་༧གོང་ས་མཆོག་གི་སྐུ་པར་དང་བོད་མིའི་སྒྲིག་འཛུགས་ཀྱི་ལས་རྟགས་རིགས། བོད་ཀྱི་ས་ཁྲ། བོད་ཀྱི་རྒྱལ་དར་སོགས་ཀྱི་པར་རིགས་གང་བྱུང་བེད་སྤྱོད་གཏོང་ཆོག་གི་མ་རེད། སྲིད་སྐྱོང་དང་སྤྱི་འཐུས་ཀྱི་འོས་མི་ཚོས་ཁྱབ་བསྒྲགས་ཀྱི་འགྲོ་སོང་ལ་ཚད་བཀག་བཟོས་ཡོད་པ་རེད། སྲིད་སྐྱོང་ལ་ཧིན་སྒོར་འབུམ་ ༨ དང་སྤྱི་འཐུས་འབུམ་ ༣ རེད། འདི་ལ་གསལ་བོ་བཟོ་དགོས་པ་ཞིག་ལ། འོས་མིར་ལངས་མཁན་དང་ཁོ་ལ་རྒྱབ་སྐྱོར་གནང་མཁན་གཉིས་ཀྱི་འགྲོ་སོང་བསྡོམས་ཏེ་རྩིས་ཁྲ་གཅིག་བཟོ་དགོས། དེ་བཞིན། ས་གནས་གང་ཏུ་ཁྱབ་བསྒྲགས་བྱེད་ཀྱི་ཡོད་ན། ས་གནས་དེའི་འོས་བསྡུའི་འགན་འཛིན་ལ་སྙན་གསེང་ཞུ་དགོས། དེ་བཞིན། དོ་བདག་ལ་འདོད་པ་མེད་བཞིན་དུ་བཙན་སྐུལ་གྱིས་འོས་མིར་ལང་དུ་འཇུག་པ་དང་། དོ་བདག་ལ་འདོད་པ་ཡོད་ཀྱང་གནོན་ཤུགས་དང་འཇིགས་སྐུལ་བྱས་ཏེ་ལང་དུ་མི་འཇུག་པ་སོགས་ཀྱང་ཁྲིམས་འགལ་རེད། ཅེས་བརྗོད་སོང་།

བོད་རིགས་ཚོགས་པའི་ཚོགས་གཙོ་ངག་དབང་བསྟན་པ་ལགས་ཀྱིས་༼ཡུ་རོབ་སྤྱི་འཐུས་གཉིས་ཀྱིས་ཡུ་རོབ་མི་མང་ལ་ལས་འགན་འཁུར་ཕྱོགས།༽ ཞེས་པའི་བརྗོད་གཞིའི་ཐོག་གཏམ་བཤད་གནང་བར། ཡུ་རོབ་སྤྱི་འཐུས་གཉིས་དེ་ཆོལ་ཁ་ཆོས་ལུགས། ལུང་ཚན་སོགས་ལ་ཕྱོགས་རེས་མེད་པ། བོད་མིའི་སྒྲིག་འཛུགས་ཀྱི་ལངས་ཕྱོགས་ལ་རྒྱབ་སྐྱོར་བྱེད་པ་དང་མ་འགྲིག་པའི་ཕྱོགས་ལ་མཛུབ་མོ་འཛུགས་ཐུབ་མཁན་ཞིག་ཡིན་དགོས་པ་རེད། བཙན་བྱོལ་བོད་མིའི་སྤྱི་ཚོགས་ལ་མཚོན་ན། གྲོས་ཚོགས་གོང་འོག་དང་ཆབ་སྲིད་ཚོགས་པ་མང་པོ་ཡོད་པ་དེ་འདྲ་མ་རེད། སྤྱི་འཐུས་ལྷན་ཁང་གི་ངོས་ནས་གཞུང་དང་མི་མང་གཉིས་ཀར་འགན་འཁུར་དགོས་པ་མ་ཟད། གཞུང་དང་ཁ་གཏད་ཚོགས་པ་གཉིས་ཀའི་འགན་ཡང་འཁུར་དགོས་ཀྱི་ཡོད་པ་རེད།

གོ་ཐོས་བྱས་ན། སྔོན་མའི་ཡུ་རོབ་སྤྱི་འཐུས་རེ་ཟུང་ལོ་གཅིག་ལ་དྷ་རམ་ས་ལར་ཚོགས་འདུ་ཐེངས་གཉིས་ལ་བཅར་ཐུབ་ལ་མ་ཐུབ་ཙམ་ལས་བྱེད་ཀྱི་ཡོད་པ་མ་ཟད། ཆོལ་ཁ་བྱེ་བྲག་པ་དང་ཆོས་ལུགས་བྱེ་བྲག་པ་ཞིག་གི་སྤྱི་འཐུས་ཡིན་པ་ལྟ་བུ་ཆགས་ཀྱི་ཡོད་པ་གོ་མྱོང་། བདེན་པ་ཡིན་མིན་མི་ཤེས། དེ་འདྲའི་སྤྱི་འཐུས་ཤིག་གིས་ཡུ་རོབ་མི་མང་གི་ཚབ་མཚོན་ཐུབ་ཀྱི་ཡོད་པ་མ་རེད། ཡུ་རོབ་སྤྱི་འཐུས་དེ་གང་འདྲ་ཞིག་དགོས་པ་རེད་ཟེར་ན། ཆོལ་ཁ་ཆོས་ལུགས་ཕྱོགས་རེས་མེད་མཁན་ཞིག་དགོས་པ་རེད། དེ་བཞིན། ཡུ་རོབ་མི་མང་གི་བདེ་སྡུག་གཞུང་ལ་སྐྱེལ་ཐུབ་མཁན་ཞིག་དང་། ཡུ་རོབ་མི་མང་ཆིག་སྒྲིལ་དང་རྩ་དོན་ཐོག་འཁྲིད་ཐུབ་མཁན་ཞིག་དགོས་ཀྱི་ཡོད་པ་མ་རེད། དེ་མ་གཏོགས་གནམ་གྲུའི་གླ་ཆར་འགྲོ་སོང་ཆེན་པོ་ཞིག་བཏང་སྟེ། ཕར་སོང་ནས་གྲོས་ཚོགས་ནང་གཉིད་ཁུག་སྡོད་པ་དང་སྒེར་དོན་ཐོག་རྒྱུག་སྡོད་མཁན་དེ་འདྲ་ཞིག་གིས་ཕན་ཐོགས་ཡོད་པ་མ་རེད། ང་ཚོའི་ཧྥ་རན་སིའི་མི་མང་ལ་མཚོན་ན། ཡུ་རོབ་ལུང་པ་གཞན་དག་དང་བསྡུར་ན་ཆ་རྐྱེན་ཧ་ཅང་སྐྱོ་བོ་རེད། ལྷག་པར་དུ་གསར་དུ་འབྱོར་མཁན་མང་པོ་ཟམ་པའི་འོག་དང་གྲུ་གཟིངས་ནང་ཉལ་ཡོད་པ་རེད། དེ་བཞིན་ཡིག་ཆ་ནག་པོ་ཆགས་མཁན་སོགས་ཀྱི་དཀའ་ངལ་ལ་གཟིགས་ཐུབ་མཁན་དང་། གཟིགས་པ་ཙམ་མ་ཡིན་པར་རོགས་རམ་མཐུན་འགྱུར་ཞུ་ཐུབ་མཁན་ཞིག་ངེས་པར་དུ་དགོས་ཀྱི་ཡོད་པ་རེད། ཅེས་བརྗོད་སོང་།

བོད་རང་བཙན་སློབ་ཕྲུག་ཚོགས་པའི་ཚོགས་གཙོ་དོན་གྲུབ་ཕུན་ཚོགས་ལགས་ཀྱིས་༼ཡུ་རོབ་སྤྱི་འཐུས་གཉིས་ལ་འཁྲི་བའི་དམིགས་བསལ་ལས་འགན།༽ ཞེས་པའི་བརྗོད་གཞིའི་ཐོག་གཏམ་བཤད་གནང་དོན། ང་རང་གི་ལྟ་ཚུལ་བྱས་ན། སྤྱི་འཐུས་ཀྱི་ལས་འགན་ཨང་དང་པོ་ང་རང་ཚོ་མི་མང་གི་ལས་འགན་དེ་གལ་ཆེ་ཤོས་རེད་བསམ་གྱི་འདུག སྤྱི་འཐུས་དེ་མི་མང་གིས་བདམས་པ་རེད། སྤྱི་འཐུས་ཀྱི་བྱེད་སྟངས་འགྲིག་གི་མེད་ན་དེ་བདམས་མཁན་མི་མང་རེད། མི་མང་གིས་བསམ་བློ་ཡག་པོ་གཏོང་རྒྱུ་ཧ་ཅང་གལ་ཆེན་པོ་རེད། མི་མང་གིས་ཆོལ་ཁ་ཆོས་ལུགས་ཕྱོགས་རེས་མ་བྱས་བར། ལྷག་བསམ་རྣམ་དག་གི་ཐོག་ནས་འདེམ་པ་ཡིན་ན་སྤྱི་འཐུས་ཚད་ལྡན་ཞིག་ཡོང་གི་རེད། ཀུན་སློང་དང་ལྟ་སྟངས་ནོར་བ་ཞིག་གི་ཐོག་ནས་འོས་བླུགས་པ་ཡིན་ན། རྗེས་མ་སྤྱི་འཐུས་དེའི་ལས་དོན་བྱེད་ཕྱོགས་ཀྱང་དེ་བཞིན་དུ་ཀྱོག་ཀྱོག་ཅིག་ཆགས་འགྲོ་བ་རེད། ཡུ་རོབ་སྤྱི་འཐུས་ལ་མཚོན་ན། ཆོལ་ཁ་བྱེ་བྲག་པ་ཞིག་གི་སྤྱི་འཐུས་མ་རེད་ལ། ཆོས་བརྒྱུད་བྱེ་བྲག་པ་ཞིག་གི་སྤྱི་འཐུས་ཀྱང་མ་རེད། ཆོལ་ཁ་ཆོས་ལུགས་དབྱེར་མེད་ཀྱི་སྤྱི་འཐུས་རེད། དེ་ནས་སྤྱི་འཐུས་ཟེར་བ་དེ་སློབ་སྦྱོང་གཅིག་པུར་ལྟ་རྒྱུ་ཞིག་ཀྱང་མ་རེད་བསམ་གྱི་འདུག སྤྱི་དོན་ལ་ཤ་ཚ་དང་དུས་ཚོད་གཏོང་ཐུབ་མཁན་ཞིག་དང་། སྤྱི་འཐུས་དེ་མི་མང་དང་གཞུང་གཉིས་བར་གྱི་ཟམ་པ་ལྟ་བུ་ཡིན་སྟབས། མི་མང་ནང་ཡོང་སྟེ་མི་མང་དང་མཉམ་དུ་མདུན་ཅོག་གཅིག་གི་སྟེང་ནས་བློ་ཐག་ཉེ་བོས་བསམ་ཚུལ་བསྡུ་ལེན་བྱེད་ཐུབ་མཁན་ཞིག་དགོས་ཀྱི་འདུག ཡུ་རོབ་སྤྱི་འཐུས་གཉིས་ཀྱི་ལས་འགན་གཙོ་བོ་གཅིག་ཕྱི་འབྲེལ་ཟེར་ན་འདྲ། ད་ལྟའི་ཆར་བོད་དོན་རྒྱབ་སྐྱོར་ཚོགས་པའི་གནས་སྟངས་དེ་གང་ལ་གང་འཚམ་ཉམས་ཆགས་སུ་འགྲོ་བཞིན་ཡོད་སྟབས། བོད་དོན་རྒྱབ་སྐྱོར་ཚོགས་པ་དེ་ཚོར་འབྲེལ་བ་ཞུ་རྒྱུ་དང་ཕྱི་ཕྱོགས་ལ་བོད་དོན་ཁྱབ་བསྒྲགས་བྱ་རྒྱུ་དེ་རེད། ཅེས་སོགས་བརྗོད་སོང་།

པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཙོ་སྤྱི་ཟུར་ཆབ་བྲག་ལྷ་མོ་སྐྱབས་ལགས་ཀྱིས་༼བོད་མི་མང་སྤྱི་འཐུས་སྐབས་ ༡༦ པ་དང་བཀའ་ཤག་སྐབས་ ༡༥ པའི་སྲིད་སྐྱོང་འོས་བསྡུའི་ཐད་ད་ལྟའི་གནས་སྟངས་ལ་གཞིགས་ཏེ་སྤྱི་ཡོངས་གཟིགས་ཚོར།༽ཞེས་པའི་བརྗོད་གཞིའི་ཐོག་གཏམ་བཤད་གནང་དོན། སྤྱི་འཐུས་སྐོར་ལ་མང་པོ་ཞུ་རྒྱུ་མེད། སྲིད་སྐྱོང་གི་འོས་མིའི་སྐོར་ལ་ཁྱད་པར་ཆེན་པོ་ཁ་ཤས་མཐོང་སོང་། ཤེས་ཡོན་རིག་གནས་ཐད་ཁྲིམས་ལུགས་རབ་འབྱམས་པ་དང་བྱང་ཐང་གི་འབྲོག་པ་ལྟ་བུའི་ཁྱད་པར། ཉམས་མྱོང་གི་ཐད་ནས་ཆུང་དུས་ནས་དཀའ་སྡུག་ཀྱག་ཀྱོག་དང་སློབ་གྲྭ་སོགས་ལས་རིགས་ཆེ་འབྲིང་ཆུང་གསུམ་ནང་འགན་འཁུར་མྱོང་མཁན་དང་། སློབ་གྲྭ་དང་ཚོགས་པ་དེ་འདྲའི་ནང་ནས་གཏམ་བཤད་སྤེལ་བ་ལས་ཉམས་མྱོང་ཆེན་པོ་མེད་མཁན་རིགས་ཤིག དེ་བཞིན་ཆབ་སྲིད་ལྟ་གྲུབ་ཀྱི་ཐད་ནས་ཀྱང་སྔར་དང་མི་འདྲ་བར་རང་བཙན་གྱི་ལངས་ཕྱོགས་འཛིན་མཁན་ཞིག་བྱུང་བ་རེད། འདི་དག་ཕྱོགས་གཅིག་ནས་དམངས་གཙོ་སྤུས་ཇེ་དག་ཏུ་འགྲོ་བཞིན་ཡོད་པའི་རྣམ་པ་ཞིག་རེད།

སྤྱི་འཐུས་ཡིན་ན་རེད། སྲིད་སྐྱོང་ཡིན་ན་རེད། ང་རང་གི་ངོས་ནས་འོས་ཆོས་གལ་ཆེན་པོ་བཞི་མཐོང་གི་ཡོད། གཅིག སྤྱི་ཡོངས་ཀྱི་གོ་རྟོགས་ཡག་པོ་ཞིག་དགོས་ཀྱི་ཡོད་པ་རེད། ཆབ་སྲིད་དང་དཔལ་འབྱོར། རིག་གནས་གང་ཐད་ནས་གོ་རྟོགས་ཡག་པོ་དགོས་པ་ཧ་ཅང་གལ་ཅེན་པོ་རེད། གཉིས་པ། སྤྱི་ཡོངས་ཀྱི་ཉམས་མྱོང་གལ་ཆེན་པོ་རེད། ཉམས་མྱོང་གང་ཡང་མེད་པར་ལས་རིགས་གསར་པ་ཞིག་ལ་ཞུགས་པ་དེ་ལམ་ཁ་རྒྱུས་མེད་མཁན་ལྟ་བུ་ཞིག་གིས་ཚོད་ལྟ་དང་འོད་ཚོད་ཀྱིས་ཕྱིན་ན་དུས་ཚོད་འགོར་འགྱང་བྱེད་པ་ལྟ་བུ་རེད། གསུམ་པ། གུ་ཡངས་བཟོད་བསྲན་དེ་རེད། སྤྱི་ཚོགས་གང་དང་གང་ཡིན་ནའང་དེའི་ནང་དུ་རྙོག་གྲ་སྣ་ཚོགས་དང་། སྐྱོན་བརྗོད་ངོ་རྒོལ་རིགས་ཧ་ཅང་མང་པོ་ཡོད་པ་རེད། དེ་འདྲའི་སྐབས་སུ་དབུ་ཁྲིད་ཅིག་ལ་མཚོན་ན་བབ་བརླིང་དང་། བཟོད་བསྲན་ཆེན་པོ་ཞིག་དགོས་པ་ཧ་ཅང་གལ་ཆེན་པོ་རེད། བཞི་པ། བརྗོད་མཁས་པ་དང་གཏམ་བཤད་ཡག་པོ་སྤེལ་ཐུབ་པ་དེ་རེད། ‘ཁ་བདེ་ན་གཞན་གྱི་དཔོན་པོ། ལག་བདེ་ན་གཞན་གྱི་གཡོག་པོ།’ ཞེས་པའི་བོད་པའི་གཏམ་དཔེ་ལྟར་རེད། གཏམ་བཤད་དེ་ལ་རིགས་གསུམ་འདུག གཅིག་མང་ཚོགས་རང་བཞིན་ལ་གཏམ་བཤད་དང་། གཉིས་པ་གལ་ཆེའི་མི་སྣར་མཇལ་འཕྲད་སྐབས་ཀྱི་གསུང་མོལ། གསུམ་པ་གསུང་འཕྲིན་ཟེར་ན་འདྲ་ཡིག་ཐོག་གི་གསུང་བཤད་དག་རེད། མི་མང་གི་སྣེ་འཁྲིད་མཁན་ཞིག་ཡིན་ན་ཆ་རྐྱེན་འདི་དག་ཧ་ཅང་གལ་ཆེན་པོ་རེད།

ངས་མིང་སྨྲོས་མ་དགོས་པའི་ཐོག་ནས་ད་ལྟ་སྲིད་སྐྱོང་འོས་མིར་ལངས་མཁན་ ༥ བྱུང་ཡོད་པ་དག་ལ་སྡོམ་ཚིག་ཅིག་བཀོད་པ་ཡིན་ན། འུད་ཤོབ་བཤད་མཁན་གྱི་རྒྱལ་བློན་རྣམ་པ་གཉིས་དང་། ཉམས་མྱོང་དང་འཇོན་ཐང་ངོམ་མཁན་གྱི་དཔའ་རྒོལ་རྣམ་པ་གཉིས། རྟེན་འབྲེལ་བརྩི་བའི་རྒད་པོ་གླེན་པ་གཅིག་བཅས་རེད། ཅེས་བརྗོད་སོང་།