སྐབས་ ༡༦ པའི་མདོ་སྨད་སྤྱི་འཐུས་འོས་མི་གསར་པ་ཨ་རིག་དགེ་མཐོང་ལགས་སུ་ཆེད་དམིགས་བཅར་འདྲི་བྱེད་སྐབས། གྲོས་ཚོགས་ནང་ཁ་མ་གྲགས་པར་རྐུབ་སྟེགས་གཅིག་པུ་སྲུང་སྟེ་དུས་ཚོད་འགྲོ་ཐབས་དང་རང་ཉིད་ལ་ཁ་དམོད་མི་ཡོང་ཐབས་བྱས་ནས་བསྡད་པ་ཡིན་ན་ཏག་ཏག་བསྡད་མེད་སྐོར་བརྗོད་བྱུང་།
དྲི་བ། ཁྱེད་རང་གི་མི་ཚེའི་ལོ་རྒྱུས་དང་སློབ་སྦྱོང་གི་བརྒྱུད་རིམ་སོགས་ངོ་སྤྲོད་རགས་རིམ་ཞིག་གནང་རོགས།
ལན། སྤྱིར་ལོ་རྒྱུས་ཙག་ཙིག་བཤད་ན་མང་པོ་ཡོད་པ་རེད། དམིགས་བསལ་གྱིས་རང་ཉིད་གྲྭ་བ་ཞིག་ཡིན་པའི་ཆ་ནས་མི་ཚེའི་མང་ཆེ་ཤོས་ལ་ནང་བསྟན་མཚན་ཉིད་སྦྱངས་པ་ཡིན། དེ་ཡང་གཞིས་དགོན་ཙམ་མ་ཡིན་པར་གྲྭ་ས་ནས་སྦྱངས་ཏེ་ལག་འཁྱེར་དང་ལོ་རེའི་རྒྱུགས་སྤྲོད་བྱ་དགའ་སོགས་ཚད་ལྡན་ཐོབ་ཡོད་པ་དེ་མི་མང་ཤོས་ཀྱིས་ཤེས་པ་འདྲ་བོ་རེད། སོ་སོའི་མི་ཚེ་ཕྱེད་ཀ་དེ་ནང་བསྟན་མཚན་ཉིད་རིག་པར་བཏང་པ་ཡིན། དེ་ནས་རང་ཉིད་བོད་མི་རིགས་ཤིག་ཡིན་པའི་ཆ་ནས་རང་གི་སྐད་ཡིག་སྟེང་འབྲི་ཀློག་ག་རེ་ཡིན་ན་སོ་སོར་གདེང་ཚོད་དང་བརྒྱུད་རིམ་ལྡན་པ་ཞིག་ཡོད། དེ་ནས་དགོན་སྡེ་དང་སློབ་གྲྭ་ཁག་ལ་སོང་ནས་རང་གི་ནུས་ཚོད་ཀྱིས་རྩོམ་རིག་དང་སྐད་ཡིག བརྡ་སྤྲོད་སོགས་ཀྱི་སྐོར་ལ་ཟབ་སྦྱོང་དང་གཏམ་བཤད་བྱས་པ་ཡིན་ལ། དོ་སྣང་ཡོད་མཁན་ཚོས་ཕལ་ཆེར་གང་འཚམ་ཞིག་ཤེས་རྒྱུ་རེད། མི་ཤེས་མཁན་ལ་མང་པོ་བཤད་ཀྱང་ར་འཕྲོད་རྒྱུ་དཀའ་ལས་ཁག་པོ་རེད།
དྲི་བ། ཁྱེད་རང་སྐབས་ ༡༦ པའི་སྤྱི་འཐུས་འོས་མིར་ལངས་དགོས་པའི་རྒྱུ་མཚན་དང་མ་འོངས་པར་མི་མང་གི་འཐུས་མི་ཚད་ལྡན་ཞིག་ཡོང་ཐུབ་པར་འཆར་གཞི་ག་རེ་ཡོད།
ལན། སྤྱི་འཐུས་ཚད་ལྡན་ཡོང་བ་ཟེར་བ་དེ་ནམ་རྒྱུན་སོ་སོས་གང་བདམས་པའི་སྤྱི་འཐུས་དེར་རྒྱུས་མངའ་བྱེད་རྒྱུ་གལ་ཆེན་རེད། མི་གཞན་གྱིས་བཤད་པ་མ་ཡིན་པར་རང་འགུལ་གྱིས་འོས་བླུགས་པའི་རྗེས་སུ་ད་ལོར་སྤྱི་འཐུས་སུ་བདམས་པ་ཡིན་ན་ལོ་རྗེས་མར་ལས་ཀ་ཏག་ཏག་བྱེད་ཀྱི་ཨེ་ཡོད་ལྟ་རྒྱུ་རེད་མ་གཏོགས། གཞན་པ་ཚད་ལྡན་ཟེར་བ་དེ་འདི་རེད་ཟེར་བ་ཞིག་ཡོད་པ་མ་རེད། གཙོ་བོ་མི་སྒེར་གྱི་དུས་ཚོད་དང་ལས་ཀ་བྱེད་སྟངས་ལ་ལྟ་རྒྱུ་རེད། ང་སྤྱི་འཐུས་ལ་ལངས་དགོས་པའི་རྒྱུ་མཚན་དེ་ང་རང་ལ་མཚོན་ན་དགོན་སྡེ་ཁག་ཏུ་ཉམས་མྱོང་ཡོད་པའི་སྟེང་། སྤྱི་ཚོགས་ཁྲོད་ནས་མདོ་སྨད་དབུས་རྒྱུན་ལས་ཁང་དུ་ལོ་གསུམ་དང་། དེ་ནས་སྤེལ་ཀོབ་མདོ་སྨད་ས་གནས་ཚོགས་གཙོ་ལོ་གསུམ་ལ་ཁུར་བ་ཡིན། དེ་བཞིན་རྩོམ་པ་པོའི་མཐུན་ཚོགས་ནང་ལོ་གསུམ་ལ་ལས་ཀ་བྱས་ཏེ་ད་ལྟ་ཚོགས་གཞོན་གྱི་འགན་ཁུར་ཡོད་པ་ལྟར་ལས་ཁུངས་ནང་གི་འགན་ཚང་མ་སོ་སོའི་སྟེང་ལ་འཁེལ་ཡོད། དེ་མིན་སྐུའི་གྱ་སྟོན་སྟེང་རང་གིས་ནུས་ཤུགས་ཡོད་དགུ་བཏོན་པ་ཡིན། བརྒྱུད་རིམ་དེ་ནས་ང་ཚོའི་མདོ་སྨད་ཀྱི་གནད་ཡོད་མི་སྣ་ཨ་ཡོད་ནང་གི་དེ་ཡོད། སྒོ་ང་ནང་གི་སེར་ཐིག་དེ་ཚོ་དང་མཉམ་དུ་ལས་ཀ་བྱས་ཡོང་དུས། སྤྱི་འཐུས་དང་དབུས་རྒྱུན་ལས། དྷ་རམ་སའི་ཁོར་ཡུག་འདི་ན་ཡོད་པའི་མི་ཚོས་ངས་ལས་ཀ་ག་རེ་བྱས་དང་མ་བྱས་དེ་ཚུར་ལ་ཁ་གྲགས་ནས་ཡོང་པ་མ་གཏོགས་ངས་འདི་བྱས་དང་གན་བྱས་ཟེར་ནས་བཤད་དགོས་ཀྱང་བཤད་ཐུབ་ཀྱི་ཡོད་པ་མ་རེད་ལ། དེ་བཤད་ནས་ཕན་ཐོགས་ཡོད་པ་མ་རེད། གང་ལྟར་འདས་པའི་ལོ་གསུམ་གྱི་རིང་གྱ་སྟོན་དང་མདོ་སྨད་དབུས་རྒྱུན་ལས་གཅིག་ལྕོགས་ཀྱི་སྟེང་ནས་ལྷོ་ཕྱོགས་དང་ཧི་མ་ལ་ཡའི་རི་བརྒྱུད་སོགས་ས་གནས་ཁག་མང་པོར་ཕྱོགས་བསྐྱོད་བྱས་ཏེ། དགོན་པ་དང་གཞིས་ཆགས་ཁག་ལ་རྒྱུས་མངའ་བླངས་ཡོད་པ་མ་ཟད། ནམ་རྒྱུན་དོ་སྣང་གང་འཚམ་བྱས་ཏེ་ངའི་རྩོམ་ཡིག་ཀྱང་ཐོག་མར་ལྷུ་ལག་སྒྲིག་པའི་སྐབས་སུ་འབོར་རྩོམ་གྱི་ལམ་ནས་སྤྱི་ཚོགས་སྐྱོན་བརྗོད་ཤུགས་ཆེན་པོ་བྲིས་པ་དང་། ལྷག་པར་དུ་དགོན་སྡེ་ཁག་དང་རང་ལ་རྒྱུས་ཡོད་པའི་རིགས་མང་པོ་གླེང་ཡོད་པས། སྤྱི་ཚོགས་ནང་གང་འཚམ་དོ་སྣང་བྱེད་མཁན་ཞིག་ཡིན་ན་དེའི་ཕྱོགས་ལ་ངས་ཁ་ཕྱོགས་ངེས་ཅན་ཞིག་བཟུང་ཡོད་པ་ཤེས་ཀྱི་རེད།
དྲི་བ། སྤྱི་འཐུས་ཤིག་གིས་ངེས་པར་དུ་སྒྲུབ་དགོས་པ་གསུམ་དང་ངེས་པར་དུ་འདོར་དགོས་པ་གསུམ་བགྲང་ན་ཁྱེད་ཀྱིས་གང་དག་བགྲང་ས་རེད།
ལན། དྲི་བ་འདི་ང་ལ་མཚོན་ན་གནད་འགག་ཅིག་ཏུ་མཐོང་གི་ཡོད། སྤྱི་འཐུས་ཤིག་གིས་ངེས་པར་དུ་སྒྲུབ་དགོས་པ་དང་འདོར་དགོས་པ་ཟེར་བ་དེ། སོ་སོའི་ཆོལ་ཁ་དང་ཆོས་ལུགས་ཀྱི་ཕྱོགས་ཞེན་མེད་ཟེར་བ་དེ་དཀའ་ལས་ཁག་པོ་ཡིན་ཡང་། ང་ཚོའི་སྤྱི་ཚོགས་ནང་ལས་ཀ་བྱེད་སྟངས་དང་དེའི་དགོས་པ་རྒྱུ་མཚན་ལ་བརྟེན་ནས་བསམ་བློ་གཏོང་ཐུབ་པ་དེ་འདྲ་ཞིག་དགོས་ཀྱི་ཡོད། ཁོ་ཆོས་ལུགས་ཤིག་དང་ཆོལ་ཁ་ཞིག་གི་སྤྱི་འཐུས་ཡིན་དུས། གྲོས་ཚོགས་ནང་སོང་ནས་ཁ་མ་གྲགས་པར་རྐུབ་སྟེགས་གཅིག་པུ་སྲུང་ནས་བསྡད་པ་ཡིན་ན་དེ་ཏག་ཏག་བསྡད་མེད་ཀི་བསམ་གྱི་ཡོད། ང་ཚོ་མདོ་སྨད་སྤྱི་འཐུས་མང་ཆེ་ཤོས་དེ་འདྲ་རེད། ང་རང་མདོ་སྨད་ཅིག་ཡིན་པའི་ཆ་ནས་གཙོ་བོ་མདོ་སྨད་སྤྱི་འཐུས་ཚོར་བཤད་གི་ཡོད། སྔོན་མ་གྲོས་ཚོགས་ནང་ལ་རྙོག་དྲ་ཏོག་ཙམ་བྱུང་པར་བརྟེན། ས་གནས་ཁག་ལ་སོང་དུས་མི་མང་གིས་འཇུག་པ་ལད་ཟློས་བྱས་ནས་ཚང་མར་ཁ་གཏོང་ཡོང་དུས། ཁ་སང་དེ་རིང་ང་ཚོའི་སྤྱི་འཐུས་གྲོས་ཚོགས་ནང་དུས་ཚོད་འགྲོ་ཐབས་དང་རང་ཉིད་ལ་ཁ་དམོད་མ་ཡོང་བ་ཙམ་བྱེད་ཀྱིན་འདུག ངས་དེ་སྟོང་ཆ་ཆེན་པོ་ཞིག་རེད་བསམ་གྱི་ཡོད། ལྷག་པར་དུ་ང་ཚོ་བོད་ཀྱི་སྤྱི་འཐུས་ཤིག་ཡིན་ན་ངེས་པར་དུ་སྤྱི་འཐུས་བཅུ་བོ་ཟླ་དྲུག་དྲུག་ལ་བགོ་བཤའ་བརྒྱབ་ཏེ། ལོ་ལྔ་ཡི་ནང་རྒྱུན་ལས་སུ་སྡོད་དགོས་ཀྱི་འདུག རྒྱུན་ལས་ཟེར་བ་དེ་སྤྱི་འཐུས་ཀྱི་སྐབས་སུ་ཧ་ལས་པའི་གལ་ཆེན་པོ་ཞིག་རེད། ཐག་གཅོད་མང་པོ་ཞིག་རྒྱུན་ལས་ཀྱིས་བྱེད་དགོས་དུས། ང་ཚོ་མདོ་སྨད་ལ་མཚོན་ན་ལོ་ལྔའི་རིང་མི་གཉིས་ཀྱིས་སྐོར་ར་བརྒྱབ་ནས་སྡོད་དགོས་ཀྱི་ཡོད་པ་རེད། མི་གཉིས་དེ་རྨོག་རུ་བསྟན་པ་དང་རྒྱ་རིགས་ཐར་གཉིས་རེད། སྐུ་ངོ་སྤེན་པ་ཁོ་རང་ཚོགས་གཙོ་ཡིན་སྟབས་དམིགས་བསལ་རེད། དེ་ག་རེ་བྱས་ནས་རེད་ཅེ་ན། ཁ་ཤས་ལ་ཤེས་ཡོན་ཡོད་ཀྱང་དུས་ཚོད་གཏོང་ཐུབ་ཀྱི་ཡོད་པ་མ་རེད། ཁ་ཤས་ཀྱིས་དབྱིན་ཇི་དང་ཧིན་དྷི་ཁྱག་ཁྱོག་རེ་ཤེས་ཀྱི་ཡོད་ཀྱང་། ལས་ཀ་དེ་བོད་ཡིག་དང་བོད་ཀྱི་གནས་སྟངས་སོགས་ལ་བྱེད་དགོས་དུས། རང་བཞིན་གྱིས་བྱེད་མ་ཐུབ་པ་ཞིག་ཆགས་ཡོང་གིན་འདུག འདི་འདྲའི་སྟོང་ཆ་དེ་ཚོ་ང་རང་སྤྱི་འཐུས་རྒྱུན་ལས་སུ་འཁེལ་བ་ཡིན་ན། དུས་ཚོད་གཏོང་ཐུབ་པ་དང་བོད་ཡིག་གི་སྒང་ནས་ཁ་གསབ་བྱེད་ཐུབ་པའི་སྤོབས་པ་ཡོད།
དྲི་བ། ད་ལྟའི་བོད་མི་མང་སྤྱི་འཐུས་རྣམ་པས་མི་མང་གི་འཐུས་མི་ཞིག་གི་མིང་ཐོག་ནས་སྤྱི་ཚོགས་ལ་འགན་འཁུར་སྟངས་དང་ཕྱག་ལས་གནང་ཕྱོགས་ཐད་དགེ་མཚན་དང་སྐྱོན་ཆ་གང་དག་མཐོང་གི་འདུག
ལན། ད་ལྟའི་ང་ཚོའི་སྤྱི་འཐུས་ཡིན་ན་ཆོག མ་འོངས་པ་ཡིན་ནའང་འདྲ། ང་ཚོའི་སྤྱི་ཚོགས་དང་དགོན་སྡེ་ཁག་ལ་ཉམས་ཞིབ་བྱེད་དགོས་ལ། གང་ཟག་བྱེ་བྲག་པ་ཞིག་ཡིན་ནའང་བག་ཆགས་ཟབ་མོ་ཞིག་འཇོག་རྒྱུ་དང་། དེ་ནས་གྲོས་ཚོགས་ཀྱི་ལས་དོན་ལ་ཁ་ནས་སྙན་མོ་བཤད་པ་ཙམ་མ་ཡིན་པར། དཔེར་ན། ང་ཚོའི་སྐད་ཡིག་གི་སྐོར་ལ་སྐད་ཡིག་གལ་ཆེན་པོ་རེད། སྐད་ཡིག་དེ་མི་རིགས་ཀྱི་ཚེ་སྲོག་རེད་ཅེས་ལབ་ཀྱིན་ཡོད་ཀྱང་། ལག་ལེན་གྱི་ཁྲོད་ནས་བོད་ཀྱི་སྐད་ཡིག་སྟེང་ལས་ཀ་བྱེད་ཀི་ཡོད་པ་མ་རེད། གལ་སྲིད་ལས་ཀ་བྱེད་དགོས་ན་ང་ཚོའི་བོད་ཡིག་སློབ་མཁན་དང་ཕྲུ་གུ་དེ་ཚོ་ཆུང་དུས་ནས་སློབ་གྲྭ་འགྲོ་རྒྱུ་ཡོད་པ་དང་། མ་འོངས་པར་མཐར་ཕྱིན་ནས་ཁོ་རང་གི་འཚོ་བ་དེ་ལས་ཀ་བྱས་ནས་ཏག་ཏག་འགྲོ་ཐུབ་པ་ཞིག་ཡིན་ན། བོད་ཀྱི་སྐད་ཡིག་གི་ཚེ་སྲོག་ལྟ་བུ་རེད། ཡིན་ནའང་། བོད་ཀྱི་སྐད་ཡིག་ཤེས་མཁན་དང་རྩོམ་ཡིག་འབྲི་མཁན་དེ་ཚོར་མཐོང་ཡོད་པ་མ་རེད། ལག་ལེན་གྱི་ཆ་ནས་ལས་ཀ་བྱེད་དགོས་པ་རེད་བསམ་ཡོད། དེ་ནས་ང་ཚོའི་སྤྱི་ཚོགས་འདིའི་ནང་ད་དུང་སྐུ་དྲག་ལམ་ལུགས་བརྒྱུད་དེ། མང་ཚོགས་དང་རྐུབ་སྟེགས་ཐོག་སྡོད་མཁན་གཉིས་ཀྱི་བར་ལ་རྣམ་འགྱུར་གྱི་ཐོག་ནས་འགལ་བ་ཞིག་མཐོང་གི་ཡོད་ལ། འགལ་བ་དེར་བརྟེན་ནས་མང་ཚོགས་མང་པོ་ཞིག་བློ་ཕམ་བྱུང་སྟེ་ས་གནས་འདིར་འདུག་རྒྱུའི་ཞེན་ཁ་ལོག་པ་དེ་འདྲ་མཐོང་སོང་། སྤྱི་ཚོགས་ཁྲོད་མི་སྒེར་གྱི་འཚོ་བ་རོལ་སྐབས་ཁྱོད་རང་གི་ཕྱོགས་ནས་དོན་དག་ཆུང་ཆུང་ཞིག་ཡིན་ན་ཡང་ཁོ་རང་ལ་མཚོན་ན་དོན་དག་ཆེན་པོ་ཞིག་ཡིན་སྲིད་སྟབས། ལས་ཀ་དེ་སྒྲུབ་ཐུབ་དང་མ་ཐུབ་ལ་འགྲེལ་བཤད་ཡག་པོ་ཞིག་རྒྱག་རྒྱུ་དང་རྣམ་འགྱུར་ཡག་པོ་ཞིག་སྟོན་རྒྱུ། མང་ཚོགས་ཀྱི་འདོད་པ་བསྒྲུབ་ཐུབ་པའི་ཕྱོགས་སུ་འབད་བརྩོན་བྱེད་རྒྱུ་དེ་གལ་ཆེན་པོ་རེད།
དྲི་བ། ང་ཚོའི་སྤྱི་ཚོགས་ཁྲོད་གྲོས་ཚོགས་ར་བའི་ནང་དགེ་འདུན་པ་ཞུགས་ན་ཡག་པོ་ཡོད་ཚུལ་བརྗོད་མཁན་མང་པོ་ཡོད་སྟབས་དེའི་ཐད་ནས་ཁྱེད་རང་ལ་བསམ་ཚུལ་ག་རེ་ཡོད།
ལན། དྲི་བ་འདི་ཁ་སང་དེ་རིང་དྲ་ལམ་དང་བརྒྱུད་ལམ་ཁག་ཏུ་ཤུགས་ཆེན་པོ་གླེང་སློང་བྱེད་ཀྱིན་འདུག ངས་དྲ་ལམ་ཚོགས་པ་ཁ་ཤས་ལ་གསལ་བོར་ཞུས་པ་ཡིན། ཁ་ཤས་ཀྱིས་༧གོང་ས་མཆོག་གིས་བཀའ་གནང་གི་འདུག་ལབ་མཁན་ཡང་འདུག ཡིན་ན་ཡང་། ང་ཚོས་༧གོང་ས་མཆོག་གི་གསུང་ལ་རྟག་གསལ་གཏང་ན་དེ་༧གོང་ས་མཆོག་རྩེད་ཆས་བྱས་པ་འདྲ་བོ་རེད། དངོས་གནས་བསམ་བློ་གཏང་ན། ད་ལྟའི་གནས་བབ་འདིར་ང་ཚོ་གྲྭ་བས་ལས་ཀ་བྱེད་པ་ཡིན་ན་ཟམ་གདོང་རིན་པོ་ཆེ་སོགས་ཀྱིས་གསུང་བ་ནང་བཞིན་དུས་ཚོད་གཏོང་ཐུབ་པ་དང་། ལས་ཀ་བྱེད་ཕྱོགས་ཀྱི་སྟེང་ནས་ཀྱང་གྲྭ་བ་ཞིག་ཡིན་ན་འགན་འཁྲི་ཡོད་པ་རེད། གཉིས་ནས་རས་དམར་པོ་ཞིག་གྱོན་མ་གྱོན་གྱི་ཁྱད་པར་ཡོད་པ་མ་རེད། དེ་ང་རང་གི་ལྟ་ཚུལ་ཡིན། གལ་སྲིད་ང་གྲྭ་བ་ལོག་སོང་ན་སྤྱི་འཐུས་ཐོབ་པ་དང་གྲྭ་བ་མ་ལོག་ན་སྤྱི་འཐུས་ཐོབ་གི་མེད་ན། དེ་མིའི་ཤེས་ཡོན་དང་གཤིས་ཀར་མ་བལྟས་པ་རེད། ལྟ་སྟངས་དེ་ཏག་ཏག་ཅིག་བསྡད་ཡོད་པ་མ་རེད་བསམ་གྱི་ཡོད། ཡིན་ན་ཡང་མི་མང་ལ་ཁག་ཡོད་པ་མ་རེད། གྲོས་ཚོགས་ནང་གྲྭ་བ་རེ་ཟུང་གི་བྱ་སྤྱོད་ཀྱིས་སྤྱི་ཚོགས་ལ་བག་ཆགས་ངན་པ་བཞག་དུས་སྤྱི་ཚོགས་ནང་འཇུག་པ་ལད་ཟློས་བྱས་བཞག་པ་རེད། དེ་ལ་སོ་སོས་ངོས་ལེན་བྱེད་ཀྱི་ཡོད། ང་ལྟ་བུ་ཞིག་ཡིན་ན། གྲྭ་བ་ཚོར་བརྒྱུད་ལམ་ཁག་ནས་སྐྱོན་བརྗོད་བྱེད་ཀྱི་ཡོད་པ་ཤེས་བཞིན་དུ་སྤྱི་འཐུས་ལ་ལངས་པ་དེར་མི་ཁ་ཤས་ཀྱིས་ལྐུག་པ་འདྲ་བོ་མཐོང་གི་ཡོད་ཀྱང་། ང་སྐབས་འདིར་སྤོབས་པའི་ངང་ནས་ལངས་དགོས་པ་དེ་རྣམ་དཔྱོད་ལྡན་པའི་མི་ཞིག་ཡིན་ན། མི་དེའི་ལས་ཀ་བྱེད་སྟངས་དང་དེའི་སྟེང་ནས་བརྒྱ་ཆ་འཇོག་རྒྱུ་རེད་མ་གཏོགས་གྱོན་པ་ཙམ་གྱིས་བརྒྱ་ཆ་འཇོག་གི་མ་རེད་བསམ་གྱི་ཡོད།
དྲི་བ། མདོ་སྨད་སྤྱི་འཐུས་ལས་ཐོག་རྣམ་པས་བོད་ཕྱི་ནང་གི་མདོ་སྨད་མི་མང་གི་འཐུས་ཚབ་བྱེད་ཐུབ་ཀྱི་འདུག་གམ།མི་འདུག་ན་ཕྱོགས་གང་དག་ནས་ཚབ་བྱེད་ཐུབ་ཀྱི་མི་འདུག ཁྱེད་ལ་དེའི་ཐད་ཚབ་བྱེད་ཐུབ་པའི་ནུས་འཇོན་ག་རེ་ཡོད།
ལན། མདོ་སྨད་སྤྱི་འཐུས་རྣམ་པས་མདོ་སྨད་ཀྱི་ཚབ་མཚོན་བྱེད་ཐུབ་ཀྱི་ཡོད་མེད་ཟེར་བ་དེར་འགྲེལ་བཤད་ག་འདྲ་རྒྱག་དགོས་མིན་ངས་མི་ཤེས། སྤྱིར་བཏང་ཁོ་རང་ཚོ་ཚབ་མཚོན་ལྟ་བུ་རེད། ཡིན་ནའང་། ལས་ཀ་བྱེད་སྟངས་ཏག་ཏག་བྱེད་ཐུབ་གིན་ཡོད་མེད་བཤད་ཁག་པོ་རེད། ལྷག་པར་དུ་མདོ་སྨད་ཟེར་ན་བཙན་བྱོལ་ནང་མི་གྲངས་ཉུང་ཉུང་ཞིག་རེད། བོད་ནང་ལ་མཚོན་ན་ཤེས་ཡོན་དང་ས་ཆ་གང་གི་སྟེང་ནས་མདོ་སྨད་ཁྱབ་ཆེ་ཤོས་ཡིན་སྟབས། ༧གོང་ས་མཆོག་གིས་ཆོལ་ཁ་རེ་དང་ཆོས་བརྒྱུད་རེ་ནས་གྲངས་འབོར་སྙོམ་པོ་འཇུག་དགོས་པ་དེ། གཙོ་བོ་བོད་ཀྱི་གནས་སྟངས་དང་ལྷག་པར་དུ་གཞིས་ལུས་བོད་མི་རྣམས་ལ་དགོངས་བཞེས་གནང་བ་ཡིན་དུས། མདོ་སྨད་སྤྱི་འཐུས་ཤིག་ཡིན་ན། མདོ་སྨད་ཀྱི་ཡུལ་སྲོལ་གོམས་གཤིས་དང་གནས་སྟངས་ཤེས་པའི་ཐོག མི་ལ་འབྲེལ་འདྲིས་བྱེད་དགོས་ཀྱི་འདུག་བསམ་གྱི་ཡོད། ད་ལྟའི་མདོ་སྨད་རྒྱུན་ལས་ནང་ལ་གང་འཚམ་ཡག་པོ་བྱུང་འདུག ཡིན་ནའང་ད་དུང་མདོ་སྨད་ཀྱི་ས་ཆ་ཟེར་ན་ཚོད་དཔག་དང་ལྷ་ཡུལ་ལྟ་བུ་ཞིག་གི་ངོས་ནས་འགྲེལ་བཤད་རྒྱག་གི་ཡོད་པ་མ་གཏོགས་དངོས་སུ་མ་མཐོང་པ། བོད་ཡིག་དང་བོད་སྐད། མདོ་སྨད་ཀྱི་ས་དང་མི་ལ་འབྲེལ་འདྲིས་མེད་པ་ཡང་མང་པོ་ཡོད་པ་རེད་བསམ་གྱི་ཡོད། དེ་ཡིན་རུང་ཕྱིའི་སྐད་ཡིག་དང་ཁྲིམས་ལུགས་འགྲོ་སྟངས་སོགས་ཤེས་ཀྱི་ཡོད་ན་འགྲིག་གི་རེད། དེའི་སྒང་ནས་སོ་སོས་སྐད་ཆ་མི་བཤད་པར་རྐུབ་བཀྱག་སྲུང་ནས་སྡོད་མཁན་ཁ་ཤས་མཐོང་གི་ཡོད། དེ་ཚོས་ཚབ་བྱེད་ཐུབ་མིན་བཤད་ཁག་པོ་རེད་བསམ་གྱི་ཡོད། ང་རང་ཡིན་ན་སོ་སོའི་ལྟ་བ་དང་རང་གཤིས་འཁུར་ཏེ་དབུས་རྒྱུན་ལས་དང་གྱ་སྟོན་སྐབས་མི་སྣ་ཆེན་པོ་དང་མཉམ་དུ་ལས་ཀ་བྱས་ཡོང་དུས། རང་གི་ལངས་ཕྱོགས་དང་བསམ་ཚུལ་གཉིས་ལ་མ་མཐུན་པ་ཡིན་ན་ཐད་ཀར་ཁོ་ཚོར་སྐྱོན་བརྗོད་བྱས་པ་དང་། ཡང་སོ་སོས་ནོར་འཁྲུལ་བྱས་ན་དེ་ལ་ཁ་ཐུག་གིས་དང་ལེན་བྱས་ཡོད་པ་དེ། ང་ཚོ་དང་མཉམ་དུ་ལས་ཀ་བྱེད་མཁན་ཚང་མ་ད་ལྟ་དངོས་ཡོད་མ་ཤི་གསོན་པོ་དང་མ་འཁྱག་དྲོན་མོར་ཡོད་དུས། ངས་སྐྱག་རྫུན་བཤད་པ་མ་ཡིན་པར་རང་གི་གཤིས་ཀའི་སྟེང་ནས་ཚང་མར་བཤད་དགོས་པ་དེ་བཤད་གི་ཡོད་ལ། མ་འོངས་པར་གྲོས་ཚོགས་ནང་དུའང་ཡིག་ཐོག་དང་ངག་ཐོག་གཉིས་ནས་བཤད་དགོས་པ་དེ་བཤད་པའི་སྤོབས་པ་ཡོད། སྤོབས་པ་དེའི་སྒང་ནས་ང་སྤྱི་འཐུས་ལ་ལངས་པ་ཡིན།
དྲི་བ། སྔོན་ཆད་བཅར་འདྲི་ཞིག་གི་སྐབས་སུ། ཁྱེད་ཀྱིས་ཆོལ་ཁ་དང་ཆོས་ལུགས་ཀྱི་མཐུན་སྒྲིལ་གཏོར་བཤིག་གཏོང་མཁན་ཕལ་ཆེ་བ་མི་སྣ་ནུས་ཤུགས་ཅན་དང་སེར་མོ་ཚོའི་སྡེ་ན་ཡོད་སྟབས། དམངས་ཁྲོད་ནས་གོ་རྟོགས་སད་དེ་ཆིག་སྒྲིལ་ཚད་ལྡན་ཞིག་བསྐྲུན་དགོས་ཞེས་བརྗོད་འདུག་པས། དམངས་ཁྲོད་ནས་གོ་རྟོགས་སད་དེ་ཆིག་སྒྲིལ་ག་འདྲ་ཡོང་དགོས་པར་འདོད་ཀྱི་ཡོད།
ལན། ངས་བཅའ་འདྲི་དེ་འདྲ་མང་པོ་དང་ལེན་བྱས་པ་དང་རྩོམ་ཡིག་ཁྱག་ཁྱོག་མང་པོ་སྤེལ་ཡོད་སྟབས་ཏག་ཏག་ཅིག་དྲན་གྱི་མི་འདུག་ཀྱང་། ནམ་རྒྱུན་ལས་ཀ་བྱེད་ཕྱོགས་ཀྱི་ཐད་ནས་མི་སྣ་དབང་ཤུགས་ཅན་ཡིན་ན་རེད། གྲོས་ཚོགས་ནང་གི་གྲྭ་བ་ཡིན་ནའང་ཆོག ཏོག་ཙམ་མ་འགྲིག་པ་བྱེད་མཁན་དེ་ཚོ་ཕལ་ཆེར་བ་མི་གཞན་ཞིག་གི་རྐུབ་ལ་རྒྱུག་ནས་ལས་ཀ་དེ་འདྲ་བྱེད་ཀྱི་འདུག་བསམ་གྱི་ཡོད། རྒྱབ་ལོག་གི་མི་དེར་ནུས་པ་གང་འཚམ་ཡོད་དུས་སྤྱི་ཚོགས་ལ་བརྡབ་གསིག་ཆེན་པོ་གཏོང་གི་འདུག གྲོས་ཚོགས་ནང་བརྒྱུད་རིམ་སྔ་ཕྱི་ཁག་ཏུ་གནད་དོན་ཅུང་ཙམ་བྱུང་བ་དེ་ཚོར་ཞིབ་འཇུག་བྱས་ན། མི་རང་གི་ལྟ་བ་དེའི་སྟེང་ནས་མ་ཡིན་པར་ཕར་ཕྱོགས་ཀྱི་རྒྱབ་ལྗོངས་ཞིག་ནས་དཀྲུག་ཡོང་གི་འདུག ང་རང་གལ་སྲིད་སྤྱི་འཐུས་འཐོབ་པ་ཡིན་ན། རྒྱབ་ལོག་གི་མི་ཞིག་ལ་བརྟེན་ནས་འགྲོ་མ་དགོས་པར་སོ་སོའི་ལྟ་བ་དང་ལས་ཀ་བྱེད་སྟངས་ནས་འགྲོ་རྒྱུ་མ་གཏོགས། མི་གཅིག་གི་ཁ་བཀོད་ཀྱི་དབང་དུ་བརྒྱ་ཆའི་བརྒྱ་འགྲོ་གི་མིན། གལ་སྲིད་ཁ་བཀོད་ཀྱི་དབང་དུ་འགྲོ་དགོས་ཚེ། ང་ཚོའི་སྤྱི་ཚོགས་འདི་དཀྲུག་གི་རེད། ཆིག་སྒྲིལ་ཟེར་བ་དེ་གཙོ་བོ་དམངས་ཁྲོད་ནས་མི་མང་གི་གོ་རྟོགས་སད་དགོས་པ་རེད། དེ་ག་འདྲ་བྱས་ནས་སད་དགོས་རེད་ཅེ་ན། མི་གཅིག་གི་ཁ་བཀོད་འོག་ནས་ཅིག་རེད་དང་མ་རེད་ཅེས་བཤད་ན་འགྲིག་གི་མ་རེད། མི་ཚང་མས་སྐད་ཡིག་དང་ཆབ་སྲིད་ཀྱི་ཐོག་ལ་དོ་སྣང་བྱས་ན་ཆིག་སྒྲིལ་ཡོང་གི་རེད། དེ་ཡང་དཔེར་ན་ང་ལྟ་བུར་མཚོན་ན། སྔོན་ཆད་ཕ་ཡུལ་ནས་དཔེ་ཆ་བལྟས་ཡོང་དུས་ཕལ་ཆེར་རྙིང་མ་དང་བཀའ་བརྒྱུད། བོན་པོ་དེ་འདྲ་མཐོང་དུས་རྣམ་རྟོག་ཟ་གིན་ཡོད། ང་རང་འདིར་ཡོང་རྗེས་༧གོང་ས་མཆོག་གི་བཀའ་སློབ་ཀློག་ནས་ངའི་བསམ་ཚུལ་ལ་རྦད་དེ་འགྱུར་བ་ཕྱིན་ཏེ། ད་ལྟ་བསམ་ཚུལ་དེ་རྩ་བ་ནས་མེད་པ་ཆགས་སོང་། དེ་ཡང་སྤྱི་ཚོགས་དང་ཁོར་ཡུག་ཅིག་གི་ཤུགས་རྐྱེན་རེད། ཁོར་ཡུག་ཅིག་ནང་མཉམ་དུ་བསྡད་པ་ཡིན་ན། ལུང་ཚན་དང་བྱེ་བྲག་ཕན་ཚུན་ལ་བསྟུན་ཤེས་དང་བཟོད་སྒོམ་བྱས་ནས་བསྡད་ན་ཆིག་སྒྲིལ་གྱི་ནུས་པ་དེ་གོང་འཕེལ་ཡོང་རྒྱུ་རེད།
དྲི་བ། བོད་གཞུང་མང་གཉིས་ནས་བོད་ནང་གི་ཛ་དྲག་གནས་སྟངས་ལ་གདོང་ལེན་ག་འདྲ་བྱེད་དགོས་པ་རེད་བསམ་གྱི་ཡོད།
ལན། བོད་ནང་གི་ཛ་དྲག་གནས་སྟངས་ལ་གདོང་ལེན་བྱེད་སྟངས་ཞེ་ན་ང་ཚོའི་གང་ཐུབ་ཐུབ་ཅིག་བྱེད་ཀྱི་ཡོད་ལ། ང་ཚོས་ལས་ཀ་བྱས་ནས་གྲུབ་འབྲས་ཐོན་པ་ཡང་ཁ་ཤས་ཡོད་པ་རེད། འབྱུང་འགྱུར་གྲུབ་འབྲས་ཐོན་རྒྱུ་ཡང་གང་འཚམ་ཡོད་པ་རེད། དྲང་མོ་བཤད་ན་ང་རང་གིས་འདིའི་སྐོར་ལ་ལས་ཀ་བྱེད་བཞིན་ཡོད། ཕྱི་ལོ་ ༢༠༡༢ དང་ ༢༠༡༤ ལོར་ང་ཕ་ཡུལ་དུ་ཐེངས་གཉིས་ལ་སོང་སྟེ་མདོ་སྨད་ཀྱི་དགོན་སྡེ་ཁག་དང་ས་ཆ་མང་པོར་ཆེད་དུ་བསམ་བློ་བཏང་ནས་སོང་པ་ཡིན། འབྱུང་འགྱུར་ངས་ཟིན་ཐོ་ཞིག་ཀྱང་འདོན་འཆར་ཡོད། བོད་ནང་གི་བོད་མི་ཚོས་བཤད་ན། ང་ཚོའི་གསར་འགྱུར་བརྒྱུད་ལམ་ཁག་དང་གཞུང་དམངས་སུ་ཡིན་ན་ཡང་། ཛ་དྲག་གི་གནས་ཚུལ་བྱུང་དུས་དེ་ལ་དབྱེ་ཞིབ་ཡག་པོ་མ་བྱས་པར་ནོར་འཁྲུལ་མང་པོ་བཟོ་བཞིན་ཡོད་པ་དེས་ཁོ་ཚོར་འགོག་རྐྱེན་ཐེབས་ཀྱི་འདུག་ཟེར། དོན་དངོས་སུ་དེ་འདྲ་མིན་པར་བོད་མི་ཚོས་རང་གི་ཚེ་སྲོག་གིས་འགྲོ་གྲོན་གཏོང་པའི་སྐབས་དེར། ཕྱི་ཕྱོགས་ཀྱི་ང་ཚོའི་གསར་འགོད་པ་ཚོས་འགྲོ་ཐབས་འདུག་ཐབས་བྱེད་པ་དང་། ཡང་ན་གཞུང་ཞབས་ནས་སྨོན་ལམ་མཆོད་འབུལ་བྱེད་པ་ཙམ་མ་ཡིན་པར། དེའི་གནས་ཚུལ་དང་རྒྱབ་ལྗོངས་སོགས་ལ་ཞིབ་འཇུག་ཡག་པོ་ཞིག་བྱས་ནས་རྒྱལ་སྤྱིའི་སྟེང་ཁྱབ་བསྒྲགས་ཡག་པོ་ཞིག་བྱ་རྒྱུ་དེ་གལ་ཆེན་པོ་རེད་བསམ་གྱི་ཡོད། དེ་མ་གཏོགས་དམིགས་བསལ་ཛ་དྲག་གི་གནས་སྟངས་ལ་གདོང་ལེན་བྱེད་པར་སྤྱི་འཐུས་ཤིག་ལ་ནུས་པ་ཡོད་པ་མ་རེད། ཡིན་ན་ཡང་། ད་ལོའི་སྐུའི་གྱ་སྟོན་དང་འདི་འདྲའི་ལས་ཀ་བྱེད་སྐབས། སོ་སོའི་ལྟ་ཚུལ་ཁ་ཤས་ཤིག་ཨུ་ཚུགས་ཀྱིས་བཤད་དུས་དེ་ལ་གང་འཚམ་ཞིག་ནས་རྒྱབ་སྐྱོར་འཐོབ་པའི་ནུས་པ་ཐོན་གྱི་འདུག དེ་ཡིན་དུས་མ་འོངས་པར་ང་སྤྱི་འཐུས་འཐོབ་པ་ཡིན་ན་ཡང་། སོ་སོས་ལས་འཆར་ཞིག་བཏོན་ནས་དེ་ལ་ཚང་མའི་རྒྱབ་སྐྱོར་མ་འཐོབ་པ་ཡིན་ནའང་། ཁ་ཤས་ཀྱི་རྒྱབ་སྐྱོར་ལ་བརྟེན་ནས་གྲོས་ཚོགས་ནང་གླེང་སློང་བྱེད་པའི་གྲུབ་འབྲས་ཤིག་ཐོནའང་ཡག་པོ་རེད་བསམ་གྱི་ཡོད།
གསར་འགོད་པ། འཇིགས་མེད་རྒྱ་མཚོ།
