ང་ཚོ་རྒྱ་གར་བ་ཚོས་ཁྱེད་ཅག་གི་རྒྱལ་ཞེན་ལ་རྗེས་སུ་ཡི་རང་ཞུ་བཞིན་ཡོད།

དམངས་གཙོའི་དུས་ཆེན་ཐེངས་ ༥༥ པ་གཞུང་འབྲེལ་སྲུང་གཙི་གནང་བའི་ཐོག བོད་རང་སྐྱོང་ལྗོངས་བཙུགས་ནས་ལོ་ ༥༠ འཁོར་བའི་དུས་སྟོན་ཟེར་བ་དེ་སྲུང་གཙི་བྱེད་པའི་གནས་སྟངས་མི་འདུག་ལ། ཡ་ང་བའི་དུས་དྲན་ཞིག་ཏུ་ངོས་འཛིན་གྱིས་བོད་མི་ཚོས་དྲན་གསོ་བྱེད་དགོས་སྐོར་གསུངས་སོང་།

དེ་རིང་སྔ་དྲོའི་ཆུ་ཚོད་ ༡༠ པ་ཙམ་ལ་དྷ་ས་ཐེག་ཆེན་གཙུག་ལག་ཁང་དུ། ༧གོང་ས་མཆོག་ནས་བོད་འབངས་ཡོངས་ལ་དམངས་གཙོའི་ལམ་བཟང་གསོལ་བསྩལ་བཀའ་དྲིན་བསྐྱངས་ཏེ་ལོ་ངོ་ ༥༥ འཁོར་བའི་དུས་ཆེན་སྲུང་གཙི་གནང་སོང་བ་དང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གི་དབུས་ཁྲིམས་ཞིབ་པ་གཞན་གཉིས་དང་། སྲིད་སྐྱོང་བློ་བཟང་སེང་གེ་མཆོག་དང་བཀའ་བློན་རྣམ་པ། དེ་བཞིན་བོད་མི་མང་སྤྱི་འཐུས་ཚོགས་གཙོ་གཞོན་གྱི་དབུས་སྤྱི་འཐུས་རྒྱུན་ལས་རྣམ་པ། སྐུ་མགྲོན་གཙོ་བོ་རྒྱ་གར་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་འགན་འཛིན་ཤན་ཐ་ཀུ་མུར་(Shanta Kumar)མཆོག་དང་། དམིགས་བསལ་སྐུ་མགྲོན་རྒྱ་གར་དབུས་གཞུང་གི་བུད་མེད་དང་བྱིས་པའི་ལས་འཆར་ཡར་རྒྱས་བློན་ཆེན་ལྕམ་མི་ནི་ཀཱ་གྷན་རྡི་(Meneka Gandhi)མཆོག་རྣམ་གཉིས་ཀྱི་གཙོས་དེ་མིན་གྱི་གྲོས་ཚོགས་འཐུས་མི་ ༤ བཅས་ཆེད་ཕེབས་གནང་ཡོད་པ་དང་། དེ་བཞིན་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་ཆུང་དང་རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། སྲི་ཞུ་ལས་བྱེད། གཞན་ཡང་། གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་སྐུ་ཚབ་རྣམ་པ་དང་། སློབ་ཕྲུག་གི་གཙོས་དྷ་ས་ཁུལ་གྱི་སེར་སྐྱ་མི་མང་བཅས་ཁྱོན་མི་གྲངས་ ༣༠༠༠ ཡས་མས་འཛོམས་འདུག

མཛད་སྒོའི་ཐོག་མར་ཚང་མ་སྐུ་བཞེངས་ཀྱིས་བོད་དང་རྒྱ་གར་གྱི་རྒྱལ་དར་བསྒྲེངས་འཛུགས་གནང་བ་དང་བསྟུན་རྒྱལ་ཁབ་གཉིས་ཀྱི་རྒྱལ་གླུ་ཕུལ་བ་དང་། བོད་ཀྱི་ཟློས་གར་ཚོགས་པས་དམངས་གཙོའི་གསར་གཞས་ཕུལ་གྲུབ་རྗེས། འདི་ལོའི་དགའ་ལྡན་ཕོ་བྲང་གི་གཟེངས་རྟགས་ཐོབ་མཁན་སློབ་མ་ ༩ དང་། སྲིད་སྐྱོང་གཟེངས་རྟགས་དང་སྲིད་སྐྱོང་སློབ་ཡོན་གཟེངས་རྟགས་ཐོབ་པའི་འབུམ་རམས་སློབ་ཐོན་གྱི་སློབ་མ་ ༢ དང་། དཔལ་འབྱོར་ལས་ཁུངས་ཀྱི་ཚོང་ལས་ཡར་རྒྱས་རམ་འདེགས་ཚན་པའི་ལས་གཞིའི་འོག ཁྱད་ལས་ཚོང་པ་གསར་པ་ཁག་ཅིག་ལ་༼ཁྱད་མཁས་ཚོང་པ་གསར་པའི་མ་དངུལ་རོགས་སྐྱོར་གཟེངས་རྟགས༽བཅས་གནང་སོང་བ་དང་འབྲེལ། བོད་ཀྱི་ཟློས་གར་ཚོགས་པ་དང་བོད་མིའི་སྒྲིག་འཛུགས་ཀྱི་ལས་བྱེད། དེ་བཞིན་ཉེ་འཁོར་སློབ་གྲྭ་ཁག་ནས་གཞས་སྣ་གཟིགས་འབུལ་བཅས་ཞུས་སོང་།

མཛད་སྒོའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་གི་གསུང་བཤད་ཡིག་ཐོག་ནས་སྒྲོག་སྦྱངས་གནང་སྐབས་ཕྱི་ལོ་ ༢༠༡༦ ལོའི་འོས་བསྡུའི་སྐོར་ལ་འབོད་སྐུལ་གནང་དོན། རིང་མིན་མང་ཚོགས་ཀྱིས་བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྐབས་བཅུ་དྲུག་པའི་བོད་མི་མང་སྤྱི་འཐུས་ཀྱི་འོས་བསྡུ་གནང་རྒྱུ་ཡིན་ཞིང་། སྔོན་འགྲོའི་འོས་བསྡུ་ཕྱི་ལོ་ ༢༠༡༥ ཟླ་ ༡༠ ཚེས་ ༡༨ ཉིན་དང་། དངོས་གཞིའི་འོས་བསྡུ་ཕྱི་ལོ་ ༢༠༡༦ ཟླ་ ༣ ཚེས་ ༢༠ ཉིན་བཅས་སོ་སོར་གནང་གཏན་འཁེལ་ཡོད་སྟབས་བཙན་བྱོལ་བོད་མིའི་བཅའ་ཁྲིམས་དང་འོས་བསྡུའི་སྒྲིག་གཞི་ནང་གསལ་འོས་ཆོས་ཚང་བའི་བོད་མི་ཀུན་གྱི་འོས་བསྡུའི་ལས་རིམ་ནང་མཉམ་ཞུགས་གནང་རྒྱུ་གལ་ཆེན་ཡིན་པ་མ་ཟད། བོད་ཀྱི་ཆབ་སྲིད་ཀྱི་གནས་སྟངས་གཉན་འཕྲང་ཆེ་བ་དང་། བཙན་བྱོལ་བོད་མིའི་གནས་བབ། རང་ཅག་རྣམས་ཀྱི་བསྒྲུབ་བྱ་ཇི་ཡིན་སོགས་ཕྱོགས་ཡོངས་ཀྱི་གནས་སྟངས་ལ་བསམ་ཞིབ་ཀྱིས་བོད་མིའི་མངོན་འདོད་བསྒྲུབ་པར་བྱེད་མཁན་འགོ་ཁྲིད་འོས་བསྡུ་བྱ་རྒྱུའི་ཐོབ་ཐང་དང་འགན་འཁུར་གཉིས་ཀ་མི་མང་ལ་ཡོད། ཡང་སྲིད་སྐྱོང་དང་སྤྱི་འཐུས་ཀྱི་འོས་མིར་བཞུགས་མཁན་དང་རྒྱབ་སྐྱོར་གནང་མཁན་ཀུན་གྱིས་བོད་ཀྱི་ཐུན་མོང་མ་ཡིན་པའི་ཡ་རབས་བཟང་སྤྱོད་ཀྱི་ཁྱད་རྣམ་མ་དོར་བའི་སྒོ་ནས་གཏམ་བཤད་དང་བསྒྲགས་གཏམ་སོགས་གནང་དགོས་ཞེས་གལ་ཆེ་ནན་ཏན་གྱི་འབོད་བསྐུལ་ཞུ་རྒྱུ་ཡིན། ཞེས་གསུངས་སོང་།

བཙན་བྱོལ་བོད་མིས་དམངས་གཙོའི་ལམ་ལུགས་ལག་བསྟར་གནང་བཞིན་པ་འདིས་རྒྱ་ནག་གི་གཙོས་རྒྱལ་སྤྱིའི་ཐོག་བོད་མིའི་རང་དབང་དམངས་གཙོའི་མངོན་འདོད་ཀྱི་བརྡ་ལན་གསལ་པོ་ཞིག་སྤྲད་ཡོད་སྐོར་ཁོང་གིས། རྒྱ་གཞུང་གི་གཙོས་རྒྱལ་སམུ་མཐུད་དུ། ང་ཚོས་སྤྲོ་སྣང་ཆེན་པོའི་སྒོ་ནས་དམངས་གཙོའི་ལམ་ལུགས་ལག་བསྟར་བྱེད་བཞིན་པ་འདིས། རྒྱ་ནག་གཞུང་གིས་གཙོས་རྒྱལ་སྤྱིའི་སྤྱི་ཚོགས་ལ་བོད་མི་རིགས་ཀྱི་རང་དབང་དམངས་གཙོའི་མངོན་འདོད་མཚོན་པའི་བརྡ་ལན་གསལ་པོ་ཞིག་སྤྲད་ཐུབ་པ་ཡོང་རྒྱུ་མ་ཟད། གཞིས་བཞུགས་བོད་རིགས་སྤུན་ཟླ་རྣམས་ལའང་གདུང་སེམས་མཉམ་བསྐྱེད་དང་། སྙིང་སྟོབས་འཕེལ་གཞིར་ཡང་འགྱུར་རྒྱུ་ཡིན།

དགའ་འོས་པ་ཞིག་ལ་རྒྱལ་སྤྱིའི་སྤྱི་ཚོགས་ཀྱིས་བཙན་བྱོལ་བོད་མིའི་དམངས་གཙོའི་ལས་རིམ་ལ་དོ་སྣང་བྱེད་བཞིན་ཡོད། ཕྱི་ལོ་ ༢༠༡༡ ལོའི་སྲིད་སྐྱོང་གི་འོས་བསྡུའི་སྐབས་གསར་འགྱུར་བརྒྱུད་ལམ་ཁག་ནང་དྲིལ་བསྒྲགས་ཤུགས་ཆེ་བྱུང་ཡོད་པ་མ་ཟད། ཕྱི་ལོ་ ༢༠༡༢ ལོར་བཞག་པའི་ཨ་རིའི་གྲོས་ཚོགས་གོང་མའི་གྲོས་ཆོད་ཨང་ ༣༥༦ གིས་མཚོན་པའི་སྲིད་གཞུང་གི་བསྒྲགས་གཏམ་ཁག་གཅིག་གི་ནང་དུའང་འོས་བསྡུའི་སྐོར་འཁོད་ཡོད། དེ་མཚུངས་འབྱུང་ཉེའི་འོས་བསྡུའི་ཐད། ཨ་རིའི་གྲོས་ཚོགས་འོག་མས་ཕྱི་ལོ་ ༢༠༡༥ ཟླ་ ༧ ཚེས་ ༨ ཉིན་གྲོས་ཆོད་ཨང་ ༣༣༧ གཏན་འབེབས་གནང་ཡོད་པ་དེའི་ནང་རིང་མིན་འགོ་འཛུགས་བྱ་རྒྱུའི་འོས་བསྡུ་ཆེན་མོའི་སྐབས་བཙན་བྱོལ་བོད་མི་རྣམས་ཀྱིས་བོད་མིའི་སྒྲིག་འཛུགས་ཀྱི་འགོ་ཁྲིད་སྲིད་སྐྱོང་འོས་འདེམས་བྱེད་ཀྱི་ཡོད་སྟབས། འོས་བསྡུའི་ལས་རིམ་དེ་དག་ལ་ཨ་རིའི་སྲིད་གཞུང་གིས་ངོས་འཛིན་དང་། རྒྱལ་སྤྱིའི་ཐོག་དྲིལ་བསྒྲགས་དང་དོ་ཁུར་སླེབས་ཐབས་ཀྱི་འབད་བརྩོན་བྱ་དགོས།

བོད་མིའི་མངོན་འདོད་བསྒྲུབ་ཐབས་སུ་བཀའ་ཤག་གིས་དབུ་མའི་ལམ་གྱི་སྲིད་བྱུས་ལག་བསྟར་བྱེད་དང་བྱེད་མུས་ཡིན། ཞི་ཅིན་ཕིང་གིས་དབུ་འཁྲིད་པའི་རྒྱ་ནག་གཞུང་གིས་གྲོས་མོལ་གྱི་ལམ་ནས་བོད་དོན་དཀའ་རྙོག་སེལ་ཐབས་བྱ་རྒྱུ་དེ་ཉིད་ཐབས་ལམ་བཟང་ཤོས་ཡིན་པ་གོ་རྟོགས་རྙེད་པའི་རེ་བ་ཡོད། དབུ་མའི་ལམ་གྱི་སྲིད་བྱུས་དེས་རང་རྒྱལ་གཞན་ཕམ་མ་ཡིན་པར་ཕྱོགས་གཉིས་ཀའི་ཁེ་ཕན་ལ་བརྩི་བཀུར་བྱེད་ཀྱི་ཡོད་སྟབས། རྒྱལ་སྤྱིའི་ཁྱོན་ཡོངས་ནས་རྒྱབ་སྐྱོར་ཤུགས་ཆེ་ཐོབ་ཡོད། ཅེས་གསུངས་སོང་།

ཡང་དུས་ཆེན་དང་འབྲེལ་བའི་གསུང་བཤད་གནང་སྐབས། དེ་རིང་ནི་བཀའ་ཤག་སྐབས་བཅུ་བཞི་པའི་ལས་ཡུན་རིང་གི་དམངས་གཙོའི་དུས་ཆེན་ཐེངས་ལྔ་པ་དེ་ཡིན། དུས་ཡུན་ལོ་བཞིའི་རིང་མང་ཚོགས་ཁྲོད་དམངས་གཙོའི་ཉམས་མྱོང་དང་གོ་རྟོགས་བཟང་དུ་ཕྱིན་ཡོད་པ་དང་། དེ་བཞིན་མང་ཚོགས་ཀྱི་བགྲོ་གླེང་གི་ནང་དོན་དང་ཁ་ཕྱོགས་ཀྱང་བཟང་དུ་ཕྱིན་ཡོད། མ་འོངས་པར་ཡང་དེ་མཚུངས་མུ་མཐུད་ཡར་རྒྱས་གོང་འཕེལ་འགྲོ་རྒྱུ་ཡིན་པ་ང་ཚོས་གདེང་ཚོད་ལྡན་པའི་སྒོ་ནས་བརྗོད་ཐུབ། དམངས་གཙོའི་རིང་ལུགས་ཀྱི་ཐབས་ལམ་ལ་བརྟེན་ནས་ཇི་སྲིད་བོད་དོན་བདེན་མཐའ་མ་གསལ་གྱི་བར་བོད་མིའི་འཐབ་རྩོད་མུ་མཐུད་གནས་རྒྱུ་ཡིན། རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བ་དབུ་བརྙེས་ནས་མི་ལོ་ ༥༠ འཁོར་བའི་དུས་ཆེན་སྲུང་བརྩི་བྱ་རྒྱུ་དང་པེ་ཅིང་ནས་ཆེས་མཐོའི་འགོ་འཁྲིད་ཚང་འཛོམས་བྱ་འཆར་གྱི་གནས་ཚུལ་ཐོན་འདུག་རུང་། བོད་ནང་གི་དངོས་ཡོད་གནས་སྟངས་ལ་བལྟས་ན་དེ་ལྟར་སྲུང་བརྩི་བྱ་དགོས་པའི་རྒྱུ་མཚན་གང་ཡང་མཐོང་རྒྱུ་མེད། ཅེས་སོགས་གསུངས་སོང་།

སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་ཡིག་ཐོག་ནས་སྒྲོག་སྦྱངས་གནང་སྐབས། ཕྱི་ལོ་ ༢༠༡༦ ལོའི་སྤྱི་འཐུས་ཀྱི་འོས་བསྡུའི་སྐོར་ལ་འབོད་སྐུལ་གནང་དོན། དེང་སྐབས་བོད་མིའི་དམངས་གཙོའི་སྒྲིག་འཛུགས་ཀྱི་ཁྲིམས་ལུགས་དབང་འཛིན་ཕུད་པའི་སྒྲིག་འཛུགས་གལ་ཆེ་ཤོས་གཉིས་ཏེ་བོད་མིའི་སྒྲིག་འཛུགས་ཀྱི་ཆབ་སྲིད་དང་འཛིན་སྐྱོང་གི་དབུ་འཁྲིད་སྲིད་སྐྱོང་དང་། ཁྲིམས་བཟོ་ལྷན་ཚོགས་སམ། བོད་མི་མང་སྤྱི་འཐུས་སྐབས་ ༡༦ པའི་སྤྱི་འཐུས་རྣམས་ཀྱི་འོས་བསྡུ་ཆེན་མོ་གཉིས་སླེབས་ལ་ཉེ་བའི་སྐབས་འདིར་སྤྱི་ཚོགས་ནང་བགྲོ་གླེང་དང་། དོ་སྣང་ཆེན་པོ་བྱེད་བཞིན་པ་གང་ལེགས་དང་། སྲིད་སྐྱོང་དང་། འཐུས་མི་འོས་འདེམས་ཀྱི་གོ་སྐབས་འདི་ལྟ་བུ་ནི་ལོ་ལྔ་རེའི་མཚམས་སུ་མ་གཏོགས་ཡོང་རྒྱུ་མེད་ཅིང་། དམངས་གཙོའི་རིང་ལུགས་ཅན་གྱི་སྒྲིག་འཛུགས་ནང་འོས་བསྡུའི་ལས་རིམ་འདི་བཞིན་མང་ཚོགས་ཀྱི་ལས་འགན་གལ་གནད་ཅན་ཞིག་ཡིན་པས་འོས་བསྡུའི་དེབ་སྐྱེལ་དང་། དངོས་སུ་འོས་འཕེན་ཁག་བཅས་པར་མཉམ་ཞུགས་ངེས་པར་གནང་དགོས་ཤིན་ཏུ་གལ་ཆེ་ཡིན་ཞིང་། དེ་ཡང་གཞན་གྱི་བརྒྱུད་སྐུལ་དང་། ཟེར་རྗེས་ཙམ་གྱི་རྗེས་སུ་མི་འབྲང་པར་སོ་སོའི་རྣམ་དཔྱོད་ཀྱི་ཐོག་ནས་རང་དབང་གིས་སྲིད་སྐྱོང་དང་། སྤྱི་འཐུས་ཚད་ལྡན་འོས་འདེམས་ཐུབ་པའི་བོད་ཀྱི་ཡུལ་མིའི་ལས་འགན་ངེས་པར་འཁུར་དགོས། དེ་བཞིན་བོད་མི་མི་ཉུང་བ་ཞིག་ཕྱིའི་རྒྱལ་ཁབ་ཀྱི་ཡུལ་གྲུ་གང་སར་རིམ་བསྐྱོད་བྱས་དང་བྱེད་བཞིན་པ་རྣམས་མང་ཆེ་བ་ས་གནས་ཁ་འཐོར་གྱིས་གནས་སྡོད་ཡོད་པ་ཚང་མས་ཀྱང་གོང་བཞིན་འོས་བསྡུའི་ལས་དོན་ལ་མཐོང་ཆེན་ངང་མཉམ་ཞུགས་ཐུབ་པའི་ཐུགས་སྣང་འགན་འཁུར་ཆེར་བསྐྱེད་དགོས་པ་དེ་རིང་གི་གོ་སྐབས་འདི་བརྒྱུད་ནས་འབོད་སྐུལ་ནན་ཙམ་ཞུ་རྒྱུ་ཡིན།

བཙན་བྱོལ་བོད་མིའི་འོས་བསྡུའི་བྱ་རིམ་འདིར་འཛམ་གླིང་ས་ཕྱོགས་གང་ས་ནས་ཐུགས་སྣང་ཆེན་པོས་གཟིགས་བཞིན་ཡོད་པས་འོས་བསྡུའི་ལས་དོན་དང་འབྲེལ་བའི་ལས་ཀྱི་སྣེ་མོར་གཏོགས་པ་ཀུན་གྱིས་ཀྱང་འོས་བསྡུའི་ལས་དོན་གང་ཡང་ཁྲིམས་སྒྲིག་དང་མཐུན་ཞིང་དྲང་བདེན་ངང་གནང་སྟེ་ཕྱིས་འབྱུང་རྩོད་རྙོག་གམ་གླེང་ལྷག་རིགས་མི་འབྱུང་བའི་ཐུགས་འགན་གཟབ་ནན་གནང་གལ་ཆེ་ཞེས་དེ་རིང་གོ་སྐབས་འདི་བརྒྱུད་ནས་ཞུ་རྒྱུ་ཡིན། ཞེས་གསུངས་སོང་།

ཡང་ཁོང་གིས་དེ་རིང་བཙན་བྱོལ་བོད་མི་རྣམས་ཀྱིས་རང་དབང་དམངས་གཙོའི་དུས་དྲན་ཉིན་མོ་སྲུང་བརྩི་ཞུ་བའི་དུས་ཚོད་གལ་ཆེ་ཞིག་ཆགས་ཡོད་ནའང། གཞིས་ལུས་རྒྱ་ཆེའི་སྤུན་ཟླ་མི་མང་རྣམས་རྒྱ་གཞུང་གི་བཙན་དབང་འོག་དམངས་གཙོ་དང། རང་དབང། དྲང་བདེན་བཅས་མེད་ཁར། ཉེས་མེད་བོད་མི་མང་པོ་བཙོན་འཇུག་སོགས་མནར་གཅོད་ཀྱི་སྡུག་བསྔལ་མྱོང་བཞིན་ཡོད་པ་དང། རྒྱ་ནག་རྒྱ་ཆེའི་མང་ཚོགས་རྣམས་ཀྱང་རྒྱ་ནག་དམར་པོའི་སྲིད་གཞུང་གི་མགོ་འཁྲིད་ཚོའི་གཅིག་སྡུད་ཀྱི་དབང་བྱུས་འོག་འཛམ་གླིང་ཡུལ་གྲུ་གཞན་ལྟར་གང་ཅིའི་རང་དབང་མེད་པའི་གནས་སྟངས་ཀུན་གྱིས་མཁྱེན་གསལ་ལྟར། དེང་སང་དཀྱིལ་ཤར་ཡུལ་གྲུ་སོགས་ཀྱི་ནང་དུ་རང་དབང་དམངས་གཙོའི་ལམ་ལུགས་ལ་དོ་སྣང་དང་འགྱུར་བ་ཤུགས་ཆེ་འགྲོ་བཞིན་པ་ལྟར། རྒྱ་ནག་གཞུང་གི་ཆབ་སྲིད་ལམ་ལུགས་ཀྱང་རིམ་པས་རང་དབང་དམངས་གཙོ་ཅན་དུ་བསྒྱུར་སླད་རྒྱལ་སྤྱིའི་ཁྱོན་ནས་གནོན་ཤུགས་ནན་ཏན་སྤྲོད་དགོས་པ་དུས་ཚོད་ཀྱི་དགོས་མཁོ་ཤིན་ཏུ་གལ་ཆེ་ཞིག་ཏུ་མཐོང་། ཞེས་དང་།

བོད་རང་སྐྱོང་ལྗོངས་བཙུགས་ནས་ལོ་ ༥༠ འཁོར་བའི་དུས་དྲན་ཟེར་བ་དེ་བོད་མི་ཚོའི་ངོས་ནས་ཡ་ང་བའི་དུས་དྲན་ཞིག་ཏུ་ངོས་འཛིན་གྱིས་དྲན་གསོ་བྱེད་དགོས་སྐོར་གསུངས་དོན། ཕྱི་ལོ་ ༢༠༡༥ ལོའི་ཟླ་ ༩ པའི་ ༡ ཉིན། བོད་རང་སྐྱོང་ལྗོངས་ཟེར་བ་བཙུགས་ཏེ་མི་ལོ་ ༥༠ འཁོར་བའི་དུས་དྲན་ཡིན་ཟེར་བ་དང་འབྲེལ་བོད་ནང་ཡར་རྒྱས་བཏང་ལུགས་ཀྱི་ཁྱབ་བསྒྲགས་ཤུགས་ཆེ་བྱས་ཡོད་ཀྱང་དོན་དངོས་སུ་མི་ལོ་ ༥༠ དེའི་རིང་གུང་ཁྲན་སྲིད་གཞུང་གི་བཀའ་བཀོད་འོག་ཁྲིམས་སྲོལ་འདྲ་མིན་མང་དག་བཟོས་ཏེ་གཞིས་ལུས་བོད་མི་རྣམས་རྒྱའི་བྲན་གཡོག་ཏུ་བཀོལ་ནས་མི་ལོ་ ༥༠་ཕྱིན་ཟིན་པའི་དུས་ཚིགས་ཤིག་ཆགས་ཡོད་ལ། བོད་ཆོལ་ཁ་གསུམ་གྱི་ས་ཁྱོན་རྣམས་ད་ལྟ་བོད་རང་སྐྱོང་ལྗོངས་ཟེར་བ་འདི་དང་། མཚོ་སྔོན་ཞིང་ཆེན། སི་ཁྲོན་ཞིང་ཆེན། ཡུ་ནན་ཞིང་ཆེན། ཀན་སུའུ་ཞིང་ཆེན་ཟེར་བ་བཅས་ནང་དུམ་བུར་བཏང་སྟེ་ཁ་བྲལ་བཟོས་ནས་མི་ལོ་ ༥༠ ཐམ་པ་འཁོར་བའི་དུས་དྲན་ཞིག་དང་། བོད་ནང་རིག་གནས་གསར་བརྗེ་ཟེར་བ་སོགས་བོད་ཀྱི་ཆོས་དང་རིག་གཞུང་རྩ་མེད་གཏོང་བའི་ལས་འགུལ་ཟམ་མ་ཆད་པ་སྤེལ་ནས་མི་ལོ་ ༥༠ འཁོར་བའི་དུས་དྲན་ཞིག  ༧ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གིས་དབུས་བྱ་བྲལ་བྱམས་པ་འཕྲིན་ལས་རིན་པོ་ཆེ་སོགས་བོད་ཀྱི་རྒྱལ་གཅེས་དཔའ་བོ་དཔའ་མོ་རྣམས་ལ་མ་ཉེས་ཁག་གཡོགས་ཀྱི་ཉེས་འཛུགས་བྱེད་མཁན་ཁ་ཞེ་མི་མཚུངས་པའི་རང་སྐྱོང་མིན་པ་གཞན་སྐྱོང་ཞིག་བཙུགས་ཏེ་མི་ལོ་ ༥༠ འཁོར་བའི་དུས་དྲན་ཞིག བོད་ནང་དམིགས་བསལ་གྱི་སྲིད་བྱུས་ལག་བསྟར་བྱས་ནས་གཞིས་ལུས་བོད་མི་རྣམས་ལ་སྨྲ་བརྗོད་ཀྱི་རང་དབང་དང་། འགྲོ་འོང་གི་རང་དབང་། ཆོས་དད་ཀྱི་རང་དབང་། རང་ལུས་ལ་རང་དབང་སོགས་འགྲོ་བ་མིའི་ཐོབ་ཐང་ཡེ་ནས་བྲལ་ཏེ་མི་ལོ་ ༥༠ འཁོར་བའི་དུས་དྲན་ཞིག བོད་ནང་གདུག་རྩུབ་ཇེ་ཆེ་ཇེ་སྡུག་ཏུ་གཏོང་ཆེད་ལོ་ལྔ་ཚན་གྱི་དྲག་གནོན་གྱི་ཁྲིམས་ངན་སྲིད་བྱུས་ཀྱི་འོག་བོད་མི་གྲངས་ལས་འདས་པ་བཙོན་འཇུག་དང་གཅར་རྡུང་སུན་གཙེར་བཅས་བྱས་ཏེ་དུས་མིན་རྐྱེན་འདས་དང་། གར་ཡོད་ཆ་མེད་དུ་བཏང་ནས་མི་ལོ་ ༥༠ འཁོར་བའི་དུས་དྲན་ཞིག གུང་ཁྲན་སྲིད་དབང་སྒེར་སྤྱོད་རིང་ལུགས་པས་བོད་ནང་རང་ཐག་རང་གཅོད་ཀྱི་འགྲོ་ལམ་མེད་པ་བཟོས་ཏེ་གཞིས་ལུས་བོད་མི་རྣམས་ཆེས་མུན་ནག་གི་ཁྲོད་དུ་གནས་ཏེ་མི་ལོ་ ༥༠ འཁོར་བའི་ཡ་ང་བའི་དུས་དྲན་ཞིག་ཏུ་ངོས་འཛིན་གྱིས་ང་ཚོས་ཀྱང་དྲན་གསོ་བྱེད་དགོས་པ་ཞིག་ཡིན། ཞེས་སོགས་གསུངས་སོང་།

མཛད་སྒོའི་དམིགས་བསལ་སྐུ་མགྲོན་ལྕམ་མི་ནི་ཀཱ་གྷན་རྡི་མཆོག་གིས་བོད་མིའི་རྒྱལ་ཞེན་དང་མི་རིགས་ཀྱི་ངོ་བོ་གཅེས་འཛིན་བྱེད་བཞིན་པར་རྗེས་སུ་ཡི་རང་ཡོད་སྐོར་གསུངས་དོན། ཁྱེད་རྣམ་པ་འདིར་བསླེབས་པ་ནས་བཟུང་ངའི་ནང་མི་དང་བོད་མིའི་འཐབ་རྩོད་ལས་འགུལ་བར་འབྲེལ་བ་དམ་ཟབ་བྱུང་ཡོད་པ་ལྟར། ང་དང་ངའི་བུས་ལམ་སྲོལ་འདི་མུ་མཐུད་དམ་ཟབ་ཉར་རྒྱུ་ཡིན་པ་མ་ཟད། ཁྱེད་རྣམ་པ་འདིར་ཕེབས་པར་ཧ་ཅང་དགའ་པོ་བྱུང་ཞེས་ཞུ་རྒྱུ་ཡིན། ད་ལན་བོད་མི་དང་བོད་མིའི་འཐབ་རྩོད་ཐད་ང་ལ་རྒྱུས་མངའ་ཐོག་མ་བྱུང་བ་གང་ཡང་མ་རེད། གང་ཡིན་ཟེར་ན། ངའི་པ་ལགས་དམག་ཞབས་ཡིན་སྐབས། ཁོང་ཨིན་ཌུ་དམག་སྒར་ལ་གནས་སྤོ་གནང་བར་བརྟེན་ང་ཆུང་དུས་ནས་རྡ་རམ་ས་ལར་རྟག་པར་ཡོང་གི་ཡོད་སྟབས། ཁྱེད་རང་ཚོ་ང་ལ་རྒྱུས་མངའ་ཡོད་ཡོད་པ་རེད། ཁ་སང་བོད་ཀྱི་ཟློས་གར་ཚོགས་པས་ཉམས་འགྱུར་དང་ལྡན་པའི་ཐོག་ནས་བོད་ཀྱི་ཐུན་མོང་མིན་པའི་རིག་གཞུང་འཁྲབ་སྟོན་གནང་བ་དང་འབྲེལ་ནས་ངས་ཁྱེད་ཚོར་ག་རེ་ཞུ་འདོད་བྱུང་ཟེར་ན། འཛམ་གླིང་སྟེང་གི་རྒྱལ་ཁབ་མང་པོ་ཞིག་རྒྱལ་ཁབ་གཞན་གྱིས་བཙན་འཛུལ་བྱས་ཡོད་པ་མ་ཟད། རྒྱལ་ཁབ་མང་པོ་ཞིག་གི་རང་གི་ཐུན་མོང་མིན་པའི་ངོ་བོ་རྩ་བརླག་ཕྱིན་ཡོད་ཀྱང་། ཁྱེད་ཚོས་རང་ཉིད་ཀྱི་རིག་གཞུང་དང་སྐད་ཡིག་ཉར་ཚགས་ལེགས་པོ་བྱས་པ་དང་། རྒྱལ་ཁབ་ལ་བཅངས་པའི་རྒྱལ་ཞེན་ཉམས་མེད་གསོན་པོར་གནས་ཡོད་པ་དེ་གཟི་བརྗིད་དང་སྤོབས་པ་སྐྱེ་གཞི་ཞིག་ཆགས་ཡོད་པ་མ་ཟད། ལྷག་པར་དུ་ལོ་ཆུང་བྱིས་པ་ཚོས་ཀྱང་སོ་སོའི་མི་རིགས་དང་རྒྱལ་ཁབ་ལ་སྤོབས་པ་ཆེན་པོ་བྱེད་བཞིན་ཡོད་པ་མཐོང་འཕྲལ་ང་ཚོར་སྐུལ་ལྕག་ཆེན་པོ་ཐེབས་བྱུང་། ཁྱེད་ཚོའི་འཐབ་རྩོད་ནི་ཡུན་རིང་དཀའ་ཚེགས་ཆེ་བ་ཞིག་ཡིན་ཡང་། ང་ཚོ་རྒྱ་གར་བ་ཚོས་ཁྱེད་ཅག་གིས་སོ་སོའི་རྒྱལ་ཁབ་དང་མི་རིགས་ལ་བཅངས་པའི་ཉམས་མེད་ཀྱི་རྒྱལ་ཞེན་ལ་བསྔགས་བརྗོད་དང་རྗེས་སུ་ཡི་རང་ཞུ་བཞིན་ཡོད། ཅེས་སོགས་གསུངས་སོང་།

མཇུག་ཏུ་སྐུ་མགྲོན་གཙོ་བོ་གྲོས་ཚོགས་འཐུས་མི་ཤན་ཐ་ཀུ་མུར་མཆོག་གིས། བོད་མི་ཚོ་སོ་སོའི་ལུང་པ་དང་ཁ་བྲལ་ནས་ལོ་ངོ་ ༥༠ ལྷག་འགྲོ་བཞིན་ཡོད་ཀྱང་། མུ་མཐུད་སོ་སོའི་ཆོས་དང་རིག་གཞུང་ལ་བདག་པོ་རྒྱག་ཐུབ་ཀྱི་ཡོད་པ་མ་ཟད། བོད་དང་རྒྱ་གར་ཙམ་མ་ཡིན་པར་འཛམ་གླིང་ཡུལ་གྲུ་གང་སར་གནས་སྡོད་བྱེད་བཞིན་ཡོད་པའི་བོད་མི་ཡོད་དོ་ཅོག་གིས། བོད་རང་དབང་གི་འཐབ་རྩོད་དེ་ཞི་བའི་ཐོག་ནས་བརྩོན་ལེན་གནང་གི་ཡོད་པ་དེ་ཧ་ཅང་ཡག་པོ་ཡིན་པ་དང་། འདས་པའི་ལོ་རྒྱུས་ཁྲོད་བོད་དང་རྒྱ་གར་གཉིས་ཆོས་ལུགས་དང་སྐད་ཡིག་རིག་གཞུང་གི་ཐོག་ནས་འབྲེལ་བ་གཏིང་ཟབ་ཡོད་པ་དེ་རྒྱུན་སྐྱོང་བཞིན་ཡོད་ལ། མ་འོངས་པར་ཡང་རྒྱུན་སྐྱོང་གནང་དགོས་པ་དང་། རྒྱ་གར་མི་མང་དང་གྲོས་ཚོགས་ཀྱི་ངོས་ནས་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་གནང་མུས་ཡིན་པ་ལྟར་མ་འོངས་པར་ཡང་མུ་མཐུད་རྒྱབ་སྐྱོར་གནང་རྒྱུ་ཡིན་སྐོར་སོགས་གསུངས་སོང་།

གསར་འགོད་པ། པདྨ་མཚོ།