དྲག་སྤྱོད་པའི་དགོས་འདུན།

ཨི་རག་དང་སི་རེ་ཡའི་མཉམ་འབྲེལ་དྲག་སྤྱོད་ཤོག་ཁག་གིས་བཙན་ཁྲིད་བྱས་པའི་མི་གཏའ་གཉིས་ཕྱིར་བསྒྲགས་བྱས་ཏེ་བླུ་ཡོན་སྤྲོད་དགོས་པའི་དགོས་འདུན་བཏོན་འདུག

ཁ་སང་སི་རེ་ཡ་དང་ཨི་རག་མཉམ་འབྲེལ་དྲག་སྤྱོད་ཤོག་ཁག་གིས་དྲག་སྤྱོད་པའི་དྲ་ཐོག་དུས་དེབ་ཌ་བྷེ་ཁུའུ་ (Dabiq) ཞེས་པའི་སྟེང་བཙོན་པའི་གྱོན་གོས་སེར་པོ་གཡོགས་པའི་མི་གཏའ་གཉིས་ཕྱིར་བསྒྲགས་བྱས་ཡོད་པ་མ་ཟད། ཁོ་གཉིས་ཀློད་གྲོལ་གཏོང་བར་བླུ་ཡོན་སྤྲོད་དགོས་པའི་དགོས་འདུན་བཏོན་འདུག

ཉེ་ལམ་དྲག་སྤྱོད་པས་འཇུ་བཟུང་བཀག་བསྐྱིལ་བྱས་པའི་མི་དེ་གཉིས་ཀྱི་ཁྲོད་ནས་གཅིག་ནི་ནོར་ཝེ་རྒྱལ་ས་ཨོ་སོ་ལོ་ནས་ཡིན་པའི་རང་ལོ་༤༠ ལ་སོན་པ་ཨོ་ལེ་ཇོ་ཧན་ (Ole Johan Grimsgaard-Ofstad) དང་། གཞན་དེ་རྒྱ་ནག་རྒྱལ་ས་པེ་ཅིང་ནས་ཡིན་པའི་རང་ལོ་ ༥༠ ཅན་གྱི་རྒྱ་ནག་གི་ཡུལ་མི་ཧྥན་ཅིན་ཧེ་ (Fan Jinghui) ཟེར་བ་གཉིས་ཡིན་པ་ཕྱིར་བསྒྲགས་བྱས་ཡོད་ཀྱང་། ཁོ་གཉིས་ག་དུས་བཙན་ཁྲིད་བྱས་མིན་དང་ས་གནས་ག་པར་བཀག་ཉར་བྱས་ཡོད་མེད་ཀྱི་གསལ་ཁ་གང་ཡང་བཏོན་མི་འདུག

མི་དེ་གཉིས་ཀྱི་པར་རིས་འོག་ཏུ་མི་སྒེར་གྱི་ལོ་རྒྱུས་དང་ནང་གི་ཁ་བྱང་རགས་རིམ་དང་ཡི་གེ་འགའ་བྲིས་ཡོད་པའི་ནང་། དྲང་བདེན་ལ་མོས་པའི་འཐབ་རྩོད་པ་དང་ཆོས་མེད་སྨྲ་བ། ཆོས་གྲོགས་དང་འགྲོ་བ་མིའི་ཐོབ་ཐང་ཚོགས་པ་ཁག་ལ་ཞུ་རྒྱུར། ང་ཚོས་ཁོ་གཉིས་ནི་སོ་སོའི་རྒྱལ་ཁབ་ཀྱིས་ནུས་པ་བཏོན་ཏེ་བླུ་ཡོན་ཕོན་ཆེ་སྤྲད་དེ་བླུས་མེད་པའི་བདག་མེད་སེམས་ཅན་ཞིག་ལ་ངོས་འཛིན་བྱེད་ཀྱི་ཡོད། ཅེས་དང་། ཡང་དུས་དེབ་དེའི་ནང་ཁོ་གཉིས་ཀྱི་སྐོར་ལ་གསལ་བཤད་ཡི་གེ་ཞིག་བྲིས་ཡོད་པའི་ནང་། ཁོ་གཉིས་ལ་འགྲོ་གྲོན་བཏང་སྟེ་ཀློད་གྲོལ་ཐོབ་ཐབས་ཀྱི་ཚོང་འབྲེལ་བྱ་འདོད་ཡོད་ཚེ། གཤམ་འཁོད་ཁ་པར་ཨང་གྲངས་བརྒྱུད་འབྲེལ་གཏུག་བྱ་ཆོག་ཀྱང་དུས་ཚོད་ལ་དུས་བཀག་ཡོད། ཅེས་བྲིས་ཡོད་ཀྱང་། བླུ་ཡོན་ག་ཚོད་སྤྲོད་དགོས་མིན་དང་ག་དུས་དུས་བཀག་རྫོགས་མིན་གྱི་གསལ་བཤད་གང་ཡང་བྱས་མེད་པ་རེད།

ནོར་ལྦེའི་སྲིད་བློན་ཨར་ཎཱ་སོལ་བྷག་ (Erna Solberg) ལགས་ཀྱིས་གསར་འགོད་ལྷན་ཚོགས་ཤིག་གི་ཐོག དྲག་སྤྱོད་ཤོག་ཁག་གིས་ཕྱིར་བསྒྲགས་བྱས་པའི་མི་དེ་གཉིས་ཀྱི་ཁྲོད་ནས་གཅིག་ནོར་ཝེ་ཡི་མི་སེར་ཡིན་པ་མ་ཟད། ཁོང་དྲག་སྤྱོད་པས་འདི་ལོའི་ཟླ་ ༡ པོའི་ཟླ་མཇུག་ཏུ་སི་རེ་ཡ་ནས་འཛིན་བཟུང་བྱས་ཡོད་པའི་དཔང་རྟགས་གསལ་པོ་བྱུང་སོང་། ད་ལྟ་བཙན་ཁྲིད་པས་ཁོང་ཀློད་གྲོལ་གཏོང་བར་དགོས་འདུན་འདྲ་མིན་བཏོན་པ་དང་བླུ་ཡོན་ཕོན་ཆེ་སྤྲོད་དགོས་པའི་གནོན་ཤུགས་སྤྲོད་བཞིན་ཡོད་ཀྱང་། གཞུང་གིས་དྲག་སྤྱོད་པར་བླུ་ཡོན་ནམ་ཡང་སྤྲོད་མི་སྲིད། ཅེས་བརྗོད་འདུག

རྒྱ་ནག་གི་ཕྱོགས་ནས་གནད་དོན་དེའི་ཐད་ཅི་ཡང་བཤད་མེད་ཀྱང་། རྒྱ་ནག་གནད་དོན་ཆེད་མཁས་པ་མཱ་ཋེའུ་ (Mathieu Duchatel) ལགས་ཀྱིས། ད་བར་རྒྱ་ནག་གཞུང་ཕྱོགས་ཀྱིས་དཀྱིལ་ཤར་ཡུལ་གྲུའི་དྲག་སྤྱོད་ཤོག་ཁག་ལ་འཛིན་པའི་ལངས་ཕྱོགས་ཁ་གསལ་གང་ཡང་མེད་སྟབས། ད་ཐེངས་དྲག་སྤྱོད་པས་རྒྱ་ནག་གི་མི་སེར་དམར་གསོད་གཏང་བ་ཡིན་ན། མ་འོངས་པར་རྒྱ་ནག་གཞུང་གིས་ཨ་རིས་སྣེ་ཁྲིད་པའི་མནའ་མཐུན་རྒྱལ་ཁབ་ཁག་དང་མཉམ་འདེགས་བྱས་ཏེ། དྲག་སྤྱོད་པར་གནམ་ས་གཉིས་ཐོག་ནས་རྒོལ་རྡུང་གཏང་སྲིད་པ་ཞིག་རེད་ཅེས་བརྗོད་ཡོད་འདུག

གསར་འགོད་པ། དོན་གྲུབ།