ང་ཚོར་རྒྱབ་སྐྱོར་མ་བྱས་ན་དམངས་གཙོ་ཟེར་བའི་གཞུང་འདི་རུལ་སོང་བ་རེད།

ཇོ་ནང་བའི་དམིགས་བསལ་ཚོགས་ཆེན་ཐོག་ཆོས་རིག་བཀའ་བློན་མཆོག་གིས་ཆོས་རིག་ལས་ཁུངས་ནས་ཇོ་ནང་བའི་ལྟ་གྲུབ་དང་ཆོས་བརྒྱུད་ཀྱི་ཐོག་ནས་རང་རྐང་ཚུགས་པ་ཞིག་ཡིན་པར་ངོས་ལེན་དང་མཐུན་རྐྱེན་གང་ཐུབ་སྦྱོར་བཞིན་ཡོད་སྐོར་གསུངས་སོང་།

དེ་རིང་སྔ་དྲོའི་ཆུ་ཚོད་ ༩།༣༠ ཐོག་དྷ་ས་མེག་གྷན་སུར་ཡ་གསོལ་མགྲོན་ཁང་གི་ཚོགས་ཁང་དུ། འཕགས་ཡུལ་ཇོ་ནང་འགྲོ་ཕན་ལྷན་ཚོགས་ཀྱི་གོ་སྒྲིག་འོག ཇོ་ནང་པའི་བསྟན་པ་ཉམས་པ་སླར་གསོ་དང་མི་ཉམས་གོང་འཕེལ་གྱི་གཙོས་བཙན་བྱོལ་ནང་ཇོ་ནང་པའི་བསྟན་པ་དར་སྤེལ་གཏོང་ཕྱོགས་བཅས་ཀྱི་ཐད་དམིགས་བསལ་ཚོགས་ཆེན་ཐེངས་བདུན་པ་དབུ་འཛུགས་གནང་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་ཆོས་རིག་བཀའ་བློན་པདྨ་ཆོས་འབྱོར་མཆོག་གི་དབུས་ཇོ་ནང་རྒྱལ་ཚབ་རིན་པོ་ཆེ་མཆོག་དང་། བོད་མི་མང་སྤྱི་འཐུས་ལས་ཐོག་དང་སྤྱི་ཟུར། དྷ་སའི་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་དོན་གཉེར་ཅན། དེ་བཞིན་རྒྱ་བལ་འབྲུག་གསུམ་དང་། ཨ་རི། ཡུ་རོབ། ར་ཤི་ཡ། སོག་པོ། མ་ལེ་ཞི་ཡ། བོད་ནང་བཅས་ཀྱི་ཇོ་ནང་བའི་དགོན་པ་དང་ཆོས་ཚོགས་ཁག་གི་འཐུས་ཚབ་ ༡༤༠ ལྷག་བཅས་མི་གྲངས་ ༢༠༠ ཙམ་འཛོམས་འདུག

ལྷན་ཚོགས་ཀྱི་ཐོག་མར་སྐུ་མགྲོན་གཙོ་བོ་མཆོག་གིས་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེའི་སྐུ་མདུན་དུ་སྣང་གསལ་སྒྲོན་མེ་ཞལ་ཕྱེ་གནང་རྗེས། འཕགས་ཡུལ་འགྲོ་ཕན་ལྷན་ཚོགས་ཀྱི་ཚོགས་གཙོ་ཚངས་དབྱངས་རྒྱ་མཚོ་ལགས་ཀྱིས་ཚོགས་འདུ་ངོ་སྤྲོད་ཀྱི་གཏམ་བཤད་གནང་དོན། ང་ཚོ་ཇོ་ནང་ཆོས་བརྒྱུད་ཀྱི་ངོས་ནས་ཕྱི་ལོ་ ༡༩༩༧ ལོ་ནས་བཟུང་སྟེ། ཇོ་ནང་ཆོས་བརྒྱུད་འདི་ལ་ཆོས་བརྒྱུད་གཅིག་མཚུངས་ཀྱི་ཐོབ་ཐང་ཞིག་གནང་རོགས་ཞེས་སྐུ་སྒེར་ཡིག་ཚང་དང་། དེའི་རྗེས་གྲོས་ཚོགས་དང་སྤྱི་འཐུས་ལྷན་ཚོགས་བཅས་སུ་རིམ་པ་བཞིན་སྙན་ཞུ་བརྒྱབ་སྟེ། ད་བར་ངོ་ལོ་ ༡༨ ཙམ་འགྲོ་གི་ཡོད་པ་དང་། དེའི་རིང་ལ་གཞིས་ལུས་ཇོ་ནང་བ་ཡིན་ཡང་སྙན་ཞུ་བརྒྱ་ཕྲག་ཁ་ཤས་ཕུལ་ཡོད་པ་མ་ཟད། གཞིས་ལུས་བོད་མི་ཁྲི་གཉིས་གསུམ་གྱིས་མཚན་རྟགས་བཀོད་ཡོད་པའི་སྙན་ཞུ་ཡང་ཕུལ་ཡོད་པ་རེད། བཙན་བྱོལ་ནང་ལོགས་ནས་ཀྱང་སིམ་ལ་ཇོ་ནང་མ་དགོན་གྱིས་གཙོ་བྱས་ཏེ། འཕགས་ཡུལ་འགྲོ་ཕན་ལྷན་ཚོགས་དང་བལ་ཡུལ་ཇོ་ནང་དགོན་པ། ཕྱི་རྒྱལ་ཁག་ཏུ་ཡོད་པའི་ཇོ་ནང་བའི་ཆོས་ཚོགས་ཁག་ ༢༠ ལྷག་གི་ངོས་ནས་ཀྱང་། ད་བར་ཕལ་ཆེར་སྙན་ཞུ་བརྒྱ་ཕྲག་ལྔ་མ་ཟིན་ཙམ་ཞིག་ཕུལ་བ་བཅས་ལ་བརྟེན་ཏེ། ཕྱི་ལོ་ ༢༠༠༥ ལོར་གཞི་ནས་ཇོ་ནང་ཆོས་བརྒྱུད་སྐོར་དེ་གྲོས་ཚོགས་ནང་ལ་བཞུགས་མོལ་ཚོགས་འདུའི་ཐོག་བགྲོ་གླེང་བྱས་མཐར། བཀའ་ཤག་ངོས་ནས་ཇོ་ནང་ཆོས་བརྒྱུད་སྐོར་ལ་ཞིབ་འཇུག་ཚོགས་ཆུང་ཞིག་བསྐོ་དགོས་པའི་ཐག་གཅོད་བྱུང་པ་ལྟར། ཆོས་རིག་ལས་ཁུངས་ཀྱི་ངོས་ནས་འཕྲལ་དུ་གྲོས་ཚོགས་ནང་ཆོས་བརྒྱུད་ཀྱི་ཐོབ་ཐང་ཡོད་བཞིན་པའི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་འཐུས་ཚབ་ཡོད་པའི་ཚོགས་ཆུང་ཞིག་འཛུགས་རྒྱུ་ཐག་གཅོད་གནང་ཡོད་ཀྱང་། རྙིང་མ་དང་བཀའ་བརྒྱུད་ཀྱི་འཐུས་མི་མ་ཕེབས་པས་ཚོགས་ཆུང་དེ་འཛུགས་མ་ཐུབ་པ་རེད། དེར་བརྟེན་ང་ཚོས་ལོ་དྲུག་རིང་སྙན་ཞུ་རབ་དང་རིམ་པ་མང་པོ་བརྒྱབ་པ་རེད། ༢༠༡༡ ལོར་ཆོས་བརྒྱུད་ཆེན་པོ་ཁག་གི་ཆོས་ལུགས་ཚོགས་ཆེན་ཐེངས་བཅུ་གཅིག་པའི་ཐོག ༧གོང་ས་མཆོག་གིས་ཇོ་ནང་ཆོས་བརྒྱུད་འདི་གལ་ཆེན་པོ་གང་འདྲ་ཡིན་མིན་སྐོར་ལ་བཀའ་སློབ་ཟབ་ཞིང་རྒྱས་པ་གནང་བ་མ་ཟད། ཚོགས་ཆེན་ཐོག་ས་སྐྱ་༧གོང་མ་རིན་པོ་ཆེ་མཆོག་དབུ་བཞུགས་ཐོག་བླ་ཆེན་རྣམ་པས་བགྲོ་གླེང་མཐར་ཕྱིན་པ་གནང་སྟེ། མཐའ་མ་དེར་ཇོ་ནང་གི་ཆོས་བརྒྱུད་འདི་ལྟ་གྲུབ་ཆ་ནས་རང་རྐང་ཚུགས་པ་ཞིག་ཡིན་པར་ངོས་འཛིན་བྱུང་ཡང་། ཁྲིམས་ལ་འགྱུར་བ་གཏོང་རྒྱུའི་ཐོབ་ཐང་དེ་ཁྲིམས་བཟོ་ལྷན་ཁང་ལ་ཡོད་པའི་གྲོས་ཆོད་བཞག་ཡོད་པ་ལྟར། ང་ཚོ་ཇོ་ནང་བ་བོད་གཞིས་བྱེས་གཉིས་ཀྱི་ངོས་ནས་གྲོས་ཚོགས་ལ་ཆོས་བརྒྱུད་གཅིག་མཚུངས་ཀྱི་ཐོབ་ཐང་སྤྲོད་དགོས་པའི་སྙན་ཞུ་དང་འབོད་སྐུལ་ཞུས་རྗེས། ཕྱི་ལོ་ ༢༠༡༢ ལོར་གྲོས་ཚོགས་ངོས་ནས་ཡིག་ལན་འབྱོར་ཏེ་ད་ལྟ་བོད་ནང་ཛ་དྲག་གི་གནས་སྟངས་ཆགས་ཡོད་སྟབས། སྐབས་དེའི་གྲོས་ཚོགས་ནང་ཇོ་ནང་བའི་སྐོར་ལ་བགྲོ་གླེང་བྱེད་མ་དགོས་པ་ཞིག་བགྱིས་དང་། སྐབས་བཅུ་དྲུག་པའི་སྤྱི་འཐུས་ཀྱི་འོས་བསྡུ་མ་བྱས་གོང་ལ་འདིའི་སྐོར་ལ་བགྲོ་གླེང་དང་ཐག་གཅོད་བྱ་རྒྱུ་ཡིན་པའི་བཀའ་ལན་འབྱོར་བ་རེད། བཀའ་ལན་འབྱོར་བ་ལྟར་ང་ཚོས་སྐབས་དེར་བོད་ནང་དུ་ཉིན་རེ་ལས་མ་འདས་པར་རང་ལུས་མེར་བསྲེགས་གནང་མཁན་མང་དུ་འགྲོ་བཞིན་ཡོད་སྟབས། ད་བར་ང་ཚོས་བསམ་གཞིགས་བྱས་ནས་སྙན་ཞུ་རེ་བརྒྱབ་ནས་བསྡད་པ་མ་གཏོགས་གཞན་གང་ཡང་བྱས་ཡོད་པ་མ་རེད། ད་ལོ་སྐབས་བཅོ་ལྔ་པའི་ཚོགས་དུས་མཐའ་མ་ཆགས་ཡོད་པ་དང་། སྐབས་བཅུ་དྲུག་པ་བསླེབ་ཡོང་གི་ཡོད་སྟབས། གྲོས་ཚོགས་ཀྱིས་བཀའ་ཡིག་ནང་ཞལ་བཞེས་གནང་བ་ལྟར་སྙན་ཞུ་བརྒྱབ་སྟེ་འདི་ལོའི་ཟླ་གསུམ་པའི་གྲོས་ཚོགས་ཚོགས་སྐབས། ཇོ་ནང་དང་འབྲེལ་བའི་ཁྲིམས་འཆར་འཁྱེར་ཡོད་ཀྱང་། གྲོས་ཚོགས་ངོས་ནས་བགྲོ་གླེང་ཙམ་ཡང་མ་བྱས་པར་ཐག་གཅོད་གནང་ཡོད་སྟབས། སྐབས་དེར་རྒྱ་བལ་འབྲུག་གསུམ་གྱི་ཇོ་ནང་བ་བརྒྱ་ཕྲག་གཅིག་ཙམ་ཞིག་གིས་གྲོས་ཚོགས་མདུན་དུ་ཉིན་གཅིག་རིང་ཞུ་འབོད་བྱས་པ་དང་། ཉིན་ཤས་རྗེས་ང་ཚོས་དམིགས་བསལ་ཚོགས་ཆེན་ཐེངས་དྲུག་པ་ཚོགས་ཏེ། སྐབས་འདིའི་གྲོས་ཚོགས་ཚོགས་དུས་མ་འཚོགས་གོང་ལ་ཇོ་ནང་བའི་དམིགས་བསལ་ཚོགས་ཆེན་ཞིག་ཚོགས་ཏེ། ལོ་ངོ་ ༡༨ རིང་ང་ཚོ་ཇོ་ནང་བས་རང་གཞུང་ལ་སྙན་ཞུ་བརྒྱབ་པ་ལ་སོགས་པའི་ཞུ་འབོད་རིམ་པ་ཁག་ལ་བསྐྱར་ཞིབ་ཅིག་བྱས་ཏེ། མ་འོངས་པར་ཞུ་འབོད་གང་འདྲ་བྱེད་དགོས་མིན་ཐོག་ཚོགས་ཆེན་ཞིག་བསྐོང་དགོས་པའི་གྲོས་ཆོད་བཞག་པ་ལྟར་ཚོགས་ཆེན་འདི་བསྐོངས་པ་རེད། ཅེས་སོགས་བརྗོད་སོང་།

འཕགས་ཡུལ་འགྲོ་ཕན་ལྷན་ཚོགས་ཀྱི་འགན་འཛིན་མཆོག་སྤྲུལ་བཀྲིས་རྒྱལ་མཚན་མཆོག་གིས་ཇོ་ནང་བས་ཆོས་བརྒྱུད་ཅིག་གི་ཐོབ་ཐང་མ་རག་བར་དུ་རྩོད་ལེན་བྱ་རྒྱུ་ཡིན་སྐོར་གསུངས་དོན། འདས་པའི་མི་ལོ་ལྔ་བཅུ་རིང་བོད་མི་རིགས་ཀྱི་བདེ་སྡུག་གང་འདྲ་ཆགས་ཡོད་མེད་དང་། ད་ལྟ་དཀའ་ངལ་གང་འདྲ་འཕྲད་བཞིན་ཡོད་པ་གསལ་པོ་ཡིན་སྟབས། མི་བསམ་ཤེས་ཅན་ཞིག་ཡིན་ཚེ། ང་ཚོ་ཆོས་བརྒྱུད་ཉམ་ཆུང་འདི་ལ་བདེན་དྲང་དང་གནས་ལུགས། དྲང་བདེན་གྱི་ཐག་གཅོད་ཅིག་ཡོང་དགོས་པ་ནི་དོན་དངོས་ཡིན་པ་མ་ཟད། རྒྱུ་མཚན་དང་ལྡན་པ་ཞིག་རེད། དེ་ལ་དགག་བྱ་གནང་མཁན་ཞིག་ཡོད་ན་ང་ཚོས་ལོ་ལྔ་བཅུའི་རྩོད་ལེན་འདི་ལ་ཕྱིར་བལྟ་ཞིག་བྱས་ན་དེ་སྟོང་པ་ཆགས་རྒྱུ་རེད། སྤྱིར་༧སྐྱབས་མགོན་རིན་པོ་ཆེ་གཙོས་པའི་ཆོས་བརྒྱུད་ཁག་གི་དབུ་འཛིན་ཐམས་ཅད་ཀྱིས། ང་ཚོ་ཇོ་ནང་བ་ཆོས་བརྒྱུད་རང་རྐང་ཚུགས་པ་ཞིག་ཡིན་པར་ངོས་འཛིན་གནང་ཡོད་པ་མ་ཟད། སིམ་ལ་མ་དགོན་ཡིན་ཡང་༧གོང་ས་མཆོག་གིས་བཙུགས་གནང་བ་དང་། ཁལ་ཁ་རྗེ་བཙུན་དམ་པ་མཆོག་ཇོ་ནང་པའི་སྐྱབས་རྗེར་མཚན་གསོལ་གནང་ཡོད་པ་ནི། གཞུང་སྒེར་སུས་ཀྱང་མ་ཤེས་པ་གང་ཡང་མེད་ཀྱང་། ག་ཟི་དགེ་བཤེས་དང་པདྨ་འབྱུང་གནས་ལ་སོགས་པས་ས་སྐྱ་དང་ཇོ་ནང་བའི་བར་ལ་འགལ་བ་བཟོས་ཡོད་པ་རེད། ས་སྐྱ་དང་ཇོ་ནང་བའི་ལོ་རྒྱུས་ཀྱི་བྱུང་རབས་ལ་བལྟས་ན། ཕན་ཚུན་བླ་སློབ་དང་ཆོས་ཐམས་ཅད་གྱི་འབྲེལ་བ་ཡོད་པ་མ་ཟད། ས་སྐྱ་༧གོང་མ་རིན་པོ་ཆེ་མཆོག་གིས་ང་ཚོར་རྒྱབ་སྐྱོར་གནང་ཡོད་སྟབས། ང་ཚོར་ས་སྐྱ་གཞུང་ངོས་ནས་དགག་བྱ་རྩ་བ་ཉིད་ནས་གནང་གི་མེད་ཀྱང་། མི་རེ་ཟུང་གིས་འཐེན་འཁྱེར་དང་གཡོ་སྒྱུ། དྲང་བདེན་མེད་པའི་ལས་ཀ་འདི་ལས་སྟབས། ང་ཚོར་དཀའ་ངལ་འདི་འཕྲད་པ་རེད། མ་འོངས་པར་ང་ཚོས་བདེན་པར་རྩོད་ལེན་བྱ་རྒྱུ་མ་ཟད་ནམ་ཡང་མཚམས་འཇོག་བྱེད་ཀྱི་མ་རེད། དེང་སང་དྲང་བདེན་ལ་རྒྱབ་སྐྱོར་བྱེད་པའི་དུས་སྐབས་ཤིག་ཆགས་ཡོད་སྟབས། ང་ཚོར་བརྒྱ་ཆ་བརྒྱ་རྒྱལ་ཁ་འཐོབ་རྒྱུ་ཡིན་པ་མ་ཟད་འཐོབ་འོས་པ་ཞིག་ཀྱང་རེད། ང་ཚོར་རྒྱབ་སྐྱོར་མ་བྱས་པ་ཡིན་ན་དམངས་གཙོ་ཟེར་བའི་གཞུང་འདི་རུལ་སོང་བ་རེད། ཅེས་སོགས་གསུངས་སོང་།

ཇོ་ནང་རྒྱལ་ཚབ་རིན་པོ་ཆེ་མཆོག་གིས་ཇོ་ནང་བས་ཞི་འབོད་ཀྱི་ཐབས་ལམ་ལ་བརྟེན་ནས་སྤྱི་མཚུངས་ཀྱི་ཐོབ་ཐང་རྩོད་ཀྱི་ཡོད་པ་ལས་ངོ་རྒོལ་བྱས་ཏེ་རྙོག་གྲ་དང་དཀའ་ངལ་བཟོ་ཡི་མེད་སྐོར་གསུངས་དོན། ང་ཚོས་དུས་ནམ་ཡང་གཞུང་ལ་ངོ་རྒོལ་དང་དྲག་རྒོལ་རྩ་བ་ཉིད་ནས་བྱེད་ངེས་མ་རེད། གང་ཡིན་ཟེར་ན། ང་ཚོའི་སྐྱབས་དང་མགོན་ཟེར་ན་འདྲ་རེ་ས་དེ་བཙན་བྱོལ་བོད་མིའི་སྒྲིག་འཛུགས་ཀྱི་ཚོགས་པ་འདི་ཆགས་བསྡད་ཡོད་ལ། ཇོ་ནང་ཙམ་མ་ཟད་ང་ཚོ་བོད་མི་ས་ཡ་དྲུག་གི་སྐྱབས་བཅོལ་ས་ཆགས་བསྡད་ཡོད་པ་རེད། ཡིན་ནའང་། ང་ཚོས་སྙན་ཞུ་དང་ཞུ་འབོད་ག་རེ་བྱེད་དགོས་ཀྱང་ཆོས་བརྒྱུད་ཀྱི་ཐོབ་ཐང་མ་འཐོབ་བར་དུ་ནམ་ཡང་ལྷོད་པ་མེད་པར་རྩོད་ལེན་བྱ་རྒྱུ་ཡིན། ང་ཚོས་དམངས་གཙོ་དང་མཐུན་པའི་ཐབས་ལམ་ག་རེ་དགོས་པ་དང་རྒྱ་སྐྱེད་ག་འདྲ་བྱེད་དགོས་ཀྱི་ཡོད་ནའང་ང་ཚོས་བྱ་རྒྱུ་ཡིན། ང་ཚོས་ཞི་རྒོལ་དང་ཞི་འབོད་བྱེད་ངེས་རེད་ལ། ལས་འགུལ་ཡང་སྤེལ་རྒྱུ་ཡིན་པ་དེ་གསལ་པོ་ཡིན། ན་ནིང་ཞི་འབོད་ཀྱི་སྐབས་སུ་ང་ཚོས་བོད་ཡིག་ཁོ་ན་མ་གཏོགས་དབྱིན་ཡིག་དང་ཧིན་རྡུའི་ཡི་གེ་གཅིག་ཀྱང་བྲིས་མེད། ང་ཚོས་མ་ཤེས་པ་མིན་ལ་མ་དྲན་པའང་མིན། ཡིན་ནའང་། ང་ཚོའི་གཞུང་ལ་གུས་བཀུར་དང་སོ་སོའི་སྐད་ཡིག་ཁོ་ན་བེད་སྤྱོད་བཏང་སྟེ། ང་རང་ཚོ་ནང་ཚགས་ཀྱི་དཀའ་ངལ་དེ་གཞན་ལ་རེ་སྐུལ་དང་ཁྱབ་བསྒྲགས་ཆེན་པོ་མི་དགོས་པར་ནང་ཁུལ་ནས་སེལ་ཐབས་བྱས་ཏེ།  ང་ཚོའི་རྙོག་དྲ་འདི་ཆེ་རུ་མི་གཏོང་བར་བསམ་བློ་བཏང་ནས་གོ་སྒྲིག་བྱས་པ་ཡིན་ལ། མི་རེ་ཟུང་ཙམ་རེད་མ་གཏོགས་གཞུང་སྤྱིའི་ངོས་ནས་ང་ཚོར་རྒྱབ་སྐྱོར་ཡོད་པ་རེད། ༧རྒྱལ་དབང་ཐམས་ཅད་མཁྱེན་པ་བཤད་མ་དགོས་པ་རེད། ཁོང་གིས་རྟེན་དང་བཅས་པ་གནང་སྟེ་ཇོ་ནང་གི་བསྟན་པ་འཛིན་སྐྱོང་སྤེལ་གསུམ་གནང་དགོས་པ་རེད་ཅེས་དུས་ནས་དུས་སུ་བཀའ་གནང་བཞིན་ཡོད་པ་དང་། འཛིན་སྐྱོང་སྤེལ་གསུམ་གནང་བར་ཆ་རྐྱེན་ཚང་མ་འཛོམས་དགོས་པ་རེད། ང་ཚོར་ཆོས་བརྒྱུད་ཀྱི་ཐོབ་ཐང་མེད་ན་ག་རེ་གནོད་ཀྱི་འདུག་ཟེར་ན། ང་ཚོས་ཇོ་ནང་ཆོས་བརྒྱུད་འཛིན་སྐྱོང་སྤེལ་གསུམ་བྱེད་པར་ཧ་ལས་པའི་དགག་བྱ་མང་པོ་ཞིག་ཡོང་གི་འདུག ཐ་ན་རྒྱལ་ཁབ་ཁག་དང་བོད་ནང་གང་དུ་ཡིན་ནའང་ཆོས་ཚོགས་ཁག་ཅིག་འཛུགས་དགོས་པ་ཡིན་ནའང་། ཁྱེད་རང་ཚོ་བོད་གཞུང་གིས་ངོས་ལེན་མི་འདུག ཁྱེད་རང་ཚོ་ཆོས་བརྒྱུད་ཀྱི་གྲས་སུ་མི་འདུག་ག་རེ་རེད། དེ་འདྲ་ཡིན་ན་ང་ཚོས་ཀྱང་ངོས་ལེན་བྱེད་ཐུབ་ཀྱི་མི་འདུག་ཅེས་གནད་དོན་འདི་འདྲ་བྱུང་དང་བྱུང་བཞིན་པ་རེད། སྤྱི་འཐུས་ནང་ཐོབ་ཐང་མེད་པའི་རྒྱུ་མཚན་གྱིས་འདི་འདྲ་ཆགས་བསྡད་ཡོད་པ་རེད། མདོར་ན་ང་ཚོར་དཀའ་ངལ་རབས་དང་རིམ་པ་འཕྲད་ཀྱི་ཡོད་པར་བརྟེན་གོང་ལ་ཞུ་འབོད་དང་སྐྱབས་འཇུག་ཞུ་ཡི་ཡོད་པ་རེད་མ་གཏོགས། རྙོག་དྲ་དང་དཀའ་ངལ་སྤྲོད་ཀྱི་ཡོད་པ་དེ་འདྲ་རྩ་བ་ཉིད་ནས་མ་རེད། དེ་འདྲ་སེམས་ནས་དྲན་གྱི་མེད་ལ་མ་འོངས་པར་ཡང་དེ་འདྲ་དྲན་གྱི་མ་རེད་ཅེས་བོད་མི་མང་དང་འདིར་ཕེབས་པའི་སྐུ་མགྲོན་རྣམ་པ་ཚང་མར་གསལ་པོ་བྱས་ཏེ་ཞུ་ཡི་ཡོད། ཅེས་སོགས་གསུངས་སོང་།

དེའི་རྗེས་སྐུ་མགྲོན་གཙོ་བོ་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་ཆོས་རིག་ལས་ཁུངས་ཀྱི་ངོས་ནས་་ཇོ་ནང་བར་མཐུན་རྐྱེན་དང་ངོས་ལེན་གང་ཐུབ་བྱེད་བཞིན་ཡོད་སྐོར་གསུངས་དོན། ཕྱི་ལོ་ ༢༠༡༡ ལོར་ཚོགས་ཁང་འདིའི་ནང་ཆོས་བརྒྱུད་ཁག་གི་ཚོགས་ཆེན་ཐེངས་བཅུ་གཅིག་པ་ཚོགས་སྐབས། ༧གོང་ས་མཆོག་གིས་དཔལ་ཇོ་ནང་བའི་ལྟ་གྲུབ་དང་ཆོས་བརྒྱུད་ཀྱི་ཐོག་ནས་ཆོས་བརྒྱུད་རང་རྐང་ཚུགས་པ་ཞིག་ཡིན་པའི་བཀའ་སློབ་ཕེབས་པ་ལྟར། ང་ཚོ་ཆོས་རིག་ལས་ཁུངས་ཀྱི་ངོས་ནས་དེ་དེ་བཞིན་གྱིས་ངོས་ལེན་དང་མཐུན་རྐྱེན་གང་ཐུབ་སྦྱོར་བཞིན་ཡོད། ཆོས་རིག་ལས་ཁུངས་ནས་བོད་ནས་གསར་དུ་ཕེབས་མཁན་གྱི་ཇོ་ནང་བའི་དགེ་འདུན་པ་ ༥༤ ལ་སློབ་ཡོན་ཕུལ་དང་འབུལ་བཞིན་ཡོད་པ་མ་ཟད། ཚན་རིག་དགེ་རྒན་གཅིག་ལ་གླ་ཕོགས་སྤྲོད་བཞིན་ཡོད། ཉེ་ལམ་ང་ཚོས་ཇོ་ནང་བའི་འཐུས་མི་ཞིག་ལ་གཞུང་ཆེན་རིགས་གཅིག་རྐང་འཛིན་གྱི་སློབ་ཡོན་ཕུལ་ཡོད་པ་མ་ཟད། དེ་བཞིན་ཆོས་བརྒྱུད་ཁག་གི་བླ་ཆེན་རྣམ་པའི་ཚོགས་ཆེན་ཚོགས་སྐབས་ཇོ་ནང་བའི་སྐུ་ཚབ་གཉིས་གདན་འདྲེན་ཞུས་པ་སོགས་མཐུན་རྐྱེན་གང་ཐུབ་སྦྱོར་བཞིན་ཡོད། སྤྱིར་བཏང་ཆོས་རིག་ལས་ཁུངས་འདི་དབྱིན་སྐད་ཐོག་ནས་ཞུས་ན་ (Sensitive) དངངས་སྐྲག་བྱས་ནས་ལས་དོན་བསྒྲུབ་དགོས་པའི་ལས་ཁུངས་ཞིག་ཆགས་ཡོད་སྟབས། ཆོས་རིག་ལས་ཁུངས་རང་ནས་གཏན་འབེབས་བྱས་ནས་སྒྲིག་གཞི་སྒྲིག་འཛུགས་བཟོས་ཏེ། དེ་ལག་བསྟར་བྱེད་དགོས་ཟེར་ནས་བཀའ་གཏོང་ས་གཅིག་ཀྱང་མི་འདུག ང་ཚོས་བར་ལམ་ནས་གསར་གཏོད་གང་འཚམ་བྱས་པ་ཡིན་ཡང་། ལས་དོན་དངོས་སུ་སྒྲུབ་སྐབས་ལག་བསྟར་བྱ་རྒྱུ་དཀའ་ལས་ཁག་པོ་ཞེ་དྲགས་འདུག ཤེས་རིག་དང་ནང་སྲིད། འཕྲོད་བསྟེན་སོགས་ཀྱི་ལྷན་ཁང་ཁག་ཡིན་ན། སོ་སོའི་ལས་ཁུངས་ནང་ཚོགས་འདུ་ཚོགས་ནས་གཏན་འབེབས་བྱས་ཏེ། འདི་དང་འདི་ཡིན་ཟེར་ནས་མར་བཀའ་གཏོང་སྐབས། འོག་ཏུ་དེ་བཞིན་ལག་བསྟར་བྱེད་བཞིན་ཡོད་པ་ལས་ཡར་འདི་འགྲིག་གི་མི་འདུག་ཟེར་ནས་དྲི་བ་གཏོང་མཁན་དང་སྐྱོན་བརྗོད་བྱེད་མཁན་ཧ་ལམ་བྱུང་གི་མེད་པའི་བཟོ་འདྲ་པོ་རེད། ཡིན་ཡང་ཆོས་རིག་ལས་ཁུངས་ཀྱིས་ལས་དོན་གང་བྱས་ཀྱང་ཐོག་མར་གྲོས་བསྡུར་བྱས་ནས་ས་བོན་བཟོས་ཏེ། ཆོས་བརྒྱུད་ཁག་གིས་ངོས་ལེན་གནང་མིན་དང་། མར་ཞུས་པ་ཡིན་ན་དེ་ལ་ཡར་ཕྱག་རོགས་གནང་མིན་སོགས་གྲོས་བསྡུར་དང་ལས་འཆར་མང་པོ་ཞིག་སྒྲིག་ནས་འགྲོ་དགོས་ཀྱི་འདུག་མ་གཏོགས། ལྷན་ཁང་ཁག་གཞན་ལྟར་གཏན་འབེབས་བྱས་ནས་བཀའ་གཏོང་ས་གང་ཡང་མེད་པ་མ་ཟད། དེ་བཞིན་སྒྲིག་གཞི་སྒྲིག་འཛུགས་གཏན་འབེབས་གནང་བཞག་པ་མང་པོ་ཞིག་ཡོད་སྟབས། དེ་ལ་ལྟོས་ནས་ལག་ལེན་བསྟར་ནས་འགྲོ་དགོས་ཀྱི་འདུག་མ་གཏོགས་ཆོས་རིག་ལས་ཁུངས་ནས་སྒྲིག་གཞི་གཏན་འབེབས་བྱས་ནས་འགྲོ་ས་གང་ཡང་ཡོད་པ་མ་རེད།  སྤྱིར་བཏང་ལོ་རེར་ཆོས་བརྒྱུད་ཁག་གི་བསྟན་བདག་བླ་ཆེན་རྣམ་པའི་ཚོགས་ཆེན་རྒྱས་བསྡུས་གཉིས་ཚོགས་ཀྱི་ཡོད་པར་བརྟེན། དེའི་ཐོག་གྲོས་ཆོད་དང་ཐག་གཅོད་གང་བྱུང་བཞག་པ་དག་རིམ་པས་ཆོས་རིག་ལས་ཁུངས་ནས་ལག་ལེན་བསྟར་ནས་འགྲོ་དགོས་པ་ཞིག་ཆགས་ཡོད་སྟབས། ཆོས་རིག་ལས་ཁུངས་ནས་དཔལ་ཇོ་ནང་བར་མཐུན་རྐྱེན་སྦྱོར་རྒྱུ་དང་ངོས་ལེན་བྱ་རྒྱུ་དེ་འདྲ་ཞིག་ཡིན། མ་འོངས་པར་ང་ཚོས་མཐུན་རྐྱེན་གང་ཐུབ་སྦྱོར་ཨེ་ཐུབ་ལྟ་གི་ཡིན། ཅེས་སོགས་གསུངས་སོང་།

གསར་འགོད་པ། དོན་གྲུབ།