དགེ་རྒན་གང་ན་ཡོད།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༧༥ སྟེང་གི་རྩོམ་སྒྲིག་པའི་གཏམ།

 
འདས་པའི་ལོ་ཤས་ནས་བཟུང་བཙན་བྱོལ་བོད་མིའི་ལོ་ངོ་ ༥༠ ལྷག་ནང་ཤེས་ཡོན་ཐོག་འཐུས་ཤོར་ཆེན་པོ་ཕྱིན་ཡོད་པའི་གླེང་ཕྱོགས་མང་པོ་བྱུང་བ་མ་ཟད། བོད་མིའི་གཞི་རིམ་སློབ་གྲྭ་ཁག་གིས་ཤེས་ཡོན་སྲིད་བྱུས་ལག་བསྟར་ཐད་གནད་དུ་འཁེལ་བའི་སྐྱོན་གནས་འདོན་མཁན་མང་པོ་བྱུང་སོང་ལ། མངོན་གསལ་ཡིན་མིན་གྱི་ཐོག་ནས་གོང་འོག་བར་གསུམ་ལ་སྐྱོན་བརྗོད་བྱས་ཏེ་མུན་ནག་ནང་ལག་སྙོབ་བྱེད་མཁན་ཡང་གང་འཚམ་བྱུང་བ་རེད། ད་ལན་སྤྱི་འཐུས་ལྷན་ཚོགས་ཀྱི་ཤེས་ཡོན་ཚོགས་ཆུང་གི་ཞིབ་འཇུག་སྙན་ཐོ་སྒྲོག་སྦྱང་དང་བགྲོ་གླེང་གནང་རྗེས། བཙན་བྱོལ་བོད་མིའི་སྔོན་འགྲོ་སློབ་གྲྭ་ ༦༣ གྱི་ནང་ནས་ ༣༨ ཙམ་གྱིས་ཤེས་ཡོན་སྲིད་བྱུས་གང་འཚམ་ཞིག་ལག་བསྟར་གནང་བཞིན་ཡོད་པ་གསལ་བོ་ཆགས་སོང་།

 
ཚོགས་ཆུང་གི་སྙན་ཐོ་དེ་ཀློག་ཡོང་དུས། ཕྱི་ལོ་ ༡༩༩༠ ནང་རྒྱ་གཞུང་གིས་བོད་ཁུལ་གྱི་སྐད་གཉིས་སློབ་གསོ་ཟེར་བའི་མིང་ཐོག་ནས་བོད་ཀྱི་སྐད་ཡིག་དམར་གསོད་གཏོང་ཐབས་ཀྱི་ངན་ཇུས་ཤིག་སྟེ། ཡིག་ཚད་ནང་བརྒྱ་ཆའི་ ༢༠ བོད་ཡིག་ཁོ་ནར་སྤྲོད་ཀྱི་ཡིན་ལུཊ་བསྒྲཊ་མོད། བརྒྱ་ཆའི་ ༢༠ སྤྲད་འཆར་གྱི་དྲི་ཤོག་ནང་རྗེས་འཇུག་ལ་རྗེས་སུ་འཇོག་པའི་ཡི་གེ་བཅུ་དང་། སྔོན་འཇུག་ལ་སྔོན་དུ་འཇོག་པའི་ཡི་གེ་ལྔ་ཞེས་རྒྱ་ཡིག་གིས་བྲིས་ཡོད་པ་དང་། དྲིས་ལན་ཡང་རྒྱ་ཡིག་གིས་འདེབས་དགོས་པའི་ངན་ཇུས་དེ་དྲན་དུ་བཅུག་སོང་། ཡིན་ནའང་ངན་ཇུས་དེར་གཞུང་གི་དཔོན་གནས་སུ་བཞུགས་པའི་བོད་རིགས་དང་། ལྷག་པར་དུ་གྲངས་ཉུང་མི་རིགས་ཀྱི་རང་སྐད་རང་ཡིག་འཛིན་སྐྱོང་སྤེལ་གསུམ་ལ་ཐུཊ་ཁུར་གནང་མཁན་ཚོའི་བཀའ་དྲིན་ལ་བརྟེན་ནས་ཐོག་མའི་སྲིད་བྱུས་བཞིན་ལག་བསྟར་ཐུབ་མེད་པ་རེད། འོན་ཀྱང་སྟབས་མ་ལེགས་པ་ཞིག་ལ། བཙན་བྱོལ་བོད་མིའི་ཤེས་ཡོན་སློབ་གསོའི་དཔེ་སྟོན་མཁན་ཏེ། དཔེ་སྟོན་སློབ་གྲྭའི་འཛིན་རིམ་ ༦ པ་ནས་ ༨ པའི་བར་བོད་དབྱིན་སྐད་གཉིས་སྲེ་ལྷད་ཀྱིས་སློབ་ཁྲིད་བྱེད་ཀྱི་ཡོད་པ་མ་ཟད། ཡིག་རིཊ་གཉིས་མཉམ་བསྲེས་བྱས་པའི་ཚན་རིག་དང་ཨང་རྩིས། སྤྱི་ཚོགས་ཚན་རིག་གསུམ་ཀྱི་དྲི་ཤོག་ཐོག་དབྱིན་ཡིག་གིས་དྲིས་ལན་འདེབས་དགོས་པ་དེ་ཇི་འདྲའི་ཐབས་རྡུཊ་ཤིག་རེད། གང་ལྟར་དབྱིན་ཡིག་གིས་རྗེས་མ་ཆོད་ཅིང་བོད་ཡིག་གིས་རང་མགོ་མ་ཐོན་པར་བརྟེན་ནས་འདི་ལྟར་མི་བྱེད་ཀ་མེད་དུ་གྱུར་བ་རེད།

 
ད་སྐབས་དཀའ་གནད་དེ་དག་སེལ་སླད་དགེ་རྒན་ཚད་ལྡན་གསོ་སྐྱོང་དང་སྦྱོང་བརྡར་གྱི་ལས་གཞི་མང་པོ་ཞིག་འགྲོ་བཞིན་ཡོད་ལ། དེ་དག་གི་ནང་ནས་ཀྱང་དམིགས་སྒོ་གཏད་ས་གཙོ་བོ་བྷུན་ཏར་དགེ་འོས་མཐོ་སློབ་ཁང་གི་སློབ་ཕྲུག་ཚོ་རེད། ཡིན་ནའང་། ཞིབ་འཇུག་ཚོགས་ཆུང་གི་མི་སྣ་དངོས་སུ་ཕེབས་ཏེ་རྒྱུས་ལོན་གནང་བའི་གྲུབ་འབྲས་ལ་དཔྱད་ན། སྦྱོང་བརྡར་དེའི་ཁྲོད་ནས་ཀྱང་བོད་སྐད་ཡིག་གི་ཚེ་སྲོག་ཕྲ་མོ་འདི་སྐྱོབ་ཐུབ་པའི་རེ་བ་ཞིག་གཏན་ནས་མངོན་གྱི་མི་འདུག ད་ལྟའི་བར་མཐོ་སློབ་དེ་ནས་ཁྱོན་སློབ་མ་ ༤༥ ཐོན་པའི་ཁོངས་ནས་རེ་ཟུང་ཞིག་མ་གཏོགས་ཕལ་ཆེ་བ་ལས་མེད་དུ་ལྷག་བསྡད་ཡོད་པ་དང་། དགེ་རྒན་ཞིག་གི་ས་མིག་སྟོང་པར་ལྷག་བསྡད་ཡོད་པ་ཕུད་ཁྱོན་དགེ་རྒན་ ༡༤ ཡོད་པའི་ནང་ནས་བོད་རིགས་དགེ་རྒན་གཉིས་ལས་མེད་པས། དགེ་འོས་སྦྱོང་བརྡར་དུ་ཞུགས་པའི་སློབ་ཕྲུག་ ༡༠༨ ལ་བོད་རིགས་དགེ་རྒན་གཉིས་ཀྱིས་འདང་གི་རེད་དམ།

 
རྒྱལ་སྤྱིའི་སློབ་གསོ་རིག་པ་བ་ཚོས་དཔྱད་ནས་བརྗོད་པ་ལྟར་ན། སྔོན་འགྲོའི་སློབ་གསོའམ་སློབ་ཆུང་གི་སློབ་གསོ་ནི་བྱིས་པའི་མི་ཚེའི་ནང་ནས་གལ་གནད་ཆེ་ཤོས་དེ་ཆགས་ཡོད་པ་དང་། ཕྱི་རྒྱལ་གྱི་ཤེས་ཡོན་སྡེ་ཁག་མིང་དུ་གྲགས་པ་དེ་ཚོས་དགེ་རྒན་ཚད་ལྡན་ཚོ་སྔོན་འགྲོའི་དགེ་རྒན་དུ་བསྐོ་བཞག་བྱེད་སྲོལ་ཡོད་འདུག ཡིན་ན་ཡང་བཙན་བྱོལ་བོད་མིའི་སྔོན་འགྲོ་སློབ་གྲྭའི་འཛིན་སྐྱོང་ནང་སྡེ་ཚན་མི་འདྲ་བ་ ༧ ཡོད་པའི་ཁྲོད་དུ་དབུས་བོད་སློབ་འཛིན་ཚོགས་ནི་སློབ་ཕྲུག་གྲངས་མང་ཤོས་ཀྱི་གྲས་ཡིན་ནའང་། དགེ་རྒན་གྱི་ས་མིག་ཁྱོན་ ༥༡ ཡོད་པའི་ནང་ནས་ས་མིག་ ༡༦ སྟོང་པར་ལྷག་ཡོད་པ་དང་། སྔོན་འགྲོའི་སློབ་གྲྭ་གཞན་དག་ལའང་དགེ་རྒན་མེད་པའི་དཀའ་ངལ་མི་ཉུང་བ་ཞིག་འཕྲད་ཀྱི་ཡོད་འདུག ལོ་རེར་མཐོ་སློབ་ཁག་ནས་སློབ་མ་མང་པོ་ཐོན་བཞིན་ཡོད་པའི་གྲངས་འབོར་ལ་གཞིག་ན། བོད་མིའི་ཚོགས་པ་དང་སྒྲིག་འཛུགས་ག་འདྲ་ཞིག་ཡིན་ནའང་དགེ་ལས་ཀྱི་ས་མིག་སྟོང་པར་ལྷག་དགོས་པ་དང་། ཁྱད་པར་དུ་ཆུ་ཚོད་གཅིག་ལའང་དགེ་རྒན་མེད་ན་སློབ་ཕྲུག་མང་པོའི་སློབ་སྦྱོང་ལ་དོ་ཕོག་འགྲོ་ཡི་ཡོད་པའི་སློབ་གྲྭ་མང་པོར་དགེ་རྒན་མེད་པའི་མུ་གེ་ག་རེ་བྱས་ནས་འབྱུང་གི་ཡོད་པ་རེད། འདི་ལ་ཕྱི་ནང་གི་རྒྱུ་རྐྱེན་མང་པོ་ཞིག་བསྔོག་རྒྱུ་ལོས་ཡོད་བསམ་གྱི་འདུག