རྒྱུ་མཚན་ལྔ་ཡི་ཐོག་ནས་བོད་དོན་ཐག་མ་ཆོད་བར་དུ་ཡལ་མི་སྲིད།

གནད་དོན་མེད་ན་རྒྱ་ནག་གཞུང་གིས་བོད་རྒྱ་གཉིས་ཀྱི་མཐུན་སྒྲིལ་ཐད་སྔར་ལས་ཤུགས་སྣོན་དགོས་པ་རྒྱུན་དུ་བཤད་དགོས་དོན་མེད་ཟེར།

དེ་རིང་ཉིན་རྒྱབ་ཆུ་ཚོད་ ༢ པ་ཐོག དྷ་ས་ནོར་བུ་མགྲོན་ཁང་གི་ཚོགས་ཁང་ནང་དུ། རྒྱལ་སྤྱིའི་བོད་རྒྱ་སྨྱུག་ཚོགས་ཀྱི་གོ་སྒྲིག་འོག ད་ལྟའི་བོད་རྒྱའི་ཆབ་སྲིད་གནས་བབ་དང་མ་འོངས་འཕེལ་ཕྱོགས་ཞེས་པའི་བརྗོད་གཞིའི་འོག་རྒྱ་སྐད་ཀྱི་བགྲོ་གླེང་ཚོགས་འདུ་ཐེངས་གཉིས་པ་སྐོང་ཚོགས་གནང་སོང་བ་དང་། ཐེངས་འདིའི་བགྲོ་གླེང་ཐོག་ཐའེ་ཝན་ཀྲུང་ཧྭ་སློབ་གྲྭ་ཆེན་པོའི་སློབ་དཔོན་སྐུ་ཞབས་ཙིན་ཅན་ཡོན་ལགས་དང་ཧོང་ཀོང་གི་རང་དབང་རྩོམ་པ་པོ་སྐུ་ཞབས་ཡང་ཁེ་ལིང་ལགས། དེ་བཞིན། བོད་མི་མང་སྤྱི་འཐུས་དང་བོད་རྒྱ་སྨྱུག་ཚོགས་ཀྱི་ཚོགས་གཙོ་འབའ་བ་སྐལ་བཟང་རྒྱལ་མཚན་ལགས་བཅས་ཀྱིས། རྒྱ་ནག་གཞུང་གི་དྲག་པོའི་དབང་བསྒྱུར་ལ་འཐབ་རྩོད་བྱེད་མཁན་གྱི་ས་ཁུལ་མི་འདྲ་བ་གསུམ་གྱི་ཞི་ཅིན་ཕིན་གཞུང་གི་དབང་བསྒྱུར་སྲིད་བྱུས་ལ་ལྟ་ཚུལ་དང་། ལྷག་པར་དུ་རྒྱའི་དབང་བསྒྱུར་འོག་གི་བོད་ཀྱི་གནས་སྟངས་སོགས་ཀྱི་སྐོར་གཏམ་བཤད་གནང་སོང་བ་དང་། དེའི་རྗེས་ཐའེ་ཝན་སློབ་གྲྭ་ཆེན་པོའི་རྒྱལ་ཁབ་གོང་སྤེལ་ཉམས་ཞིབ་ཁང་གི་འབུམ་རམས་པ་སྐུ་ཞབས་ཝོ་ཞིང་ཅེན་ལགས་ཀྱིས་གཏམ་བཤད་པ་རྣམ་པའི་སྐད་ཆར་དཔྱད་བརྗོད་གནང་བ་དང་འབྲེལ། སྔར་ལས་བོད་དོན་བདེན་མཐའ་སེལ་བར་ནུས་པ་མཉམ་དུ་སྤུངས་དགོས་སྐོར་གྱི་འབོད་སྐུལ་གནང་སོང་། དེ་ནས་བགྲོ་གླེང་ནང་ཞུགས་པའི་ཕྱི་དྲིལ་རྒྱ་ཡིག་ཚན་པ་དང་བོད་ཀྱི་སྲིད་བྱུས་ཉམས་ཞིབ་ཁང་གི་འབྲེལ་ཡོད་ལས་བྱེད། དེ་བཞིན་འབྲེལ་བ་ལས་ཁུངས་ཀྱི་ལས་བྱེད་རྣམས་དང་ལྷན་དུ་དྲི་བ་དྲིས་ལན་བཅས་གནང་སོང་།

བགྲོ་གླེང་ཐོག་སྐུ་ཞབས་ཙིན་ཅན་ཡོན་ལགས་ཀྱིས་ཁོ་རང་དམའ་འབྲིང་ཡིན་སྐབས་ནས་བོད་དོན་སྐོར་ལ་དོ་སྣང་བྱུང་སྟེ་ད་ལྟའི་བར་ལོ་ངོ་ཉི་ཤུ་སུམ་ཅུའི་ཕྱིན་ཡོད་སྐོར་དང་། ཞི་ཅིན་ཕིན་གྱིས་རྒྱ་ནག་གི་སྲིད་དབང་བཟུང་སྟེ་ལོ་ངོ་ ༣ ལྷག་ཕྱིན་པའི་རིང་ཐའེ་ཝན་གོ་མིན་ཏང་སྲིད་གཞུང་དང་རྒྱ་ནག་བར་གྱི་ཚོང་འབྲེལ་དང་རིག་གཞུང་བརྗེ་རེས་ཀྱི་འབྲེལ་བ་ཤུགས་ཆེ་རུ་ཕྱིན་ཡོད་པ་ཧ་ཅང་མངོན་གསལ་ཡིན་ནའང་། ཆབ་སྲིད་ཀྱི་ཐོག་ནས་ཉི་དགའ་མེ་ཏོག་གི་ལས་འགུལ་བྱུང་བ་སོགས་འབྲེལ་བ་སྔར་ལས་ཇེ་སྡུག་ཏུ་འགྲོ་བཞིན་ཡོད་པ་མ་ཟད། སང་ལོར་ཐའེ་ཝན་དམངས་གཙོ་ཡར་སྐུལ་ཚོགས་པར་རྒྱལ་ཁ་འཐོབ་ཏེ་ཐའེ་ཝན་སྲིད་གཞུང་འཛིན་རྒྱུ་ཡིན་པར་བརྒྱ་ཆ་བརྒྱ་ཐམ་པ་ཡིད་ཆེས་ཡོད་པ་དང་། དེ་བཞིན་བོད་ཀྱི་གནད་དོན་ཡང་ཛ་དྲག་ཏུ་འགྲོ་བཞིན་ཡོད་པ་ལས་བཟང་ཕྱོགས་ཀྱི་འགྱུར་བ་གང་ཡང་ཕྱིན་མེད་སྐོར་བརྗོད་པ་དང་འབྲེལ་ཁོང་གིས། ཞི་ཅིན་ཕིན་གྱི་ད་ལྟའི་དབང་ཤུགས་དེ་ཧུའུ་ཅིན་ཐའོ་དང་ཅང་ཙི་མེན་གྱི་སྐབས་ཀྱི་དབང་ཤུགས་ལས་བརྒལ་ཟིན་པར་བརྟེན། ཞི་ཅིན་ཕིན་ལ་བོད་རྒྱ་གཉིས་ཀྱི་ད་ལྟའི་གནས་སྟངས་ལ་འགྱུར་བ་གཏང་བའི་གོ་སྐབས་མང་བ་ཡོད་པ་རེད། བོད་རྒྱའི་གནས་སྟངས་ཐད་རྒྱ་གཞུང་ལ་རང་མོས་ཀྱིས་ཐག་གཅོད་བྱེད་པའི་དབང་ཆ་ཆེན་པོ་ཡོད་དུས། ང་ཚོས་རྒྱ་གཞུང་ལ་སྔར་ལས་འབོད་སྐུལ་དང་རྒྱུ་ཆ་མང་བ་མཁོ་སྤྲོད་བྱས་ཏེ། ང་ཚོས་བོད་རྒྱའི་མདུན་ལམ་སྐོར་གྱི་ལྟ་སྟངས་ཤེས་རྟོགས་བྱུང་དུ་འཇུག་དགོས། ང་ཚོས་ཐབས་ལམ་བཙལ་ཏེ་དེང་སང་གི་བརྒྱུད་ལམ་སྣ་མང་ཅན་བརྒྱུད་ནས་ང་ཚོའི་འབོད་སྒྲ་དེ་རྒྱ་ནག་སྐམ་སའི་ནང་ཁྱབ་ཐབས་བྱེད་དགོས་པ་རེད། ང་ཚོ་ཐའེ་ཝན་ལ་མཚོན་ན། རྒྱ་རིགས་འདུས་སྡོད་ཀྱི་ས་ཁུལ་ཁག་གི་ནང་ནས་སྨྲ་བརྗོད་རང་དབང་དང་གསར་འགྱུར་རང་དབང་ཆེས་ཡར་རྒྱས་ཕྱིན་པའི་ས་ཁུལ་ཞིག་ཡིན་སྟབས། གལ་སྲིད་བཙན་བྱོལ་བོད་མིའི་སྤྱི་ཚོགས་འདི་ཐའེ་ཝན་དང་སྔར་ལས་འབྲེལ་འདྲིས་ཆེན་པོ་བྱུང་བ་ཡིན་ན། ཐའེ་ཝན་གྱི་གསར་འགྱུར་བརྒྱུད་ལམ་བརྒྱུད་བཙན་བྱོལ་བོད་མིའི་སྤྱི་ཚོགས་ཀྱི་འབོད་སྒྲ་དེ་ཐའེ་ཝན་མི་མང་གྱིས་རྒྱ་ནག་ནང་ལོགས་སུ་སྐྱེལ་ཐུབ་པ་རེད། ཅེས་བརྗོད་སོང་།

དེའི་རྗེས་སྐུ་ཞབས་ཡང་ཁེ་ལིང་ལགས་ཀྱིས་ཁོ་བོ་དེ་སྔོན་བཅིངས་གྲོལ་དམག་མི་ཞིག་ཡིན་པ་དང་། ལོ་རབས་བདུན་ཅུ་པའི་ལོ་སྟོད་དུ་བོད་ནང་ཕྱིན་ཏེ་ལོ་རྒྱུས་རང་བཞིན་ལྡན་པའི་པར་མང་པོ་བརྒྱབ་པ་དང་། ཐེངས་ཤིག་ཡར་ཀླུང་གཙང་བོའི་ནང་ལྷུང་གྲབས་བྱེད་སྐབས་བོད་མི་ཁག་ཅིག་གིས་ཁོ་བོའི་སྲོག་བསྐྱབས་པར་བརྟེན། བོད་མི་རིགས་ནི་བྱམས་བརྩེ་ལྡན་པའི་མི་རིགས་བཟང་པོ་ཞིག་ཡིན་པའི་བག་ཆགས་ཟབ་མོ་བཞག་པ་མ་ཟད། ཕྱི་ལོ་ ༡༩༩༢ ལོར་ཁོ་བོ་ཧོང་ཀོང་ནང་བསྐྱབས་བཅོལ་དུ་ཕྱིན་རྗེས། དྷ་རམ་ས་ལར་ཡོང་སྟེ་༧གོང་ས་མཆོག་ལ་མཇལ་བཅར་ཐེངས་འགའ་ཞུ་རྒྱུ་བྱུང་བ་དང་། མི་ཁ་ཤས་ཀྱིས་བཤད་པ་ལྟར་༧གོང་ས་མཆོག་གིས་བོད་རང་བཙན་རྩོད་ལེན་གནང་གི་མེད་པ་དང་རྒྱ་ནག་ལའང་ཐུགས་བརྩེ་ཆེན་པོ་ཡོད་པ་ཤེས་རྟོགས་བྱུང་སྐོར་བརྗོད་པ་དང་འབྲེལ་ཁོང་གིས། རྒྱ་གཞུང་གིས་ཆེས་ཐོག་མ་ནས་བོད་རྒྱ་གཉིས་ཀྱི་མཐུན་སྒྲིལ་ལ་སྔར་ལས་ཤུགས་སྣོན་དགོས་ཞེས་པའི་སྐད་ཆ་དེ་ངས་བལྟས་ན་ཧ་ཅང་གལ་ཆེན་པོ་རེད། གལ་སྲིད་ཕན་ཚུན་བར་གནད་དོན་མེད་པ་ཡིན་ན་སྔར་ལས་ཤུགས་སྣོན་དགོས་དོན་མེད། སྔར་ལས་ཤུགས་སྣོན་དགོས་ཚེ་གནད་དོན་ཡོད་པ་ཡིན་པས་ཡག་པོ་བྱས་ནས་ཐག་གཅོད་བྱེད་དགོས་པ་རེད། ཡང་དོན་གནད་གལ་ཆེན་གཞན་ཞིག་ཡོད་པ་ནི། མཐའ་མཚམས་སྐྱོང་བར་སྔོན་ལ་བོད་ཀྱི་བརྟན་བརླིང་སྲུང་སྐྱོབ་བྱེད་དགོས་ཟེར་བ་དེ་རེད། བོད་ཀྱི་བརྟན་བརླིང་སྲུང་སྐྱོབ་བྱེད་པ་དེ་གལ་ཆེན་པོ་ཞེ་དྲགས་ཤིག་ཏུ་རྩི་ཡི་ཡོད་པ་རེད། ངས་བལྟས་ན་དེ་གཉིས་ཧ་ཅང་གལ་གནད་ཆེན་པོ་རེད་བསམ་གྱི་འདུག དེ་མིན་དྲིལ་བསྒྲགས་བྱེད་ཕྱོགས་དང་ད་རུང་ཡིག་ཆ་རྫབ་བེ་རྫོབ་བེ་དེ་ཚོའི་ནང་གི་སྐད་ཆ་གཟན་པོ་དེ་ཚོས་ཞི་ཅིན་ཕིན་གྱི་ལངས་ཕྱོགས་མཚོན་ཐུབ་ཀྱི་མ་རེད་བསམ་གྱི་འདུག ཅེས་དང་། རྭ་སྒྲེང་རིན་པོ་ཆེ་ནི་བོད་ཀྱི་ལོ་རྒྱུས་ཐོག་ནས་ནམ་ཡང་བརྗེད་མི་རུང་བའི་མི་སྣ་བྱས་རྗེས་ཅན་ཞིག་ཡིན་སྐོར་སོགས་བརྗོད་སོང་།

དེ་ནས་བོད་རྒྱ་སྨྱུག་ཚོགས་ཀྱི་ཚོགས་གཙོ་འབའ་བ་སྐལ་བཟང་རྒྱལ་མཚན་ལགས་ཀྱིས་ཞི་ཅིན་ཕིན་གཞུང་གིས་བོད་ཐོག་འཛིན་པའི་སྲིད་བྱུས་སྐོར་ལ་ཁོང་གིས། ཞི་ཅིན་ཕིན་གྱིས་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུའི་སྲིད་བྱུས་ཀྱི་བསྡོམས་འདྲ་བོ་དེ་ག་རེ་བྱས་ནས་ཡོང་པ་རེད་ཞུས་པ་ཡིན་ན། བོད་ནང་གི་སྲིད་བྱུས་དེ་གང་ལ་གང་འཚམ་གྱིས་འགྱུར་བ་བཏང་སྟེ་བོད་ཀྱི་ས་ཁུལ་ཡོངས་རྫོགས་ཀྱི་སྲིད་བྱུས་གཅིག་འཛིན་པའི་ཐོག་ལ་སྲིད་བྱུས་བཏིང་བ་དང་། བོད་ཀྱི་འཛུགས་བསྐྲུན་གྱི་ཐད་ནས་མི་མང་གི་འཚོ་བ་ཡར་རྒྱས་གཏོང་བ་དང་། སློབ་གྲྭ་ཁག་གི་སློབ་ཡོན་མེད་པ་བཟོ་བ་སོགས་ཤེས་ཡོན་སྲིད་བྱུས་དང་། དམིགས་བསལ་གྱིས་ཁོར་ཡུག་སྲུང་སྐྱོབ་ཐད་འགྱུར་བ་ཤུགས་ཆེན་པོ་ཞིག་འགྲོ་ཡི་ཡོད་པ་དེ་ཚོ་ང་ཚོས་མཐོང་དགོས་པ་རེད། ཡིན་ཡང་རྒྱལ་སྤྱིའི་གནོན་ཤུགས་དང་ཡང་ན་འབོད་སྐུལ། བོད་མིའི་སྒྲིག་འཛུགས་ཀྱིས་བཏོན་པའི་སྲིད་བྱུས་དེ་ཚོར་ཡ་མི་བྱེད་པའི་ངོ་བོ་ཞིག་ཏུ་ཕྱི་ནས་བལྟས་ན་འགྲོ་ཡི་ཡོད་ཀྱང་། ཞི་ཅིན་ཕིན་གྱི་གཏམ་བཤད་ཀྱི་མཇུག་སྡོམ་གཙོ་བོའི་ནང་། དབུ་མའི་ལམ་ལ་ངོས་ལེན་མེད་སྐོར་ཡོད་པ་མ་རེད། རྒྱ་ནག་འཐབ་ཕྱོགས་གཅིག་གྱུར་ལས་ཁུངས་ཀྱིས་ཕྱིས་སུ་བྲིས་བཞག་པ་ཞིག་རེད། དོན་དག་རྡོག་རྡོག་དེ་རྒྱ་ནག་ཁ་བྲལ་གཏོང་མཁན་ལ་རྡུང་རྡེག་གཏོང་དགོས་ལབ་ཡོད་པ་རེད། དེ་རྒྱལ་ཁབ་སུ་ཡིན་ཡང་ལབ་དགོས་པ་རེད། ཡིན་ཡང་ཁྱོན་ཡོངས་ནས་བོད་ཀྱི་ཁོར་ཡུག་སྲུང་སྐྱོབ་དང་མི་གྲངས་འཕེལ་རྒྱས་འགོག་ཐབས། མི་མང་གི་འཚོ་བ་ཡར་རྒྱས་གཏོང་བའི་ཐོག་སྲིད་བྱུས་དང་མ་འདྲ་བ་ཞིག་གི་སྟེང་ནས་ཡོང་དགོས་པ་ཡིན་དུས། ང་ཚོས་ངོ་བོ་གཉིས་ལ་བལྟས་ཏེ། བོད་ནང་ལ་ག་འདྲ་བྱས་ནས་འགྲོ་ཡི་འདུག ཕྱི་ལ་ག་འདྲ་བྱས་ནས་འགྲོ་ཡི་འདུག་དེར་ལྟ་དགོས་པ་དེ་གལ་ཆེན་པོ་རེད། ཅེས་དང་།

ཡང་ཁོང་གིས་བོད་ཀྱི་གནད་དོན་དེ་ཐག་མ་ཆོད་ཀྱི་བར་དུ་མེད་པ་ཆགས་མི་སྲིད་པའི་སྐོར་ལ་རྒྱུ་མཚན་ལྔ་བགྲངས་དོན།

༡༽ ང་ཚོ་བོད་ལ་མི་རིགས་གཞན་དང་མ་འདྲ་བར་བོད་ཕྱི་ནང་གཉིས་ཀྱིས་དད་པ་དང་བརྩི་བཀུར་ཞུ་སའི་རྒྱལ་སྤྱིའི་སྙན་གྲགས་ཅན་གྱི་མགོ་ཁྲིད་ཅིག་ཡོད་པ་དེ། བོད་མི་རྣམས་ཁ་འཐོར་དུ་མི་འགྲོ་བར་རྡོག་རྩ་ཆིག་སྒྲིལ་གྱིས་ནུས་པ་གཅིག་ཏུ་སྤུངས་ཐུབ་པའི་ནུས་སྟོབས་གལ་ཆེ་ཤོས་ཤིག་ཆགས་ཡོད་པ་རེད།

༢༽ བོད་ནང་གི་བོད་མི་ཚོའི་ཞུམ་པ་མེད་པའི་སྙིང་སྟོབས་ཏེ་བོད་ཀྱི་ཆོས་དང་རིག་གཞུང་། སྐད་ཡིག་སྲུང་སྐྱོབ་ཆེད་རང་སྲོག་བློས་གཏོང་དགོས་ཀྱང་གཏོང་པའི་སྙིང་སྟོབས་ཡོད་པར་བརྟེན། བོད་ཀྱི་གནད་དོན་དེ་དུས་ནམ་ཡང་ཡལ་མི་སྲིད་པའི་ང་ཚོའི་སྨོན་འདུན་འདྲ་བོ་དེ་ཆགས་ཡོད་པ་རེད།

༣༽ སུ་གང་གིས་བཅད་མ་ཐུབ་པའི་བོད་ཕྱི་ནང་གཉིས་ཀྱི་འབྲེལ་ཐག་དེ་རེད། གལ་སྲིད་ང་ཚོའི་གཞུང་དང་མི་མང་བར་གྱི་འབྲེལ་ལམ་ཆད་པ་ཡིན་ན་ང་ཚོར་ནུས་སྟོབས་གང་ཡང་མེད་པ་ཆགས་འགྲོ་ངེས་རེད། ཡིན་ནའང་། ང་ཚོ་ཆོས་ལ་དད་པ་ཡོད་པ་དང་། སྐད་ཡིག་དང་རིག་གཞུང་ལ་བརྩེ་བ་ཡོད་སྟབས། བོད་ཕྱི་ནང་གཉིས་ཀྱི་གདུང་སེམས་མཉམ་སྐྱེད་ཀྱི་འབྲེལ་ལམ་རྩ་བ་ནས་ཆད་མེད་པ་མ་ཟད། ནུས་པ་དེ་མ་འོངས་པར་བོད་ཀྱི་གནད་དོན་ཐག་གཅོད་བྱ་ཐུབ་པའི་འགུལ་ཤུགས་ཆེ་ཤོས་དེ་རེད།

༤༽ ༧གོང་ས་མཆོག་དགོངས་པ་རྫོགས་སྲིད་ཀྱང་ཡང་སྲིད་ཕེབས་ངེས་རེད། ང་ཚོ་བོད་པ་ཁྱིམ་ཚང་གཅིག་ནང་བཞིན་སྡོད་ཐུབ་པ་དེ། རང་དབང་དམངས་གཙོའི་ངོ་བོར་བསྒྱུར་བའི་ནུས་པ་ལྡན་པའི་བོད་མིའི་སྒྲིལ་འཛུགས་ཀྱི་གཞུང་ཞིག་ཡོད་པ་རེད། གལ་སྲིད་གཞུང་དེ་མེད་པ་ཡིན་ན། ང་ཚོ་མི་སྒེར་དང་ཚོགས་པ་ཁག་གི་ནུས་སྟོབས་ག་ཚོད་ཆེན་པོ་ཆགས་པ་ཡིན་ནའང་མ་འོངས་པར་རྒྱ་མཚོ་ལྟ་བུའི་འཛམ་གླིང་རྒྱལ་ཁབ་ནང་ཡལ་འགྲོ་ཡི་རེད། ཡིན་ཡང་ང་ཚོར་གཞུང་ཡོད་པའི་བཀའ་དྲིན་གྱིས་བོད་མི་ཡོངས་རྫོགས་རྡོག་རྡོག་བྱས་ནས་གནས་ཐུབ་པ་ཞིག་ཡིན་དུས། བོད་མིའི་སྒྲིག་འཛུགས་ཀྱི་གཞུང་འདི་མུ་མཐུད་གནས་དགོས་པ་དེ་མ་འོངས་པར་བོད་ཀྱི་གནད་དོན་ཐག་གཅོད་བྱེད་པའི་རེ་བ་ཆེ་ཤོས་དེ་ཆགས་ཀྱི་ཡོད་པ་རེད།

༥༽ རྒྱལ་སྤྱིའི་ངོ་བོ་འགྱུར་བཞིན་པའི་བོད་ཀྱི་གནད་དོན་དེ་རེད། རྒྱ་གཞུང་གིས་བོད་ཀྱི་གནད་དོན་ཐག་གཅོད་བྱ་རྒྱུའི་མོས་པ་དང་འཆར་གཞི་མེད་པ་ཡིན་ནའང་། བོད་ཀྱི་གནད་དོན་རྒྱལ་སྤྱིའི་སྟེང་ཤུགས་ཆེན་པོ་ཁྱབ་བསྒྲགས་བྱེད་དགོས་པ་དང་། ག་དུས་ཡིན་ནའང་རྒྱལ་སྤྱིའི་ཐོག་བོད་ཀྱི་གནད་དོན་དེ་མ་ཤི་བ་བཟོ་དགོས་པ་རེད། རྒྱལ་སྤྱིའི་ཐོག་ནས་ཡིན་ནའང་བོད་ཀྱི་གནད་དོན་ཐོག་དོ་སྣང་བྱེད་མཁན་དང་རྒྱབ་སྐྱོར་བྱེད་མཁན་མི་མང་རང་གི་ནང་རྒྱ་ཆེན་པོ་ཞེ་དྲགས་ཡོད་པ་ཡིན་དུས། རྒྱལ་སྤྱིའི་མགོ་ཁྲིད་ཚོས་རྒྱ་ནག་གི་མགོ་ཁྲིད་ཚོར་ག་དུས་ཡིན་ནའང་བོད་ཀྱི་གནད་དོན་ཐག་གཅོད་དགོས་སྐོར་ལབ་བསྡད་དགོས་པ་ཞིག་ཆགས་ཡོད་དུས། རྒྱ་ནག་གིས་ངེས་པར་དུ་དེར་ཅིག་མ་བྱས་ན་འགྲིག་ས་མ་རེད་བསམ་པའི་གནད་དོན་མི་ཡོང་ཀ་མེད་རེད། དེར་བརྟེན་ང་ཚོས་དོན་ཚན་ ༥ དེ་རྡོག་རྡོག་བྱས་ནས་བསྡད་པ་ཡིན་ན་ང་ཚོའི་རེ་བ་དང་ནུས་སྟོབས་ཆགས་ཡོད་པ་རེད། དེའི་ནང་གི་གང་རུང་ཞིག་མེད་པའི་ཉིན་མོར་ང་ཚོའི་ནུས་སྟོབས་ཉམས་འགྲོ་ཡི་རེད། དེ་མེད་པ་ཆགས་དུས་རྒྱ་ནག་གིས་ང་ཚོར་འབྲེལ་མོལ་བྱ་རྒྱུ་མ་རེད་ལ། བོད་ཀྱི་གནད་དོན་བཤད་དགོས་པ་མེད། ང་ཚོ་བོད་མི་ཡོངས་སུ་ཚར་འགྲོ་བའི་ཉེན་ཁ་ཞིག་ཆགས་ཀྱི་ཡོད་པ་རེད། ཅེས་བརྗོད་སོང་།

གཏམ་བཤད་ཀྱི་མཇུག་ཏུ་སྐུ་ཞབས་ཝོ་ཞིང་ཅེན་ལགས་ཀྱིས་གཏམ་བཤད་པ་རྣམ་པའི་སྐད་ཆར་དཔྱད་བརྗོད་གནང་བ་དང་འབྲེལ། དེ་རིང་གི་བོད་པ་ཚོས་སོ་སོའི་རང་བཙན་རྒྱལ་ཁབ་སླར་གསོ་དང་། སྐད་ཡིག་དང་ཆོས་ལུགས། རིག་གཞུང་བཅས་སྲུང་སྐྱོབ་ཐུབ་པ་དང་། དེ་བཞིན་༧གོང་ས་མཆོག་ཕྱིར་བོད་དུ་གདན་འདྲེན་ཞུ་རྒྱུ་སོགས་བོད་རིགས་མི་མང་གི་འབོད་སྒྲ་དེ་རྒྱལ་སྤྱིའི་སྤྱི་ཚོགས་ནང་གོ་ཐོས་ཐུབ་པར་འབད་བརྩོན་དགོས་ལ། རྒྱ་རིགས་ཤེས་ཡོན་པ་ཚོས་ད་ལྟ་ལས་ལྷག་གིས་འབད་བརྩོན་མང་པོ་བྱེད་དགོས་པ་དང་། དབུས་བོད་མིའི་སྒྲིག་འཛུགས་དང་བོད་ཀྱི་གཞོན་ནུ་ལྷན་ཚོགས། དེ་བཞིན་བོད་ཕྱི་ནང་གཉིས་ཀྱི་བོད་མི་ཚོས་འབད་བརྩོན་གནང་བཞིན་ཡོད་པ་ལས་ལྷག་གིས། བོད་དང་རྒྱ་མིའི་བར་ལྷད་མེད་ཀྱི་ལངས་ཕྱོགས་བཟུང་སྟེ། བོད་ཀྱི་སྐད་ཡིག་དང་ཆོས་ལུགས། རིག་གཞུང་། དེ་བཞིན་བོད་མིའི་མངོན་འདོད་ལྟར་༧གོང་ས་མཆོག་བོད་དང་ཕོ་བྲང་པོ་ཏ་ལའི་ནང་ཞབས་སོར་འཁོད་ཐུབ་པར་རྒྱ་རིགས་ཤེས་ཡོན་ཚོས་རྒྱ་ནག་གཞུང་དང་འཁུར་མཉམ་ལེན་དགོས་སྐོར་བརྗོད་སོང་།

བོད་རྒྱ་སྨྱུག་ཚོགས་དེ་ཕྱི་ལོ་ ༢༠༠༩ ལོར་སུད་སི་ཇེ་ནེ་ཝ་རུ་ཚོགས་པའི་བོད་རྒྱ་ཚོགས་ཆེན་གྱི་གྲོས་ཆོད་གཞིར་བཟུང་ཐའེ་ཝན་དུ་བཙུགས་ཤིང་། ཨ་རིའི་ནང་དེབ་སྐྱེལ་བྱས་ཟིན་པའི་ཚོགས་པ་ཞིག་ཡིན་ལ། ད་ལྟའི་ཆར་བོད་མི་ ༤ དང་རྒྱ་རིགས་ ༣ བཅས་རྒྱུན་ལས་བདུན་དང་། ཚོགས་མི་ ༡༠ ལྷག་ཡོད་ཅིང་། མ་འོངས་པར་ཚོགས་མི་བསྡུ་རུབ་ཀྱི་ལས་གཞི་དངོས་སུ་མགོ་འཛུགས་འཆར་ཡོད་འདུག ཚོགས་པ་དེའི་དམིགས་ཡུལ་གཙོ་བོ་ནི་བོད་ཀྱི་གནད་དོན་དེ་རྒྱའི་སྤྱི་ཚོགས་ནང་ཁྱབ་བསྒྲགས་བྱེད་པའི་ཆེད་དུ་ཡིན་ལ། ད་ལྟའི་ཆར་ང་ཚོའི་སྤྱི་ཚོགས་ནང་རྒྱ་ཡིག་ཐོག་ནས་བོད་དོན་སྐོར་གྱི་རྩོམ་ཡིག་འབྲི་མཁན་ཉུང་ཉུང་ཡིན་སྟབས། ཚོགས་པ་དེ་བརྒྱུད་བོད་མིའི་ངོས་ནས་བོད་དོན་སྐོར་གྱི་རྒྱུ་ཆ་གང་མང་རྒྱ་མི་ཚོར་མཁོ་སྤྲོད་བྱས་ཏེ། རྒྱ་རིགས་ནང་བོད་དོན་སྐོར་གྱི་རྩོམ་ཡིག་སྤེལ་མཁན་མང་པོ་ཡོང་ཐུབ་པའི་ཆེད་དུ་ཡིན་འདུག

གསར་འགོད་པ། འཇིགས་མེད་རྒྱ་མཚོ་དང་པདྨ་མཚོ།