སྐབས་བཅོ་བརྒྱད་པའི་རྒྱ་ནག་དབུས་ཆབ་སྲིད་རྒྱུན་ལས་ཡོངས་ཀྱི་ཚོགས་འདུ་ཐེངས་ལྔ་པ་དེ་པེ་ཅིན་དུ་ཚོགས་བཞིན་ཡོད་པའི་སྟེང་ཏང་མི་རྒན་པ་སྐོར་ཞིག་གི་གྱོད་དོན་ཐག་གཅོད་སྲིད་པར་ཚོད་དཔག་བྱེད་བཞིན་འདུག
ཟླ་འདིའི་ཚེས་ ༢༦ ནས་ ༢༩ ཉིན་བར། རྒྱ་ནག་གི་སྐབས་བཅོ་བརྒྱད་པའི་དབུས་ཆབ་སྲིད་རྒྱུན་ལས་ཡོངས་ཀྱི་ཚོགས་འདུ་ཐེངས་ལྔ་པ་དེ་པེ་ཅིན་གྱི་ཅིན་ཞི་མགྲོན་ཁང་ (京西宾馆) དུ་འཚོགས་བཞིན་ཡོད་པ་དང་། ཚོགས་འདུ་འདིའི་བརྗོད་གཞི་གཙོ་བོ་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ། བཅུ་གསུམ་ལྔ་ (ལོ་ལྔ་རེ་རྗེས་ཀྱི་མི་མང་གི་དཔལ་འབྱོར་དང་སྤྱི་ཚོགས་ཡར་རྒྱས་ཀྱི་ལས་འཆར་ཐེངས་བཅུ་གསུམ་པ།)ཟེར་བ་དེ་ཡིན་ཚུལ་བསྒྲགས་ཡོད་ཀྱང་། རྒྱ་ནག་ཕྱིའི་བརྒྱུད་ལམ་ཁག་ཏུ། ད་རེབ་ཀྱི་ཚོགས་འདུ་དེ་རྒྱ་ནག་གི་དཔལ་འབྱོར་དང་མཐོ་རིམ་མི་སྣ་ཁག་ཅིག་གྱོད་དོན་ཐག་གཅོད་བྱ་རྒྱུ་ཡིན་ཚུལ་རྗོད་བཞིན་འདུག
ཁ་སང་ཨ་རིའི་རྒྱ་སྐད་སྡེ་ཚན་གྱིས་གནས་ཚུལ་སྤེལ་པའི་ནང་། ཨ་རིའི་ཁེ་རོ་ལེ་ནཱ་མངའ་སྡེའི་གཙུག་ལག་སློབ་ཆེན་གྱི་སློབ་དཔོན་ཆེན་མོ་ (Xie Tian) ཡིས། ད་རེབ་ཀྱི་ལོ་ ༥ ཡི་འཆར་གཞི་འདི་ནི་ཞི་ཅིན་ཕིན་གྱི་ཐོག་མའི་ལོ་ ༥ འཆར་གཞི་ཡིན་སྟབས་འཆར་གཞི་གཙོ་བོ་དཔལ་འབྱོར་ཡིན་སྲིད། དཔལ་འབྱོར་གོང་འཕེལ་བཏང་བ་ཡིན་ན། རྒྱ་ནག་གི་སྲིད་དབང་ཁྲིམས་མཐུན་རིང་བཞིན་ཆགས་ཀྱི་ཡོད་པ་དང་། གལ་སྲིད་དཔལ་འབྱོར་ལ་གནོད་སྐྱོན་ཕོག་པ་ཡིན་ན། རྒྱ་ནག་གི་ཆབ་སྲིད་ཤོག་ཁག་གཅིག་ཡར་འགྲོ་མར་འགྲོ་ཙམ་མ་ཡིན་པར། གུང་ཁྲན་ཏང་ཡོངས་ལ་དཀའ་ངལ་འཕྲད་ངེས་རེད། ཅེས་བརྗོད་འདུག
ཨ་རིར་གནས་སྡོད་བྱེད་པའི་རྒྱ་ནག་སྲིད་དོན་དཔྱད་ཞིབ་པའམ་འབུམ་རམས་པ་ཝང་ཅོན་ཐའོ་ (Wang Juntao)ཡིས། ད་རེབ་ཀྱི་ཚོགས་དུས་ ༥ བའི་སྟེང་ཞི་ཅིན་ཕིན་གྱིས་རྒྱ་ནག་སྐབས་ ༡༩ བའི་ཆབ་སྲིད་རྒྱུན་ལས་སྟངས་འཛིན་བྱ་དགོས་པ་དང་། ལྐོག་ཟ་རུལ་སུངས་ཀྱི་གནད་དོན་ཐག་གཅོད་བྱ་རྒྱུ་གལ་ཆེ་ཤོས་ཡིན་སྟབས། ཁོས་མི་སྣ་གོ་སྒྲིག་གི་ལམ་ལུགས་འགྱུར་བ་གཏང་སྟེ་མི་ཁག་ཅིག་མགྱོགས་པོར་གནས་སྤོར་བྱ་སྲིད་པ་རེད། ཅེས་བརྗོད་འདུག
འདས་པའི་ལོ་ ༢༠ ནང་རྒྱ་གཞུང་གིས་ཆབ་སྲིད་ལྷན་ཁང་ལ་སྒྲིག་ཁྲིམས་མང་པོ་གཏན་འབེབས་བྱས་ཡོད་པའི་ཁྲོད། རྒྱུན་ལས་སུ་ཞིག་ཡིན་ཡང་རང་ལོ་ ༦༩ ལ་སླེབས་པ་ཡིན་ན་རྒན་ཡོལ་ཞུ་དགོས་ཀྱི་ཡོད་པ་དང་། ད་ལྟའི་དབུས་ཆབ་སྲིད་ལྷན་ཁང་གི་རྒྱུན་ལས་ཁྲོད་ཀྲང་ཏི་ཅང་ (Zhang Dejiang)དང་། ཡོ་ཀྲོན་ཧྲིན་ (Yu Zhengsheng)། ཀྲང་གའོ་ལི་ (Zhang Gaoli)། ལི་ཡོན་ཧྲན་ (Liu Yunshan)། ཝང་ཆི་ཧྲན (Wang Qishan)སོགས་མི་ ༥ ལོ་ན་ ༦༨ ལ་སླེབ་ཀྱི་ཡོད་འདུག
རྒྱ་ནག་དཔྱད་ཞིབ་པ་ཁག་ཅིག་གིས། ད་ལྟའི་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་འགན་འཛིན་ཝང་ཆེ་ཧྲན་རྒན་ཡོལ་ལོ་ཚད་ཐོན་ཡོད་ཀྱང་། སྲིད་འཛིན་ཞི་ཅིན་ཕིན་གྱི་ལག་པ་གཡས་བ་དང་ཏང་གི་རྐང་པ་གཡོན་པ་དེ་ཆགས་ཡོད་སྟབས། སྐབས་བཅུ་དགུ་པའི་ནང་མུ་མཐུད་སྡོད་རྒྱུ་ཡིན་པ་དང་། ད་རེབ་ཚོགས་འདུའི་སྟེང་ཝང་ཆི་ཧྲན་གྱི་རྒན་ཡོལ་ཕར་འགྱང་བྱ་སྲིད་སྐོར་ཡང་བརྗོད་འདུག
ད་རེབ་ཀྱི་ཚོགས་འདུའི་སྟེང་། ལིན་ཅི་ཧྭ་གུང་ཁྲན་ཏང་ནས་ཕྱིར་འཕུད་དངོས་སུ་ཁྱབ་བསྒྲགས་བྱ་རྒྱུ་ཡིན་པ་མ་ཟད། ཀྲུའུ་པིན་ཧྲིན་ (Zhou benshun) སོགས་ཆབ་སྲིད་ལྷན་ཁང་གི་རྒྱུན་ལས་ཨུ་ཡོན་དང་། ཁ་གསབ་རྒྱུན་ལས་ཨུ་ཡོན་བཀག་གཉེར་བྱས་ཡོད་པ་རྣམས་དངོས་སུ་ཕྱིར་འཕུད་བྱ་རྒྱུ་ཡིན་སྟབས། ཚོགས་དུས་ ༥ བ་འདི་གུང་ཁྲན་ཏང་གི་འདས་པའི་ལོ་རྒྱུས་ཁྲོད་ཏང་གི་དཔོན་རིགས་ཕྱིར་འཕུད་ཆེས་མང་བའི་ཚོགས་འདུ་དེ་ཆགས་རྒྱུ་ཡིན་པའི་ངོས་འཛིན་བྱེད་མཁན་ཡོད་ཀྱང་། སྲིད་དོན་དཔྱད་ཞིབ་པ་ཝང་ཅོན་ཐའོ་ཡིས། ཞི་ཅིན་ཕིན་གྱིས་ཝང་ཆི་ཧྲན་གྱི་གོ་གནས་སྲུང་སྐྱོབ་ཆེད་ནུས་ཤུགས་དེ་འདྲ་འདོན་དགོས་དོན་ཡོད་པ་མ་རེད། རྒྱུ་མཚན་རྒྱ་ནག་གི་སྒྲིག་ཁྲིམས་ནང་ཐབས་ཤེས་གཞན་སྣ་ཚོགས་ཡོད་སྟབས། ལྐོག་ཟ་རུལ་སུངས་ཀྱི་རྡུང་རྡེག་ལ་འབྲས་བུ་གཅིག་པ་འབྱུང་གི་རེད། ཅེས་བརྗོད་འདུག
གསར་འགོད་པ། འཇིགས་མེད་རྒྱ་མཚོ།
