འཚོ་བའི་འགྲན་རྩོད་ཁྲོད་མི་མང་པོ་རེ་ཆད་ཐབས་ཟད་དུ་འགྱུར་བཞིན་ཡོད།

དེ་རིང་བཞུགས་སྒར་ཕོ་བྲང་དུ་༧གོང་ས་མཆོག་དབུ་བཞུགས་ཐོག་བཙན་བྱོལ་བོད་མི་དང་རྒྱ་གར་བ། ཨ་རི་བཅས་ཀྱི་ཚོང་པའི་ཚོགས་བསྡུའི་སྟེང་། ཚོང་ལས་དཔལ་འབྱོར་ཡར་རྒྱས་བཏང་བ་དང་འབྲེལ་མི་ཚེ་ལ་བདེ་སྐྱིད་བསྐྲུན་ཏེ་རང་བཞིན་གཉིས་ཕན་སྒྲུབ་སྟངས་སྐོར་ལ་བགྲོ་གླེང་གནང་སོང་།

དེ་རིང་སྔ་དྲོའི་ཆུ་ཚོད་ ༡༠ སྟེང་། ཨ་རིའི་ཚོང་ལས་སྒྲིག་འཛུགས་ལྟེ་གནས་ཁང་ (AEI) གི་གོ་སྒྲིག་འོག དྷ་རམ་ས་ལའི་བཞུགས་སྒར་ཕོ་བྲང་གི་ཚོགས་ཁང་དུ། ཞེན་ཆགས་མེད་པའི་ཐོག་ནས་འབྱོར་ཕྱུག་བཟོ་རྒྱུ་དང་དཔལ་འབྱོར་ཡར་རྒྱས་ལ་བརྟེན་ནས་འཛམ་གླིང་ནང་བདེ་སྐྱིད་བསྐྲུན་ཐབས་ (Abundance Without Attachment, Pursuing Happiness in a World of Economic Growth) ཞེས་པའི་བརྗོད་གཞིའི་ཐོག ༧གོང་ས་མཆོག་དབུ་བཞུགས་ཐོག་བགྲོ་གླེང་ཚོགས་འདུ་ཞིག་ཚོགས་ཡོད་པ་དང་། ཚོགས་འདུ་དེར་ཨ་རིའི་ཚོང་ལས་སྒྲིག་འཛུགས་ལྟེ་གནས་ཁང་དང་རྒྱ་གར་གྱི་དབུལ་སྐྱོར་ཁེ་ལས་སྡེ་ཁག དེ་བཞིན། བོད་མིའི་སྒྲིག་འཛུགས་ནང་སྲིད་མཉམ་ལས་དང་། དཔལ་འབྱོར་ཚོང་པའི་ལྷན་ཚོགས་སོགས་སྐུ་མགྲོན་ ༦༠ ཙམ་མཉམ་ཞུགས་གནང་སོང་། ཚོང་པའི་བགྲོ་གླེང་ཚོགས་འདུའི་དགོས་དམིགས་གཙོ་བོ་དེང་གི་དཔལ་འབྱོར་འདུ་འགོད་ལ་བརྟེན་ཏེ་ཁེ་ལས་པ་ཚོས་སོ་སོའི་ཁེ་བཟང་གཉེར་རྒྱུ་གཅིག་པུ་མ་མིན་པར། སྤྱི་མང་གི་དབུལ་ཕོངས་སེལ་ཐབས་དང་འཚོ་གནས་ལ་བདེ་སྐྱིད་བསྐྲུན་ཐབས་བཅས་བདག་གཞན་གཉིས་ལ་དོན་ཕན་ལྡན་པའི་ཁེ་ལས་གཉེར་ཕྱོགས་སྐོར་ཡིན་འདུག

བགྲོ་གླེང་ཚོགས་འདུའི་གཙོ་སྐྱོང་བ་སྐུ་ཞབས་ཨར་ཐུར་བྷི་རའོ་ཁི་ (Arthur Brooks) ལགས་ཀྱིས་ཚོགས་འདུའི་དགོས་དམིགས་ངོ་སྤྲོད་གནང་བར། དེ་རིང་༧གོང་ས་མཆོག་དང་ལྷན་དུ་ང་ཚོས་ཉིན་གཉིས་རིང་གི་ཚོང་པའི་བགྲོ་གླེང་འདི་བརྒྱུད་དཔལ་འབྱོར་འདུ་འགོད་ཀྱི་ཕུགས་འདུན་མངོན་འགྱུར་ཡོང་བ་དང་། འགྲོ་བ་མིའི་སྤྱི་ཚོགས་ནང་དོན་ཕན་ལྡན་པའི་བདེ་སྐྱིད་ཀྱི་འཚོ་གནས་བསྐྲུན་ཐུབ་པའི་རེ་བ་ཡོད། ཅེས་བརྗོད་སོང་།

རྒྱ་གར་མངའ་སྡེ་ཨོ་ཌེ་ཤཱ་ (Odisha) ཆབ་སྲིད་ཚོགས་པའི་འཐུས་མི་སྐུ་ཞབས་རྗེན་པན་ཌ་ (Jay Panda) ལགས་ཀྱིས་དབུལ་ཕོངས་མི་མང་སྐོར་ལ། ངས་ནམ་རྒྱུན་མི་མང་གི་དབུལ་ཕོངས་ཀྱི་ཕྱོགས་དེ་མཐོང་གི་འདུག དཔེར་ན། དབུལ་ཞིང་ཕོངས་པའི་མི་མང་གིས་སོ་སོར་ཡིད་ཆེས་མེད་པ་དང་རང་མཐོང་མེད་པའི་གནས་སྟངས་འོག་འཚོ་གནས་ཀྱི་བྲན་གཡོག་ཏུ་འགྱུར་བཞིན་ཡོད་པ་དང་། ཕྱོགས་གཞན་ཞིག་ནས་མི་མང་གིས་དབུལ་ཕོངས་ཀྱི་འཚོ་གནས་རྩོད་ལེན་བྱེད་པར་བརྟེན་ནས་སོ་སོའི་ཆེ་མཐོང་ཤོར་གྱི་ཡོད། དཔེར་ན། ལོ་ངོ་ ༡༥ སྔོན་ལ་ང་རང་མངའ་སྡེའི་གྲོས་ཚོགས་ནང་ཡོད་དུས། ང་ཚོའི་མངའ་སྡེའི་ནང་ལོ་རེར་ཡུལ་མི་བརྒྱ་ཕྲག་མང་པོ་ལྟོགས་སྐོམ་གྱིས་གྲོངས་ཀྱི་ཡོད་པ་དང་། དེང་སྐབས་མི་མང་གི་འཚོ་གནས་ཅུང་ཡར་རྒྱས་ཕྱིན་ཡོད་ཀྱང་། མི་མང་གིས་སོ་སོར་ཡིད་ཆེས་དང་རང་མཐོང་མེད་པའི་གནད་དོན་དེ་མུ་མཐུད་ལྷག་འདུག ཐེངས་ཤིག་བུད་མེད་ཅིག་ཡོང་ནས་ང་ལ་ཧིན་སྒོར་ ༡༠ བསླངས་སོང་། སྐབས་དེའི་གྲོང་གསེབ་ཀྱི་འཚོ་གནས་ཐད་ནས་བཤད་ན་ཧིན་སྒོར་ ༡༠ དེ་གང་ལ་གང་འཚམ་གྲངས་ཀ་ཆེན་པོ་ཞིག་རེད། བུད་མེད་དེས་བདག་གི་གཏོང་ཕོད་ལ་བསྔགས་བརྗོད་ཡི་རངས་གནང་སོང་། ཞེས་བརྗོད་སོང་།

ཨ་རིའི་ཚོང་ལས་སྒྲིག་འཛུགས་ལྟེ་གནས་ཁང་གི་དབུལ་ཕོངས་ཞིབ་འཇུག་ཚན་པའི་ཆེད་མཁས་པ་སྐུ་ཞབས་རའོ་བྷིར་ཊི་ཌོར་ (Robert Doar) ལགས་ཀྱིས། ང་རང་རྒྱལ་གར་ནང་སྐྱེས་པ་ཡིན་ཞིང་། དེང་གི་དངོས་པོའི་དཔལ་ཡོན་ལ་བརྟེན་ནས་ང་ལ་འབྱོར་ཕྱུག་ཅུང་རྒྱས་པ་ཡིན་སྟབས། ང་ལ་རྒྱུན་པར་ཡིད་མ་ཚིམས་པའི་ཚོར་སྣང་འབྱུང་གི་འདུག ཉེ་བའི་ཆ་ནས་ངས་དེང་དུས་ཀྱི་ཚན་རིག་དང་བཟོ་རིག ཁེ་ལས་གསུམ་ཟུང་སྦྲེལ་གྱིས་རང་དང་འདྲ་བའི་མི་ཚང་མར་བྱམས་བརྩེ་དང་སྙིང་རྗེ་བསྐྱེད་པ་ཡིན། དེ་ལ་བརྟེན་ནས་ངས་འབྱོར་ཕྱུག་གིས་མི་ལ་ནུས་སྟོབས་སྤེལ་ཐུབ་པ་ཤེས་རྟོགས་བྱུང་སོང་། བརྩེ་བ་དང་འབྱོར་བ། དངུལ་ལོ་སོགས་ནི་མིའི་འཚོ་བའི་ནུས་སྟོབས་ཤིག་རེད། གལ་སྲིད་ང་ཚོས་བརྩེ་བ་ནི་ནུས་སྟོབས་ཤིག་ཏུ་མཐོང་ཚེ། དེ་ནི་ང་ཚོས་ལོངས་སུ་སྤྱོད་བཞིན་པའི་འབྱོར་ཕྱུག་བཞིན་འཁོར་སྐྱོད་བྱེད་ཀྱི་ཡོད། ང་ཚོས་ཕར་ལ་གཏོང་ཕོད་ཇི་ལྟར་ཆེ་ན། ཚུར་ལའང་ཁེ་སྤོགས་དེ་ཙམ་འཐོབ་ངེས་ཡིན། ང་ཚོ་ཚང་མས་བདེ་སྐྱིད་ཀྱི་འཚོ་བ་ལོངས་སུ་སྤྱོད་འདོད་ཡོད་པ་རེད། ཡིན་ནའང་འཚོ་བའི་འགྲན་རྩོད་ཁྲོད་དུ་མི་མང་པོ་ཞིག་རེ་ཆད་ཐབས་ཟད་དུ་འགྱུར་བཞིན་ཡོད། སྤྱིར་འགྲོ་བ་མིའི་འཚོ་གནས་ཞིབ་འཇུག་ནང་འཛམ་གླིང་སྟེང་འགྲོ་བ་མི་ཡོད་དོ་ཅོག་ཕན་ཚུན་རྟེན་འབྲེལ་དུ་གནས་པར་བཤད་ཀྱང་། དོན་དངོས་སུ་དེང་སྐབས་འཛམ་གླིང་སྟེང་གི་འགྲོ་བ་མི་ཚང་མ་ཕན་ཚུན་ལ་འབྲེལ་འདྲིས་མེད་པ་ལྟར་རེ་ཆད་འུ་ཐུག་གིས་འཚོ་བཞིན་ཡོད། དེར་བརྟེན། ང་ཚོས་འབྱོར་ཕྱུག་གི་རམ་འདེགས་ལ་བརྟེན་ནས་དཀའ་སྡུག་འདི་ངེས་པར་དུ་སེལ་དགོས་ཀྱི་ཡོད་པ་རེད། ཅེས་བརྗོད་སོང་།

༧གོང་ས་མཆོག་གིས་བཀའ་སློབ་གནང་དོན། ང་ཚོ་ཚང་མ་རང་བཞིན་གྱིས་དགའ་སྐྱོ་ཆགས་སྡང་གི་མྱོང་བ་ཟབ་པའི་སྲོག་ཆགས་ཤིག་ཡིན་པ་དང་། མྱོང་བ་ཟབ་མོ་འདིའི་ཐད་ནས་འབུ་རིགས་ཕྲ་མོ་ལ་ཚོར་ཤེས་དང་གོ་རྟོགས་དམན་པོ་ཡོད་སྟབས། ཁོ་ཚོ་དེ་རིང་འདིར་ཡོང་ནས་འཚོ་གནས་ཀྱི་དཀའ་སྡུག་སེལ་ཐབས་ལ་བགྲོ་གླེང་གནང་ཐུབ་ཀྱི་མེད། ཁོ་ཚོ་འགུལ་སྐྱོད་ཙམ་གྱི་འཚོ་ཐབས་ལ་བརྟེན་ཡོད། ང་ཚོ་མིའི་ཀླད་པའི་གོ་རྟོགས་དང་འདྲ་གི་མ་རེད། ང་ཚོ་སྨྲ་ཤེས་དོན་གོ་བའི་སྲོག་ཆགས་ཤིག་ཡིན་སྟབས། ང་ཚོས་མིའི་འཇིག་རྟེན་འདི་ཇེ་ལེགས་སུ་གཏོང་དགོས་ཀྱི་ཡོད་པ་རེད། ང་ཚོ་ཚང་མ་བདེ་སྐྱིད་འདོད་པ་དང་སྡུག་བསྔལ་མི་འདོད་གཅིག་མཚུངས་ཡིན། ཡིན་ནའང་ང་ཚོ་འཇིག་རྟེན་འདིར་སྐྱེས་པ་ནས་སྡུག་བསྔལ་མྱོང་གི་ཡོད། སྡུག་བསྔལ་དེ་ང་ཚོ་རང་ཉིད་ཀྱིས་བཟོས་པ་ཡིན་དུས། ད་ལྟ་ང་ཚོས་སོ་སོའི་ནོར་འཁྲུལ་ཡོ་བསྲང་བྱེད་ཐབས་ལ་བསམ་བློ་གཏོང་དགོས་པ་དང་། ང་ཚོར་ང་ཚོས་བཟོས་པའི་དཀའ་སྡུག་སེལ་དགོས་པའི་འགན་ཡོད་པ་རེད། གལ་ཏེ་ང་ཚོས་རང་ཉིད་ཀྱིས་བཟོས་པའི་དཀའ་སྡུག་སེལ་ཐབས་མེད་ན། གཞན་གང་གིས་ཀྱང་སེལ་ཐབས་ཡོད་པ་མ་རེད། ང་ཚོས་ཕན་ཚུན་ལ་བསམ་ཤེས་གུ་ཡངས་མ་བྱས་པའི་རྐྱེན་གྱིས་མིས་བཟོས་པའི་དཀའ་སྡུག་ལ་འཕྲད་ཀྱི་ཡོད་པ་རེད། དཀའ་སྡུག་འདི་དག་ཁྲོ་སྡང་དང་སྒེར་སེམས་ལ་བརྟེན་ནས་འབྱུང་གི་ཡོད་སྟབས། དཀའ་སྡུག་འདི་སེལ་བའི་ནུས་སྟོབས་ང་ཚོར་ཏན་ཏན་ཡོད་པ་རེད། ཅེས་གསུང་སོང་།

གསར་འགོད་པ། པདྨ་རྒྱལ།