འབྲས་སྤུངས་སུ་རྩོད་པའི་ཆོས་ཐོག་ཚུགས།

གནས་ཚུལ་བཏང་འབྱོར་བྱུང་བ་ལྟར་ན། ཁ་སང་གཟའ་ལྷག་པའི་ཉིན། དགེ་ལུགས་ཡོངས་ཀྱི་རྒྱལ་བའི་བཀའ་དྲིན་རྗེས་དྲན་དང་འབྲེལ་བའི་དབུ་ཕར་གྱི་རྩོད་པའི་ཆོས་ཐོག་ཆེན་མོ་དེ་རྒྱ་གར་ལྷོ་ཕྱོགས་ཀྱི་གདན་ས་ཆེན་མོ་དཔལ་ལྡན་འབྲས་སྤུངས་སུ་དབུ་འཛུགས་གནང་ཡོད་འདུག

ཆོས་ཐོག་དེར་གདན་ས་གསུམ་དང་བཀྲ་ཤིས་ལྷུན་པོ། ར་སྟོད་བཅས་ཀྱི་དགེ་ལུགས་རྒྱུགས་སྤྲོད་ལ་ཕེབས་བཞིན་པའི་སློབ་དཔོན་ལོ་རིམ་དང་པོ་དང་གཉིས་པ། རྣམ་རྒྱལ་གྲྭ་ཚང་གི་གཞུང་ལུགས་རབ་འབྱམས་བཅས་དགེ་འདུན་པ་ ༢༠༠ ལྷག་མཉམ་ཞུགས་གནང་ཡོད་འདུག

ཆོས་ཐོག་དབུ་འཛུགས་ཀྱི་མཛད་སྒོའི་སྐུ་མགྲོན་གཙོ་བར་དགའ་ལྡན་ཁྲི་རིན་པོ་ཆེ་མཆོག་དང་། དམིགས་བསལ་སྐུ་མགྲོན་དུ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག གཞན། འབྲས་སྤུངས་ཁྲི་པ་དང་དགའ་ལྡན་དང་འབྲས་སྤུངས་ཀྱི་མཁན་པོ། མོན་གྷོ་ས་གནས་མགོ་འཛིན་སོགས་མཉམ་ཞུགས་གནང་ཡོད་འདུག

དབུ་འབྱེད་མཛད་སྒོའི་སྟེང་། ཆོས་ཐོག་གོ་སྒྲིག་ཚོགས་ཆུང་གི་ཚོགས་གཙོ་དགེ་བཤེས་རོང་པོ་བློ་བཟང་སྙན་གྲགས་ལགས་ཀྱིས། རྩ་ཤེ་ཌཱིཀ་ཆེན་ལ་མཚོན་ན་རྗེ་རིན་པོ་ཆེས་རྗེ་བཙུན་འཇམ་པའི་དབྱངས་ཀྱི་ཞལ་གཟིགས་རྒྱུན་མར་བྱུང་བ་དང་། ལྟ་བའི་སྐོར་དུས་ཡུན་རིང་པོར་སྦྱངས་ཤིང་ལྟ་བ་ལེགས་པར་རྟོགས་པའི་སྟེང་ནས་བརྩམས་པའི་བསྟན་བཅོས་རྨད་དུ་བྱུང་བ་ཞིག་ཡིན་ཙང་།   ལོ་འདིར་རབ་བྱེད་དང་པོ་དང་གཉིས་པ་གཉིས་ལ་ལྟ་སྐབས། དབུ་མའི་དཀའ་ནད་དུ་གྲགས་པའི་ནང་ཚན་ཆོས་ཅན་མཐུན་སྣང་བའི་སྐོར་ལྷག་མཐོང་ཆེན་མོ་དང་དྲང་ངེས་ལ་གསལ་ཡང་ཐལ་བཟློག་གི་སྐོར་ལ་རྗེའི་གསུང་ཌཱིཀ་ཆེན་ལ་གསལ་བ་འདི་བཞིན་གཞན་ལ་མེད་པས་ད་རེས་ངེས་ཅན་དུ་ཐུགས་སྣང་དགོས་སྐོར་དང་། དེ་ཡང་ཉིན་རེ་བཞིན་སྔ་དྲོ་ཆུ་ཚོད་དགུ་བ་ནས་ཆུ་ཚོད་གཅིག་རིང་རྩོད་ཟླ་དང་། དེ་ནས་ཆུ་ཚོད་གཅིག་ལ་དམ་བཅའ། ཉིན་རྒྱབ་ཁོངས་སོ་སོ་ནས་ཆུ་ཚོད་གཉིས་ཙམ་ལ་མཉམ་ཚོགས་ཀྱི་ལབ་གླེང་། དགོང་དྲོ་ཆུ་ཚོད་དྲུག་པ་ནས་བདུན་དང་ཕྱེད་ཀའི་བར་དམ་བཅའ་ཆེན་མོ་དང་། དེ་གྲོལ་བ་དང་ཆུ་ཚོད་གཅིག་རིང་རྩོད་ཟླ་གནང་རྒྱུ་སོགས་ངོ་སྤྲོད་གནང་ཡོད་འདུག

དམིགས་བསལ་སྐུ་མགྲོན་དཔལ་ལྡན་བཀའ་བློན་ཁྲི་ཟུར་སློབ་དཔོན་ཆེན་པོ་མཁས་དབང་ཟམ་གདོང་རིན་པོ་ཆེ་མཆོག་ནས། མདོ་རྒྱན་སྦྱར་ཚུལ་དང་།   དཔེ་ཀློག་སྐབས་གཞུང་སྤྱིའི་ཁོག་འབུབས་ལུགས་དང་། ཚིག་འགྲེལ་བསྐྱོན་སྟངས་ཚུན་ཆད་ལ་ཐུགས་སྣང་དགོས་སྐོར་དང་།   རང་རང་སོ་སོའི་ཡིག་ཆས་ལྡེ་མིག་བྱས་ཏེ་རྗེ་ཡབ་སྲས་ཀྱི་གཞུང་གི་སྒོ་ཕྱེ་ནས་ཐོས་བསམ་བྱ་རྒྱུ་ལས་དེའི་མཚམས་རང་ལ་བསྡད་པ་ཡིན་ན། ལྡེ་མིག་ཟིན་ཏེ་སྒོ་མ་ཕྱེ་བར་བསྡད་པ་ལྟ་བུར་ཆགས་འགྲོ་བ་དང་། བཤད་རྒྱུན་ལ་རྟོག་གེ་མགོ་མཁྲེགས་ཟེར་བ་ལྟར་རྩོད་པ་རང་ལ་མགོ་མ་འཁོར་བ་དགོས་པ་ལས། སྟབས་ཉེས་ན་ངག་ཀྱལ་གྱི་རྒྱུ་རུ་འགྲོ་རྒྱུའི་ཉེན་ཁ་ཡང་ཡོད་པས་ཇི་ཙམ་ཐོས་བསམ་བྱས་པའི་ཚོད་ཀྱིས་རང་རྒྱུད་ཀྱི་ཉོན་མོངས་ཉུང་དུ་གཏོང་ཐབས་དང་། རྗེ་རིན་པོ་ཆེས། རིགས་ལམ་ཕྲ་མོ་འབྱེད་པའི་རྣམ་དཔྱོད་དང་། །གཞུང་ལུགས་གདམས་པར་ཤར་བའི་ཉམས་ལེན་དང་། །ཚིག་སྦྱོར་ཚུལ་ལ་མཁས་པའི་ངག་གི་དཔལ། །ས་སྟེང་འདི་ན་རིན་ཆེན་རྣམ་གསུམ་སྣང་། །ཞེས་པ་ལྟར་གཞུང་ལུགས་གདམས་པར་ཤར་ཏེ། ཉམས་སུ་ལེན་རྒྱུ་གལ་ཆེ་སྐོར་དང་། ད་རེས་ཀྱི་བཀའ་དྲིན་རྗེས་དྲན་འདི་དང་། ལས་རིམ་ཕྱིན་ཟིན་པ་དང་། འགྲོ་བཞིན་པ། བྱེད་འཆར་ཀྱི་མཛད་རིམ་གལ་ཆེ་བ་ཁག་ལམ་སྟོན་གནང་མཁན་དང་། ལས་དོན་གནང་མཁན་ཚང་མ་ལ་བསྔགས་བརྗོད་དང་རྗེས་སུ་ཡི་རང་ཡོད་སྐོར་དང་། དེ་ཡང་། ཕན་པའི་ལན་དུ་མཆོད་པར་བྱ་བ་ནི། །བསྒོ་བའི་ཚིག་བཞིན་ཉམས་སུ་ལེན་པ་ཡིན། །ཞེས་གསུངས་པ་ལྟར་ཡིན་ཙང་ཅི་གསུང་བཀའ་སྒྲུབ་ཞུ་རྒྱུ་དེ་སྒྲུབ་པའི་མཆོད་པ་ཡིན་སྐོར། འབྱུང་འགྱུར་ཡང་ལས་དོན་འདི་བཞིན་གདན་སའི་ནང་ཕྱག་བཞེས་དགོས་སྐོར་སོགས་གསུངས་ཡོད་འདུག

སྐུ་མགྲོན་གཙོ་བོ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་ནས། བོད་གངས་ཅན་དང་འཕགས་པ་སྤྱན་རས་གཟིགས་དབར་གྱི་ཐུགས་བསྐྱེད་སྨོན་ལམ་གྱི་འབྲེལ་བ་དང་། མདོར་ན་འཕགས་པ་སྤྱན་རས་གཟིགས་དབང་གིས། །ཞེས་སོགས་གསུངས་པ་ལྟར། རྒྱལ་བའི་བཀའ་སློབ་ལག་ལེན་དུ་བསྟར་རྒྱུ་གལ་ཆེ་བ་དང་།༸རྒྱལ་བ་ཐུབ་བསྟན་རྒྱ་མཚོ་དགུང་ལོ་རིང་པོ་བཞུགས་འདུན་ཡོད་ཀྱང་མ་འོངས་པའི་གནས་ཚུལ་མང་པོ་ཞིག་ལ་གཟིགས་ནས་བསམ་བཞིན་དགོངས་པ་ཞི་དབྱིངས་སུ་གཞོལ་བ་དང་། རྭ་སྒྲེང་རིན་པོ་ཆེ་ནས་ཡང་སྲིད་བརྩད་འཚོལ་སྐབས་སྐུ་ངལ་མང་པོ་བསྐྱོན་ཡོད་པ་སོགས་ལོ་རྒྱུས་ཀྱི་བྱུང་རིམ་དང་། དེ་སྔོན་ཡོངས་འཛིན་རིན་པོ་ཆེ་ནས་བློ་གླིང་ཆོས་རའི་ནང་འཛམ་གླིང་ཞི་བདེ་ཡོང་མིན་སངས་རྒྱས་ཀྱི་བསྟན་པ་གནས་མ་གནས་ལ་རག་ལས་ཡོད་པ་དང་། དེའི་གཞི་རྩ་༸རྒྱལ་བ་རིན་པོ་ཆེའི་སྐུ་ཚེ་ཞབས་པད་བརྟན་མིན་ལ་རག་ལས་པ། དེ་ཡང་ཅི་གསུང་བཀའ་སྒྲུབ་ལ་རག་ལས་སྐོར་སོགས་གསུངས་ཡོད་འདུག