ཐུགས་རེ་ཙམ་མིན་པར་ལས་བྱེད་ལ་མིའི་མཐོང་དང་ཆ་འཇོག་དགོས་པ་ཧ་ཅང་གལ་ཆེན་པོ་རེད།

ཕྱི་ལོ་ ༢༠༡༡ ནས་ ༢༠༡༥ ལོའི་བར་བཙན་བྱོལ་བོད་མིའི་སྒྲིག་འཛུགས་ནང་ཁྱོན་ལས་བྱེད་གསར་པ་ ༢༤༤ ཡར་འཇུག་གནང་ཡོད་པ་དང་ལས་བྱེད་ ༨༧ གྱིས་རྩ་དགོངས་ཞུས་ཡོད་འདུག

གསར་འགོད་པས་རྒྱུས་ལོན་བྱས་པ་ལྟར་ན། བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་ནང་ཕྱི་ལོ་ ༢༠༡༡ ནས་ ༢༠༡༢ བར་ལས་བྱེད་གསར་པ་ ༥༤ ཡར་འཇུག་དང་ལས་བྱེད་ ༡༡ གིས་རྩ་དགོངས་ཞུས་ཡོད་པ་དང་། ཕྱི་ལོ་ ༢༠༡༢ ནས་ ༢༠༡༣ བར་ལས་བྱེད་གསར་འཇུག་ ༣༤ དང་རྩ་དགོངས་ཞུ་མཁན་ ༡༠། ཕྱི་ལོ་ ༢༠༡༣ ནས་ ༢༠༡༤ བར་ལས་བྱེད་གསར་འཇུག་ ༤༨ དང་རྩ་དགོངས་ཞུ་མཁན་ ༢༣། ཕྱི་ལོ་ ༢༠༡༤ ནས་ ༢༠༡༥ བར་ལས་བྱེད་གསར་པ་ ༢༡ དང་རྩ་དགོངས་ཞུ་མཁན་ ༣༠། ཕྱི་ལོ་ ༢༠༡༥ ཟླ་ ༡༡ ཚེས་ ༢༦ ཉིན་གྱི་བར་ལས་བྱེད་གསར་པ་ ༨༧ ཡར་འཇུག་དང་ ༡༣ གྱིས་རྩ་དགོངས་ཞུས་ཡོད་པ་བཅས། ༢༠༡༡ ལོ་ནས་ ༢༠༡༥ ལོའི་བར་ཁྱོན་ལས་བྱེད་གསར་པ་ ༢༤༤ ཡར་འཇུག་གནང་ཡོད་པ་དང་། ལས་བྱེད་པ་ ༨༧ གྱིས་རྩ་དགོངས་ཞུས་ཡོད་འདུག

ཁ་སང་འདི་གའི་གསར་འགོད་པས་བོད་མིའི་སྒྲིག་འཛུགས་ལས་བྱེད་འདེམས་བསྐོ་ལྷན་ཁང་གི་དྲུང་ཆེ་མི་འགྱུར་རྡོ་རྗེ་ལགས་སུ། བོད་མིའི་སྒྲིག་འཛུགས་ཀྱི་གཞུང་ཞབས་ལས་བྱེད་ནང་ལོ་ལྟར་རྩ་དགོངས་ཞུས་ནས་ཐོན་འགྲོ་མཁན་མང་པོ་ཡོང་གི་ཡོད་པ་དེ་དག་རྒྱུ་མཚན་ག་འདྲ་ཞིག་གི་འོག་ནས་རྩ་དགོངས་ཞུ་བཞིན་ཡོད་མེད་དྲིས་པར་ཁོང་གིས། ང་ཚོའི་ལས་བྱེད་ཀྱི་བླང་དོར་སྒྲིག་གཞིའི་ནང་དགོངས་པ་ཞུ་བའི་ཆ་རྐྱེན་དེ་གཅིག་རང་མ་གཏོགས་མེད་སྟབས། ལས་བྱེད་པ་སོ་སོར་དགོངས་པ་བཞེས་ཕྱོགས་ག་རེ་བྱུང་བ་རྣམས་ང་ཚོས་ཚོད་དཔག་ཞུ་ཐུབ་རྒྱུ་ཁག་པོ་ཞེ་དྲགས་རེད། སྒྲིག་གཞིའི་ནང་སོ་སོ་སྒེར་གྱི་དཀའ་ངལ་ཞིག་བྱུང་བ་ཡིན་ན་རྩ་དགོངས་ཞུ་ཆོག་གི་རེད་ཅེས་གསལ་ཡོད་སྟབས། ལས་བྱེད་སུ་ཞིག་གིས་རྩ་དགོངས་ཀྱི་སྙན་ཞུ་བཏང་ཡོང་སྐབས། སྒེར་གྱི་དཀའ་ངལ་སེལ་ཐབས་སུ་རྩ་དགོངས་ཞུ་ཡི་ཡོད་ཅེས་བཀོད་པ་མ་གཏོགས་ཐབས་ལམ་གཞན་བརྒྱུད་དེ་རྩ་དགོངས་ཞུ་པའི་ལམ་ཀ་ཡོད་པ་མ་རེད། གཞི་རྩའི་རྒྱུ་མཚན་མང་པོ་ཡོད་སྲིད་པ་རེད་དེ་ཡིག་ཆའི་ཐོག་ནས་རྟོགས་ཐུབ་པ་ཡོད་པ་མ་རེད། ཡིན་ནའང་འདི་ལྟར་བལྟས་པ་ཡིན་ན། རྩ་དགོངས་ཞུ་མཁན་མང་ཆེ་བར་ཕྱི་རྒྱལ་ཁག་ཏུ་འགྲོ་བའི་གོ་སྐབས་བྱུང་བ་དང་། ལྷག་པར་དུ་གཉེན་སྒྲིག་བྱས་ནས་ཕྱི་རྒྱལ་དུ་འགྲོ་མཁན་མང་པོ་འདུག ཡིན་ནའང་ཚང་མ་དེ་འདྲ་མ་རེད། རྒྱུ་རྐྱེན་གཞན་གྱི་ཐོག་ནས་རྩ་དགོངས་ཞུ་མཁན་ཡང་ཡོད་པ་རེད་བསམ་གྱི་འདུག ཅེས་ངོ་སྤྲོད་གནང་སོང་།

དེ་སྔོན་གཞུང་ཞབས་ཚུད་རྒྱུགས་ཀྱི་སྦྱོང་བརྡར་ཟབ་སྦྱོང་གནང་ཡོད་པ་ལྟར། ཟབ་སྦྱོང་དེ་མུ་མཐུད་དུ་གནང་འཆར་ཡོད་སྐོར་ལ་ཁོང་གིས། ལས་བྱེད་སྦྱོང་བརྡར་ཟབ་སྦྱོང་གི་ལས་འཆར་དེ་བཀའ་ཤག་དང་ལས་བྱེད་འདེམས་བསྐོ་ལྷན་ཁང་གི་གཞི་རིམ་ལས་འཆར་ནང་ཡོད་པ་དང་། ལས་བྱེད་ཟབ་སྦྱོང་སྤྲོད་སྟངས་དེ་ལའང་རིགས་མ་འདྲ་བ་མང་པོ་ཡོད་པ་རེད། དཔེར་ན། ས་ར་མཐོ་སློབ་ལྟ་བུར་ཆ་བཞག་ན། སློབ་ཕྲུག ༤༠ ཞིག་ལ་སྤྱི་ཡོངས་ནས་ལས་དོན་གནང་ཕྱོགས་སྐོར་ལ་ཟླ་ ༦ རིང་ཟབ་སྦྱོང་སྤྲོད་པའི་ལས་འཆར་ཞིག་ཡོད་པ་རེད། ཡིན་ནའང་ད་ལྟའི་བར་མགོ་འཛུགས་ཞུ་རྒྱུ་བྱུང་ཡོད་པ་མ་རེད། ཅེས་བརྗོད་བྱུང་།

ཁོང་གིས་མུ་མཐུད་དུ། ལས་བྱེད་འདེམས་བསྐོ་ལྷན་ཁང་གི་ལས་ཀའི་ནང་ནས་གཙོ་ཆེ་ཤོས་ལས་བྱེད་འདེམས་སྒྲུག་བྱེད་པ་དེ་ཡིན་ལ། འདེམས་སྒྲུག་བྱས་པ་རྣམས་སྤུས་དག་པོ་ཡོང་བར་སྦྱོང་བརྡར་འབུལ་དགོས་པ་དེ་ལས་འགན་གཙོ་བོ་ཞིག་ཆགས་ཡོང་གི་ཡོད་པ་རེད། དེར་བརྟེན། གཞུང་ཞབས་སུ་བདམས་ཚར་བ་རྣམས་ལས་ཀར་དངོས་སུ་མ་ཞུགས་གོང་དུའང་ཟབ་སྦྱོང་སྤྲོད་པའི་བང་རིམ་ཞིག་བསླེབ་ཀྱི་རེད་ལ། དེ་ལས་གལ་ཆེ་བ་ཞིག་ལ་ད་ལྟ་འཛིན་སྐྱོང་ནང་ཕྱག་ལས་གནང་བཞིན་པའི་ལས་བྱེད་ཚོར་འཛིན་སྐྱོང་རིག་པའི་གནས་ཚད་མཐོ་རུ་གཏོང་བར་སྐབས་དང་དུས་སོ་སོར་ཟབ་སྦྱོང་སྤྲོད་པའི་ལས་འཆར་ཡོད་པ་རེད། དེ་ཞེ་དྲགས་གལ་ཆེན་པོ་ཆགས་ཡོད་པ་རེད། ཅེས་བརྗོད་བྱུང་།

ཐེངས་སྔོན་མའི་གཞུང་ཞབས་ཚུད་རྒྱུགས་ཀྱི་སྦྱོང་བརྡར་བརྒྱུད་གཞུང་ཞབས་ནང་ཚུད་པའི་ལས་བྱེད་ཚོར་དང་ཐོག་ཐུགས་རེ་གནང་བ་ལྟར་ཞབས་ཞུའི་ཐོག་ཕན་ནུས་ཅི་ཙམ་ཐོན་གྱི་ཡོད་དྲིས་པར། བོད་རྒྱལ་ཁབ་དང་བོད་མི་རིགས་གནས་བབ་ཐབས་སྐྱོ་བོ་ཞིག་གི་སྒང་ལ་གནས་ཡོད་པའི་སྐབས་འདིར། དངོས་གནས་དྲང་གནས་རང་དོན་གང་ལ་གང་འཚམ་ཞིག་བློས་བཏང་ནས་ཤུགས་རྒྱག་དགོས་པ་དེ་བོད་མིའི་སྒྲིག་འཛུགས་དང་། ལས་བྱེད་འདེམས་བསྐོ་ལྷན་ཁང་གི་ཐོག་མའི་རེ་བ་དེ་རེད། ཡིན་ནའང་། ལས་བྱེད་པ་སུ་ཞིག་ཡིན་ནའང་མི་ཡིན་པའི་ཆ་ནས་ང་ཚོས་རེ་བ་བཅངས་བ་གཅིག་པུས་འདང་གི་ཡོད་པ་མ་རེད། ལས་བྱེད་པ་ཞིག་ལ་གལ་ཆེ་ཤོས་དེ་ག་རེ་ཆགས་ཀྱི་ཡོད་པ་རེད་ཟེར་ན། རྒྱལ་ཁབ་རང་བཙན་ཡོད་པ་དེ་ཚོ་ལྟ་བུའི་མཐུན་རྐྱེན་དེ་འདྲ་སྦྱོར་ཐུབ་པའི་ནུས་པ་ང་ཚོར་ཡོད་པ་མ་རེད། འོན་ཀྱང་། གོང་དུ་ཞུས་པ་ལྟར། གཞུང་ཞབས་ནང་འཛུལ་མཁན་མང་ཆེ་བ་ཞིག་གིས་བོད་མི་རིགས་དང་རྒྱལ་ཁབ། བོད་བསྟན་པ་ཆབ་སྲིད་ཀྱི་ཆེད་དུ་ངས་ཞབས་ཞུ་བསྒྲུབ་རྒྱུ་ཡིན་བསམ་པའི་ཀུན་སློང་ཞིག་དང་སེམས་ཤུགས་ཤིག་འཁུར་ནས་འཛུལ་ཡོང་བ་ཡིན་སྟབས། ལས་བྱེད་བདག་སྐྱོང་དང་གཅེས་སྐྱོང་ཚད་དང་ལྡན་པ་ཞིག་དགོས་པ་རེད་བསམ་གྱི་འདུག དེ་ལས་ཀྱང་གལ་ཆེ་ཤོས་གཞན་ཞིག་ལ་མི་སུ་ཡིན་ནའང་རྒྱུ་དཔལ་འབྱོར་སོགས་ཀྱི་གནས་བབ་ལ་ལྟ་རྒྱུ་མེད་ནའང་སྤྱི་ཚོགས་ནང་མིའི་མཐོང་དང་ཆ་འཇོག ཡིད་ཆེས་བཅས་དགོས་པ་ཧ་ཅང་གལ་ཆེན་པོ་རེད། མིའི་མཐོང་དང་ཆ་འཇོག་དེ་ཚོ་མེད་པ་ཡིན་ན་སུ་ཡིན་ནའང་འདུག་འདོད་ཡོད་པ་མ་རེད། དེར་ང་རང་ཚོ་ལས་ཀྱི་སྣེ་མོར་གཏོགས་པ་ཚང་མས་དགོངས་པ་ཡག་པོ་བཞེས་དགོས་པ་རེད་བསམ་གྱི་འདུག མི་ལ་མཐོང་དང་ཆ་འཇོག་བྱས་པ་ཡིན་ན། ལས་ཀ་བྱེད་མཁན་ཚོ་ཡིན་ནའང་གོང་རིམ་ནས་ང་ལ་མཐོང་དང་ཆ་འཇོག་ཅིག་གནང་གི་ཡོད་པས། ངའི་ངོས་ནས་ཀྱང་དངོས་གནས་དྲང་གནས་འབད་བརྩོན་བྱེད་དགོས་བསམ་པ་མི་སུ་ལ་ཡིན་ནའང་ཡོང་གི་རེད་བསམ་གྱི་འདུག དེར་བརྟེན་ངས་བསམ་པར་ང་ཚོས་རེ་བ་བརྒྱབ་པ་གཅིག་པུ་མ་ཡིན་པར་རེ་བ་དེ་དོན་དུ་འགྱུར་ཆེད་ཆ་རྐྱེན་ག་རེ་བསྐྲུན་དགོས་ཀྱི་འདུག ཡིན་གཅིག་མིན་གཅིག་ཕོགས་ཆེ་རུ་གཏོང་བ་དང་མཐུན་རྐྱེན་ཡག་ཏུ་གཏོང་བའི་ཆ་རྐྱེན་མ་རེད། མི་ཡིན་པའི་ཆ་ནས་མིའི་བསམ་བློར་འགྱུར་བ་གཏོང་ཐུབ་དགོས་པ་དེ་དཔེ་གལ་ཆེན་པོ་རེད་བསམ་གྱི་འདུག ཅེས་བརྗོད་བྱུང་།

མཇུག་ཏུ་ཁོང་གིས་ལོ་ངོ་ ༣༧ ཙམ་གྱི་རིང་བཙན་བྱོལ་བོད་མིའི་སྒྲིག་འཛུགས་ལ་ཞབས་ཞུ་ཞུས་པའི་ཉམས་མྱོང་བརྒྱུད་གཞུང་ཞབས་ལས་བྱེད་གསར་པ་ཚོར་འབོད་སྐུལ་གནང་དོན། ང་ཚོ་དང་པོ་གཞུང་ཞབས་ནང་འཛུལ་ཡོང་སྐབས་ཀུན་སློང་གཅིག་ཡོད་པ་རེད། གཞུང་ཞབས་ཀྱི་ལས་ཀར་དངོས་སུ་ཞུགས་པའི་ཉིན་མོ་ནས་བཟུང་དམ་བཅའ་ག་འདྲ་ཞིག་དགོས་པ་རེད་ཟེར་ན། མཆོངས་ཟེར་ན་དམྱལ་བར་མཆོང་ཐུབ་མཁན་ཞིག་དང་། རྒྱོབས་ཟེར་ན་སོ་སོའི་ཨ་ཕའི་མགོ་ལའང་རྒྱག་ཐུབ་མཁན་ཞིག་དགོས་པ་རེད་ཅེས་སྔོན་མ་བཤད་སྲོལ་ཡོད་པ་རེད་ལ། ང་ཚོ་གང་ལ་གང་འཚམ་གྱིས་བསམ་བློ་དེ་ལྟར་གཏོང་མཁན་ཞིག་ཡིན། ཡིན་ནའང་། ཆབ་སྲིད་བརྒྱུད་སྤྲོད་དང་འཛིན་སྐྱོང་གི་འཕོ་འགྱུར་སོགས་གནས་ཚུལ་མང་པོ་ཞིག་ལ་ལྟ་དུས། དེ་འདྲའི་དམ་བཅའ་སྲུང་མཁན་དེ་ཏོག་ཙམ་དཀོན་པོ་ཆགས་ཡོང་གི་ཡོད་པ་རེད། ད་ལྟ་ཡོད་པའི་བོད་མིའི་སྒྲིག་འཛུགས་ཀྱི་ལས་བྱེད་གཞོན་པ་ཚོར་ང་ཚོ་རྒན་པ་ཚོས་ག་རེ་ཞུ་ཐུབ་ཀྱི་རེད་ཟེར་ན། དཔལ་འབྱོར་ཆེན་པོ་དང་ཕྱི་དངོས་པོའི་གནས་བབ་མཐོ་རུ་གཏོང་དགོས་ཀྱི་ཡོད་ན་ལས་ཀ་བྱེད་ས་དེ་འདི་མ་རེད། དེ་ལས་ལྡོག་སྟེ་དངོས་གནས་དྲང་གནས་བོད་མི་རིགས་དང་བོད་བསྟན་པ་ཆབ་སྲིད་ཀྱི་ཆེད་དུ་ངས་ཞབས་ཞུ་ཧུར་ཐག་འབད་ཐག་གིས་ཞུ་རྒྱུ་ཡིན་བསམ་ན། བོད་མིའི་སྒྲིག་འཛུགས་དེ་ག་ཚོད་ཀྱིས་མེད་ཟེར་བ་ཡིན་ནའང་འཕགས་མཆོག་སྤྱན་རས་གཟིགས་ཀྱིས་སྒང་ནས་གཟིགས་ནས་བཞུགས་བསྡད་ཡོད་པ་རེད། དེར་བརྟེན། རྒྱལ་བ་རིན་པོ་ཆེའི་བཀའ་དྲིན་དེ་དྲན་པའི་ཐོག་ནས་བསམ་པ་རྣམ་དག་གིས་གཞུང་ཞབས་ནང་འཛུལ་ཐུབ་པ་ཡིན་ན་ཕན་ཐོགས་ཆེན་པོ་ཡོད་པ་རེད། དེ་རིང་ཁྱེད་རང་ཚོའི་ཚགས་པར་བརྒྱུད་དེ་ངས་ལས་བྱེད་པ་དགུང་ལོ་ཆུང་བ་དེ་ཚོར་ཞུ་དགོས་པ་ཞིག་ལ། མཚམས་མཚམས་ལ་གནས་སྟངས་མང་པོ་མཐོང་སྟེ་རང་ཉིད་དང་མ་འཚམ་པའི་གནས་སྟངས་དེ་འདྲ་ཡོང་སྲིད་པ་རེད་དེ། རྒྱ་ཆེ་ས་ཞིག་ལ་དགོངས་པ་བཞེས་ནས་ལྷག་བསམ་རྣམ་དག་དང་ཧུར་ཐག་འབད་ཐག་བྱེད་དགོས་པ་དེ་ང་ཚོའི་སྐབས་སུ་བབ་པའི་ལས་འགན་ཞིག་ཆགས་བསྡད་ཡོད་སྟབས། དེ་ལྟར་གནང་རྒྱུའི་དམ་བཅའ་བརྟན་པོ་ཞིག་གི་ཐོག་ནས་ཕྱག་ལས་གནང་རོགས་བྱོས་ཟེར་ནས་ཞུ་འདོད་བྱུང་སོང་། ཞེས་རེ་སྐུལ་དང་བཅས་བརྗོད་བྱུང་།

གསར་འགོད་པ། པདྨ་མཚོ།