ཐུབ་བསྟན་རྒྱལ་མཚན།
གནའ་བོའི་ཕ་མེས་ཡབ་མེས་ནས་ཡང་ཡང་གོ་མྱོང་བའི་རྒྱ་གར་ཀ་ལི་སྤུངས་ནི་ཧ་ཅང་མཛེས་སྡུག་གིས་བཅིངས་པའི་ཁོར་ཡུག་ཅིག་རེད། ང་ལ་མཚོན་ན་ཆེས་ཐོག་མ་ཀ་སྤུངས་སུ་བསྐྱོད་པའི་ཉིན་མོ་ནི་ ༢༠༡༥། ༡༡། ༦ དགོང་མོ་ཏག་ཏག་ལ་ཁེལ་སོང་། དེའི་སང་ཉིན་ནས་དཔལ་ས་སྐྱའི་ཁྲི་ཐོག་ཞེ་གཅིག་པ་སྐྱབས་མགོན་༧གོང་མ་བདག་ཁྲི་རིན༌པོ་ཆེ་མཆོག་གིས་འཕགས་ཡུལ་གྲུབ་ཆེན་རྣམས་ནས་བརྒྱུད་པའི་ཆེ་བ་དུ་མའི་ལྡན་པའི་ཟབ་ཆོས་མན་ངག་དགུའི་ནང་གསེས་ལམ་སྐོར་ཕྱི་མ་བརྒྱད་ཀྱི་བཀའ་ཁྲིད་བསྩལ་རྒྱུ་ཡིན་པ་དང་། དུས་མཚུངས་འཁོན་གདུང་སྐུ་བགྲེས་རཏྣ་བཛྲ་རིན་པོ་ཆེ་མཆོག་གིས་གསང་སྔགས་རྡོ་རྗེ་ཐེག་པའི་ཆོས་ཀྱི་སྙིང་ཁུ་ཡབ་ཆོས་བླ་ན་མེད་པའི་གསུང་ངག་རིན་པོ་ཆེ་ལམ་འབྲས་ཚོགས་བཤད་ཆེན་མོ་ཤར་ནུབ་ཡུལ་གྲུ་གང་ས་ནས་ཕེབས་པའི་ཆོས་ཞུ་བ་སྟོང་ཚོ་གཅིག་ལྷག་ལ་བཀའ་དྲིན་སྩོལ་བཞིན་པ་བཅས་ཁེལ་བའི་དེ་རིང་གི་འགྲུལ་བཞུད་འདི་ནི་མི་ཚེ་ནང་ཆེས་རིན་ཐང་ཆེ་ཤོས་ཀྱི་འགྲུལ་བཞུད་ཅིག་ཡིན།
སྤྱིར་བཏང་ནས་བཤད་ན་ཀ་ལི་སྤུངས་ནི་བོད་ཀྱི་ཆོས་སྲིད་རིག་གནས་ཀྱི་བསྟི་གནས་ཤིག་ཡིན་ཞིང་། དུས་འགྱུར་མ་བྱུང་གོང་བོད་ཀྱི་གྲགས་ཅན་ཚོང་པ་དང་དཔོན་ཁག་མང་པོ་ཞིག་གིས་ཚོང་དུས་གནང་སའི་ས་ཚིགས་གལ་ཆེ་ཞིག་ཆགས་འདུག ད་ལན་ཁོ་བོས་གོ་སྐབས་གཟུང་ཏེ་སྔོན་མའི་ལོ་རྒྱུས་མང་པོ་ཞིག་ལ་འཚོལ་ཞིབ་དང་དྲི་བ་བྱས་པས་བོད་ཀྱི་གནད་ཡོད་མི་སྣ་མང་པོ་ཞིག་གི་ལོ་རྒྱུས་དང་རྗེས་ཤུལ་ཁང་མིག་སོགས་ལ་ལྟ་རྒྱུ་བྱུང་། ད་དུང་དེའི་ཁོངས་ནས་ཚོར་སྣང་ཟབ་ཤོས་ཤིག་ནི་བགྲེས་སོང་ཁག་གཅིག་གིས་མིད་པ་མཆིལ་མས་རྣོང་བཞིན་དུ་ལྐོག་ལྐོག་སུད་སུད་ཀྱིས་ངོ་སྤྲོད་གནང་འོང་ཡ་གཅིག་ནི་སྨར་ཁམས་སྤང་མདའ་ཚང་གི་སྐོར་རེད།
དུས་རབས་ཉི་ཤུའི་མགོ་སྟོད་དུ་སྤང་མདའ་ཚང་ནི་རྟ་དྲེལ་བརྒྱ་ཕྲག་མང་པོ་དེད་ནས་སྨད་དར་མདོ་དང་རྒྱ་ནག་གི་རྒྱལ་ས་པེ་ཅིན་ནས་ཤར་རྒྱ་གར་ཀ་ལི་སྤུངས་ཚུན་ཆད་བར་དར་གོས་འགྲུལ་ལམ་རིང་མོའི་ཚོང་ལས་གཉེར་ནས་ཧ་ཅང་སྐད་གྲགས་ཆེ་བའི་ཚོང་པའི་ཁྱིམ་ཚང་ཞིག་ཡིན། བརྒྱ་ཕྲག་ཉི་ཤུའི་དཀྱིལ་ཙམ་ནས་རིམ་བཞི་དང་ནང་སོ་མཛོད་པ་ཡུལ་དམག་གི་རུ་དཔོན་སོགས་ཀྱི་གོ་གནས་སྣ་མང་བཞེས་ནས། སོག་སྡེ་དཔོན་མགོ་བཅོ་བརྒྱད་ཀྱི་གྲས་སུ་བཞུགས་པ་དང་སྡེ་པ་གཞུང་གི་སྐུ་ཚབ་ཀྱི་འགན་ཁུར་ཐོག་གྲུ་མོ་སྤྱི་ཁྱབ་སོགས་གནང་ནས་ཚོང་པའི་ལས་དོན་ཙམ་མ་ཟད་ས་སྐྱ་དང་དགའ་ལྡན་ཕོ་བྲང་སྲིད་གཞུང་གཉིས་ཀྱི་གོ་གནས་རིམ་པ་ཡོད་པའི་དཔོན་ཚང་ཞིག་ཏུ་གྱུར། མ་ཟད་༧གོང་ས་སྐུ་ཕྲེང་བཅུ་གསུམ་པ་ཀྱང་ཐུགས་བློའི་རྗེན་འགེལ་གནང་སའི་སྤྱན་གསལ་གྱི་མི་སྣ་ཞིག་ཏུ་ཆགས་འདུག
སྤང་མདའ་ཞེས་པ་ནི་གནས་མིང་ཁྱིམ་ཚང་ལ་ཐོགས་པའི་དུད་ཚང་ཞིག་ཡིན་ཅིང་ཁྱིམ་འདིར་བུ་ཆེ་བ་སྤང་མདའ་ཡར་འཕེལ་དང་། འབྲིང་བ་སྤང་མདའ་སྟོབས་རྒྱས། ཆུང་བ་སྤང་མདའ་རབ་དགའ་བཅས་བུ་སྤུན་གསུམ་འདུག བུ་རྒན་པ་གཉིས་ནི་སྦྱང་སྟོབས་ཀྱི་སློབ་སྦྱོང་ལ་དེ་ཙམ་གོ་ཚོར་མེད་ཀྱང་སྐྱེས་སྟོབས་ཀྱི་རྣམ་དཔྱོད་དང་ཀླད་པ་ནི་ཧ་ཅང་ཚད་མཐོན་པོ་ཡིན་ཞིང་ཉེ་རབས་ལོ་རྒྱུས་སྨྲ་བ་དང་གནད་ཡོད་མི་སྣ་མང་པོས་ཁོང་གཉིས་ལ་བསྔགས་བརྗོད་གནང་བ་མ་ཟད་༧གོང་ས་མཆོག་གིས་ཀྱང་སྔ་ཕྱིར་བསྔགས་བརྗོད་མཛད་འདུག །བུ་ཆུང་བ་རབ་དགའ་ནི་བོད་རང་གི་རིག་གཞུང་དང་ནང་ཆོས་ལ་མཁས་པ་ཆེན་པོ་ཡིན་འདུག་པ་མ་ཟད་། རྒྱ་སྐད་དང་ཆབ་སྲིད་ཀྱི་ཐོག་ནས་ཧ་ཅང་མཁྱེན་པ་རྒྱས་པའི་ཕུལ་བྱུང་གི་མི་སྣ་ཞིག་རེད་འགི ཁོང་གིས་རྒྱ་སྐད་ནས་བོད་བསྒྱུར་ཞུས་པའི་དེབ་གཅིག་ཀྱང་ཡོད་ཚོད་གདའ། སྤང་མདའ་ཡར་འཕེལ་དང་རབ་དགའ་གཉིས་ཐོག་མའི་ཆར་སྐྱབས་བཅོལ་ཕེབས་ནས་ཀ་སྤུངས་སུ་གནས་གཞིས་བཟུང་ནས་བཞུགས་ཡོད་པ་དང་རང་གཞུང་གིས་ཛ་སག་གི་གོ་གནས་ཤིག་ཀྱང་གསོལ་སྩལ་གནང་ཡོད་ཚོད་འདུག ཁོང་ཚང་གིས་དུས་འགྱུར་སྐབས་བཙན་བྱོལ་དུ་ཕེབས་པའི་རང་ཁོངས་ཀྱི་མི་མང་རྣམས་སྡོད་གནས་ཀྱི་གཞིས་སྒར་ཞིག་དང་རང་ལུགས་ཆོས་བརྒྱུད་ཀྱི་རྟེན་གཞི་དགོན་པ་བཅས་གསར་བཞེངས་གནང་སའི་ཀ་ལི་སྤུངས་ས་གནས་ཡུལ་མིའི་ལག་ནས་ས་ཆ་མང་པོ་ཞིག་སྤུས་གཟིགས་གནང་ནས་དབུ་འོག་དཔུང་འདེབས་ཀྱི་གྲ་སྒྲིག་གནང་འདུག
ལོ་རབས་དྲུག་ཅུའི་ནང་སྤང་མདའ་ཡར་འཕེལ་དང་མ་ནང་ཨ་བུ་པདྨ་ཚེ་དབང་། སྨར་ཁམས་ཐོས་བསམ་འབྲེལ་ཡོད་སྐུ་དྲག་ཁག་གཅིག་མཉམ་འདུས་ཀྱིས་བོད་མི་རིགས་ཀྱི་ལས་དབང་དང་བདེ་དོན་ཁོ་ན་ལ་དམིགས་ནས་ལས་འགུལ་ཁ་ཤས་ཀྱི་རྨང་གཞི་བཏིང་འདུག་ཀྱང་སྒེ་གནད་ཁོག་བཟུང་གིས་ལས་དོན་ཡོངས་རྫོགས་འགྲེལ་ལོག་དང་མ་ཉེས་ཁག་གཡོགས་གནང་ནས་མཐར་བོད་པ་བོད་པས་བརྡུངས་ནས་དྲང་པོ་དང་བདེན་པ་ཡོད་ཚད་ཞུ་སའི་དཔོན་མེད། སྐྱབས་སའི་མགོན་མེད། མཐར་ཀ་སྤུངས་སུ་གནས་མ་ཐུབ་པའི་དཀའ་ངལ་དང་གནོད་ཤུགས་འོག་ནས་ལས་དོན་ཡོངས་རྫོགས་མཇུག་སྒྲིལ་དགོས་བྱུང་འདུག གནོད་ཤུགས་དང་བཀའ་ངལ་འདིའི་བྱུང་དོན་གཙོ་བོ་ནི།
༡༽ དུས་འགྱུར་མ་བྱུང་གོང་ནས་སྤང་མདའ་ཚང་ནི་བོད་སྡེ་པ་གཞུང་གི་ཆེས་མཐོ་མི་སྣ་གྲས་ཡིན་པ་མ་ཟད་ཆབ་དཔལ་རིག་གསུམ་གང་ཐད་ནས་རྩ་བ་ཚུགས་ཤིང་རྩེ་མོ་རྒྱས་པས་ཕྲག་དོག་གིས་མི་སྣ་མང་པོ་ཞིག་གི་མིག་ལ་མ་བབས་པ་དང་།
༢༽༧གོང་ས་བཅུ་གསུམ་པའི་སྤྱན་གསལ་དང་ཐུགས་འགེལ་གནང་སའི་མི་སྣ་གལ་ཆེ་ཞིག་ཡིན་པ་དང་། ཁམས་ཕྱོགས་སུ་ནང་སོ་མཛོད་པ་དང་རུ་དཔོན་གྱི་གོ་གནས་ཡོད་ཙང་ཉེ་སྐོར་གྱི་དཔོན་མིང་ཡོད་པ་རེ་གཉིས་ཀྱིས་ཁོ་དང་ཁོའི་མི་མང་ལ་དབང་ཡོད་དང་ཐུགས་རྩོད་གནང་སའི་གོ་སྐབས་མ་རགས་པའི་སྒེ་ནད་བྱུང་བ།
༣༽ བོད་ས་ཤོར་ལ་ཉེ་སྐབས་སྡེ་པ་གཞུང་གི་གསེར་དངུལ་མང་པོ་ཞིག་འབྲས་ལྗོངས་བར་སྐྱེལ་འདྲེན་གྱི་ལས་འགན་བཞེས་ཡོད་པ་དང་། ས་ཤོར་རྗེས་མི་སྣ་ལ་ལས་ངན་པ་ལག་སྦྲེལ་གྱིས་གསེར་དངུལ་དེ་དག་ཟ་འདོད་ཧམ་བཤད་བྱས་ཙང་ཐོགས་མའི་འཆར་སྤང་མདའ་ཡར་འཕེལ་གྱིས་གསེར་དངུལ་ནི་བོད་མི་སྤྱི་མཐུན་གྱི་རྒྱུ་རྫས་ཡིན་སྟབས་མི་རེ་གཉིས་ལ་ཁ་གསལ་མེད་པའི་རྩིས་སྤྲོད་ཞུ་ཐབས་མེད་སྐོར་གསུངས་ཏེ་དང་ལེན་མ་བྱས་པས་གནད་ཡོད་མི་སྣ་མང་པོ་ཞིག་ཁ་སྐྱེངས་ཙང་སྒེར་ནད་ཇི་ཆེར་གྱུར་ཡོད། གོང་གསལ་གནས་ཚུལ་འདི་གསུམ་གཙོར་བཟུང་གིས་དངོས་ཤུགས་བརྒྱུད་གསུམ་ནས་མི་མང་ནང་ཁུལ་ལ་སྤང་མདའ་དང་སྤང་མདའི་འབྲེལ་ཡོད་ཡོངས་རྫོགས་རྩ་མེད་བཟོ་མ་ཐུབ་ཚེ་ཁོང་ཚོས་༧གོང་ས་ཆེན་པོ་སྐུ་དབང་ལ་ཐེ་བྱུས་གནང་གིན་ཡོད་པ། བོད་སྡེ་པ་གཞུང་གི་གསེར་དངུལ་ཚང་མ་སྒེར་ཟས་གནང་གིན་ཡོད་པ། དེ་དག་ངེས་པར་དུ་ཚུར་འཕྲོག་ནས་མི་མང་བདེ་རྩའི་ཆེད་ལྕག་གི་བཟོ་གྲྭ་འཛུགས་དགོས་པ། རྒྱ་དམར་ནག་གཉིས་ལ་ངན་པ་ལག་སྦྲེལ་གྱི་འབྲེལ་བ་ཡོད་པ་སོགས་དཀྲོག་གཏམ་སྤེལ་ཏེ་མཚན་རྟགས་བསྡུ་རུབ་སོགས་ཀྱང་གནང་ཡོད་ཚོད་འདུག
གནས་ཚུལ་དེ་དག་གི་རྐྱེན་པས་སྤང་མདའ་ཡར་འཕེལ་ཀ་སྤུངས་ལ་སྡོད་ཐབས་ཡོངས་སུ་ཟད་ནས་མཐར་བོད་དུ་ལོག་དགོས་བྱུང་བ་དང་། སྤང་མདའ་རབ་དགའ་ལ་ཀ་སྤུངས་ལྷམ་ཚོང་ཁང་ཞིག་ནས་ལྐོག་མདའ་བརྒྱབ་ནས་གསོད་གྲབས་བྱས་ཡོད་ཀྱང་མེ་མདའ་ཁོང་ལ་མ་ཕོག་ནས་ཚོང་བདག་གི་སྐྱེས་དམན་གྱི་རྐང་པར་ཕོག་ཤོར་འདུག མེ་མདའ་རྒྱག་མཁན་ནི་ཆེད་གཏོང་གནང་བའི་བོད་པ་ཞིག་ཡིན་པ་མ་ཟད་དམག་ཟུར་ཞིག་ཀྱང་ཡིན་འདུག ཁོང་གིས་སྤང་མདའ་རབ་དགའ་གསོད་ཆེད་ཉིན་མང་རྗེས་འདེད་བྱས་ཀྱང་མེ་མདའ་གཏན་ནས་རྒྱག་མ་ཐུབ་པས་མི་དེ་ནི་སྤྱིར་བཏང་ཞིག་རེད་མི་འདུག་ཟེར་བ་སོགས་བཤད་རབས་འདུག
གནས་ཚུལ་དེ་དག་གི་དབར་ན་སྤང་མདའ་དབང་མོ་༧གོང་ས་མཆོག་ལ་མཇལ་ཁ་ཞིག་ཐོབ་ཡོད་པས། དེ་ཡང་དཔེ་མེད་ཚབས་ཆེ་ཡིན་པས་མཇལ་ཁ་གཏོང་མཁན་མི་དེའི་སྐེར་ཐག་པ་བཏགས་ནས་ཕོ་བྲང་ཕྱི་རུ་དྲུད་ཀྱི་ཡིན་ཞེས་འུར་སྒྲ་ལང་ཡོད་འདུག སྐབས་དེ་ཤེད་དུ་སྤང་མདའ་དང་འབྲེལ་ཡོད་ཡོངས་ལ་དཀའ་ངལ་གཅིག་རྗེས་གཉིས་མཐུད་ཡོང་སྟབས་ལུང་ཚན་གཅིག་པའི་མི་སྣ་མི་ཉུང་བ་ཞིག་ལུང་ཚན་མིང་བསྒྱུར་བྱེད་དགོས་ཁེལ་འདུག མདོར་ན་བརྒྱ་ཕྲག་ཉི་ཤུའི་ནང་ས་སྤང་མདའ་གནམ་སྤང་མདའ་ཞེས་པའི་གྲགས་སྙན་ཆེ་བ། ཆབ་དཔལ་རིག་གསུམ་ལ་མཁྱེན་དཔྱོད་ཡངས་པ། རྣམ་དཀར་གྱི་བགྱི་བ་ལ་མོས་པ་དང་དད་ཞེན་ཆེ་བའི་བསྟན་པ་མཆོད་སྦྱིན་གྱི་སྦྱིན་བདག་ཆེན་པོ། དགྲ་བོར་བློ་མི་ཞུམ་པའི་དཔལ་འཛངས་གཉིས་ལྡན་སྤང་མདའ་ཚང་། ཁྱེད་སྤུན་གསུམ་པོར་འདི་ལྟར་ཉེས་མེད་ནག་གཡོག་གི་འོག་ནས་ཁྱིམ་ཚང་འདིའི་ཡོད་ཚད་མཇུག་བསྡོམས་རྒྱག་དགོས་བྱུང་བ་དེ་བསམ་བློ་ཇི་ཙམ་བཏང་ཡང་གྱོང་རྒུད་དང་བློ་ཕམ་གྱི་རང་བཞིན་ཞིག་ལོས་ཡིན། ད་ནི་ཆེས་མཐའ་མཇུག་གི་སྤང་མདའ་ནི་ད་ལྟ་མིག་སྔ་ནས་མཐོང་བཞིན་པའི་ཀ་ལི་སྤུངས་ཡོད་པའི་སྤང་མདའ་སྒོ་མཛོད་ཟེར་བའི་ལྕག་ལེབ་ཁང་པ་ཁ་ཤས་དང་རི་ངོགས་སུ་སྤང་མདའ་ས་ཆ་ཟེར་བ་ས་ཁྱོན་ཆེ་ཙམ་ཁ་ཤས་མཇལ་རྒྱུ་འདུག་ཀྱང་། ས་གནས་ཡུལ་མི་དང་བོད་པ་གཉིས་ཀས་མ་བདག་བདག་བཟུང་གནང་ནས་དེ་དག་ཀྱང་མིག་སྔ་ནས་དྲན་གསོ་སློང་བྱེད་ཙམ་ལས་ཅི་ཡང་མི་འདུག
ཀ་སྤུངས་ནས།༢༠༡༥་༡༡་༡༧
ཡུགས་མོ་སྒྲོལ་མ་མིང་ཅན་འདས་པའི་ལོ་རྒྱུས་ནང་བྱུང་ཚར་བ་ཡིན་པས་རྒྱུ་མཚན་གྱིས་ངས་གླེང་བ་ཡིན། དེ་གླེང་རན་མེད་པ་ཞིག་ནམ་ཡང་མཐོང་གིན་མེད། གལ་སྲིད་གླེང་རན་མེད་ན་བོད་བཙན་པོའི་རྒྱལ་རབས་ཚུན་ཆད་ནས་གླེང་རན་མེད་པ་མཚུངས། ཁྱེད་ཀྱིས་ཆེད་དུ་རྙོག་གླེང་ཞིག་མགོ་ཚུགས་ནས་སྤང་མདའ་གཏོར་མཁན་བོད་གཞུང་ཡིན་པ་ངན་ཁག་དཀྲི་ཐབས་བྱས་པ་དེ་ཆེད་དུ་ད་ཡོད་སྤང་མདའི་མི་བརྒྱུད་དང་༸གོང་ས་མཆོག་དང་རང་གཞུང་བཅས་ཀྱི་བར་ན་དམ་ཚིག་ལ་གཏོར་སྐྱོན་གཏང་ཐབས་ཡིན་པས་ངས་གསལ་པོ་ཤེས་ཀྱི་ཡོད། སྤང་མདའ་རྩ་གཏོར་གཏང་མཁན་དེ་བོད་གཞུང་གི་མིང་དང་རྐུག་བཀྱག་བེད་སྤྱོད་གཏང་མཁན་གྱི་ལས་སྣེ་དྲག་གྲས་རེ་གཟུངས་ཡིན་པ་གསལ་གསལ་ཐིང་ཐིང་རེད། སྤང་མདའ་དབང་མོ་ཕྷ་རན་སི་དོན་གཅོད་གནང་མྱོང་བ་དེ་མཚན་མོ་རྨི་ལམ་མིན་པའི་རེ་བ་ཡོད། གལ་སྲིད་དོན་གཅོད་གནང་ཡོད་ན་སྐོ་གཞག་བྱེད་མཁན་སུ་ཡིན་སྐབས་དེར་ལོ་ཚིགས་ཇི་ཡིན་དང་བཀའ་ཤག་སུའི་སྐབས་ཡིན་པ་ཁ་གསལ་འགོད་རོགས། སྤང་མདའ་སྲས་མོ་སྐལ་བཟང་ཟེར་བ་དེ་སྤང་མདའ་ཚང་སུའི་སྲས་མོ་རེད། ཁྱེད་ཀྱིས་མ་ཤེས་ཤེས་མདོགས་དང་ཁུངས་མེད་ཀྱི་སྐད་ཆ་འདི་ཚོ་ཆེད་དུ་གཉེར་ནས་འདི་སྤེལ་སྟངས་ལ་ལྟས་ནས་ཁྱེད་ཀྱང་ལྐོག་རྔན་ཞིག་གིས་འོག་ནས་མིས་བེད་སྤྱོད་གནང་གིན་མེད་པའི་རེ་བ་ཡོད། ངར་སྤང་མདའ་སྐོར་མངགས་བཅོལ་བྱེད་མཁན་སུ་ཡང་མེད་ཀྱང་སོ་སོའི་ཡུལ་གྱི་རྗེ་བོའི་བདེ་སྡུག་དེ་འབངས་མི་སེར་ལ་འགན་དབང་ཡོད་ཙང་བདེན་པ་དེ་རྫུན་པས་བཅོམ་དུས་ནམ་ཡང་སྡུག་ནད་འདི་འཁྱོལ་གྱི་མི་འདུག །
ཐུབ་བསྟན་རྒྱལ་མཚན་ལགས།་་་ལོ་རྒྱུས་ཞེས་པ་དེ་ལོ་ངོ་སྟོང་ཕྲག་སོང་ནའང་གླེང་ཆོག་པ་ཞིག་རེད།་་་དེས་ན་ཁྱོད་ཀྱིས་སྤོམ་མདའ་ཚང་ལ་རྒྱབ་སྐྱོར་ཡིན་ཚེ།་་་ལོ་རྒྱུས་དེ་དག་ཚར་ས་ཚར་བ་རེད།་་་གླེང་རིན་མེད་པ་ཞིག་དང་མཚང་འབྲུས་པ་ལྟ་བུ་ཞིག་ལས་མ་མཐོང་།་་་ཆེད་དུ་རྙོག་གླེང་བྱས་པ་ཡིན་ན་ནི་ཁྱོད་རང་གི་བློ་འདོད་རེད།་་་སྐབས་དེར་ཁྱོད་རང་གིས་བཤད་པ་ལྟར་རྩ་གཏོར་བཏང་མཁན་རྒྱ་གར་གཞུང་གི་གསང་བ་ལས་ཁུངས་དང་བོད་གཞུང་རེད།་་་ཤེས་སོང་ངམ།་་་ཀ་ལོན་སྦུག་ནས་སྤོམ་མདའ་རྙེད་པ་ཟེར་བ་དེ་ཡ་མཚན་ཅན་ཞིག་ལས་མ་མཐོང་།་་་སྤོམ་མདའ་ཚང་གི་མི་ངོ་དབང་མོ་ལགས་དང་།་་་སྲས་མོ་སྐལ་བཟང་ལགས་བོད་གཞུང་གི་ཕ་རན་སིའི་སྐུ་ཚབ་དོན་གཅོད་ཀྱང་གནང་ཡོད་པ་ཚང་མས་ཤེས་གསལ་རེད།་་་དེ་འཚོལ་དགོས་དོན་མེད་ལ་བརླག་པ་ཞིག་དང་རྙེད་པ་ཞིག་ག་ལ་ཡིན།་་་བོད་ནང་དུ་སྤོམ་མདའ་ཚང་གི་མི་རྒྱུས་འཁྲུལ་མེད་ཕ་ཤི་ན་བུ་དང་བུ་ཤི་ན་ཚ་བོ་བཅས་སྨྱུག་རྩ་རྒྱས་པ་ལྟ་བུ་ཞིག་ཡོད་བཞིན་པར་མི་ངོ་སུ་ཞིག་གིས་ཀྱང་བརྗོད་རིན་མེད་པའི་གཏམ་ཞིག་ཁྱོད་རང་ལ་བཤད་དགོས་པས་སུ་ཞིག་གིས་བཀའ་མངགས་དང་བསྐུལ་མ་གནང་སོང་ངམ།་་ཡིག་རྨོངས་སིལ་བ་ཙམ་ཞིག་ལ་གང་བཤད་གང་འབྲི་ཡིན་བསམ་མི་ཉེན།་་ལྷག་པར་དུ་སྔ་མོའི་གཏམ་དཔེར་ཞིག་ལ་བསྟོད་མི་ཤེས་མཁན་གྱིས་བསྟོད་པ་ལས།་་་སྨད་མཁས་པ་གཅིག་གིས་སྨད་ན་དགའ་ཟེར་བ་བཞིན་ནོ།།
གསེར་ཚུལ་ལགས། ལོ་རྒྱུས་འདིར་ཁུངས་ལུང་མེད་པ་ཁྱེད་ཀྱིས་ཐག་གཅོད་ཨེ་ཐུབ། ཁྱེད་ལ་དཔང་རྟགས་དང་ཁུངས་སྐྱེལ་ག་རེ་ཡོད་ལགས།
ཨ་མ་སྒྲོལ་མ། དཀར་འདོན་དགོས་ཟེར་ནས་ཞུ་གཏུགས་ཡོད་མེད་ལ་མ་ལྟོས་པར་བྱུང་བ་རང་བཞིན་བརྗོད་པ་དེ་ལོ་སྟོང་ཕྲག་འགྲོ་ན་ཡང་ལོ་རྒྱུས་ནང་ཡོད་པ་ཞིག་དང་གླེང་སློང་བྱེད་འོས་པ་ཞིག་རེད། སྤང་མདའ་ཚང་དབང་ཡོད་དབང་མེད་ཀྱི་རྩ་གཏོར་ཟིན་ན་ཡང་ད་དུང་སྤང་མདའ་ལ་ག་རེའི་ཚང་བྲུས་དགོས་རེད།
སུ་ཡིན་ཡང་ལོ་རྒྱུས་ཁུངས་ལུངས་མེད་པའི་རྫུན་མའི་རིགས་མ་སྤེལ་ན་བཟང་། བཀའ་དྲིན་ཆེ།
བཙན་བྱོལ་བའི་བྱུང་རིམ་ནང་དུ་ཐོན་པའི་རྩོད་རྙོག་ཅན་གྱི་གནད་དོན་ཞིག་མི་ལོ་དྲུག་ཅུ་བརྒལ་ཟིན་པའི་དུས་སུ་སླར་ཡང་བོད་ཀྱི་བང་ཆེན་དང་དུས་བབ་གསར་ཤོག་ཐོག་གསར་འགོད་བྱས་དོན་གང་ཡིན་ནམ།་་་སྤོམ་མདའ་ཚང་དང་འབྲེལ་བའི་རྙོག་གླེང་དེ་དག་སླར་ཡང་དཀར་འདོན་དགོས་ཞེས་སུ་ཞིག་ལ་ཞུ་གཏུགས་བྱ་འདོད་ཡོད་དམ།་་་དེ་ནི་འདས་པའི་རྙོག་གླེང་བསྐྱར་སླང་གིས་སྤོམ་མདའ་ཚང་ལ་ད་ལྟའི་ཆར་ཡང་མཚང་འབྲུད་བྱ་རྩིས་ཤིག་ལས་གཞན་མ་མཐོང་།་་་མི་དཔང་དང་དངོས་དཔང་ཚང་མ་ཡོད་དུས་དོན་གྱི་བདག་པོས་གསལ་བཤད་དག་ཐེར་མ་གནང་བར་ད་ལྟ་བཤད་སྲོལ་དང་གནམ་གཏམ་ཙམ་ལས་དོན་ངོ་མ་གང་ཡང་མི་ཤེས་པས་ལབ་གླེང་བྱས་པ་དེ་ནི་རྒྱུ་མཚན་གང་ཡང་མ་མཐོང་།་་་ལོ་རྒྱུས་བཤད་མཁན་དེས་སྤོམ་མདའ་ཚང་གི་བུ་སྤུན་གསུམ་གྱི་རྒན་གཞོན་ཡང་མ་ཤེས་པ་ཞིག་ལ་ལོ་རྒྱུས་དེའི་ཀྱང་ག་ལ་ཤེས།་་་དཔེར་ན།་་་སྤུན་གསུམ་ནས་ཆུང་ཤོས་སྐུ་ངོ་སྟོབས་རྒྱལ་ལགས་ཡིན་པའང་ཤེས་ཀྱི་མེད་པ་རེད།་་ལར་ནས་སྨར་ཁམས་བའི་མིས་བྱེད་སྟངས་ཤིག་ལ།་་་བོད་གཞུང་དང་བོད་མི་མང་གིས་གོང་དུ་བཀུར་བའི་སྨར་ཁམས་བའི་མི་སྣ་ཞིག་ཡོད་ཕྱིན།་་་དེར་སོ་སོས་མིའི་འཇོན་ཐང་ལ་ཕྲག་དོག་དང་སྡང་སེམས་བྱས་ཏེ་མི་དེའི་རྐང་པ་ནས་མར་འཐེན་གང་ཐུབ་བྱེད་པའི་ལོ་རྒྱུས་ད་བར་མང་པོ་ཡོད་པ་རེད།་་་དེ་ཕྱི་རོགས་ནང་བཙོང་ཟེར་བ་དེ་མ་ཡིན་ནམ།་་གནས་ཚུལ་འདི་རིགས་སྤེལ་མཚམས་བཞག་ན་ལེགས་སོ།།