གལ་སྲིད་དངོས་གཞིར་མ་ཚུད་ན་སྐབས་དེར་བལྟ་རྒྱུ་ཡིན། ༼ཨ་ཚོགས་ཀླུ་མཁར་བྱམས།༽

བཀའ་ཤག་སྐབས་བཅོ་ལྔ་པའི་སྲིད་སྐྱོང་དང་སྐབས་བཅུ་དྲུག་པའི་བོད་མི་མང་སྤྱི་འཐུས་ཀྱི་འོས་བསྡུའི་ཆེན་མོའི་སྔོན་འགྲོའི་འོས་གྲངས་ཁྱབ་བསྒྲགས་དང་བསྟུན་ཏེ། འདི་གའི་གསར་ཁང་གིས་དབུས་འོས་བསྡུ་ལ་ཁང་གིས་གསལ་བསྒྲགས་གནང་བ་ལྟར། དངོས་གཞིའི་འོས་མིར་མ་ཚུད་པའི་སྲིད་སྐྱོང་འོས་མིར་བཞེངས་མཁན་དག་ལས་ཨ་ཚོགས་ཀླུ་མཁར་བྱམས་ལགས་སུ་དྲི་བ་ཁག་ཅིག་བཏོན་ཡོད།

དྲི་བ། ཁ་སང་སྲིད་སྐྱོང་དང་སྤྱི་འཐུས་ཀྱི་སྔོན་འགྲོའི་འོས་གྲངས་གསལ་བསྒྲགས་གནང་བའི་ཁྲོད་སྲིད་སྐྱོང་གི་འོས་མི་ ༦  གི་འོས་གྲངས་གསལ་བོ་ཆགས་སོང་། འོས་མི་རེ་རེའི་འོས་གྲངས་དང་འབྲེལ་ཏེ་མཐོང་ཚོར་ག་རེ་བྱུང་སོང་།

ལན། སྔོན་འགྲོའི་འོས་གྲངས་ཀྱི་ནང་ནས་འོས་མཐོ་ཤོས་བློ་བཟང་སེང་གེ་རེད། སྤྱིར་བཏང་བོད་མི་རིགས་དང་ལྷག་པར་དུ་བཙན་བྱོལ་སྤྱི་ཚོགས་འདི་ལ་མཚོན་ན། སྤྱི་ཚོགས་ལ་འགྱུར་བ་ཆེན་པོ་ཞིག་གཏོང་བ་དང་གསར་བརྗེ་རང་བཞིན་གྱི་ལེགས་བཅོས་བྱེད་པའི་བློ་ཁོག་མེད་སྟབས། མི་མང་གིས་སྐབས་སྔོན་མར་བློ་བཟང་སེང་གེར་ཐོབ་ཡོད་པ་དང་། ད་ལྟ་ཡིན་ནའང་ཁོ་ཡིན་ཤག་རེད་ལབ་ཀྱི་ཡོད་པའི་རྒྱུ་མཚན་ག་རེ་རེད་ཟེར་ན། གལ་ཆེ་ཤོས་དེ་ང་ཚོའི་སྤྱི་ཚོགས་ལ་ལམ་ཀ་གསར་བར་འགྲོ་རྒྱུ་དང་། བསྒྱུར་བཅོས་གཏོང་བའི་སྙིང་སྟོབས་མེད་པར་གོམས་སྲོལ་རྙིང་པ་དང་། ངོ་གདོང་རྙིང་པ་དག་ལ་དགའ་བ། ད་ལྟའི་བར་དུ་དེ་དག་ལ་མགོ་བསྙེས་བསྡད་པའི་རྒྱུ་མཚན་གྱིས་བློ་བཟང་སེང་གེ་ལ་མང་པོ་ཐོབ་པ་རེད་བསམ་གྱི་འདུག

དེའི་རྗེས་ནས་བཀྲ་ཤིས་དབང་འདུས་དང་བཀྲ་ཤིས་སྟོབས་རྒྱལ། ང་ཚོ་གསུམ་ཆགས་རེད། བཀྲ་ཤིས་དབང་འདུས་ཀྱིས་ཟླ་ཤས་སྔོན་ནས་བཟུང་ཁྱབ་བསྒྲགས་བྱས་ཏེ་ཁྱབ་བསྒྲགས་གང་ལ་གང་འཚམ་ཞིག་བྱེད་ཐུབ་ཡོད་པ་རེད། ང་ཡིན་ན་སྔོན་འགྲོའི་འོས་བསྡུའི་ཟླ་བ་གཅིག་གི་སྔོན་ཙམ་ལ་མ་གཏོགས་དངོས་སུ་ལངས་ནས་ཁྱབ་བསྒྲགས་བྱེད་ཐུབ་ཡོད་པ་མ་རེད། སྤྱི་ཚོགས་ནང་ཁྱབ་བསྒྲགས་དང་ངོ་སྤྲོད་བྱེད་པའི་གོ་སྐབས་ཡང་ཡག་པོ་ཞིག་བྱུང་མ་སོང་། ཕྱོགས་གཞན་ནས་བཤད་ན། གཞུང་དང་གཞུང་འབྲེལ་མ་ཡིན་པའི་སྡེ་ཚན་ཁག་གི་ཐོག་ནས་ང་ལ་ལྡོག་ཕྱོགས་ཀྱི་གནོན་ཤུགས་མང་པོ་ཞིག་བསླེབས་པ་རེད། ངའི་ཁྱབ་བསྒྲགས་ལས་ཀྱང་མིང་ཆལ་བཟོ་བ་དང་ཚུལ་དང་མི་མཐུན་པའི་བྱ་སྤྱོད་མང་པོ་ཞིག་སྤེལ་ཡོད་པའི་རྐྱེན་གྱིས་ང་ཁྱབ་བསྒྲགས་ཡག་པོ་ཞིག་འགྲོ་ཐུབ་ཡོད་པ་མ་རེད། དེ་གནས་སྟངས་གཅིག་རེད་བསམ་གྱི་འདུག བཀྲ་ཤིས་སྟོབས་རྒྱལ་ལ་མཚོན་ན། སྔོན་འགྲོའི་འོས་བསྡུར་ཟླ་བ་གཅིག་ཡོད་མེད་ཙམ་ལ་དྷ་རམ་ས་ལ་ནས་གསར་འགོད་གསལ་བསྒྲགས་ཤིག་བྱས་པ་ཙམ་རེད་མ་གཏོགས་ཁྱབ་བསྒྲགས་བྱེད་ཐུབ་ཡོད་པ་མ་རེད། དེར་བརྟེན། ང་ཚོ་གསར་པ་ཚོར་མཚོན་ན། སྤྱིར་བཏང་གི་ཆ་ནས་སྤྱི་ཚོགས་ཐོག་ངོ་སྤྲོད་ཀྱི་གོ་སྐབས་ཡག་པོ་ཞིག་ཀྱང་བྱུང་ཡོད་པ་མ་རེད། དེ་གལ་ཆེ་ཤོས་ཤིག་རེད་བསམ་གྱི་འདུག དེ་ནས་སྤེན་པ་ཚེ་རིང་རེད། ཁོ་རང་སྒེར་གྱི་ཐོག་ནས་སྤྱི་ཚོགས་འདིའི་ནང་ངོ་སྤྲོད་བྱེད་དགོས་པའི་མི་ཞིག་མ་རེད། ད་ལྟའི་བར་དུ་སྤྱི་ཚོགས་ཀྱི་བརྒྱུད་ལམ་སྣ་ཚོགས་ཐོག་བཟང་ན་ངན་ན་འཐོན་བསྡད་པ་ཞིག་ཡིན་པ་མ་ཟད། ཁོའི་རྒྱབ་ལྗོངས་དུ་དབུས་གཙང་ཆོལ་ཁ་ཟེར་བ་ལྟ་བུའི་ཚོགས་པ་ཆེ་ཤོས་དག་གིས་དངོས་ཤུགས་བརྒྱུད་གསུམ་ནས་རྒྱབ་སྐྱོར་བྱས་པའི་རྒྱུ་མཚན་གྱིས་འོས་གང་ལ་གང་འཚམ་ཐོབ་སོང་བ་རེད། ངས་གཙོ་བོ་ག་རེ་ཤོད་ཀྱི་ཡོད་ཟེར་ན། ངེད་ཅག་ལྟ་བུར་མཚོན་ན་གལ་སྲིད་དངོས་གཞིའི་ནང་ལ་ཚུད་སོང་བ་ཡིན་ན། ད་དུང་འདི་ལས་འོས་འཕར་འགྲོ་བར་ང་ལ་མཚོན་ན་རེ་བ་རྒྱག་གི་ཡོད། ཡིན་ནའང་འོས་བསྡུ་ལྷན་ཁང་གི་ངོས་ནས་ཁྲིམས་དང་སྒྲིག་གཞི་མང་པོ་ཞིག་བཟོས་པའི་དབང་གིས་དངོས་གཞིའི་ནང་ལ་འགྲོ་རྒྱུར་རེ་བ་ཡོད་ས་མ་རེད། འོས་བསྡུའི་ཁྲིམས་སྒྲིག་བཟོས་པ་ཙམ་མ་རེད་ང་རང་ལ་འོས་མང་པོ་ཞིག་མ་ཐོབ་པའི་རྒྱུ་མཚན་དེ་མིས་བསམ་གཟས་ཏེ་མང་པོ་ཞིག་བྱས་པའི་དབང་གིས་བྱུང་བ་རེད་བསམ་གྱི་འདུག

དྲི་བ།  ཁྱེད་རང་རང་བཙན་རྩོད་མཁན་ཞིག་རེད། སྤྱི་ཚོགས་ནང་༧གོང་ས་མཆོག་ལ་སྐྱོན་བརྗོད་བྱས་སོང་ཟེར་བའི་གླེང་སློང་ཞིག་ཀྱང་ཡོད་པ་རེད། ད་རེབ་སྔོན་འགྲོའི་འོས་བསྡུའི་ཁྲོད་ཁྱེད་རང་གི་འོས་གྲངས་ ༢༥༥༧ ཙམ་ལས་ཐོབ་ཡོད་པ་མ་རེད། གནས་སྟངས་འདི་ལ་གཞིགས་པའི་ཁྱོད་རང་གིས་ངོས་འཛིན་གང་འདྲ་གནང་གི་ཡོད་དམ།

ལན། བཙན་བྱོལ་སྤྱི་ཚོགས་ནང་ངས་ལོ་ངོ་ ༢༠ བསྐྱལ་ཡོད་པ་དང་། དེའི་ནང་བྱུང་ན་མ་བྱུང་ན་ངས་བོད་རང་བཙན་བཤད་ཡོད་པ་རེད། རྒྱ་ནག་གི་བཙོན་ཁང་དུ་ཕྱིན་པ་དེའང་བོད་རང་བཙན་འཐབ་རྩོད་བྱས་པའི་རྐྱེན་གྱིས་རེད། སྤྱིར་བཏང་ང་སྲིད་སྐྱོང་ལ་ལངས་པ་དང་མཉམ་གཅིག་ཏུ་རང་བཙན་གྱི་འབོད་སྒྲ་འདི་ཤུགས་ཆེན་པོ་ཞིག་ཡར་ཡོང་ན་དེས་ཀླུ་མཁར་བྱམས་ཙམ་མ་ཡིན་པར་བོད་ཀྱི་སྤྱི་ཚོགས་ལ་ཕན་ཞིག་ཐོགས་ངེས་རེད། ཡིན་ནའང་ལྡོག་ཕྱོགས་ཀྱི་གལ་ཆེ་ཤོས་ག་རེ་ཡིན་ལབ་ན། ཀླུ་མཁར་བྱམས་ཡར་ལངས་བ་དང་མཉམ་དུ་རང་བཙན་གྱི་འབོད་སྒྲ་ལས་༧རྒྱལ་བ་རིན་པོ་ཆེར་ཁ་བཏང་བ་རེད་ཅེས་པའི་སྐད་ཆ་དེ་ཤུགས་ཆེན་པོ་བཟོས་ཡོང་བ་དེས་ངའི་འོས་གྲངས་ལ་ཁྱད་པར་ཏན་ཏན་འགྲོ་ཡོད་པ་རེད་བསམ་གྱི་འདུག དེ་ཚོ་རྩ་བའི་ཆ་ནས་བཤད་ན་ང་ཀླུ་མཁར་བྱམས་ལ་དམིགས་བསལ་གྱིས་ཁྱད་པར་ཆེན་པོ་མི་འདུག་ལ། དེས་༧རྒྱལ་བ་རིན་པོ་ཆེ་མཆོག་ལའང་མཚན་གནས་རྗེས་འབྲེལ་གྱི་ཐོག་ནས་དོ་ཕོག་གང་ཡང་འགྲོ་བ་མ་རེད། རང་བཙན་རྩོད་མཁན་ཞིག་ལ་མཚོན་ན། རྒྱལ་བ་རིན་པོ་ཆེའི་བསྟན་པའི་དབུ་མའི་ལམ་ནས་ལོ་ངོ་ཉི་ཤུ་ཙམ་ལྷག་རིང་གྲུབ་འབྲས་འཐོན་གྱི་མེད་པ་དེ་བཤད་རྒྱུ་གལ་ཆེན་པོ་ཞིག་ཆགས་ཡོད་པ་རེད། དེའི་ནང་གི་ཚིག་རེ་གཉིས་ཤིག་གི་མགོ་རྔ་གཏུབས་ནས་འཁྱེར་ཡོང་སྟེ་༧རྒྱལ་བ་རིན་པོ་ཆེར་ཁ་བཏང་བ་རེད་ཟེར་ནས་མང་པོ་བཤད་པ་དེས་བོད་ཀྱི་རྩ་དོན་ལ་གྱོང་ཆེན་པོ་ཞིག་རག་ཡོད་པ་རེད་བསམ་གྱི་འདུག སྤྱིར་བཏང་དམངས་གཙོ་ཟེར་བ་དེས་སྤྱི་ཚོགས་ཀྱི་ལམ་ཁ་ཡག་པོ་ཞིག་ལ་འཁྲིད་ཐུབ་པ་རེད་ལ། ཤེས་ཚད་མེད་པའི་སྤྱི་ཚོགས་ལ་མཚོན་ན་ལམ་ཁ་ལོག་པར་ཡང་འཁྲིད་པའི་ཉེན་ཁ་ཡོད་པ་རེད། དཔེར་ན། སྒང་དུ་སྡོད་མཁན་ཚོས་གཙོ་བོ་སོ་སོའི་རྐུབ་སྟེགས་ག་རེ་ཐོབ་མིན་མ་གཏོགས་ས་གནས་མང་ཚོགས་ཀྱིས་ང་ཚོའི་སྟེང་དུ་ག་རེ་བྱེད་ཀྱི་འདུག གཞུང་དང་འོས་བསྡུ་ལས་ཁང་གིས་ག་རེ་བྱེད་ཀྱི་འདུག་དེ་དག་ཡོངས་རྫོགས་ལ་སྣང་མེད་གཏོང་གི་ཡོད་པ་དེ་ང་ཀླུ་མཁར་བྱམས་སྒེར་གྱི་གནད་དོན་ཙམ་མ་རེད་བོད་སྤྱི་ཚོགས་ལ་གྱོང་རྒྱག་གི་ཡོད་པ་རེད་བསམ་གྱི་འདུག

དྲི་བ། ད་རེབ་སྔོན་འགྲོའི་འོས་བསྡུའི་གནས་སྟངས་ལ་བལྟས་ཡོང་ན། སྲིད་སྐྱོང་ལས་ཐོག་བློ་བཟང་སེང་གེ་མཆོག་བཀའ་ཤག་སྐབས་བཅོ་ལྔ་པའི་སྲིད་སྐྱོང་ལ་བསྐྱར་དུ་འཁེལ་རྒྱུ་ཡིན་པ་འདྲ་བོ་འདུག ཁོང་གི་ལས་ཡུན་རིང་འཐུས་ཤོར་ཆེ་ཤོས་གསུམ་གང་ལ་ངོས་འཛིན་གནང་གི་ཡོད་པ་དང་། གལ་སྲིད་ཁོང་ཡང་བསྐྱར་ཕེབས་པ་ཡིན་ན། ཁ་ཡོད་ལག་ཡོད་ཀྱིས་གནང་དགོས་པའི་ལས་འགན་གཙོ་བོ་གསུམ་གང་དག་ལ་ངོས་འཛིན་གནང་གི་ཡོད་དམ།

ལན། རྩ་བའི་བློ་བཟང་སེང་གེ་སྐབས་གཉིས་པར་བསྐྱར་དུ་ལངས་པ་ཙམ་གྱིས་ནོར་འཁྲུལ་རེད་བསམ་གྱི་འདུག ཁོ་རང་ལ་ནུས་པ་དང་འཇོན་ཐང་ག་རེ་ཡོད་པ་ཡིན་ནའང་དེ་བསྟན་ཚར་བ་རེད། ངས་བསམ་ན་བློ་བཟང་སེང་གེ་ཡིས་སྐབས་གཉིས་པ་ལ་གསར་པ་ཞེ་དྲགས་ཤིག་བྱ་རྒྱུ་ཡོད་པ་རེད་བསམ་གྱི་མི་འདུག གང་ཡིན་ཟེར་ན། ང་ཚོ་གཤིབ་བསྡད་པ་དང་། ལོ་འདི་འདྲ་ཞིག་ལ་ང་ཚོས་མཐོང་བསྡད་པ་རེད། བློ་བཟང་སེང་གེ་མི་ཡག་པོ་དང་སྡུག་པོ་ཡིན་པའི་སྐད་ཆ་མ་རེད། ཁོས་བོད་ཀྱི་རྩ་དོན་རང་བཞིན་གྱི་ལས་ཀ་ཆེན་པོ་ཞིག་བྱེད་ཐུབ་རྒྱུ་རེད་བསམ་པའི་གདེང་ཚོད་དེ་ང་ལ་མི་འདུག ཁོང་རང་སྐབས་གཉིས་པར་ལངས་པའི་ཁྱབ་བསྒྲགས་དེ་ཚོར་བལྟས་ཡོང་ན། ལས་འཕྲོ་སྐྱོང་དགོས་པ་ཁ་ཤས་ཙམ་མ་གཏོགས་གསར་གཏོད་རང་བཞིན་གྱི་ལས་འཆར་ཅི་ཡང་མཐོང་མ་སོང་།

དེ་ནས་མ་འོངས་པར་གལ་ཆེ་ཤོས་ག་རེ་ཐོག་ཤུགས་རྒྱག་དགོས་པ་རེད་ཟེར་ན། གཞིས་ཆགས་སྲ་བརྟན་ཟེར་བ་འདྲ་བོ་ཉ་གེ་ཉོག་གེ་འདི་རིགས་ཀྱང་འགྲིག་གི་ཡོད་པ་རེད་དེ། གཙོ་བོ་བོད་ཀྱི་རྩ་དོན་རང་བཞིན་གྱི་ལས་དོན་ཐོག་ཤུགས་རྒྱག་དགོས་པ་རེད། ཡིན་ནའང་རྩ་དོན་རང་བཞིན་ལ་ཤུགས་རྒྱག་དགོས་ཟེར་དུས་དབུ་མའི་ལམ་ནས་བོད་རྒྱ་ནག་གི་འོག་ཏུ་འགྲོ་རྒྱུ་ཡིན་ཟེར་བའི་སྐད་ཆ་འདིའི་རིགས་རྩ་བ་ཉིད་ནས་འགྲིག་གི་མ་རེད། དངོས་གནས་དྲང་གནས་དེང་སང་གི་རྒྱལ་སྤྱིའི་སྤྱི་ཚོགས་ཀྱི་འགྱུར་བར་བལྟས་ཏེ་བོད་ཀྱི་རྩ་དོན་རང་བཞིན་གྱི་ཐོག་ལ་ཤུགས་བརྒྱབ་སྟེ། བོད་རང་དབང་རང་བཙན་གྱི་ལམ་ཀ་ཞིག་གི་ཐོག་འགྲོ་དགོས་པ་རེད། དེ་མིན་གྱི་ལས་ཀ་ག་རེ་བྱས་པ་ཡིན་ནའང་རྒྱུན་ལྡན་རེད། ཡིན་ནའང་བཙན་བྱོལ་འདི་ལ་སྒྲིག་འཛུགས་ཤིག་ཡོད་པ་དང་། སྒྲིག་འཛུགས་དེར་མགོ་ཁྲིད་མཁན་ཞིག་ཀྱང་དགོས་ཀྱི་ཡོད་ལ། དགོས་པ་ཙམ་གྱིས་གཅིག་ལ་ཐོབ་ཡོད་པ་འདྲ་པོ་མ་གཏོགས་ངས་དོན་ཚན་ལ་དབྱེ་ནས་བློ་བཟང་སེང་གེ་ཡིས་འདི་དང་འདི་བྱེད་དགོས་ཀྱི་འདུག་ཅེས་བཤད་ཤེས་ཀྱི་མི་འདུག

དྲི་བ། ཁྱེད་རང་ཐེངས་འདིའི་འོས་བསྡུའི་ནང་ཞུགས་པ་དེ་བཙན་བྱོལ་སྤྱི་ཚོགས་འདི་ལམ་ཀ་ཡག་པོ་ཞིག་ཏུ་ཁྲིད་ཐུབ་པའི་མཐའ་མཇུག་གི་རེ་བ་ཡིན་གསུངས་སོང་། གལ་སྲིད་ཁྱེད་རང་དངོས་གཞིའི་ནང་དུའང་མ་བསླེབ་པ་ཡིན་ན། མ་འོངས་པར་བོད་པའི་སྤྱི་དོན་ལ་འཆར་སྣང་དང་བློས་གཏོང་གི་རེ་འཆར་ག་རེ་ཡོད།

ལན། ང་སྲིད་སྐྱོང་གི་འོས་འདིའི་ནང་ཞུགས་པ་དེ་བོད་རང་བཙན་འཐབ་རྩོད་ཀྱི་ཆ་ཤས་ཤིག་ཡིན་ལ། སྤྱིར་བཏང་གི་ཆ་ནས་བོད་རང་བཙན་ཕྱོགས་ཁག་གི་ནང་ནས་རྒྱུན་རིང་པོར་གོ་བསྡུར་བྱས་པའི་ལས་རིམ་ནང་གི་གཅིག་རེད། ང་གཅིག་པུའི་གནད་དོན་མ་རེད། མི་མང་པོ་ཞིག་གིས་གོ་བསྡུར་བྱས་ཏེ་ང་ཚོ་འདིའི་ནང་ཞུགས་ཡོད་པ་རེད། དེར་བརྟེན། ང་ཚོའི་རང་བཙན་གྱི་འཐབ་རྩོད་འདི་དང་འབྲེལ་བའི་མ་འོངས་པར་ལས་འགུལ་ག་རེ་སྤེལ་དགོས་ཀྱི་ཡོད་པ་དེ་ཚོ་བང་བསྒྲིགས་ནས་ཡོད་སྟབས། མ་འོངས་པར་ངས་ལས་རིམ་དེའི་ནང་ནས་ཆ་ཤས་ག་རེ་ལེན་དགོས་ཀྱི་འདུག ཞབས་ཞུ་ག་རེ་ཞུ་ཐུབ་ཀྱི་ཡོད་ན་དེར་ངས་མུ་མཐུད་དུ་ལས་ཀ་བྱེད་རྒྱུ་ཡིན། དོན་དག་གཉིས་པ་དེ་བཙན་བྱོལ་བོད་མིའི་སྒྲིག་འཛུགས་འདིའི་ཐོག་ལ་བོད་རང་བཙན་རྩོད་མཁན་ཚོས་རེ་བ་རྒྱག་གི་རེད་དང་མ་རེད། རེ་བ་རྒྱག་ས་ཞིག་ཡོད་མེད་ཐོག་ང་ཚོས་བསམ་བློ་ཏན་ཏན་གཏོང་གི་རེད། ང་ཚོས་གོ་རིམ་ཁ་ཤས་ཤིག་བགོས་ཡོད། ད་ལྟའི་སྐབས་ལ་མངོན་གསལ་དོད་པོས་ང་དངོས་གཞིའི་ནང་འགྲོ་རུ་མ་བཅུག་པ་ཡིན་ན། ང་ཚོ་རང་བཙན་རྩོད་མཁན་ཚོས་ག་རེ་བྱེད་དགོས་ཀྱི་འདུག་དེའི་ཐོག་ཏན་ཏན་འཆར་གཞི་ཞིག་འཐེན་གྱི་རེད། གལ་སྲིད་ང་རང་དངོས་གཞིའི་ནང་ལ་བཞག་པ་ཡིན་ན་ང་ཚོས་ཁས་ལེན་དམ་བཅའ་དེ་མཇུག་བསྐྱལ་རྒྱུ་རེད། གལ་སྲིད་མངོན་གསལ་དོད་པོས་མ་བཞག་པ་ཡིན་ན་དངོས་གཞིའི་འོས་མི་གསལ་བསྒྲགས་སྐབས་དེ་ལ་འབབ་པའི་འཆར་གཞི་ཞིག་གཏོང་གི་རེད།

གསར་འགོད་པ། པདྨ་མཚོ།