རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་༧གོང་ས་མཆོག་ལ་ཞི་བདེ་གཟེངས་རྟགས་ཐོབ་པའི་དུས་དྲན་སྲུང་གཙིའི་སྟེང་། བཀའ་སྤྱི་གཉིས་ཀྱི་གསུང་བཤད་ནང་དབུ་མའི་ལམ་ལ་མུ་མཐུད་ཤུགས་བསྐྱོན་དགོས་པ་དང་༧གོང་ས་མཆོག་ལ་བཀའ་དྲིན་རྗེས་དྲན་ཞུ་དགོས་པ་ལས་ཁོང་གི་ཐུགས་ཕམ་པའི་བཤད་སྤྱོད་རིགས་སྤེལ་མི་རུང་བའི་འབོད་སྐུལ་ཞུས་སོང་།
དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར། རྒྱ་གར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། བོད་གཞུང་དམངས་གཉིས་ཀྱིས་༧གོང་ས་མཆོག་གིས་ནོ་བྷེལ་ཞི་བདེའི་གཟེངས་རྟགས་བཞེས་ཏེ་ལོ་ངོ་ ༢༦ འཁོར་བའི་དུས་དྲན་སྲུང་གཙི་ཞུས་སོང་།
དུས་དྲན་དབུ་འབྱེད་གྱི་སྐུ་མགྲོན་གཙོ་བོར་རྒྱ་གར་ཧི་མ་ཅལ་མངའ་སྡེའི་གཞུང་གི་བློན་ཆེན་ཟུར་བ་ཡིན་པ་དང་ད་ལྟ་མངའ་སྡེའི་གྲོས་ཚོགས་འཐུས་མི་ལྕམ་སི་མེ་ཊི་སའི་ཝེན་ཅོ་དྷི་རེ (Smt Sarveen Chaudhary)དང་། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་བཀའ་བློན་རྣམ་པ་དང་། བོད་མི་མང་སྤྱི་འཐུས་ཚོགས་གཙོ་མཆོག་གིས་དབུས་པའི་སྤྱི་འཐུས་རྒྱུན་ལས་རྣམ་པ། དེ་བཞིན། ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཟུར་བ་དང་ད་ཆ་ཚོགས་པའི་སློབ་སྟོན་པ་སྐུ་ཞབས་རམ་སི་ཝ་རོཕ་ཇེ་ (Ram Swaroopji) ལགས་གཙོས་ཧི་མ་ཅལ་མངའ་སྡེའི་གནད་ཡོད་མི་སྣ་ཁག་ཅིག བོད་མིའི་སྒྲིག་འཛུགས་ཀྱི་གཞུང་ཞབས་ལས་བྱེད་དང་གཞུང་འབྲེལ་མིན་པའི་ཚོགས་སྡེ་ཁག་གི་འགན་འཛིན། བཞུགས་སྒར་ཁུལ་གྱི་སེར་སྐྱ་མི་མང་བཅས་མི་མང་ ༢༠༠༠ ལྷག་འཛོམས་སོང་།
མཛད་སྒོའི་ཐོག་མར་ཧིན་བོད་གཉིས་ཀྱི་རྒྱལ་གླུ་ཕུལ་བ་དང་བསྟུན་ཏེ་སྲིད་སྐྱོང་བློ་བཟང་སེང་གེ་མཆོག་གིས་བོད་རྒྱལ་ཁབ་ཆེན་པོའི་རྒྱལ་དར་བསྒྲེངས་འཛུགས་གནང་རྗེས། བོད་བསྟན་སྲིད་ཆེད་ལུས་སྲོག་བློས་བཏང་བའི་རྒྱལ་གཅེས་དཔའ་བོ་དཔའ་མོ་རྣམ་པར་མྱ་ངན་གུས་འདུད་དང་། བོད་ཀྱི་ཟློས་གར་ཚོགས་པས་ནོ་བྷེལ་བསྟོད་དབྱངས་མཉམ་འབུལ་གནང་རྗེས། འཕྲོད་བསྟེན་ལས་ཁུངས་ཀྱིས་བཙན་བྱོལ་སྤྱི་ཚོགས་ནང་འཕྲོད་བསྟེན་དང་འབྲེལ་བའི་ཕྱག་ལས་གནང་མཁན་ཞབས་ལོ་ ༢༥ འཁོར་བའི་ལས་བྱེད་ ༦ ལ་སྲིད་སྐྱོང་གིས་གཟེངས་བསྟོད་ལེགས་སྐྱེས་ཕུལ་བ་དང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་ཕྱི་དྲིལ་ལས་ཁུངས་ནས་ཕྱི་ལོ་ ༡༩༩༦ ལོར་འགྲེམས་སྤེལ་གནང་བའི་ The Panchen Lama Lineage:How Reincarnation is Being Reinvented as a Political Tool ཞེས་པའི་དཔེ་དེབ་དེར་ཁ་སྣོན་གྱིས་པར་སྐྲུན་ཞུས་པ་དབུ་འབྱེད་གནང་སོང་།
ཐེངས་འདིའི་བཀའ་ཤག་གི་གསུང་བཤད་ནང་། ྋགོང་ས་ྋསྐྱབས་མགོན་ཆེན་པོ་མཆོག་གི་དགོངས་བཞེད་ལྟར་མང་གཙོའི་ལམ་ལུགས་ཀྱི་ཐོག་ནས་གཏན་ལ་ཕབ་པའི་དབུ་མའི་ལམ་ནི་བོད་མིའི་སྒྲིག་འཛུགས་ཀྱི་སྲིད་བྱུས་ཤིག་ཡིན། འདིས་བོད་རྒྱ་མི་རིགས་གཉིས་ཀྱི་ཕུགས་རྒྱང་རིང་པོའི་ཁེ་ཕན་ལ་སྨན་པར་བརྟེན་རྒྱལ་སྤྱིའི་སྲིད་གཞུང་ཁག་དང༌། ཤེས་ཡོན་ཅན། རྒྱ་རིགས་རྩོམ་པ་པོ།མཁས་པ་བཅས་ཕྱོགས་མང་པོ་ནས་བོད་དོན་ལ་རྒྱབ་སྐྱོར་གནང་མཁན་གང་མང་བྱུང་ཡོད། ཨ་རིའི་ཕོ་བྲང་དཀར་པོ་ནས་དབུ་མའི་ལམ་གྱི་མཛད་བྱུས་ལ་བསྔགས་བརྗོད་དང་རྒྱབ་སྐྱོར་ཤུགས་ཆེ་ཡོད་པའི་གསལ་བསྒྲགས་ཀྱང་སྤེལ་ཡོད། འདི་ལོའི་ནང་སྲིད་འཛིན་ཨཱོ་སྦ་མ་མཆོག་གིས་རྒྱ་ནག་སྲིད་འཛིན་ཞི་ཅིན་ཕིང་མཇལ་འཕྲད་གནང་སྐབས་ཁོང་གིས་བོད་དོན་དཀའ་རྙོག་སེལ་ཐབས་སུ་ྋགོང་ས་ྋསྐྱབས་མགོན་ཆེན་པོ་མཆོག་དང་གང་ཉིད་ཀྱི་སྐུ་ཚབ་ལྷན་དུ་འབྲེལ་མོལ་གནང་དགོས་པའི་ནན་བསྐུལ་གནང་ཡོད། ཁོང་གིས་གསུང་བཤད་དེ་འདྲ་གནང་བར་བཀའ་ཤག་གིས་བོད་མི་ཡོངས་ཀྱི་ཚབ་ཞུས་ཏེ་དགའ་བསུ་དང་རྗེས་སུ་ཡི་རང་ཞུ་གི་ཡོད།
དེ་བཞིན་ཨ་རི་གྲོས་ཚོགས་ཀྱི་དབུ་འཁྲིད་ལྕམ་ནན་སི་སྤེ་ལོ་སི་མཆོག་གིས་གཙོས་གྲོས་ཚོགས་འཐུས་མི་ཁག་ཅིག་བོད་དུ་གཟིགས་སྐོར་ཕེབས་ཏེ་བོད་ནང་གི་འགྲོ་བ་མིའི་ཐོབ་ཐང་ཐོག་ཐུགས་འཚབ་ཡོད་གསུངས་པ་དང་ཆབས་ཅིག་རྒྱ་ནག་གཞུང་ནས་འབྲེལ་མོལ་གནང་དགོས་པའི་བསྐུལ་མ་གནང་ཡོད། དེ་ཡང་ཨ་རིའི་གྲོས་ཚོགས་ཀྱི་དབུ་འཁྲིད་ལྕམ་ནན་སི་སྤེ་ལོ་སི་མཆོག་གིས་ ”བོད་མིའི་ཆོས་དད་དང་སྨྲ་བརྗོད་ཀྱི་རང་དབང༌། ཆོས་དང་རིག་གཞུང་སྐད་ཡིག་སྲུང་སྐྱོབ། ཕྱི་འབྲེལ་མི་སྣ་དང་ལྟ་སྐོར་བ་ཕེབས་ཕྱོགས་ཐད་ཐུགས་འཚབ་ཡོད་ཅེས་”དང༌། ཁོང་གིས་མུ་མཐུད་”ྋགོང་ས་ྋསྐྱབས་མགོན་ཆེན་པོ་མཆོག་ལ་ཨ་རིའི་རྒྱ་ཆེའི་མི་མང་དང་གྲོས་ཚོགས་ནས་རྒྱབ་སྐྱོར་ཤུགས་ཆེ་ཡོད་སྐོར་རྒྱ་ནག་གཞུང་གི་མི་སྣར་གསལ་པོ་བཤད་ཡོད་”ཅེས་གསུངས་ཡོད། དེ་མཚུངས་གྲོས་ཚོགས་འཐུས་མི་སྐུ་ཞབས་ཇཱིམ་མེག་གྷ་ཝན་མཆོག་གིས་ཀྱང་ད་ལན་གྱི་གཟིགས་སྐོར་སྐབས་རྒྱ་རིགས་ལས་བྱེད་མཉམ་དུ་བསམ་ཚུལ་བརྗེ་ལེན་ཤུགས་ཆེ་བྱུང་སྐབས་ཁོང་གིས་ ”ཏཱ་ལའི་བླ་མ་ནི་བོད་རྒྱའི་དཀའ་རྙོག་འགྲིག་འཇགས་ཡོང་བའི་ཐབས་ལམ་ཡིན།རྒྱ་ནག་གཞུང་གིས་བོད་ནང་འགྲོ་གྲོན་བཏང་ཡོད་ནའང༌། མི་རིགས་ཤིག་གི་ངོ་བོ་མཚོན་པའི་རྩ་ཆེའི་རིག་གཞུང་དང་སྲོལ་རྒྱུན་རྣམས་འགྲེམས་སྟོན་ཁང་ལྟ་བུ་ཞིག་ཏུ་དམ་བཅིངས་ཐུབ་ཀྱི་མ་རེད།”ཅེས་གསུངས་ཡོད་ཚུལ་འཁོད་འདུག
གསུང་བཤད་ནང་མུ་མཐུད་དུ་བཀོད་དོན། ཉེ་ཆར་བོད་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེ་ཁྲན་ཆུང་གོའུ་ཡིས་བོད་རིགས་ལས་བྱེད་པ་ལྐོག་ཏུ་ཆོས་དད་བྱེད་མཁན་དང་ ‘ཏཱ་ལའི་རུ་ཚོགས’ ཀྱི་རྗེས་འཇུག་པ་ངོ་རྟགས་བཟུང་སྟེ་ཚབས་ཆེའི་ཉེས་པ་གཏོང་དགོས་བཤད་ཡོད། ཡང་རྒྱ་ནག་གཞུང་འཛིན་མི་སྣ་ཀྲུའུ་ཝེ་ཆུན་གྱིས་ྋགོང་ས་ྋསྐྱབས་མགོན་ཆེན་པོ་མཆོག་གི་ཡང་སྲིད་སྐོར་ཐག་གཅོད་བྱེད་དབང་རྒྱ་ནག་གཞུང་ལ་ཡོད་ཚུལ་ཧམ་བཤད་བྱས་ཡོད། འོན་ཀྱང་ཆོས་དང་སྐྱེ་བ་སྔ་ཕྱི་ཁས་མི་ལེན་མཁན་ཞིག་གིས་ཧམ་བཤད་བྱས་པར་རྒྱལ་སྤྱིའི་བློ་ལྡན་སུས་ཀྱང་ཆ་འཛིན་མི་བྱེད། ྋགོང་ས་མཆོག་གི་སྐུའི་ཡང་སྲིད་ནི་བོད་ཀྱི་ལོ་རྒྱུས་དང་ཆོས་ཕྱོགས་གང་ཐད་ནས་ྋགོང་ས་མཆོག་གང་ཉིད་ལས་གཞན་སུ་ལའང་ཐག་གཅོད་བྱེད་དབང་མེད། ྋགོང་ས་མཆོག་ལ་བོད་མིས་ཡིད་ཆེས་སྲ་བརྟན་ཡོད་པ་དེར་རྒྱ་ནག་གཞུང་གིས་དཔུང་སྟོབས་སྤྱད་པའམ་དངུལ་སྤྲད་དེ་འགྱུར་བ་རྩ་བ་ནས་གཏོང་ཐུབ་ཀྱི་མ་རེད། ཅེས་འཁོད་འདུག
བཀའ་ཤག་གི་གསུང་བཤད་དང་ད་ལོའི་འོས་བསྡུའི་སྐོར་འཁོད་དོན། བཙན་བྱོལ་བོད་མི་རྣམས་ནས་མང་གཙོའི་བརྒྱུད་རིམ་གྱི་གོ་རྟོགས་ཇེ་ཆེར་འཕེལ་སྟེ་འོས་བསྡུའི་སྐབས་དོ་སྣང་ཆེན་པོས་མཉམ་ཞུགས་གནང་ཡོད། གཞི་རྩའི་གཏམ་བརྗོད་ཀྱི་རང་དབང་ནི་མང་གཙོའི་ཐོབ་ཐང་ཞིག་ཡིན་པ་དང་སྤྱི་ཚོགས་ཀྱི་བརྒྱུད་ལམ་ཁག་ནི་དེའི་ལག་ཆ་ལྟ་བུ་ཡིན་ནའང༌། དེ་དག་བེད་སྤྱོད་ལོག་པར་མ་སོང་བའི་འགན་འཁུར་དགོས་པ་ཡིན། དམིགས་བསལ་ྋགོང་ས་ྋསྐྱབས་མགོན་ཆེན་པོ་མཆོག་ལ་དད་གུས་བརྩི་བཀུར་ཞུ་རྒྱུའི་ཚབ་ཏུ་རྫུན་གཏམ་ཧམ་བཤད་བྱས་པ་ལ་བཀའ་ཤག་ནས་མཐའ་གཅིག་ཏུ་ངོ་རྒོལ་ཡོད། སྲིད་སྐྱོང་དང་སྤྱི་འཐུས་ལ་བཞེངས་མཁན་སྐྱེ་བོ་སུ་ཡིན་མིན་ལ་མ་ལྟོས་པར་ཁུངས་མེད་ཀྱི་སྐྱོན་འཛུགས་བྱེད་པ་དེས་སྲིད་སྐྱོང་དང་སྤྱི་འཐུས་ཀྱི་སྒྲིག་འཛུགས་ཀྱི་མཚན་མཐོང་ལ་གནོད་རྒྱུ་ལས་ཕན་ཆ་གང་ཡང་མེད། ཉེ་ཆར་དྲ་ལམ་ཁག་ཏུ་གཞི་མེད་སྐྱོན་འཛུགས་ཀྱི་འཆལ་གཏམ་མང་དག་ཅིག་སྤེལ་བ་དེས་མང་ཚོགས་ཡིད་རྨོངས་སུ་བཅུག་ཡོད་པ་མ་ཟད། བོད་མིའི་རྩ་དོན་དང་ཆིག་སྒྲིལ་ལ་འཕྲལ་ཕུགས་རྒྱང་གསུམ་ནས་ཁེ་ཕན་གང་ཡང་བྱུང་རྒྱུ་མེད་ན་ཚང་མས་ཡིད་གཟབ་དང་འགན་འཁུར་གནང་རྒྱུ་གལ་ཆེ།
བོད་མིའི་སྒྲིག་འཛུགས་ཀྱིས་ ༢༠༡༤ ལོར་བཀའ་དྲིན་རྗེས་དྲན་སྲུང་བརྩི་ཞུས་པ་དང༌། ༢༠༡༥ ལོར་གཞུང་མང་གཉིས་ནས་མགོན་པོ་མཆོག་དགུང་གྲངས་བརྒྱད་བཅུ་ཐམ་པར་ཕེབས་པའི་བཀྲིན་རྗེས་དྲན་གྱི་ལོ་ཚིགས་སྲུང་བརྩི་ཞུ་བཞིན་པའིསྐབས་འདིར་སྐྱེ་བོ་རེ་ཟུང་གིས་བཀའ་དྲིན་བསམ་ཤེས་མེད་པར་མགོན་པོ་མཆོག་ལ་རྒྱལ་ཚོང་བ་ཡིན་པའི་སྨྱོ་གཏམ་དང༌། ཟུར་ཟ་སོགས་འཆལ་གཏམ་སྣ་ཚོགས་སྤེལ་བཞིན་ཡོད་པ་ནི་འགྲོ་བ་མིའི་བཟང་སྤྱོད་དང་ཡོངས་སུ་འགལ་བའི་ངོ་ཚ་དགོས་པའི་གནས་ཤིག་ཡིན།
དེ་བཞིན་དོལ་རྒྱལ་རྗེས་འབྲངས་པ་ཚོས་རྒྱ་ནག་གཞུང་དང་ངན་པ་ལག་སྦྲེལ་གྱིས་ྋགོང་ས་ྋསྐྱབས་མགོན་ཆེན་པོ་མཆོག་ལ་མཚན་སྨད་དང་ངོ་རྒོལ་བྱེད་པ་ཀུན་གྱི་མཐོང་ཐོས་བྱུང་ཡོད། ཕྱིའི་ཡུལ་ཁག་ཏུ་འཚར་ལོངས་བྱུང་བའི་ན་གཞོན་འགའ་རེས་དོལ་རྒྱལ་ཕྱོགས་གཏོགས་པས་ཆོས་དད་རང་དབང་རྩོད་པ་བདེན་པ་མིན་ནམ་སྙམ་པ་བློར་འཆར་སྲིད། དོན་དངོས་གནས་སྟངས་ནི་དོལ་རྒྱལ་རྗེས་འབྲངས་པ་ཚོས་བོད་མིའི་གཞིས་ཆགས་ནང་དགོན་པ་བརྒྱབ་སྟེ་དོལ་རྒྱལ་བསྟེན་རྒྱུར་རང་དབངབྱུང་ཡོད་པ་དང༌།བོད་མིའི་སྒྲིག་འཛུགས་ནས་ཁོང་ཚོར་བོད་མི་ཀུན་ལ་ཐོབ་པའི་ཤེས་ཡོན་དང༌། འཕྲོད་བསྟེན། འགྲུལ་བསྐྱོད་སོགས་ཀྱི་མཐུན་རྐྱེན་སྦྱར་དང་སྦྱོར་བཞིན་པ་ཡིན། དེར་བརྟེན་རང་རེ་མི་ཐོག་རྒན་པ་ཚོས་རང་གི་བུ་ཕྲུག་བརྒྱུད་འཛར་ལ་དོལ་རྒྱལ་གྱི་གནད་དོན་ངོ་མ་ཇི་ཡིན་ངོ་སྤྲོད་འགྲེལ་བཤད་དང་སློབ་གསོ་གནང་དགོས་པ་གལ་ཆེ་ཡིན། ཞེས་སོགས་བཀོད་འདུག
བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་ནང་། ཉེ་ལམ་ཕྱི་ཟླ་ ༡༡ ཚེས་ ༣ ཉིན་གཙུག་ལག་ཁང་དུ་སོག་ཤོད་དང་རོང་པོ་སོགས་ཀྱིས་བརྟེན་བཞུགས་ཕུལ་སྐབས་ཀྱི་བཀའ་སློབ་ཅིག་ལུང་འདྲེན་གནང་དོན། “ད་ཆ་ང་ཚོ་དུས་རབས་ ༢༠ དང་ ༢༡ ནང་སླེབས་ཡོད། འཛམ་གླིང་ཧ་ཅང་འགྱུར་བ་འགྲོ་བཞིན་ཡོད། དེ་འདྲ་ཡིན་དུས་གཉིས་ཕན་གྱི་བསམ་བློ་བཏང་ནས་འགྲོ་རྒྱུ་ཅིག་རེད། དབུ་མའི་ལམ་ཟེར་རྒྱུ་འདི་རེད། དེ་རིང་ཁྱེད་རང་ཚོས་དབུ་མའི་ལམ་གྱི་སྲིད་བྱུས་ལ་ཡིད་ཆེས་གཙང་མའི་ཐོག་ནས་དེའི་རྗེས་སུ་སྐྱོད་བཞིན་ཡོད། དེར་འགྱུར་བ་མེད། ཅེས་བརྗོད་པ་རེད། དེ་ངོས་རང་ཧ་ཅང་དགའ་པོ་བྱུང་། ༸རྒྱལ་བ་རིན་པོ་ཆེ་བོད་ལ་ཤ་ཚ་ཡོད་པ་རེད། བོད་ལ་ཕན་པ་ཞིག་བསམ་བློ་གཏོང་གི་རེད། བོད་ཀྱི་ཆབ་སྲིད་ཀྱི་འགན་འཁྱེར་ནས་ལོ་དྲུག་ཅུ་ཙམ་ལས་ཀ་བྱས་པ་རེད། ད་ཆ་རྒན་ཡོལ་བྱས་ནས་ངོས་རང་ལོ་བརྒྱད་ཅུར་སླེབས་སྐབས་འགྲིག་མ་སོང་ཞེས་ལབ་པ་ཡིན་ན་སྐབས་རེ་བློ་ཏོག་ཙམ་ཕམ་གྱི་འདུག བསམ་པ་རྣམ་དག་བྱས་པ་ཡིན། ད་ཆ་ཡག་བྱུང་ཟེར་རྒྱུའི་ཚབ་ཏུ་འཐུས་ཤོར་བཏང་འདུག ཅེས་ལབ་ན་བློ་ཕམ་གྱི་འདུག ཤེས་སོང་ངམ། དེར་བརྟེན་ང་ཚོའི་རྩ་བའི་ལམ་སྟོན་ཞིག་ཡོད་པ་དེར་ཧུར་ཐག་འབད་ཐག་བྱས་ནས་ཤར་བསྐྱོད་བྱེད་བཞིན་ཡོད་ཅེས་བརྗོད་པ་དེར་ངོས་རང་ཧ་ཅང་དགའ་པོ་བྱུང་། ཐུགས་རྗེ་ཆེ་ཟེར་རྒྱུ་ཡིན་” ཞེས་སོགས་ཐུགས་ཕམ་གྱི་བཀའ་སློབ་སྩལ་དགོས་བྱུང་བ་འདི་བཞིན་བོད་མི་ཡོངས་ཀྱི་ཁོག་པའི་སྙིང་དང་། དཔྲལ་བའི་མིག ཡིད་བཞིན་གྱི་ནོར་བུ་ཞེས་ཞུ་བཞིན་པའི་འདི་ཕྱི་གཏན་གྱི་བཀའ་དྲིན་གྱི་བདག་ཉིད་ཆེན་པོ་གང་ཉིད་བོད་མི་རང་གི་ངོས་ནས་ཐུགས་ཕམ་གྱི་བཀའ་སློབ་ཕེབས་དགོས་བཟོས་པ་འདི་དག་ཧ་ཅང་བློས་འགན་མི་བཟོད་པའི་གནས་སུ་གྱུར་པས་བོད་མི་ཚང་མས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེས་མཛད་ཕྱོགས་དངོས་ཡོད་ཀྱི་ལམ་ནས་གསལ་རྟོགས་ཐུབ་པ་བྱ་རྒྱུ་ཤིན་ཏུ་གལ་ཆེར་མ་ཟད། མགོན་པོ་གང་གི་ཐུགས་རྗེ་བཀའ་དྲིན་དུས་རྟག་ཏུ་ཡིད་ལ་དྲན་ཤེས་དགོས་པ་དང་། བོད་མིའི་སྤྱི་མཐུན་བསོད་ནམས་བཅས་ལ་དགོངས་རྒྱ་ཆེ་བཞེས་མ་ལན་མ་འགྱོད་མེད་པ་གནང་དགོས་པའི་དུས་མཚམས་ངེས་ཅན་ཞིག་ཏུ་སླེབས་ཡོད་པའི་འབོད་སྐུལ་ནན་ཏན་ཞུ་རྒྱུ་ཡིན།
རྒྱ་ནག་མགོ་ཁྲིད་ཚོའི་ངོས་ནས་ཀྱང་སྲིད་བྱུས་མཁྲེགས་འཛིན་ཁོ་ན་མིན་པར་དངོས་ཐོག་བདེན་འཚོལ་ཞེས་ཡང་ཡང་བཤད་དང་ཤོད་བཞིན་འདུག་པ་ལྟར། དོན་དངོས་ལག་ལེན་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རང་རྒྱལ་གཞན་ཕམ་མིན་ཞིང། བོད་རྒྱ་གཉིས་ཕན་དང་། ལྷག་པར་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་གཉིས་སྨན་དབུ་མའི་ལམ་གྱི་སྲིད་བྱུས་འདིའི་ཐོག་ནས་བོད་རྒྱ་གཉིས་ཀའི་དཀའ་རྙོག་སེལ་ཞིང། རྒྱ་ནག་གཞུང་གི་བསམ་འདུན་བོད་དེ་བཞིན་རྒྱ་ནག་དང་ཁ་བྲལ་དུ་འགྲོ་མི་དགོས་ལ། བོད་མིར་བོད་མིའི་ངོ་བོ་དང་། ཆོས་རིག ཁོར་ཡུག་བཅས་རྩ་བརླག་ཏུ་འགྲོ་མི་དགོས་པ་བཅས་ཀྱི་མངོན་འདོད་དེ་དག་བསྒྲུབ་རྒྱུར་བློ་སྟོབས་ཆེར་བསྐྱེད་ཀྱིས་དུས་ཐོག་བསམ་ཤེས་ཐུབ་པ་དགོས་རྒྱུའི་སྐུལ་མ་མུ་མཐུད་བྱ་རྒྱུ་ཡིན། ཞེས་སོགས་བཀོད་འདུག
ཧི་མ་ཅལ་མངའ་སྡེའི་གཞུང་གི་བློན་ཆེན་ཟུར་བ་ལྕམ་སི་མེ་ཊི་སའི་ཝེན་ཅོ་དྷི་རེ་མཆོག་གིས་གསུངས་དོན། ༧གོང་ས་མཆོག་ལ་ནོ་བྷེལ་ཞི་བདེ་གཟེངས་རྟགས་ཕུལ་བ་དེ་བོད་དང་རྒྱ་གར་གཉིས་ཀྱིས་དགའ་སྤོབས་སྐྱེས་དགོས་པ་ཞིག་རེད། ལྷག་པར་དུ་ནོ་བྷེལ་ཞི་བདེ་གཟེངས་རྟགས་ཀྱི་ཕྱག་དངུལ་ཆ་ཚང་སྤྱི་ཚོགས་ཞབས་ཞུ་དང་འབྲེལ་བའི་ཚོགས་པ་ཁག་ལ་བགོས་འགྲེམས་གནང་བ་དེ་ཚོས་༧གོང་ས་མཆོག་གིས་དུས་དང་རྣམ་པ་ཀུན་དུ་རླབས་ཆེ་བའི་སྤྱི་ཚོགས་ཀྱི་ཕན་བདེ་ལ་གཟིགས་ཀྱི་ཡོད་པ་གསལ་བོ་ཞེ་དྲགས་རེད།
བོད་དང་རྒྱ་གར་གྱི་རིག་གཞུང་ནི་ལོ་རྒྱུས་དང་ལྡན་པ་ཞིག་ཆགས་ཡོད་པ་རེད། ཡིན་ཡང་ད་ལྟ་རྒྱ་ནག་གིས་བོད་བཙན་འཛིན་བྱས་ཡོད་པ་རེད། རྒྱ་གར་དང་ཨེ་ཤ་ཡའི་ཆུའི་འབྱུང་ཁུངས་སོགས་བོད་ནང་ཆགས་ཡོད་སྟབས། རྒྱ་ནག་གིས་བོད་བཙན་འཛིན་བྱས་པར་བརྟེན། བོད་ནང་གི་གཙང་ཆུ་སོགས་ཁ་བསྒྱུར་དང་ཆུ་རགས་སོགས་བཟོས་ཏེ་ཨེ་ཤ་ཡའི་ནང་ལ་གྱོང་གུན་ཆེན་པོ་འགྲོ་བཞིན་ཡོད་པ་མ་ཟད། ད་དུང་བོད་ནང་གི་གཏེར་ཁ་མང་པོ་སྔོག་འདོན་བྱས་ཏེ་བོད་བཙན་བཟུང་བྱས་ནས་ད་ལྟ་ཡང་གློད་གྲོལ་གཏིང་གི་ཡོད་པ་མ་རེད། ཡིན་ཡང་བོད་མི་ཚོ་བཙན་བྱོལ་འབྱོར་རྗེས་༧གོང་ས་མཆོག་གིས་བོད་མིའི་སྒྲིག་འཛུགས་བཙུགས་ཏེ་སོ་སོའི་ཆོས་དང་རིག་གཞུང་སྲུང་སྐྱོབ་ཡག་པོ་བྱས་པ་མ་ཟད། རྒྱ་གར་དང་བོད་གཉིས་ཀྱི་མཛའ་འབྲེལ་ཡང་ག་ཚོད་ཡག་པོ་ཡོད་པ་མཐོང་གི་རེད། དཔེར་ན། དེ་རིང་ང་ཚོའི་མཛད་སྒོ་དབུ་འབྱེད་བྱས་པའི་སྐབས་སུ་རྒྱལ་ཁབ་གཉིས་ཀྱི་རྒྱལ་གླུ་གཏིང་གི་ཡོད་པ་རེད། བོད་པའི་སློབ་ཕྲུག་ཚོས་རྒྱ་གར་གྱི་རྒྱལ་གླུ་གཏོང་པ་དང་། དབྱིན་ཇི་དང་ཧིན་དྷུ། ལུང་པའི་ཡུལ་སྐད་བཤད་ཤེས་ཀྱི་ཡོད་པ་སྟེ་ང་ཚོའི་འབྲེལ་བ་དམ་པོ་ཡོད་པ་གསལ་བོ་མཚོན་གྱི་ཡོད་པ་རེད། རྒྱ་ནག་གཞུང་ལ་ཞི་བདེ་དང་ལྷུང་འཇགས་ཤིག་དགོས་ཀྱི་ཡོད་ན། བོད་ནང་གི་འགྲོ་བ་མིའི་ཐོབ་ཐང་ལ་གུས་བརྩི་བྱ་རྒྱུ་གལ་ཆེན་པོ་རེད། ཅེས་སོགས་བརྗོད་སོང་།
གསར་འགོད་པ། འཇིགས་མེད་རྒྱ་མཚོ།
