རྒྱ་ནག་གི་སྲིད་འཛིན་ཞི་ཅིན་ཕིན་གྱིས་རྒྱ་ནག་ནང་ཁྲིམས་འགལ་གྱི་ཕྲུ་གུ་སྐྱེས་ཏེ་ཁྱིམ་ཐོ་རག་མེད་མཁན་རྣམས་ལ་སྤྱི་ཚོགས་ཀྱི་ཐོབ་ཐང་ཁག་སྤྲོད་རྒྱུའི་ཐག་གཅོད་བྱས་ཡོད་ཟེར།
རེས་གཟའ་ལྷག་པའི་ཉིན་གྱི་ཕྱི་དྲོར་རྒྱ་ནག་གི་སྲིད་འཛིན་ཞི་ཅིན་ཕིན་གྱི་གཙོ་སྐྱོང་བྱས་པའི་རྒྱ་ནག་དབུས་རྒྱལ་ཡོངས་བཅོས་བསྒྱུར་འགན་འཛིན་ཚོགས་ཆུང་ཐེངས་ ༡༩ པ་ཚོགས་པའི་སྟེང་། རྒྱ་ནག་ནང་གི་ཁྱིམ་ཐོ་མེད་པའི་བུ་ཕྲུག་ཡོངས་ལ་སྤྱི་ཚོགས་ཀྱི་ཁེ་ཕན་དང་གོ་སྐབས་བསྐྲུན་རྒྱུ་ཡིན་པའི་ཁྱབ་བསྒྲགས་བྱས་ཡོད་འདུག
དེ་རིང་ཧྥ་རན་སིའི་རླུང་འཕྲིན་ཁང་གི་རྒྱ་ཡིག་སྡེ་ཚན་ནང་དུ་གནས་ཚུལ་སྤེལ་བ་ལྟར་ན། རྒྱ་ནག་རྒྱལ་ཡོངས་སུ་ཁྱིམ་ཐོ་ནག་པོ་ཅན་གྱི་མི་སེར་ཁྲི་ ༡༣༠༠ ལྷག་ཡོད་པ་དང་། དེས་རྒྱ་ནག་མི་འབོར་གྱི་བརྒྱ་ཆའི་གཅིག་ཟིན་ཡོད་འདུག
ཁྱིམ་ཐོ་མེད་པ་དང་ཁྱིམ་ཐོ་ནག་པོ་ཡིན་པའི་ཕྲུ་གུ་དེ་དག་ནི། ཕ་མས་ཁྲིམས་འགལ་གྱིས་ཕྲུ་གུ་སྐྱེས་ཏེ་ཁྱིམ་ཐོ་བཟོ་རྒྱུའི་ཐོབ་ཐང་མེད་མཁན་དང་དྭ་ཕྲག་དག་ཆགས་ཡོད་ཅིང་། དེ་ནི་རྒྱ་གཞུང་གི་ཕྲུ་གུ་གཅིག་ལས་སྐྱེས་མི་ཆོག་པའི་སྲིད་བྱུས་འོག་ཕ་མ་ཚོས་ཕྲུ་གུ་ལྷག་མ་སྐྱེ་པར་རྒྱ་གཞུང་གིས་ཁྲིམས་ཆད་ནན་མོ་བཅད་རྗེས། ཕྲུ་གུ་རྣམས་ལ་ཁྲིམས་མཐུན་གྱི་ཤོག་ལེབ་གཅིག་རག་གི་ཡོད་ཀྱང་། དཔལ་འབྱོར་ཆ་རྐྱེན་སྐྱོ་བའི་ཁྱིམ་ཚང་རྣམས་ཀྱིས་ཁྲིམས་ཆད་ལྕི་མོ་འཁུར་ཐུབ་ཀྱི་མེད་སྟབས། ཕྲུ་གུ་རྣམས་ལ་ཁྱིམ་ཐོ་མེད་པར་ནག་པོ་ཆགས་ཀྱི་ཡོད་འདུག
རྒྱ་ནག་གི་ཁྱིམ་ཐོ་མེད་པའི་ཕྲུ་གུ་དེ་དག་ལ་ནམ་རྒྱུན་འཚོ་བའི་ཁྲོད་དཀའ་ངལ་མང་པོ་འཕྲད་ཀྱི་ཡོད། དཔེར་ན། སློབ་གྲྭར་འགྲོ་མི་ཆོག་པ་དང་། གཞུང་འབྲེལ་གྱི་ལས་ཀ་རག་གི་མེད་པ་མ་ཟད། རྒྱལ་ཁབ་གཞན་ལ་འགྲུལ་བཞུད་ཀྱི་ཐོབ་ཐང་ཡང་མེད། ཅེས་བཀོད་འདུག
ཧྥ་རན་སིའི་གསར་ཁང་གིས་ལྟ་ཚུལ་ལྟར་ན། རེས་གཟའ་ལྷག་པའི་ཉིན་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་དངོས་སུ་གཙོ་སྐྱོང་གནང་པའི་ཚོགས་འདུའི་སྟེང་ཁྱིམ་ཐོ་ནག་པོ་ཡིན་པ་རྣམས་ཁྱིམ་ཐོ་བཟོས་ཏེ་སྤྱི་ཚོགས་ཀྱི་ཐོབ་ཐང་ཁག་སྤྲོད་རྒྱུའི་ཁྱབ་བསྒྲགས་བྱས་ཡོད་ཀྱང་། གྲོང་གསེབ་ཁག་ཏུ་སྲིད་བྱུས་དེ་དངོས་སུ་ལག་བསྟར་བྱ་རྒྱུར་དུས་ཡུན་གང་འཚམ་འགར་རྒྱུ་ཡིན་པ་མ་ཟད། ས་ཁུལ་མང་པོ་ཞིག་ལ་འདྲ་མཉམ་གྱི་གོ་སྐབས་དེ་འཐོབ་མིན་ཡང་ད་ལྟའི་ཆར་ཚོད་དཔག་བྱེད་དཀའ་བ་ཞིག་ཡིན་སྐོར་སོགས་བཀོད་འདུག
གསར་འགོད་པ། འཇིགས་མེད་རྒྱ་མཚོ།
