རྒྱ་རིགས་ཁེ་དབང་དོན་གཉེར་བ་དང་ཁྲིམས་རྩོད་པ་པུ་ཀྲེ་ཆང་གིས་སྤྱི་ཚོགས་བརྒྱུད་ལམ་ཁག་ཏུ་རྒྱ་ནག་དམར་ཤོག་པའི་དྲག་གནོན་སྲིད་ཇུས་དང་ངལ་རྩོལ་སྒྲིག་འཛུགས། སྨྲ་བརྗོད་རང་དབང་སྐོར་གྱི་གསལ་བསྒྲགས་ཐེངས་ ༧ ཙམ་སྤེལ་བའི་ཉེས་འཛུགས་འོག་པེ་ཅིན་མི་དམངས་འབྲིང་རིམ་ཁྲིམས་ཁང་གཉིས་པས་ལོ་ ༨ ཁྲིམས་ཐག་བཅད་འདུག
ཨེ་ཕེ་གསར་ཁང་སོགས་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་པེ་ཅིན་མི་དམངས་འབྲིང་རིམ་ཁྲིམས་ཁང་གཉིས་པས་རྒྱ་རིགས་སྤྱི་དམངས་ཁེ་དབང་དོན་གཉེར་བ་དང་ཁྲིམས་རྩོད་པ་པུ་ཀྲེ་ཆང་ (Pu Zhiqiang) ལ་སྤྱི་ཚོགས་བརྒྱུད་ལམ་ཁག་ཏུ་མི་རིགས་བར་འཁོན་འཛིང་བསླངས་པ་དང་དཀྲུག་ཤིང་བཟོས་པ། ལྷག་དོན་རྒྱ་ནག་དམར་ཤོག་ཚོགས་པའི་དབང་སྒྱུར་སྲིད་ཇུས་དང་ངལ་རྩོལ་སྒྲིག་འཛུགས་སོགས་ཐེར་འདོན་བྱས་པའི་ཉེས་འཛུགས་འོག་ལོ་ ༨ ཀྱི་ཁྲིམས་ཆད་གཏན་འབེབས་བྱས་ཡོད་པ་དང་། སྐབས་དེར་དྲག་ཆས་ཉེན་རྟོགས་པས་པུ་ཀྲེ་ཆང་གི་མཐའ་སྐོར་ནས་རྒྱལ་ཁབ་ཕྱི་ནང་གི་རང་དབང་གསར་འགོད་པ་དང་ཁྲིམས་རྩོད་པ་གཅིག་ཀྱང་ཁྲིམས་ཁང་ནང་འགྲོ་རུ་བཅུག་མེད་པ་མ་ཟད། ཁྲིམས་ཁང་གི་ཕྱི་ལོགས་སུ་པུ་ཀྲེ་ཆང་ལ་རྒྱབ་སྐྱོར་གནང་མཁན་རྒྱ་རིགས་མི་མང་བརྒྱ་ཕྲག་མང་པོ་འདུ་འཛོམས་ཀྱིས། “རྒྱ་ནག་ནང་འགྲོ་བ་མིའི་ཐོབ་ཐང་མི་འདུག རྒྱ་ནག་གི་ཉེན་རྟོག་པ་ཚོ་ཇག་ཚོགས་རེད། རྒྱ་ནག་གི་ཁྱི་ལ་ཐོབ་ཐང་འདུག མི་མང་ལ་ཐོབ་ཐང་མི་འདུག” ཅེས་ངོ་རྒོལ་སྐད་འབོད་བྱས་སྐབས། དྲག་ཆས་ཉེན་རྟོག་པས་མི་མང་པོ་འཛིན་བཟུང་བྱས་ཡོད་འདུག
རྒྱལ་སྤྱིའི་ཉེས་ཡངས་ཚོགས་པའི་རྒྱ་ནག་ནང་ཁྲིམས་བཤེར་ཞིབ་འཇུག་པ་ཕ་ཊི་རེ་ཁི་ཕོན་ (Patrick Poon) ཟེར་བ་ཞིག་གིས། པུ་ཀྲེ་ཆང་གིས་འགྲོ་བ་མིའི་ཐོབ་ཐང་འགན་སྲུང་བྱས་པ་ཡིན་སྟབས། རྒྱ་ནག་གཞུང་གིས་ཁོ་ལ་ཁྲིམས་ཐག་བཅད་པ་དེ་ནི་ཆབ་སྲིད་ཀྱི་སྡུག་སྦྱོང་མནར་གཅོད་གཏོང་སྟངས་ཤིག་ཡིན་སྐོར་བརྗོད་འདུག
རྒྱ་ནག་ནང་འགྲོ་བ་མིའི་ཐོབ་ཐང་ལྟ་ཞིབ་ཚན་པའི་ཞིབ་འཇུག་པ་མ་ཡ་ཝང་ (Maya Wang) ཟེར་བ་ཞིག་གིས། པུ་ཀྲེ་ཆང་ལ་ནག་ཉེས་མེད་པ་ཧ་ཅང་གསལ་བོ་རེད། གལ་ཏེ་རྒྱ་ནག་གཞུང་གིས་ཁོ་ལ་ནག་མེད་ཉེས་འཛུགས་བྱས་པ་ཡིན་ན། དེ་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་རྩ་ཁྲིམས་སྣང་མེད་རྡོག་རོལ་བཏང་བ་རེད། ཅེས་བརྗོད་འདུག
དེ་མིན་ཧྲན་ཞི་ཞིང་ཆེན་ནས་ཡིན་པའི་རྒྱ་རིགས་དགེ་རྒན་ཆའུ་པའོ (Qu Biao) ཟེར་བ་ཞིག་གིས། པུ་ཀྲེ་ཆང་ལ་ནག་ཉེས་ཅི་ཡང་མེད་པ་ལོ་རྒྱུས་ཀྱིས་ཐག་ཆོད་ར་སྤྲོད་འབྱུང་གི་རེད། རྒྱ་ནག་གི་རྩ་ཁྲིམས་ཀྱིས་སྨྲ་བརྗོད་རང་དབང་འགན་སྲུང་དགོས་ཀྱི་ཡོད་སྟབས། ཁོང་ལ་ཁྲིམས་མེད་ལུགས་མེད་ཀྱིས་ཁྲིམས་ཐག་གཅོད་པ་ནི་དྲང་བདེན་མིན་པ་དང་རྒྱ་ནག་རང་ཉིད་ལ་ངོ་གནོང་དགོས་པ་ཞིག་ཆགས་ཡོད། ཅེས་སོགས་བརྗོད་འདུག
གནས་ཚུལ་ལྟར་ན། རྒྱ་རིགས་ཁྲིམས་རྩོད་པ་པུ་ཀྲེ་ཆང་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཉེས་མེད་མི་སེར་ལ་དམའ་འབེབས་དང་རྒྱལ་ནང་གི་ཐོན་ཟོག་བདེ་འཇགས། དེ་བཞིན། སྤྱི་ཚོགས་བརྒྱུད་ལམ་དང་གསར་འགོད་རང་དབང་སོགས་ཀྱི་ཁྲིམས་རྩོད་པ་ཞིག་ཡིན་ཞིང་། ཁོང་ཕྱི་ལོ་ ༢༠༡༤ ལོའི་ཕྱི་ཟླ་ ༥ ནང་གནམ་བདེ་སྒོ་མོ་ཆེའི་ཐང་ཆེན་གྱི་དོན་རྐྱེན་བྱུང་ནས་ལོ་ ༢༥ འཁོར་བའི་རྗེས་དྲན་ཚོགས་འདུ་ཞིག་གི་སྟེང་མཉམ་ཞུགས་ཀྱིས། རྒྱལ་ནང་གི་ཆབ་སྲིད་བཙོན་པ་ཚོར་ཁྲིམས་མཐུན་ལུགས་མཐུན་གྱི་ཁྲིམས་ཞིབ་མེད་པར་བཙོན་ཁང་ནང་སྡུག་སྦྱོང་གཏོང་བ་དང་དམའ་འབེབས་བྱེད་པ། ལྷག་པར་དུ་བོད་དང་ཡུ་གུར་གྲངས་ཉུང་མི་རིགས་ས་ཁུལ་ཁག་ཏུ་འཛིན་པའི་དམར་ཤོག་ཚོགས་པའི་དྲག་གནོན་སྲིད་ཇུས་སོགས་ལ་ཐེར་འདོན་བྱས་པའི་ཉེས་འཛུགས་འོག འདས་པའི་ཟླ་བ་ ༩ རིང་བཀག་བསྐྱིལ་བྱས་ཏེ། དེ་རིང་གཞི་ནས་པེ་ཅིན་མི་དམངས་འབྲིང་རིམ་ཁྲིམས་ཁང་གཉིས་པའི་ནང་ལོ་ ༨ ཀྱི་ཁྲིམས་ཐག་བཅད་ཡོད་འདུག་ལ། ཕྱི་ལོ་ ༢༠༡༣ ལོར་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་སྲིད་དབང་བཟུང་བ་ནས་རྒྱ་རིགས་ཁེ་དབང་རྩོད་ལེན་པ་དང་འགྲོ་བ་མིའི་ཐོབ་ཐང་གི་ཁྲིམས་རྩོད་པ། སྤྱི་ཚོགས་བརྒྱུད་ལམ་དང་གསར་འགོད་རང་དབང་སོགས་ལ་སྟངས་འཛིན་དང་དྲག་གནོན་བྱེད་མུས་ཡིན་པ་དང་། དེ་ཡང་གཙོ་བོ་རྒྱ་ནག་དམར་ཤོག་ཚོགས་པའི་དབང་སྒྱུར་སྲིད་ཇུས་སྲ་བརྟན་དང་བརྟན་ལྷིང་ཡོང་ཐབས་ཁོ་ནར་དམིགས་པ་ཞིག་ཡིན་འདུག
གསར་འགོད་པ། པདྨ་རྒྱལ།
