མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

གཞོན་ནུ་ལྷན་ཚོགས་ལ་ལྟ་ཞིབ་བྱས་པ།

བོད་ཀྱི་དུས་བབ།
༢༠༡༥/༡༢/༢༠
Share on FacebookShare on TwitterShare on EmailShare on Whatsapp

གེ་སར་ནོར་བུ་དགྲ་འདུལ།

ང་ཚོས་རིག་པ་དྭངས་གསལ་གྱི་སྒོ་ནས་གཞོན་ནུ་ལྷན་ཚོགས་ཟེར་ན་ཅི་ཞིག་ཡིན་མིན་དང་། ཚོགས་པ་དེའི་ཚུགས་རིམ། ཤུལ་རྗེས། ད་ལྟའི་ཚོགས་པའི་གནས་བབ། ཚོགས་མིའི་གྲངས་འབོར། རྒྱུན་ལས་ཚོའི་ཤེས་ཚད་བཅས་ལ་གཞིགས་ན། གཞི་ནས་ད་ལྟའིགཞོན་ནུ་ལྷན་ཚོགས་ཟེར་བ་ནི་ཡོད་ན་གྲངས་ཀ་ལྷག་མ་ཅིག་དང་། མེད་ན་གྱོང་གུད་མེད་པའི་ཚོགས་པ་ཞིག་ཡིན་པའི་ར་སྤྲོད་རྙེད་ངེས།

 

ངས་སྐད་ཆའི་མགོ་བཙུགས་མ་ཐག་འདི་ལྟར་གླེང་ཡོང་དུས། བློ་གཟུ་བོར་མི་གནས་ཤིང་། ཞེན་ཁོག་ལ་རྒྱབ་བཅོལ་བ་རེ་ཟུང་གིས་ནང་དོན་ཆ་ཚང་ལ་གོ་བ་ལོན་རྒྱུ་ཁག་པོ་དང་། གོ་བ་ལོག་པ་ལེན་མཁན་ཡང་ཡོང་སྲིད། ཡིན་ནའང་། ངས་རེབ་འདིར་གཞོན་ནུ་ལྷན་ཚོགས་གླེང་དུས། རྒྱ་རི་བློ་གྲོས་རྒྱལ་མཚན་སོགས་བར་གནས་ཁག་ཅིག་གི་གླེང་སྟངས་དང་། དེ་བཞིན་གཞོན་ནུའི་ཉེ་བའི་རྒྱུན་ལས་སུ་གཏོགས་པ་རེ་ཟུང་གི་བཤད་ཚུལ། ཡང་ན་སྲང་བར་གྱི་སྐད་ཆ་སྐྱོར་ཐུབ་པ་ཡིན་ན་གཏམ་བཤད་གནང་བ་དང་། བོད་དོན་གླེང་བར་རློམ་པའི་སྐབས་འཚོལ་རིང་ལུགས་པའི་འཆལ་གཏམ་ཡང་འདིར་མ་དྲངས་བར། དངོས་དོན་ཇི་བཞིན་གླེང་རྒྱུ་དེ་ཡིན།

 

ཐོག་མར་གསལ་བོ་བཟོ་དགོས་པ་ཞིག་ནི། གཞོན་ནུ་ལྷན་ཚོགས་ནི་ཆབ་སྲིད་ཀྱི་དམིགས་ཡུལ་ངེས་ཅན་གཞིར་བཟུང་སྟེ་བཙུགས་པ་ཞིག་མ་རེད། ལྷག་པར་ཏུ་མང་གཙོའི་ལམ་སྲོལ་ནང་གི་ཆབ་སྲིད་ཀྱི་ལངས་ཕྱོགས་གང་ཡང་རུང་བར་མཁྲེགས་བཟུང་ཨ་འཐས་བྱེད་ཆེད་བཙུགས་པ་ཞིག་དེ་བས་ཀྱང་མ་རེད། དེ་ནི་བཙན་བྱོལ་དུ་བྲོས་མགོ་ཐོན་མ་ཐག་ནས་ཀྱང་མིན་པར། དེའི་གོང་ལྷ་སར་ཡོད་དུས་ནས། བོད་ལ་ངེས་པར་དུ་གསར་བརྗེའི་ལས་དོན་རིགས་ཤིག་འགྲོ་དགོས་ངེས་ཅན་དང་། དེའི་ངོས་འཛིན་ནང་ན་གཞོན་ཚོས་འགན་ཁུར་དགོས་པའི་བཤད་ཚུལ་དེ་ཡང་ཤུགས་ཆེར་གྲགས་ཀྱི་ཡོད་ལ། དེ་ཙམ་མ་ཟད་བུད་མེད་ཀྱི་ཐོབ་ཐང་དང་བུད་མེད་ཀྱིས་སྤྱི་ཚོགས་ལ་འགན་ཁུར་དགོས་པའི་བསམ་ཚུལ་ཡང་གང་འཚམ་ས་ཁར་བུད་ཡོད་པ་མ་ཟད། གཅེན་མོ་དམ་པ་ཚེ་རིང་སྒྲོལ་མ་སོགས་བུད་མེད་རུ་ཁག་གཅིག་སྐབས་དེར་རྒྱ་ནག་ཏུ་ཚོགས་འདུར་ཞུགས་འདུག སྲིད་དོན་བྱུང་རབས་ཀྱི་ངོས་ནས་བཤད་ན། གཞོན་ནུ་དང་བུད་མེད་འཛུགས་དགོས་པའི་བསམ་བློའི་འཆར་སྣང་གོང་དུ་སྨྲས་པ་འདི་ཙམ་ལས་གཞན་རྒྱུ་མཚན་གང་ཡང་མེད། འོན་ཀྱང་། སྐབས་དེར་རྒྱལ་སྤྱིའི་ཆབ་སྲིད་ཀྱི་འཕོ་འགྱུར་ལ་བོད་མི་དྲག་ཞན་མང་ཆེ་བ་རྒྱུས་མངའ་མེད་པས། བསམ་བློའི་འཆར་སྣང་འདི་ལ་རིགས་པའི་གཞུང་ལུགས་ཀྱི་རྒྱབ་རྟེན་ལས་བཤད་ཡམས་དང་འོལ་ཚོད། ཅལ་འདྲོགས་བཅས་ཀྱི་རྫོང་མཐུག་པོ་ཡོད་པའང་ཁས་མི་ལེན་རང་ལེན་ཡིན།

 

བཙན་བྱོལ་དུ་འབྱོར་རྗེས་༧གོང་ས་མཆོག་གིས་ཆབ་སྲིད་ལངས་ཕྱོགས་ཀྱི་སྐད་ཆ་མིན་པར། གཞན་ཡུལ་ནས་འཐབ་རྩོད་ཀྱི་རྨང་གཞི་ཚུགས་ཐབས་སུ་མཛད་འཆར་ལམ་སྟོན་རིམ་པར་བསྩལ་ཡོད་པའི་ཁྲོད། བོད་པ་མི་རེ་ངོ་རེ་དང་བོད་ཀྱི་གཞོན་ནུ་ཚོས་རྩ་དོན་ལ་འགན་ལེན་དགོས་པའི་བཀའ་སློབ་ཕེབས་པ་གཞིར་བཟུང་། རྒྱ་ནག་ནང་རིག་གསར་སོགས་གནམ་ས་མགོ་རྟིང་སློག་པའི་ཛ་དྲག་གི་སྐབས་དེར། བཙན་བྱོལ་ནས་ལམ་སེང་བོད་ཀྱི་ཆབ་སྲིད་མདུན་ལམ་ཐད་གྲོས་མགོ་འདོན་རྒྱུའི་གྲ་སྒྲིག་གང་ཡང་གནང་ཚར་མེད་ལ། ཚར་ཡོད་ཀྱང་ཞུ་ཡུལ་མེད་པའི་དུས་དེར། སྐྱབས་བཅོལ་དུ་སློབ་གྲྭ་ཁག་ཚུགས་ཐུབ་གཙོས་བཙན་བྱོལ་སྒྲིག་འཛུགས་ཀྱི་རྨང་གཞི་སྲ་བརྟན་ཡོང་བར་དུས་ཚོད་གཏོང་དགོས་པ་སྨྲས་མེད་རེད། སྐབས་དེར་གཞོན་ལྷན་ཡང་གནས་སྟངས་དེ་འདྲའི་འོག་གཙོ་བོ་བོད་མིའི་ངོ་བོ་དང་རིག་གཞུང་། སྐད་ཡིག སྤྱི་ཚོགས་ཞབས་ཞུ་བཅས་སུ་དམིགས་ཏེ་བཙུགས་པ་ཞིག་ལས། རང་བཙན་ནམ་རང་སྐྱོང་གང་གི་དམིགས་ཡུལ་གཙོར་བཟུང་གིས་བཙུགས་པ་ཞིག་མིན་པ་ཚང་མས་ངོས་ལེན་ཞུ་དགོས་ལ། གལ་སྲིད་ངོས་ལེན་མ་ཞུས་ནའང་མིན་པའི་སྒྲུབ་བྱེད་དང་དཔང་རྟགས་གང་ཡང་སྟོན་རྒྱུ་མེད་ཁར། དེ་ལས་ལྡོག་སྟེ་གཞོན་ལྷན་ཐོག་མར་གསར་འཛུགས་ཀྱི་རྨང་གཞི་འདིང་མཁན་ནས་ད་བར་གྱི་རྒྱུན་ལས་ལས་ཟུར་དང་། ཚོགས་པའི་སྒྲིག་གཞི། གྲོས་ཆོད་ཡིག་ཆ་བཅས་ཀྱིས་གསལ་བོར་ར་སྤྲོད་ན། གཞོན་ནུར་ལྟ་ཞིབ་བྱེད་སྐབས་ངེས་པར་དུ་རྒྱབ་ལྗོངས་འདི་དག་ཤེས་རྒྱུ་ནི་གལ་ཆེ།

 

གཅིག གཞོན་ནུའི་ཚུགས་རིམ་དང་དབུས་རྒྱུན་ཟུར་པ་ཁག

 

ད་ལྟའི་གཞོན་ནུ་འདི་དབུས་རྒྱུན་སྐབས ༡༦ འཁེལ་ཞིང་། རྒྱ་རི་བློ་རྒྱན། བཀྲས་མཐོང་བསྟན་དགེ མཛེས་བཅུ་ཚང་བསོད་སྟོབས་སོགས་ཀྱིས་ཐོག་མར་གཞོན་ནུ་དགོས་གལ་དུ་མཐོང་སྟེ་ཚུགས་རིམ་སྐབས་འདིར་བསྐྱར་བཤད་ཞུ་རྩིས་མེད། འོན་ཀྱང་དེང་སང་ཕྱིར་ལྟོས་བྱས་པ་ཡིན་ན་དབུས་རྒྱུན་ཟུར་པ་ཕལ་མོ་ཆེས་རྒྱུ་མཚན་ངེས་པ་རྙེད་དེ་དབུ་མའི་ལམ་ལས་བོད་ལ་ལམ་ཁ་གཞན་མེད་པ་དང་། རང་བཙན་ཟེར་བ་ནི་རྟོག་བཏགས་ཙམ་དང་། སེམས་ཚོར་ཙམ་གྱི་གཞི་རྩས་འགྲུབ་ན་མ་གཏོགས། རྒྱ་བོད་འབྲེལ་བའི་སྲིད་དོན་བྱུང་རབས་མགོ་ཉོག་ཚ་བོ་དེ་དག་དང་། ད་ལྟའི་དངོས་ཡོད་གནས་བབ་གང་ལ་གཞིགས་ཀྱང་རེ་འབྲས་དོན་སྨིན་འབྱུང་རྒྱུ་ལས། ཤེས་བཞིན་ཤི་སྒུག་རྒྱག་པ་ལྟ་བུར་མཐོང་སྟེ། དབུས་རྒྱུན་ཟུར་པ་བརྒྱ་ཆའི་དགུ་བཅུ་བརྒལ་བས་དངོས་ཡོད་གནས་ཚུལ་ཞལ་བཞེས་གནང་ཞིང་། དབུ་མའི་ལམ་གྱི་གཏན་ཚིགས་ལ་ངེས་ཆུབ་བྱུང་བ་རང་གཞན་གཉིས་ཀར་གསལ་འགྲེལ་གནང་མུས་རེད། གནས་ཚུལ་འདི་དག་ལ་ང་ཚོ་རྩ་བ་ནས་གཡོལ་མི་རུང་ལ། རྣ་རྒྱབ་ཀྱི་ལྷག་པར་དེ་བས་ཀྱང་བཏང་མི་རུང་། གང་ཡིན་ཞེ་ན་དབུས་ཟུར་རྣམས་ལ་ཉམས་མྱོང་དང་ཤེས་ཚད་གཉིས་ཀ་གང་ལ་གང་འཚམ་ཐོབ་ཡོད་པ་རེད།

 

གཉིས། གཞོན་ནུའི་ཚོགས་མའི་གྲངས་འབོར།

 

གཞོན་ནུ་ལྷན་ཚོགས་ལ་རྒྱ་བོད་ཕྱོགས་གཉིས་ཀས་རྨོངས་དད་ཀྱི་མིག་ཤེལ་གྱོན་ཏེ་བལྟས་ཡོད། ཡིན་ནའང་། རྒྱ་ནག་གིས་གཞོན་ནུའི་གནས་ཚུལ་མ་ཤེས་མདོག་མདོག་གིས་འགྲེལ་ལོག་རྒྱབ་སྟེ། ཆབ་སྲིད་ཀྱི་རྩེད་མོ་རྩེ་བ་གྲངས་ཀྱིས་མི་ཟིན་པའི་ཚད་དུ་སླེབས་ཡོད། ཆབ་སྲིད་འཐབ་རྩོད་ནང་ཕྱིའི་རྒྱུད་ལམ་ཁག་དང་དོ་སྣང་ཞིབ་ཚགས་ལ་གཞི་མི་བཅོལ་བའི་མི་དམངས་ནང་། ༧གོང་ས་སྐྱབས་མགོན་ཆེན་པོའི་གཟི་བརྗིད་དང་སྟོབས་ཤུགས་ལ་མ་བཟོད་ནས། གཞོན་ནུ་ལྷན་ཚོགས་ཆེན་པོ་དང་ནུས་ཅན་དུ་བཟོས་ཏེ་ཁག་དཀྲི་བསྙོན་འཛུགས་བྱ་ཡུལ་གྱི་ལག་ཆར་བེད་སྤྱོད་གཏོང་བཞིན་པ་ནི་ཚང་མས་ཤེས་གསལ་རེད། དངོས་དོན་དུ་བྱས་ན་དེང་སང་གཞོན་ལྷན་དབུས་སའི་རྒྱུན་ལས་ཀྱི་བཀོད་ཁྱབ་འོག་འགྲོ་ཞིང་། ཚོགས་མི་ཡིན་སྙམ་པའི་འདུ་ཤེས་ཡོད་མཁན་ཚོགས་མི ༡༠༠༠ ཆིག་སྟོང་ཡང་གྲངས་སུ་བརྩི་དགོས་ན་ཧ་ཅང་དཀའ་བའི་གནས་སུ་ལྷུང་ཡོད་པ་འདི་ངེས་པར་དུ་བོད་དོན་ལ་དོ་སྣང་ཡོད་མཁན་ཚང་མས་མཁྱེན་དགོས་པ་རེད། དེ་ནི་རང་སྣང་རང་ལ་མི་དག་ཆེད་བོད་མི་ཚོས་དེ་བས་ཀྱང་ཤེས་དགོས། ཉེ་བའི་ལོ་འགའི་སྔོན་ས་གནས་གཞོན་ནུ་ཁག་བརྒྱད་གཞོན་ནུའི་ཁོངས་ནས་ཕྱིར་འཐེན་གནང་བའི་རྙོག་གླེང་གིས་དེ་བས་ཀྱང་གསལ་བོ་བཟོས་ཡོད་པ་གཅིག་ནི། བཙན་བྱོལ་བོད་མིའི་སྡོད་གནས་རྒྱ་བལ་འབྲུག་གསུམ་གཙོས་ཕྱི་རྒྱལ་ཡུལ་གྲུ་ཁག་ལས་ཚོགས་མིའི་ཨ་མ་རྒྱ་གར་ནང་གི་ཚོགས་མིར་བརྟེན་དགོས་ཀྱི་ཡོད་ལ། དེའི་ནང་ནས་ཀྱང་སྦེལ་ཀོབ་མོན་གྷོ་ལྟ་བུའི་གཞིས་ཆགས་ཆེ་ཁག་ལ་བཅོལ་དགོས་ཀྱང་། གཞོན་ནུའི་དམིགས་ཡུལ་ངོས་འཛིན་གནང་སྟངས་ལ་དབུས་ནས་འགྲེལ་ལོག་རྒྱབ་པར་འདོད་པ་མེད་པས། ས་གནས་ཁག་བརྒྱད་ཕྱིར་འཐེན་གནང་བ་ནི་ཚོགས་མིའི་འབོར་ཆེ་ཤོས་ཀྱི་ས་གནས་ཁག་ཏུ་འཁེལ་ཡོད། སྤྱིར་དེང་སང་དང་སྔ་དུས་གཞོན་ནུ་ཚུགས་མ་ཐག་པའི་སྐབས་ཀྱི་གནས་སྟངས་མི་འདྲ་ལ། རྙོག་གླེང་བྱུང་བ་ནས་དེ་བས་ཀྱང་གཟུ་བོར་གནས་ཏེ་ཞུས་པ་ཡིན་ན། གཞོན་ནུའི་ཚོགས་མིའི་གྲངས་འབོར་གྱི་གནས་བབ་ནི་དབུས་སའི་རྒྱུན་ལས་ཙམ་ལ་བརྟེན་དགོས་ཐུག་ལ་ཉེ་བ་ཡོད།

 

གསུམ། བོད་ཀྱི་གཞོན་ནུ་ལྷན་ཚོགས་ཀྱི་བྱས་རྗེས།

 

སྤྱིར་ཡིན་ན་ང་ཚོས་དང་པོ་ནས་གཞོན་ལྷན་གྱི་བྱས་རྗེར་ལྟ་དགོས་པ་ཡིན་མོད། སྐབས་འདིར་གླེང་བ་ཡིན་ན་དེ་བས་ཀྱང་ར་འཕྲོད་ངེས་སྙམ། ངས་ཚིག་ཉོག་མེད་ལ་ཚིག་ཐག་ཆོད་པོས་ཞུས་ན། གཞོན་ལྷན་གྱི་བྱས་རྗེས་ཆེ་ཤོས་ནི་དམིགས་ཡུལ་དོན་ཚན་བཞི་དོན་འཁྱོལ་དུ་བསྒྱུར་ཐུབ་ཡོད་མེད་བཤད་ཁག་པོ་ཡིན་ཡང་། ཞལ་འདེབས་ཆར་བ་འབབ་འབབ་བསྡུས་ནས་སྤྱི་ཚོགས་ཞབས་ཞུ་མིག་ལ་ཐོགས་པ་གནང་བ་དང་། སེམས་ཚོར་ཙམ་ལ་བརྟེན་ཏེ་རེ་བ་བཅངས་བསྡད་པ་ཚོར་རེ་བ་མི་བརླག་པའི་གཞི་རྩ་ཞིག་བསྐྲུན་ཐུབ་ཡོད་པ་དེ་གཉིས་རེད། གཞན་ཤེས་རིག་རྒྱུད་འཛིན་ཐད་ཐག་རིང་ནས་གླེང་མི་དགོས་པར། གཞོན་ནུའི་དབུས་ཟུར་མང་ཆེ་བའི་རིགས་མྱུག་རྣམས་ཀྱང་འཚོ་ས་ཕྱི་རྒྱལ་དང་། སྐད་ཆ་གཞན་སྐད་མ་སྤྱད་ན་ཁྱིམ་ཚང་ནང་བརྡ་མི་འཕྲོད་པའི་ཚད་དུ་སླེབས་ཡོད། གནད་དོན་འདི་བཙན་བྱོལ་ནང་མཐོ་རིམ་མི་སྣ་མང་ཆེ་བའི་བྱེད་སྟངས་ཤིག་ཆགས་རྒྱུའི་རྟགས་མཚན་གང་སར་ཐོན་ཡོད། དེ་བཞིན་འཐབ་རྩོད་ཀྱི་རང་སྟེང་ནས་དཔྱད་ན་གཞོན་ནུའི་ངོས་ནས་ད་བར་བོད་ཀྱི་སྲིད་དོན་བྱུང་རབས་དང་། རྒྱལ་སྤྱིའི་ཁྲིམས་ལུགས་སོགས་ལ་ཆེད་མཁས་གཞོན་ནུ་གང་ཡང་སྐྱེད་སྲིང་གནང་ཐུབ་མེད་ལ། གཞོན་ནུའི་འཐབ་རྩོད་ཀྱི་རྨང་གདན་དུ་བགྲངས་པའི་རྒྱ་བོད་འབྲེལ་བའི་ལོ་རྒྱུས་བཤད་ཚུལ་ཡོངས་རྫོགས། གཞན་གྱི་གཏམ་བཤད་དང་རྩོམ་ཡིག་བསྐྱར་ཟློས། ཕབ་བཤུ། བསྐྱར་བཤད། བསྐྱར་སྒྲོག་རྐྱང་རྐྱང་ཆགས་ཡོད་པ་ཉི་ཤར་སྦར་མོས་མི་ཁེབས་པའི་ཚུལ་དུ་གྱུར་ཡོད། དེ་བཞིན་རང་བཙན་མེད་ན་སྨྱོ་ཡི་ཡིན་མདོག་སྟོན་པའི་ལྷ་བཟང་ཚེ་རིང་དང་འཇམ་དབྱངས་ནོར་བུ་སོགས་ཀྱིས་ཀྱང་སྒྲིག་འཛུགས་རང་ལ་བྱས་རྗེས་བཞག་པའི་ཤུལ་རྗེས་མཐོང་ཡུལ་དུ་མེད་ལ། དེ་ལས་ལྡོག་སྟེ་ལས་ཐོག་སྐབས་རང་གི་འཚོ་བའི་མདུན་ལམ་ཐག་གཅོད་ཡག་པོ་བྱས་ཐུབ་འདུག་སྟེ། དེང་སང་ངྷ་རམ་ཤཱ་ལར་ཁང་བརྩེགས་དང་ས་ཆ་མི་ལ་བོགས་མར་བཏང་སྟེ། ཕ་ཡུལ་མེད་པ་དང་སྐྱབས་བཅོལ་བ་ཡིན་པའི་ཚོར་སྣང་རང་སྟེང་ནས་ཡལ་བཅུགས་ཏེ་བདེ་སྐྱིད་ཀྱི་འཚོ་བ་རོལ་བཞིན་པ་སུས་ཀྱང་བསྙོན་དུ་མེད།

 

བཞི། བར་སྐབས་གཞོན་ལྷན་ལ་སྤྱི་ཚོགས་ནང་ཆེ་མཐོང་མེད་པ་ཆགས་དོན།

 

གཞོན་ནུའི་དབུས་རྒྱུན་སྐབས ༡༤ དང ༡༥ པའི་སྐབས་ནས་ནང་ཁུལ་མ་མཐུན་པས་དུས་ཚོད་མང་པོ་གཏོང་དགོས་ཐུག་ཡོད་ཅིང་། ཚེ་དབང་རིག་འཛིན་དང་དོན་གྲུབ་ལྷ་དར་གྱི་སྐབས་སུ་ཕྱོགས་གཉིས་འགལ་བ་རྣོ་ངར་ཅན་དུ་ཆགས་ཏེ། གནད་དོན་ཆེ་ཕྲ་གང་ཞིག་ཐག་གཅོད་བྱེད་ཐབས་ལ་ནང་ཁུལ་ཤོག་ཁ་གཉིས་མ་འཆམ་པས་དུས་ཚོད་ཕུད་པ་དང་། ཕྱི་ལ་གདོང་པ་སྟོན་སྟངས་ནི་དམིགས་བསལ་དབུ་མའི་ལམ་གྱི་སྣེ་ཁྲིད་མི་སྣ་ཚོར་”གདོང་རྩེ་ཁ་སྤྲོད་’’༼ཚིག་འདི་དོན་གྲུབ་ལྷ་དར་གྱིས་དངོས་སུ་གསར་འགོད་གསལ་བསྒྲགས་སྟེང་བཤད། མཆན། ༽ཀྱི་རྣམ་འགྱུར་བསྟན་ཅིང་། ཚོགས་པའི་ལས་འགུལ་དང་གཏམ་བཤད། བགྲོ་གླེང་གང་སར་༧གོང་ས་མཆོག་ལ་མཚན་སྨོད་ཞུ་མཁན་ཚོར་སྤྱང་ཀིར་རྣ་ཙོར་དང་། རྐུན་མར་དཔའ་དར་འཐེན་པ་ལྟར་མཁས་དབང་དང་ཉམས་ཞིབ་པ་སོགས་ཀྱི་མིང་བཏགས་ནས། མི་སྣ་དེ་དག་གི་གཏམ་བཤད་ཀྱིས་སྤྱི་ཚོགས་ག་ཚོད་དཀྲུགས་མིན་ཤར་ཕྱོགས་ཁུག་རྟ་གཙོས་མང་དག་ཅིག་གིས་རྩོམ་དུ་གསལ་འགྲེལ་གནང་འདུག་པས་དེར་གཟིགས། དེ་བཞིན། རྒྱལ་སྲིད་རྩིས་སྤྲོད་ཀྱི་སྐབས་ཚད་ལས་བརྒལ་བའི་གྲོས་ཆོད་དང་བསྒྲགས་གཏམ། རང་བཙན་དུས་དེབ་སྟེང་ཐལ་ཆ་ཆེ་བའི་རྩོམ་སྒྲིག་པའི་གཏམ་སོགས་བྲིས་པ། ཧ་ཅང་ཞེད་སྣང་བྱེད་དགོས་པ་ཞིག་ནི་རང་བཙན་གྱི་ཚིག་འདིར་འཐམས་ཏེ། དེའི་སྟེང་ཁ་མཐུན་ཁུལ་གྱིས་བར་ལམ་ཆུ་བཞི་སྒང་དྲུག་གི་བསམ་ཚུལ་གཞོན་ནུའི་ནང་སིམ་འཛུལ་བྱས་ཏེ། གཞོན་ལྷན་ནང་ཁུལ་འཐོར་བཤིག དབུས་སའི་བར་དུ་དམ་གྲིབ། ༧གོང་ས་ཆེན་པོས་མཇལ་ཁ་མ་གནང་བ་སོགས་ལ་བརྟེན་ནས་བྱུང་བ་ས་རིས་ཐང་གསལ་རེད་འདུག་པས། བོད་མི་སྤྱི་དང་གཞོན་ནུར་ཤ་ཚ་ཡོད་མཁན་ཚོས་བྱུང་རབས་ཀྱི་བྱས་ཉེས་འདི་ཐེར་འདོན་གནང་སྟེ། ལམ་ནོར་ལྡོག་ཤེས་ཅི་ལྟར་བྱེད་དགོས་མིན་ལ་བསམ་ཞིབ་ཚད་ལྡན་བྱེད་དགོས་པ་ཞུ་ག་ལ་དགོས།

 

ལྔ། གཞོན་ནུའི་དམིགས་ཡུལ་ཐད་ཀྱི་གླེང་རྙོག

 

གཞོན་ནུའི་དམིགས་ཡུལ་ལམ་རྩ་འཛིན་དོན་ཚན་བཞི་ཅན་དེ་གཏན་འབེབས་གནང་དུས་དང་། ད་ལྟའི་ཁོར་ཡུག་དང་གནས་བབ་གང་ཅིར་འགྱུར་བ་ཐེབས་ཟིན་པ། ཕྱོགས་ཡོངས་ནས་མི་འདྲ་བ་ངེས་པར་དུ་ཁས་ལེན་ཞུ་དགོས། གོང་དུ་གླེང་སློང་ནང་བཤད་པ་བཞིན། དོན་ཚན་བཞི་ལ་དཔྱད་ན་གཞོན་ནུའི་དམིགས་ཡུལ་ཆོས་དང་རིག་གཞུང་། སྐད་ཡིག་རྒྱུད་འཛིན། སྤྱི་ཚོགས་ཞབས་ཞུ། བཟང་སྤྱོད་སོགས་༧གོང་ས་ཆེན་པོའི་དགོངས་གཞི་ལྟར”་བོད་གཞུང་འབངས་”ཀྱི་བདེ་རྩར་ཕན་ཐབས་སྲི་ཞུ་སྒྲུབ་རྒྱུ་ཡིན་པ་དེ་ཧ་ཅང་གསལ་བོ་རེད། འོན་ཀྱང་། ད་ལྟའི་གཞོན་ནུའི་ལས་དོན་བྱེད་ཕྱོགས་དང་དོན་ཚན་བཞི་གཉིས་བར་ཧེ་བག་ཆེན་པོ་དང་། འགལ་ཟླ་མངོན་སུམ་ཡོད་པ་རིག་པས་སྒྲུབ་ཐུབ་པས། ཨུ་ཚུགས་དང་བསྐྱར་བཤད་བྱས་པས་མི་ཕན་པའང་གསལ་བོ་རེད། མང་གཙོའི་ཁེ་དབང་དང་འོས་འགན་ལོངས་སུ་སྤྱོད་སྐབས། བསམ་ཚུལ་མཐུན་དང་མི་མཐུན་པ་ཡོང་ངེས་ནའང་། བསམ་ཚུལ་སྣ་ཚོགས་ཡོང་ཆོག་པ་ཙམ་གྱིས་བསམ་ཚུལ་དེ་དག་༧གོང་ས་མཆོག་གི་ཆབ་སྲིད་དགོངས་གཞི་དང་འགལ་མེད་པ་སུས་ཀྱང་སྒྲུབ་མི་ཐུབ། ༧གོང་ས་མཆོག་གིས་གཞོན་ལྷན་སོགས་ལ་རྟག་ཏུ་ལངས་ཕྱོགས་གང་ཞིག་འཛིན་པར་རང་དབང་ཡོད་པ་བཀའ་གནང་གི་ཡོད་པ་དང་། དེར་ཡོང་ཆོག་པའི་ངོས་འཛིན་གནང་བའི་ཞོར་དུ། ༧གོང་ས་མཆོག་རང་ཉིད་དབུ་མའི་ལམ་ལ་ཕེབས་དགོས་པའི་བརྟག་དཔྱད་རིམ་པར་གནང་བའི་རྒྱུ་མཚན་རྣམས་རིག་པ་དང་དངོས་ཡོད་གནས་ཚུལ་གྱིས་རྒྱན་ཏེ་བཀའ་གནང་གི་ཡོད་པ་ཀུན་གྱིས་ཤེས་གསལ་ཡིན་པས། གསལ་བོ་ཤེས་དགོས་པ་ཞིག་ནི། རང་བཙན་བརྩད་དེ་བོད་མིའི་མདུན་ལམ་ལ་བསམ་བློ་གཏོང་བའི་ཆབ་སྲིད་ཀྱི་རྣམ་འགྱུར་དེ། ༧གོང་ས་མཆོག་གི་བོད་མིའི་མདུན་ལམ་རྩོལ་སྒྲུབ་གནང་བའི་ཆབ་སྲིད་ཀྱི་དགོངས་གཞི་དང་ཡོངས་སུ་འགལ་བ་ཡིན། དེའི་རྐྱེན་རང་བཙན་བརྩད་དེ་བོད་མིའི་མདུན་ལམ་ལ་བསམ་བློ་གཏོང་བའི་ཆབ་སྲིད་རྣམ་འགྱུར་ལ་མང་གཙོའི་རིང་ལུགས་ཀྱི་ཆ་ནས་དབུ་མའི་ལམ་གྱི་རྗེས་འཇུག་པ་ཚོས་གུས་བརྩི་ཞུ་དགོས་ཀྱང་། ཆབ་སྲིད་ཀྱི་རྣམ་འགྱུར་དེ་དབུ་མའི་ལམ་དང་ཡོངས་སུ་འགལ་ཟླ་ཡིན་པ་ངེས་པར་དུ་ངོས་འཛིན་གསལ་བོ་གནང་དགོས། བོད་མིའི་བདེ་དོན་བཤད་ཀྱི་ཡོད་སྐོར་གྱི་ལྐུགས་པའི་ཞེན་ཁོག་ལ་ཁ་གཡར་ཏེ་དེ་གཉིས་ལ་འགལ་ཟླ་མེད་པ་ལྟ་བུར་སྒྲོ་བཏགས་ན། ཆབ་སྲིད་དང་ཁྲིམས་དོན། དངོས་ཡོད་གནས་ཚུལ་གསུམ་གྱི་མདུན་སར་བྱབ་ཆུང་ཡིན་པ་ཕྱོགས་གླང་ཆོས་གྲགས་སླེབས་ཀྱང་དགག་མི་ཐུབ་པ་གསལ་བོ་ཡིན་པས། དམིགས་ཡུལ་དོན་ཚན་བཞི་ལ་ངེས་པར་དུ་འགྱུར་བ་བཏང་སྟེ། ཁ་ལག་མཚུངས་པའི་ཚོགས་པ་ཞིག་ཏུ་དུས་བསྟུན་བསྒྱུར་བཅོས་ཀྱིས་རྗེས་ལུས་ཐེབས་པའི་གནས་ཚུལ་རྣམས་འཕྲལ་དུ་ཡོ་སྲང་ཞུ་དགོས་པ་ཅི་ལ་མིན།

 

དྲུག སྐབས་བབ་རྙོག་གླེང་དག་དང་འབྲེལ་ཏེ་མཇུག་བསྡུ་བ།

 

སྲིད་སྤྱིའི་སྔོན་འགྲོ་དང་དངོས་གཞིའི་བར་གྱི་དུས་ཚོད་འདི་དང་བསྟུན་ཏེ། ཨ་རིའི་བོད་སྐད་རླུང་འཕྲིན་ཁང་སོགས་གསར་འགྱུར་གྱི་མུ་གེ་ཐེབས་པའི་གསར་ཁང་དུ་རློམ་པ་རེ་ཟུང་གིས། ནེའུ་ཡོག་དང་ནེའུ་ཇེ་སིའི་ས་གཞོན་སྒོ་རྒྱབ་པ་ཞེས་གླེང་ནའང་། མི་དམངས་ལ་གནས་ཚུལ་ངོ་མ་སྤྲོད་ཀྱི་མེད་ཁར། སྒྲིག་གཞི་གཞིར་བཟུང་ས་གནས་ཁག་གི་རེ་འདུན་སྒྲུབ་ཐུབ་ཀྱི་མེད་པའི་གནས་ཚུལ་ཡང་གསལ་ཁ་བྱེད་ཐུབ་ཀྱི་མེད། གསར་འགོད་པ་དང་བཅའ་འདྲི་ཞུ་མཁན་ཚོས་གནས་ཚུལ་གྱི་རྒྱབ་ལྗོངས་ངོ་མར་རྒྱུས་ལོན་བྱས་ཚུལ་ཧ་ཅང་སྐྱོ་བོ་ཡོད་པ་ནི། ལས་གནས་སྟེང་ཉི་མ་ཕུད་ཐུབ་བྱེད་པ་མཚོན་ནའང་། ལྡོག་ཕྱོགས་ནས་མི་མང་ནང་མགོ་མ་འཚོས་པའི་བཤད་ཡམས་དཀྲོགས་གཏམ་མང་པོ་ཞིག་སྤེལ་གྱི་ཡོད། དངོས་དོན་དུ་བྱས་ན། ས་གནས་གང་ཡང་རུང་བ་ནས་དབུས་ཀྱི་ཁོངས་ནས་ཕྱིར་འབུད་པའམ། དབུས་ཀྱི་ལངས་ཕྱོགས་ལ་འགྱུར་བ་གཏོང་བའི་རེ་འདུན་བཏོན་ཆོག་པ་མང་གཙོའི་སྒྲིག་གཞི་ཚང་མར་ཁྱབ་མཉམ་དུ་ཡོད་པའི་ཐོབ་ཐང་ཞིག་ཡིན་ལ། ནེའུ་ཡོག་དང་ནེའུ་ཇི་སི་སོགས་ས་གཞོན་ཚོས་དབུས་རྒྱུན་སྐབས་འདི་དང་ལྷག་པར་ཚོགས་གཙོ་འདིའི་འཐུས་ཤོར་རྣམས་ལ་ཐེར་འདོན་ཚུལ་བཞིན་གནང་ཡོད་ཀྱང་། དེ་དག་མི་མང་ལ་ཡོངས་བསྒྲགས་གང་ཡང་བྱས་མེད། དབུས་ལ་ས་གནས་སྒོ་རྒྱག་རྒྱུའི་དབང་ཚད་ཡོད་ན། ས་གནས་དབུས་ཁོངས་ཕྱིར་འཐེན་བྱེད་པའི་དབང་ཚད་ཅི་ལ་མེད་དམ། ས་གནས་སྒོ་རྒྱབ་པ་ལ་བརྟེན་ནས་ཅ་དངོས་རྩིས་སྤྲོད་བྱེད་དགོས་ཟེར་བ་ནི། མཐར་གཏུག་ན་གཞོན་ནུ་ལྷ་ཚོགས་ཀྱི་གདོང་རུས་གསལ་བོར་སྟོན་བྱེད་ཅིག་སྟེ། དབུས་སའི་རྒྱུན་ལས་ཚུགས་ཐུབ་པ་ཙམ་གྱི་མཐུན་རྐྱེན་འཛོམས་པ་ཡིན་ན། ཁོ་ཚོའི་མི་ཚེ་འགྲོ་ཡི་ཡོད་ཅིང་། བོད་ཟེར་ན་ས་ཡ་དང་བཏུང་ཡ་ག་རེ་ཡིན་མིན་ཤེས་རྒྱུ་ཅི་ལྟར་ཡང་། གཞོན་གཞོན་མང་པོ་ཞིག་འཚང་ཁ་རྒྱག་ས་རེག་སོང་ན་འགྲིག་གི་ཡོད་པ་དེ་ལས་བརྒལ་བའི་དམིགས་ཚད་དང་ལམ་སྟོན་གནང་ཐུབ་མཁན་ཡོང་གི་མེད་པ་གསལ་བོ་རེད། དེའི་ཆ་ནས་དངོས་དོན་དུ་བྱས་གཞུང་ཞབས་དང་གཞོན་ལྷན་སོགས་ཀྱི་སྡིངས་ཆ་འདི་དག བྱེས་སུ་སྐྱེ་བའི་གཞོན་པ་སྐོར་ཞིག་གི་མི་ཚེའི་འཚོ་ཐབས་གཉེར་སར་མི་འགྱུར་བའི་ངེས་པའང་གང་ཡང་མི་འདུག་སྙམ་པས། སྐད་ཆ་གླེང་སློང་བའི་སྐབས་ཞུས་པ་བཞིན།

 

གཞོན་ནུ་ལྷན་ཚོགས་འདི་ཡོད་ན་གྲངས་ཀ་ལྷག་མ་ཞིག་དང་མེད་ན་གྱོང་གུད་མེད་པའི་ངོ་བོར་གྱུར་ཚར་བ་ནི་གསལ་བོ་རེད། དེའི་ཆ་ནས་ཆབ་སྲིད་ཀྱི་ལངས་ཕྱོགས་ཀྱི་རྩོད་རྙོག་གང་ཡང་མེད་པར། གངས་ལྗོངས་གཞོན་ནུའི་ནུས་སྟོབས་སྤུངས་སའི་སྡིངས་ཆ་ཞིག་སྟེ་དོན་དམ་པའི་༼ གངས་ལྗོངས་གཞོན་ནུ་ལྷན་ཚོགས་༽ཟེར་བ་ཞིག་ཟུར་དུ་དབུ་འཛུགས་ཐུབ་ན་དུས་ཀྱི་དགོས་མཁོར་མཐོང་བ་བཅས་སོ།།

༢༠༡༥། ༡༢། ༡༩། ཉིན།།

འབྲེལ་ཡོད་གསར་འགྱུར།

Mobile App

བཙན་འོག་གི་གྲོས་མཐུན་དོན་ཚན་ ༡༧ ནུས་མེད་ཆགས་པ་རྒྱལ་སྤྱིའི་ཐོག་ཁ་གསལ་བཟོ་དགོས།

༢༠༢༥/༠༥/༢༣
དབྱིན་ཇིའི་རྒྱལ་ཁབ་སི་ཀོ་ཊི་ལན་ཌིས་༧གོང་ས་མཆོག་གི་ཡང་སྲིད་ཀྱི་གནད་དོན་ཐད་ལངས་ཕྱོགས་གསལ་བོ་བཟོས་འདུག བོད་ཀྱི་དུས་བབ་གསར་ཁང་གིས་པར་སྒྲིག་སྦྱོར་བྱས། ༢༠༢༥།༥།༢༣
Mobile App

སི་ཀོ་ཊི་ལན་ཌིས་༧གོང་ས་མཆོག་གི་ཡང་སྲིད་ཀྱི་བདག་དབང་ཐད་ལངས་ཕྱོགས་བརྟན་པོ་བཟོས་འདུག

༢༠༢༥/༠༥/༢༣
ཧཱ་ཝར་ཌི་གཙུག་ལག་སློབ་གཉེར་ཁང་། དྲ་ལམ་གྱི་པར།
Mobile App

ཧཱ་ཝར་ཌི་གཙུག་ལག་སློབ་གྲྭར་རྒྱལ་སྤྱིའི་སློབ་མ་བཀག་སྡོམ་གནང་འཆར་ཡོད་འདུག

༢༠༢༥/༠༥/༢༣
དྷ་ས་ས་གནས་མགོ་འཛིན་དཀོན་མཆོག་མིག་དམར། དུས་བབ་ཀྱི་པར། ༢༠༢༢།༦།༤
Mobile App

དཀོན་མཆོག་མིག་དམར་ལགས་བསྐྱར་དུ་དྷ་ས་ས་གནས་མགོ་འཛིན་དུ་འདེམས་ཐོན་བྱུང་།

༢༠༢༥/༠༥/༢༣
བོད་ཀྱི་གནས་མཆོག་གངས་རིན་པོ་ཆེ། དྲ་ལམ་གྱི་པར།
Mobile App

རྒྱ་གར་གྱི་གནས་མཇལ་བ་ ༧༥༠ གངས་རིན་པོ་ཆེར་གནས་མཇལ་དུ་གཏང་རྒྱུ་ཡིན་འདུག 

༢༠༢༥/༠༥/༢༢
༸གོང་ས་མཆོག གསར་འགྱུར།

ཡེ་ཤུ་ཆོས་དཔོན་ཕོབ་ལེའོ་མཆོག་ལ་༧གོང་ས་མཆོག་དང་ལྷན་དུ་མགྱོགས་མྱུར་མཇལ་འཕྲད་གནང་བའི་འབོད་སྐུལ་ཞུས།

༢༠༢༥/༠༥/༢༢

མཆན། 3

  1. amadolma says:
    ལོ་ 9 སྔོན།

    གེ་སར་ནོར་བུ་དགྲ་འདུལ་ལགས།་་་སྐུ་ཉིད་ཀྱི་རྩོམ་ཡིག་འདི་ལོ་རྒྱུས་ཀྱི་བྱུང་རིམ་དང་ད་ལྟའི་གནས་བབ་བཅས་ལ་གཅིག་ནས་གཉིས་སུ་འགྱེད་པས་དབྱེར་ཞིབ་ནན་པོ་གནང་སྟེ་དངོས་ཐོག་བདེན་འཚོལ་གྱིས་བྲིས་འདུག་པར་རྒྱབ་སྐྱོར་ཞུ་འོས་ངེས་རེད།་་་མདོར་ན།་་་ད་ལྟའི་གཞོན་ལྷན་ནི་ངོ་བོ་འགྱུར་ཏེ་ངན་པ་ཆགས་པ་མ་ཟད།་་་རང་དོན་ཁོ་ན་སྒྲུབ་མཁན་གྱི་སྤུ་མེད་ཕག་པ་ཁྱུ་གཅིག་གི་ལག་ཆ་གྱུར་ཟིན་པ་རེད།་་་དེ་བཞིན་དགུ་བཅུ་གསུམ་ཚོགས་པའང་དེ་ལྟར་ཆགས་རྒྱུའི་ཉེན་ཁ་མེད་པ་མ་རེད།་་་་དེ་ནི་སྔ་མོའི་གཏམ་དཔེར་ཕ་ཙན་དན་གདོང་པོ་ལ་བུ་ཆུ་ཤིང་གོག་ཏོ་ཟེར་བ་དེ་དང་ཅི་མ་མཚུངས།་་་ཡང་གཅིག་ཞུས་ན།་་་ཁ་ནས་རང་བཙན་ཟེར་བ་ཙམ་ལས་དོན་དུ་དངུལ་དངོས་ཀྱི་ཁེ་ཕན་ཆེད་དུ་ཕ་རོལ་དགྲ་བོའི་རྐུབ་གཡོག་རྒྱུགས་མི་སྲིད་པ་ག་ལ་ཡིན།་་་ཉེ་ཆར་པེ་ཅིང་གི་བོད་རིག་པ་མཁས་ཅན་འཇམ་དཔལ་ལགས་ཀྱིས་རྩོམ་ཡིག་ནང་དུ།་་་རྒྱ་རྒན་ཀྲུའུ་ཝན་ཆོན་ཅན་གྱིས་ཁ་བྲལ་རིང་ལུགས་པར་དངུལ་འབོར་ཆེན་སྤྲོད་ཀྱི་ཡོད་པ་རེད་ཅེས་ཡོངས་གྲགས་སུ་ཐེར་འདོན་བྱས་འདུག་པ་དེ་ནས་རྟོག་ནུས།་་ཨ་མ་རྒན་མོས།

    Reply
  2. པ་སངས་ཚེ་རེང་ says:
    ལོ་ 9 སྔོན།

    ཐོག་མར་ད་རེས་ཀྱི་རྙོགས་གླེང་དེའི་སྟེང་གི་རྩོམ་འབྲི་མཁན
    གེ་སར་ནོར་བུར་སྙིང་དབུས་ནས་ཐུགས་རྗེ་ཆེ་ཞུ་རྒྱུ་ཡིན་རྒྱུ་མཚན་གཙོ་བོ་ནི་ང་རང་གི་གནས་ཚུལ་ཅལ་སྒྲོགས་གི་གསར་འགྱུར་ཁང་ནས་སྤེལ་མ་ཐག་མེ་འགའི་གནས་ཚུལ་བཀོད་པ་དེའི་སྟེང་ཐེང་འགའ་འདི་འདྲ་བའི་ཟིན་བྲིས་བྱས་བཏབ་ཀྱང་ནག་སུབ་བཏང་གི་འདུག་ཡིན་ནའང་གསལ་པོ་བྱས་ནས་ཞུ་ཡག་ཞིག་ལ་ད་རེས་ཀྱི་བྱེད་སྟངས་དེས་སླད་ཕྱིན་ནིའུ་ཡོག་དང་ནིའུ་ཇར་དེ་མེན་བཙན་བྱོལ་ནང་གི་རྒྱ་བལ་འབྲུག་གསུམ་ནང་གངས་ལྗོངས་གཞོན་ནུ་ཞིས་གང་མགྱོགས་བཙུགས་ཐུབ་ན་བོད་མི་ས་ཡ་དྲུག་གི་ཆེད་ལས་དོན་ད་ལྟ་ཡོད་པའི་གཞོན་ལས་ཚགས་ཚུད་ཡོང་ངེས་ཡིན། དེར་རྟེན་ནིའུ་ཡོག་དང་ནིའུ་ཇར་སི་ནས་གངས་ལཇོངས་གཞོན་ནུ་ཞེས་གང་མགྱོགས་བཙུགས་ཐུབ་ན་ལེགས་པར་མཐོང་།

    Reply
  3. ཐོས་པ་དགའ། says:
    ལོ་ 9 སྔོན།

    གེ་སར་ནོར་བུ་དགྲ་འདུལ། ལགས་ཀྱིས་ཧ་ཅང་ཡག་པོ་བྲིས་འདུག དེང་སང་རང་བཙན་ཁ་ལ་ཁྱེར་ནས་མི་ངན་གཞོན་སྐྱེས་ཧོར་རྒྱུགས་དང་གཞན་གྱི་ཟེར་རྗེས་འགྲང་མཁན། ཁ་ཕྱོགས་དང་དམིགས་ཡུལ། ལངས་ཕྱོགས་དང་འཆར་གཞི། གདེང་ཚོད་དང་ལྟ་བ་མེད་པའི་མགོ་སྟོང་གང་མང་ཞིག་འདྲེ་ཐེའུ་རང་ནང་བཞིན་ཆབ་སྲིད་ཀྱི་གདེང་ཆའི་སྟེང་མཆོང་ལྡིང་བྱེད་བཞིན་པ་ནི་དགྲ་གཉེན་སྡུག་རང་རེད། དཔེ་མཚོན་ཅིག་བགྲང་ན། ཀླུ་བྱམས་དང་དེའི་རྒྱབ་སྐྱོར་བ་མགོ་སྟོང་ཚོ་དང་། ད་དུང་གང་ཡང་མི་འགྱོན་ཅི་ཡང་མི་ཤེས་པའི་རྡ་སའི་མགོ་རས་དམར་གྱིས་གཏུམས་པའི་བསྟན་བརྩོན་དང་། དེའི་རྒྱབ་ནས་དུས་རྟག་ཏུ་སེམས་ཚོར་ཙམ་གླེང་མཁན་ཚོ་བཤད་མ་དགོས་པ་རེད། འདི་དང་འདི་ལྟ་བུ་རིགས་གཅིག་རེད།
    རིགས་གཉིས་པ་ནི། འཇུ་ཆེན་གྱི་ཕྱོགས་ནས་ལངས་ཡོང་བའི་སྤྲུལ་མིང་འཛིན་པ་ཨོརྒྱན་སྟོབས་རྒྱལ་སོགས་སོགས་ཀྱང་ཁྱི་སྤྱང་ངན་འབྲེལ་བྱེད་ཀིན་པ་མཐོང་དུས་སེམས་གཏེང་ནས་ཞེན་པ་ལོག་ཀི ད་རྒྱ་ནག་གི་རིག་གནས་གསར་བརྗེས་ཟེར་པ་དེ་བཙན་བྱོལ་ནང་རོང་ལངས་རྒྱག་མགོ་བརྩམས་སོང་། མགོ་འཇམ་ནོར་སོགས་ཀྱིས་བཙུགས། རྒྱུན་ཀླུ་བྱམས་སོགས་ཀྱིས་བསྐྱངས་ནས་ས་ལྡིང་གནམ་ལྡིང་བྱེད་ཚུལ་ལ་ལྟོས་དང་། ད་མི་མང་གཉིད་སད་རན་འདུག

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese