དྲག་སྤྱོད་པར་ལྐོག་འབྲེལ་བ་ཡོད་པ་དག་འཛིན་བཟུང་།

པ་ཀི་སི་ཐན་ནང་གི་ཁ་ཆེའི་བུད་མེད་འབྱོར་ལྡན་སྐོར་ཞིག་གིས་ཤར་དཀྱིལ་ཁ་ཆེ་འཇིགས་སྐུལ་དྲག་སྤྱོད་པར་དངུལ་དངོས་ཀྱི་རྒྱབ་རོགས་རོགས་དང་། པ་ཀི་སི་ཐན་ནས་སྐྱེས་དམན་ཡང་ཐབས་འཚོལ་བྱེད་བཞིན་ཡོད་པ་ཤེས་རྟོགས་བྱུང་འདུག

ཁ་སང་རྒྱ་གར་གྱི་ཚོང་ལས་དྲ་བས་གནས་ཚུལ་སྤེལ་བ་ལྟར་ན། པ་ཀི་སི་ཐན་ཀཱ་ར་ཆཱི་གྲོང་ཁྱེར་གྱི་ཉེས་དོན་ཉེན་རྟོག་པས། ཉེ་བའི་ལོ་ཤས་རིང་གྲོང་ཁྱེར་གྱི་འབྱོར་ལྡན་བུད་མེད་ ༢༠ ཡིས་ཨི་རག་དང་སི་རེ་ཡའི་མཉམ་འབྲེལ་དྲག་སྤྱོད་ཤོག་ཁག་ (IS) ལ་རྒྱབ་སྐྱོར་བྱས་ཏེ། ཁོ་ཚོར་གོ་མཚོན་ཉོ་ཆེད་དཔལ་འབྱོར་གྱི་མཐུན་རྐྱེན་སྦྱར་ཡོད་པ་མ་ཟད། དྲག་སྤྱོད་པར་མནའ་མ་བཙལ་ནས་ཁོ་ཚོའི་བག་མར་བཏང་དང་གཏོང་མུས་ཡིན་པ་སོགས་ཀྱི་གནས་ཚུལ་ཤེས་རྟོགས་བྱུང་སྟེ། ད་ལྟ་གྲོང་ཁྱེར་ཡོངས་ལ་དམ་དྲག་བྱས་ནས་བུད་མེད་དེ་དག་འཛིན་བཟུང་བྱེད་བཞིན་ཡོད་འདུག

ཨལ་ཇཱ་ཛི་ར་དྲ་བ་ (Al Jazeera) སྟེང་པ་ཀི་སི་ཐན་གྱི་ཉེན་རྟོག་པ་ཞིག་གིས། ཉེ་ལམ་ང་ཚོས་ཨི་རག་དང་སི་རེ་ཡའི་མཉམ་འབྲེལ་དྲག་སྤྱོད་ཤོག་ཁག་ལ་གོ་མཚོན་སྤྲད་དེ། འདི་ལོའི་ཟླ་ ༥ པའི་ནང་ཀཱ་ར་ཆཱི་གྲོང་ཁྱེར་དུ་སྤྱི་སྤྱོད་རླངས་འཁོར་ཞིག་ལ་འཇབ་རྒོལ་བྱས་ཏེ། ཤཱ་སེ་ (Shias) ཆོས་བྱེད་ཡུལ་མི་ ༤༤ དམར་གསོད་གཏོང་དུ་བཅུག་མཁན་གྱི་དོགས་ཡོད་མི་སྣ་ཞིག་འཛིན་བཟུང་ཐུབ་ནས་འདྲི་རྩད་བྱས་པ་བརྒྱུད། ཁོའི་རྒྱབ་རོགས་ལ་བུད་མེད་མང་པོ་ཞིག་ཡོད་པ་ཤེས་རྟོགས་བྱུང་སྟེ། ད་ལྟ་བུད་མེད་དེ་དག་འཛིན་བཟུང་བྱེད་བཞིན་ཡོད། ཅེས་བརྗོད་འདུག

དེ་རིང་ཨེ་ཕེ་གསར་ལམ་སྟེང་པ་ཀི་སི་ཐན་སིན་མངའ་སྡེའི་འཇིགས་སྐུལ་རིང་ལུགས་པར་རྒོལ་རྡུང་གཏོང་མཁན་གྱི་ཚོགས་གཙོ་ར་ཇེ་ཨུ་མར་ (Raja Umar Khattab) གྱིས། “བདུན་ཕྲག་སྔོན་མའི་ང་ཚོས་ཀཱ་ར་ཆཱི་གྲོང་ཁྱེར་ནས་དེ་སྔོན་ཨི་རག་དང་སི་རེ་ཡ་མཉམ་འབྲེལ་དྲག་སྤྱོད་ཤོག་ཁག་ལ་རྒྱབ་སྐྱོར་བྱས་ཏེ། སྤྱི་སྤྱོད་རླངས་འཁོར་ལ་མེ་མདའ་བརྒྱབ་ནས་མི་གསོད་བཅུག་མཁན་གྱི་དོགས་ཡོད་ཉེས་ཅན་ཞིག་འཛིན་བཟུང་བྱས་རྗེས། ཁོས་ཁོ་རང་གི་བཟའ་ཟླས་ཀཱ་ར་ཆཱི་ནང་ཆོས་ཚོགས་ཨལ་ཛེ་ར་ (Al Zikra) ཞེས་པ་ཞིག་བཙུགས་ཏེ། དེའི་ཡོང་འབབ་ཨི་རག་དང་སི་རེ་ཡ་མཉམ་འབྲེལ་དྲག་སྤྱོད་ཤོག་ཁག་ལ་གཏོང་གི་ཡོད་པ་དང་། ཆོས་ཚོགས་དེའི་ནང་འབྱོར་ལྡན་བུད་མེད་ ༢༠ ཡོད་པ་དེ་དག་གིས་དྲག་སྤྱོད་པའི་བརྙན་ཐུང་ཕབ་བཤུ་བྱས་ཏེ། མི་མང་ལ་འགྲེམས་སྤེལ་བྱེད་ཀྱི་ཡོད་པ་ཁས་ལེན་བྱས་སོང་།” ཞེས་བརྗོད་འདུག

ཏ་ལི་བྷན་དྲག་སྤྱོད་ཤོག་ཁག་གིས་ལོ་རེར་པ་ཀི་སི་ཐན་ནང་ཉུང་མཐར་འཇབ་རྒོལ་ཐེངས་ལྔ་ལྷག་བྱས་ཏེ། ཉེས་མེད་མི་སེར་བརྒྱ་ཕྲག་མང་པོ་གསོད་བཞིན་ཡོད་སྟབས། ད་བར་པ་ཀི་སི་ཐན་གཞུང་གིས་ཏ་ལི་བྷན་དྲག་སྤྱོད་ཤོག་ཁག་དང་ལོ་བཅུ་ལྷག་དམག་འཐབ་བྱས་མྱོང་ཡོད། ད་ལྟ་པ་ཀི་སི་ཐན་ནང་ཨི་རག་དང་སི་རེ་ཡ་མཉམ་འབྲེལ་དྲག་སྤྱོད་ཤོག་ཁག་ལ་རྒྱབ་སྐྱོར་བྱེད་མཁན་མི་མང་གིས་གཞུང་ལ་ཁ་གཏད་གཅོག་གི་ཡོད་པ་དེ་ནི། པ་ཀི་སི་ཐན་གཞུང་ལ་མཚོན་ན་གནས་ཚུལ་གསར་པ་དང་དམག་འཐབ་གསར་པ་ཞིག་ཆགས་ཡོད་པ་རེད།

རྒྱ་གར་ཧིན་རྡུ་སི་ཐན་དུས་བབ་ཀྱིས་ད་ལྟ་ཨི་རག་དང་སི་རེ་ཡ་མཉམ་འབྲེལ་དྲག་སྤྱོད་ཤོག་ཁག་གིས་ཁ་ཆེ་ཆོས་ལྡན་རྒྱལ་ཁབ་འཛུགས་སྐྲུན་བྱ་རྒྱུ་ཡིན་ཞེས། རྒྱལ་ཁབ་ནང་ཟིང་འཁྲུག་བསླངས་ཏེ་སི་རེ་ཡ་དང་ཨི་རག་གི་ས་ཁུལ་གསུམ་ཆ་གཅིག་ལ་དབང་སྒྱུར་དང་། ལི་བྷེ་ཡའི་སར་ཌི་གྲོང་ཁྱེར་ (Sirte) དང་ཡཱ་མན་སོགས་ཀྱི་ནང་རྟེན་གཞི་བཙུགས་ནས་དྲག་ཟིང་ལས་འགུལ་འདྲ་མིན་སྤེལ་ཏེ། ད་བར་མི་སེར་ ༨༠༠༠༠ ལྷག་བསད་ཡོད་སྟབས། ཤོག་ཁག་དེར་ནེ་ཇེ་རི་ཡར་རྟེན་གཞི་བྱས་པའི་བྷོ་ཁཱོ་ཧ་རམ་ (Boko Haram) དྲག་སྤྱོད་སྒྲིག་འཛུགས་མགུ་པོ་བྱུང་སྟེ། ཚོགས་ཁོངས་སུ་བཞུགས་ནས་མཉམ་རུབ་ཐོག་དཀྱིལ་ཤར་ཡུལ་གྲུ་དང་ཨབ་གྷན། པ་ཀི་སི་ཐན་སོགས་སུ་དྲག་སྤྱོད་ལས་འགུལ་སྤེལ་ཏེ་ད་བར་ཁྱོན་མི་ ༢༨༩༥༡ ཙམ་བསད་སྟབས། ༢༠༡༥ ལོའི་ཟླ་ ༣ པ་ནས་ཟླ་འདིའི་ཚེས་ ༢༡ ཉིན་བར་ཡོ་རོབ་ཁུལ་དུ་སྐྱབས་བཅོལ་བ་ ༡༠༡༨༣༥༢ འབྱོར་བ་དང་། མི་ ༣༦༩༥ མཚོ་ཐོག་ནས་རྐྱེན་ལམ་ཕྱིན་ཡོད་པ་རེད་ཅེས་བརྗོད་འདུག

གསར་འགོད་པ། དོན་གྲུབ།