རྒྱལ་སྤྱིའི་ཉེ་ཡངས་ཚོགས་པས་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ་བསྒྲགས་པའི་གསར་གནས་དེ་དག་དངོས་ཡོད་གནས་ཚུལ་མིན་སྐོར་བརྗོད་འདུག
ཁ་སང་རྒྱ་ནག་དབུས་བརྙན་འཕྲིན་ལས་ཁང་ (CCTV) དང་ཞིན་ཧྭ་གསར་ཁང་ (XNA) སོགས་རྒྱ་ནག་གི་གཞུང་འབྲེལ་བརྒྱུད་ལམ་ཁག་ཏུ་རྒྱ་རིགས་ངལ་རྩོལ་ཁེ་དབང་རྩོད་ལེན་པ་མི་བདུན་གྱིས “རྒྱ་ནང་གི་ལས་བཟོ་བ་ཚོར་བཟོ་ལས་མཚམས་འཇོག་གི་ངོ་རྒོལ་ལས་འགུལ་སྤེལ་དགོས་པའི་སྐུལ་སློང་བྱས་པ”དང་། “ཕྱི་གླིང་གི་ཐེབས་རྩ་ཁག་གི་རོགས་དངུལ་བླངས་པ” “སྤྱི་ཚོགས་སྒྲིག་འཛུགས་ལ་གཏོར་བརླག་བཏང་བ”སོགས་ནག་ཉེས་གསུམ་འོག་འཛིན་བཟུང་བྱས་ཡོད་ལུགས་བསྒྲགས་ཀྱང་། རྒྱལ་སྤྱིའི་ཉེ་ཡངས་ཚོགས་པའི་ཞིབ་འཇུག་སྙན་སྒྲོན་ལྟར་ན། གནས་ཚུལ་དེ་ནི་རྒྱ་ནག་གཞུང་གིས་ཉེས་མེད་མི་སེར་ལ་ཉེས་དོན་བཙན་འགལ་བྱས་པ་ཞིག་ཡིན་ཞིང་། ནག་མེད་ཉེས་འཛུགས་ཀྱི་བྱ་སྤྱོད་འདི་ནི་རྒྱ་ནག་ནང་འདས་པའི་ལོ་ངོ་ ༢༠ ལྷག་རིང་གི་འགལ་འདུ་མང་པོར་དམ་དྲག་བྱེད་ཐབས་ཤིག་ཡིན་པ་མ་ཟད། འདས་པའི་ལོ་ངོ་དེ་དག་རིང་རྒྱ་རིགས་ངལ་རྩོལ་ཁེ་ཐོབ་རྩོད་ལེན་པ་ཚོས་རྒྱ་ནག་གི་ངལ་རྩོལ་སྒྲིག་འཛུགས་བཅོས་སྒྱུར་གྱི་ལས་འགུལ་བསླངས་པར་བརྟེན། རྒྱ་ནག་གཞུང་གིས་ངལ་རྩོལ་ཁེ་ཐོབ་རྩོད་ལེན་པ་མི་བརྒྱ་ཕྲག་མང་པོ་འཛིན་བཟུང་དང་བཀག་བསྐྱིལ་བྱས་ཡོད་པ་ཞིག་ཡིན་འདུག
ཟླ་འདིའི་ཟླ་སྟོད་ཙམ་ལ་རྒྱ་ནག་གི་བྱང་ནུབ་ཁུལ་གྱི་ཀང་ཀྲུའུ་ (Guangzhou) ཞེས་པའི་གྲུ་ཁའི་གྲོང་ཁྱེར་གྱི་ཉེན་རྟོག་པས་གྲོང་ཁྱེར་དེའི་ནང་རྟེན་གཞི་བྱས་པའི་ཕན་ཡས་ངལ་རྩོལ་ལྟེ་གནས་ཁང་ (PMWC) གི་འགན་འཛིན་ཙིན་ཧྥི་ཡཱང་ (Zeng Feiyang) ཟེར་བ་སྤྱི་ཚོགས་ཀྱི་སྒྲིག་འཛུགས་ལ་གཏོར་བརླག་བྱས་པའི་ཉེས་འཛུགས་འོག་འཛིན་བཟུང་བྱས་ཡོད་པ་དང་། ཁོའི་ཁྲིམས་རྩོད་པ་ཁྲིན་ཀྲིན་ཆང་ (Cheng Zhunqiang) ཟེར་བས། རྒྱ་རིགས་ངལ་རྩོལ་ཁེ་ཐོབ་རྩོད་ལེན་པ་ཀྲུའུ་ཞོ་མི་ (Zhu Xiaomei) དང་ཧི་ཞོ་པོ་ (He Xiaobo)། མེན་ཧན་ (Meng Han)། ཕིན་ཇ་ཡོང་ (Peng Jiayong)། ཏིན་ཞོ་མིན་ (Deng Xiaoming)། ཐང་ཧན་ཞིན་ (Tang Huanxing) སོགས་མི་ ༦ འཛིན་བཟུང་བྱས་ཡོད་པ་དང་། ང་རང་ཁྲིམས་རྩོད་པ་ཞིག་ཡིན་པའི་ངོས་ཐད་ནས། སྔོན་ཆད་རིག་གནས་གསར་བརྗེ་ཆེན་མོའི་དུས་ཟིང་སྐབས་ཀྱི་གྲལ་རིམ་འཐབ་རྩོད་དང་བསྡུར་ན། ང་དེང་གི་རྒྱ་ནག་གཞུང་གིས་མི་སེར་རྣམས་ཁྲིམས་ཞིབ་མི་ཆོག་པར་འཛིན་བཟུང་བཙོན་འཇུག་བྱེད་པའི་སྲིད་ཇུས་འདིར་འཐད་པ་ཡིན། ཞེས་བརྗོད་ཡོད་འདུག
རྒྱ་ནག་གཞུང་འབྲེལ་བརྒྱུད་ལམ་ཁག་ཏུ། ཙིན་ཧྥི་ཡཱང་གཙོས་པའི་ངལ་རྩོལ་ཁེ་ཐོབ་རྩོད་ལེན་པ་ཚོས་རྒྱ་ནང་གི་ལས་བཟོ་བ་དག་ལ་ལས་ཀ་མཚམས་འཇོག་གིས་ངོ་རྒོལ་ལས་འགུལ་སྤེལ་དགོས་པའི་ངན་སྐུལ་བཏང་བ་དང་སྤྱི་ཚོགས་སྟེང་ཟིང་ཆ་བསླངས་པ། རྒྱ་ནང་གི་བཟོ་ལས་ཐོན་སྐྱེད་ལ་བྱུས་གཏོགས་བྱས་པ་དང་སྤྱི་ཚོགས་སྒྲིག་འཛུགས་ལ་གཏོར་བརླག་བཏང་ཡོད་ལུགས་བསྒྲགས་འདུག
གཞན། རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པ་ཧོང་ལེ་ (Hong Lei) ཟེར་བ་ཞིག་གིས། གནད་དོན་འདི་རྒྱལ་ཁབ་ཀྱི་བཅའ་ཁྲིམས་ཐོག་ནས་ཐག་ཆོད་ཡོད་ཚུལ་བརྗོད་ཀྱང་། དེང་སྐབས་རྒྱ་ནག་གི་སྤྱི་ཚོགས་དཔལ་འབྱོར་གྱི་འགྲོས་ཤིན་ཏུ་དལ་བར་བརྟེན། རྒྱ་ནག་ལྷོ་རྒྱུད་ཀང་ཏུང་ (Guangdong) ཞིང་ཆེན་གྱི་བཟོ་གྲྭ་མང་པོ་ཞིག་གི་སྒོ་རྒྱག་དགོས་བྱུང་སྟེ། བཟོ་གྲྭའི་མགོ་དཔོན་ཚོས་ལས་བཟོ་བར་གླ་དངུལ་མ་སྤྲད་པར་བྲོས་བྱོལ་བྱས་པའི་དཀའ་རྙོག་འབྱུང་མུས་ཡིན་པ་མ་ཟད། རྒྱ་ནང་གི་འགྲོ་བ་མིའི་ཐོབ་ཐང་དང་དམངས་གཙོ་དོན་གཉེར་བ་རྒྱ་རིགས་མང་པོ་ཞིག་གིས་རྒྱ་ནག་གཞུང་གིས་འཛིན་བཟུང་བྱས་པའི་བཙོན་པ་ཚོར་དྲང་བདེན་གྱི་སྒོ་ནས་ཁྲིམས་ཞིབ་ཡང་དག་དགོས་པའི་ངོ་རྒོལ་སྐད་འབོད་བྱེད་བཞིན་ཡོད་པ་རེད།
གསར་འགོད་པ། པདྨ་རྒྱལ།
