ཧྲན་ཏོན་ཞིང་ཆེན་ལིན་ཡཱེ་གྲོང་ཁྱེར་ལན་ཧྲན་ས་ཁུལ་གྱི་པེ་ཡེན་ལམ་སྤྱི་བདེ་ཉེན་རྟོག་མི་སྣས་བྱིས་པ་ལོ་ ༡༦ ཅན་ཞིག་ལ་ཉེས་རྡུང་བཏང་སྟེ་བསད་ཡོད་པ་མ་ཟད། ཞུ་གཏུག་ཏུ་ཡོང་མཁན་ཕ་མ་གཉེན་ཉེ་ཚོར་ཡང་དྲག་གནོན་འཛིན་བཟུང་བྱས་ཡོད་འདུག
དེ་རིང་པའོ་ཞོན་དྲ་བས་གནས་ཚུལ་སྤེལ་བ་ལྟར་ན། ཟླ་འདིའི་ཚེས་ ༢༢ ཉིན་གྱི་དགོང་མོར། རྒྱ་ནག་ལན་ཧྲན་ས་ཁུལ་པེ་ཡེན་ལམ་གྱི་སྤྱི་བདེ་ཉེན་རྟོག་ཁང་མི་སྣས་ལེན་ཡཱེ་གྲོང་ཁྱེར་ལོ་ཀྲོང་ས་ཁུལ་ཏའོ་ཅཱ་སན་ཀིང་གྲོང་ཚོའི་བྱིས་པ་ལོ་ ༡༦ ཡིན་པའི་མིང་ལ་ཝང་ཀྲི་ཁྲའོ་ (Wang Zhichao) ཟེར་བ་ཞིག་ལ་ཉེས་རྡུང་བཏང་སྟེ་དམར་གསོད་བཏང་རྗེས། བྱིས་པའི་ཕུང་པོ་པུར་སྲེག་ཁང་དུ་བསྐྱལ་ནས་མེ་བསྲགས་གཏོང་རྩིས་བྱས་ཡོད་ཀྱང་། ཕྱི་ཚེས་ ༢༣ ཉིན་པུར་སྲེག་ཁང་གིས་འདས་པོའི་ནང་མིར་འབྲེལ་བ་བྱས་ཡོད་སྟབས། འདས་པོའི་ནང་མིས་པེ་ཡེན་ཉེན་རྟོག་ཁང་ལ་བྱིས་པ་དེ་གསོད་དགོས་པའི་རྒྱུ་མཚན་དྲིས་ཀྱང་། ཉེན་རྟོག་ཁང་ལ་རྒྱུ་མཚན་ཁ་གསལ་གང་ཡང་བཤད་རྒྱུ་མེད་པ་མ་ཟད། ཉེན་རྟོག་ཁང་ལ་ཞུ་གཏུག་ཏུ་ཡོང་མཁན་ཚོར་དྲག་གནོན་དང་། ནང་མི་ཁག་ཅིག་འཛིན་བཟུང་བཅས་བྱས་ཡོད་འདུག
པེ་ཡེན་ལམ་གྱི་སྤྱི་བདེའི་ལས་ཁང་གི་སྒོ་འཁྲིས་སུ་ཁྱིམ་བདག་ཁག་ཅིག་འདུ་འཛོམས་བྱས་ཏེ་མྱ་ངན་གྱི་མེ་ཏོག་སོགས་བསྒྲིགས་པ་དང་ཤོག་སྒོར་རྫུན་མ་སོགས་མེར་བསྲེགས་བཏང་སྟེ་མྱ་ངན་བྱེད་བཞིན་ཡོད་པ་མ་ཟད། ༼ལོ་ཀྲོང་ས་ཁུལ་ཏའོ་ཅ་སན་ཀང་གྲོང་ཚོས་བྱིས་པ་ལོ་ ༡༦ ཅན་གྱི་ཝང་ཀྲི་ཁྲའོ་པེ་ཡེན་ལམ་གྱི་སྤྱི་བདེ་ལས་ཁང་གིས་རྡུང་རྡེག་བཏང་ནས་བཀྲོངས་པ་རེད།༽ཅེས་འཕྲད་དར་མང་པོ་འཐེན་པ་དང་། གཉེན་ཉེ་ཁག་ཅིག་གིས་འདས་པོའི་པར་བཟུང་ནས་ངུ་འབོད་བྱས་ཡོད་པ་དང་། དེར་མང་ཚོགས་མང་པོ་འདུ་འཛོམས་བྱས་ཏེ་གདུང་སེམས་མཉམ་སྐྱེས་བྱས་ཡོད་སྟབས། ས་གནས་འབྲེལ་ཡོད་ཉེན་རྟོག་པས་ཁྲབ་ལྡན་འཁོར་ལོ་སོགས་བཏང་ཡོང་སྟེ་དྲག་གནོན་བྱེད་བཞིན་ཡོད་འདུག
དྲ་མིང་མ་ལཱི་ཀྲུང་ཞཱང་ཟེར་བ་ཞིག་གིས། ལོ་ན་ ༥༠ ཡིན་པའི་ཝང་ཀྲི་ཁྲའོ་ཡི་ཕ་མ་གཉིས་ལ་ལོ་ ༡༦ ཅན་གྱི་བྱིས་པ་དེ་གཅིག་པུ་ལས་མེད་པ་དང་། ཁ་སང་བྱིས་པ་འདས་གྲོངས་ཕྱིན་རྗེས་སྤྱི་བདེ་ལས་ཁང་གིས་པུར་སྲེག་ཁང་ནས་ཐད་ཀ་མེ་བསྲེགས་གཏོང་རྩིས་བྱས་ཀྱང་། པུར་སྲེག་ཁང་གིས་ཁྱིམ་བདག་གི་མཚན་རྟགས་དགོས་པའི་དགོས་མདུན་བཏོན་ཡོད་སྟབས། དེ་རིང་ཉིན་གུང་པེ་ཡེན་ལམ་སྤྱི་བདེ་ལས་ཁང་གིས་ཧྲང་ཡོའུ་མཚེའུ་སྤྱི་བདེ་ལས་ཁང་ལ་འབྲེལ་བ་བྱས་རྗེས་ཏའོ་ཅ་སན་ཀང་གྲོང་ཚོའི་སྲིད་གཞུང་ལས་མིས་འབྲེལ་ཡོད་ཁྱིམ་བདག་ལ་བརྡ་ཐོ་འབྱོར་ཐབས་བྱས་ཡོད་སྟབས། ཁྱིམ་མི་ཚོས་ཉིན་གུང་ཆུ་ཚོད་ ༡༡ ཡས་མས་ལ་བྱིས་པ་མེད་པའི་གོ་ཐོས་བྱུང་རྗེས། ནང་མི་རྣམས་ངུ་འབོད་བྱེད་བཞིན་སྤྱི་བདེ་ལས་ཁང་གི་སྒོ་འགྲམ་དུ་སོང་སྟེ། ཉེན་རྟོག་པར་ཅིའི་ཕྱིར་བྱིས་པ་དེ་གསོད་དགོས་པའི་རྒྱུ་མཚན་རྩད་གཅོད་བྱས་ཀྱང་། སྤྱི་བདེ་ལས་ཁང་ལ་རྒྱུ་མཚན་ཁ་གསལ་གང་ཡང་བཤད་རྒྱུ་མེད་པ་མ་ཟད། ཁྱིམ་བདག་ཚོས་ཉེན་རྟོག་པར་བྱིས་པ་དེའི་ཁ་པར་སོགས་ནང་མི་ལ་སྤྲོད་དགོས་པའི་འབོད་སྐུལ་ཞུས་ཀྱང་དེ་ཡང་སྤྲད་མི་འདུག ཅེས་བཀོད་ཡོད་འདུག
དྲ་གྲོགས་ཁོན་ཊོ་རའེ་ཞེས་པ་ཞིག་གིས། སྤྱི་བདེ་ལས་ཁང་གིས་གཞན་གྱི་བྱིས་པ་ལོ་ ༡༦ ཅན་ཞིག་བཀྲོངས་པ་མ་ཟད། དེ་རིང་སླར་ཡང་ཁྲབ་ལྡན་འཁོར་ལོ་བཏང་ནས་ནང་མི་ལ་དྲག་གནོན་བྱེད་ཀྱིན་འདུག ང་ཚོའི་རྒྱ་ནག་ཆེན་པོ་ལ་ལྟོས་དང་། དངོས་གནས་འགྲེལ་བཤད་རྒྱག་ཤེས་ཀྱི་མི་འདུག ཅེས་བརྗོད་འདུག
གསར་འགོད་པ། འཇིགས་མེད་རྒྱ་མཚོ།
