མེ་ཁི་སི་ཁོ་གྲོང་ཁྱེར་ཉེན་རྟོག་པ་དང་ནག་ཚོང་གཉེར་མཁན་གཉིས་ངན་འབྲེལ་གྱིས་མཐོ་རིམ་སློབ་ཕྲུག་ ༤༣ འཛིན་བཟུང་བཙན་ཁྲིད་བྱས་པའི་གནས་ཚུལ་དེ་ད་དུང་གསལ་ཁ་བྱུང་ཐུབ་མེད་འདུག
དེ་རིང་ཧྥ་རན་སིའི་གསར་ཁང་ (AFP) གིས་གནས་ཚུལ་དོན་ལྟར་ན། བྱང་ཨ་རིའི་རྒྱལ་ཁབ་མེ་ཁི་སི་ཁོ་སྲིད་གཞུང་གིས་ཕྱི་ལོ་ ༢༠༡༤ ལོའི་ཟླ་ ༡༠ པའི་ཚེས་ ༢༦ ཡས་མས་སུ་ལྐོག་རྔན་སྤྲོད་ལེན་དང་འབྲེལ་བའི་མེ་ཁི་སི་ཁོ་གྲོང་ཁྱེར་ཉེན་རྟོག་པས་མཐོ་རིམ་སློབ་ཕྲུག་ ༤༣ འཛིན་བཟུང་བཙན་ཁྲིད་བྱས་པའི་གནས་ཚུལ་ཐད་ད་ལྟའི་བར་རྟོག་ཞིབ་བྱས་ཀྱང་ད་དུང་རྙེད་སོན་བྱུང་ཐུབ་མེད་སྐོར་བརྗོད་ཅིང་། སློབ་ཕྲུག་ཚོའི་ནང་མི་ཚོས་ཁོ་ཚོ་ཡུལ་ལུང་དེའི་ལྷོ་རྒྱུད་མངའ་སྡེ་གྷུ་རར་རོ་ (Guerrero) ཡི་ནག་ཚོང་གཉེར་མཁན་ཚོས་དམར་གསོད་དང་མེར་སྲེག་བཏང་བར་ཚོད་དཔག་བྱེད་ཀྱི་ཡོད་ནའང་། ཁོ་ཚོས་མེ་ཁི་སི་ཁོ་སྲིད་གཞུང་ལ་མུ་མཐུད་རྟོག་ཞིབ་དགོས་པའི་ཛ་དྲག་གི་འབོད་སྐུལ་ཞུ་མུས་ཡིན་འདུག
མེ་ཁི་སི་ཁོའི་ནང་སྲིད་ལྷན་ཁང་གི་འགྲོ་བ་མིའི་ཐོབ་ཐང་ཚན་པའི་འགན་འཛིན་གཞོན་པ་ལྕམ་རོ་བྷིར་ཊོ་ཁམ་པཱ་ (Roberto Campa) ཟེར་བ་ཞིག་གིས། མེ་ཁི་སི་ཁོ་སྲིད་གཞུང་གིས་ད་ལྟའི་བར་མེ་ཁི་སི་ཁོ་གྲོང་ཁྱེར་དབུས་ཁུལ་དང་ལྷོ་ཁུལ་སོགས་ཕྱོགས་སོ་སོར་རྟོག་ཞིབ་བྱས་པ་ལྟར་ན། ནག་ཚོང་ཉེར་མཁན་དེ་ཚོས་སློབ་ཕྲུག་ཚོ་ས་གནས་གཞན་དུ་བཙན་ཁྲིད་བྱས་ཡོད་པ་དང་། ཁོ་ཚོས་སློབ་ཕྲུག་དེ་ཚོ་བཙན་ཁྲིད་བྱེད་དོན་རྟོགས་ཐབས་མེད་པ་ཞིག་ཡིན་སྐོར་བརྗོད་འདུག
མེ་ཁི་སི་ཁོའི་ཁྲིམས་དོན་སྤྱི་ཁྱབ་འགན་འཛིན་ཟུར་བ་ཇེ་སུ་མུ་རེ་ལོ་ཀ་རམ་ (Jesus Murillo Karam) ཟེར་བ་ཞིག་གིས། གྲོང་ཁྱེར་ཉེན་རྟོག་པས་སློབ་ཕྲུག་དེ་ཚོ་ནག་ཚོང་གཉེར་མཁན་ཚོར་རྩིས་སྤྲོད་བྱས་ཏེ། ནག་ཚོང་གཉེར་མཁན་ཚོས་ཁོ་ཚོ་དམར་གསོད་བཏང་ནས་ཁོ་ཚོའི་ཕུང་བོ་གད་སྙིགས་དང་མཉམ་དུ་མེར་སྲེག་བཏང་ཡོད་སྐོར་བརྗོད་ཅིང་། ཨ་རིའི་འགྲོ་བ་མིའི་ཐོབ་ཐང་སྲུང་སྐྱོབ་ཚན་པའི་རང་དབང་རྟོག་ཞིབ་པ་ཚོས་གོང་ཞུས་གནས་ཚུལ་ཐད་ལ་དོག་གཞི་བྱེད་ཀྱི་ཡོད་པ་རེད།
གནས་ཚུལ་ལྟར་ན། ཕྱི་ལོ་ ༢༠༡༤ ལོའི་ཟླ་ ༡༠ ཚེས་ ༢༦ ཙམ་ལ་ནག་ཚོང་གཉེར་མཁན་ཚོའི་ལྐོག་རྔན་སྤྲོད་ལེན་དང་འབྲེལ་བའི་མེ་ཁི་སི་ཁོ་གྲོང་ཁྱེར་ཉེན་རྟོག་པས་མཐོ་རིམ་སློབ་ཕྲུག་ ༤༣ འཛིན་བཟུང་བཙན་ཁྲིད་བྱས་ཡོད་པ་དང་། རྟོག་ཞིབ་ཚན་ཁག་གིས་འཚོལ་ཞིབ་བྱས་པ་བརྒྱུད་རྟོག་ཞིབ་པ་ལ་ལས་ཉེན་རྟོག་པས་བཙན་ཁྲིད་བྱས་པའི་གྲས་ཀྱི་སློབ་ཕྲུག་ ༡༣ མེ་ཁི་སི་ཁོའི་ལྷོ་རྒྱུད་གྲོང་ཁྱེར་ཨ་གྷུ་ལའི་ (Iguala) ཕྱི་རོལ་དུ་ཁྲིད་སོང་ནས་སློབ་ཕྲུག་ ༩ ལ་མེ་མདའ་བརྒྱབ་ནས་དམར་གསོད་བཏང་བ་དང་སློབ་ཕྲུག་ ༤ གཅར་རྡུང་བཏང་ནས་དམར་གསོད་བཏང་ཡོད་པར་ཚོད་དཔག་བྱེད་ཀྱི་ཡོད་ཅིང་། ད་ལྟའི་བར་མེ་ཁི་སི་ཁོ་སྲིད་གཞུང་གིས་ཡུལ་དེའི་ས་ཁུལ་ ༦༠༠ ནང་རྟོག་ཞིབ་བྱས་ཀྱང་ཁུངས་ལྡན་གནས་ཚུལ་ཤེས་རྟོགས་བྱུང་ཐུབ་མེད་པ་རེད།
གསར་འགོད་པ། པདྨ་རྒྱལ།
