དྷ་རམ་ས་ལའི་ཉེ་འཁྲིས་སུ་ཡོད་པའི་ཤེས་རབ་དགའ་ཚལ་སློབ་གླིང་ནི་བོད་ནས་ཕེབས་པའི་སློབ་ལོ་ཡོལ་ཟིན་པ་ཚོར་འཕྲལ་སེལ་བོད་དབྱིན་དང་གློག་ཀླད། ལག་ཤེས་སོགས་སྦྱོང་སའི་སློབ་གྲྭ་ཞིག་ཡིན་ཞིང་། བར་ལམ་སློབ་གྲྭ་གཞན་དང་གྲྭ་ས་སོགས་ནས་ཡོང་མཁན་ཚོར་གོ་སྐབས་གཉིས་པ་སྤྲོད་བཞིན་ཡོད་ཀྱང་། འདས་པའི་ལོ་ཤས་གོང་ནས་སློབ་ཕྲུག་ཇེ་ཉུང་དུ་ཕྱིན་ཏེ་ད་ལྟ་སློབ་གྲྭ་སྒོ་རྒྱག་སྲིད་པའི་གནས་སྟངས་ཆགས་ཡོད་འདུག
འདི་གའི་གསར་འགོད་པས་ཤེས་རབ་དགའ་ཚལ་སློབ་གླིང་གི་སློབ་སྤྱི་ཚེ་རིང་གཡུ་སྒྲོན་ལགས་དང་དགེ་ཆེ་ཟླ་བ་ཚེ་རིང་ལགས་གཉིས་སུ་ད་ལྟའི་ཤེས་རབ་དགའ་ཚལ་སློབ་གླིང་གི་གནས་སྟངས་སྐོར་བཅར་འདྲི་ཞུས་པ་ལྟར་ན། ད་ལྟའི་ཆར་ཤེས་རབ་དགའ་ཚལ་སློབ་གླིང་དུ་སློབ་མ་ ༡༡༤ ཡོད་པ་ལས་སློབ་ཕྲུག་བུ་ ༧༦ དང་བུ་མོ་ ༣༨ ཡོད་པ་དང། དགེ་རྒན་ ༢༩ དང་ལས་བྱེད་ ༡༤ བཅས་ཡོད་འདུག ༢༠༡༥ ནང་གསར་ཞུགས་སློབ་མ་ ༢༦ དང་སློབ་གྲྭ་ནས་རྩ་དགོངས་ཞུ་མཁན་ ༨༨ ཡོད་པ་དང་། ད་ལོར་འཛིན་རིམ་བཅུ་བ་མཐར་ཕྱིན་སློབ་མ་ ༣༠ དང་འཛིན་རིམ་བཅུ་བ་འགྲོ་བཞིན་པའི་སློབ་མ་ ༡༠། དེ་བཞིན། འཛིན་རིམ་བཅུ་གཉིས་མཐར་ཕྱིན་སློབ་མ་ ༤ དང་འཛིན་རིམ་བཅུ་གཉིས་འགྲོ་བཞིན་པའི་སློབ་མ་ ༡༢ བཅས་ཡོད་འདུག
ཤེས་རབ་དགའ་ཚལ་སློབ་གླིང་གི་བོད་དགེ་བོད་ཞུགས་མཚོ་ལགས་སུ། བོད་ནས་ཡོང་མཁན་སློབ་མ་ཚོའི་ཤེས་ཡོན་དང་དཔལ་འབྱོར། ཀུན་སྤྱོད་སོགས་གང་འདྲ་ཡོད་པའི་སྐོར་དྲིས་པར་ཁོ་མོས། སློབ་མ་ཚོའི་ཀུན་སྤྱོད་དང་དཔལ་འབྱོར་ཕྱོགས་གང་ཐད་ནས་སྔོན་མ་ལས་ཞེ་དྲགས་ཡག་ཏུ་ཕྱིན་འདུག ཤེས་ཡོན་གྱི་ཕྱོགས་ནས་སྤྱིར་བཏང་སློབ་མ་ཚོའི་ཤེས་ཚད་ཡག་པོ་ཡོད་ནའང་ཁག་ཅིག་གིས་རྒྱ་སྐད་མ་གཏོགས་བོད་སྐད་ཡག་པོ་ཞིག་བཤད་ཤེས་ཀྱི་མི་འདུག བོད་སྐད་ཡག་པོ་མི་ཤེས་མཁན་དེ་ཚོས་བོད་པའི་གོམས་གཤིས་དང་བསམ་བློའི་འཁྱེར་ཕྱོགས་མི་འདྲ་བ་དང་། ལྷག་པར་དུ་སློབ་མ་ཚོའི་ཤེས་ཚད་ཆ་སྙོམས་མིན་སྟབས། སློབ་ཁྲིད་བྱེད་པར་དཀའ་ཁག་ཆེན་པོ་འདུག ཅེས་བརྗོད་བྱུང་།
སློབ་མ་ཐུབ་བསྟན་དགའ་བ་ལགས་ཀྱིས། དེང་སྐབས་སློབ་སྦྱོང་གི་གོ་སྐབས་ཧ་ལས་པའི་ཡག་པོ་རེད། ཡིན་ནའང་སློབ་གྲྭར་ཡོང་མཁན་མང་ཆེ་བ་སློབ་གཉེར་གྱི་གོ་སྐབས་ལ་དམིགས་ནས་ཡོང་བ་མ་རེད། ཁོ་ཚོའི་དམིགས་ཡུལ་གཙོ་བོ་ཕྱི་རྒྱལ་ལ་འགྲོ་རྒྱུར་སྒུག་བསྡད་ཡོད་དུས། སློབ་སྦྱོང་གི་ཆུ་ཚོད་ཧ་ཅང་སྐྱོ་བོ་ཡིན་ཁར། སློབ་གྲྭར་གུང་སེང་མང་བ་དང་སློབ་གྲྭའི་ནང་སློབ་སྦྱོང་གི་ཁོར་ཡུག་ཞན་པོ་བཅས་ལ་བརྟེན་ཏེ། དངོས་གནས་སློབ་སྦྱོང་བྱེད་མཁན་ཚོར་ཤུགས་རྐྱེན་ངན་པ་ཐེབས་ཀྱི་འདུག ང་རང་སློབ་གྲྭའི་རྩོམ་དེབ་ཀྱི་རྩོམ་སྒྲིག་པ་ཞིག་ཡིན་པའི་ཆ་ནས། ངས་སྔོན་ཆད་ཀྱི་སློབ་མ་ཚོའི་སློབ་སྦྱོང་གི་བརྩོན་འབྲས་ལ་བལྟས་ཡོང་དུས། སྔོན་ཆད་དང་བསྡུར་ན་དེང་སྐབས་ཀྱི་སློབ་མ་མང་ཆེ་བར་སློབ་སྦྱོང་གི་སེམས་ཤུགས་དང་ཕུགས་འདུན་དེ་འདྲ་རྩ་བ་ནས་མི་འདུག ང་རང་སློབ་གྲྭ་འདིར་ཞུགས་ནས་ལོ་ ༦ འགྲོ་བཞིན་ཡོད་ལ། ང་འཛིན་རིམ་ ༡༢ གྱི་སློབ་མ་ཡིན། ད་ལོའི་ཕྱི་ཟླ་ ༥ སློབ་མཐར་ཕྱིན་འགྲོ་གི་ཡོད། སྐབས་དེར་མཐར་ཕྱིན་སློབ་མ་ ༤༠ ཟིན་གྱི་ཡོད་སྟབས་ཤུལ་དུ་སློབ་མ་ ༧༤ ཙམ་ལས་ལྷག་གི་ཡོད་པ་མ་རེད། དེ་བས་གསར་ཞུགས་སློབ་མ་མེད་དུས་སློབ་གྲྭ་འདིའི་སྒོ་རྒྱག་སྲིད་པ་རེད། ཅེས་བརྗོད་བྱུང་།
སམ་བྷོ་ཊ་བོད་སློབ་འཛིན་ཚོགས་ཀྱི་སྤྱི་ཁྱབ་འགན་འཛིན་ཀརྨ་ཆུང་བདག་ལགས་སུ་བཅར་འདྲི་ཞུས་པ་ལྟར་ན། ཕྱི་ལོ་ ༢༠༠༨ ལོའི་རྗེས་སུ་རྒྱ་མིས་བོད་ནས་ཡོང་མཁན་ཚོའི་ཕྱི་སྐྱོད་ལག་འཁྱེར་ཐོག་དམ་དྲག་བྱས་ཡོད་སྟབས། བོད་ནས་ཕེབས་མཁན་ཧ་ཅང་ཉུང་ཉུང་ཡིན་པ་དང་། ད་ལྟའི་ཤེས་རབ་དགའ་ཚལ་སློབ་གླིང་གི་དཀའ་ངལ་ཆེ་ཤོས་དེ་གསར་ཞུགས་སློབ་མ་མེད་པ་དེ་རེད། དཀའ་ངལ་དེ་ཤེས་རབ་དགའ་ཚལ་སློབ་གླིང་གཅིག་པུ་ཙམ་མ་ཡིན་པར་བཙན་བྱོལ་ནང་གི་བོད་སློབ་ཁག་ཡོངས་དང་། ཐ་ན་གཞིས་ཆགས་ཁག་ཏུའང་བོད་མི་ལོ་རེ་བཞིན་ཉུང་རུ་འགྲོ་བཞིན་ཡོད་པ་རེད། གནས་སྟངས་འདི་ནི་ཕྱི་ལོ་ ༡༩༥༩ ལོར་བོད་མི་ཚོ་ཐོག་མར་རྒྱ་གར་ནང་བཙན་བྱོལ་དུ་ཡོང་སྐབས་ཀྱི་དཀའ་སྡུག་གི་གནས་བབ་ལས་ཀྱང་ཧ་ཅང་ཛ་དྲག་པོ་ཆགས་ཀྱི་ཡོད་པ་རེད། གསར་ཞུགས་སློབ་མ་མེད་པའི་གནས་སྟངས་དེ་འདྲའི་འོག གཅིག་བྱས་ན་མ་འོངས་པར་ཤེས་རབ་དགའ་ཚལ་སློབ་གླིང་གི་སྒོ་རྒྱག་དགོས་པའི་གནས་སྟངས་ཤིག་ཆགས་སྲིད་པ་རེད། ཅེས་སོགས་ངོ་སྤྲོད་གནང་སོང་།
ཁོང་གིས་ཤེས་རབ་དགའ་ཚལ་སློབ་གླིང་གི་སྡེ་ཚན་ཁག་ངོ་སྤྲོད་གནང་དོན། ཕྱི་ལོ་ ༢༠༡༡ ལོའི་ཟླ་ ༡ ཚེས་ ༤ ཉིན་ཤེས་རབ་དགའ་ཚལ་སློབ་གླིང་འདི་བཞིན་བོད་གཞུང་དབུས་སྣེ་ལེན་ཁང་གི་སྒྲིག་ཁོངས་ནས་སམ་བྷོ་ཊའི་ཁྱབ་ཁོངས་སུ་བཅུགས་པ་དང་། སློབ་གྲྭའི་འཛིན་སྐྱོང་སྒྲིག་འཛུགས་ཁག་ལ་བཅོས་བསྒྱུར་བཏང་སྟེ་རྨང་གཞི་དང་འདེམས་གསེས་ཞེས་སྡེ་ཚན་གཉིས་སུ་བགོས་པ་དང་། དེ་སྔའི་ལག་ཤེས་དང་ཤེས་ཡོན། གློག་ཀླད་ཚན་ཁག་གི་ཁར་ཧིན་སྐད་ཚན་པ་དང་ཞལ་ལག་ཚན་པ་ (ཟ་མ་བཟོ་སྟངས) སོགས་ཟུར་སྣོན་གྱིས་སྡེ་ཚན་ ༦ ཆགས་ཡོད་པ་དང་། རྨང་གཞི་ཚན་པའི་ནང་ལོ་ ༣ ལ་སློབ་སྦྱོང་གནང་སྟེ། འདེམས་གསེས་ཚན་པའི་ནང་བསླེབས་དུས་སློབ་མ་སོ་སོའི་མོས་པ་ལྟར་སྡེ་ཚན་སོ་སོར་ཞུགས་ཆོག་པ་དང་། འཛིན་རིམ་བཅུ་བ་བཅུ་གཉིས་མཐར་ཕྱིན་རྗེས། རྒྱ་གར་རྒྱལ་ཡོངས་འཛིན་རིམ་བཅུ་གཅིག་བཅུ་གཉིས་ཀྱི་ཡིག་འབྲེལ་ཡིག་རྒྱུགས་ (open school) ནང་འཛུལ་ཞུགས་ཆོག་པའི་ལམ་ཁ་བཟོས་ཡོད་པ་མ་ཟད། བོད་ཡིག་རྐྱང་བ་སྦྱོང་མཁན་ཚོར་ཡིག་རྒྱུགས་ཀྱི་ལམ་ནས་ས་ར་མཐོ་སློབ་ཏུ་མུ་མཐུད་སློབ་གཉེར་གནང་བའི་གོ་སྐབས་སྤྲད་པ་ལྟར། ད་ལྟ་ས་ར་མཐོ་སློབ་ནང་སློབ་གཉེར་གནང་མཁན་སློབ་མ་ ༤ ཡོད་ལ། ལག་ཤེས་ཚན་པའི་ཁོངས་ནས་ཞལ་ལག་སྡེ་ཚན་ཞེས་པ་ཞིག་གསར་འཛུགས་བྱས་ཏེ་ཟས་རིགས་སྣ་ཚོགས་བཟོ་སྟངས་སྐོར་གྱི་སྦྱོང་བརྡར་སྤྲད་དེ། རྒྱ་གར་གྱི་ཟས་རིགས་བཟོ་སྟངས་ཆེད་སྦྱོང་མཐོ་སློབ་ཁག་ཏུ་ཡིག་ཚད་གཏོང་བའི་གོ་སྐབས་སྤྲད་ཡོད་པ་མ་ཟད། ད་དུང་བོད་སློབ་ཁག་དང་གྲྭ་ས་ཁག་ནས་ཁུངས་མ་འཁྱོལ་བའི་གཞོན་སྐྱེས་ཚོར་ཤེས་རབ་དགའ་ཚལ་སློབ་གླིང་ནང་འཛུལ་ཞུགས་ཆོག་པའི་གོ་སྐབས་གཉིས་པ་སྤྲོད་ཀྱི་ཡོད་ལ། དེང་སྐབས་ཤེས་རབ་སློབ་གླིང་འདི་དེ་སྔོན་དང་བསྡུར་ན་སློབ་སྦྱོང་གི་གོ་སྐབས་དང་འཚོ་གནས་ཀྱི་མཐུན་འགྱུར་སོགས་ཕྱོགས་ཡོངས་ནས་ཧ་ལས་པའི་ཡར་རྒྱས་བཏང་ཡོད་པ་རེད། ཅེས་བརྗོད་བྱུང་།
གསར་འགོད་པས་རྒྱུས་ལོན་བྱུང་བ་ལྟར་ན། བཞུགས་སྒར་དྷ་རམ་ས་ལའི་ཉེ་འདབས་སུ་ཚུགས་པའི་ཤེས་རབ་དགའ་ཚལ་སློབ་གླིང་ནི་བོད་མིའི་སྐྱབས་མགོན་༧གོང་ས་མཆོག་གི་བཀའ་དགོངས་ལྟར་བོད་ནས་གསར་དུ་འབྱོར་མཁན་རང་ལོ་ ༡༨ ནས་ ༣༠ བར་གྱི་ན་གཞོན་ཚོར་དམིགས་ཏེ་ཕྱི་ལོ་ ༡༩༩༣ ལོའི་ཟླ་ ༣ ཚེས་ ༧ ཉིན་བོད་གཞུང་དབུས་སྣེ་ལེན་ཁང་གི་སྒྲིག་ཁོངས་སུ་གསར་དུ་བཙུགས་པ་དང་། དེ་ཡང་ཐོག་མར་བོད་གཞུང་དབུས་སྣེ་ལེན་ཁང་གི་འཛིན་སྐྱོང་འོག་སློབ་མ་ ༡༠༠ ལྷག་ལ་རས་གུར་ཕུབ་སྟེ་སློབ་སྐྱོང་བྱས་པ་ཡིན་སྟབས། སློབ་གྲྭ་འདིའི་མིང་ལ་ ༼གསོག་སྒར་སློབ་གྲྭ་༽ ཞེས་འབོད་ཅིང་། ཕྱི་ལོ་ ༡༩༩༤ ལོར་སློབ་སྦྱོང་གི་དུས་ཡུན་ལོ་གཅིག་ནས་གཉིས་སུ་གཏན་འཁེལ་བ་དང་། ཕྱི་ལོ་ ༡༩༩༨ ལོར་༧གོང་ས་མཆོག་ཆེད་ཕེབས་ཀྱིས་༼ ཤེས་རབ་དགའ་ཚལ་སློབ་གླིང་༽ཞེས་མཚན་གསོལ་ཞིང་། སློབ་གྲྭའི་ནང་ལག་ཤེས་དང་ཤེས་ཡོན་སྡེ་ཚན་གཉིས་སུ་དབྱེ་སྟེ་ལག་ཤེས་ནང་འཚེམ་བཟོ་དང་ལྷ་བྲིས་གཉིས་དང་། ཤེས་ཡོན་ནང་བོད་དབྱིན་སྐད་ཡིག་གཉིས་དང་གློག་ཀླད་བཅས་སྡེ་ཚན་འགའ་བཙུགས་ཡོད་པ་དང་། སློབ་སྦྱོང་མཐར་ཕྱིན་སྟངས་ཐད་ནས་བོད་ཡིག་འཛིན་རིམ་བཅུ་གཉིས་བར་དང་། དབྱིན་ཡིག་འཛིན་རིམ་བརྒྱད་པ། འཚེམ་བཟོ་དང་ལྷ་བྲིས་ལོ་གསུམ་བཅས་སུ་གཏན་འབེབས་བྱས་ཡོད་འདུག
ཕྱི་ལོ་ ༢༠༡༡ ལོར་སམ་བྷོ་ཊ་བོད་སློབ་འཛིན་ཚོགས་ཀྱི་ཁྱབ་ཁོངས་སུ་ཟླ་སྒྲིལ་བཏང་བ་ཡོད་ཅིང་། ཕྱི་ལོ་ ༢༠༠༧ ཡས་མས་ལ་སློབ་ཕྲུག་ཆེས་མང་བའི་སྐབས་སུ་སློབ་མ་ ༩༠༠ ལས་བརྒལ་མྱོང་ཡོད་པ་དང་། འདས་པའི་མི་ལོ་ ༢༣ རིང་ཤེས་རབ་དགའ་ཚལ་སློབ་གླིང་དུ་སློབ་ཞུགས་གནང་མཁན་སློབ་མ་ ༧༤༠༣ བྱུང་འདུག
གསར་འགོད་པ། པདྨ་རྒྱལ།
སློབ་གྲ་དེའི་དབུས་འཛིན་མཆོག་ལ་འདྲི་བ་ཞུ་རྒྱུར། དེང་སྐབས་སློབ་གྲ་དེར་འཛུལ་བཞུག་བྱེད་པ་ལ་ཆ་སྐྱེན་གང་དགོས་མིན་ལན་ཞིག་གནང་སྐྱོང་ཡོང་བ་ཞུ།
གསར་འགྱུར་ཁ་གསལ་གོ་བདེ་སྤུས་དག་བྲིས་འདུག་ཐུགས་རྗེ་ཆེ། ཤཻས་རབ་དགའ་ཚལ་ཙམ་མ་རེད།་བཙན་བྱོལ་བོད་མིའི་སློབ་གྲྭ་དང་དགོན་སྡེ་ཡོངས་ལ་ཞིབ་འཇུག་གསལ་བོ་ཞིག་གནང་སྟེ་མང་ཚོགས་ལ་མཁྱེན་རྟོགས་ཡོང་བ་གནང་རྒྱུ་གལ་ཆེན་པོ་རེད།
གང་ལྟར་ད་ལོའི་སྤྱི་ཟླ་ལྔ་པའི་ནང་འཛིན་རིམ་བཅུ་གཉིས་ཀྱི་སློབ་མ་རྣམས་ཕྱིན་པ་ཡིན་ན་གསོག་སྒར་སློབ་གྲྭར་སློབ་མ་ 70 ལས་ལྷག་རྒྱུ་མ་རེད། སྐབས་དེར་དགེ་རྒན་དང་ལས་བྱེད་ 50 ཡོད་པ་རེད། སྐབས་དེར་སློབ་གྲྭ་སྒོ་རྒྱག་རྒྱུ་ཡིན་ནམ། ཡང་ན་ངོ་བོ་གཞན་ཞིག་ལ་བསྒྱུར་མིན་ཐག་གིས་གཅོད་དགོས་པ་རེད་མ་གཏོགས་རང་འཇགས་འཇོག་ཐབས་ཡོད་པ་མ་རེད། ས་ཆ་ཡག་པོ་རེད། ཁང་པ་དང་ཆ་རྐྱེན་ཡག་པོ་རེད། འདི་ལྟར་བཞག་པ་ཡིན་ན་གྱོང་ཆེན་པོ་མ་རེད་དམ།
སློབ་མའི་ཡོངས་ཁུངས་ནི་ཆོལ་ཁ་གསུམ་ནས་ཡིན་པས་ད་དུང་ངེས་གཏན་མེད།