རྒྱ་ནག་རྒྱལ་ཁབ་དཔལ་འབྱོར་བསྡོམས་རྩིས་ཁང་གི་འགན་འཛིན་ཝང་པའོ་ཨན་གྱིས་ཁྲིམས་འགལ་ཚབས་ཆེན་བྱས་པའི་ཉེས་མིང་འོག་འཛིན་བཟུང་བྱས་ཡོད་འདུག
ཁ་སང་ཕྱི་དྲོར་རྒྱ་ནག་དབུས་སྒྲིག་ཁྲིམས་ཞིབ་བཤེར་ཁང་གིས། རྒྱལ་ཁབ་དཔལ་འབྱོར་བསྡོམས་རྩིས་ཁང་གི་འགན་འཛིན་ཝང་པའོ་ཨན་གྱིས་ཁྲིམས་འགལ་ཚབས་ཆེན་བྱས་ཡོད་སྟབས། ད་ལྟའི་ཆར་ལས་མཚམས་བཞག་སྟེ་ཞིབ་བཤེར་བྱེད་བཞིན་ཡོད་སྐོར་བསྒྲགས་ཡོད་པ་དང་། ཁ་སང་ཕྱི་ཚེས་ ༢༦ ཉིན་རྒྱ་ནག་གི་མ་རྐང་ཁྲོམ་རར་འདས་པའི་ཟླ་ ༡༣ ནང་གི་ཉམས་དམས་ཚབས་ཆེ་ཤོས་དེ་བྱུང་ཡོད་པ་དང་། ཁ་སང་ཕྱི་དྲོར་ཚོགས་འདུ་ཞིག་གི་ཐོག་ཝང་པའོ་ཨན་གྱིས་རྒྱ་ནག་གི་མ་རྐང་ཁྲོམ་རའི་གཡོ་འགུལ་གྱིས་དཔལ་འབྱོར་འཕེལ་རྒྱས་ལ་ཤུགས་རྐྱེན་ཐེབས་ཀྱི་ཡོད་ཀྱང་ཤུགས་རྐྱེན་ཆེན་པོ་ཐེབས་ཀྱི་མེད་ལ། མ་རྐང་ཁྲོམ་རའི་འཁོར་རྒྱུག་ལ་ཡིད་ཆེས་བརྟན་པོ་ཡོད་སྐོར་བརྗོད་ཡོད་པ་དང་། ཁོས་གཏམ་བཤད་བྱས་ནས་ཆུ་ཚོད་ ༣ ལྷག་ལས་མ་འགོར་བར་འཛིན་བཟུང་བྱས་ཡོད་འདུག
རྒྱ་ནག་དབུས་སྒྲིག་ཁྲིམས་ཞིབ་བཤེར་ཁང་གིས་ཝང་པའོ་ཨན་གྱི་ད་ལྟའི་ལས་འགན་ལ་ཞིབ་བཤེར་བྱེད་བཞིན་ཡོད་དང་། ཡང་ན་སྔོན་ཆད་ཀྱི་ལས་འགན་ལ་ཞིབ་བཤེར་བྱེད་བཞིན་ཡོད་ཁ་གསལ་བརྗོད་མེད་ཀྱང་། ཕྱི་ལོ་ ༢༠༡༥ ཟླ་ ༤ པ་ནས་བཟུང་ཝང་པའོ་ཨན་གྱིས་རྒྱ་ནག་རྒྱལ་ཁབ་དཔལ་འབྱོར་བསྡོམས་རྩིས་ཁང་གི་འགན་འཛིན་གྱི་ལས་འགན་འཁུར་ཡོད་པ་དང་། དེའི་སྔོན་དུ་རྒྱལ་ཁབ་ནོར་སྲིད་ཁང་གི་འགན་འཛིན་གཞོན་པ་ཡིན་སྟབས། རྒྱ་ནག་གི་མ་རྐང་ཁྲོམ་རའི་ཉམས་དམས་ཀྱིས་འཛམ་གླིང་གི་མ་དངུལ་འཇོག་མཁན་ཚོར་བློ་མ་བདེ་བ་ཆེན་པོ་བཟོས་ཡོད་པ་མ་ཟད། རྒྱ་ནག་གི་དཔལ་འབྱོར་འཕེལ་རྒྱས་ཀྱི་བསྡོམས་རྩིས་ཁག་ལ་དོགས་པ་ཇེ་ཆེར་འགྲོ་བཞིན་ཡོད་སྟབས། གློ་བུར་དུ་བྱུང་བའི་ཝང་པའོ་ཨན་གྱི་ཞིབ་བཤེར་དེ་དཔོག་དཀའ་བའི་དུས་སྐབས་ཤིག་ཏུ་བྱུང་ཡོད་སྐོར་རྗོད་ཀྱི་འདུག
འདས་ལོའི་ཕྱི་ཟླ་ ༣ པའི་ནང་རྒྱ་ནག་སྲིད་གྲོས་ཀྱི་ཚོགས་ཆུང་ཚོགས་འདུའི་ཐོག རྒྱ་ནག་རྩིས་བཤེར་ཁང་གི་འགན་འཛིན་གཞོན་པ་ཟུར་པ་ཏུང་ཏ་ཧྲིན་གྱིས་འདས་པའི་ལོ་ཤས་ནང་རྒྱ་ནག་གི་དཔལ་འབྱོར་འཕེལ་རྒྱས་ཀྱི་གྲངས་འབོར་རྫུན་བཟོ་བྱས་པ་ཧ་ཅང་ཚབས་ཆེན་ཡིན་པ་དང་། ས་གནས་མགོ་ཁྲིད་ཅིག་གི་སྐད་ཆ་ལུང་འདྲེན་གྱིས་འདས་པའི་ལོ་ཤས་ནང་རྫུན་བཟོའི་གྲངས་འབོར་མཐོ་དྲགས་པའི་རྐྱེན་གྱིས་ད་ལྟ་གཡང་གཟར་ནས་ལྷུང་བ་ལྟ་བུའི་ཉམས་ཆག་འབྱུང་བཞིན་ཡོད་སྐོར་བརྗོད་ཡོད་འདུག
རྒྱལ་སྤྱིའི་དཔལ་འབྱོར་རིག་པའི་དཔྱད་ཞིབ་པ་ཚོས། རྒྱ་ནག་གཞུང་ཕྱོགས་ནས་འདས་ལོའི་དཔལ་འབྱོར་འཕེལ་རྒྱས་ཀྱི་མྱུར་ཚད་འདས་པའི་ལོ་ངོ་ ༢༥ རིང་གི་ཆེས་དམའ་ཤོས་ཤིག་ཆགས་ཡོད་ཀྱང་། སྔར་ལོ་དང་བསྡུར་ན་རྒྱ་ནག་ནང་གི་ཐོན་སྐྱེད་ཀྱི་སྤྱིའི་ཚད་གཞི་བརྒྱ་ཆ་ ༦.༩ འཕར་ཡོད་ཚུལ་བསྒྲགས་ཡོད་ཀྱང་། དོན་དངོས་སུ་བརྒྱ་ཆ་ ༣.༢ ཡས་མས་ལས་འཕར་མེད་སྐོར་རྗོད་ཀྱི་འདུག
གསར་འགོད་པ། པདྨ་མཚོ།
