བོད་རང་སྐྱོང་ལྗོངས་རྒྱལ་ཁབ་ཐོན་ཁུངས་ལས་ཁང་གི་མགོ་ཁྲིད་ལོའུ་ཡས་ཁྲོ་ཟེར་བ་ཞིག་གིས་ཁྲིམས་འགལ་ཚབས་ཆེན་བྱས་པའི་དོགས་གཞིའི་འོག་ཞིབ་བཤེར་བྱེད་བཞིན་ཡོད་འདུག
ཁ་སང་བོད་རང་སྐྱོང་ལྗོངས་སྒྲིག་ཁྲིམས་ཞིབ་བཤེར་ཁང་གིས་གནས་ཚུལ་བསྒྲགས་པ་ལྟར་ན། བོད་རང་སྐྱོང་ལྗོངས་རྒྱལ་ཁབ་ཐོན་ཁུངས་ལས་ཁང་ཟེར་བའི་དམར་ཤོག་ཚོགས་པའི་མགོ་ཁྲིད་གཞོན་པ་ཟུར་པ་ལོའུ་ཡས་ཁྲོ་(Liú yùchao)་ཡིས་ཁྲིམས་འགལ་ཚབས་ཆེན་བྱས་པའི་དོགས་གཞིའི་འོག་ཞིབ་བཤེར་བཞིན་ཡོད་འདུག
ལོའུ་ཡས་ཁྲོ་ནི་ཕྱི་ལོ་ ༡༩༧༢ ནས་ ༡༩༨༤ བར་ལྷ་ས་གྲོང་ཁྱེར་སྐྱེལ་འདྲེན་ཚོང་གཉེར་ཁང་གི་ནག་ཆུའི་སྐྱེལ་འདྲེན་ས་ཚིགས་ཀྱི་རྩིས་པ་དང་། ཕྱི་ལོ་ ༡༩༨༦ ནས་བོད་རང་སྐྱོང་ལྗོངས་མི་མང་སྲིད་གཞུང་གི་དཔལ་འབྱོར་སྒྲིག་གཞི་བཅོས་བསྒྱུར་ལས་སྒྲུབ་ཁང་དུ་ལས་གནས་སྤར། ཕྱི་ལོ་ ༡༩༨༧ ནས་ ༡༩༩༡ བར་བོད་རང་སྐྱོང་ལྗོངས་འགྲིམ་འགྲུལ་ཁང་མཉམ་འབྲེལ་ཚོང་གཉེར་ཚན་པའི་མགོ་ཁྲིད་དང་བོད་རང་སྐྱོང་ལྗོངས་སྣང་རྫོང་གི་རྫོང་དཔོན་གཞོན་པ། ཕྱི་ལོ་ ༡༩༩༢ ནས་ ༡༩༩༦ བར་ཀོང་པོ་འཇོ་མདའ་རྫོང་གི་དམར་ཤོག་དྲུང་ཆེ། ཕྱི་ལོ་ ༡༩༩༦ ནས་༡༩༩༨ བར་ཉིང་ཁྲི་ས་ཁུལ་ཚོང་ལས་ཁང་གི་མགོ་ཁྲིད་གཞོན་པ། ཕྱི་ལོ་ ༡༩༩༨ ནས་ ༢༠༠༡ བར་བོད་རང་སྐྱོང་ལྗོངས་ཚན་རྩལ་ཁང་གི་དམར་ཤོག་ཚོགས་པའི་མགོ་ཁྲིད་བྱས་པ། ཕྱི་ལོ་ ༢༠༠༨ ནས་ད་ལྟའི་བར་བོད་རང་སྐྱོང་ལྗོངས་རྒྱལ་ཁབ་ཐོན་ཁུངས་ལས་ཁང་ཟེར་བའི་དམར་ཤོག་ཚོགས་པའི་མགོ་ཁྲིད་གཞོན་པ་བཅས་ཀྱི་གོ་གནས་བཟུང་ཡོད་འདུག
གསར་འགོད་པ། པདྨ་མཚོ།
གང་ལྟར་གནས་སྟངས་ཁ་གསལ་གོ་བདེ་ཡག་པོ་འདུག་མ་ཟད་ལོ་རྒྱུས་སོགས་ལ་དོན་སྣང་བྱས་འདུག་དེ་འདྲ་ཡིན་ན་གསར་འགྱུར་འཚོལ་མཁན་ཚོ་ལ་དགོས་པ་ཕན་ཐོག་ཡོད་པར་མཐོང་མ་བོད་རང་གིས་སྐད་ཡིག་གི་ལམ་ནས་གནས་ཚུལ་སྤེལ་སྟངས་ཡག་ཤོས་སྟེ་གསར་འགྱུར་ཁ་གསལ་ཞིག་དགོས་པ་གལ་ཆེན་ཡིན་པར་མ་ཟད་ངེས་ཁུངས་བཙན་དགོས་པ་རེད།