ང་དངོས་གཞིའི་ནང་མ་བཞག་པ་དེས་རང་བཙན་གྱི་ལྟ་བ་ལངས་ཕྱོཊ་བཀག་པར་ངོས་འཛིན་གྱི་ཡོད།

ཨ་ཚོགས་ཀླུ་མཁར་བྱམས་ལགས་ཀྱིས་དབང་ཤུགས་ཀྱི་ཐོག་ནས་ཁྲིམས་སྒྲིག་བར་བཟོ་བྱས་ཏེ་ང་ཚོ་བཀག་བཞག་པ་ཡིན་པས་དངོས་གཞིའི་འོས་དམིགས་རྣམས་ལ་བཀྲ་ཤིས་བདེ་ལེགས་ཀྱི་འཚམས་འདྲི་ཞུ་ཐུབ་ཀྱི་མི་འདུག་ཟེར།

དེ་རིང་སྔ་དྲོའི་ཆུ་ཚོད་ ༡༠།༣༠ ཐོག་དྷ་ས་བོད་ཀྱི་གསོལ་མགྲོན་ཁང་གི་ཚོགས་ཁང་དུ། སྲིད་སྐྱོང་འོས་མིར་ལང་མཁན་ཨ་ཚོགས་ཀླུ་མཁར་བྱམས་ལགས་ཀྱིས་གསར་འགོད་ལྷན་ཚོགས་ཤིག་བསྐོངས་ཏེ། ཁོང་དངོས་གཞིའི་འོས་དམིགས་ནང་མ་བཞག་པ་དེ་འོས་འཐོབ་མིན་ལ་མ་ལྟོས་པར་བོད་རང་བཙན་གྱི་ལྟ་བ་འཛིན་མཁན་ཞིག་ལ་སྡིངས་ཆ་ཙམ་ཡང་མ་སྤྲད་པ་ཞིག་ཆགས་ཡོད་སྟབས། དངོས་གཞིའི་སྐབས་སུ་འདོད་པ་མ་ཁེངས་པའི་མི་མང་གིས་རྣམ་འགྱུར་ག་རེ་བསྟན་པ་ཡིན་ནའང་དབུས་འོས་བསྡུ་ལས་ཁང་དང་དངོས་གཞིའི་འོས་དམིགས་རྣམས་ཀྱིས་འགན་ཆ་ཚང་འཁུར་དགོས་སྐོར་བརྗོད་སོང་།

ཨ་ཚོགས་ཀླུ་མཁར་བྱམས་ལགས་སྲིད་སྐྱོང་གི་དངོས་གཞིའི་འོས་དམིགས་ནང་མ་ཚུད་པའི་སྐོར་ལ་ཁོང་གིས། དེ་རིང་གི་གསར་འགོད་གསལ་བསྒྲགས་འདིའི་གལ་ཆེ་ཤོས་དེ། ཁ་སང་དབུས་འོས་བསྡུ་ལས་ཁང་གི་ངོས་ནས་ཕྱི་ལོ་ ༢༠༡༦ ལོའི་སྲིད་སྐྱོང་དང་སྤྱི་འཐུས་ཀྱི་དངོས་གཞིའི་འོས་དམིགས་རྣམ་ཁྱབ་བསྒྲགས་བྱས་ཡོད་པ་དང་། ང་ཡིན་ན་སྲིད་སྐྱོང་འོས་དམིགས་ཨང་གསུམ་པ་ནས་བཞག་མེད་པ་དེ་གསལ་བོ་བྱུང་སོང་བ་རེད། དེར་བརྟེན་དེ་རིང་ངས་དེ་དང་འབྲེལ་བའི་གསར་འགོད་གསལ་བསྒྲགས་ཤིག་སྔོན་མ་ནས་སྤེལ་རྒྱུ་ཡིན་ཟེར་ནས་བཤད་ཡོད་སྟབས། ངས་བརྒྱུད་རིམ་འདྲ་པོ་དེ་གསར་འགོད་པ་རྣམ་པར་ཞུ་རྒྱུ་ཡིན། ཞུ་དགོས་པའི་རྒྱུ་མཚན་ག་རེ་རེད་ལབ་ན། སོ་སོ་ལས་རིམ་འདིའི་ནང་དང་ལེན་བྱས་ནས་ཞུགས་པ་ཡིན་པས་ལས་རིམ་འདིའི་ནང་ག་རེ་བྱུང་བ་ཆ་ཚང་ལ་ང་རྒྱུས་ཡོད་པ་རེད་ལ། ངས་སྤྱི་ཚོགས་སྒང་ལ་ང་དང་འབྲེལ་བའི་གནས་ཚུལ་གསལ་པོ་བཟོ་དགོས་པ་དེ་ངའི་འོས་འགན་ཆགས་བསྡད་ཡོད་སྟབས། དེ་རིང་རྣམ་པ་ཚོ་སྐད་གཏོང་དགོས་པའི་རྒྱུ་མཚན་གལ་ཆེ་ཤོས་དེ་ཡིན།

སྤྱིར་བཏང་ཡིན་ན་ད་རེས་དངོས་གཞིའི་ནང་སུ་བསླེབས་པ་ཡིན་ནའང་དེ་ལ་འཚམས་འདྲི་བཀྲ་ཤིས་བདེ་ལེགས་ཞུ་བ་དང་། སོ་སོར་མ་ཐོབ་པ་ཡིན་ན་གུ་ཡངས་བཟོད་གསོལ་གྱི་ངང་ནས་འོས་མི་གཞན་པ་ཚོར་འཚམས་འདྲི་ཞུ་དགོས་པ་དེ་ང་ཚོའི་རྩ་བའི་འགྲོ་སྟངས་ཤིག་རེད། ཡིན་ནའང་། ངས་ད་རེས་དེ་འདྲ་ཞུ་མ་ཐུབ་པའི་རྒྱུ་མཚན་ག་རེ་ཆགས་བསྡད་ཡོད་པ་རེད་ཟེར་ན། ང་ཚོ་འོས་འདེམས་ཀྱི་ནང་ཞུགས་ཏེ་འོས་ཤོག་གིས་ཁ་གྲགས་ནས་ཕམ་པའི་གནས་སྟངས་ཤིག་མ་རེད། འོས་བསྡུ་ལས་ཁང་གི་ཁྲིམས་སྒྲིག་བར་ནས་བཟོས་ཏེ། ང་ཚོ་དབང་ཤུགས་ཀྱི་ཐོག་ནས་མར་ཕུད་བཞག་པ་ཞིག་ཡིན་སྟབས། ངས་སྲིད་སྐྱོང་ཡིན་ནའང་རེད་དངོས་གཞིའི་འོས་དམིགས་ནང་སླེབ་མཁན་ཚོར་འཚམས་འདྲི་ཞུ་མ་ཐུབ་པའི་རྒྱུ་མཚན་གཙོ་བོ་དེ་ག་རེ་རེད་ཟེར་ན། མི་སྒེར་གྱི་གནད་དོན་ཞིག་དང་ཡང་ན་རྒྱ་ཆེའི་འོས་བླུག་མཁན་མི་མང་གིས་འོས་ཤོག་ལ་རྩིས་མེད་བྱས་པ་དེ་འདྲ་བཤད་ཀྱི་མེད། འོས་བསྡུ་ལས་ཁང་གིས་ཡག་པོ་མ་བྱས་པས་ངས་གལ་ཆེ་ཤོས་ད་རེས་ཀྱི་འོས་བསྡུའི་གོ་རིམ་ང་སྒེར་གྱི་ངོས་ནས་ངོས་ལེན་བྱེད་མ་ཐུབ་པའི་རྒྱུ་མཚན་དེ་ཡིན།

ང་ཀླུ་མཁར་བྱམས་སྲིད་སྐྱོང་གི་དངོས་གཞིའི་ནང་མ་བཞག་པ་དེ་རྩ་བའི་ཆ་ནས་གནད་དོན་ཆུང་ཆུང་ཞིག་རེད། རྒྱ་ཆེའི་འོས་འདེམས་མི་མང་གི་ངོས་ནས་འདི་ལྟར་བྱས་ནས་ཐག་བཅད་པ་ཡིན་ན། ང་ཡིན་ནའང་དམིགས་བསལ་གྱིས་ཅི་གང་ཞུ་དགོས་པའི་གནས་སྟངས་ཆགས་ཡོད་པ་མ་རེད། ཡིན་ནའང་། གལ་ཆེ་ཤོས་དེ་ག་རེ་རེད་ཟེར་ན། འོས་བསྡུ་ལས་ཁང་གིས་འོས་དམིགས་གཉིས་མ་གཏོགས་མ་བཞག་པ་དེ་ཀླུ་མཁར་བྱམས་གཅིག་པུའི་གནད་དོན་མ་རེད། ང་དང་པོ་ལངས་སྐབས་ནས་ང་བོད་རང་བཙན་གྱི་དམིགས་ཡུལ་ཐོག་ནས་ལངས་ཀྱི་ཡོད་ཅེས་བཤད་ཡོད། དེར་བརྟེན་ད་རེས་འོས་བསྡུ་ལས་ཁང་ནས་ང་བཀག་པ་དེ་བོད་རང་བཙན་གྱི་བརྒྱུད་ལམ་ཞིག་དང་། ང་ཚོ་བོད་རང་བཙན་གྱི་ལྟ་བ་ལངས་ཕྱོགས་འཁུར་མཁན་ཞིག་ལ་འོས་འཐོབ་མིན་ལ་མ་ལྟོས་པར་སྡིངས་ཆ་ཁོ་རང་མ་སྤྲད་པ་དེ་རེད། དེར་བརྟེན་འདི་ང་ཚོ་བོད་མི་རིགས་ཀྱི་ལོ་རྒྱུས་ཐོག་ནས་རྒྱལ་གཅེས་དཔའ་བོ་དཔའ་མོ་ཐམས་ཅད་ཀྱི་ཤི་བོའི་དུར་སའི་ནང་ནས་ངས་བསམ་བློ་ཞིག་གཏང་བ་ཡིན་ན། འདི་ཁོང་ཚོས་ཁྲེལ་མེད་བྱས་པ་ཞིག་རེད། བོད་ཀྱི་རྒྱལ་རབས་ལོ་རྒྱུས་ལ་འགན་མ་འཁུར་བ་ཞིག་རེད། ང་ཚོ་བཙན་བྱོལ་བ་ཆགས་དགོས་པའི་རྒྱུ་མཚན་དེ་རྒྱལ་ཁབ་ཤོར་ནས་ཡོང་བ་རེད། ད་སྐབས་ང་ཚོར་དངོས་གནས་དམིགས་ཡུལ་ཞིག་ཡོད་པ་ཡིན་ན། ང་ཚོའི་རྒྱལ་ཁབ་སླར་གསོ་བྱེད་དགོས་པ་རེད། རྒྱལ་ཁབ་སླར་གསོ་བྱེད་མཁན་གྱི་ང་ཚོས་སྲིད་སྐྱོང་འོས་མི་ཞིག་གི་ངོས་ནས་སྐད་ཆ་འདི་བཤད་ཡོང་དུས་ཁྲིམས་སྒྲིག་བར་བཟོ་བྱས་ནས་བཅད་བཞག་པ་དེ། ངའི་ངོས་ནས་བོད་རང་བཙན་གྱི་ལྟ་བ་ལངས་ཕྱོགས་བཀག་པར་ངོས་འཛིན་བྱེད་བཞིན་ཡོད། ཅེས་བརྗོད་སོང་།

ཡང་ཁོང་གིས། བོད་རྒྱ་ཆེའི་མི་མང་གི་མངོན་འདོད་དང་རེ་བ་དེ་ད་ལྟ་ལྷག་ཡོད་པའི་སྲིད་སྐྱོང་འོས་དམིགས་འདི་གཉིས་ཀྱིས་བསྐོང་ཐུབ་ཀྱི་རེད་དམ། གལ་སྲིད་འདིས་མ་བྱུང་བ་ཡིན་ན། མི་མང་ལ་ཆབ་སྲིད་ཀྱི་ཁྱབ་ཁོངས་ནས་གདམ་ག་གསུམ་པ་ཞིག་མ་སྤྲད་པའི་འགན་དེ་སུས་འཁུར་དགོས་པ་རེད། ང་ཚོའི་དབུས་འོས་བསྡུ་ལས་ཁང་གིས་འཁུར་དགོས་པ་རེད་ལ། དེ་བཞིན་ད་ལྟའི་འོས་བསྡུའི་ལས་རིམ་ནང་ཞུགས་བསྡད་ཡོད་པའི་སྲིད་སྐྱོང་རྣམ་པ་ཚོ་ཡིན་ནའང་འགན་ཐད་ཀར་ཡོད་པ་རེད། སོ་སོའི་འོས་ཤོག་གཅིག་པུ་ལ་མ་གཏོགས་གཞན་པའི་གནས་སྟངས་གཅིག་ལའང་དོ་སྣང་མ་བྱས་པ་དེ་རྩ་བའི་ཆ་ནས་ཡག་པོ་ཞིག་མ་རེད་ལ། འགྲོ་སྟངས་ཤིག་ཀྱང་མ་རེད། ཅེས་དང་། རྒྱ་གར་གཞུང་དང་འོས་བསྡུའི་ཞིབ་འཇུག་ཚོགས་པ་སོགས་ནས་བཙན་བྱོལ་བོད་མིའི་འོས་བསྡུའི་ལས་རིམ་ལ་ལྟ་སྟངས་ཡག་པོ་བྱུང་མེད་སྐོར་སོགས་བརྗོད་སོང་།

ཡང་ཁོང་གིས་སྲིད་སྐྱོང་འོས་མིའི་དྲིལ་བསྒྲགས་སྐོར་སྐྱོད་ཀྱི་བྱུང་སོང་ལྷག་གསུམ་སྐོར་བརྗོད་སྐབས། ཆེད་དུ་ཚོགས་ཆུང་བཙུགས་ཏེ་དངུལ་ཚང་མ་དངུལ་ཁང་ནང་བཞག་ཡོད་ལ། རྒྱ་གར་ནང་གི་རྩིས་ཁོངས་སུ་ཁྱོན་ཧིན་སྒོར་འབུམ་ ༦ ལྷག་(༦༦༤༢༨༢ )བྱུང་ཡོད་པ་དང་། ཡུ་རོབ་དང་ཨ་རིའི་ནང་བསྡོམས་པའི་ཧིན་སྒོར་འབུམ་གཉིས་ཡས་མས་ཤིག་གནས་སྐབས་ཚུར་འབྱོར་མ་ཐུབ་པར་ལྷག་ཡོད་ལ། ས་གནས་ཁག་ཏུ་སྐོར་སྐྱོད་ཆེད་ཧིན་སྒོར་ ༢༣༩༡༣༢ དང་ཁྱབ་བསྒྲགས་ཀྱི་སྦྱར་ཡིག་སོགས་ལ་ཧིན་སྒོར་ ༧༧༣༥ བཅས་ཁྱོན་ཧིན་སྒོར་ ༥༤༨༠༠༠ སོང་རྗེས། དངུལ་ཁང་དུ་ཧིན་སྒོར་ ༡༡༥༨༣༡ ལྷག་ཡོད་པ་དང་། མ་འོངས་པར་དངུལ་ལྷག་དེ་ཚོ་བོད་ཀྱི་འཐབ་རྩོད་ཐོག་བེད་སྤྱོད་གཏང་རྒྱུ་ཡིན་སྐོར་བརྗོད་སོང་།

དེ་ཡང་འོས་བསྡུ་དང་འབྲེལ་འགྲོ་གྲོན་ཐད་ལ་ཁོང་གིས། དབུས་འོས་བསྡུ་ལས་ཁང་གི་ངོས་ནས་སྲིད་སྐྱོང་གི་སྔོན་འགྲོ་དང་དངོས་གཞིའི་འོས་བསྡུའི་བར་དུ་འགྲོ་སོང་གཏོང་ཆོག་པའི་ཚད་དེ་འབུམ་ ༨ རེད། ངའི་ཚད་གཞི་འདིར་ལྟ་དུས། ང་ཚོས་འགྲོ་སོང་གང་ཉུང་ཉུང་བཏང་ཡང་འདི་འདྲ་ཞིག་ཤོར་ཡོད་པ་ཡིན་ན། ད་ལྟའི་སྲིད་སྐྱོང་ལས་ཐོག་བློ་བཟང་སེང་གེ་དང་སྤེན་པ་ཚེ་རིང་གཉིས་ཀྱིས་གཞུང་འབྲེལ་ཁ་ལ་འཁུར་ནས་ཡར་མར་འགྲོ་རྒྱུ་དེ་ཚོ་གནས་ཚུལ་ལོག་ཁ་རེད་མ་གཏོགས། ཁྱོན་ཡོངས་ཀྱི་འགྲོ་སོང་ཚང་མ་རྩིས་ཡག་པོ་ཞིག་བརྒྱབ་པ་ཡིན་ན་འབུམ་ ༨ ཀྱིས་ངས་བསམ་བློ་བཏང་ན་འདང་བ་ཞིག་མིན་པ་ཧ་ཅང་གསལ་པོ་རེད་འདུག ཅེས་བརྗོད་སོང་།

མཇུག་ཏུ་ཁོང་གིས། འདོད་པ་མ་ཁེངས་བའི་མི་མང་གི་ངོས་ནས་དངོས་གཞིའི་སྐབས་སུ་འོས་ཤོག་བླུག་སྟངས་སོགས་ཀྱི་ཐོག་ནས་རྣམ་འགྱུར་ཞིག་ཏན་ཏན་སྟོན་རྒྱུ་ཡིན་པས། དེའི་འགན་དེ་ག་རེ་ཡིན་མིན་ལ་མ་ལྟོས་པར་དབུས་འོས་བསྡུ་ལས་ཁང་དང་འོས་དམིགས་ནང་ཞུགས་ཡོད་མཁན་ཚོས་འཁུར་དགོས་སྐོར་དང་། འོས་འདེམས་ག་འདྲ་ཞིག་གི་ཁྲོད་དུ་ཡིན་ནའང་རང་ཉིད་ལ་འོས་བླུགས་མྱོང་མེད་ལ། ད་རེས་ཀྱི་སྔོན་འགྲོའི་འོས་བསྡུའི་སྐབས་སུ་སོ་སོའི་འོས་ཤོག་གཅིག་པུ་དེ་རང་ཉིད་ཀྱི་ལྟ་བ་དང་ལངས་ཕྱོགས་གཅིག་པ་འཇམ་དབྱངས་ནོར་བུ་ལགས་སུ་བླུགས་ཡོད་ཀྱང་། རང་བཙན་གྱི་ལམ་དུ་འགྲོ་མཁན་ཞིག་གིས་དབུ་མའི་ལམ་གྱི་ལངས་ཕྱོགས་འཛིན་མཁན་ཞིག་ལ་འོས་བླུག་པ་ཡིན་ན། སོ་སོས་སོ་སོ་ནག་ཁུང་ནང་དུ་འཁྲིད་ཀྱི་ཡོད་པ་དང་གཅིག་པ་ཡིན་སྟབས། དངོས་གཞིའི་སྐབས་སུ་ཁོང་གིས་འོས་བླུག་རྒྱུ་མིན་པ་དང་། ཡིན་ནའང་། ཁོང་ལ་རྒྱབ་སྐྱོར་བྱེད་མཁན་ཚོའི་ངོས་ནས་འོས་བླུག་མིན་དེ་ཁོང་རང་ཚོའི་རང་དབང་ཡིན་སྐོར་བརྗོད་སོང་།

གསར་འགོད་པས་དབུས་འོས་བསྡུ་ལས་ཁང་གི་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས་སུ། སྔོན་ཆད་དང་མི་འདྲ་བར་ད་རེས་སྲིད་སྐྱོང་གི་དངོས་གཞིའི་འོས་དམིགས་གཉིས་གཏན་འབེབས་གསལ་བསྒྲགས་གནང་བ་དེ་འོས་བསྡུའི་སྒྲིག་གཞི་ག་རེ་གཞིར་བཟུང་ཐག་གཅོད་གནང་བ་ཡིན་བཀའ་འདྲི་ཞུས་པར་ཁོང་གིས། དེ་ནི་ཕྱི་ལོ་ ༢༠༡༥ ཟླ་ ༡༠ ཚེས་ ༡༩ ཉིན་འོས་བསྡུའི་འགན་འཛིན་རྣམ་པ་གསུམ་ནས་བཅའ་ཁྲིམས་ཀྱིས་འགན་དབང་སྤྲད་པའི་དགོངས་དོན་གཞིར་བཟུང་སྤྱི་མོས་ཐག་གཅོད་བྱས་པ་ཞིག་ཆགས་ཡོད་པ་དང་། དེ་ཡང་འོས་བསྡུའི་སྒྲིག་གཞི་དོན་ཚན་ ༦༧ པའི་ནང་གསེས་བཞི་པའི་ནང་ག་རེ་གསལ་ཡོད་པ་རེད་ཟེར་ན། སྲིད་སྐྱོང་ཡིན་ན་དངོས་གཞིའི་འོས་དམིགས་གཉིས་ལས་མ་ཉུང་བ་གསལ་བསྒྲགས་དགོས་ཞེས་འགྲེལ་བཤད་གསལ་པོ་གསལ་རྐྱང་ཡོད་པ་རེད། དེར་བརྟེན་སྔོན་འགྲོའི་འོས་ཤོག་གྲངས་བཤེར་ཐད་གང་ཡང་ཧ་མ་གོ་བའི་ཐོག་ནས་ང་ཚོས་གྲངས་ཆ་ཞིག་གཏན་འབེབས་བྱས་ཡོད་པ་རེད། དེ་སྔའི་ལམ་ལུགས་གཞི་རྩར་བཞག་ནས་མང་ཚོགས་ཀྱི་ངོས་ནས་དེ་སྔ་གསུམ་བཏོན་ཡོད་པ་རེད་ཟེར་བའི་ཁུངས་འདྲེན་གནས་ཚུལ་མི་ཡོང་བའི་ཆེད་དུ། གལ་སྲིད་སྔོན་འགྲོའི་འོས་གཞིའི་ཁོངས་ནས་གཉིས་པ་དང་གསུམ་པའི་བར་འོས་གྲངས་བརྒྱ་ཆ་ ༢༠ ལས་ཉུང་བ་ཡོད་ན། འོས་གཞི་གསུམ་པ་དེ་འཇོག་གི་ཡིན་ཞེས་དངོས་གཞིའི་ནང་འཇོག་ཆེད་ང་ཚོས་ཆ་རྐྱེན་ཞིག་བཏོན་པ་རེད་མ་གཏོགས། གལ་སྲིད་ཁོང་ཕར་འདོན་པའི་གནད་དོན་ཞིག་ཡིན་ན། ང་ཚོས་འོས་གཞི་གཉིས་པ་དང་གསུམ་པའི་བར་དུ་འོས་གྲངས་བརྒྱ་ཆ་ ༢༠ ལས་ཉུང་བ་ཡོད་ན་འཇོག་གི་མིན་ཞེས་ལབ་པ་ཡིན་ན། འཇོག་གི་མེད་པར་རྦད་དེ་མེད་པ་བཟོ་འགྲོ་ཡི་ཡོད་པ་རེད། དེ་འདྲའི་གནད་དོན་མི་ཡོང་བའི་ཆེད་དུ་ང་ཚོས་གསལ་བསྒྲགས་ཞུས་ཡོད་པ་རེད་ལ། གང་ཟག་ལ་མ་ལྟོས་པར་ཐག་གཅོད་བྱས་པ་ཞིག་ཆགས་ཡོད་པ་རེད། གལ་སྲིད་ང་ཚོས་སྔོན་འགྲོའི་འོས་གྲངས་དེ་ཚོ་ཆ་ཚང་ཞིག་མིག་གིས་མཐོང་རྗེས་མི་གཉིས་མ་གཏོགས་མ་བཏང་བ་ཡིན་ན། གང་ཟག་ལ་བལྟས་ཏེ་ཨང་གསུམ་པ་དེ་བཀག་སོང་ཟེར་ན་རྒྱུ་མཚན་ཡོད་པ་རེད། སྐབས་དེ་དུས་གང་ཟག་གང་ཡང་ང་ཚོས་མཐོང་གི་ཡོད་པ་མ་རེད། འོས་ཤོག་གྲངས་བཤེར་གང་ཡང་བྱུང་མེད་པས་ཤེས་རྟོགས་མེད་དུས། གང་ཟག་ལ་བལྟས་པ་ཞིག་ཆགས་ཀྱི་ཡོད་པ་མ་རེད། ཁོང་རང་གིས་གང་ཟག་ལ་བལྟས་ནས་ང་བཀག་སོང་གསུངས་པ་ཡིན་ན་དེ་རྒྱུ་མཚན་ཡང་དག་མ་རེད། དེ་བཞིན་ང་རང་བཙན་འཐབ་རྩོད་པ་ཞིག་ཡིན་པས་བཀག་སོང་གསུངས་པ་ཡིན་ན། ང་ཚོ་ད་ལྟའི་དབུས་འོས་བསྡུ་ལས་ཁང་གི་འགན་འཛིན་རྣམ་པ་གསུམ་ལ་ལས་འགན་ག་རེ་ཡོད་པ་རེད་ཟེར་ན། བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྤྱི་འཐུས་འོས་བསྡུ་བྱེད་པ་ཆགས་བསྡད་ཡོད་པ་རེད་མ་གཏོགས། ལྟ་བ་རང་བཙན་དང་དབུ་མའི་འོས་བསྡུའི་ལམ་ལུགས་དེ་བྱེད་ཀྱི་ཡོད་པ་མ་རེད། བྱས་ཀྱང་ཡོད་པ་མ་རེད། དེར་བརྟེན་རང་བཙན་འཐབ་རྩོད་པ་བཀག་པ་རེད་གསུངས་པ་དེ་ཐལ་ཆ་ཆེ་དྲགས་པའི་བསམ་ཚུལ་ཞིག་མིན་འགྲོ་བསམ་པའི་བསམ་ཚུལ་ཞིག་བྱུང་། ཅེས་དང་། འོས་གཞི་གཉིས་པ་དང་གསུམ་པ་བར་གྱི་གྲངས་ཚད་དེ་མ་འོངས་པར་འོས་བསྡུའི་སྒྲིག་གཞིའི་ནང་བསྐྱར་བཅོས་འཆར་འབུལ་ཞུ་རྩིས་ཡོད་སྐོར་གསུངས་བྱུང་།

གསར་འགོད་པ། པདྨ་མཚོ།