བོད་ཀྱི་འགྲོ་བ་མིའི་ཐོབ་ཐང་ཚོགས་པའི་འདས་པའི་བོད་ནང་གི་འགྲོ་བ་མིའི་ཐོབ་ཐང་སྐོར་གྱི་སྙན་ཐོ་བཏོན་པའི་ནང་ད་ལྟ་རྒྱའི་བཙོན་འོག་ཏུ་བོད་པའི་ཆབ་སྲིད་བཙོན་པ་ ༢༠༨༡ ཡོད་པའི་ཁྲོད་གྲྭ་བཙུན་ ༩༦༧ ཆགས་འདུག་ཟེར།
དེ་རིང་ཞོགས་པའི་ཆུ་ཚོད་ ༡༠ སྟེང་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། ཕྱི་ལོ་ ༢༠༡༥ ལོའི་བོད་ནང་གི་འགྲོ་བ་མིའི་ཐོབ་ཐང་སྐོར་གྱི་སྙན་ཐོ་འདོན་སྤེལ་གྱི་གསར་འགོད་གསལ་བསྒྲགས་བསྐྱངས་སོང་།
ལྟེ་གནས་ཁང་གིས་ངོ་སྤྲོད་གནང་བ་ལྟར་ན། ད་ལྟའི་བར་དུ་བཙོན་ཁང་ནང་ལྷག་བསྡད་ཡོད་པའི་ཆབ་སྲིད་བཙོན་པའི་གྲངས་འབོར་ང་ཚོས་རག་པ་དེ་ ༢༠༨༡ ཡིན་པ་དང་། དེའི་ནང་གྲྭ་བ་དང་བཙུན་མ་ ༩༦༧ ཡོད་འདུག ཕྱི་ལོ་ ༢༠༡༥ ལོ་གཅིག་པུའི་ནང་འཛིན་བཟུང་བྱས་ཏེ་ཁྲིམས་ཐག་བཅད་པའི་ཆབ་སྲིད་བཙོན་པ་ ༦༨ ཆགས་ཡོད་འདུག འགྲོ་བ་མིའི་ཐོབ་ཐང་གིས་ངོས་འཛིན་ལྟར་ན་ད་བར་བོད་ནང་རང་ལུས་མེར་བསྲེགས་ ༡༤༣ ཙམ་བྱུང་ཡོད་པ་དང་ཕྱི་ལོ་ ༢༠༡༤ ཟླ་ ༩ ནས་ ༢༠༡༥ བར་དུ་ ༡༢ བྱུང་ཡོད་འདུག
སྙན་ཐོ་དེར་དོན་ཚན་ ༥ ཡོད་པའི་དང་པོ་ཆོས་དད་རང་དབང་དང་གཉིས་པ་མི་སྒེར་རང་དབང་། གསུམ་པ་རང་བྱུང་ཁོར་ཡུག་གི་གནས་སྟངས། བཞི་བ་སྤྱི་དམངས་དང་སྲིད་ཆབ་ཐོབ་ཐང་། ལྔ་བ་རྒྱལ་སྤྱིའི་སྤྱི་ཚོགས་ཀྱི་གནས་སྟངས་བཅས་ལས་གྲུབ་འདུག་ཅིང་། ལྟེ་གནས་ཁང་གི་ཉམས་ཞིབ་པ་ཚེ་རིང་རྒྱལ་ལགས་ཀྱིས་ངོ་སྤྲོད་གནང་བར། ད་ལོར་ང་ཚོས་ཆོས་དད་རང་དབང་དམིགས་བསལ་འབུར་དུ་འདོན་དགོས་པའི་རྒྱུ་མཚན་གཙོ་བོ་རྒྱ་ནག་གཞུང་གིས་ད་ལོར་དམིགས་བསལ་ཁྲིམས་གཞིའི་ངོས་ནས་བཀག་སྡོམ་གྱི་ཡོད་པ་དང་། བཀག་སྡོམ་བྱེད་ཡུལ་གཙོ་བོ་དེ་ཡང་དགོན་པ་བྱེ་བྲག་དང་མི་སྒེར་བྱེ་བྲག་ཙམ་མ་ཟད། དེའི་གནས་དོན་རེ་རེ་བཞིན་བཀག་སྡོམ་བྱེད་ཀྱི་ཡོད་པ་རེད། དེ་ཡང་ཕྱིར་འཕུད་བཏང་བའི་གྲྭ་བཙུན་ཞིག་ལ་ཆ་བཞག་ན། གྲྭ་བཙུན་དེ་ཕྱིར་བཏང་ཡང་ད་དུང་ཁ་ལ་མ་ཉན་པ་ཡིན་ན། ཁོའི་དགོན་པ་དང་བླ་མ། ཕ་མ་དང་སྡེ་དཔོན། དེ་བཞིན། ས་གནས་ལས་བྱེད་སོགས་ཚང་མར་ཆད་པ་གཅོད་ཀྱི་ཡོད་པ་ལྟར། ཁྲིམས་ཀྱི་ངོ་བོའི་ཐོག་ནས་བཀག་སྡོམ་བྱེད་ཀྱི་ཡོད་པའི་ཛ་དྲག་གི་གནས་སྟངས་ཤིག་ཆགས་འདུག
གཉིས་པ་མི་སྒེར་གྱི་རང་དབང་ཐད། རྒྱ་ནག་གཞུང་གིས་མ་སྒེར་གྱི་དྲ་རྒྱ་དང་ཁ་པར། སྐད་འཕྲིན་སོགས་སྤྱི་ཚོགས་བརྒྱུད་ལམ་ཁག་ལ་ཚོད་འཛིན་བྱས་ཏེ། མི་སྒེར་གྱི་གསང་བ་བཙན་འཁྱེར་དང་། མི་སྒེར་འཛིན་བཟུང་དང་ཁྲིམས་ཆད་གཅོད་ཀྱི་ཡོད་པ་རེད། དེར་མ་ཟད་དྲ་རྒྱ་བཟོ་མཁན་དང་གཉེར་མཁན་ཚོར་གནོན་ཤུགས་སྤྲད་དེ། དྲ་རྒྱའི་གསང་ཨང་ཡིན་གཅིག་མིན་གཉིས་རྒྱ་ནག་གཞུང་ལ་སྤྲོད་དགོས་ཞེས་བཙན་བཀའ་གཏོང་གི་ཡོད་པ་རེད། མི་སྒེར་གྱི་དྲ་རྒྱའི་གསང་ཨང་སྤྲད་པ་ཡིན་ན། བརྒྱུད་ལམ་ཁག་ཏུ་མི་སྒེར་གྱི་སྐད་ཆ་ག་རེ་བཤད་ཀྱི་ཡོད་པ་ཚང་མ་ཁོ་ཚོས་སྔོག་བཤེར་དང་ལྐོག་ཉན་ཐུབ་ཀྱི་ཡོད་པ་རེད། གསུམ་པ་རང་བྱུང་ཁོར་ཡུག་གི་གནས་སྟངས་ཐད། རྒྱ་ནག་གཞུང་གིས་དཔལ་འབྱོར་འཛུགས་སྐྲུན་དང་བོད་ནང་འཛུགས་སྐྲུན་སོགས་ཁ་ལ་ཁྱེར་ནས་བོད་ནང་གི་རང་བྱུང་གཏེར་ཁ་སྔོག་འདོན་བྱེད་པ་དང་། ཡང་ཕྱོགས་གཅིག་ནས་རང་བྱུང་ཁོར་ཡུག་སྲུང་སྐྱོབ་ལ་ཁ་གཡར་ནས། བོད་ཁུལ་གྱི་འབྲོག་སྡེ་ཁག་གནས་སྤོར་དུ་བཅུག་སྟེ་འབྲོག་པའི་རྩྭ་ཐང་འཕྲོག་པ་དང་ཞིང་པའི་ས་ཞིང་འཕྲོག་གི་ཡོད་པའི་རྐྱེན་གྱིས། ཞིང་འབྲོག་མང་ཚོགས་ཀྱི་འཚོ་གནས་ལ་དཀའ་སྡུག་འབྱུང་མུས་ཡིན།
བཞི་བ་སྤྱི་དམངས་དང་ཆབ་སྲིད་ཀྱི་ཐོབ་ཐང་གི་ངོས་ཐད་ནས། མི་སྒེར་གྱི་ཐོབ་ཐང་གི་གནད་དོན་ལ་ཐུག་ཡོད་དུས། དེ་མཉམ་འབྲེལ་རྒྱལ་ཚོགས་ཀྱི་ཁྲིམས་གཞི་གལ་ཆེན་ཞིག་ཆགས་ཀྱི་ཡོད་པ་དང་། དེ་རྒྱ་ནག་གཞུང་གིས་ཀྱང་ངོས་ལེན་བྱས་ཡོད་པ་ལྟར། ང་ཚོས་དེའི་སྐོར་ཡང་སྙན་ཐོའི་ནང་ཞིབ་ཅིང་རྒྱས་པར་འགྲེལ་བརྗོད་བྱས་ཡོད། ལྔ་བ་རྒྱལ་སྤྱིའི་ཚོགས་ཀྱི་གནང་སྟངས་ཐད། རྒྱལ་སྤྱིའི་བོད་དོན་རྒྱབ་སྐྱོར་དང་ཕྱིའི་སྤྱི་ཚོགས་ནང་དུའང་ཕྱི་སྡོད་བོད་མི་དང་བོད་དོན་རྒྱབ་སྐྱོར་བ་ཚོས་ཞི་བའི་ངོ་རྒོལ་སྐད་འབོད་སྐབས་སུ་སྲིད་གཞུང་ཁག་ཅིག་གིས་ཁྲིམས་མཐུན་མ་ཡིན་པའི་སྒོ་ནས་བོད་མི་དང་བོད་དོན་འགུལ་བ་ཚོ་འཛིན་བཟུང་དང་བཀག་བསྐྱིལ་བྱེད་བཞིན་པའི་སྐོར་བཏོན་ཡོད། ཅེས་སོགས་བརྗོད་བྱུང་།
དྲི་བ་དྲིས་ལན་གྱི་སྐབས་། རང་ལུས་མེར་བསྲེགས་སྐོར་ལ་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས། ༢༠༡༢ ལོར་རང་ལུས་མེར་བསྲེགས་གནང་མཁན་མང་ཤོས་བྱུང་ཡོད། དེའི་རྗེས་སུ་ཉུང་དུ་ཕྱིན་ཡོད་པ་དང་། རང་ལུས་མེར་བསྲེགས་མཚམས་འཇོག་བྱེད་པར་བོད་མིའི་སྒྲིག་འཛུགས་༧གོང་ས་མཆོག་སོགས་མང་པོ་ཞིག་ནས་འབོད་སྐུལ་མང་པོ་ཞིག་གནང་ཡོད་པ་རེད། ཡིན་ནའང་ང་རང་ཚོ་ཚོགས་པའི་ངོས་ནས་ག་རེ་བཤད་ཀྱི་ཡོད་ལབ་ན། རང་ལུས་མེར་བསྲེགས་ཉུང་དུ་ཕྱིན་པའི་རྐྱེན་གལ་ཆེ་ཤོས་གཅིག་ག་རེ་ཆགས་ཀྱི་འདུག་ཟེར་ན། རྒྱ་ནག་གཞུང་གིས་རང་ལུས་མེར་བསྲེགས་གནང་བ་ཙམ་གྱིས་རྒྱལ་ཁབ་ཀྱི་ཉེས་ཁྲིམས་ནང་ཁྲིམས་འགལ་གྱི་བྱ་སྤྱོད་ཅིག་ལ་ངོས་འཛིན་བྱེད་ཀྱི་ཡོད་པ་དང་། རང་ལུས་མེར་བསྲེགས་གནང་མཁན་གཅིག་པུ་མིན་པར་ཁོའི་ཕ་མ་སྤུན་མཆེད་དང་གྲོགས་པོ་གྲོགས་མོ། སྡེ་བ་ཡོངས་ཀྱི་འཚོ་སྣོན་སོགས་གཞུང་གི་རོགས་རམ་ཚང་མ་མཚམས་འཇོག་གི་ཉེས་པ་གཏོང་སྐབས། རང་ལུས་མེར་བསྲེགས་གནང་བ་ཡིན་ན་ཧ་ལམ་ས་ཆ་དེའི་མི་ཚང་མས་དཀའ་ངལ་མྱོང་དགོས་པ་ཞིག་ཆགས་ཡོད་སྟབས། རང་ལུས་མེར་བསྲེགས་གནང་མཁན་ཉུང་དུ་ཕྱིན་པ་རེད། ཅེས་བརྗོད་སོང་།
གསར་འགོད་པ། པདྨ་རྒྱལ་དང་པདྨ་མཚོ།
