ད་ལོར་བོད་མིའི་སྒྲིག་འཛུགས་སྲིད་བྱུས་ཉམས་ཞིབ་ཁང་གིས་རྒྱལ་སྤྱིའི་ཕ་སྐད་ཉིན་མོ་སྲུང་གཙིའི་བགྲོ་གླེང་ཞིག་ཚོགས་ཡོད་ཅིང་། འདི་ནི་བོད་མིའི་སྒྲིག་འཛུགས་ཀྱི་གཞུང་འབྲེལ་ལས་ཁུངས་ཤིག་གིས་རྒྱལ་སྤྱིའི་ཕ་སྐད་ཉིན་མོ་སྲུང་གཙི་ཞུས་པ་ཐོག་མ་དེ་ཆགས་ཡོད་པ་རེད།
ཁ་སང་ཚེས་ ༢༡ ཉིན་གྱི་སྔ་དྲོར་གངས་སྐྱིད་ཕྱི་དྲིལ་ལག་པ་ཚེ་རིང་ཚོགས་ཁང་དུ། བོད་ཀྱི་སྲིས་བྱུས་ཉམས་ཞིབ་ཁང་གི་གོ་སྒྲིག་འོག ༼རྒྱལ་སྤྱིའི་ཕ་སྐད་ཉིན་མོར་བོད་ཀྱི་སྐད་ཡིག་གླེང་བ༽ཞེས་པའི་བགྲོ་གླེང་ཚོགས་འདུ་ཞིག་གོ་སྒྲོག་གནང་ཡོད་པ་དང་། སྐུ་མགྲོན་གཙོ་བོར་བོད་མིའི་སྒྲིག་འཛུགས་ཤེས་རིག་བཀའ་བློན་དངོས་གྲུབ་ཚེ་རིང་མཆོག་དང་། ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་བཀྲ་ཤིས་ཚེ་རིང་ལགས། དེ་བཞིན་གཏམ་བཤད་གནང་མཁན་ཝ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་སློབ་དཔོན་ལྷག་པ་ཚེ་རིང་ལགས་དང་། བོད་ཀྱི་སྲིད་བྱུས་ཉམས་ཞིབ་པ་རྣམ་པ། དེ་བཞིན། ཚོགས་ཞུགས་སེར་སྐྱ་མང་ཚོགས་ ༡༠༠ འཛོམས་འདུག
བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བསྟན་འཛིན་བདེ་གསལ་ལགས་ཀྱིས་རྒྱལ་སྤྱིའི་ཕ་སྐད་ཉིན་མོའི་བྱུང་རབས་ལོ་རྒྱུས་སྙིང་བསྡུས་སུ་ངོ་སྤྲོད་གནང་རྗེས། ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས། བོད་ཀྱི་སྐད་ཡིག་ཉམས་ཆག་འགྲོ་བ་དེ་ཕྱི་ནང་གཉིས་ཀྱི་རྒྱུ་རྐྱེན་ལ་ཐུག་ཡོད་པ་དང་། ནང་གི་རྒྱུ་རྐྱེན་དེ་རྒྱལ་ཁབ་ཀྱི་སྲིད་ཇུས་ཐོག་དབང་བསྒྱུར་དང་། བཙན་ཤུགས། ཁྲིམས་ཐོག་བེད་སྤྱོད་ཆོག་མིན། མཐུན་རྐྱེན་སྦྱོར་མིན། དཔལ་འབྱོར་གྱི་གནས་སྟངས། སྤྱི་ཚོགས་མཉམ་འདུས་ཀྱི་ཁོར་ཡུག་ཡོད་མེད་བཅས་ལ་ཐུག་ཡོད་པ་དང་། བོད་ནང་ལྟ་བུ་ཡིན་ན་ཁྲིམས་ཐོག་ནས་དཀའ་ངལ་ཡོད་པ་རེད། ཕྱིའི་རྒྱུ་རྐྱེན་དེ་བཙན་བྱོལ་ནང་ཡོད་པའི་བོད་མི་ཚོ་རང་དབང་རེད། གཅིག་ནས་ང་ཚོས་སོ་སོའི་སྐད་ཡིག་ལ་མཐོང་ཆུང་དང་། ཁ་ཤས་ཀྱིས་སོ་སོའི་སྐད་ཡིག་སྣང་མེད་བཏང་སྟེ། བེད་སྤྱོད་མ་བཏང་བ་ཡོང་གི་ཡོད་པ་རེད། དེར་རྟེན། བོད་ཀྱི་སྐད་ཡིག་ཉམས་ཆག་འགྲོ་བར་ཕྱི་ནང་གཉིས་ཀྱི་དཀའ་ངལ་ཡོད་པ་རེད། ཅེས་གསུང་སོང་།
བཀྲ་ཤིས་ཚེ་རིང་ལགས་ཀྱིས། “ཡོན་ཏན་ཀུན་གྱི་གཞི་མ་ཡི་གེ་དང་། དེ་སྦྱོང་པར་བྱེད་པར་ཐོག་མར་འབྲི་ཀློག་གཉིས་ལས་ཕྱི་མ་གཙོ་བོར་བྱེད་དགོས་ཚུལ་ལས་འཕྲོས་པའི་གྲོས་འདེབས་རང་བློས་དཔག་ཚོད་ཀྱི་ཐོག་མའི་འཆར་སྒོ་རགས་བསྡུས་སུ་ཞུས་བ”ཞེས་པའི་བརྗོད་གཞིའི་ཐོག་གཏམ་བཤད་གནང་བ་དང་། ཝ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་སློབ་དཔོན་ལྷག་པ་ཚེ་རིང་ལགས་ཀྱིས་“བོད་ཀྱི་སྐད་ཡིག་གི་ད་ལྟའི་ཉག་ཕྲ་བའི་གནས་སྟངས་དང་དེའི་རྒྱུ་རྐྱེན་དང་། སླར་གསོ་ཐབས་གང་དང་གང་ཡོད་ཅེས་པའི་བརྗོད་གཞིའི་ཐོག” དེ་ཡང་མི་ཞིག་གི་ལུས་ལ་དཔེ་བླངས་ན། མི་དེའི་གཟུགས་པོ་བདེ་ཐངས་ཡོད་དགོས་པ་མ་ཟད། དེ་ལ་སྟོབས་ཤུགས་དང་བརྟན་པོ་དགོས་པ་རེད། གལ་ཏེ་ནད་ཁྲིའི་སྟེང་ལྷུང་བའི་ནད་པ་ཞིག་ཡིན་ན། དེའི་ནད་གཞི་གསོ་བའི་ཐབས་ལམ་འདོན་དགོས་པ་རེད་ཅེས་སོགས་སྐོར་བརྗོད་སོང་།
དེའི་རྗེས་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་གྲྭ་བློ་བཟང་སྨོན་ལམ་ལགས་ཀྱིས“བརྡ་འཕྲིན་འཕྲུལ་ལས་ཀྱི་དུས་དང་མཉམ་པའི་བོད་ཡིག་གི་མདུན་སྐྱོད”ཅེས་པའི་བརྗོད་གཞིའི་ཐོག བརྡ་འཕྲིན་དང་བོད་ཀྱི་ཚོང་ལས་དང་། བརྡ་འཕྲིན་དང་བོད་ཀྱི་ཤེས་ཡོན། བརྡ་འཕྲིན་དང་འབྲེལ་བའི་སྤྱི་ཚོགས། བརྡ་འཕྲིན་དང་སྲིད་དོན་དགོས་དམིགས། བརྡ་འཕྲིན་ཅན་དུ་བསྒྱུར་བའི་གཞུང་སྒེར་གྱི་སྲིད་ཇུས་བཅས་ཀྱི་སྐོར་ལ་གཏམ་བཤད་གནང་ཡོད་པ་རེད།
བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་ཞུས་པའི་བགྲོ་གླེང་ཚོགས་འདུའི་དགོས་དམིགས་ངོ་སྤྲོད་ཡིག་ཆའི་ནང་། “འཛམ་གླིང་ཡོངས་ལ་ཕྱི་ལོ་ ༢༠༠༠ ནས་བཟུང་རྒྱལ་སྤྱིའི་ཕ་སྐད་ཉིན་མོ་སྲུང་བརྩི་ཞུ་བཞིན་ཡོད་དང་། དེའི་དམིགས་ཡུལ་གཙོ་བོ་འཛམ་གླིང་ཡོངས་ལ་མི་རིགས་སོ་སོའི་ཕ་སྐད་ཡོད་དོ་ཅོག་གལ་གནད་ཆེན་པོ་ཡིན་པའི་གོ་རྟོགས་སྤེལ་རྒྱུ་དང་། སྲུང་སྐྱོབ། དར་སྤེལ་གཏོང་རྒྱུ་སོགས་ཡིན་ཞིང་། སྐད་ཡིག་ཚང་མ་རྒྱུ་རྐྱེན་སྣ་ཚོགས་རྐྱེན་པས་འགྱུར་ལྡོག་འགྲོ་བཞིན་པ་དང་། གོ་ལ་གཅིག་འགྱུར་གྱི་མྱུར་ཚད་མགྱོགས་པའི་རྐྱེན་གྱིས་ཁྱབ་ཤུགས་ཆེ་བའི་སྐད་ཡིག་གིས་གྲངས་ཉུང་མི་རིགས་ཀྱི་སྐད་ཡིག་རྣམས་ཉམས་རྒུད་དང་འཚོ་གནས་ཀྱི་དཀའ་ངལ་བཟོས་དང་བཟོ་བཞིན་ཡོད་པ་དང་། མིག་སྔར་འཛམ་གླིང་སྐད་ཡིག་གྲངས་འབོར་ ༧༠༠༠ ཙམ་ཡོད་པའི་ཁོངས་ནས་བརྒྱ་ཆ་ ༥༠ ཙམ་ཕྱི་ལོ་བརྒྱ་ཕྲག་འདིའི་མཇུག་ཏུ་རྩ་བརླག་འགྲོ་རྒྱུའི་ཚོད་དཔག་བྱེད་ཀྱི་ཡོད་པ་དང་། དེའི་ནང་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་གྲངས་ཉུང་མི་རིགས་ཀྱི་སྐད་ཡིག་འདྲ་མིན་ཡོད་པ་རྣམས་ཀྱི་བརྒྱ་ཆ་ ༤༠ ཙམ་རྩ་བརླག་ཏུ་འགྲོ་བའི་ཉེན་ཁར་སླེབས་ཡོད། འཛམ་གླིང་གི་སྐད་ཡིག་དེ་དག་གི་གནས་སྟངས་ཇི་ཆགས་གོ་རྟོགས་སྤེལ་རྒྱུ་དང་། དེ་ལ་ཕན་པའི་ལས་འགུལ་སྤེལ་རྒྱུ་ནི་སྤྱི་ཚོགས་སྤྱི་དང་ལྷག་པར་མི་རིགས་སོ་སོའི་ལས་འགན་ངོ་ཤེས་དང་ཐོབ་ཐང་བེད་སྤྱོད་དགོས་པ་ཡིན།
བོད་ཀྱི་སྐད་ཡིག་ནི་ཕྱུག་པ་དང་འཛིམ་གླིང་ཡོངས་ལ་ཕན་ཐོག་ཆེ་བའི་སྐད་ཡིག་ཅིག་ཡིན་ཡང་། དབང་བསྒྱུར་དང་ཆབ་སྲིད་དཔལ་འབྱོར་གྱི་རྒྱུ་རྐྱེན་འདྲ་མིན་ལ་བརྟེན་ནས་བོད་ཀྱི་སྐད་ཡིག་འདྲ་མཉམ་མི་སྤྱོད་པར་བརྟེན་ཉམས་རྒུད་འགྲོ་བཞིན་ཡོད། ཕྱི་ལོ་ ༢༠༠༤ ལོའི་ཟླ་ ༡ ཚེས་ ༧ ཉིན་མཁས་དབང་དམ་པ་བཀྲ་ཤིས་ཚེ་རིང་མཆོག་གིས་བོད་རང་སྐྱོང་ལྗོངས་མི་མང་འཐུས་མི་ཚོགས་ཆེན་ལ་ཕུལ་བའི་འཕྲིན་ཡིག་དང་། ཕྱི་ལོ་ ༢༠༡༢ ལོའི་ཟླ་ ༡༢ ནང་འཛམ་གླིང་ཡོངས་ནས་བོད་རིག་པའི་མཁས་དབང་ ༩༠ ཙམ་གྱིས་རྒྱ་ནག་གི་སྲིད་འཛིན་གྱི་ལས་འགན་བཞེས་ལ་ཉེ་བའི་ཞི་ཅིན་ཕིན་ལ་ཕུལ་བའི་སྙན་ཞུ་དང་། ཕྱི་ལོ་ ༢༠༡༠ ནས་ ༢༠༡༢ བར་བོད་ནང་གི་སློབ་ཕྲུག་ཚོས་བོད་ཀྱི་སྐད་ཡིག་ལ་ཐོབ་ཐང་དང་རང་དབང་མེད་པའི་གནས་སྟངས་ལ་མ་བཟོད་པར་རང་གི་གཅེས་པའི་སྲོག་ཀྱང་བློས་གཏོང་གིས་བོད་ནང་གི་བོད་ཀྱི་སྐད་ཡིག་གི་གནས་སྟངས་ཡིད་སྐྱོ་ཛ་དྲག་གི་གནས་སུ་ཡོད་པ་བསྟན་ཡོད” ཅེས་སོགས་འཁོད་འདུག
གསར་འགོད་པ། པདྨ་རྒྱལ།
