༧རྒྱལ་དབང་སྐུ་ཕྲེང་བཅུ་གསུམ་པ་མཆོག་གིས་སྲོལ་གཏོད་པའི་དགེ་བཤེས་ལྷ་རམས་པའི་སྔགས་ཀྱི་རྩོད་རྒྱུགས་ཆེན་མོ་དེ་ཉིན་གསུམ་ཙམ་རིང་བཞུགས་སྒར་རྒྱུད་སྟོད་གྲྭ་ཚང་དུ་འཚོགས་བཞིན་ཡོད་པ་རེད།
དེ་རིང་སྔ་དྲོའི་ཆུ་ཚོད་ ༨ པའི་སྟེང་བཞུགས་ཉེ་འཁྲིས་ཀྱི་གསང་ཆེན་དཔལ་ལྡན་རྒྱུད་སྟོད་གྲྭ་ཚང་གི་འདུ་ཁང་ཆེན་མོའི་ནང་ཉིན་གསུམ་ཙམ་རིང་སྔགས་ཀྱི་རྩོད་རྒྱུགས་ཆེན་མོ་དབུ་འཛུགས་གནང་ཡོད་པ་དང་། སྐུ་མགྲོན་གཙོ་བོར་སེར་འབྲས་དགའ་གསུམ་གྱི་མཁན་པོ་དང་མཁན་ཚབ་རྣམ་པ་དང་། བོད་མིའི་སྒྲིག་འཛུགས་ཆོས་རིགས་ཁུངས་ཀྱི་ཟུང་དྲུང་ཐུབ་བསྟན་ཚེ་རིང་། དེ་བཞིན། ད་ལོའི་སྔགས་ཀྱི་རྩོད་རྒྱུགས་ཆེན་མོའི་ནང་འཛུལ་ཞུགས་མཁན་སེར་འབྲས་དགའ་གསུམ་གྱི་དགེ་བཤེས་ལྷ་རམས་པ་ ༧༠ དང་། གསང་ཆེན་དཔལ་ལྡན་རྒྱུད་སྟོད་གྲྭ་ཚང་གི་བླ་སྤྲུལ་དགེ་བཤེས་ལྷ་རམས་པ་བཅས་སེར་མོ་བ་ ༡༥༠ ལྷག་འཛོམས་འདུག
རྒྱུད་སྟོད་གྲྭ་ཚང་གི་ཕྱག་མཛོད་དོན་འགྲུབ་འཕྲིན་ལས་ལགས་ཀྱིས་ངོ་སྤྲོད་གནང་བ་ལྟར་ན། སྤྱིར་སྟངས་རྒྱུད་སྟོད་གྲྭ་ཚང་གི་ཐོག་མའི་འཆར་གཞིའི་ནང་དགའ་ལྡན་ཁྲི་རིན་པོ་ཆེ་མཆོག་དང་། ཤར་བྱང་ཆོས་སྡེ་ཁག་བཅས་ནམ་རྒྱུན་གདན་ཞུ་གནང་བའི་ལུགས་སྲོལ་ཡོད་ཀྱང་། ད་སྐབས་ཆོས་བརྒྱུད་ཁག་ལ་ཆོས་ཕྱོགས་ཀྱི་མཛད་རིམ་གལ་ཆེན་མང་པོ་ཡོད་པའི་དབང་གིས་ད་རེབ་ཕེབས་ཐུབ་ཡོད་པ་མ་རེད། དེར་བརྟེན། གདན་ས་ཆེན་མོ་སེར་འབྲས་དགའ་གསུམ་གྱི་གྲྭ་ཚང་ཁག་དྲུག་སྟེ། སེར་ར་བྱེས་སྨད་གཉིས་དང་། དགའ་ལྡན་ཤར་བྱང་གཉིས། འབྲས་སྤུངས་སྒོ་མང་དང་བློ་གསལ་གླིང་བཅས་ཀྱི་མཁན་པོ་དང་མཁན་ཚབ་རྣམ་པ་དྲུག་དང་། དབུས་བོད་མིའི་སྒྲིག་འཛུགས་ཆོས་རིག་ལྷན་ཁང་གི་སྐུ་ཚབ་བཅས་ཕེབས་གནང་ཡོད་པ་རེད།
རྩ་བའི་སྔགས་ཀྱི་རྩོད་རྒྱུགས་ཆེན་མོ་འདི་བོད་ནང་ཡིན་ན། ༧གོང་ས་མཆོག་གི་ཐད་ཀའི་གཙོ་སྐྱོང་འོག་ཡོད་པ་རེད། ༧གོང་ས་མཆོག་གི་ཐད་ཀའི་གཙོ་སྐྱོང་འོག གདན་ས་གྲྭ་ཚང་ཁག་ནས་ལྷ་རམས་དགེ་བཤེས་བཏང་རྗེས། ༧གོང་ས་མཆོག་གི་དབྱར་དུས་བཞུགས་གནས་ནོར་བུ་གླིང་ཁར་ལོ་རེ་བཞིན་སྔགས་ཀྱི་རྩོད་རྒྱུགས་ཆེན་མོ་འཚོགས་སྲོལ་ཡོད་ཀྱང་། འདི་ག་རྒྱ་གར་ནང་ལོ་ལྟར་འཚོགས་ཐུབ་ཀྱི་མེད་པར་ལོ་གསུམ་རེའི་ནང་ཐེངས་རེར་འཚོགས་བཞིན་ཡོད་པ་རེད།
དགེ་བཤེས་ལྷ་རམས་པའི་སྔགས་ཀྱི་རྩོད་རྒྱུགས་ཆེན་མོ་འདི་གྲུབ་རྗེས། ཁོང་རྣམས་མ་འོངས་པར་གདན་ས་གྲྭ་ཚང་ཁག་གི་མཁན་པོ་དང་དགའ་ལྡན་ཁྲིར་ཕེབས་གནང་མཁན་དེ་འདྲ་རེད། སྲོལ་འདི་༧གོང་ས་སྐུ་ཕེང་བཅུ་གསུམ་པས་མཛད་པ་རེད། དེའི་སྔོན་ལ་ཡིན་ན་སྔགས་ཀྱི་རྩོད་རྒྱུགས་ཆེན་མོ་དེ་འདྲ་གཏོང་ཐུབ་ཀྱི་ཡོད་པ་མ་རེད། སྤྱིར་བཏང་བསྡུར་གྲྭ་ནས་འགྲོ་དགོས་ཀྱི་ཡོད་ཀྱང་། ༧གོང་ས་བཅུ་གསུམ་པའི་སྐབས་ནས་དགེ་བཤེས་ལྷ་རམས་ཐོན་རྗེས། སྔགས་ཀྱི་རྩོད་རྒྱུགས་གནང་བ་དང་། སྔགས་ཀྱི་རྩོད་རྒྱུགས་གཞིར་བཟུང་གིས་གདན་ས་གྲྭ་ཚང་ཁག་གི་མཁན་པོ་དང་དགའ་ལྡན་ཁྲིར་ཕེབས་གནང་མཛད་པའི་སྲོལ་གསར་དུ་མཛད་པ་རེད། སྔོན་འགྲོའི་སྔགས་ཀྱི་རྩོད་རྒྱུགས་གནང་ཚར་རྗེས། མཐའ་མའི་འདེམས་ཐོན་པའི་མཚན་རྟགས་དེ་༧གོང་ས་མཆོག་གིས་སྐྱོན་གནང་གི་ཡོད་པ་རེད། དེ་འདྲ་ཡིན་སྟབས་སེར་འབྲས་དགའ་གསུམ་དང་། རྭ་སྟོད་གྲྭ་ཚང་བཅས་ཀྱི་ལྷ་རམས་དགེ་བཤེས་རྩེ་གྲས་རྣམས་དེ་རིང་གི་སྔགས་ཀྱི་རྩོད་རྒྱུགས་ཆེན་མོ་འདིར་ཞུགས་གནང་ཡོད་པ་རེད།
ཐེངས་འདིའི་སྔགས་ཀྱི་རྩོད་རྒྱུགས་ཆེན་མོ་འདི་ཉིན་གཉིས་ནང་འགྲུབ་ཐུབ་པ་གནང་གི་ཡོད་རེད། གང་ཡིན་ཟེར་ན་སང་གནངས་འདི་ག་གྲྭ་ཚང་དུ་རི་བོ་དགེ་ལུགས་པ་སྤྱི་ནས་༧གོང་ས་མཆོག་དགུང་གྲངས་ ༨༠ ཕེབས་པའི་བཀའ་དྲིན་རྗེས་དྲན་དུ། ༧གོང་ས་མཆོག་གི་མཛད་རྣམ་དང་བཀའ་དྲིན་རྗེས་ཀྱི་བགྲོ་གླེང་ཚོགས་ཆེན་འཚོགས་ཀྱི་ཡོད་པ་རེད། ཅེས་གསུངས་སོང་།
གསར་འགོད་པ། པདྨ་རྒྱལ།
