བཙན་བྱོལ་བོད་མིའི་སྲིད་སྤྱིའི་འོས་བསྡུ་ཆེན་མོའི་དངོས་གཞི་བསླེབ་ལ་ཉེ་བའི་སྐབས་དང་བསྟུན་ཏེ། འཛམ་གླིང་གི་ཕྱོགས་མཐའ་གང་སར་འཐོར་བའི་བཙན་བྱོལ་བོད་མི་རྣམས་ཀྱིས་དྲ་རྒྱ་དང་སྤྱི་ཚོགས་འཕྲིན་ཁག་ཏུ་འོས་བསྡུ་དང་འབྲེལ་བའི་བགྲོ་གླེང་དང་། ལྷག་པར་དུ་སྲིད་སྐྱོང་འོས་མི་གཉིས་དང་འབྲེལ་བའི་གནས་ཚུལ་འདྲ་མིན་འབྱུང་བཞིན་ཡོད་སྟབས། འདི་གའི་གསར་ཁང་གིས་ཁོང་རྣམ་གཉིས་ཀྱི་རྒྱབ་སྐྱོར་ཚོགས་པའི་འཐུས་ཚབ་མི་སྣ་རེར་དྲི་བ་གསུམ་རེ་བཏང་ཡོད།
བཀའ་ཤག་སྐབས་བཅོ་ལྔ་པའི་སྲིད་སྐྱོང་འོས་དམིགས་བློ་བཟང་སེང་གེ་མཆོག་གི་རྒྱབ་སྐྱོར་ཚོགས་པའི་འཐུས་ཚབ་ཨ་རིའི་གྲོང་ཁྱེར་ནེའུ་ཡོག་ཏུ་གནས་སྡོད་བསོད་ནམས་རྒྱས་འཕེལ་ལགས་སུ། བློ་བཟང་སེང་གེ་མཆོག་ལ་རྒྱབ་སྐྱོར་གནང་དོན་གང་ཡིན་སྐོར་དྲིས་པར་ཁོང་གིས། བོད་མི་སྤྱི་བོ་གནམ་བསྟན་ཚང་མས་ཆོལ་ཁའི་འཐེན་འཁྱེར་མེད་པའི་ཐོག་ནས་བོད་མི་ཡག་ཤོས་ཤིག་སྲིད་སྐྱོང་གི་ཁྲི་ལ་འཁོད་དགོས་པ་དེ་བོད་མི་རེ་རེའི་འོས་འགན་འདྲ་པོ་ཞིག་ཆགས་བསྡད་ཡོད་པ་རེད། ང་རང་འདྲ་པོ་ཡིན་ན། ནམ་རྒྱུན་བོད་ཀྱི་སྐད་དང་ཡི་གེ་རིག་གཞུང་བཅས་པར་དོ་སྣང་སེམས་ཁུར་བྱེད་མཁན་ཞིག་ཡིན་ལ། ལྷག་པར་དུ་ད་ལྟའི་སྲིད་སྐྱོང་མཆོག་གིས་དབུ་ཁྲིད་པའི་བཀའ་ཤག་སྐབས་ ༡༤ པས་ཕྱག་ལས་གནང་ཕྱོགས་དང་། གྲོས་ཚོགས་ཀྱི་ལས་རིམ་སོགས་ཚང་མར་ནམ་རྒྱུན་དོ་སྣང་བྱེད་མཁན་ཞིག་ཆགས་ཡོད་པ་རེད། ཕྱི་ལོ་ ༢༠༡༦ ལོའི་སྲིད་སྐྱོང་གི་འོས་མི་སྲིད་སྐྱོང་ལས་ཐོག་མཁས་དབང་བློ་བཟང་སེང་གེ་མཆོག་ལ་ངས་རྒྱབ་སྐྱོར་ཞུས་པའི་རྒྱུ་མཚན་གཅིག་ནི། ང་རང་གིས་ནམ་རྒྱུན་ཡར་མར་དོ་སྣང་དང་བརྟག་དཔྱད་བྱས་པ་བརྒྱུད། མི་གཞན་གྱི་བརྒྱུད་སྐུལ་བྱས་པ་སོགས་མིན་པའི་ཐོག་ནས་སོ་སོས་སེམས་ཐག་བཅད་ནས་ཁོང་ལ་རྒྱབ་སྐྱོར་ཞུས་དང་ཞུ་བཞིན་པ་ཡིན།
ཁོང་ལ་རྒྱབ་སྐྱོར་ཞུ་དགོས་པའི་རྒྱུ་མཚན་ཞུས་པ་ཡིན་ན། ང་ཚོའི་ད་ལྟའི་སྲིད་སྐྱོང་མཆོག་གིས་ཕྱི་ལོ་ ༢༠༡༡ ལོར་བཀའ་བློན་ཁྲི་པའི་དམ་འབུལ་སྐབས་ཆིག་སྒྲིལ་དང་གསར་གཏོད། རང་ཁ་རང་གསོ་བཅས་ལྟ་གྲུབ་གསུམ་གསུངས་ཡོད་པ་དང་། ལྟ་གྲུབ་དེ་གསུམ་གྱི་ཐོག་ནས་སྲིད་སྐྱོང་བློ་བཟང་སེང་གེ་མཆོག་ནས་འདས་པའི་ལོ་ལྔ་མ་ཟིན་ཙམ་གྱི་རིང་ཕྱག་ལས་ཧང་སང་བ་ཡག་པོ་གནང་ཡོད་པ་ཞིག་ལ་ང་རང་གིས་ག་དུས་ཡིན་ནའང་ངོས་འཛིན་ཞུས་པའི་ཐོག་དངོས་གནས་དྲང་གནས་རྗེས་སུ་ཡི་རངས་དང་ཐུགས་རྗེ་ཆེ་ཞུ་བ་ཡིན།
ད་ལྟའི་སྲིད་སྐྱོང་འོས་བསྡུའི་ནང་སྲིད་སྐྱོང་ལས་ཐོག་བློ་བཟང་སེང་གེ་མཆོག་དང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་རྣམ་གཉིས་ཕེབས་ཡོང་པ་དང་། ང་རང་ཡིན་ན་ཁོང་རྣམ་གཉིས་ཀྱིས་ཕྱག་ལས་ག་རེ་གནང་གི་ཡོད་པ་ཡིན་ནའང་ག་དུས་ཡིན་ཡང་ཆེ་མཐོང་དང་གུས་བརྩི། དངོས་གནས་རྗེས་སུ་ཡི་རང་ཞུ་མཁན་ཞིག་ཡིན། ད་ལྟ་ང་ཚོས་ཁོང་གཉིས་ཀྱི་ནང་ནས་མི་གཅིག་འདེམ་དགོས་ཀྱི་ཡོད་དུས་དེ་ལ་དཀའ་ངལ་འདུག གང་ཡིན་ཟེར་ན། ཁོང་རྣམ་པ་གཉིས་ཀ་ཧང་སང་བའི་ང་རང་ཚོའི་སྤྱི་ཚོགས་ནང་ཕྱག་ལས་ཡག་པོ་གནང་མཁན་དང་མི་སྣ་གལ་ཆེན་པོ་ཞིག་ཡིན་པ་བཤད་མི་དགོས་པ་རེད། ཡིན་ནའང་། ཁོང་གཉིས་ལས་གཅིག་གདམ་དགོས་ཀྱི་ཡོད་དུས། སོ་སོའི་ངོས་ནས་སྲིད་སྐྱོང་མཆོག་གི་ལོ་བཞི་དང་ཕྱེད་ལྷག་ལ་ཕྱག་ལས་གནང་ཕྱོགས་སོགས་ལ་གང་ལ་གང་འཚམ་གྱིས་དཔྱད་པ་བྱེད་ཡོང་དུས། ད་ལྟའི་སྲིད་སྐྱོང་ལས་ཐོག་བློ་བཟང་སེང་གེ་མཆོག་ལ་རྒྱབ་སྐྱོར་བྱེད་པར་བརྒྱ་ཆ་འདྲ་པོ་མང་བ་མཐོང་གི་འདུག་སྟབས། སོ་སོའི་ངོས་ནས་སྲིད་སྐྱོང་བློ་བཟང་སེང་གེ་མཆོག་ལ་རྒྱབ་སྐྱོར་ཞུ་བཞིན་ཡོད། ཅེས་བརྗོད་བྱུང་།
ཚོགས་གཙོ་སྤེན་པ་ཚེ་རིང་མཆོག་ལ་རྒྱབ་སྐྱོར་ཞུ་མི་ཐུབ་པའི་རྒྱུ་རྐྱེན་གཙོ་བོ་ག་རེ་ཡིན་དྲིས་པར་ཁོང་གིས། ང་རང་གི་ངོས་ནས་ད་ལྟའི་གནས་སྐབས་ལ་ཚོགས་གཙོ་སྤེན་པ་ཚེ་རིང་མཆོག་འགྲིག་གི་མི་འདུག་ཟེར་ནས་དམིགས་བསལ་རྩ་བ་ཉིད་ནས་ཞུ་རྒྱུ་མེད། གོང་དུ་ཞུས་པ་ལྟར་རྣམ་པ་གཉིས་ཀར་ཧང་སང་བའི་གུས་བཀུར་དང་ཆེ་མཐོང་ཡོད། ཡིན་ནའང་། ཁོང་གཉིས་ལས་གཅིག་མ་གཏོགས་གདམ་རྒྱུ་མེད་དུས་ཧ་ཅང་གདམ་ཁག་པོ་འདྲ་པོ་ཆགས་འདུག འོན་ཀྱང་། སོ་སོའི་རྣམ་དཔྱོད་བེད་སྤྱོད་བཏང་ནས་དཔྱད་ཞིབ་བྱེད་ཡོང་དུས། ད་ལྟའི་སྲིད་སྐྱོང་ལས་ཐོག་བློ་བཟང་སེང་གེ་མཆོག་ནས་ལོ་ལྔ་མ་ཟིན་ཙམ་གྱི་རིང་ཕྱག་ལས་ཧང་སང་བ་ཡག་པོ་གནང་བཞིན་ཡོད་ཚང་། ཕྱི་ལོ་ ༢༠༡༦ ནས་ ༢༠༢༡ བར་གྱི་སྲིད་སྐྱོང་ལ་ཁོང་རང་འོས་པ་ཞིག་མཐོང་སོང་། ཚོགས་གཙོ་སྤེན་པ་ཚེ་རིང་མཆོག་ལ་ཆ་བཞག་པ་ཡིན་ནའང་མ་འོས་པ་དེ་འདྲ་རྩ་བ་ཉིད་ནས་མཐོང་གི་མེད། ཅེས་བརྗོད་བྱུང་།
སྤྱི་ཚོགས་ནང་སྲིད་སྐྱོང་འོས་དམིཊ་བློ་བཟང་སེང་གེ་མཆོག་དོལ་རྒྱལ་གྱི་ཐོག་ལ་བཞེངས་ཕྱོགས་གསལ་པོ་དང་བརྟན་པོ་མེད་པ་དང་། ཨ་རིའི་སྐུ་ཚབ་དོན་གཅོད་ཁང་ནང་ཡོད་པའི་༧གོང་ས་མཆོག་གི་སྐུ་པར་གྱི་ཚབ་ཏུ་སྲིད་སྐྱོང་མཆོག་གི་སྐུ་པར་བཞག་ཡོད་ལུགས་དང་། ཨ་རིའི་ནང་ཉོས་པའི་སྒེར་གྱི་ཁང་པའི་སྐོར་སོགས་ལ་ལབ་གླེང་མང་པོ་ཡོང་གི་ཡོད་པའི་ཐད་ཁྱེད་རང་ཚོས་ངོས་འཛིན་ག་འདྲ་གནང་གི་ཡོད་དམ་ཅེས་དྲིས་པར། ང་རང་གི་མཐོང་སྣང་ཞུས་པ་ཡིན་ན། དཔལ་ལྡན་སྲིད་སྐྱོང་མཆོག་དང་འཛིན་སྐྱོང་བཀའ་ཤག་གི་ཕྱོགས་ནས་དོལ་རྒྱལ་རྗེས་འབྲང་པ་ཚོར་ག་རེ་གསལ་བཤད་གནང་དགོས་པ་དེ་ཚོ་གནང་སོང་ལ། ལྷག་པར་དུ་དོལ་རྒྱལ་རྗེས་འབྲང་པ་ཚོ་ངོས་འཛིན་པའི་ཆེད་དུ་མི་རེ་རེ་བྱས་ནས་མིང་དང་པར། ལོ་བཅས་ངོ་སྤྲོད་ཚང་མ་དྲ་རྒྱའི་ཐོག་ལ་བཞག་གནང་སོང་། མ་ཚད་སྤྱིར་བཏང་ང་རང་ཚོ་བོད་མིའི་སྒྲིག་འཛུགས་ནས་དོལ་རྒྱལ་རྗེས་འབྲང་པ་ཚོར་ང་ཚོས་དབྱེ་བ་དབྱེ་འབྱེད་ཀྱིས་ཟེར་ནས་ག་དུས་ཡིན་ནའང་བཀའ་གནང་གི་ཡོད་པ་རེད། དཔལ་ལྡན་སྲིད་སྐྱོང་མཆོག་ནས་དམིགས་སུ་བཀར་ནས་བོད་མི་ཚང་མ་གཅིག་པ་ཡིན་པ་དང་། ཁོང་ཚོར་ཡིན་ནའང་ལྟ་སྟངས་ལོགས་ཀ་ཞིག་བཟུང་ན་འགྲིག་གི་མེད་པ་དེ་ག་དུས་ཡིན་ནའང་གསལ་བཤད་གནང་དང་གནང་བཞིན་པ་རེད། གང་ལྟར་སྲིད་སྐྱོང་མཆོག་ནས་དོལ་རྒྱལ་རྗེས་འབྲང་པ་ཚོར་ཨ་རིའི་མིན་ནི་སོ་ཊར་ཡིན་ན་རེད། ཧྥ་རན་སི་དང་འཇར་མན་གྱི་ནང་ཡིན་ནའང་རེད། དེ་བཞིན་དྷ་ས་བོད་ཁྱིམ་དུ་སློབ་ཕྲུག་ཚོར་དོལ་རྒྱལ་དང་འབྲེལ་བའི་བཀའ་སློབ་གནང་ཡོད་པ་དང་། གྲོས་ཚོགས་ནང་བཀའ་སློབ་གནང་བ་སོགས་མཛད་རིམ་མང་པོ་ཞིག་གི་ནང་དོལ་རྒྱལ་གྱི་རྗེས་འབྲང་པ་ཚོར་མཐའ་གཅིག་ཏུ་ངོ་རྒོལ་ཡོད་པའི་བཀའ་སློབ་རིམ་པར་གནང་ཡོད་པ་རེད།
དེ་ནས་སྐུ་པར་སྒྲིག་གཤོམ་གྱི་ཐོག་ནས་ཞུས་པ་ཡིན་ན། ང་ཚོའི་གྲོས་ཚོགས་ནང་བྱང་ཨ་རིའི་སྤྱི་འཐུས་བཀྲ་ཤིས་རྣམ་རྒྱལ་ལགས་ཀྱིས་སྐུ་པར་སྐོར་གྱི་གྲོས་འཆར་དེ་བསྣམས་ཕེབས་པ་རེད། སྐབས་དེ་དུས་ཀྱི་གྲོས་ཚོགས་ཆ་ཚང་ལ་ངས་བལྟས་པ་ཡིན། ངའི་སེམས་ཚོར་ནང་སྲིད་སྐྱོང་བློ་བཟང་སེང་གེ་མཆོག་དང་དོན་གཅོད་ཁང་གི་ཕྱག་ལས་གནང་མཁན་ཚོས་ནོར་འདུག་བསམ་པ་ཞིག་རྩ་བ་ཉིད་ནས་དྲན་མ་སོང་། གང་ལྟར་གནས་ཚུལ་དེ་ང་ཚོའི་སྤྱི་ཚོགས་ནང་འོས་བསྡུ་དང་འབྲེལ་བའི་ཐོག་ནས་ཡར་བསླངས་ཡོང་དུས། ཁ་ཤས་ཤིག་གིས་རྐང་བཙུགས་ནས་སྲིད་སྐྱོང་བློ་བཟང་སེང་གེ་མཆོག་ལ་སྐྱོན་འཛུགས་ཀྱི་གཞིར་བཟོས་བསྡད་པ་ཞིག་ཆགས་འདུག དངོས་གནས་བྱས་ན་དེ་གྲོས་ཚོགས་ནང་གསལ་པོ་གསལ་རྐྱང་ཆགས་ཚར་བ་རེད་ལ། གྲོས་ཚོགས་ཀྱི་ལས་རིམ་ཆ་ཚང་དྲ་ཐོག་ཏུ་གཟིགས་རྒྱུ་ཡོད་པ་རེད། དངོས་གནས་བྱས་ན་དོན་གཅོད་ནང་ཡོད་བཞིན་པའི་༧རྒྱལ་བ་རིན་པོ་ཆེ་མཆོག་གི་སྐུ་པར་མར་ཕབ་ནས་སྲིད་སྐྱོང་མཆོག་གི་སྐུ་པར་ཡར་བཞག་པ་ཞིག་རྩ་བ་ཉིད་ནས་མ་རེད། ཝ་ཤིན་ཊོན་ཌི་སི་ནང་ཡོད་པའི་དོན་གཅོད་ཀྱི་ཁང་པ་གསར་པའི་ནང་༧རྒྱལ་བ་རིན་པོ་ཆེའི་སྐུ་པར་དང་པོ་ཁོ་རང་རྩ་ཆེན་པོར་བརྩིས་ནས་དོན་གཅོད་ཀྱི་ལས་ཁུངས་ཨ་མའི་ནང་དུ་གདན་འདྲེན་ཞུས་ཡོད་པ་མ་ཟད། ཆ་ཚང་བར་སྐུ་པར་ཡར་མར་སྒྲིག་གཤོམ་གནང་ཚར་རྗེས། དོན་གཅོད་ནང་ཁང་པ་མང་པོ་ཡོད་དུས་སྲིད་སྐྱོང་གི་ཆབ་སྲིད་ཀྱི་སྡིངས་ཆ་ལ་སྲིད་སྐྱོང་གི་སྐུ་པར་བཞག་པ་ཞིག་ཆགས་ཀྱི་འདུག ང་རང་ཚོས་གྲོས་ཚོགས་ཀྱི་ལས་རིམ་མང་པོ་ཞིག་ལ་ཉན་ཡོང་དུས་དེ་འདྲ་ཞིག་ཆགས་ཀྱི་འདུག གང་ལྟར་ང་རང་ཚོའི་སྤྱི་ཚོགས་ནང་གནས་ཚུལ་དེ་གསལ་པོ་ཆགས་ན་ཆགས་ཚོད་ཅིག་ཡིན། ཚིག་སྡུག་ཅག་བེད་སྤྱོད་བྱེད་མ་དགོས་པའི་ཐོག་ནས་ཞུས་པ་ཡིན་ན། ང་ཚོའི་སྤྱི་ཚོགས་ནང་ཁ་ཤས་ཤིག་གིས་གཞི་མེད་སྐྱོན་བརྗོད་སོགས་བྱེད་ཀྱི་འདུག དེ་ཚོའི་ཐོག་ལ་སྲིད་སྐྱོང་མཆོག་ནས་གྲོས་ཚོགས་དང་གསར་ལམ་ཁག་ལ་གསལ་བཤད་མང་པོ་གནང་སོང་། ང་རང་འདྲ་པོ་ཡིན་ན། ད་ལྟ་གསལ་པོ་ཆགས་པ་དེ་འདྲ་མིན། སྔོན་མ་གྲོས་ཚོགས་ནང་གསལ་བཤད་གནང་དུས་ནས་གསལ་པོ་ཆགས་ཚར་སོང་།
ཁང་པའི་སྐོར་ལ་ཡིན་ན་ངས་དམིགས་བསལ་ཞུ་དགོས་པ་མ་རེད། ཨ་རིའི་ནང་ལྟ་བུར་ཆ་བཞག་ན། ཕྲུ་གུར་ལྟ་མཁན་དང་ཁང་པ་གཙང་མ་བཟོ་མཁན། ཟ་ཁང་དུ་ལས་ཀ་བྱེད་མཁན་ཞིག་ཡིན་ནའང་ལོ་ལྔ་དྲུག་བདུན་བརྒྱད་ལ་ལས་ཀ་བྱས་པ་ཡིན་ན། ཨ་སྒོར་འབུམ་གསུམ་བཞི་ལྔ་ཡིས་ཁང་པ་ཞིག་ཉོ་ཐུབ་ཀྱི་ཡོད་པ་དེ་ཚང་མས་མཁྱེན་གསལ་རེད། དེར་བརྟེན་ད་ལྟའི་སྲིད་སྐྱོང་ལས་ཐོག་བློ་བཟང་སེང་གེ་མཆོག་བཟའ་ཚང་གཉིས་ཀྱིས་ཧ་ཝར་ཌི་གཙུག་ལག་སློབ་གཉེར་ཁང་དུ་ལོ་ ༡༦ ཙམ་གྱི་རིང་དཀའ་ལས་སྐུ་ངལ་བསྐྱོན་ཏེ། ཨ་སྒོར་འབུམ་ ༣ ལྷག་གི་ཁང་པ་ཞིག་ཉོ་མ་ཐུབ་པ་ཡོད་པ་མ་རེད། ཉོ་ཐུབ་པ་དེ་ཚང་མས་ཧ་གོ་ཡི་ཡོད་པ་རེད། ཡིན་ནའང་། ང་རང་ཚོའི་སྤྱི་ཚོགས་ནང་ཕྱི་རྒྱལ་མི་རིགས་ཤིག་གི་སྐད་ཆ་དེ་ཡར་བསླངས་ནས་སྤྱི་ཚོགས་དྲ་རྒྱ་སོགས་ཡར་མར་མང་པོ་ཞིག་ཏུ་སྐད་ཆ་དེ་གླེང་ཡོང་དུས། ང་ཚོའི་སྤྱི་ཚོགས་ནང་དེ་འདྲའི་བརྡབ་གསིག་ཐེབས་བསྡད་ཡོད་པ་རེད། ཡིན་ནའང་། གནས་ཚུལ་དེ་གསལ་པོ་ཆགས་དགོས་པའི་རྒྱུ་མཚན་ག་རེ་ཆགས་ཀྱི་འདུག་ཞུས་པ་ཡིན་ན། ད་ལྟའི་གནས་སྐབས་ལ་གསལ་པོ་ཆགས་དགོས་ན་ཆགས་དགོས་ཚོད་ཅིག་ཡིན་བསམ་བསམ་ཞིག་དྲན་གྱི་འདུག གང་ཡིན་ཟེར་ན། དཔལ་ལྡན་སྲིད་སྐྱོང་མཆོག་ནས་གྲོས་ཚོགས་ནང་ཐེངས་གཉིས་ཙམ་ལ་གསལ་བཤད་ཧ་ཅང་གསལ་པོ་གནང་ཚར་སོང་། འོན་ཀྱང་། ང་རང་ཚོའི་སྤྱི་ཚོགས་ནང་མི་ཁ་ཤས་ཀྱིས་མགོ་ཚོས་ནའང་མ་ཚོས་མདོག་མདོག་བྱས་ཏེ་སྐྱོན་བརྗོད་ཞུ་བཞིན་འདུག་སྟབས། དེ་ཚོར་ག་དུས་ཡིན་ནའང་ཐུགས་གཟབ་གནང་རོགས་གནང་ཟེར་ནས་འབོད་སྐུལ་ཞུ་བ་ཡིན། ཞེས་བརྗོད་བྱུང་།
གསར་འགོད་པ། པདྨ་མཚོ།
སྐད་ཆ་དེ་དྲང་མོ་མ་རེད།། བཙན་བྱོལ་དུ་ནས་ལོ་ངོ་ག་ཚོད་འགྲོ་ཚར་འདུག། འདས་བའི་ལོ་རྒྱུས་ནང་དུ་བཀའ་ཁྲི་མཁས་བ་བསམ་གདོང་རིན་པོ་ཆེ་སོགས་མི་སྣ་མང་པོ་བསྡད་ཡོད་པ་རེད།། དེ་ཚོ་ལ་དེ་འདྲའི་ལོ་རྒྱུས་ཡོད་པ་མ་རེད།། འདས་སོང་བཙན་བྱོལ་བོད་མི་སྤྱི་ཡོངས་ནས་རང་གི་ལས་དོན་གང་བྱུང་ཚང་མ་༧གོང་ས་མཆོག་ཉག་གཅིག་གིས་བཀའ་ཡིན་པར་བསམ་ནས་བསྡད་ཡོད་པ་མ་ཟད་གོང་ས་མཛད་འཕྲིན་རྒྱས་ཆེད་ཉིན་མཚན་ལྟོས་མེད་ཞབས་རིམ་ཡང་མང་པོ་བསྒྲུབ་དང་སྒྲུབ་བཞིན་པ་རེད།། མ་ཟད་གཙོ་གལ་ཆེ་ཤོས་དེ་གོང་ས་མཆོག་གི་སྐུ་པར་ཚོགས་ཁང་ནང་བཤམས་པའི་རྒྱུ་མཚན་ག་རེ་ཡིན་དེ་བཀའ་ཁྲི་མཆོག་ནས་མ་ཤེས་བ་ཡིན་ནམ་ཡང་ན་ཤེས་ནས་འཕྱ་གསོད་བྱས་བ་ཡིན་ནམ།། ཚོགས་ཁང་དང་གྲོས་ཚོགས་ནང་རྒྱལ་བའི་སྐུ་བཤམས་པ་དེའི་དགོས་དོན་ག་རེ་རེད།། ཡང་བློ་བཟང་སེང་གེ་པར་ཅིག་གྲོས་ཚོགས་ནང་དུ་བཤམས་ན་དགོས་མཚན་ག་རེ་ཡོད་པ་རེད།། ང་ཚོ་གོང་ས་རྒྱལ་བ་རིན་པོ་ཆེ་དགོངས་གཞི་དབུ་མའི་ལམ་དང་༧གོང་ས་མཆོག་གི་ལམ་སྟོན་འོག་ལས་གཞི་ཚང་མ་འགྲོ་བསྡད་ཡོད་པས་་༧སྤྱི་ནོར་གོང་ས་རྒྱལ་པ་རིན་པོ་མཆོག་གི་སྐུ་པར་བཤམས་གི་ཡོད་པ་རེད།། དཔེར་ན་ང་ཚོ་ཚང་མ་ནང་པ་སངས་རྒྱས་པ་ཡིན་པས་༧ལྷ་མིའི་རྣམ་འདྲེན་སྟོན་པ་སངས་རྒྱས་བཅོམ་ལྡན་འདས་ཀྱི་སྐུ་ཐང་ཅིག་བཤམས་གི་ཡོད་པ་རེད།། དེ་ག་རེ་མཚོན་བྱེད་ཡིན་པ་གལ་གནད་གཙོ་བོ་དེ་བཞག་ནས་དོན་མེད་བློ་བཟང་སེང་གེ་པར་དེས་མཚོན་དོན་ག་རེད་དམ།། གྲོས་ཚོགས་ཀྱི་ལམ་སྟོན་ཆེད་ཡིན་ནམ་ག་རེ་ཡིན་ནམ།། གྲོས་ཚོགས་ནང་སྐུ་པར་བཤམས་པ་དེ་སྒྱུ་རྩལ་ཅིག་མ་རེད།། འགྲེེམས་སྟོན་ཅིག་དེ་ལས་ཀྱང་ག་ལ་ཡིན།། བཀའ་ཁྲི་མཆོག་ནས་གྲོས་ཚོགས་ནང་དུ་༧རྒྱལ་བའི་སྐུ་པར་མར་བླངས་ན་ཡང་འདྲ་་ཡར་བཞག་ཡང་འདྲ་རད་གི་པར་ཅིག་བཤམས་པ་དེ་ལ་འགྲེལ་བཤད་ཅིག་གྲོས་ཚོགས་ལ་གནང་དགོས་བ་མ་ཟད་མི་དམངས་ལ་ཡང་གནང་དགོས་ངེས་རེད།།།
སྤྱིར་ན་ལྟ་བ་མི་མཐུན་པ་དང་བསམ་ཚུལ་མི་མཐུན་པ་སྤྱི་ཚོགས་སྟེང་ཡོད་དགོས་པ་ཞིག་རེད།
དེས་མང་གཙོའི་ནུས་སྟོབས་གོང་འཕེལ་དུ་གཏོང་ཐུབ།
འོན་ཀྱང་།
ལོ་འདེ་དག་རང་ལ་བློ་སེང་གིས་དམངས་ལ་ཕན་ཐོག་བྱ་བ་ཆེན་པོ་ཅི་ཡང་མེད།
དེ་མིན་ཉིན་འདི་དག་ལ་བོད་ཀྱི་རྒྱལ་གཅེས་དཔའ་བོ་དཔའ་མོ་ཚོའི་རོ་ཐོག་ནས་བྲོ་འཁྲབ་རྟ་རྒྱུག
ཁོ་རང་༢༠༡༦སྲིད་སྐྱོང་འདེམས་ཚེ་བོད་མི་ལ་མདུན་ལམ་མེད། མ་འོངས་པ་མེད།
རྣམས་པ་ཚོ།
དང་པོ་ནས་རྩ་དོན་གསུམ་གྱིས་ཐོག་ཕྱག་ལས་ཡག་པོ་གནང་ཡོད་པ་དང་དེ་ལམ་འགྲོ་ཡག་པོ་བྱུང་ཡོད་སྐོར་གསུང་བ་ཙམ་གྱིས་ཁྱེད་རང་མི་དྲང་བདེན་པ་ཞིག་དང་དཔྱད་བརྗོད་སྤེལ་ཐུབ་མཁན་ཞིག་གི་གནས་ཚད་ཡོད་མེད་གསལ་བོ་རེད་ད་གོང་ནས་བརྒྱ་བཤད་སྟོང་བཤད་ན་སྟོང་པ་ཆགས་སོང་ཟིག་དགོངས་དག་རྩ་དོན་གསུམ་གྱི་ཐོག་ཕྱག་ལས་གནང་པ་ཡིན་འོན་ཀྱང་གྲུབ་གང་ཙམ་ཐོན་ཡོད་གསུང་གི་འདུག་སྲིད་སྐྱོང་ལས་ཐོག་པས་ཁྱེད་རང་གིས་དེའི་ཡན་བརྗོད་རུང་སྟོང་པ་རེད་བསོད་ནམས་རྒྱས་འཕེལ་ལགས།
ཁང་པའི་སྐོར་ལ་ཡིན་ན་ངས་དམིགས་བསལ་ཞུ་དགོས་པ་མ་རེད། ཨ་རིའི་ནང་ལྟ་བུར་ཆ་བཞག་ན། ཕྲུ་གུར་ལྟ་མཁན་དང་ཁང་པ་གཙང་མ་བཟོ་མཁན། ཟ་ཁང་དུ་ལས་ཀ་བྱེད་མཁན་ཞིག་ཡིན་ནའང་ལོ་ལྔ་དྲུག་བདུན་བརྒྱད་ལ་ལས་ཀ་བྱས་པ་ཡིན་ན། ཨ་སྒོར་འབུམ་གསུམ་བཞི་ལྔ་ཡིས་ཁང་པ་ཞིག་ཉོ་ཐུབ་ཀྱི་ཡོད་པ་དེ་ཚང་མས་མཁྱེན་གསལ་རེད།
གོང་གི་་སྐད་ཆ་འདི་བདེན་པ་མ་རེད།
ཨ་རི་ནང་ཁང་པ་ཉོ་མཁན་མང་ཆེ་བས་ལོ་ངོ་30་རྗེས་ལ་གཞི་ནས་་བུ་ལོན་གཙང་འཇལ་གྲུབ་ཡི་ཡོད།
བློ་བཟང་སེང་གེ་སྲིད་ཁྲིར་མ་བཞེངས་སྔོན་ཏག་ཏག་དངུལ་འབོར་ཆེན་པོ་དེ་འདྲ་ག་ནས་རེག་པ་ཡིན་ནམ་དོགས་པ་ཆེན་པོ་འདུག དེ་མིན། ཁོང་ཉིད་སྲིད་ཁྲིར་མ་སླེབས་ཉིས་སྟོང་བཅུ་གཅིག་ཡ་སྔོན་ལོ་བཅུའི་རིང་གི་ལོ་རེའི་ནང་མིའི་ཡོང་བབས་མཚོན་བྱེད W-2 འམ་ US Tax Returns མིག་སྟོན་གནང་ན་གཞི་ནས་གསལ་པོ་ཆགས་ཀྱི་རེད།
བསོད་ནམས་ཡར་འཕེལ་ལགས་ནས་དགོངས་ཚུལ་དྲང་པོ་གསུང་ཤག ཡག་པོ་རེད། སོ་སོའི་ཆོལ་ཁ་དང་ལུང་ཚན་སོགས་ལའང་བསྟུན་ཤེས་བྱེད་དགོས་པ་དེ་གལ་ཆེ་པོ་རེད་བསམ་སོང་། མི་སུ་ཡིན་ནའང་གལ་འགངས་ཆེན་པོར་ཐུག་དུས་སོ་སོའི་ཆོལ་ཆ་དང་ལུང་ཚན་སྤུན་ཉེ་སོགས་ལས་རེ་བ་རྒྱབ་ས་ཐག་རིང་པོ་ན་ཡོད་པ་མ་རེད།
ལས་ཐོག་སྲིད་སྐྱོང་མཆོག་གི་རྩ་དོན་གསུམ་སྲིད་འཛིན་ཨོ་བྷ་མའི་ཨོ་བྷ་མའི་སྨན་བཅོས་ལྟ་སྐྱོང་ལྟར་ཁ་ཆགས་སྣ་རུལ་ཆགས་པ་རེད།
སྲིད་སྐྱོང་མཆོག་གི་སྐབས་༧གོང་ས་མཆོག་ལ་དོལ་རྒྱལ་གྱིས་མངོན་གསལ་དོད་པས་ངོ་རྒོལ་སྐད་འབོད་ཤུགས་ཆགས་པ་རེད། སྲིད་འཛིན་ཨོ་བྷ་མའི་སྐབས། དཀྱིལ་ཤར་ཨེ་ཤའི་ནང་དུ་འཇིགས་སྐུལ་དྲག་སྤྱོད་པས་་ཁ་ཆེ་རྒྱལ་ཁབ་ཟེར་བའི་འོག་འཇིགས་སྐུལ་པ་མང་དུ་ཆགས་ཏེ་འཛམ་གླིང་གི་ཞི་བདེ་ཉེན་ཁ་ཅན་དུ་གྱུར་ཡོད།
ད་མང་པོ་ཞེ་དྲག་ཡོད་ཀྱང་དུས་ཁོམ་མེད།
”ཆིག་སྒྲིལ་དང་གསར་གཏོད། རང་ཁ་རང་གསོ་བཅས་ལྟ་གྲུབ་གསུམ་གསུངས་ཡོད་པ་དང་། ལྟ་གྲུབ་དེ་གསུམ་གྱི་ཐོག་ནས་སྲིད་སྐྱོང་བློ་བཟང་སེང་གེ་མཆོག་ནས་འདས་པའི་ལོ་ལྔ་མ་ཟིན་ཙམ་གྱི་རིང་ཕྱག་ལས་ཧང་སང་བ་ཡག་པོ་གནང་ཡོད་པ་ཞིག་ལ་ང་རང་གིས་ག་དུས་ཡིན་ནའང་ངོས་འཛིན་ཞུས་པའི་ཐོག་དངོས་གནས་དྲང་གནས་རྗེས་སུ་ཡི་རངས་དང་ཐུགས་རྗེ་ཆེ་ཞུ་བ་ཡིན།” ཟེར། ང་ཡང་ཁོང་གིས་ཕྱག་ལས་གནང་ཕྱོགས་ལ་ཧང་སང་ཧོན་ཐོར་ནས་བསྡད་ཡོད།