ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་རྩ་དགོངས་ཞུས།

དེ་རིང་སྔ་དྲོར་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་ཁོང་མོས་བཀའ་ཤག་སྐབས་བཅུ་བཞི་པའི་བཀའ་བློན་ནས་བློ་ཕམ་གྱི་སྒོ་ནས་རྩ་དགོངས་ཞུས་པ་ཡིན་སྐོར་གསལ་བསྒྲགས་གནང་སོང་།

དེ་རིང་སྔ་དྲོའི་ཆུ་ཚོད་ ༡༠ སྟེང་། གངས་སྐྱིད་བོད་ཀྱི་དཔེ་མཛོད་ཁང་གི་ཕྱི་རོལ་དུ། བོད་མིའི་སྒྲིག་འཛུགས་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས། ཁོང་མོས་བཀའ་ཤག་སྐབས་བཅུ་བཞི་པའི་ཕྱི་དྲིལ་བཀའ་བློན་ནས་རྩ་དགོངས་ཞུ་བཞིན་ཡོད་པའི་སྐོར་ལ་གསར་འགོད་གསལ་བསྒྲགས་བསྐྱངས་སོང་།

བཀའ་བློན་མཆོག་གི་གསར་འགོད་གསལ་བསྒྲགས་ནང་བཀོད་དོན། “བློ་ཕམ་གྱི་སྒོ་ནས་ཕྲན་རང་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་གྱི་ལས་གནས་ནས་དགོངས་ཞུ་བྱས་པ་ཡིན། ཐག་གཅོད་འདི་ཕྲན་ནས་སྤྱི་པའི་རྩ་དོན་དང་། མ་འོངས་པར་ང་ཚོའི་མདུན་དུ་ལྷག་པའི་གནད་དོན་གལ་འགངས་ཆེ་བ་ཁག་གདོང་ལེན་བྱ་ཕྱོགས་བཅས་ལ་བསམ་ཞིབ་གཏིང་ཟབ་བཏང་ནས་བྱས་པ་ཡིན། ད་བར་བཀའ་བློན་གྱི་ལས་གནས་ཐོག་བོད་མི་མང་ལ་ཞབས་ཕྱི་ཞུ་རྒྱུའི་གོ་སྐབས་བྱུང་བ་ནི་ཧ་ཅང་སྐལ་བ་བཟང་པོར་བསམ་བཞིན་ཡོད། མཐའ་དོན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་སྐུ་ཚེ་༧ཞབས་པད་བརྟན་ཅིང་ཐུགས་བཞེད་མ་ལུས་ལྷུན་གྱིས་འགྲུབ་པ་དང་། གཞིས་བཞུགས་བོད་རིགས་སྤུན་ཟླའི་རེ་འདུན་མངོན་འགྱུར་ཡོང་བའི་སྨོན་འདུན་ཞུ།” ཞེས་བཀོད་འདུག

བཀའ་བློན་མཆོག་གིས་གསར་འགོད་པ་ཚོར་གསུངས་དོན། དེ་རིང་ཞོགས་པར་ངས་དཔལ་ལྡན་སྲིད་སྐྱོང་མཆོག་ལ་བཀའ་བློན་ནས་དགོངས་པ་ཞུ་རྒྱུ་ཡིན་པའི་ཡི་གེ་ཕུལ་ཡོད། དགོངས་ཤོག་དེའི་ངོ་བཤུས་བཀའ་དྲུང་དང་ཕྱི་དྲིལ་ལས་ཁུངས་ཀྱི་དྲུང་ཆེ་རྣམ་གཉིས། བོད་ཀྱི་སྲིད་བྱུས་ཉམས་ཞིབ་ཁང་གི་དྲུང་ཆེ་བཅས་དྲུང་ཆེ་རྣམ་པ་བཞི་ལ་ཕུལ་ཡོད། ད་རེས་ཐག་བཅད་པ་འདི་གནས་ཚུལ་ཆུང་ཆུང་ཞིག་མིན་སྟབས། ང་རང་གི་ངོས་ནས་རྒྱུན་རིང་པོར་བསམ་བློ་མང་པོ་ཞིག་བཏང་སྟེ་ཐག་བཅད་པ་ཞིག་ཡིན། འདི་ཐག་གཅོད་བྱེད་སྐབས་ང་རང་སྒེར་གྱི་གནས་ཚུལ་ཕར་བཞག་སྟེ་སྤྱི་པར་བསམ་བློ་བཏང་ནས་ཐག་བཅད་པ་ཞིག་ཡིན། ང་རང་གི་ངོས་ནས་ལོ་བཞི་ལྷག་རིང་བོད་མིའི་ཚབ་བྱས་ཏེ་རྒྱལ་ཁབ་མང་པོ་ཞིག་གི་ནང་བཀའ་བློན་གྱི་མིང་འཁུར་ནས་ཞབས་ཞུ་ཞུས་ཡོད་ལ། མ་འོངས་པར་ང་རང་གིས་མུ་མཐུད་བོད་སྤྱི་པར་ཞབས་ཞུ་ཞུ་བའི་སེམས་ཤུགས་དང་གདེང་ཚོད་ཡོད། ངས་དགོངས་ཤོག་ཕུལ་དགོས་པའི་རྒྱུ་མཚན་སྐོར་རྗེས་མ་གོ་སྐབས་གཞན་པ་བཟུང་ནས་ཞིབ་ཚགས་ཀྱིས་ཞུ་ཡི་ཡིན། ཞེས་གསུངས་སོང་།

བཀའ་བློན་བདེ་སྐྱིད་ཆོས་དབྱངས་མཆོག་ནི། ཕྱི་ལོ་ ༡༩༦༦ ལོར་སྐུ་འཁྲུངས་ཤིང་། ༡༩༧༡ ལོར་རྒྱ་གར་ནས་ཁེ་ན་ཌར་གཞིས་སྤོས་གནང་། དེར་དབུས་ཨེ་ཤ་ཡ་དང་སྤྱི་ཚོགས་ཡར་རྒྱས་ཀྱི་རིག་གནས་ཐོག་ (M.A)ཐོན་རྗེས། ༡༩༩༠ ལོར་བོད་མི་ཨ་རིར་(Connecticut, USA) གཞིས་སྤོས་ཀྱི་ལས་གཞིར་ཞབས་ཞུ་གནང་། ༡༩༩༩ ནས་ ༢༠༠༣ བར་ཨ་རི་ཀུན་ཕན་ཐེབས་རྩ་ཚོགས་པའི་ལས་འཆར་འོག་བོད་ནང་དུ་ཕེབས་ཏེ། མཚོ་སྔོན་ཟི་ལིང་གྲོང་ཁྱེར་དུ་སྤྱི་ཚོགས་ཡར་རྒྱས་ཀྱི་ལས་གཞིའི་འགན་འཁུར་བ་དང་། (Pepperidge Farm Inc.) དང་(Canada World Youth)་ཞེས་པའི་སྒྲིག་འཛུགས་ཁག་ནང་མི་མང་འབྲེལ་མཐུད་པ། ༢༠༡༡ ཟླ་ ༩ པའི་ནང་སྲིད་སྐྱོང་བློ་བཟང་སེང་གེ་མཆོག་གིས་ཁོང་མོ་ཕྱི་དྲིལ་བཀའ་བློན་དུ་བསྐོ་བཞག་གནང་སྐབས། ཁེ་ན་ཌའི་མོན་ཊེ་ཡོལ་མཐོ་རིམ་སློབ་གྲྭ་ཆེན་མོའི་ཁེ་སྒོར་ས་ཡ་ ༢༠༠༠ ལྷག་གི་སྨན་ཁང་གསར་རྒྱག་གི་ལས་གཞི་རྒྱ་ཆེ་ཞིག་འགྲོ་བཞིན་ཡོད་པ་དེའི་འབྲེལ་མཐུད་པའི་མཚན་གནས་བཅས་བཞེས་བཞིན་ཡོད་པ་དང་། ༢༠༡༡ ཟླ་ ༩ པ་ནས་ད་བར་བོད་མིའི་སྒྲིག་འཛུགས་ཕྱི་དྲིལ་བཀའ་བློན་གྱི་ཕྱག་ལས་གནང་ཡོད་པ་རེད།

གསར་འགོད་པ། པདྨ་མཚོ།