རྒྱ་ནག་གི་ཆབ་སྲིད་གནོན་ཤུགས་འོག་ཐའེ་ཝན་དམངས་གཙོའི་སྲིད་གཞུང་གསར་བས་༧གོང་ས་མཆོག་ཐའེ་ཝན་མཚོ་འགག་ནང་ཕེབས་བསུ་གནང་ཐུབ་མིན་ཐད་ལ་དོགས་གཞི་བྱེད་བཞིན་ཡོད་འདུག
གསར་གནས་འདིའི་ནང་མུ་མཐུད། ལྕམ་ཚའེ་ཡེན་ཝན་གྱིས་རྒྱ་ནག་གཞུང་གི་གནོན་ཤུགས་འཁུར་བ་ལས། ཁོང་མོས་རྒྱ་ནག་གི་དཔོན་རིགས་ཚོ་དང་ལྷན་དུ་༧གོང་ས་མཆོག་ཐའེ་ཝན་མཚོ་འགག་ནང་ཕེབས་བསུ་གནང་རྒྱུའི་ཐད་ལ་གོ་བསྡུར་གནང་དགོས་སྐོར་འཁོད་ཡོད་ཅིང་། ཐའེ་ཝན་དམངས་གཙོ་ཡར་ཐོན་ཚོགས་པའི་བསྒྲགས་གཏམ་ཞིག་གི་ནང་། ༧གོང་ས་མཆོག་ཐའེ་ཝན་མཚོ་འགག་ནང་གདན་ཞུ་གནང་བའི་གནས་ཚུལ་དེ་ཁོ་ཚོས་གསལ་བོར་ཤེས་སྐོར་བཤད་འདུག་ལ། རྒྱ་ནག་དང་ཐའེ་ཝན་ལས་དོན་ལྷན་ཁང་གིས་གནས་ཚུལ་འདིའི་ཐད་ལ་བརྡ་ལེན་ཅི་ཡང་སྤྲད་མེད་སྐོར་སོགས་འཁོད་འདུག
གནས་ཚུལ་ལྟར་ན། ཐའེ་ཝན་སྲིད་འཛིན་མ་ཡེན་ཇོ་ཡིས་ཐའེ་ཝན་མཚོ་འགག་གི་དཔལ་འབྱོར་འཚོལ་སྒྲུབ་ཆེད་ཐའེ་རྒྱ་གཉིས་ཀྱི་འབྲེལ་ལམ་ཡར་རྒྱས་བཏང་བ་དང་བསྟུན་ནས། ཕྱི་ལོ་ ༢༠༠༩ ལོའི་རྗེས་སུ་༧གོང་ས་མཆོག་ཐའེ་ཝན་མཚོ་འགག་ནང་ཕེབས་བསུ་གནང་ཐུབ་མེད་པ་དང་། ལྕམ་ཚའེ་ཡེན་ཝན་ལ་ཐའེ་ཝན་མཚོ་འགག་གི་སྲིད་འཛིན་རྒྱལ་ཁབ་ཐོབ་དང་། ཁོང་མོས་ཞི་བའི་སྒོ་ནས་ཐའེ་རྒྱ་གཉིས་ཀྱི་འབྲེལ་ལམ་རྒྱུན་འཁྱོངས་གནང་རྒྱུ་ཁག་ཐག་བྱས་ཡོད་ལྟར། རྒྱ་ནག་གཞུང་འབྲེལ་བརྒྱུད་ལམ་ཁག་གིས་ལྕམ་ཚའེ་ཡེན་ཝན་གྱི་ཁས་ལེན་ཁག་ཐག་ལ་དོ་སྣང་ཤུགས་ཆེན་བྱེད་བཞིན་ཡོད་པ་མ་ཟད། པེ་ཅིན་གཞུང་གིས་ཐའེ་ཝན་མཚོ་འགག་གི་སྲིད་འཛིན་འོས་བསྡུ་མགོ་བཙུགས་པ་ནས་བཟུང་། ཐའེ་ཝན་མཚོ་འགག་གི་རང་བཙན་ལངས་ཕྱོགས་ལ་ཉེན་བརྡ་བཏང་སྟེ། རྒྱ་ནག་གཞུང་གིས་རང་རྒྱལ་གྱི་མངའ་ཁོངས་ཐའེ་ཝན་མཚོ་འགག་བདག་སྲུང་བྱེད་རྒྱུ་ཡིན་སྐོར་ནན་བཤད་བྱས་ཡོད་པ་རེད།
ཉེ་ལམ་ནས་རྒྱ་ནག་དང་ལྷོ་ཤར་ཨེ་ཤ་ཡའི་རྒྱལ་ཁབ་ཁག་བར་རྒྱ་ནག་གི་ལྷོ་རྒྱུད་མཚོ་ཁུལ་བདག་དབང་རྩོད་ལེན་བྱེད་མུས་ཡིན་པ་ལྟར། ད་ལོའི་ཕྱི་ཟླ་ ༣ པའི་ཚེས་ ༢༠ ཉིན་ལྕམ་ཚའེ་ཡེན་ཝན་གྱིས་དངོས་སུ་ཐའེ་ཝན་དམངས་གཙོའི་སྲིད་གཞུང་གསར་བ་འཛིན་སྐྱོང་གནང་རྒྱུ་ཡིན་པ་དང་འབྲེལ། ལྕམ་ཚའེ་ཡེན་ཝན་གྱིས་༧གོང་ས་མཆོག་ཐའེ་ཝན་མཚོ་འགག་ནང་ཕེབས་བསུ་ཆོག་མིན་གྱི་གནད་དོན་དེ་ཐག་ཆོད་དགོས་པ་ཞིག་ཆགས་ཡོད་འདུག
གསར་འགོད་པ། པདྨ་རྒྱལ།
