ཤིན་ཅང་ཡུ་གུར་མི་རིགས་རང་སྐྱོང་ལྗོངས་སྲིད་གཞུང་གིས་ཤེས་ཡོན་སློབ་གསོ་དང་དཔལ་འབྱོར་འཛུགས་སྐྲུན་ལ་ཁ་གཡར་ཏེ་མི་རིགས་རིག་གནས་གཏོར་བརླག་དང་མི་རིགས་བསྲེས་ལྷད་བྱེད་ཐུབ་ལ་ཤུགས་སྣོན་བཞིན་ཡོད་འདུག
ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། ཤིན་ཅང་ཡུ་གུར་མི་རིགས་རང་སྐྱོང་ལྗོངས་ས་གནས་དམར་ཤོག་ཚོགས་པའི་དཔོན་རིགས་ཚོས་དབུས་ཁུལ་ཨེ་ཤ་ཡའི་རྒྱལ་ཁབ་ཁག་དང་མཉམ་འབྲེལ་གྱིས་ཤིན་ཅང་ཡུ་གུར་མི་རིགས་རང་སྐྱོང་ལྗོངས་ནང་ཕྱི་ཕྱོགས་ཀྱི་ཁ་ཆེ་འཇིགས་སྐུལ་དྲག་སྤྱོད་པར་འགོག་རྒོལ་དགོས་ཚུལ་དང་། ཆོས་ལུགས་གྲུབ་མཐར་ཐལ་ཆེ་བའི་དད་འདུན་འཆང་བ་ནི་ཟླ་བ་མར་ངོ་ལྟ་བུའི་མུན་ནག་གི་དུས་སྐབས་དེ་ཡིན་ལུགས་སོགས་བཤད་འདུག
ཤིན་ཅང་ཡུ་གུར་མི་རིགས་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེ་ཀྲང་ཁྲུན་ཞིན་ (Zhang Chunxian) ཟེར་བས་རྒྱ་ནག་ལོ་འཁོར་སྲིད་གྲོས་ཚོགས་ཆེན་སྟེང་གསར་འགོད་པར། ན་ནིང་ཤིན་ཅང་ཡུ་གུར་མི་རིགས་རང་སྐྱོང་ལྗོངས་ནང་དུས་ཟིང་ཞི་འཇགས་གཏོང་ཐུབ་ཡོད་ནའང་། རྒྱལ་སྤྱི་དང་རྒྱལ་ནང་གི་གནད་དོན་མང་པོར་མུ་མཐུད་གདོང་ལེན་དགོས་སྐོར་དང་། ད་ལོར་གཏན་འབེབས་བྱས་པའི་སྲིད་ཇུས་ཁག་རྒྱུན་སྐྱོང་། དབུས་སྲིད་གཞུང་གི་སྲིད་ཇུས་དང་བྱེད་ཕྱོགས་ལ་གཡོ་སྐྱོམ་སློང་མཁན་ཞིན་ཅང་ཡུ་གུར་ས་གནས་སྲིད་གྲོས་ལས་བྱེད་ཚོར་ཞིབ་བཤེར་དང་ “རྡུང་རྡེག་ཚ་ནན”བཏང་ཏེ་འཇིགས་སྐུལ་དྲག་སྤྱོད་ཀྱི་བསམ་བློར་ཡོ་བསྲང་དང་། ཏང་དང་རྒྱལ་ཁབ་ལ་བློ་དཀར་དགོས་པའི་སློབ་གསོ་དང་སྐུལ་འདེད་དགོས་ལུགས་སོགས་བཤད་འདུག
ཤིན་ཅང་ཡུ་གུར་མི་རིགས་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཡིག་གཞོན་པ་ཁྲི་ཅིན་ (Che Jun) ཟེར་བ་ཞིག་གིས། ཡུ་གུར་མི་རིགས་ས་གནས་སྲིད་གཞུང་གིས་མཐའ་མཚམས་རྒྱལ་ཁབ་ཁག་དང་མཉམ་འབྲེལ་གྱིས། ཕྱིའི་དགྲ་བོར་འགོག་རྒོལ་དང་རྒྱལ་ནང་གི་མི་མང་ཁྲིམས་འགལ་གྱི་སྒོ་ནས་ཕྱིའི་རྒྱལ་ཁབ་ཁག་ཏུ་འགྲོ་བར་བཀག་སྡོམ་དགོས་ཚུལ་བཤད་འདུག
གནས་ཚུལ་ལྟར་ན། པེ་ཅིན་སྲིད་གཞུང་གིས་ཁ་ཆེ་མི་རིགས་འདུས་སྡོད་ཆེ་བའི་ཤིན་ཅང་མི་རིགས་ས་གནས་ཁག་ཏུ་སྐད་ཡིག་སློབ་གསོ་དང་ཆོས་ལུགས་བྱེད་སྒོ་ཁག་ལ་དམ་དྲག་ཤུགས་ཆེན་བྱེད་བཞིན་ཡོད་པར་བརྟེན། ཡུ་གུར་མི་རིགས་ས་གནས་ཁག་ཏུ་ཟིང་འཁྲུག་བསྟུད་མུར་འབྱུང་བཞིན་ཡོད་པ་དང་། རྙོག་འཛིང་དེ་དག་ཁྲོད་ཡུལ་མི་བརྒྱ་ཕྲག་མང་པོར་ཤི་རྨས་ཐེབས་ཀྱི་ཡོད་ཅིང་། པེ་ཅིན་གཞུང་གིས་འཁྲུག་རྩོད་འདི་ནི་ཕྱི་ནང་གི་ཁ་ཆེ་འཇིགས་སྐུལ་དྲག་སྤྱོད་པས་ངན་སྐུལ་བྱས་པ་ཡིན་ལུགས་རྗོད་ཀྱིན་ཡོད་འདུག སྲིད་འཛིན་ཞི་ཅིན་ཕིན་གྱི་འཛིན་སྐྱོང་འོག་གི་རྒྱ་ནག་དབུས་སྲིད་གཞུང་གིས་རྒྱལ་ཁབ་བརྟན་ལྷིང་ལ་ཁ་གཡར་ཏེ“རྡུང་རྡེག་ཚ་ནན” (Strike Hard) ཞེས་པའི་སྲིད་ཇུས་སྤེལ་ཏེ་ཡུ་གུར་གྲངས་ཉུང་མི་རིགས་ས་གནས་ཁག་ཏུ་ཉེན་རྟོག་དམག་མི་ཆེད་གཏོང་གིས་རྟོག་ཞིབ་དང་དྲག་གནོན་བྱེད་པ་དང་། ཤེས་ཡོན་སློབ་གསོ་དང་དཔལ་འབྱོར་འཛུགས་སྐྲུན་ལ་ཁ་གཡར་ནས་ཡུ་གུར་མི་རིགས་རིག་གནས་དང་ཆོས་ལུགས་རིག་གནས་བསྲེས་ལྷད་གཏོང་བ། ཐ་ན་ཡུ་གུར་མི་རིགས་དང་རྒྱ་ནག་ཧན་མི་རིགས་གཉིས་བར་གཉེན་སྒྲིག་གི་བྱེད་སྒོ་སྤེལ་ཏེ་རིགས་རུས་བསྲེས་ལྷད་གཏོང་ཐབས་སོགས་ལ་ཤུགས་སྣོན་གཏོང་གི་ཡོད་འདུག
གསར་འགོད་པ། པདྨ་རྒྱལ།
