ང་ལ་ཆོལ་ཁའི་ཕྱོགས་ཞེན་བྱས་སོང་ཟེར་བའི་སྐད་ཆ་དེ་འདོགས་ས་རག་གི་མ་རེད།

སྲིད་སྤྱིའི་འོས་བསྡུ་བསླེབ་ལ་ཉེ་བ་དང་བསྟུན་ཏེ། འདི་གའི་གསར་ཁང་གིས་སྲིད་སྐྱོང་འོས་མི་གཉིས་ཀྱི་རྒྱབ་སྐྱོར་ཚོགས་པ་སོ་སོར་འབྲེལ་བ་ཞུས་ཏེ། རིམ་པ་དང་པོར་སྲིད་སྐྱོང་འོས་མི་བློ་བཟང་སེང་གེ་མཆོག་གི་རྒྱབ་སྐྱོར་བ་ཨ་རིར་གནས་སྡོད་བསོད་ནམས་རྒྱས་འཕེལ་ལགས་དང་། སྲིད་སྐྱོང་འོས་མི་སྤེན་པ་ཚེ་རིང་མཆོག་གི་རྒྱབ་སྐྱོར་བ་ཐར་ལམ་སྒྲོལ་མ་ལགས་གཉིས་ལ་བཅར་འདྲི་ཞུས་ཟིན་ལ། རིམ་པ་གཉིས་པར་སྲིད་སྐྱོང་འོས་མི་གཉིས་དང་ཆོལ་ཁ་ལོགས་ཀ་ཡིན་པའི་རྒྱབ་སྐྱོར་བ་ངོ་སྤྲོད་གནང་བ་ལྟར། དྲང་བདེན་ཕྱོགས་ལྷུང་མེད་པའི་ཐོག་ནས་སྲིད་སྐྱོང་འོས་མི་གཉིས་ཀྱི་སྐྱོན་ཡོན་ལ་དཔྱད་བསྡུར་གནང་ཡོད།

བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལ་རྒྱབ་སྐྱོར་ཞུ་མཁན་དྷ་ས་རྒྱུད་སྟོད་དཔེ་མཛོད་ཁང་གི་འགན་འཛིན། ཕ་ཡུལ་ཁམས་སོག་རྫོང་དཀར་ཤོད་ནས་ཡིན་པའི་དགེ་འདུན་པ་བློ་བཟང་ཀླུ་སྒྲུབ་ལགས་སུ། ཚོགས་གཙོ་མཆོག་ལ་ག་རེ་བྱས་ནས་རྒྱབ་སྐྱོར་ཞུ་ཡི་ཡོད་སྐོར་དྲིས་པར་ཁོང་གིས། ཐོག་མ་ནས་ཞུ་དགོས་པ་ཞིག་ལ་ཕྱི་ལོ་ ༢༠༡༦ ལོའི་སྲིད་སྐྱོང་འདེམ་སྐབས། གང་ཟག་བྱེ་བྲག་པ་ཞིག་འཁུར་ཡོང་ནས་དེ་སྲིད་སྐྱོང་ལ་འོས་ཀྱི་འདུག་མི་འདུག་ང་རང་གི་ངོས་ནས་ཞིབ་འཇུག་བྱས་མེད། སྒྲིག་འཛུགས་རང་གི་ཐོག་ནས་ད་ལྟའི་བོད་ཀྱི་གནས་བབ་དེ་ག་འདྲ་ཞིག་དགོས་པ་དང་། དེ་ལ་འོས་འཚམ་གྱི་སྲིད་སྐྱོང་ཞིག་གང་དུ་འདུག་ཅེས་མང་ཚོགས་ནང་ཕར་འཚོལ་དུ་འགྲོ་སྐབས། སྲིད་སྐྱོང་ལ་སྤེན་པ་ཚེ་རིང་མཆོག་ཡག་ཤོས་སུ་མཐོང་བ་རེད། ངས་ཚོགས་གཙོ་མཆོག་ལ་རྒྱབ་སྐྱོར་ཞུ་དགོས་པའི་རྒྱུ་མཚན་ལ་སྡོམ་བརྒྱབ་པ་ཡིན་ན། དོན་ཚན་གསུམ་གྱི་ཐོག་ནས་ཞུས་ན་འགྲིག་འདུག དོན་ཚན་གསུམ་སྟེ་རེ་བ་དང་གྲ་སྒྲིག གདོང་ལེན་བཅས་ཡིན་ལ། དང་པོ་རེ་བ་དེ་བོད་ཀྱི་ཆབ་སྲིད་ཀྱི་གནས་བབ་ཐོག་ནས་ད་ལྟའི་ཆར་ང་ཚོའི་ལུང་པ་ཆ་ཚང་རྒྱ་མིའི་ལག་ཏུ་ཤོར་བསྡད་ཡོད་སྟབས། ཆབ་སྲིད་ཀྱི་ཐོག་ནས་བོད་དོན་བདེན་མཐའ་སེལ་བར་ཐབས་ཤེས་བྱེད་དགོས་ཀྱི་ཡོད་པ་དང་། དེའི་ཐབས་ལམ་དེར་སྡོམ་བརྒྱབ་པ་ཡིན་ན། བོད་མི་མང་ཆེ་བའི་མངོན་འདོད་དང་༧གོང་ས་མཆོག་གི་ལམ་སྟོན། སྤྱི་འཐུས་ལྷན་ཚོགས་ཀྱི་གྲོས་ཆོད་ཀྱི་དགོངས་དོན་དེ་བླ་ན་མེད་པའི་ཐབས་ལམ་དབུ་མའི་སྲིད་བྱུས་ཀྱི་ཐོག་ནས་བོད་དོན་བདེན་མཐའ་སེལ་དགོས་པ་དེ་གནད་འགག་ཆེ་ཤོས་ཆགས་བསྡད་ཡོད་པ་རེད། ལམ་དབུ་མའི་སྲིད་བྱུས་ཀྱི་རྒྱབ་ལྗོངས་ག་རེ་ཡིན་པ་དང་། ལྟ་གྲུབ་ཀྱི་གཞི་རྩ་ག་རེ་ཡིན་པ། མ་འོངས་པར་དེའི་ཐོག་ནས་གྲུབ་འབྲས་ག་རེ་འཐོན་གྱི་ཡོད་པ་དང་། དེས་བོད་མིའི་མངོན་འདོད་ཆ་ཚང་བསྐོང་ཐུབ་ཀྱི་ཡོད་པའི་ཐད་ཚོགས་གཙོ་མཆོག་གོ་རྟོགས་དང་གདེང་ཚོད་ཆ་ཚང་ཡོད་མཁན་གྱི་གང་ཟག་ཅིག་དང་། ཐོག་མཐའ་བར་གསུམ་དུ་ལམ་དེའི་ཐོག་ལ་ཤར་སྐྱོད་བྱེད་མཁན་ཞིག་ཡིན་སྟབས། ཏན་ཏན་རྒྱ་ནག་གི་ངོས་ནས་ང་ཚོར་འབྲེལ་བ་ཞིག་བྱས་པ་ཡིན་ན། དེ་འདྲའི་ལམ་དེར་གདེང་ཚོད་དང་ཡིད་ཆེས་ཡོད་པའི་མི་ཞིག་ལ་འབྲེལ་བ་བྱེད་ངེས་རེད་མ་གཏོགས་གཞན་པ་ཞིག་ལ་བོད་རྒྱ་ཞི་མོལ་གྱི་གནས་སྟངས་དེ་ཁག་པོ་ཆགས་བསྡད་ཡོད་པ་རེད། དེར་བརྟེན་ཆབ་སྲིད་ཀྱི་གནས་སྟངས་ཀྱི་ཐོག་ནས་ང་ཚོས་རེ་བ་བཟང་ས་ནས་རྒྱོབས་ཟེར་བ་ལྟར་བོད་དོན་བདེན་མཐའ་མྱུར་ཏུ་སེལ་ཆེད་ཁོང་ལ་རྒྱབ་སྐྱོར་ཞུ་ཡི་ཡོད།

གཉིས་པ་གྲ་སྒྲིག་རེད། གྲ་སྒྲིག་དེ་ང་ཚོའི་ཆབ་སྲིད་ཀྱི་གནས་བབ་མི་རབས་གཅིག་དང་རྒྱལ་ཁབ་གཅིག་གི་གནས་སྟངས་ཀྱི་ཐོག་ནས་ལམ་སང་ཐག་གཅོད་ཅིག་མ་བྱུང་བ་ཡིན་ན། ང་ཚོའི་འཐབ་རྩོད་དེ་མུ་མཐུད་རྒྱུན་གནས་ཡོང་བར་གལ་ཆེ་ཤོས་དེ་བོད་མི་རིགས་ཀྱི་ངོ་བོ་སྲུང་སྐྱོབ་བྱེད་དགོས་པ་དང་། ལྷག་པར་དུ་བཙན་བྱོལ་གྱི་སྒྲིག་འཛུགས་འདི་ཚགས་ཚུད་པོ་གནས་དགོས་པ་རེད། བཙན་བྱོལ་གྱི་སྒྲིག་འཛུགས་འདི་ཚགས་ཚུད་པོ་ག་འདྲ་གནས་དགོས་མིན་ཐད་ཚོགས་གཙོ་མཆོག་ལ་ཆ་བཞག་ན། གཞིས་ཆགས་རིམ་པའི་ལས་རིགས་འདྲ་མི་འདྲའི་ཐོག་ནས་ད་ལྟའི་སྤྱི་འཐུས་ཚོགས་གཙོའི་བར་དུ་ཐེམ་པ་རིམ་འཛེགས་ཀྱིས། སོ་སོའི་སྤྱི་ཚོགས་ཀྱི་བདེ་སྡུག་གི་ཚོར་བ་མྱངས་ནས་བསླེབས་པའི་མི་ཞིག་ཆགས་ཡོད། ལྷག་པར་དུ་ད་ལྟའི་ཆར་བོད་མི་རིགས་ཀྱི་ངོ་བོ་སྲུང་སྐྱོབ་བྱེད་པར་ལམ་སྟོན་ཡོད་ན་མེད་ན་དེ་ཤེས་ཡོན་སྲིད་བྱུས་ཆགས་བསྡད་ཡོད་ལ། ཤེས་ཡོན་སྲིད་བྱུས་དེ་བོད་མི་རིགས་ཀྱི་བཟང་སྤྱོད་གོང་འཕེལ་དུ་གཏོང་བའི་གཞི་རྩ་ཞིག་ཆགས་བསྡད་ཡོད་པ་མ་ཟད། ནང་པའི་ཐུན་མོང་མ་ཡིན་པའི་ཆོས་དང་རིག་གཞུང་གི་གཞི་རྩ་ཞིག་ཆགས་བསྡད་ཡོད་པ་རེད། ཤེས་ཡོན་སྲིད་བྱུས་དེ་སྐབས་སྔོན་མའི་བཀའ་ཤག་སློབ་དཔོན་ཟམ་གདོང་རིན་པོ་ཆེ་མཆོག་གི་སྐབས་ནས་གཏན་འབེབས་གནང་བ་ཞིག་རེད་ལ། ཚོགས་གཙོ་མཆོག་གིས་ཤེས་ཡོན་སྲིད་བྱུས་ཀྱི་ངོ་བོ་དང་གོ་རིམ། རྒྱབ་ལྗོངས་རྒྱུ་མཚན་བཅས་ཆ་ཚང་ཞིག་ཉམས་སུ་མྱོང་ཡོད་པ་རེད། དེ་འདྲ་ཡིན་དུས་མ་འོངས་པར་མུ་མཐུད་བོད་མི་རིགས་ཀྱི་ངོ་བོ་སྲུང་སྐྱོབ་བྱེད་དགོས་ན། སྐད་ཡིག་དང་རིག་གཞུང་གིས་སྲུང་སྐྱོབ་བྱེད་དགོས་པ་རེད་མ་གཏོགས་ཕྱི་རྒྱལ་གྱི་སྐད་ཡིག་དང་རིག་གཞུང་ཞིག་ཚུར་འཁུར་ཡོང་ནས་ང་ཚོའི་རིག་གཞུང་སྲུང་སྐྱོབ་བྱེད་ཐུབ་པ་མ་རེད། སོ་སོའི་རིག་གཞུང་སྲུང་སྐྱོབ་བྱེད་ཐུབ་པར་དང་པོ་མགོ་ལ་སྡོད་མཁན་མི་ཁོ་རང་ལ་དེའི་གོ་རྟོགས་ཆ་ཚང་ཞིག་ཡོད་དགོས་པ་རེད་མ་གཏོགས། མགོ་ལ་སྡོད་མཁན་སྲིད་སྐྱོང་ལ་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་སྐད་ཡིག་གི་ཞག་རྩི་འདྲ་པོ་དེ་མེད་པ་ཡིན་ན། ག་ཚོད་མ་དགོས་ག་ཚོད་བྱེད་ཀྱི་ཡོད་ལབ་པ་ཡིན་ནའང་ནུས་པ་འཐོན་རྒྱུ་ཁག་པོ་རེད། རྒྱུ་མཚན་དེར་བརྟེན་ནས་གཞིས་ཆགས་སྲ་བརྟན་དང་སྒྲིག་འཛུགས་སྲ་བརྟན། ལྷག་པར་དུ་སྒྲིག་འཛུགས་ཚགས་ཚུད་པོ་གནས་དགོས་ན། སྒྲིག་འཛུགས་ཀྱི་ཚེ་སྲོག་འདྲ་པོ་དེ་གཞུང་གི་སྒྲིག་གཞི་དང་སྲིད་བྱུས་རེད། དེའི་ཐོག་བཀའ་ཤག་སྐབས་སྔོན་མས་ཤེས་ཡོན་སྲིད་བྱུས་ནས་བཟུང་སྟེ་གཏན་འབེབས་གནང་ནས་རྨང་གཞི་ཞེ་དྲགས་གཏིང་བཞག་ཡོད་པ་དང་། ཚོགས་གཙོ་སྤེན་པ་ཚེ་རིང་མཆོག་འདྲ་པོ་ཡིན་ན་དེའི་བརྒྱུད་རིམ་ཡོངས་རྫོགས་ཉམས་སུ་མྱོང་མཁན་ཞིག་ཡིན་པ་མ་ཟད། གྲོས་ཚོགས་ཀྱི་ཚོགས་གཙོ་བྱེད་བཞིན་པའི་སྐབས་སུ་དུས་དང་ནམ་པ་ཀུན་དུ་ལས་དོན་ག་རེ་བྱས་པ་ཡིན་ནའང་། གང་ཟག་གི་དབང་བསྒྱུར་འོག་ལ་མ་སོང་བར་ཁྲིམས་ཀྱི་དབང་བསྒྱུར་ཚད་ལྡན་ཞིག་གི་ཐོག་འགྲོ་ཐུབ་པར་འབད་བརྩོན་གནང་གི་ཡོད་པ་རེད་ལ། སྐྱབས་རྗེ་ཟམ་གདོང་རིན་པོ་ཆེ་མཆོག་ནས་དམིགས་དཔེ་བཟང་པོ་བསྟན་གནང་ཡོད་པ་དེ་རྒྱུན་འཛིན་བྱེད་མཁན་གཙོ་བོ་དེ་ཁོང་ཆགས་ཀྱི་ཡོད་པ་རེད་ལ། བོད་མིའི་སྒྲིག་འཛུགས་ཀྱི་སྒྲིག་གཞི་དང་སྲིད་བྱུས་ཆ་ཚང་ལ་གོ་རྟོགས་གསལ་པོ་ཡོད་དགོས་པ་ཏན་ཏན་གནད་འགག་ཅིག་ཆགས་ཡོད་པ་རེད་བསམ་གྱི་འདུག

གསུམ་པ་གདོང་ལེན་རེད། དེ་རིང་ཁ་སང་བོད་པའི་སྤྱི་ཚོགས་ནང་བོད་པ་སྤྱི་ཡོངས་ཀྱི་བསོད་ནམས་ཉམས་པའི་སྔ་བལྟས་སྡུག་ཅག་གཅིག་ག་རེ་ཆགས་བསྡད་ཡོད་པ་རེད་ཟེར་ན། རྒྱ་མིའི་དངུལ་གྱིས་བསླུས་པའི་དོལ་རྒྱལ་རྗེས་འབྲང་བ་ཟེར་བ་ཞིག་གིས། ༧སྐྱབས་མགོན་རིན་པོ་ཆེ་གང་དུ་ཕེབས་པ་ཡིན་ནའང་ངོ་རྒོལ་སྐད་འབོད་བྱེད་བཞིན་ཡོད་པ་དང་། ལྷག་པར་དུ་ཁ་ནས་རང་བཙན་དར་ཆ་ཞིག་འཕྱར་ཏེ་༧རྒྱལ་བ་རིན་པོ་ཆེ་རྒྱལ་འཚོང་བ་རེད་ཅེས་མཚན་སྨད་ཞུས་ཏེ་སྤྱི་ཚོགས་ནང་ཧ་ཅང་ཡིད་སྐྱོ་བའི་གནས་ཚུལ་བསླངས་བ་དང་། ༧རྒྱལ་བ་རིན་པོ་ཆེ་མཆོག་གིས་དོལ་རྒྱལ་བསྟེན་གསོལ་བྱས་པ་ཡིན་ན་འཕྲལ་ཕུགས་རྒྱང་གསུམ་ལ་གནོད་སྐྱོན་ཡོང་གི་ཡོད་པའི་བླང་དོར་ལམ་སྟོན་གནང་བ་དེ་ཚོ་སྐྱུག་བྲོ་བའི་ལས་ཀ་རེད་ཟེར་བ་ལྟ་བུ་ཚུན་ཆད་བཤད་ཡོང་སྐབས། འཛེམ་ཟོན་མེད་པའི་ཐོག་ནས་སོ་སོ་སྒེར་གྱི་ཁེ་ཕན་བློས་བཏང་སྟེ་མཐའ་གཅིག་ཏུ་གདོང་ལེན་བྱེད་ཐུབ་མཁན་དེ། ད་ལྟའི་ཆར་ཁ་ཡོད་ལག་ཡོད་ཀྱི་ཐོག་ནས་ཚོགས་གཙོ་སྤེན་པ་ཚེ་རིང་མཆོག་ཆགས་བསྡད་ཡོད་པ་རེད། ད་བར་ཁོང་ལ་མིང་ཆལ་འདྲ་མིན་བཟོ་མཁན་དང་། སྐྱོན་བརྗོད་ཡོང་ཁུངས་གཅིག་༧གོང་ས་མཆོག་གི་བཀའ་དགོངས་ཐོག་ཤར་སྐྱོད་དང་། ༧གོང་ས་མཆོག་གི་བཀའ་བརྩི་ཡི་མེད་མཁན་ཚོར་འཛེམ་ཟོན་མེད་པའི་ཐོག་ནས་གདོང་ལེན་བྱས་པ་དེ་ཆགས་བསྡད་ཡོད་པ་གསལ་བོ་ཞེ་དྲགས་རེད། ངས་འདི་འདྲའི་རྒྱུ་མཚན་གསུམ་གྱི་ཐོག་ནས་ཚོགས་གཙོ་སྤེན་པ་ཚེ་རིང་མཆོག་ལ་རྒྱབ་སྐྱོར་ཞུ་བཞིན་ཡོད། ཅེས་བརྗོད་བྱུང་།

སྲིད་སྐྱོང་ལས་ཐོག་བློ་བཟང་སེང་གེ་མཆོག་ལ་རྒྱབ་སྐྱོར་ཞུ་མི་ཐུབ་པའི་རྒྱུ་རྐྱེན་ག་རེ་ཡིན་དྲིས་པར་ཁོང་གིས། རྩ་བའི་དཔལ་ལྡན་སྲིད་སྐྱོང་མཆོག་བོད་མི་མང་གིས་བདམས་པའི་སྲིད་སྐྱོང་རེད། སྤྱི་ཡོངས་ཀྱི་སྒྲིག་འཛུགས་ཀྱི་ཆ་ནས་གུས་ཞབས་དང་ཆེ་མཐོང་ཞུ་ཡི་ཡོད་ལ། ཞུ་དགོས་པའང་རེད། ཡིན་ནའང་། གནད་འགག་ཅིག་ག་རེ་ཆགས་བསྡད་ཡོད་པ་རེད་ཟེར་ན། གོང་དུ་ཚོགས་གཙོའི་ཁྱད་ཆོས་རྣམས་ཞུས་ཚར་དུས་ཕྱོགས་གཅིག་ནས་དེ་ག་རང་གི་ཐོག་ནས་ཧ་གོ་དགོས་པའི་གནས་སྟངས་ཤིག་ཆགས་བསྡད་ཡོད་པ་རེད། ད་དུང་གལ་ཆེན་པོ་བྱས་ཏེ་ཞུ་དགོས་པ་ཞིག་ལ། བོད་རྒྱ་ཞི་མོལ་གྱི་གནས་སྟངས་དེ་སྲིད་སྐྱོང་ཁོང་རང་གི་ཐོག་ནས་མཐའ་གཅིག་ཏུ་མ་བྱུང་བ་ཞིག་མ་རེད་དེ། ཡིན་ནའང་བོད་རྒྱ་ཞི་མོལ་གྱི་ཁོར་ཡུག་བསྐྲུན་སྟངས་ཀྱི་ཆ་ནས་ནམ་རྒྱུན་བཀའ་སློབ་གནང་སྟངས་དང་། ལྷག་པར་དུ་ཁོང་རང་ལམ་དབུ་མའི་སྲིད་བྱུས་ཐོག་གོ་རྟོགས་དང་ངེས་ཤེས་ག་ཚོད་ཡོད་མེད་ངས་ཚོད་ཐིག་གི་མི་འདུག དེ་ལས་ཀྱང་གལ་ཆེ་བ་ཞིག་ལ་བོད་མི་རིགས་ཀྱི་ངོ་བོ་མཚོན་ཐུབ་པའི་ཤེས་ཡོན་སྲིད་བྱུས་ཀྱི་སྐོར་ལ་དངོས་གནས་དྲང་གནས་ནུས་པ་འཐོན་པའི་ལས་ཀ་ཞིག་བྱས་མ་སོང་བསམ་བསྡད་ཡོད། སྤྱི་འཐུས་ལྷན་ཚོགས་ཀྱིས་ཆེད་འཛུགས་བྱས་པའི་ཞིབ་འཇུག་ཚོགས་ཆུང་གི་མཐའ་མའི་གྲུབ་དོན་ནང་། ད་ལྟ་ཤེས་ཡོན་སྲིད་བྱུས་དེ་ཤི་མི་འདུག་ཀྱང་ནད་པ་ཆགས་འདུག་ཟེར་བའི་སྡོམ་བརྒྱབ་ཡོད་པ་རེད། སོ་སོའི་ངོས་ནས་ཀྱང་རྒྱུན་དུ་ཉམས་ཞིབ་བྱེད་བཞིན་པའི་གནས་སྟངས་མང་པོ་ཞིག་གི་ཐོག་ནས་ཏན་ཏན་ནུས་པ་འཐོན་པ་ཞིག་ཆགས་ཀྱི་མི་འདུག དེ་མ་ཆགས་པ་དེ་དཔལ་ལྡན་སྲིད་སྐྱོང་མཆོག་གི་ལྷག་བསམ་མ་དག་པ་རེད་ཅེས་ཞུ་ཡི་མེད་ཀྱང་། ཁོང་རང་གི་སློབ་སྦྱོང་དང་གོམས་གཤིས་དེ་ཕྱི་རྒྱལ་གྱི་སློབ་སྦྱོང་དང་གོམས་གཤིས་ཆགས་བསྡད་ཡོད་དུས། ང་ཚོའི་ཐུན་མོང་མ་ཡིན་པའི་བོད་ཀྱི་ཆོས་དང་རིག་གཞུང་སྐད་ཡིག་དེ་དངོས་གནས་དྲང་གནས་ཤེས་ཡོན་ཅན་གྱི་སློབ་གསོ་ཞིག་ཡིན་པར་ཏན་ཏན་ཁོང་རང་གོ་རྟོགས་ཆུང་ཆུང་རེད་འདུག ལྷག་པར་དུ་དཔལ་ལྡན་སྲིད་སྐྱོང་མཆོག་གིས་ཤེས་ཡོན་སྲིད་བྱུས་དེ་གལ་ཆེན་པོར་རྩི་བཞིན་ཡོད་གསུང་གི་ཡོད་པ་རེད་དེ། དོན་དམ་གྱིས་ང་རང་ཚོ་བོད་མི་རིགས་ཀྱི་ངོ་བོ་སྲུང་སྐྱོབ་བྱེད་ཐུབ་པ་དང་བཟང་སྤྱོད་གོང་འཕེལ་གཏོང་ཐུབ་པའི་བླ་ན་མེད་པའི་ཤེས་ཡོན་དེ་ཤེས་ཡོན་ཚད་ལྡན་གྱི་སློབ་གསོ་ཞིག་ཡིན་པའི་གོ་རྟོགས་དེ་ཙམ་མེད་པའི་ཚོར་སྣང་ཞིག་གི་ཐོག་ནས་དེ་གནད་འགག་ཅིག་ཆགས་འདུག དེ་བཞིན། དཔལ་ལྡན་སྲིད་སྐྱོང་མཆོག་གིས་བར་ལམ་གྱི་བཀའ་མོལ་ནང་རྨང་གཞི་ཞེ་དྲགས་ཤིག་བཏིང་བཞག་ཡོད་གསུངས་པ་དེ་ངའི་སྣང་བར་མ་འགྲོ་བ་ཆེ་ཤོས་ཤིག་ཡིན། འཛིན་སྐྱོང་གི་སྒྲིག་གཞིའི་ཐོག་རྨང་གཞི་ཞེ་དྲགས་བཏིང་ཡོད་ཟེར་གྱི་ཡོད་ན། ལོ་ངོ་ལྔ་བཅུ་དྲུག་ཅུའི་རིང་༧སྐྱབས་མགོན་རིན་པོ་ཆེ་མཆོག་གི་ལམ་སྟོན་འོག་ཡོང་བ་ཡིན་ལ། ལྷག་པར་དུ་སློབ་དཔོན་ཟམ་གདོང་རིན་པོ་ཆེ་མཆོག་གིས་བཀའ་ཤག་སྐབས་གཉིས་ཀྱི་རིང་ལ་སྲིད་བྱུས་གཏན་འབེབས་གནང་བ་དང་། སྒྲིག་གཞི་གཏན་འབེབས་གནང་ཡོད་པ། བརྟན་འཇགས་མ་དངུལ་བཙུགས་ཡོད་པ་བཅས་ཀྱི་ནང་འགྲོ་བསྡད་པ་ཡིན་ན། སྒྲིག་འཛུགས་ཐད་སུ་ཡིན་ནའང་དཀའ་ངལ་མེད་པའི་རྨང་གཞི་ཞིག་བཏིང་བཞག་ཡོད་པ་རེད། དེ་བཞིན་དཔལ་ལྡན་སྲིད་སྐྱོང་མཆོག་གིས་ལྷིང་འཇགས་ཞེ་དྲགས་ཤིག་ཆགས་ཡོད། སྤྱིར་བཏང་རྒྱལ་ཁབ་ཀྱི་སྲིད་དབང་ལ་འཕོ་འགྱུར་བྱུང་སྐབས་ཞེ་དྲགས་ཟ་ངེ་ཟེང་ངེ་ཆགས་ཀྱི་ཡོད་པ་རེད་ཅེས་ཁ་ཆེའི་ལུང་པ་ཁ་ཤས་དཔེ་མཚོན་དུ་བགྲངས་ནས་ཅིག་གསུང་གི་འདུག་གཱ། དེ་ཁྱོན་ནས་སྣང་བར་མ་འགྲོ་བ་དང་། དངོས་གནས་དྲང་གནས་ཁས་ལེན་མི་ཐུབ་པའི་གནས་སྟངས་ཤིག་རེད། གང་ཡིན་ཟེར་ན། ཁ་ཆེའི་ལུང་པ་དེ་ཚོ་ཡིན་ན་མི་མང་གིས་གྱེན་ལོག་བྱས་ཏེ་དམངས་གཙོའི་ཐོབ་ཐང་དགོས། སྲིད་དབང་འཕོ་འགྱུར་གཏོང་དགོས་ཞེས་ཟིང་ཆ་ཞེ་དྲགས་བརྒྱབ་སྟེ་གཞུང་དང་མང་གཉིས་འཁྲུག་གི་ཡོད་པ་རེད། ང་ཚོ་བཙན་བྱོལ་དུ་བསླེབས་མ་ཐག་ནས་༧རྒྱལ་བ་རིན་པོ་ཆེ་མཆོག་ནས་ཕ་མ་བཟང་པོ་ཞིག་གིས་ཕྲུ་གུ་ཆུང་ཆུང་ཞིག་བྱམས་སྐྱོང་བྱས་པ་ནང་བཞིན་སྣེ་ཁྲིད་དེ། དངོས་གནས་དྲང་གནས་དུས་དང་འཚམ་པའི་ཐོག་ནས་ག་ཚོད་མི་མང་ལ་རྩིས་སྤྲད་པ་ཡིན་ན་དེ་ཚོད་འགན་ལྕོགས་ས་རེད་བསམ་པའི་ཐོག་ནས་སྣེ་ཁྲིད་གནང་སྟེ། ཏག་ཏག་ཅིག་འགན་འཁུར་ཐུབ་པའི་སྐབས་སུ་སྲིད་དབང་ཡོངས་རྫོགས་མི་མང་གི་ལག་པར་རྩིས་སྤྲད་གནང་བ་ཞིག་ཆགས་ཡོད་སྟབས། དེར་ལྷིང་འཇགས་ཡོང་ཡོང་བ་རེད། ལྷག་པར་དུ་ད་ལྟའི་ཆར་༧སྐྱབས་མགོན་རིན་པོ་ཆེ་ཞལ་འཚོ་ཞིང་བཞུགས་ཡོད་པ་དང་། ཁོང་ལ་ཆབ་སྲིད་ཀྱི་འགན་དབང་ཐད་ཀར་མེད་ཀྱང་འཕགས་པ་སྤྱན་རས་གཟིགས་ཀྱི་ལས་དང་སྨོན་ལམ་གྱི་འབྲེལ་བ་དང་། བོད་རྒྱ་ཆེའི་མི་མང་གི་རེ་བ་དང་ཡིད་ཆེས་ཀྱི་ཐོག་ནས་བླ་ན་མེད་པའི་རེ་བ་ཞིག་ཞུ་ཡི་ཡོད་ལ། རེ་བ་དེ་ཡོད་པ་ནང་བཞིན་ཐུགས་སྐྱེད་སྨོན་ལམ་གྱིས་ཐད་ཀར་ཆབ་སྲིད་ཀྱི་སྐུ་དབང་བཟུང་མེད་ཀྱང་། རང་ཆས་སུ་ཡོད་པའི་༧སྐྱབས་མགོན་རིན་པོ་ཆེ་མཆོག་དང་ང་ཚོ་བོད་མི་རིགས་གཉིས་མགོ་དང་མཇིང་པ་བྲལ་དུ་མེད་པའི་དམ་ཚིག་ཅིག་གི་ཐུགས་རྗེའི་འོག་ད་ལྟ་ང་ཚོར་ལྷིང་འཇགས་ཡོང་བ་དེ། དཔལ་ལྡན་སྲིད་སྐྱོང་ལས་ཐོག་པ་ཡིན་ན་རེད། གཞན་པ་སྐབས་དེ་དུས་སྲིད་སྐྱོང་སུ་ཕེབས་པ་ཡིན་ནའང་ལྷིང་འཇགས་ཡོང་བ་བརྒྱ་ཆ་བརྒྱ་ཐམ་པ་ཐག་ཆོད་པ་རེད། དེར་བརྟེན་སྐད་ཆ་དེ་ཚོ་དངོས་གནས་དྲང་གནས་གཞན་པས་ཕྱག་ལས་གནང་བཞག་པ་དེ་ཚོ་སོ་སོའི་གྲུབ་འབྲས་ལ་ཚུར་འཁུར་ཡོང་བ་དེ་ངའི་བློ་ལ་ཁྱོན་ནས་བབ་ཀྱི་མི་འདུག ཅེས་བརྗོད་བྱུང་།

སྤྱི་ཚོགས་ནང་ཚོགས་གཙོ་མཆོག་གིས་མི་བསད་ཡོད་པ་དང་ཆང་འཐུང་གི་ཡོད་པ། རང་བཙན་གྱི་ལྟ་བ་འཁུར་མཁན་ཚོར་སྡང་པོ་ཡོད་པ་རེད་ཟེར་བ་སོགས་ཀྱི་སྐྱོན་བརྗོད་ཞུ་བཞིན་ཡོད་པ་རེད། ཁྱེད་རང་གིས་གནད་དོན་དེ་ཚོར་བརྟག་དཔྱད་བྱས་མྱོང་ཡོད་དམ་ཅེས་དྲིས་པར། ཚོགས་གཙོ་སྤེན་པ་ཚེ་རིང་མཆོག་གིས་མི་བསད་པ་རེད་ཟེར་བ་དེ་ང་ཚོར་མཚོན་ན་སྐབས་དེར་བོད་དུ་ཡོད་པ་རེད། སྤེན་པ་ཚེ་རིང་མཆོག་ཐོག་མ་སྤྱི་འཐུས་སུ་ཕེབས་སྐབས་སྐད་ཆ་དེ་ཡོད་པ་མ་རེད། བར་སྐབས་ཤིག་ལ་བསླེབས་པ་རེད། རྗེས་ལ་བཀའ་ཟུར་ཞིག་གི་དེབ་ཀྱི་ཐོག་ཏུ་ཐོན་པ་རེད། དེབ་དེའི་ཐོག་མ་ཐོན་གོང་དུ་སྤྱི་འཐུས་གྲོས་ཚོགས་ནང་སློབ་དཔོན་ཟམ་གདོང་རིན་པོ་ཆེ་མཆོག་ནས་སྤེན་པ་ཚེ་རིང་མཆོག་བཀའ་བློན་གྱི་འོས་གཞིར་བཏང་ཡོང་དུས། མི་བསད་པ་རེད་ཟེར་བའི་སྐྱོན་བརྗོད་དེ་བསླེབས་ཡོང་བ་རེད། སྐྱོན་བརྗོད་དེ་བསླེབས་པའི་རྗེས་དེ་རང་ལ་ཚོགས་གཙོ་མཆོག་ནས་གནས་ཚུལ་ག་རེ་ཡིན་པ་དེ་གསལ་བཤད་ཆ་ཚང་བྱས་ཡོད་པ་རེད། སྐབས་དེར་སྐྱོན་འཛུགས་བྱེད་མཁན་གྱིས་ཚོགས་གཙོའི་གསལ་བཤད་བདེན་པ་མ་རེད་ལབ་ཡོད་པ་མ་རེད། ཉེ་ཆར་གྲོས་ཚོགས་ནང་བསྐྱར་དུ་གླེང་བ་དེ་ཁྲིམས་ཐོག་ལ་སྐྱེལ་བའི་ལམ་ཁ་ཡོད་པ་མ་རེད། དེབ་ནང་ལ་འབྲི་མཁན་བཀའ་ཟུར་ཁོང་ཡང་སྐུ་གྲོངས་བའི་རྗེས་ལ་དེབ་བཏོན་པ་རེད། ཕར་དེད་ན་སྐད་ཆ་དེ་དགོས་མཁོ་ཞིག་དང་བསྟུན་ཏེ་གླེང་ཙམ་རེ་བྱེད་པ་མ་གཏོགས་ཁུངས་སྐྱེལ་ར་སྤྲོད་ཡོད་པ་མ་རེད། སྔོན་མ་སྤེན་པ་ཚེ་རིང་མཆོག་བཀའ་བློན་འོས་ཁུངས་སུ་བཏོན་ཏེ་དགག་པ་བསླེབས་སྐབས། ཟམ་གདོང་རིན་པོ་ཆེ་མཆོག་ནས་ངའི་ངོས་ནས་ཁོང་ལ་འོས་ཆོས་ཆ་ཚང་ཚང་བསྡད་ཡོད་པ་ཞིག་ལ་ངོས་འཛིན་བྱེད་བཞིན་ཡོད། ཡིན་ནའང་། གནས་ཚུལ་དེ་འདྲ་ཡོད་པ་ཡིན་ན་བརྒྱུད་ལམ་གཞན་གྱི་ཐོག་ནས་ཐག་གཅོད་བྱེད་དགོས་པ་རེད་ཅེས་བཀའ་གནང་ཡོད་པ་རེད། དངོས་གནས་བྱས་ན་དེ་རྩ་འཛིན་བྱས་ཏེ་ཁྲིམས་ཐོག་ལ་བསྐྱལ་ནས་གཙང་མ་བཟོ་དགོས་ཀྱང་། ད་བར་དུ་ཁྲིམས་ཐོག་ལ་སྐྱེལ་མཁན་སུ་གང་ཡང་བྱུང་ཡོད་པ་མ་རེད།

དེ་ནས་ཚོགས་གཙོ་ལ་སྐྱོན་བརྗོད་གཞན་ཞིག་ནི་ཆང་འཐུང་གི་འདུག་ལབ་པ་དེ་རེད། སྤྱིར་བཏང་ཚོགས་གཙོ་མཆོག་ཁོང་རང་གིས་ཆང་འཐུང་གི་ཡོད་ལ། ཆང་གཅོད་ཀྱིའང་མིན་གསུང་གི་ཡོད་པ་རེད། ཡིན་ནའང་། ཁ་ཤས་ཀྱིས་འུར་འདྲ་པོ་བརྒྱབ་སྟེ་ག་རེ་ལབ་ཀྱི་ཡོད་པ་རེད་ཟེར་ན། ཆང་ཚད་མེད་པ་འཐུང་གི་འདུག་ཟེར་གྱི་ཡོད་ཀྱང་ངས་ཚད་མེད་པ་ཞིག་འཐུང་གི་ཡོད་པར་གཏན་ནས་ངོས་འཛིན་བྱེད་ཀྱི་མེད། ད་བར་ཚོགས་གཙོ་མཆོག་ར་བཟི་ནས་ལས་ཀ་འཐུས་ཤོར་འདི་བཏང་སོང་ཟེར་བ་ཞིག་སྟོན་རྒྱུ་ཡོད་པ་མ་རེད། རྩ་བའི་ཆ་ནས་རྒྱལ་ཁབ་རིམ་པའི་སྲིད་འཛིན་དང་སྲིད་བློན་ག་འདྲ་ཞིག་ཡིན་ནའང་། འོས་ཆོས་ཀྱི་ནང་དུ་ཆང་རག་འཐུང་མི་ཆོག་ཟེར་བའི་ཐ་ཚིག་དེ་ཡོད་པ་རེད་བསམ་གྱི་མི་འདུག་ལ། བཙན་བྱོལ་བོད་མིའི་སྲིད་སྐྱོང་གི་འོས་ཆོས་ནང་དུའང་ཐ་ཚིག་དེ་ཡོད་པ་མ་རེད།

དེ་བཞིན། ཚོགས་གཙོ་སྤེན་པ་ཚེ་རིང་རང་བཙན་ལྟ་བ་འཁུར་མཁན་ཚོའི་ཐོག་ལ་སྡང་པོ་ཡོད་པ་རེད་ལབ་པ་དེར་རྒྱུ་མཚན་བཤད་རྒྱུ་ཡོད་པ་མ་རེད། ཚོགས་གཙོ་མཆོག་ཁོང་རང་གིས་ཁ་སང་གསུངས་སོང་དེ་དངོས་གནས་རེད། ལམ་དབུ་མའི་སྲིད་བྱུས་འགྲེལ་བཤད་བྱེད་དགོས་པ་དང་། ལམ་དབུ་མའི་སྲིད་བྱུས་ལ་དོ་ཕོག་འགྲོ་བའི་གནས་ཚུལ་ཞིག་ཡོང་གི་འདུག་ན་དེ་ལ་གདོང་ལེན་བྱེད་དགོས་པ་དེ་ཚོགས་གཙོ་གཅིག་པུའི་ལས་འགན་མ་རེད། དེ་སྤྱི་འཐུས་ལྷན་ཚོགས་ཀྱི་ལས་འགན་རེད་ལ། དཔལ་ལྡན་སྲིད་སྐྱོང་མཆོག་གི་དབུས་པའི་བཀའ་ཤག་ལྷན་རྒྱས་ཀྱི་ལས་འགན་ཡང་རེད། གང་ཡིན་ཟེར་ན། ལམ་དབུ་མའི་སྲིད་བྱུས་དེ་བོད་མི་བརྒྱ་ཆ་ཕལ་ཆེར་བའི་མངོན་འདོད་དང་༧སྐྱབས་མགོན་རིན་པོ་ཆེ་མཆོག་གི་ལམ་སྟོན་ཡོད་པ། སྤྱི་འཐུས་ལྷན་ཚོགས་ཀྱིས་གཏན་ལ་ཕབ་པའི་སྲིད་བྱུས་ཤིག་ཆགས་ཀྱི་ཡོད་པ་རེད། སྲིད་བྱུས་དེར་འགྱུར་བ་མ་ཕྱིན་བར་དུ་སྲིད་བྱུས་དེའི་དབང་ལྡན་འགན་འཛིན་གྱིས་དེ་ལ་སྲུང་སྐྱོབ་བྱེད་དགོས་པ་དེ་ཁོ་རང་གི་ཕྲག་པར་བབ་པའི་ལས་འགན་རེད། དེ་ལས་འགན་སྒྲུབ་པ་རེད་མ་གཏོགས་རང་བཙན་གྱི་ལྟ་བར་སྐྱོན་བརྗོད་བྱས་པ་སོགས་འདྲ་མི་འདྲ་བྱས་པའི་གནས་སྟངས་རྩ་བ་ཉིད་ནས་མ་རེད། ཁོང་རང་བོད་མི་མང་སྤྱི་འཐུས་ཀྱི་ཚོགས་གཙོ་ཡིན་པའི་ཆ་ནས་དབུ་མའི་ལམ་ལ་རྒྱབ་སྐྱོར་དང་སྲུང་སྐྱོབ་བྱེད་དགོས་པ་དེ་ཁོང་རང་གི་ཕྲག་ཏུ་བབ་པའི་འོས་འགན་རང་ཆགས་བསྡད་ཡོད་པ་རེད། དེ་དགའ་དང་མ་དགའ་ཡི་སྐད་ཆ་ཞིག་མ་རེད། རང་བཙན་ལ་མ་དགའ་ནས་རང་བཙན་འཐབ་རྩོད་ལ་གནོད་སྐྱོན་ག་རེ་བཏང་ཡོད་བགྲང་བཅུག་ན་གང་ཡང་བགྲང་རྒྱུ་ཡོད་པ་མ་རེད།

རྩ་བའི་ཚོགས་གཙོ་མཆོག་རང་བཙན་གྱི་ལྟ་བ་འཁུར་མཁན་ཚོར་སྡང་པོ་ཡོད་པ་རེད་ཅེས་བཤད་འདུག་མཁན་ཚོར་བོད་རང་བཙན་གྱི་ཐོག་གོ་རྟོགས་ཡོད་པ་མ་རེད། སྐད་ཆ་དེ་འདྲ་བཤད་འདུག་མཁན་ཚོར་ལོ་རྒྱུས་ཀྱི་ཐོག་ནས་བོད་རང་བཙན་ག་འདྲ་རེད་ཁུངས་སྐྱེལ་དང་ལབ་ན་ལན་ཏག་ཏག་འདེབས་ཐུབ་རྒྱུ་ཁག་པོ་རེད། ད་ལྟའི་རྒྱལ་སྤྱིའི་གནས་བབ་ཀྱི་ཐོག་ནས་རང་བཙན་ག་འདྲ་རྩོད་ཀྱི་ཡིན་ལབ་ན་ཁག་པོ་རེད། དེ་བཞིན་མ་འོངས་པར་རང་བཙན་ཐོབ་སོང་ན་བོད་འདི་རང་བཙན་གཙང་མའི་རྒྱལ་ཁབ་ཏུ་ག་འདྲ་འཛུགས་སྐྲུན་བྱ་རྒྱུ་ཡིན་ལབ་ན། གོ་རིམ་དང་འཆར་གཞི་ཡོད་པའི་ཐོག་ནས་སྐད་ཆ་བཤད་ཐུབ་རྒྱུ་ཁག་པོ་རེད། དེ་འདྲ་ཡིན་དུས་སྤྱི་ཚོགས་ནང་རང་དགར་སྐད་ཆ་འདྲ་མི་འདྲ་བཤད་བསྡད་པ་ཙམ་ལས་རྒྱུ་མཚན་ཅི་གང་མཐོང་གི་མི་འདུག ཅེས་བརྗོད་བྱུང་།

ཁྱེད་རང་གིས་ཆོལ་ཁའི་ཕྱོགས་རིས་མིན་པའི་ཐོག་ནས་སྲིད་སྐྱོང་གི་འོས་མི་ཞིག་ལ་རྒྱབ་སྐྱོར་གཙང་མ་ཞུ་བཞིན་ཡོད་པ་དེས་སྤྱི་ཚོགས་ནང་མཐོང་སྣང་ག་འདྲ་ཞིག་སྐྲུན་གྱི་ཡོད་པ་རེད་ཅེས་དྲིས་པར། ང་ཚོའི་སྤྱི་ཚོགས་ནང་དམངས་གཙོའི་ལེགས་བྱང་ཐོག་གོ་རྟོགས་ཡག་པོ་མེད་པའི་སྐྱོན་ཡིན་པ་རེད་དྲན་གྱི་འདུག གང་ལྟར་སྤྱི་ཚོགས་འདིའི་ནང་ལོགས་ནས་ལམ་ག་ག་འདྲ་ཞིག་ལ་ཕྱིན་པ་ཡིན་ནའང་མིང་ཆལ་ཅིག་རང་བཞིན་གྱིས་བཟོ་ཡོང་གི་ཡོད་པ་རེད། དཔེར་ན། ང་རང་འདྲ་པོ་ཡིན་ན། མདོ་སྟོད་ཀྱི་མི་ཞིག་ཡིན་ལ། དཔལ་ལྡན་སྲིད་སྐྱོང་མཆོག་ལ་རྒྱབ་སྐྱོར་ཞུས་པ་ཡིན་ན། ཕྱོགས་གཞན་པ་ཞིག་ནས་ཆོལ་ཁ་ཡི་ཕྱོགས་ཞེན་བྱེད་ཀྱི་འདུག་ཅེས་པའི་སྐད་ཆ་དེ་རང་བཞིན་གྱིས་སླེབ་ཡོང་གི་རེད། ང་རང་ལ་མཚོན་ན། སོ་སོའི་ངོས་ནས་རྒྱུ་མཚན་མཐོང་བ་དང་རང་ཉིད་ཀྱི་བསམ་བློའི་རང་དབང་སོ་སོས་བེད་སྤྱོད་བཏང་སྟེ། མི་གཞན་གྱི་འཁྱོག་བཤད་དང་གཡམ་རྒྱུག གནོན་ཤུགས་སོགས་གང་གི་འོག་ཏུའང་མ་ཕྱིན་པའི་ཐོག་ནས་ངས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་མཆོག་ལ་རྒྱབ་སྐྱོར་ཞུ་བཞིན་ཡོད། དེ་ལ་ཆོལ་ཁའི་ཕྱོགས་ཞེན་བྱས་སོང་ཟེར་བའི་སྐད་ཆ་དེ་འདོགས་ས་རག་གི་མ་རེད་དེ། གཞན་གྱི་རྒྱུག་ཁྱི་བྱས་སོང་ཟེར་བ་དང་། གཞན་གྱི་མགོ་སྐོར་འོག་ཚུད་འདུག་ཟེར་བའི་མིང་ཆད་དེ་ངའི་མཇིང་པའི་སྒང་ལ་བསླེབ་ཡོང་རྒྱུ་ཡིན་པ་དེ་གསལ་པོ་གསལ་རྐྱང་རེད། ང་གཞན་པའི་མགོ་སྐོར་འོག་ཚུད་པ་དང་རྒྱུག་ཁྱི་བྱས་པ་གང་ཡང་མེད། རང་ཉིད་ཀྱི་རྒྱུ་མཚན་གནས་ལུགས་དེར་རང་ཉིད་གཡོལ་ཐབས་བྱས་ན་འགྲིག་གི་ཡོད་པ་མ་རེད་ལ། ལྷག་པར་དུ་བོད་སྤྱི་བའི་ལས་དོན་ཐོག་འགྲིག་གི་མེད་ས་ཞིག་ཡོང་གི་ཡོད་ན་སོ་སོར་ཅིག་ལབ་ཡོང་བསམ་ནས་གཡོལ་ཐབས་བྱས་ན་རྩ་བ་ཉིད་ནས་འགྲིག་གི་ཡོད་པ་མ་རེད། སྤྱི་ཚོགས་ནང་ཕྱོགས་ག་བར་ཕྱིན་ནའང་རང་བཞིན་གྱིས་མཇིང་པའི་སྒང་ལ་མིང་ཞིག་ཡོང་རྒྱུ་ཡིན་པ་དེ་གསལ་བོ་རེད། ཡིན་ནའང་སྤྱི་ཚོགས་ནང་མིང་ཆད་ག་རེ་བཟོས་ཡོང་གི་ཡོད་མེད་དེ་གཞི་རིམ་སྤྱི་ཚོགས་ཀྱི་སྤུས་ཚད་དང་། དེ་ལ་རྩ་ཆེན་པོ་རྩི་མིན་དེའང་གསན་མཁན་སོ་སོའི་བསམ་བློའི་གནས་ཚད་ལ་ཐུག་ཡོད་པ་རེད་མ་གཏོགས་ང་རང་གི་སྐྱོན་ཞིག་རེད་བསམ་གྱི་མེད། གནས་ཚུལ་འདིའི་གྲས་དམངས་གཙོའི་ལེགས་བྱང་གི་འགན་འཁུར་དང་སྤྱི་ཚོགས་ཀྱི་གོ་རྟོགས་ཚད་ལྡན་ཡོད་པའི་བློ་གཟུ་བོར་གནས་བའི་གང་ཟག་དེ་ཚོའི་ཐོག་ནས་ལྟ་ཚུལ་གཞན་པ་ཞིག་ཡོད་པའི་རེ་བ་དང་། ལྷག་པར་དུ་ད་ལན་གྱི་སྲིད་སྐྱོང་གི་འོས་བསྡུའི་སྐབས་སུ་ཆོལ་ཁའི་ཕྱོགས་ཞེན་གྱི་ཐོག་ནས་སྤྱི་ཚོགས་ལ་འཁྲུག་རྐྱེན་འགྲོ་བའི་ཉེན་ཁ་ཡོད་པའི་སྐབས་འདིར། ངས་བཅར་འདྲི་འདིའི་ཐོག་ནས་དམིགས་དཔེ་བཟང་པོ་ཞིག་བསྟན་ཡོད་བསམ་པའི་གདེང་སྤོབས་ཡོད། ཅེས་བརྗོད་བྱུང་།

གསར་འགོད་པ། པདྨ་མཚོ།