རྒྱ་ནག་དམར་ཤོས་ཚོགས་པའི་ཆེས་མཐོའི་ཞིབ་བཤེར་ཁང་གིས་རྒྱ་ནག་གི་གཞི་རིམ་ཁག་གི་དབུལ་སྐྱོབ་ཐེབས་རྩ་ཁག་ལོག་སྤྱོད་དང་ལྐོག་ཟ་བྱེད་མཁན་དཔོན་རིགས་ཚོར་ཞིབ་བཤེར་དང་ཚར་གཅོད་བྱ་འགུལ་གསར་བ་ཞིག་གཏན་འབེབས་དང་ལག་བསྟར་བྱ་འཆར་ཡོད་ཚུལ་བཤད་འདུག
དེ་རིང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་དམར་ཤོག་ཚོགས་པའི་ཆེས་མཐོའི་ཞིབ་བཤེར་ཁང་གི་འགན་འཛིན་ཚོ་ཅེན་མེན་ (Cao Jianming) ཟེར་བ་ཞིག་གིས། ཉེ་ལམ་ནས་གཞི་རིམ་ས་གནས་དཔོན་རིགས་ཚོས་དབུལ་སྐྱོབ་ཐེབས་རྩ་ཁག་ལོག་སྤྱོད་དང་ལྐོག་ཟ་ཚབས་ཆེ་རུ་ཕྱིན་ཡོད་སྟབས། གཞི་རིམ་གྲོང་ཁུལ་མང་ཚོགས་ཀྱི་སློབ་གསོ་དང་འཕྲོད་བསྟེན། ཁོར་ཡུག་སྲུང་སྐྱོབ་དང་འཚོ་དོད་མ་དངུལ་སོགས་ལྐོག་ཟ་བྱེད་མཁན་ས་གནས་དཔོན་རིགས་ཚོར་ཞིབ་བཤེར་དང་ཚར་གཅོད་ལས་འགུལ་སྔར་ལས་ཤུགས་དང་ཁྱབ་ཆེ་རུ་གཏོང་རྒྱུ་ཡིན་ལུགས་དང་། རྒྱལ་ནང་གི་ལྐོག་ཟ་རུལ་སུངས་ཀྱི་ནག་ཉེས་གཙང་བཤེར་བྱ་འགུལ་དོན་སྨིན་ཡོང་ཐབས་སུ་གཞུང་དམངས་མཉམ་འབྲེལ་ཐོག་འབད་བརྩོན་བྱ་རྒྱུ་ཡིན་པ་དང་། གཞི་རིམ་ས་གནས་ཁག་གི་ཆུ་ཤུགས་གློག་འདོན་དང་སྐམ་གློག་འཛུགས་སྐྲུན། གཞི་རིམ་སྡོད་གནས་འཛུགས་སྐྲུན་སོགས་ལའང་ཞིབ་བཤེར་ནན་མོ་བྱ་རྒྱུ་ཚུལ་སོགས་བཤད་འདུག
གནས་ཚུལ་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༡༤ ལོར་གཞི་རིམ་ས་གནས་དབུལ་སྐྱོབ་མ་དངུལ་དམངས་སྒོར་ཐེར་འབུམ་ ༤༣།༣ ཟུར་འཇོག་བྱས་ཡོད་པ་དེ་ཕྱི་ལོ་ ༢༠༡༠ ལོ་དང་བསྡུར་ན་ལྡབ་འགྱུར་ཟིན་གྱི་ཡོད་པ་དང་། ན་ནིང་ཕྱི་ཟླ་ ༡༠ ནས་ཕྱི་ལོ་ ༢༠༢༠ ལོའི་བར་གཞི་རིམ་གྲོང་ཁུལ་ཁག་གི་འཚོ་གནས་ཡར་རྒྱས་གཏོང་འཆར་ཡོད་ཅིང་། ཕྱི་ལོ་ ༢༠༡༢ ལོ་ནས་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་རྒྱལ་ནང་གི་ལྐོག་ཟ་རུལ་སུངས་གཙང་བཤེར་ལས་འགུལ་མགོ་བཙུགས་ཏེ། སྟག་དང་སྦྲང་མ་མཉམ་རྡུང་བྱ་རྒྱུ་ཁག་ཐག་བྱས་པ་དེས་འདས་པའི་མི་ལོ་བཅུ་ཕྲག་རིང་གི་རྒྱ་ནག་དམར་ཤོག་ཚོགས་པའི་དབང་ཤུགས་ཞ་འཐེང་དུ་གཏོང་བཞིན་ཡོད་འདུག
གསར་འགོད་པ། པདྨ་རྒྱལ།
