ངའི་འོས་ཤོག་འདི་༧གོང་ས་མཆོག་གིས་གནང་བའི་དམངས་གཙོའི་འོས་འགན་སྒྲུབ་བྱེད་ཡིན།

གནམ་ལྷ་དོན་འགྲུབ།

ངས་འདི་ལྟར་བསམ་སྟེ། སྲིད་སྐྱོང་འབུམ་རམས་པ་བློ་བཟང་སེང་གེ་མཆོག་དང་གྲོས་ཚོགས་ཀྱི་ཚོགས་གཙོ་སྤེན་པ་ཚེ་རིང་མཆོག་རྣམ་གཉིས་སུ་སྲིད་སྐྱོང་ལ་འོས་མིན་དེ་ཁོང་གཉིས་ཀྱི་སྲིད་སྐྱོང་འོས་བསྡུའི་ལས་འགུལ་སྤེལ་སྟངས་ནས་ཚོད་དཔག་ངེས་ཅན་ཞིག་བྱེད་ཐུབ་སོང་སྙམ། འབུམ་རམས་པ་བློ་བཟང་སེང་གེ་མཆོག་གིས་ཕྱི་ལོ་ ༢༠༡༡ ལོར་བཙན་བྱོལ་ནང་བྱུང་མ་མྱོང་བའི་བཀའ་ཁྲིའི་འོས་བསྡུའི་ལས་འགུལ་དེ་དམངས་གཙོའི་འགྲོ་ལུགས་དང་མཐུན་པའི་འོས་བསྡུའི་ལམ་ཁ་ད་ལྟ་འགྲོ་བཞིན་པ་འདི་གསར་གཏོད་གནང་། དེ་ནི་མི་གཅིག་གིས་དུས་གཅིག་ལ་སྐྲུན་ཐུབ་པ་བྱུང་བའི་ངོ་མཚར་ཅན་གྱི་བྱས་རྗེས་ཤིག་རེད། ཚོགས་གཙོ་སྤེན་པ་ཚེ་རིང་མཆོག་གིས་ད་ལོ་འོས་བསྡུ་སྤེལ་མགོ་བཙུགས་སྐབས། ཁོང་གིས་སྲིད་སྐྱོང་བློ་བཟང་སེང་གེ་ལ་འགྲན་འོས་པའི་བྱས་རྗེས་དང་ཤེས་ཡོན་གང་གི་ཆ་ནས་ཀྱང་དམིགས་བསལ་ཞིག་བསྟན་རྒྱུ་མེད་པར་བརྟེན། འགྲན་རྩོད་དེ་སྐྱོན་འཚོལ་རྒྱུའི་ཕྱོགས་སུ་ཁ་བསྒྱུར་བའི་ཐབས་ཇུས་མགོ་བཙུགས་པ་དང་། དེ་ནས་བཟུང་སྟེ་གཅིག་གིས་གཅིག་ལ་ནང་དོན་ཆེན་པོ་མེད་པའི་སྐྱོན་ཁོ་ན་བཙུགས་པའི་སྲོལ་ངན་གཏོད་ཅིང་། དེ་ཡང་ཆོལ་ཁའི་འཐེན་འཁྱེར་གྱི་དྲི་མ་ངན་པ་ཕྱོགས་ཀུན་དུ་ཁྱབ་པར་བྱས།

གལ་ཏེ་ཁོང་བོད་སྤྱི་པ་ལ་གཞི་རྩའི་སེམས་ཁུར་ཡོད་མཁན་ཞིག་ཡིན་ན། ཆོལ་གསུམ་རྡོག་རྩ་གཅིག་སྒྲིལ་དེ་རྩ་ཆེན་པོ་ཡིན་པ་ངོས་འཛིན་གྱིས་ཆོལ་ཁའི་མིང་ཐོག་ནས་ཁོང་ལ་རྒྱབ་སྐྱོར་བྱེད་ཀྱི་ཡིན་ཅེས་བརྗོད་སྐབས། དེ་ལྟར་བྱེད་མི་དགོས་ཅེས་ལབ་དགོས་ངེས་ཤིག་ཆགས་ཡོད། ངས་བལྟས་ན་གལ་ཏེ་ཆོལ་ཁ་བྱེ་བྲག་པས་བློ་བཟང་སེང་གེ་ཆོལ་ཁའི་མིང་ཐོག་ནས་རྒྱབ་སྐྱོར་བྱས་པ་ཆ་བཞག་ན། ཁོང་གིས་དེ་ལྟར་གནང་བཅུག་རྒྱུ་མ་རེད་བསམ་གྱི་ཡོད།

ཁོང་གིས་ཐོག་མ་ནས་སྲིད་སྐྱོང་འགྲོ་སའི་ལམ་ཁ་དེ་རྩ་བའི་ལྟ་གྲུབ་གསུམ་བཟོས་ཚར་བ་ལ་བརྟེན་ནས་ཆོལ་ཁའི་མིང་འཁྱེར་ནས་རྒྱབ་སྐྱོར་འགྲོ་ས་མེད་པ་བཟོས་ཡོད། རྒྱུན་དུ་དྷ་རམ་ས་ལའི་མི་ཚོས་མདོ་སྟོད་ཆོལ་ཁའི་གཅིག་འགྲིག་མ་སོང་གཉིས་འགྲིག་མ་སོང་ཟེར་ནས། ཁ་ན་ན་ཤོད་ཀྱི་ཡོད་པ་རེད་དེ་ད་ལོ་མདོ་སྟོད་ཆོལ་ཁ་ཡིས་ཕོ་ཚོད་ཡག་པོ་བཟུང་སྟེ། དེ་ལྟ་བུའི་ཆོལ་ཁའི་མིང་ཐོག་ནས་སྲིད་སྐྱོང་འོས་མི་སུ་ལ་ཡང་རྒྱབ་སྐྱོར་མི་བྱེད་རྒྱུའི་གསལ་སྒྲགས་བྱས་པར་ལོ་རྒྱུས་ཀྱིས་བསྔགས་བརྗོད་ཞུ་ངེས། ཆོལ་ཁའི་མིང་ཐོག་ནས་ལས་འགུལ་སྤེལ་ཡོང་དུས་རང་བཞིན་གྱིས་རྒྱལ་ཁབ་ཀྱི་གཅིག་སྒྲིལ་ལ་ཕོག་ཐུག་ཡོང་རྒྱུ་ཡིན་པ་གསལ་པོ་རེད་ལ་ད་ལྟ་ནས་གསལ་པོ་ཞེ་དྲགས་ཆགས་ཚར་སོང་། དཔེར་ན། དེ་སྔོན་སྲིད་སྐྱོང་བློ་བཟང་སེང་གེ་ལ་འོས་མི་འཕེན་མཁན་གྱི་ཁམས་པའི་ནང་དུ་ད་ལྟ་ཆོལ་ཁ་གཞན་ཚང་མས་ཆོལ་ཁའི་རྩོད་མགོ་སློང་སོང་བས། ད་ལོ་ཡིན་གཅིག་མིན་གཉིས་བློ་བཟང་སེང་གེ་འོས་མ་འཕེན་ན་འགྲིག་མ་སོང་ཟེར་མཁན་མང་པོ་འདུག འདི་ནི་དེ་སྔར་རང་གི་སྲིད་དོན་གྱི་ལང་ཕྱོགས་ཐོག་ནས་རྒྱབ་སྐྱོར་བྱས་པ་ཡོད་མ་རེད་དེ། ད་ལོ་ཆོལ་ཁ་ཡི་ཚོར་བའི་འོག་ནས་རྒྱབ་སྐྱོར་བྱེད་དགོས་པ་ཞིག་བཟོས་པ་རེད།

དེ་བཞིན་མདོ་སྨད་ཀྱི་མི་ཁུངས་ནས་དེ་སྔོན་ཆོལ་ཁའི་འཐེན་འཁྱེར་མེད་ཟེར་མཁན་དེ་འདྲ་ལའང་ད་ལྟ་གློ་བུར་དུ་སྦས་མི་ཐུབ་པའི་ཆོལ་ཁའི་ཚོར་ཤུགས་ཆེན་པོ་སླེབས་འདུག གནས་ཚུལ་འདིའི་ཐད་རྒྱལ་སྤྱིའི་ཐོག་བོད་ལ་ཤ་ཚ་ཡོད་མཁན་མང་པོ་ལའང་བློ་འཚབ་སྐྱེ་བཞིན་ཡོད། དཔེར་ན། ཨ་རིའི་གྲོས་ཚོགས་ཀྱི་བོད་དོན་རྒྱབ་སྐྱོར་བ་འདས་པོ་མཱོ་ན་ཧན་གྱི་བུ་མོ་དང་བོད་ལ་དུས་ཡུན་རིང་པོར་དོ་སྣང་བྱེད་མཁན་ལྕམ་མཱོ་ར་མོ་ནེ་ཧན་གྱིས་ཉེ་ཆར་བྲིས་པའི་རྩོམ་ཡིག་ནང་སྤེན་པ་ཚེ་རིང་ལ་དགག་པ་ཤུགས་ཆེན་བརྒྱབ་ཡོད། མགོ་བརྗོད་ལ་“ཧམ་བཤད་ཅན་གྱི་སྤེན་པ་ཚེ་རིང་”ཞེས་པའི་རྩོམ་ཡིག་ནང་སྤེན་པ་ཚེ་རིང་གིས་འཐེན་འཁྱེར་ཕྱོགས་ལྷུང་ཤུགས་ཆེན་བྱེད་ཀྱི་ཡོད་པ་དང་། ཁོང་གིས་བོད་ཀྱི་དམངས་གཙོ་ལ་གནོད་སྐྱོན་ཚབས་ཆེན་བཟོ་ཉེན་ཡོད་པ་ཐེར་འདོན་གནང་ཡོད། https://www.facebook.com/maura.moynihan.3 དེ་བཞིན་ཨ་རིའི་ནང་ཡོད་པའི་བོད་ཀྱི་སྲིད་ཇུས་བསྐྱར་ཞིབ་ཁང་གིས་གསུམ་པའི་ཚེས་ ༩ ཉིན་སྤེལ་བའི་བསྒྲགས་གཏམ་ནང་དུའང་། སྤེན་པ་ཚེ་རིང་གིས་བོད་ཀྱི་གཅིག་སྒྲིལ་ལ་གནོད་འཚེ་བྱེད་པའི་ལས་འགུལ་སྤེལ་བཞིན་པའི་ཉེན་བརྡ་བཏང་ཡོད།

http://www.tibetanpoliticalreview.org/editorials/flippingtibetandemocracy གོང་ཞུས་རྩོམ་པ་པོ་དེ་དང་ཚོགས་པ་དེ་གཉིས་ཀ་ནི་རྒྱུན་དུ་སྲིད་སྐྱོང་བློ་བཟང་སེང་གེ་ལ་རྒྱབ་སྐྱོར་བྱེད་མཁན་མིན་པར་སྐྱོན་བརྗོད་བྱེད་མཁན་གྱི་གྲས་རེད། ཡིན་ནའང་། སྐྱུར་མོ་ཚོར་དུས་མངར་མོ་ཤེས་ཟེར་བ་ལྟར་ད་ལྟ་སྤེན་པ་ཚེ་རིང་འོས་མི་ལ་ལངས་ཡོང་བ་མཐོང་དུས། ཁོང་ཚོས་འོས་བསྡུའི་སྔོན་དུ་སྤེན་པ་ཚེ་རིང་ལ་སྐྱོན་བརྗོད་བྱས་ཏེ་བློ་བཟང་སེང་གེ་རྒྱབ་སྐྱོར་བྱེད་པ་ཤུགས་ཀྱིས་བསྟན་ཡོད།

བོད་ནང་བོད་མི་ཚོས་བོད་ལ་བདེན་མཐའ་གསལ་རྒྱུ་ཞིག་ཡོད་ཤག་བྱས་ཏེ་རང་སྲོག་ཚུན་ཆད་བློས་གཏོང་འདི་ཙམ་བྱས་པ་དང་། མཐུན་འབྲེལ་དང་ཆོལ་གསུམ་གཅིག་སྒྲིལ་ཟེར་བའི་འབོད་ཚིག་གི་འོག་ནས་ལས་འགུལ་ཤུགས་ཆེན་པོ་འདི་འདྲ་ཞིག་འགྲོ་བཞིན་པའི་སྐབས་སུ། ཁོང་ཚོའི་རེ་བ་རྒྱག་ཡུལ་བཙན་བྱོལ་ནང་ཆོལ་འཐེན་པ་ཚོས་བྱ་སྤྱོད་འདི་འདྲའི་འོག་ནས་ཁམས་པ་ཞིག་སྲིད་སྐྱོང་མ་ཆགས་ན། ར་གཟི་ཞིག་ཡིན་ཡང་ཡར་འཇོག་ཐབས་བྱེད་ཀྱི་ཡིན་ཟེར་བ་ལྟ་བུའི་བྱ་སྤྱོད་འདི་འདྲ་སྤེལ་བ་དེ་ངོ་མ་བོད་ལ་ཤ་ཚ་མེད་པའི་རྟགས་མཚན་ལས་གང་ཡང་མིན། མ་གཞི་རྒྱ་གར་གྱི་བཤད་སྲོལ་ལྟར་སྤྲེའུ་ཡི་སྒ་སེར་གྱི་དྲོ་བ་ཅི་ལྟར་ཤེས་ཟེར་བ་ལྟར། བོད་ནང་གི་བོད་མིའི་སེམས་ནང་གི་དཀའ་སྡུག་དང་སེམས་ཤུགས་དེ་བཙན་བྱོལ་ནང་གི་ཆོལ་ཁའི་མིང་གི་འོག་ནས་ཁེ་ཕན་ཁོ་ན་ལེན་བཞིན་མི་ཚེ་སྐྱེལ་མཁན་གྱི་མི་རྒན་ཚོའི་སེམས་གཏིང་ལ་ཚོར་རྒྱུ་ཁག་པོ་རེད།

ད་ལོ་དབུས་གཙང་ཆོལ་ཁའི་མགོ་གཙོ་རེ་ཟུང་དང་མདོ་སྨད་ཆོལ་ཁའི་མགོ་གཙོ་རེ་ཟུང་། མངའ་རིས་ཚོགས་པའི་མགོ་གཙོ་རེ་ཟུང་གིས་ཆོལ་ཁའི་མིང་ཁྱེར་ནས་སྲིད་སྐྱོང་འོས་བསྡུའི་ནང་འཛུལ་ཡོང་བའི་རྐྱེན་གྱིས། ད་བར་བོད་ཕྱི་ནང་གཉིས་སུ་༧གོང་ས་མཆོག་གི་དབུ་ཁྲིད་དང་། བར་ལམ་ལོ་བཞི་ལྷག་གི་རིང་ལ་སྲིད་སྐྱོང་གིས་མགོ་ཁྲིད་པའི་བཙན་བྱོལ་བོད་གཞུང་གི་ལམ་སྟོན་འོག མདུན་སྐྱོད་བྱེད་བཞིན་པའི་གངས་ལྗོངས་ཀྱི་གཅིག་སྒྲིལ་དེའི་གོམ་པ་ཕྱིར་ནུར་ལ་འབུད་རྒྱག་ཤུགས་ཆེན་པོ་ཞིག་བརྒྱབ་སོང་། འོན་ཀྱང་དེའི་འདོད་དོན་འགྲུབ་དང་མི་འགྲུབ་དེ་འོས་བསྡུའི་ཉིན་མོར་མང་ཚོགས་ཀྱིས་ཁ་གྲག་ཡོང་གི་རེད།

གལ་ཏེ་གནས་སྟངས་འདིའི་འོག་ནས་བོད་གཅིག་སྒྲིལ་སྡུག་ཏུ་སོང་བ་ཡིན་ན་མ་འོངས་བོད་ཀྱི་ལོ་རྒྱུས་ནང་ད་ལོའི་འོས་བསྡུའི་ལས་འགུལ་སྤེལ་ཕྱོགས་དེ་གླེང་གཞི་ཆེན་པོ་ཞིག་ཏུ་འགྱུར་རྒྱུ་དང་། དོ་བདག་གི་མི་ས་འོག་ལ་སོང་ན་གཏམ་ས་སྟེང་ནས་ནམ་ཡང་ཡལ་གྱི་མ་རེད། བཙན་བྱོལ་ནང་མི་འགའ་ཤས་ཀྱིས་ཆོལ་ཁ་ཟེར་བ་དེ་དགོས་ཀྱི་མི་འདུག་ཆབ་སྲིད་ཀྱི་ཚོགས་པ་འཛུགས་དགོས་ཀྱི་འདུག་ཟེར་མཁན་མང་པོ་ཡོད། དྲང་པོ་བཤད་ན་དེ་ལྟར་ཤོད་མཁན་མང་ཆེ་བ་དབུས་གཙང་གི་མི་སྣ་རེད། ཡིན་ནའང་། དོན་དངོས་སུ་ཆོལ་ཁའི་འཐེན་འཁྱེར་སླར་གསོ་དང་རྒྱུན་གནས་ཡོང་བ་བྱེད་ཀྱི་ཡོད་པ་མ་ཟད། ཆབ་སྲིད་ཚོགས་པ་ལ་སེམས་འཁོར་བའི་གོ་སྐབས་རྩ་བ་ནས་མེད་པ་བཟོ་བཞིན་ཡོད།

ཡ་རབས་མ་རབས་སྤྱོད་པའི་ཤེས།

བར་ལམ་དྷ་སར་སྲིད་སྐྱོང་འོས་མིའི་བགྲོ་གླེང་ཁག་བྱེད་སྐབས། ཡ་རབས་དང་བཟང་སྤྱོད་དགོས་ཞེས་རང་ལ་བཟང་སྤྱོད་ཡོད་མདོག་མདོག་དང་། གཞན་ལ་མི་འདུག་ཟེར་ནས་ཡ་རབས་ཡོད་མེད་དེ་སྲིད་སྐྱོང་གི་ཆ་རྐྱེན་གལ་ཆེན་ཞིག་ཡིན་པར་བརྩིས་ཡོད། འོན་ཀྱང་། གཏམ་བཤད་མགོ་བཙུགས་ནས་ད་བར་བགྲོ་གླེང་ཐེངས་གསུམ་པོ་ཚང་མའི་ནང་ཚོགས་གཙོས་སྲིད་སྐྱོང་མཆོག་ལ་སྲིད་སྐྱོང་ཟེར་བའི་གུས་ཞབས་ཙམ་ཡང་མི་བརྗོད་པར་སྲིད་སྐྱོང་འོས་མི་བློ་བཟང་སེང་གེ་ཞེས་འབོད་ཀྱི་ཡོད་པ་དེ། དམངས་གཙོའི་རྒྱལ་ཁབ་ཀྱི་ཡ་རབས་སྤྱོད་ཚུལ་དང་འགལ་ཡོད་ལ་བོད་རྒྱལ་ཁབ་ཀྱི་སྲིད་སྐྱོང་གི་གོ་གནས་ལ་མཐོང་ཆུང་དང་ཁྱད་གསོད་བྱས་ཡོད།

འདི་ཕྱོགས་ཡུ་རོབ་ཁུལ་དུ་སྲིད་བློན་དང་སྲིད་འཛིན། ཆན་སི་ལོར་སོགས་འོས་འདེམས་བྱེད་པའི་སྐབས་སུ་ཁ་གཏད་ཀྱི་གོ་གནས་ཐོག་ནས་མིང་འབོད་དགོས་ཀྱི་ཡོད་རེད་མ་གཏོགས། འོས་མི་ཁྱོད་ཟེར་བ་དེ་འདྲ་ནམ་ཡང་ཤོད་ཀྱི་མ་རེད། ཨ་རིའི་ནང་ལ་ལྟོས་དང་དེ་ལྟར་རེད། སྲིད་འཛིན་འོས་བསྡུའི་ནང་སྲིད་འཛིན་གྱི་འགན་ཁུར་བཞིན་པའི་མི་དེ་སྐབས་དེར་སྲིད་འཛིན་ཡིན་ན་འགྲན་ཡ་ཚོས་ཁ་རྩོད་ག་ཚོད་བརྒྱབ་ཀྱང་། སྲིད་འཛིན་ཞེས་པའི་མིང་འབོད་ཀྱི་འདུག་པ་དང་གསར་འགོད་པ་ཚོས་ཀྱང་སྲིད་འཛིན་ཞེས་གུས་ཞབས་ཀྱི་མིང་འབོད་དགོས་ཀྱི་འདུག དེ་བཞིན་སྲིད་འཛིན་འོས་མིའི་ནང་ཞུགས་མཁན་ཕྱི་སྲིད་དྲུང་ཆེ་ཡིན་ན་ཕྱི་སྲིད་དྲུང་ཆེ་ཞེས་དང་གྲོས་ཚོགས་ཀྱི་ཚོགས་མི་ཡིན་ན་ཚོགས་མི་ཟེར་བའི་གོ་གནས་དེ་ངེས་པར་འབོད་དགོས་ཀྱི་ཡོད།

དེ་ལྟའི་ཡ་རབས་བཟང་སྤྱོད་ཅན་གྱི་དམངས་གཙོའི་འགྲོ་ལུགས་དེ་བོད་ཀྱི་སྤྱི་འཐུས་ཚོགས་གཙོས་མཁྱེན་གྱི་མེད་པའམ། ཡང་ན་མཁྱེན་བཞིན་དུ་ཁྱད་གསོད་གནང་བ་ཞིག་ཡིན་པ་འདི་ནི་༧གོང་ས་སྐྱབས་མགོན་ཆེན་པོ་མཆོག་གིས་བོད་མི་དམངས་ལ་མར་གནང་བའི་བོད་རྒྱལ་ཁབ་ཀྱི་སྲིད་ཀྱི་ཆེའི་མཐོའི་དབུ་ཁྲིད་ཀྱི་གོ་གནས་སམ་འགན་ཁྲི་ལ་ཁྱད་གསོད་དང་མཐོང་ཆུང་བྱེད་པ་ཞིག་ཏུ་མཐོང་། འོན་ཀྱང་སྲིད་སྐྱོང་འབུམ་རམས་པ་བློ་བཟང་སེང་གེ་ཡིས་ཚོགས་གཙོ་སྤེན་པ་ཚེ་རིང་ལ་དཔལ་ལྡན་ཚོགས་གཙོ་མཆོག་ཞེས་འབོད་ཀྱི་འདུག བགྲོ་གླེང་གི་བརྒྱུད་རིམ་དེ་ཚོའི་ནང་སྐད་ཆ་བཤད་སྟངས་དང་རྣམ་འགྱུར་སྟོན་སྟངས་མང་པོའི་ཆ་ནས། སྲིད་སྐྱོང་འབུམ་རམས་པ་བློ་བཟང་སེང་གེ་མཆོག་ནི་མང་གཙོའི་འགྲོ་སྟངས་ལ་བྱང་ཆུབ་པ་ཞིག་དང་བློ་རྒྱ་ཆེ་ཞིང་ཁོག་པ་ཡངས་པའི་ཆབ་སྲིད་ཀྱི་འགོ་ཁྲིད་ཕུལ་དུ་བྱུང་བ་ཞིག་ཡིན་པ་གསལ་པོ་བྱུང་སོང་།

མ་འོངས་ལས་དོན་བྱེད་ཕྱོགས་ཀྱི་ཐད་ལ་ཚོགས་གཙོ་སྤེན་པ་ཚེ་རིང་མཆོག་གིས་གང་ཡོང་ཅི་ཡོང་བྱེད་ཀྱི་ཡིན་ཅེས་བརྗོད་པ་ལས་འདི་དང་དེ་བྱེད་རྒྱུའི་འཆར་གཞི་གསལ་པོ་ཡོད་རབས་གསུངས་མ་སོང་། འོན་ཀྱང་ཡིད་སྐྱོ་བ་ཞིག་ལ་གསར་འགོད་པ་ཡིན་ཟེར་མཁན་དེ་ཚོས་ཁོང་ལ་དེའི་བརྡ་འདེད་བཏང་མེད། ཁོང་གིས་འདི་བྱེད་ཀྱི་ཡིན་ཅེས་སྐད་གསང་མཐོན་པོས་བཤད་པའི་སྐད་ཆ་གཉིས་ལས་བོད་རྒྱ་འབྲེལ་མོལ་ཐད། སྔོན་མ་༧གོང་ས་མཆོག་གི་སྐུ་ཚབ་རྣམ་པས་རྒྱ་ནག་གཞུང་ལ་སྤྲད་པའི་མིང་དོན་མཚུངས་པའི་རང་སྐྱོང་གྲོས་འཆར་གྱི་ཚབ་ལ། ཞི་ཅིན་ཕིང་གིས་༧གོང་ས་མཆོག་ལ་མཇལ་འཕྲད་ཞུ་དགོས་པའི་དགོས་འདུན་གསར་པ་ཞིག་སྤྲོད་རྒྱུ་ཡིན་ཞེས་གསུངས། དེ་ནི་རྒྱ་ནག་གཞུང་གིས་ད་ལྟ་བོད་རྒྱ་འབྲེལ་ལམ་གྱི་སྐས་ལྷུ་དང་པོའི་ཐོག་ལ་གོམ་པ་སྤོ་རོགས་མི་བྱེད་པའི་སྐབས་སུ་སྐས་མགོ་ལ་ཡར་མཆོངས་ཤོག་ཟེར་བ་ལྟ་བུ་ཞིག་ཡིན་པས། ཁོང་ནི་ཅི་དྲན་གང་དྲན་ཤོད་མཁན་ཞིག་ལས་དོན་དངོས་དང་མཐུན་པའི་འཆར་གཞི་ཡོད་མཁན་ཞིག་མིན་པ་མཐོང་སོང་།

ཡང་ཁོང་གིས་སྐད་གསང་མཐོན་པོས་བཤད་པ་གཞན་ཞིག་ནི་༧གོང་ས་མཆོག་གི་ཅི་གསུང་བཀའ་སྒྲུབ་ཞུ་ཡི་ཡིན་ཞེས་བསྒྲགས་ཡོད། འོན་ཀྱང་ཁོང་གིས་༧གོང་ས་མཆོག་གི་བཀའ་སྒྲུབ་མིན་དེ་སྤྱོད་པའི་ཐོག་ནས་རགས་ཙམ་ཚོད་དཔག་བྱེད་ཐུབ། ༧གོང་ས་མཆོག་གིས་བོད་མི་ཚང་མར་རྒྱུན་དུ་ཆང་རག་འཐུང་ནས་བག་མེད་ལོངས་སྤྱོད་མ་བྱེད་གསུང་གི་ཡོད་ཀྱང་། ནོར་ཝེ་རླུང་འཕྲིན་ཁང་གིས་ཚོགས་གཙོ་མཆོག་ལ་སྲིད་སྐྱོང་འོས་མིའི་བཅར་འདྲི་ཞུས་སྐབས། ཁོང་གི་ཆང་རག་སྐྱག་ལང་ཤོར་བའི་ཐད་ལ་ངས་ཆང་རག་ནམ་ཡང་སྤངས་ཐུབ་ས་མ་རེད་ཅེས་གསུངས་ཡོད། ༧གོང་ས་མཆོག་གི་བཀའ་ཡི་བློན་པོའམ་སྲིད་སྐྱོང་བྱེད་རྒྱུ་ཡིན་ཟེར་མཁན་ཞིག་གིས་ཆང་རག་ཙམ་ཡང་མཚམས་འཇོག་བྱེད་རྒྱུའི་བློ་སྤོབས་མེད་ན། དེ་ལ་བོད་ཀྱི་ཕྱི་ནང་གསང་གསུམ་གྱི་ལས་དོན་རླབས་ཆེན་བྱེད་རྒྱུའི་དཔའ་གདེང་ཞིག་ག་ལ་ཡོད། བོད་ཀྱི་སྲིད་སྐྱོང་ནི་བཙན་བྱོལ་བོད་མིའི་ཁྲོད་ནས་ཆེས་ཕུལ་དུ་བྱུང་བའི་མི་ཞིག་འདེམ་དགོས་ཀྱི་ཡོད་པ་ལས་ཁ་རྫིག་པོ་ཤོད་ཐུབ་ཙམ་གྱིས་མི་འགྲིག

བདེ་སྐྱིད་ཆོས་དབྱངས།

ཆོལ་ཁའི་འཐེན་འཁྱེར་གྱི་ཚོར་བའི་མེ་ལྕེ་འབར་བཞིན་པའི་སྐབས་སུ་བཀའ་བློན་བདེ་སྐྱིད་ཆོས་དབྱངས་ཀྱིས་མེ་ཐོག་ལ་སྣུམ་བླུག་པ་ལྟར། ཚུལ་ལྡན་བོད་མི་དམངས་ཀྱི་སེམས་ནང་མི་ཤོང་པའི་བློ་ཕམ་བཟོས་པ་དང་། བོད་ཀྱི་བཀའ་བློན་ཞིག་ལ་ཡོད་དགོས་པའི་རེ་བ་དང་རིན་ཐང་ཐལ་བར་བསྒྱུར་ཡོད། འོན་ཀྱང་། འདི་ནི་ཚོགས་གཙོ་སྤེན་པ་ཚེ་རིང་ལ་རྒྱབ་སྐྱོར་ཆེད་དུ་དྲིལ་བསྒྲགས་ཀྱི་གོ་སྐབས་ལེན་ཆེད་འཆར་གཞི་དང་སྒྲིག་འཛུགས་ཡོད་པའི་བྱ་བ་ཞིག་ཡིན་པ་གསལ་པོར་གྱུར། བདེ་སྐྱིད་ཆོས་དབྱངས་ཀྱིས་དང་ཐོག་སྐད་ཆ་རོབ་ཙམ་བཤད་ནས་དགོངས་པ་ཞུས་པ་ནས་གསར་འགྱུར་བརྒྱུད་ལམ་ཁག་ནས་ཁོང་དགོངས་པ་ཞུས་པའི་སྐོར་བསྒྲགས་པའི་གོ་སྐབས་བསླངས་པ་དང་། དེ་རྗེས་གསལ་བསྒྲགས་ཐེངས་གཉིས་པ་ཞིག་སྤེལ་བ་དང་སླར་ཡང་ཁོང་གི་ཕྱོགས་གཏོགས་ཀྱི་གསར་འགྱུར་སྤེལ་མཁན་ཚོས་དེ་བེད་སྤྱད་ནས། བོད་མིའི་སྤྱི་ཚོགས་ནང་དྲིལ་བསྒྲགས་མུ་མཐུད་བྱེད་རྒྱུའི་ཐབས་ཇུས་བཟུང་ཡོད།

དེ་དུས་ཡང་སྐད་ཆ་གསལ་ལ་མི་གསལ་ལ་གཅིག་བཤད་ནས་སླར་ཡང་ཤོད་རྒྱུ་ཡོད་མདོག་མདོག་བྱས་པའི་རྗེས། སླར་ཡང་གསར་འགྱུར་བེད་སྤྱོད་གཏོང་རྒྱུ་བཟོས་ནས་འོས་ཤོག་མ་འཕེན་བར་དུ་དྲིལ་བསྒྲགས་རྒྱུན་མ་ཆད་པར་བྱེད་ཐབས་བྱེད་བཞིན་ཡོད་པར་མངོན། དེ་ལྟ་བུའི་ཐབས་ཇུས་ཤིག་ད་བར་ལོ་བཞི་ལྷག་གི་རིང་ལ་ཕྱི་འབྲེལ་བཀའ་བློན་བྱས་པའི་སྐབས་སུ་བོད་སྤྱི་ཡི་ཆེད་དུ་བསྟན་པ་མཐོང་མ་སོང་། ལར་ནས་ད་བར་ཁོང་དང་སྲིད་སྐྱོང་གཉིས་མི་འཆམ་པ་ཞིག་ཡོད་པའི་རྣམ་པ་མཐོང་རྒྱུ་མེད། ཁོང་གཉིས་མཉམ་དུ་གསར་འགོད་འདུ་ཚོགས་ཐེངས་མང་པོའི་སྐབས་གཅིག་གིས་གཅིག་ལ་འཛུམ་མུལ་མུལ་ངང་ཧ་ཅང་འཆམ་པོ་ཡོད་པའི་རྣམ་པ་འདུག་ལ། ཁོང་གཉིས་མཉམ་དུ་འགྲུལ་སྐྱོད་ཀྱང་བྱས་སོང་། མ་གཞི་ནས་འཆམ་པོ་ཡོད་དགོས་རྒྱུ་ཞིག་ཀྱང་ཡིན་པ་དེ་ནི་བདེ་སྐྱིད་ཆོས་དབྱངས་ལ་བཀའ་བློན་ཐད་བསྐོས་བྱེད་མཁན་ཡང་སྲིད་སྐྱོང་རེད།

གསར་འགྱུར་བརྒྱུད་ལམ།

ལས་དོན་འདིའི་ནང་ཨ་རིའི་རླུང་འཕྲིན་ཁང་དང་ཨེ་ཤི་ཡ་རླུང་འཕྲིན་ཁང་གཉིས་ཀྱིས་དུས་ཚོད་དམ་འཛིན་གྱིས་བདེ་སྐྱིད་ཆོས་དབྱངས་ཀྱི་གསལ་བསྒྲགས་རེ་སྤེལ་དུས། དེའི་སྐོར་བརྒྱུད་བསྒྲགས་བྱེད་ཆོག་ཆོག་བྱས་ནས་སྡོད་ཡོད་པ་ལྟར་ཁོང་གིས་བྲིས་ཚད་དང་བཤད་ཚད་རླུང་འཕྲིན་དང་བརྙན་འཕྲིན་དྲ་རྒྱ་བཅས་ནང་དུས་ཐོག་ལ་སྤེལ་བ་དང་། ཁོང་ལ་ཐད་ཀར་བརྙན་འཕྲིན་ནང་སྐད་ཆ་བཤད་པའི་གོ་སྐབས་སྤྲད་པ་སོགས་བརྒྱུད་ལམ་ཡོད་ཚད་ཀྱི་སྡིངས་ཆ་རྒྱ་ཆ་ ༡༠༠ ཐམ་པ་སྤྲད་ནས་དྲིལ་བསྒྲགས་ཤུགས་ཆེན་བྱེད་བཞིན་པ་དང་སྦྲགས། དེ་དང་དོ་མཉམ་བྱེད་པའི་གསར་འགྱུར་གྱི་ལས་འགན་ཏེ་ཕྱོགས་གཞན་གྱིས་གནས་ཚུལ་སྤེལ་བ་མཐོང་རྒྱུ་མི་འདུག

དཔེར་ན། བཙན་བྱོལ་བོད་མའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་སྤྱི་ཚོགས་ནང་བཀའ་བློན་ཚང་མ་དགོངས་པ་ཞུ་ཡི་ཡོད་པ་དང་། དེ་ཡང་དང་པོ་ནང་སྲིད་བཀའ་བློན་དགོངས་པ་ཞུ་ཡི་ཡོད་པའི་གཏམ་འཆལ་ལ་གསལ་བཤད་བྱས་ཏེ། ཁོང་བཀའ་བློན་ནས་དགོངས་པ་ཞུ་ཡི་མེད་པ་དང་ཁོང་གིས་དེ་སྔར་བཀའ་བློན་དམ་འབུལ་ཞུས་སྐབས་ཁས་བླངས་པའི་དམ་བཅའ་མཐའ་སྐྱོང་གི་ཡིན་ཅེས་མང་ཚོགས་ལ་གསལ་བསྒྲགས་སྤེལ་པ་དེ། ངོ་མ་བྱེད་ན་གསར་འགྱུར་བརྒྱུད་ལམ་ཁག་ལ་གསར་འགྱུར་དོ་མཉམ་པོ་བཟོ་རྒྱུའི་གོ་སྐབས་ཡག་པོ་ཞིག་སྤྲད་ཡོད། ཡིན་ནའང་ཨ་རིའི་རླུང་འཕྲིན་ཚང་གིས་རྒྱ་རི་སྒྲོལ་མ་ལགས་ཀྱིས་གསལ་བསྒྲགས་དེ་རླུང་འཕྲིན་དང་བརྙན་འཕྲིན་དྲ་ལམ་བཅས་གང་གི་ནང་ལའང་བསྟན་མི་འདུག

གོ་ཐོས་ལྟར་ན། ནང་སྲིད་བཀའ་བློན་གྱིས་ཨ་རིའི་རླུང་འཕྲིན་ཚང་ལ་འབྲེལ་བ་བྱས་ཏེ་ཀུན་གླེང་བརྒྱུད་ནས་མང་ཚོགས་ལ་གསལ་བཤད་བྱ་རྒྱུའི་རེ་བ་ཞུས་ཀྱང་གོ་སྐབས་མ་སྤྲད་པ་རེད་ཟེར། དེ་ཡིས་གསར་འགྱུར་ལས་ཁུངས་ཀྱི་མིང་ཡོད་མཁན་ཚོས་ཐེངས་འདིའི་བཙན་བྱོལ་བོད་མིའི་འོས་བསྡུའི་འགྲན་རྩོད་ཀྱི་ལས་འགུལ་ནང་བློ་གཟུར་བོར་མ་གནས་པར་ཕྱོགས་གཅིག་ཏུ་ལྷུང་ཡོད་པ་གསལ་པོ་གྱུར་ཡོད།

སྤྱིར་འོས་བསྡུའི་གནས་ཚུལ་ཕྱོགས་ལྷུང་མེད་པ་དང་དོ་མཉམ་པོ་བྱེད་རྒྱུ་དེ་གསར་འགྱུར་བརྒྱུད་ལམ་ཚང་མའི་ལས་འགན་ཞིག་ཡིན་གྱི་རེད་དྲན་གྱི་ཡོད་ལ། ཡང་དགོས་ངས་ནོར་མེད་ན་ཨ་རི་ལ་ཡོད་པའི་རླུང་འཕྲིན་ཁང་དེ་གཉིས་གཅིག་ཨ་རིའི་གཞུང་རང་གི་མ་ལག་ལས་ཁུངས་གཅིག་ཡིན་པ་དང་། དེའི་ལས་བྱེད་ཚང་མ་སྲིད་གཞུང་གི་ལས་བྱེད་ཡིན། གཅིག་ཤོས་དེ་གཞུང་གིས་ཐད་ཀར་འགྲོ་སོང་གཏོང་བཞིན་པའི་རླུང་འཕྲིན་ཁང་ཡིན་པ་རེད། གལ་སྲིད་དེ་འདྲ་ཡིན་ན། རླུང་འཕྲིན་དང་བརྙན་འཕྲིན་ཁང་དེ་གཉིས་ཀྱི་ལས་དོན་གང་བྱས་པ་དེ་ཨ་རིའི་གཞུང་གི་སྲིད་ཇུས་དང་མཐུན་དགོས་ཀྱི་ཡོད་པ་དང་། ལྷག་པར་དུ་ཨ་རིའི་ཕྱི་སྲིད་དང་འབྲེལ་བ་ཡོད་ཀྱི་རེད།

དེར་བརྟེན། རྒྱལ་ཁབ་གཞན་གྱི་སྲིད་བློན་ནམ་སྲིད་སྐྱོང་གི་འོས་བསྡུའི་ནང་ཐད་ཀར་འཛུལ་ནས་མངོན་གསལ་དོད་པོའི་ཐོག་ནས་འཐེན་འཁྱེར་བྱེད་པ་ཡིན་ན། དེ་ནི་ཨ་རི་གཞུང་གིས་བློ་འཚབ་བྱེད་དགོས་པའི་བྱ་བ་ཞིག་ཡིན་གྱི་རེད་དྲན་གྱི་ཡོད། ཨ་རིའི་ཕྱི་སྲིད་ཀྱི་སྲིད་ཇུས་ནང་བཙན་བྱོལ་བོད་གཞུང་གི་སྲིད་སྐྱོང་གང་ཟག་སུ་ལ་འོས་ཐོབ་དགོས་པ་དང། སུ་ཤོར་དགོས་པའི་སྲིད་ཇུས་གཅིག་ཡོད་ཀྱི་མ་རེད་དྲན་ལ། དེ་བཞིན་དུ་ཨ་རིའི་ཧ་ཝར་ཌའི་སློབ་ཆེན་ནང་གསོ་སྐྱོང་བྱས་པའི་འབུམ་རམས་པ་དང་ཨ་རིའི་སྲིད་དོན་དང་མཐོ་རིམ་མི་སྣ་ཁག་དང་འབྲེལ་བ་ཡོད་པའི་མི་ཞིག་ལ་ཁ་གཏད་བྱེད་པ་དེ་ཨ་རིའི་རྒྱལ་ཁབ་ཀྱི་ཁེ་ཕན་ཞིག་ཡིན་གྱི་རེད་མི་སྙམ།

ཡིན་ནའང་། ཁོང་ཚོས་ཨ་རིའི་སྲིད་གཞུང་གི་ལས་བྱེད་པའི་མིང་ཁུར་ནས་ཕྱིའི་རྒྱལ་ཁབ་སྟེ། བཙན་བྱོལ་བོད་གཞུང་གི་ཆབ་སྲིད་ལ་ཐད་བྱུས་བྱེད་དུས་ཁྲིམས་ཐོག་ནས་ཁོང་ཚོས་ཨ་རི་གཞུང་གི་ཚབ་མཚོན་གྱི་རེད། དེར་བརྟེན། རླུང་འཕྲིན་ལས་ཁུངས་དེ་གཉིས་ཀྱིས་བོད་གཞུང་གི་སྲིད་དོན་བྱ་བའི་ནང་འཛུལ་ནས་ཕྱོགས་རེས་བྱས་པ་ཡིན་ན། གནད་དོན་དེའི་ཐོག་ཨ་རིའི་སྲིད་གཞུང་གིས་ཞིབ་བཤེར་བྱ་སྲིད་ཀྱི་རེད་ལ། ལས་ཀ་ཚུལ་མཐུན་མ་བྱས་པའི་གནས་ཚུལ་ཐོན་ན་བོད་མི་དམངས་ཀྱི་རིན་ཐང་ཆེན་པོ་བརྩི་སའི་རླུང་འཕྲིན་ཁང་དེ་ཚོ་སྒོ་རྒྱག་པའི་ཉེན་ཁ་ཡང་མེད་མི་སྲིད་པ་མ་རེད།

མཐའ་དོན།

བར་ལམ་ཆོལ་ཁའི་འཐེན་འཁྱེར་གྱི་དུག་ཁབ་དེ་བོད་མི་དམངས་ཀྱི་ཟུངས་ཁྲག་ནང་མ་བླུག་གོང་དུ་བཙན་བྱོལ་ནང་གི་འོས་འཕེན་མཁན་བོད་མི་བཞི་ཆ་གསུམ་གྱིས། སྲིད་སྐྱོང་བློ་བཟང་སེང་གེ་མཆོག་ལ་འོས་བླུག་ནས་ཁོང་ལ་མི་མང་གི་རྒྱབ་སྐྱོར་དེ་ཚོགས་གཙོ་ལས་ལྡབ་གསུམ་གྱིས་མང་བ་ཡོད་པ་བསྟན་ཟིན། དེར་བརྟེན། རྒྱ་ཆེའི་མང་ཚོགས་ཀྱི་རྒྱབ་སྐྱོར་སུ་ལ་ཡོད་པ་ཕྱི་གསལ་ནང་གསལ་ཆགས་ཚར་བ་ཞིག་ཡིན། བསླེབ་ལ་ཉེ་བའི་དངོས་གཞིའི་འོས་བསྡུའི་སྐབས་སུ་དེ་ལ་འགྱུར་བ་ཅི་ཙམ་ཕྱིན་ཡོད་མེད་དེ། ཆོལ་ཁའི་འཐེན་འཁྱེར་གྱི་ལས་འགུལ་འདི་ཡིས་ནུས་པ་ཅི་ཙམ་ཐོན་ཡོད་མེད་གསལ་པོ་མངོན་རྒྱུ་དང་། དེས་རྒྱ་ནག་འཐབ་ཕྱོགས་གཅིག་གྱུར་ལས་ཁུངས་ལ་བཙན་བྱོལ་བོད་མིའི་སྤྱི་ཚོགས་འདི། ཡང་སྙིང་རྒྱུན་གནས་ཐུབ་པའི་སྲ་མཁྲེགས་ཅི་ཙམ་ཡོད་མེད་ཀྱི་ཚད་མཇལ་སའི་གོ་སྐབས་ཤིག་ཆགས་རྒྱུ་རེད།

ཉིན་ཤས་གོང་རྒྱལ་སྤྱིའི་དོལ་རྒྱལ་ཚོགས་པ་ཟེར་བ་སྒོ་བརྒྱབ་པའི་གཏམ་བཟང་གི་གནས་ཚུལ་བྱུང་བ་དང་། ད་ནས་བཟུང་ཁོང་ཚོས་༧གོང་ས་མཆོག་ལ་ངོ་རྒོལ་མི་ཞུ་བའི་གསལ་བསྒྲགས་སྤེལ་ཏེ་ང་ཚོའི་གནས་སྟངས་ཀྱང་རྒྱལ་ཁ་ཡི་ཕྱོགས་སུ་སྐྱོད་བཞིན་པའི་སྐབས་འདིར། རང་མགོ་ཆུ་བླུག་མ་བྱས་པར་ད་བར་ལོ་བཞི་ལྷག་ལ་འགྲིག་ཐག་ཆོད་བྱས་ནས་བདུན་སྐྱོད་ཀྱིས་འགྲོ་བསྡད་པའི་སྒྲིག་འཛུགས་འདི། ག་རེ་བྱ་མིན་མི་ཤིས་པའི་མི་གསར་པ་ཞིག་གི་ལག་ཏུ་མི་འཇོག་པར་མུ་མཐུད་ནས་བདུན་སྐྱོད་བྱེད་བཅུག་རྒྱུ་དེ་གལ་ཆེན་མཐོང་། ལོ་བཞིའི་གོང་༧གོང་ས་མཆོག་གིས་སྲིད་ཀྱི་ཐུགས་འགན་ཡོངས་སུ་མི་མང་ལ་མར་གནང་ནས་བཙན་བྱོལ་བོད་གཞུང་དེ་འཕོ་འགྱུར་ཆེན་པོ་ཞིག་བྱུང་ཡོད། ད་བར་ལོ་བཞི་ལྷག་དེ་མི་སྒེར་རེ་ཟུང་གི་འདོད་པ་མ་ཁེངས་བ་ཡོད་སྲིད་ཀྱི་རེད་དེ། སྤྱི་ཡོངས་ནས་ལྷིང་འཇགས་དང་བཟང་ཕྱོགས་ཀྱི་འགྱུར་བའི་འོག་མདུན་ནས་མདུན་དུ་སྐྱོད་བཞིན་པ་ནི་གཟུར་གནས་ཀྱི་མིག་གིས་བལྟས་ན་མཐོང་རྒྱུ་ཡོད་པ་ཞིག་རེད།

ཤེས་ཡོན་གཙོ་བོ་བྱས་པའི་བཙན་བྱོལ་བོད་མིའི་མ་ལག་ཁག་ལ་འཕོ་འགྱུར་དང་ཡར་རྒྱས་ཀྱི་གོམ་པ་སྤོ་མགོ་བཙུགས་ཡོད་ཅིང་། དེའི་ཆེད་དུ་ཨ་རི་སོགས་ཀྱི་མ་དངུལ་རོགས་སྐྱོར་སྔར་ལས་ཚད་མཐོན་པོའི་མང་བ་རེག་ཡོད་པ་སྲིད་སྐྱོང་རང་གིས་བཤད་སོང་ལ་དེ་མ་རེད་ཟེར་མཁན་ཡང་བྱུང་མ་སོང་། སྤྱིར་བཏང་ཨ་རི་སོགས་ཕྱིའི་རྒྱལ་ཁབ་ཀྱི་རོགས་སྐྱོར་རྣམས་༧གོང་ས་སྐྱབས་མགོན་ཆེན་པོ་མཆོག་གི་བཀའ་དྲིན་ལ་བརྟེན་ནས་ཡོང་གི་ཡོད་པ་བརྗོད་མི་དགོས་པ་གཅིག་རེད་མོད། དེ་ལྟར་རེག་པར་འབད་བརྩོན་བྱེད་མཁན་དེ་སྲིད་སྐྱོང་གི་ནུས་པ་ལ་ཐུག་ཡོད། དེ་ལྟར་རྒྱབ་སྐྱོར་རག་ཐབས་སུ་ཕྱིའི་རྒྱལ་ཁབ་ཀྱི་སྲིད་གཞུང་གི་མི་སྣ་ཐུག་པར་འགྲོ་བའི་ཨ་རིའི་ཧར་ཝར་ཌིའི་འབུམ་རམས་པའི་མིང་ཡོད་མཁན་མི་གཤིས་ཡག་ཅིང་། དྲུང་ཤ་དོད་པའི་འགོ་ཁྲིད་འདི་མུ་མཐུད་ནས་སླང་ཡར་ལོ་ལྔ་ཡི་རིང་ལ་འགན་གནང་རྒྱུ་ཡིན་ནམ། ཡང་ན་ཞལ་རས་ཆང་གིས་ཚོས་ཤིང་བུད་མེད་སུ་ཐུག་ལ་འདོད་མིག་ཤོར་བཞིན་འདོད་གཏམ་ཤོད་མཁན་གྱི་ང་ཚོའི་ཚོགས་གཙོ་འདི་གཏོང་རྒྱུ་ཡིན་མིན་དེ། ཁྱོད་ཀྱི་ལག་ཏུ་ཡོད་པའི་དབང་ཆ་དང་བོད་ཆགས་འཇིག་སྐབས་ཀྱི་ཁྱོད་ལ་ཡོད་པའི་ལས་འགན་དེ་རེད།།