ཨ་རྒྱ་གཉིས་ཀྱི་འགལ་འདུ་གླེང་སློང་།

འདི་ལོའི་ཕྱི་ཟླ་བཅུ་གཅིག་པའི་ནང་ཨ་རིའི་སྲིད་འཛིན་རྒྱལ་ཁ་དེ་སུ་ལ་འཐོབ་རུང་། ཨ་རྒྱ་གཉིས་ཀྱི་ཉོ་འཚོང་གི་འབྲེལ་ལམ་མུ་མཐུད་ཡར་རྒྱས་འགྲོ་གི་རེད་ཟེར།

རོའུ་ཊར་གསར་ཁང་གིས་གནས་ཚུལ་སྤེལ་དོན་ལྟར་ན། ཁ་སང་རྒྱ་ནག་གི་སྲིད་བློན་ལེ་ཁི་ཆང་གིས་རྒྱ་ནག་འཐུས་མི་ཚོགས་ཆེན་གྱི་མཇུག་སྡོམ་གཏམ་བཤད་ཐོག ད་ལོའི་ཕྱི་ཟླ་ ༡༡ པའི་ཚེས་ ༨ ཉིན་གྱི་ཨ་རིའི་སྐབས་ ༥༨ པའི་སྲིད་འཛིན་རྒྱལ་ཁ་དེ་སུ་ལ་འཐོབ་པ་ཡིན་ནའང་། ཨ་རྒྱ་གཉིས་ཀྱི་ཉོ་འཚོང་གི་འབྲེལ་ལམ་མུ་མཐུད་ཡར་རྒྱས་འགྲོ་རྒྱུ་ཡིན་ལུགས་བཤད་འདུག

འཐུས་མི་ཚོགས་ཆེན་གྱི་མཇུག་སྡོམ་ཐོག་རྒྱ་ནག་གིས་སྲིད་བློན་ལེ་ཁི་ཆང་གིས། འཛམ་གླིང་མི་མང་གིས་འགྲོ་བཞིན་པའི་ཨ་རིའི་སྲིད་འཛིན་འོས་བསྡུ་ལ་དོ་སྣང་ཆེན་པོ་བྱེད་ཀྱི་ཡོད་ཅིང་། ངས་ནི་ཨ་རིའི་སྲིད་འཛིན་རྒྱལ་ཁ་དེ་སུ་ལ་འཐོབ་རུང་། ཨ་རྒྱ་གཉིས་ཀྱི་འབྲེལ་ལམ་ལ་འགྱུར་བ་ཐེབས་མི་སྲིད་པར་ཡིད་ཆེས་བྱེད་ཀྱི་ཡོད་ལ། འདས་པའི་མི་ལོ་བཅུ་ཕྲག་འགའ་ཞིག་རིང་ཕྱོགས་གཉིས་ཀྱི་འབྲེལ་ལམ་མུ་མཐུད་ཡར་རྒྱས་འགྲོ་བཞིན་ཡོད། ཨ་རི་གཙོས་པའི་ཕྱིའི་རྒྱལ་ཁབ་ཁག་གིས་ཨེ་ཤེ་ཡ་ཞི་བདེ་མཚོ་ཁུལ་གྱི་བདག་དབང་རང་དགར་མི་བསྐྱུར་ཚུལ་བརྗོད་ཅིང་། རྒྱ་ནག་གིས་འཛམ་གླིང་རྒྱལ་ཁབ་ཁག་དང་མཉམ་འབྲེལ་ཐོག་ཕན་ཚུན་བར་གྱི་རྩོད་གླེང་ཞི་འདུམ་ཡོང་གི་རེད། ངའི་རེ་བར་ཨ་རྒྱ་གཉིས་ཀྱིས་ཕན་ཚུན་ཐུན་མོང་གི་ཁེ་ཕན་དང་གཞི་རྩའི་ཐོབ་ཐང་འདྲ་མཉམ་བཅས་ཀྱི་གྲོས་ཆིངས་ཁག་ལག་ལེན་བསྟར་རྒྱུ་དང་། རྒྱ་ནག་གིས་ཨ་རིའི་མ་རྐང་འཇོག་མཁན་ཚོར་ཕྱོགས་གཉིས་ཐུན་མོང་གི་དཔལ་འབྱོར་ཁྲོམ་ར་མཁོ་འདོན་བྱེད་རྒྱུ་ཡིན་ལུགས་སོགས་བཤད་འདུག

གནས་ཚུལ་ལྟར་ན། ཨ་རིའི་སྤྱི་མཐུན་ཚོགས་པའི་འོས་མིར་འགྲན་ཞུགས་མཁན་སྐུ་ཞབས་ཌོ་ནལ་ཌི་ཊི་རུམ་ཕུ་ལགས་ཀྱིས་ཉེ་ལམ་རྒྱ་ནག་གི་དྲ་ཐོག་གསང་ཉུལ་བ་ཚོས་ཨ་རིའི་གཞུང་འབྲེལ་དྲ་ཚིགས་དང་གློག་ཀླད་མ་ལག་འཕྲུལ་ཆས་ནང་ལྐོག་འཛུལ་བྱས་ཏེ། ཨ་རིའི་ཚོང་དོན་གསང་རྐུ་འཁྱེར་བྱས་པའི་ཐད་སྐྱོན་བརྗོད་ཤུགས་ཆེན་བྱས་ཡོད་དང་། ཨ་རིའི་དམངས་གཙོ་ཚོགས་པའི་སྲིད་འཛིན་འོས་མིར་འགྲན་ཞུགས་མཁན་ལྕམ་ཧེ་ལ་རེ་ཁི་ལེན་ཊོན་ལགས་ཀྱིས་རྒྱ་ནག་གི་དཔལ་འབྱོར་འདུ་འགོད་ཀྱི་འགྲོས་ཤིན་ཏུ་དལ་བ་དེས་རྒྱལ་ཕྱིའི་ཚོང་ལས་ལ་ལྡོག་ཕྱོགས་ཀྱི་ཤུགས་རྐྱེན་ཆེན་པོ་ཐེབས་ཀྱི་ཡོད་སྐོར་བརྗོད་ཡོད་ནའང་། རྒྱ་ནག་གཞུང་གིས་ཨ་རིའི་སྲིད་འཛིན་འོས་བསྡུ་དེ་བཞིན་ཨ་རིའི་མི་མང་གི་དོན་དག་ཅིག་ཏུ་འགྲེལ་ཏེ། ཨ་རིའི་སྲིད་འཛིན་འོས་འདེམས་ཐད་ཀྱི་གླེང་གཞིར་འཛེམ་དོགས་བྱེད་ཀྱི་ཡོད་པ་རེད།

སྤྱིར་ཨ་རྒྱ་གཉིས་རྒྱ་ནག་ནང་འགྲོ་བ་མིའི་ཐོབ་ཐང་གི་གནད་དོན་དང་དམངས་སྒོར་གྱི་མཛའ་ཐང་འཕར་ཆག་གི་སྲིད་ཇུས། དེ་བཞིན་རྒྱ་ནག་གི་ལྷོ་རྒྱུད་མཚོ་ཁུལ་གྱི་བདག་དབང་རྩོད་གླེང་སོགས་ཕྱོགས་ཡོངས་ནས་འགལ་འདུའི་རྣོ་ངར་ཇེ་ཆེར་ཕྱིན་ཡོད་ནའང་། དཔལ་འབྱོར་ཉོ་འཚོང་གི་ཐད་ནས་ཕྱོགས་གཉིས་ཀྱི་འབྲེལ་ལམ་དམ་ཟབ་ཡོད་པ་དང་། རྒྱ་ནག་གིས་ཨ་རིའི་གཞུང་འབྲེལ་དྲ་ཚིགས་མ་ལག་ནང་ལྐོག་འཛུལ་བྱས་ཏེ་ཚོང་དོན་གསང་བ་མང་པོ་རྐུ་འཁྱེར་དང་། རྒྱ་ནང་གི་ཕྱིའི་འཕྲུལ་རིག་ཚན་རྩལ་འཕེལ་རྒྱས་ཁེ་ལས་ཐད་འཛིན་པའི་སྒྲིག་ཁྲིམས་གསར་བ་སོགས་ཀྱི་གནད་དོན་ལ་བརྟེན་ནས། ཕྱོགས་གཉིས་ཀྱི་ཚོང་དོན་འབྲེལ་ལམ་ལ་གཡོ་སྐྱོམ་ཐེབས་ཀྱི་ཡོད་པ་མ་ཟད། རྒྱ་ནག་གཞུང་གིས་ཕྱིའི་རྒྱལ་ཁབ་ཁག་གི་མ་རྐང་འཛུགས་སྐྲུན་ཐད་དམ་དྲག་ཤུགས་ཆེན་བྱེད་ཀྱི་ཡོད་ནའང་། ཨ་རིའི་མ་རྐང་འཛུགས་མཁན་ཚོས་ཨ་རྒྱ་གཉིས་བར་གྱི་ཚོང་དོན་གྲོས་ཆིངས་ཁག་གཞིར་བཟུང་སྟེ་རྒྱ་ནག་གཞུང་འབྲེལ་བཟོ་ལས་ཐོན་གཉེར་ཁང་ཁག་ལ་མ་རྐང་འཛུགས་པ་དང་ཚན་རྩལ་གློག་འཕྲིན་བཅས་ཀྱི་ཁེ་ལས་གཉེར་བའི་རེ་བ་རྒྱག་གི་ཡོད་འདུག

གསར་འགོད་པ། པདྨ་རྒྱལ།