སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་མཐའ་མ་ཟླ་འདིའི་ཕྱི་ཚེས་ ༢༡ ནས་ཟླ་ ༤ ཚེས་ ༡ ཉིན་བར་དུ་འཚོགས་རྒྱུ་ཡིན་འདུག
སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༡ པ་སྟེ། སྐབས་འདིའི་ཚོགས་དུས་མཐའ་མ་ཟླ་འདིའི་ཕྱི་ཚེས་ ༢༡ ནས་ཕྱི་ཟླ་ ༤ ཚེས་ ༡ ཉིན་བར་དུ་འཚོགས་རྒྱུ་ཡིན་ལ། ཐེངས་འདིའི་ཚོགས་དུས་ཐོག་གཙོ་བོ་རྩིས་ལོ་ ༢༠༡༦ དང་ ༢༠༡༧ ལོའི་བཙན་བྱོལ་བོད་མིའི་ལས་ཁུངས་མ་ལག་དང་བཅས་པའི་སྔོན་རྩིས་གཏན་འབེབས་གནང་རྒྱུ་དང་། ཁྲིམས་སྒྲིག་ཁག་ཅིག་བསྐྱར་བཅོས་དང་བཀའ་ཤག་ནས་གསལ་བཤད། གཞན་ཡང་། བོད་མི་མང་སྤྱི་འཐུས་ལྷན་ཚོགས་ཀྱིས་ཆེད་འཛུགས་གནང་བའི་མང་ཚོགས་རྩིས་ཁྲའི་ཚོགས་ཆུང་སྐབས་ ༧ པའི་ཞིབ་འཇུག་སྙན་ཐོ་དང་འཆར་ཅན་ལྟར་གཞུང་འབྲེལ་གྲོས་གཞི་གྲོས་འཆར་ཁག་ཅིག་བསྣམ་ཡོང་རྒྱུ་ཡིན་འདུག
དེ་རིང་འདི་གའི་གསར་འགོད་པས་ཚོགས་དྲུང་སྟོབས་རྒྱལ་ལགས་སུ། ཐེངས་འདིའི་ཚོགས་དུས་ཐོག་ལས་རིམ་གཙོ་བོ་ག་རེ་ཡོང་གི་ཡོད་མེད་སྐོར་ནས་བཀའ་འདྲི་ཞུས་པར་ཁོང་གིས། ད་ལན་གྱི་གྲོས་ཚོགས་ཚོགས་དུས་ ༡༡ པ་འདི་ཚོགས་དུས་མཐའ་མ་རེད། ཚོགས་དུས་འདིའི་ཐོག་གཙོ་བོ་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་ཁྱབ་ཁོངས་དང་བཅས་པའི་ཕྱི་ལོ་ ༢༠༡༦ དང་ ༢༠༡༧ ལོའི་སྔོན་རྩིས་གཏན་འབེབས་གནང་རྒྱུ་ཡིན་སྟབས། དཔལ་འབྱོར་བཀའ་བློན་མཆོག་ནས་ཕྱི་ལོ་ ༢༠༡༦།༡༧ ལོའི་སྔོན་རྩིས་སྐོར་གྱི་གསུང་བཤད་གནང་རྒྱུ་དང་། དེ་བཞིན། བཀའ་ཤག་གིས་རྒྱབ་གཉེར་གནང་སྟེ་དཔལ་འབྱོར་ལས་ཁུངས་ནས་ཚོགས་དྲུང་ལས་ཁུངས་ལ་ཕུལ་བའི་སྔོན་རྩིས་སྐོར་གྱི་ཡིག་ཆ་དེར། ཚོད་དཔག་འཆར་རྩིས་ཚོགས་ཆུང་གིས་རྩིས་མགོ་རེ་རེར་ཞིབ་འཇུག་བྱས་ཏེ་སྤར་ཆ་དང་གཅོག་ཆ་གནང་བ། དེ་བཞིན་དགེ་སྐྱོན་གྱི་གནས་ལུགས་བཅས་བཀོད་པའི་སྙན་ཐོ་ཞིག་འབུལ་ཡོང་གི་རེད། དེ་ནས་ལས་ཁུངས་རྣམས་བང་རིམ་བྱས་ཏེ་དངུལ་འཛིན་བཀའ་འཁྲོལ་ཐད་བགྲོ་གླེང་དང་གཏན་འབེབས་གནང་བར་ཉི་མ་མང་པོ་འགོར་ངེས་རེད། ནམ་རྒྱུན་ཡིན་ན་གྲོས་ཚོགས་ནང་ཉི་མ་གཉིས་པ་ནས་བཟུང་དྲི་བ་དྲིས་ལན་བསླེབ་ཡོང་གི་རེད། ཚོགས་འདུ་མགོ་འཛུགས་ཀྱི་ཉི་མ་དང་པོ་དེའི་ནང་དཔེར་ན་ད་རེས་འདྲ་པོ་ཡིན་ན། རྙིང་མའི་དབུ་འཛིན་སྐུ་གཤེགས་པར་མྱ་ངན་གུས་འདུད་ཀྱི་རྗེས་དྲན་གྲོས་ཆོད་ཅིག་ཡོང་གི་རེད་ལ། དེ་བཞིན། ཉེ་འཆར་ཕྱི་ཟླ་གཉིས་པའི་ཟླ་མཇུག་ཏུ་བོད་ཕྱི་གཉིས་ནས་བོད་མི་ ༢ ཀྱིས་རང་ལུས་མེར་བསྲེགས་གནང་ཡོད་པ་དང་། བོད་ནང་བོད་མི་ ༡༤༣ གྱིས་རང་ལུས་མེར་བསྲེགས་གནང་ཡོད་པ་དེ་ཚོའི་ཐོག་མྱ་ངན་གུས་འདུད་ཀྱི་གྲོས་གཞི་གྲོས་འཆར་དང་། བོད་ནང་གི་ཛ་དྲག་གནས་སྟངས་དང་གཞིས་ལུས་རྒྱ་ཆེའི་བོད་མི་ཚོས་རྒྱ་ནག་གཞུང་གི་སྡུག་རྩུབ་འོག་མྱངས་དང་མྱོང་བཞིན་པར་གདུང་སེམས་མཉམ་སྐྱེད་ཀྱི་གཞུང་འབྲེལ་གྲོས་གཞི་གྲོས་འཆར་ཞིག་བཅས་ཡོང་གི་རེད། ཅེས་བརྗོད་བྱུང་།
ཡང་ད་ལན་གྱི་ཚོཊ་དུས་ཐོག་འཛིན་སྐྱོང་བཀའ་ཤག་ནས་གསལ་བཤད་དང་ཁྲིམས་སྒྲིག་བསྐྱར་བཅོས་སོགས་ཀྱི་ལས་རིམ་ཁག་ཅིག་ཡོད་སྐོར་ལ་ཁོང་གིས། ད་ལྟ་བར་དུ་འཛིན་སྐྱོང་བཀའ་ཤག་ནས་ཁྲིམས་སྒྲིག་བསྐྱར་བཅོས་གནང་རྒྱུ་བཞི་ལྔ་ཞིག་ཡོད་གསུང་གི་འདུག་ལ། དེའི་ཐོག་བཀའ་ཤག་གིས་གསལ་བཤད་གནང་བའི་ལས་རིམ་ཞིག་ཀྱང་ཡོད་གསུངས་སོང་། དེ་བཞིན་འཆར་ཅན་གྱི་ཐུགས་སྣང་ཞེན་སྐུལ་དང་སྤྱི་འཐུས་སྒེར་གྱི་གཞུང་འབྲེལ་གྲོས་གཞི་གྲོས་འཆར་བསྣམ་ཡོང་རྒྱུ་དེ་ཚོ་ཚང་མ་ལས་རིམ་སོ་སོ་སོ་སོའི་ནང་འགྲོ་ཡི་རེད། གཞན། ད་ལན་གྱི་གྲོས་ཚོགས་ནང་མང་ཚོགས་རྩིས་ཁྲའི་ཚོགས་ཆུང་སྐབས་ ༧ པའི་སྙན་ཐོ་ཧ་ཅང་ཞིབ་ཚགས་པོ་ཞིག་འབུལ་རྒྱུའི་གྲ་སྒྲིག་བྱས་བསྡད་ཡོད། ཅེས་བརྗོད་བྱུང་།
གསར་འགོད་པ། པདྨ་མཚོ།
![Wang made a research tour in Tibet from July 19 to 22. [Xinhua/Liu Bin]](https://tibettimes.net/wp-content/uploads/2026/07/1784796471071092378-360x180.jpg)
