ཐའེ་ཝན་གོ་མན་ཏང་དང་དམངས་གཙོ་ཡར་ཐོན་ཚོགས་པའི་ཚོགས་གཙོ་གཉིས་ཐུག་འཕྲད་ཀྱིས་ཐའེ་ཝན་སྲིད་གཞུང་རྩིས་སྤྲོད་དང་གསར་འཛུགས་འཛིན་སྐྱོང་གནང་ཕྱོགས་ཐད་གྲོས་མོལ་བྱས་ཡོད་འདུག
ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཐའེ་ཝན་དམངས་གཙོ་ཡར་ཐོན་ཚོགས་པའི་ཚོགས་གཙོ་དང་ཉེ་ལམ་གསར་དུ་བདམས་ཐོན་བྱུང་བའི་ཐའེ་ཝན་གྱི་སྲིད་འཛིན་གསར་པ་ལྕམ་ཚའེ་ཡེན་ཝན་དང་། ཐའེ་ཝན་གོ་མན་ཏང་ཚོགས་པའི་ཚོགས་གཙོ་དང་ད་ལྟའི་སྲིད་འཛིན་ལས་ཐོག་སྐུ་ཞབས་མཱ་ཡེན་ཇོ་གཉིས་ཐུག་འཕྲད་གནང་ཡོད་པ་དང་། ཐེངས་འདིར་ཁོང་གཉིས་ཀྱིས་ཕྱི་ཟླ་ ༥ ཚེས་ ༢༠ ཉིན་ཐའེ་ཝན་གོ་མན་ཏང་སྲིད་གཞུང་དེ་བཞིན་ཐའེ་ཝན་གྱི་དམངས་གཙོའི་ས་ཚིགས་སུ་འབོད་པའི་ཐའེ་ཝན་དམངས་གཙོ་ཡར་ཡོན་ཚོགས་པར་རྩིས་སྤྲོད་དང་འཛིན་སྐྱོང་གནང་ཕྱོགས། ཐའེ་ཝན་མཚོ་འགག་གི་དཔལ་འབྱོར་འདུ་འགོད་དང་གསལ་ཁ་མེད་པའི་ཐའེ་རྒྱ་གཉིས་ཀྱི་འབྲེལ་ལམ་བཅས་ཀྱི་ཐད་གྲོས་མོལ་བྱས་ཡོད་འདུག
ཐུག་འཕྲད་སྐབས་སུ་སྐུ་ཞབས་མཱ་ལགས་ཀྱིས། ཚོགས་གཙོ་ལྕམ་ཚའེ་ཡེན་ཝན་ནི་རྒྱ་ནག་སྤྱི་མཐུན་རྒྱལ་ཁབ་ཚུགས་པའི་ཚུན་གྱི་བུད་མེད་སྲིད་འཛིན་ཐོག་མ་དེ་ཆགས་ཀྱི་ཡོད་སྐོར་དང་། ཐའེ་ཝན་མཚོ་འགག་དེང་སྐབས་ཕྱི་ནང་གཉིས་ཀྱི་འཐབ་རྩོད་མང་པོ་ཞིག་གི་དཀའ་རྙོག་ལ་འཕྲད་ཀྱི་ཡོད་སྐོར། འདས་པའི་མི་ལོ་ ༨ རིང་ལ་ཐའེ་ཝན་རྒྱ་ཆེའི་མི་མང་གིས་ཁོ་ལ་ཐའེ་ཝན་མཚོ་འགག་གི་ཞི་བདེ་བརྟན་ལྷིང་དང་རང་དབང་དྲང་བདེན། རྒྱལ་སྤྱིའི་སྤྱི་ཚོགས་ཁོར་ཡུག་དང་མཛའ་འབྲེལ་དང་འཆམ་མཐུན་བཅས་ཀྱི་ལས་དོན་སྒྲུབ་པའི་གོ་སྐབས་སྤྲད་པར་ཁོ་རང་གིས་སྙིང་ཐག་པ་ནས་ཐུག་རྗེ་ཆེ་ཞུ་རྒྱུ་ཡིན་སྐོར་སོགས་བརྗོད་ཅིང་། ལྕམ་ཚའེ་ལགས་ཀྱིས། སྐུ་ཞབས་མཱ་ལགས་ཀྱིས་ད་ལྟའི་བར་ཐའེ་ཝན་མཚོ་འགག་གི་སྲིད་འཛིན་ལས་དོན་བསྒྲུབས་པ་དང་། མི་འགྱང་པར་ཁོས་ཐའེ་ཝན་སྲིད་གཞུང་ཐའེ་ཝན་དམངས་གཙོ་ཡར་ཐོན་ཚོགས་པར་རྩིས་སྤྲོད་གནང་ཕྱོགས་ཀྱི་གྲོས་མོལ་དང་ལེན་བྱས་པར་ཐུགས་རྗེ་ཆེ་ཞུ་རྒྱུ་དང་། དེ་སྔོན་སྲིད་འཛིན་འོས་བསྡུའི་སྐབས་སུ་ཤོག་ཁག་ཕན་ཚུན་བར་འགྲན་རྩོད་དང་སྐྱོན་བརྗོད་བྱས་མིན་ལ་མ་ལྟོས་པར། ཐའེ་ཝན་རྒྱ་ཆེའི་མི་མང་གི་རེ་འདུན་ལྟར། ཐའེ་ཝན་གོ་མན་ཏང་དང་དམངས་གཙོ་ཡར་ཐོན་ཚོགས་པ་གཉིས་ཞི་མཐུན་གྱི་སྒོ་ནས་ཐའེ་ཝན་སྲིད་གཞུང་རྩིས་སྤྲོད་དང་གསར་འཛུགས་འཛིན་སྐྱོང་ཐུབ་པར་ཡིད་ཆེས་གནང་གི་ཡོད་སྐོར་བརྗོད་འདུག
རྒྱ་ནག་ཐའེ་ཝན་ལས་དོན་ཁང་གི་མགྲིན་ཚབ་པ་ཨན་ཧྥིང་ཧྲན་ (An Fengshan) ཟེར་བ་ཞིག་གིས། ལྕམ་ཚའེ་ཡེན་ཝན་གྱིས་མི་མང་རྒྱ་ཆ་ ༩༢ གྱིས་མང་མོས་ཐོབ་པའི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་འཛིན་ལ་ངོས་ལེན་མ་གནང་བ་ཡིན་ན་ཐའེ་རྒྱ་གཉིས་ཀྱི་འབྲེལ་ལམ་སྡུག་ཏུ་འགྲོ་སྲིད་ལུགས་བཤད་འདུག
གནས་ཚུལ་ལྟར་ན། པེ་ཅིན་གཞུང་གིས་ཕྱི་ཟླ་ ༥ ཚེས་ ༢༠ ཉིན་ལྕམ་ཚའེ་ཡེན་ཝན་གྱིས་ཐའེ་ཝན་དམངས་གཙོའི་སྲིད་གཞུང་གསར་བ་འཛིན་སྐྱོང་མ་གནང་སྔོན་ལ། ཐའེ་ཝན་མཚོ་འགག་དེ་བཞིན་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དང་ཁ་འབྲེལ་ཐབས་མེད་པ་ངོས་ལེན་དགོས་ལུགས་བཤད་ཀྱི་ཡོད་ནའང་ལྕམ་ཚའེ་ཡེན་ཝན་གྱིས་ཐའེ་ཝན་མཚོ་འགག་དཔལ་འབྱོར་ཡར་རྒྱས་དང་སྤྱི་ཚོགས་བདེ་འཇགས་སྐོར་གཙོ་བོར་རྗོད་ཀྱི་ཡོད་པ་ལས་ཐའེ་རྒྱ་གཉིས་ཀྱི་འབྲེལ་ལམ་ཐད་གླེང་སློང་བྱེད་ཀྱི་མེད་པ་རེད།
གསར་འགོད་པ། པདྨ་རྒྱལ།
