ལེ་ཡེ་ལས་བཤད།
སྐལ་ལྡན་གྱིས་བསྒྱུར།
་་་་་་་་་་་་་་་་་་་་་་་་་་་་་་་་་་་་་ང་ཚོས་དམག་འཐབ་ལས་གཡོལ་ཏེ་ནང་མི་ལྷན་འཛོམས་བྱེད་འདོད་ཀྱང་། ཡུ་རོབ་མཐུན་ཚོགས་ཀྱིས་ང་ཚོའི་མི་ཚེ་དེ་བས་ཡ་ང་བ་བཟོ་དོན་ཅི།
ང་ཚོ་དང་ཐོག་འདིར་ཡོང་སྐབས་ཁ་ཟས་ཕྲན་བུ་ཉོ་བའི་དངུལ་ཡོད། དེ་དག་རྫོགས་ཟིན་པ་རེད། ད་ཆ་ང་ཚོས་ཚེ་མ་སྡེབ་བཙིར་ sandwich ཞིག་གི་དོན་དུ་ཆུ་ཚོད་མང་པོ་བང་བསྒྲིགས་ཏེ་ལང་དགོས་ཀྱི་འདུག ཉེ་ཆར་ངའི་བཟའ་ཟླས་གསར་འགོད་པ་ཞིག་ལ་ “མི་རྣམས་ཞེན་པ་ལོག་ཚར་འདུག སང་ཉིན་རྒྱ་སྒོ་གཏོར་ཏེ་ས་མཚམས་སུ་འུར་བསྐྱོད་བྱེད་མི་སྲིད་པ་མ་རེད།” ཅེས་བཤད་སོང་། གསར་འགོད་པ་དེས་ “ཁྱོད་ཚོར་མཚོན་ཆ་ག་ཚོད་ཡོད་དམ།” ཞེས་དྲིས་བྱུང་། གལ་ཏེ་ང་ཚོས་མཚོན་ཆར་ལག་པ་འཆང་ཤེས་པ་དང་འཆང་འདོད་ཡོད་པ་ཡིན་ན། སེ་རི་ཡ་ནས་བྲོས་དགོས་དོན་མེད། ང་ཚོ་མི་གསོད་ཁྲག་སྦྱོར་གྱིས་ཡིད་ཐང་ཆད་བསྡད་ཡོད། ང་ཚོར་དགོས་པ་ནི་ཞི་བདེ་ཡིན།
ང་ཚོ་དམག་འཁྲུག་ལས་བྲོས་བྱོལ་དུ་ཡོང་བ་ཡིན། ད་ཆ་ཡུ་རོབ་མཐུན་ཚོགས་ཀྱིས་ང་ཚོར་དམག་འདྲེན་གྱི་ཡོད་རེད། བསམ་བློའི་དམག་འཐབ་འདྲེན་གྱི་འདུག ང་ཚོ་ཡུ་རོབ་ལ་འགྲོ་སྐྱོད་ཆོག་པའི་དཀྲོག་གཏམ་རེ་གོ་སྐབས། ང་ཚོས་རྟེན་འབྲེལ་རེ་བྱེད་ཀྱི་ཡོད། མགོ་ཁྲིད་དེ་དག་གིས་ང་ཚོར་རེ་བ་ཞིག་བྱིན་པ་དང་ལྷན། རེ་བ་དེ་དག་གར་སོང་ཆ་མེད་དུ་གྱུར་གྱི་འདུག ཁྱོད་ཚོས་སྐྱབས་བཅོལ་བར་སྒོ་མོ་ཕྱེ་དོན་ཅི་ཡིན་ནམ། ཁྱོད་ཚོས་མི་རྣམས་ལ་སྣེ་ལེན་བྱེད་དོན་ཅི་ཡིན་ནམ། གལ་ཏེ་ཁྱོད་ཚོས་སྔོན་ཚུད་ནས་བཀག་འགོག་བྱས་ཡོད་ཚེ། ང་ཚོ་འདིར་ཡོང་དགོས་དོན་མེད། ང་དང་ངའི་ཕྲུ་གུ། མི་སྣ་སྟོང་ཕྲག་མང་པོས་སྲོག་ཉེན་ལ་མ་འཛེམས་པར་ས་མཚམས་རྒལ་དགོས་དོན་མེད།
ང་ནི་ལོ་ན་སོ་དགུར་སོན་པའི་གྲོང་ཁྱེར་ཧཱ་སཱ་ཀའི་རུ་གནས་སྡོད་ཀུར་སྡེའི་མི་རིགས་ཤིག་ཡིན། གྲོང་ཁྱེར་ཧཱ་སཱ་ཀའི་ནི་ད་ཆ་གསར་འགྱུར་བརྒྱུད་ལམ་ཁག་ཏུ་མཐོང་ཐོས་སུ་གྱུར་བ་བཞིན། ཨི་སི་ལམ་དྲག་སྤྱོད་རིང་ལུགས་ཀྱི་ཉེན་ཁའི་འོག་གནས་ཡོད། དེ་སྔོན་དཔྱིད་ཀའི་དུས་སུ་ཉིན་ལྟར་གྲོང་ཁྱེར་གྱི་མཐའ་སྐོར་ནས་སྲིད་གཞུང་གིས་སྲུང་སྐྱོབ་བྱེད་དགོས་ཀྱི་ཡོད། སྐབས་རེར་གང་ཡོང་ཆ་མེད་ཀྱི་སྒྱོགས་བདེལ་འཁྱམ་པོ་ང་ཚོའི་ཉེ་འགྲམ་དུ་འཛག་གི་ཡོད།
ཉིན་ཞིག་གི་ཞོགས་པའི་ཆུ་ཚོད་ལྔ་པའི་ཐོག་ང་ཚོས་སྒྱོགས་བདེལ་གྱི་སྐད་སྒྲ་ཐོས་བྱུང་། ཨི་སི་ལམ་དྲག་སྤྱོད་པ་སླེབས་ཟིན་པ་ཤེས་བྱུང་། ངས་རང་ཉིད་ཀྱི་ཕྲུ་གུ་དང་སྒྱེ་མོ་གཉིས་འཁྱེར་ཏེ་བྲོས་ཡོང་བ་ཡིན། དུས་སྐབས་དེར་མི་ཚང་མས་སྒྱེ་མོ་གཉིས་རེ་སྔོན་ཚུད་ནས་གྲ་སྒྲིག་ཨང་གསར་བྱེད་ཀྱི་རེད། སྒྱེ་མོ་གཅིག་ནི་གལ་ཆེའི་ཡིག་རིགས་བླུག་སྣོད་ཡིན་པ་དང་། གཞན་དེ་ནི་གྱོན་གོས་སོགས་ཉེར་མཁོའི་དངོས་ཆས་བླུག་སྣོད་རེད། ང་ཚོས་རྐམ་ལ་ཉེ་བའི་གཙང་པོ་ཞིག་བརྒྱུད་རྐང་ཚིགས་བར་འདམ་ཆུ་འཛར་འཛར་ངང་ཡོང་བ་ཡིན།
ཨི་སི་ལམ་དྲག་སྤྱོད་པ་ཚོའི་ཉེན་ཁ་ལས་ཐར་ཡང་ཀུར་སྡེའི་དམག་དཔུང་གི་འཇིགས་པ་ནི་དེ་བས་ཆེ། ང་ཚོར་མེ་ཁ་གསོ་བའི་ཤིང་ཡང་མེད། ཉིན་ཞིག་ངས་རང་ཉིད་ཀྱི་བཟའ་ཟླར་ “གལ་ཏེ་ང་ཚོས་ཁང་ཐོག་གི་གདུང་མ་གཉིས་ལས་གཅིག་བུད་ཤིང་གི་ཆེད་བེད་སྤྱད་ཚེ། གདུང་མ་གཞན་དེས་ཁང་ཐོག་འཛིན་ཐུབ་བམ།” ཞེས་དྲིས་པར། ངའི་བཟའ་ཟླ་གད་མོ་ཤོར་བཞིན་དུ་ “འཛིན་ཐུབ་ཀྱི་མ་རེད། དེ་ལྟར་བྱས་ཚེ་ང་ཚོ་སྲང་ལམ་འདི་ནས་གནས་མཐོ་ཤོས་སུ་བསྡད་པ་རེད།” ཅེས་བཤད་བྱུང་།
གལ་ཏེ་ཧཱ་སཱ་ཀའི་གྲོང་ཁྱེར་དུ་ཁྱོད་ལ་ཕྲུ་གུ་བུ་ཞིག་ཡོད་ཚེ། ཁོ་པ་དམག་འཐབ་ཏུ་འགྲོ་དགོས་པ་རེད། ཕྲུ་གུ་དེ་ཁྱོད་ཀྱི་གཅེས་ཕྲུག་གཅིག་པོ་དེ་ཡིན་མིན་གྱི་ཁྱད་པར་མེད་ལ། ཁོ་པ་སློབ་སྦྱོང་བྱེད་མཁན་ཞིག་ཡིན་མིན་གྱི་ཁྱད་པར་མེད། གལ་ཏེ་ཁྱོད་ཀྱི་ཁྱིམ་རྒྱུད་དུ་བུ་མེད་ཚེ་བུ་མོ་ཞིག་དམག་འཐབ་ཏུ་གཏོང་དགོས་པ་ཡིན། ས་གནས་དེར་སྡོད་འདོད་ཡོད་ཚེ་ཁྱིམ་རྒྱུད་རེ་ནས་མི་རེ་དམག་འཐབ་ཏུ་གཏོང་དགོས་པ་རེད། ཀུར་སྡེའི་དཔུང་དམག་གིས་ངའི་བུ་མོ་དམག་ཁྲལ་དུ་སྐུལ་ཐབས་བྱས་པར་བརྟེན། ངས་ཁོ་མོ་ཊར་ཀིའི་ཡུལ་དུ་ཁྲིམས་འགལ་གྱིས་མ་གཏོང་ཐབས་མེད་བྱུང་།
ངའི་ནང་མི་ཕལ་མོ་ཆེ་བ་ཇར་མན་དུ་ཡོད། ང་ཚོས་དེར་འགྲོ་རྒྱུ་ཐག་བཅད་པ་ཡིན། ང་ཚོས་ཊར་ཀིར་མ་ཡོང་གོང་ཟླ་བ་གཉིས་ཙམ་རིང་ས་མཚམས་སུ་བསྡད་པ་ཡིན། ཊར་ཀིའི་ནི་ངའི་བཟའ་ཟླ་ལས་ཀ་བྱ་ཡུལ་དེ་ཡིན། ང་ཚོས་ངོ་དེབ་བརྒྱུད་གཉན་སྒྲིག་གི་འབྲེལ་ལམ་ཡོད་པའི་ནག་ཚོང་བ་ཞིག་དང་འབྲེལ་བ་བྱས་ཏེ། མཁའ་ལམ་བརྒྱུད་ཨི་ཛི་མིར་བསླེབས་པ་ཡིན། ཉིན་གཉིས་ཀྱི་རྗེས་ང་ཚོ་མི་གྲངས་སོ་ལྔ་མུན་ནག་ཁྲོད་ཊར་ཀིའི་མཚོ་འགྲམ་ཞིག་ཏུ་བསྡད་པ་ཡིན།
ང་དང་ངའི་བུ་མོ། ཁོ་མོའི་བཟའ་ཟླ་དང་ཕྲུ་གུ་བཅས་ནི་མཚོ་མཐར་ལུས་པའི་མི་རྣམས་ཡིན། ངའི་བུ་མོས་མིག་ཆུ་འདོན་བཞིན་མཚོ་ཐོག་ཏུ་འགྲོ་འདོད་བྱེད་ཀྱི་མི་འདུག ངས་རང་ཉིད་ཀྱིས་ནག་ཉེས་བསགས་པའི་ཚོར་བ་ཞིག་དང་ལྷན་ཅི་བྱ་གཏོལ་མེད་དུ་གྱུར། གློ་བུར་དུ་གཞོན་ནུ་ཞིག་གིས་ངའི་བུ་མོ་དང་ཁོ་མོའི་ཕྲུ་གུ་གཉིས་རྨི་ལམ་རྨིས་པ་ལྟར་འཁྱེར་ཏེ་གྲུ་གཞོང་ནང་བླུགས་སོང་། མཚོ་མཐར་ལུས་པ་ནི་ང་ཁོ་ན་རེད། ངས་ནུས་ཤུགས་ཡོད་རྒུས་ཆུར་བརྒལ་ཏེ་གྲུ་གཞོང་ཕྱོགས་སུ་ཕྱིན་པ་ཡིན། ནག་ཚོང་བ་ཞིག་གིས་ང་ཡར་འདེགས་རོགས་བྱས་པ་དང་ངའི་ཚ་བོས་གྲུ་གཞོང་ནས་འཐེན་རོགས་བྱས་བྱུང་།
ང་ཚོ་འདི་ག་ཨའི་ཌོ་མེ་ནིར་སླེབས་སྐབས། སྐྱབས་བཅོལ་བ་བར་མ་ཆད་པར་ས་མཚམས་བརྒལ་ཏེ་མ་སེ་ཌོ་ནི་ཡར་འཛུལ་གྱི་འདུག ང་ཚོའི་བསམ་པར་དཀའ་ཚེགས་ཆེ་ཤོས་ཀྱི་ལམ་བུ་ནི་མཚོ་ཐོག་བརྒྱུད་རྒྱུ་དེ་ཡིན་པ་དང་། ད་ཆ་ང་ཚོ་འགྲོ་ཡུལ་དུ་སླེབས་ཟིན་པ་རེད་སྙམ་བྱུང་།
ཨ་རབ་ཀྱི་བཤད་རྒྱུན་ཞིག་ལ། “ལྷ་ཡུལ་ཡིན་ཡང་མི་མེད་ན་བཟོད་མི་ཐུབ།” ཅེས་ཟེར་བ་རེད། ང་ལ་མཚོན་ན་ཇར་མན་དུ་སྤུན་མཆེད་གཅེན་པོ་གསུམ་དང་གཅེན་མོ་གསུམ་ཡོད། ཡུ་རོབ་མཐུན་ཚོགས་ཀྱིས་ང་ཚོ་གཅེན་གཅུང་ཡུལ་ལུང་ཐ་དད་དུ་ཁ་བྲལ་གཏོང་རྩིས་བྱེད་ཀྱི་ཡོད། གལ་ཏེ་ང་ཚོས་ཡུ་རོབ་མཐུན་ཚོགས་ཀྱི་གནས་སྤོའི་འཆར་གཞི་བཞིན་མིང་རྟགས་བཀོད་ཚེ། ང་ཚོ་ས་ཁུལ་གང་དུ་སླེབས་པའི་ཡུལ་དེའི་མི་སེར་གྱི་ཐོབ་ཐང་སྤྲོད་སྲིད་པ་རེད། འབྱུང་འགྱུར་ང་ཚོས་ཇར་མན་དུ་ཡོད་པའི་རང་ཉིད་ཀྱི་ནང་མི་ཐུག་འཕྲད་བྱེད་ཐུབ་བམ། ངའི་བསམ་པར་སླར་ཡང་སྲིད་བྱུས་འགྱུར་ལྡོག་གིས་ང་ཚོ་དེ་ནས་ཀྱང་འགྲོ་སྐྱོད་མི་ཐུབ་པ་བཟོ་ངེས་རེད།
ང་ཚོ་རང་ཉིད་ཀྱི་ལུང་པར་ཡང་ཁ་བྲལ་འདོད་མེད་པར། གཞན་ཡུལ་དུ་ཁ་བྲལ་བྱེད་པ་ཇི་ལྟར་བློ་ཡུལ་དུ་ཤོང་ངམ། ཨཡེ་ཌོ་མེ་ནིར་སླེབས་པའི་མི་ཚང་མར་རང་ཉིད་ཀྱི་ནང་མི་ཟླ་སྒྲིལ་གཏོང་འདོད་ཀྱི་བསམ་པ་ཡོད་པ་ཤ་སྟག་རེད། དེ་ལྟར་མེད་ཚེ་ཡ་ཡུག་ཆེ་བའི་ལམ་བུ་དེར་སུས་ཀྱང་འཇུག་གི་མ་རེད། སྡོད་གུར་ཕྱི་མ་དེར་རང་ཉིད་ཀྱི་ཁྱོ་ག་ལོ་གཉིས་རིང་ཐུག་འཕྲད་མ་བྱུང་བའི་བུད་མེད་གཉིས་ཡོད། ཁྱོ་ག་གཉིས་པོ་ཇར་མན་དུ་ཡོད་ཀྱང་རང་ཉིད་ཀྱི་བཟའ་མི་བུ་ཕྲུག་འཐེན་ཐུབ་ཀྱི་མེད།
ཡུ་རོབ་ཀྱི་དཔོན་རིགས་ཚང་མས་ངའི་རེ་འབོད་ལ་གསན་པའི་རེ་བ་ཞུ་བཞིན་ཡོད། གལ་ཏེ་ཁྱེད་རྣམ་པས་རང་ཉིད་ཀྱི་བུ་ཕྲུག་དང་གཉེན་ཉེ། ཚ་བོ་བཅས་དང་ཁ་བྲལ་ཏེ་སྡོད་རྒྱུ་ཁས་ལེན་བྱེད་ཐུབ་ཚེ། ངས་ཀྱང་དེ་ལྟར་ཞུ་ཆོག
གལ་ཏེ་ང་ཚོ་མུ་འཐུད་ད་ལྟའི་གནས་སྟངས་འོག་འཇོག་འདོད་ཡོད་ཚེ། ང་ཚོས་འདིར་ཡོང་སྟེ་བློས་བཏང་གང་བྱས་གུན་གསབ་བྱས་ཏེ་ང་ཚོ་སེ་རི་ཡར་སློག་རོགས་གནང་། གལ་ཏེ་ང་ཆ་རྒྱུས་མེད་པའི་མི་དང་འགྲོག་འདོད་ཚེ། ངས་ཁེ་ན་ཌའི་ཐོངས་མཆན་ཞུས་ཀྱང་ཆོག་པ་ཡིན། གལ་ཏེ་ཁྱོད་ནད་ཀྱིས་མནར་ཚེ། ཁྱོད་ལ་ལྟ་རྟོག་སུས་བྱེད་དམ། ནད་ཀྱིས་མནར་སྐབས་ཁྱོད་ལ་གཅེན་པོ་དགོས་ལ་གཅེན་མོ་དགོས། ཨ་མ་དགོས་ལ་པ་ཕ་ཡང་དགོས་པ་ཡིན།
ལེ་ཡ་ལ་ནི་ཆེད་ལས་སྐྲ་བཟོ་བ་ཞིག་ཡིན་པ་དང་། ཁོ་མོས་སེ་རི་ཡར་ལུས་པའི་རང་ཉིད་ཀྱི་ནང་མི་སྤུན་མཆེད་ལ་དཀའ་སྡུག་ཡོང་དོགས་དང་། རང་ཉིད་ཀྱིས་སྐྱབས་བཅོལ་ཞུ་བའི་གནད་དོན་ལ་དོ་ཕོག་ཡོང་དོགས་ཀྱིས་ཁེའི་རོ་ས་གནས་སུ་རྟེན་གཞི་བྱས་པའི་གསར་འགོད་པ་ལའོ་ར། དྷིན་ལ་རང་ཉིད་ཀྱི་རུས་མིང་དང་ལོ་རྒྱུས་གསང་ཉར་བྱེད་དགོས་པར་བཤད་ཡོད།
