སྲིད་སྐྱོང་འོས་མི་གཉིས་ནས་བཟོད་གསོལ་ཞུས་པ་དང་སྦྲཊ་ཆིག་སྒྲིལ་དགོས་པའི་འབོད་སྐུལ་གནང་།

སྲིད་སྐྱོང་འོས་མི་གཉིས་ཀྱིས་གསར་འགོད་ལྷན་ཚོགས་བསྐངས་ཏེ་༧གོང་ས་མཆོག་གི་དབུས་བོད་མི་རྣམས་ལ་བཟོད་གསོལ་ཞུས་བ་དང་སྦྲགས་བོད་མི་ཚང་མས་བོད་ཀྱི་རྩ་དོན་ཐོག་ནུས་པ་མཉམ་དུ་སྤུངས་དགོས་པའི་འབོད་སྐུལ་གནང་སོང་།

དེ་རིང་སྔ་དྲོའི་ཆུ་ཚོད་ ༡༡ ཐོག་གངས་སྐྱིད་ལྷག་པ་ཚེ་རིང་ཚོགས་ཁང་དུ། བཀའ་ཤག་སྐབས་ ༡༥ པའི་སྲིད་སྐྱོང་འོས་མི་སྲིད་སྐྱོང་བློ་བཟང་སེང་གེ་མཆོག་དང་། སྲིད་སྐྱོང་འོས་མི་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་རྣམ་གཉིས་ནས་གསར་འགོད་ལྷན་ཚོགས་ཤིག་བསྐངས་ཏེ། ༧གོང་ས་མཆོག་གི་དབུས་བོད་མི་རྣམས་ལ་བཟོད་གསོལ་ཞུས་བ་དང་སྦྲགས། འོས་བསྡུའི་སྐབས་སུ་ལ་རྒྱབ་སྐྱོར་བྱས་ཡོད་མེད་ལ་མ་ལྟོས་པར་ད་ནས་བཟུང་བོད་མི་ཚང་མས་རྡོག་རྩ་ཆིག་སྒྲིལ་གྱིས་བོད་ཀྱི་རྩ་དོན་ཐོག་ནུས་པ་མཉམ་དུ་སྤུངས་དགོས་པའི་འབོད་སྐུལ་གནང་སོང་།

གསར་འགོད་ལྷན་ཚོགས་ཐོག་སྲིད་སྐྱོང་འོས་མི་སྤེན་པ་ཚེ་རིང་མཆོག་གིས། རྩ་བའི་ཆ་ནས་ང་ཚོས་གསར་འགོད་ལྷན་ཚོགས་དེ་འདྲ་ཚོགས་སྐབས། མར་ཞུ་དགོས་པ་དེ་ཚོ་ཞུས་རྗེས་དྲི་བ་དྲིས་ལན་གྱི་དུས་ཚོད་ཅིག་ཕུལ་གྱི་ཡོད་པ་རེད། དེ་རིང་གཙོ་བོ་དཔལ་ལྡན་སྲིད་སྐྱོང་མཆོག་ངེད་གཉིས་ཀྱི་ངོས་ནས་ཞུ་བ་དེ་མང་ཚོགས་ཀྱི་བདེ་རྩའི་ཆེད་དུ་ཡིན་སྟབས། ཞུ་དགོས་དོན་གཙོ་བོ་དེ་གང་ཡིན་པ་མང་ཚོགས་ལ་ཞུ་ཆེད་ཡིན། མ་འོངས་པར་ང་ཚོས་གསར་འགོད་ལྷན་ཚོགས་བསྐང་དགོས་པ་དང་དྲི་བ་དྲིས་ལན་བྱེད་དགོས་པའི་དུས་ཚོད་ཏན་ཏན་ཤར་སྲིད་པ་རེད། དེ་དུས་དྲི་བ་དྲིས་ལན་གྱི་དུས་ཚོད་འབུལ་ཆོག་པ་ཞུ་ཞེས་ཞུ་རྒྱུ་ཡིན།

དེ་རིང་དཔལ་ལྡན་སྲིད་སྐྱོང་མཆོག་དང་ངེད་གཉིས་ཀྱིས་བཀའ་སྤྱི་ལྷན་རྒྱས་ཀྱི་ཐོག་ནས་ཡིན་ན་རེད། ངེད་གཉིས་སྲིད་སྐྱོང་འོས་མི་གཉིས་ཀྱང་ཆགས་བསྡད་ཡོད་སྟབས། བར་ལམ་ཕྱི་ཟླ་ ༣ ཚེས་ ༢༣ ཉིན་ང་རང་ཚོའི་ལས་དོན་བྱེད་ཕྱོགས་སྤྱི་དང་། བཟང་སྤྱོད་ཀྱི་ཐོག་ནས་༧གོང་ས་སྐྱབས་མགོན་ཆེན་པོ་མཆོག་གི་ཐུགས་ལ་མ་བབས་པའི་གནས་ཚུལ་ཞིག་བྱུང་ཡོད་པ་རེད། དེ་བཞིན་ལྷ་སྲུང་མ་ཆོས་སྐྱོང་རྣམ་པ་ཚོའི་བཀའ་ལུང་གི་ནང་དུའང་བར་ལམ་གྱི་འོས་བསྡུའི་ལས་རིམ་དང་འབྲེལ་བའི་ཐོག་ནས་འོས་མིར་བཞེང་མཁན་དང་། དེ་བཞིན་རྒྱབ་སྐྱོར་བྱེད་མཁན་ཚོའི་བྱ་སྤྱོད་ཀྱི་རྣམ་པའི་ཐོག་ཆོལ་ཁའི་འཐེན་འཁྱེར་དང་ཕྱོགས་རེས་ཀྱི་རྣམ་འགྱུར་མང་པོ་ཞིག་ཐོན་པའི་རྒྱུ་མཚན་ལ་བརྟེན་ཏེ། ༧གོང་ས་སྐྱབས་མགོན་ཆེན་པོ་མཆོག་ཐུགས་ཕམ་བྱུང་བའི་གནས་ཚུལ་ཡོང་ཡོད་པས། སྙིང་ཁོང་རུས་པའི་གཏིང་ནས་༧གོང་ས་སྐྱབས་མགོན་ཆེན་པོ་མཆོག་ལ་བཟོད་གསོལ་ཞུ་བའི་མཇལ་ཁ་གནང་བར་ངང་སྒུག་ཞུ་བསྡད་ཡོད།

འོས་བསྡུའི་ལས་རིམ་གྱི་ཐོག་ནས་ད་ལྟ་བར་དུ་བྱུང་ཚར་བ་དེ་ཚར་བ་རེད་ལ། དེ་ཚོ་བཅོས་པའི་ཐབས་ལམ་ཡོད་པ་མ་རེད། ཡིན་ནའང་། གཙོ་བོ་དེ་མ་འོངས་པར་ང་རང་ཚོས་ག་འདྲ་ཞིག་བྱེད་དགོས་ཀྱི་ཡོད་མེད་དེའི་ཐོག་ལ་རེད། ང་རང་གཉིས་སྒེར་གྱི་ངོས་ནས་མ་འཆམ་དགོས་པའི་རྒྱུ་མཚན་རྩ་བ་ཉིད་ནས་ཡོད་པ་མ་རེད། དེ་བཞིན་ཕར་ཚུར་འཁོན་འཛིན་བྱེད་དགོས་པའི་གནས་སྟངས་རྩ་བ་ཉིད་ནས་མེད་ལ། མང་ཚོགས་ཀྱི་ངོས་ནས་ཀྱང་མ་འོངས་པར་ང་རང་ཚོ་བོད་ཆོལ་ཁ་གསུམ་གཅིག་ཏུ་སྒྲིལ་ཏེ་ནུས་པ་མཉམ་སྤུངས་བྱེད་དགོས་པའི་ལས་འགན་དེ་ང་ཚོ་ཚང་མར་ཡོད་སྟབས། དེ་སྔོན་༧གོང་ས་སྐྱབས་མགོན་ཆེན་པོ་མཆོག་གིས་གནམ་ཐང་དུ་བཀའ་སློབ་གནང་བ་ནང་བཞིན་རེད། སྐུ་མདུན་གྱི་ཕྱག་གིས་ངེད་གཉིས་ཀྱི་ལག་པ་ནས་འཇུས་ཏེ། ཆོལ་ཁ་གསུམ་ཆིག་སྒྲིལ་ཡོང་བའི་འགན་དེ་ཁྱེད་རང་གཉིས་ཀར་ཡོད་རེད་དཱ་ཞེས་གསུངས་པ་ལྟར། དེ་རིང་སླར་ཡང་ངེད་གཉིས་ཀྱི་ཐོག་ནས་འབོད་སྐུལ་ཞུ་བ་དེ་ང་ཚོའི་འོས་བསྡུའི་ལས་རིམ་ཟིན་པ་རེད། འོས་བསྡུའི་ལས་རིམ་སྐབས་སོ་སོའི་ངོས་ནས་སུ་ལ་རྒྱབ་སྐྱོར་བྱེད་སོ་སོའི་འདོད་པ་རེད། ཡིན་ནའང་། གཞི་མེད་ཀྱི་སྐྱོན་བརྗོད་བྱེད་པ་དང་། ད་ལྟ་ཡིན་ནའང་དཔེར་ན་ཉེ་ཆར་ཆོས་སྐྱོང་སྤྱན་འདྲེན་ཞུ་སྐབས་བསྟན་མའི་བཀའ་ལུང་དེ་ཚོར་བཟོ་བཅོས་བརྒྱབ་སྟེ། གང་བྱུང་བཏང་བསྡད་པ་དེ་ཚོའི་གྲས་དེ་ཐབས་སྐྱོ་བོའི་གནས་ཚུལ་རེད། ང་ཚོ་མི་ཙམ་ཕར་བཞག་སྟེ་ལྷ་ཚོ་ཡིན་ནའང་དེ་ངས་བཤད་མེད་དཱ་ཅེས་གསུང་དགོས་པའི་གནས་སྟངས་འདྲ་པོ་ཆགས་བསྡད་ཡོད་པ་རེད། དེར་བརྟེན་ཕྱོགས་ཕན་ཚུན་ཚང་མས་གནོད་སྐྱེལ་བའི་ལས་ཀ་དེ་ཚོ་མི་བྱེད་པར་༧རྒྱལ་བ་རིན་པོ་ཆེའི་བཀའ་སྒྲུབ་རྒྱུ་དང་། དེ་བཞིན་བོད་དོན་བདེན་མཐའ་སེལ་བའི་ཆེད་དུ་ཚང་མ་མཉམ་རུབ་ཀྱི་ཐོག་ནས་ལས་ཀ་བྱེད་རོགས། སྐུ་ངོ་སྲིད་སྐྱོང་མཆོག་ལ་རྒྱབ་སྐྱོར་གནང་མཁན་ཡིན་ན་རེད། ང་ལ་རྒྱབ་སྐྱོར་བྱེད་མཁན་ཚོ་ཡིན་ནའང་རེད། ཚང་མས་ད་ལྟ་ཕན་ཆད་ཀྱི་གནས་ཚུལ་ཚང་མ་ཕར་བཞག་སྟེ་ཆིག་སྒྲིལ་གྱི་ནུས་པ་སྤུངས་ནས་མཉམ་རུབ་ཀྱིས་འགྲོ་དགོས་པ་དེ་གལ་ཆེན་པོ་རེད། ད་ཕན་ནས་གཅིག་གིས་གཅིག་ལ་གནོད་པ་དང་ང་རང་ཚོའི་ཆིག་སྒྲིལ་གྱི་ནུས་པར་གཏོར་བཤིག་གཏོང་བའི་ལས་ཀ་སུས་བྱེད་ཀྱི་ཡོད་ནའང་དེ་ཚོ་མ་བྱེད་རོགས་ཞེས་ཞུ་རྒྱུ་དང་། སྲུང་མའི་བཀའ་ལུང་ཕེབས་པ་བཅོས་བ་དེ་དོལ་རྒྱལ་བསྟེན་མཁན་ཡིན་ན་རེད། ཡང་མིན་ན་རྒྱ་ནག་གཞུང་གི་རྒྱུག་ཁྱི་དེ་འདྲ་ཞིག་གིས་བྱེད་ཀྱི་ཡོད་པའི་དོགས་པ་ཤར་ཡོང་གི་འདུག ད་ནས་བཟུང་ང་ཚོར་རྒྱབ་སྐྱོར་བྱེད་མཁན་ཚོ་ཆིག་སྒྲིལ་བྱེད་དགོས་པ་རེད། ཕྱིས་སུ་དེ་འདྲ་བྱུང་བ་ཡིན་ན་དེ་ཚོའི་གྲས་དེ་དངོས་གནས་དྲང་གནས་རྒྱ་ནག་གི་རྒྱུག་ཁྱི་དང་དོལ་རྒྱལ་བསྟེན་མཁན་གྱི་ལག་ཆར་འགྱུར་གྱི་ཡོད་པ་ཞིག་ལ་ངོས་འཛིན་ཞུ་ཡི་ཡིན་ཞེས་ངས་ལག་གཉིས་ཐལ་མོ་སྦྱར་ཏེ་ཞུ་ཡི་ཡོད། ང་རང་ལ་རྒྱབ་སྐྱོར་གནང་མཁན་ཚོ་ལ་ངས་དེ་སྔའང་ཞུས་པ་ཡིན། སོ་སོས་བཤད་དགོས་པ་དེ་ཚོ་གཞི་རྩ་ཡོད་པའི་ཐོག་ནས་བཤད་དགོས་པ་རེད་མ་གཏོགས་གཞི་རྩ་མེད་པའི་རྫུན་བཤད་པ་དེ་ཚོའི་གྲས་དེ་མ་བཤད་རོགས། སྐད་འཕྲིན་གྱི་ཚོགས་པ་དེ་ཚོ་ཡིན་ནའང་འོས་བསྡུའི་ལས་རིམ་ཚར་རྗེས་མཚམས་བཞག་རོགས་ཟེར་ནས་ཞུ་བ་ལྟར་མང་པོ་ཞིག་གིས་དེ་འདྲ་གནང་འདུག ང་ལ་རྒྱབ་སྐྱོར་གནང་མཁན་ཚོའི་ངོས་ནས་ཡིན་ནའང་དེ་རིང་ནས་བཟུང་ཚང་མས་མཚམས་འཇོག་རོགས། གང་གནང་བ་ཚང་མ་བོད་སྤྱི་པའི་དོན་དུ་ནུས་པ་སྤུངས་གནང་རོགས་ཞེས་ངས་འབོད་སྐུལ་ཞུ་ཡི་ཡོད། ཅེས་གསུངས་སོང་།

སྲིད་སྐྱོང་འོས་མི་སྲིད་སྐྱོང་བློ་བཟང་སེང་གེ་མཆོག་གིས་གསུངས་དོན། དེ་རིང་འདིར་སྲིད་སྐྱོང་འོས་མི་དཔལ་ལྡན་ཚོགས་གཙོ་ནས་བཀའ་གནང་བ་དང་། དེ་བཞིན་མི་མང་ལ་འབོད་སྐུལ་ཞུས་པ་དེར་ང་རང་ཡིན་ན་མཐའ་གཅིག་ཏུ་རྒྱབ་སྐྱོར་ཡོད། མོས་མཐུན་ཡོད་ཅེས་ཞུ་བ་ཡིན། ཚང་མས་མཁྱེན་གསལ་རེད། ཉེ་ཆར་བཀའ་ལུང་ནང་དུ་ཕེབས་པ་ལྟར་གཙོ་ཆེ་ཤོས་མི་མང་ནང་དམ་ཚིག་དང་ཆིག་སྒྲིལ་དགོས་པ། དེ་ཡོད་པ་ཡིན་ན་སྤྱི་མཐུན་གྱི་བསོད་ནམས་གསོག་གི་ཡོད་པ་རེད། སྤྱི་མཐུན་གྱི་བསོད་ནམས་ག་ཚོད་ཡོད་པ་ཡིན་ན་དེ་ལ་དཔག་པའི་༧གོང་ས་མཆོག་གི་སྐུ་ཚེ་དང་ཐད་ཀར་འབྲེལ་བ་ཡོད་དུས། ང་ཚོའི་སྤྱི་ཚོགས་ནང་ལ་དེ་སྔ་ཡང་ཞུས་བསྡད་པ་ཡིན། ང་ཚོའི་ནང་དམ་ཚིག་གཙང་མ་དགོས་པ་དང་རྡོག་རྩ་ཆིག་སྒྲིལ་དགོས་པ། མཐུན་སྒྲིལ་དགོས་པ་དེ་ཤིན་ཏུ་གལ་ཆེན་པོ་རེད། དེར་བརྟེན་འོས་བསྡུའི་སྐབས་རྒྱབ་སྐྱོར་གནང་མཁན་རེད། མི་མང་ཚང་མར་འབོད་སྐུལ་ཞུ་རྒྱུར། འོས་བསྡུའི་ལས་རིམ་དེ་ཚར་བ་ཡིན་པས་ད་ང་ཚོ་ཚང་མས་རྡོག་རྩལ་ཆིག་སྒྲིལ་གནང་དགོས་པ་དེ་ཤིན་ཏུ་གལ་ཆེན་པོ་རེད་ཅེས་ཞུ་བ་ཡིན། འོས་བསྡུའི་སྐབས་ཏན་ཏན་མི་མང་ནང་ཐུགས་ཕམ་དགོས་པའི་གནས་ཚུལ་ཆགས་ཡོད་པ་རེད། དེ་ངོས་ལེན་ཞུ་ཡི་ཡོད། ངོས་ལེན་ཞུས་བ་དང་སྦྲགས་མི་མང་ལའང་བཟོད་གསོལ་ཞུ་ཡི་ཡོད། ཉེ་ཆར་༧གོང་ས་མཆོག་ནས་བཀའ་སློབ་ནན་པོ་ཞེ་དྲགས་ཕེབས་ཡོད་པ་རེད། བཀའ་སློབ་ཕེབས་པ་དེ་ཚོ་སེམས་ལ་ཉར་བའི་ཐོག་ནས་དགོངས་པ་མ་དྭངས་བར་དུ་དགོངས་སེལ་ཞུ་རྒྱུ་རེད། དེ་ལས་གལ་ཆེ་བ་དེ་བཀའ་སློབ་གནང་བ་དེ་ཚོ་སེམས་ལ་བཞག་པའི་ཐོག་ནས་ལག་བསྟར་བྱེད་དགོས་པ་དེ་གལ་ཆེ་ཤོས་རེད། བཀའ་ཤག་འདིའི་ཐོག་ནས་ཡིན་ནའང་ལས་རིམ་བང་སྒྲིག་བཞིན་ཡོད། འཕྲོད་བསྟེན་དང་ཉམ་ཐག བཟང་སྤྱོད། འོས་བསྡུའི་སྒྲིག་གཞི་བཅས་ཀྱི་ཐོག་ནས་ད་ལྟའི་བར་དུ་བཀའ་སློབ་ཕེབས་པ་དེ་ཚོ་གལ་ཆེན་པོར་རྩིས་ཏེ་ལས་རིམ་བང་སྒྲིག་བཞིན་ཡོད་ལ། མ་འོངས་པར་བཀའ་ཤག་གིས་ཏན་ཏན་ལག་བསྟར་གནང་གི་ཡོད་པར་ངོས་འཛིན་གྱི་ཡོད། གང་ཡིན་ཟེར་ན། ང་རང་ཚོའི་བླ་ན་མེད་པའི་དབུ་ཁྲིད་༧གོང་ས་སྐྱབས་མགོན་ཆེན་པོ་མཆོག་ལས་ལྷག་ཡོད་པ་མ་རེད། བོད་ཀྱི་ལོ་རྒྱུས་ནང་གཟིགས་པ་ཡིན་ན་རེད། བོད་ཕྱི་ནང་གཉིས་ཀྱི་མི་མང་གི་རྡོག་རྩ་ཆིག་སྒྲིལ་ལ་གཟིགས་ནའང་རེད། བོད་ནང་གི་བོད་མིའི་སྙིང་སྟོབས་ལ་གཟིགས་ན་རེད། དེ་བཞིན་བཙན་བྱོལ་ནང་གང་ཡང་མེད་པ་ནས་ད་ལྟའི་ཆར་ང་ཚོར་ཆ་ཚང་ཡོད་ཐུབ་པ་དང་། འཛམ་གླིང་གི་སྡིངས་ཆའི་སྒང་ལ་འགྲོ་ཐུབ་པ་དེ་ཁོང་གི་བཀའ་དྲིན་ལ་བརྟེན་ནས་བྱུང་བ་རེད། དེར་བརྟེན་བོད་རྩ་དོན་ཆེད་དུ་ཡིན་ན་རེད། ལོ་རྒྱུས་ཀྱི་ཐོག་ནས་ཡིན་ནའང་རེད་གང་ཅིའི་ཐད་ནས་ཁོང་ལས་ལྷག་པའི་བཀའ་དྲིན་ཆེ་བ་ཞིག་མེད་སྟབས། ང་ཚོའི་བླ་ན་མེད་པའི་དབུ་ཁྲིད་ཀྱིས་བཀའ་སློབ་གནང་བཞག་པ་དེ་ཚོ་ལག་བསྟར་བྱེད་དགོས་པ་དེ་ཤིན་ཏུ་གལ་ཆེན་པོ་རེད། དེ་ལག་བསྟར་བྱེད་པར་ང་རང་ཚོའི་ངོས་ནས་དམ་བཅའ་གཙང་མ་ཡོད། ད་ལན་ནས་བཟུང་སྟེ་ང་ཚོའི་སྤྱི་ཚོགས་ནང་དམ་ཚིག་དང་མཐུན་སྒྲིལ། ཆིག་སྒྲིལ་སྔར་ལྷག་གིས་ཚད་མཐོ་བོ་བྱུང་ཐུབ་པར་འབད་བརྩོན་ཞུ་བར་གྲ་སྒྲིག་ཨང་གསར་ཡོད། ཏན་ཏན་རང་འབད་བརྩོན་ཞུ་ཡི་ཡིན་ཞེས་ཞུ་བ་ཡིན།

ད་ལན་གྱི་འོས་བསྡུའི་སྐབས་སུ་བྱུང་ཡོད་ལ། ད་ལྟ་ཡིན་ནའང་ཆོལ་ཁ་འཐེན་འཁྱེར་དང་འཁྱོག་བཤད་དེ་ཚོ་མུ་མཐུད་དུ་འགྲོ་ཡི་འདུག ང་རང་གིས་ཐད་ཀར་ཞུ་ཐུབ་པ་དེ་ད་ལྟ་དཔལ་ལྡན་ཚོགས་གཙོ་ནས་བཀའ་གནང་བ་གཞིར་བཟུང་ཁོང་ལ་རྒྱབ་སྐྱོར་གནང་མཁན་ཚོར་མ་གནང་རོགས་ཞེས་བཀའ་གནང་བ་ལྟར། ང་རང་གི་ཐོག་ནས་ཡིན་ནའང་ང་ལ་རྒྱབ་སྐྱོར་བྱེད་མཁན་ཚང་མས་འོས་བསྡུའི་ལས་ཀ་མཚམས་འཇོག་བྱས་ཏེ། བོད་མི་ཞིག་ཡིན་པའི་ཆ་ནས་ང་ཚོའི་ཆིག་སྒྲིལ་ལ་ཕན་པའི་འགན་འཁུར་གནང་བའི་ཐོག་ནས་ཕྱག་ལས་གནང་རོགས་ཞེས་ཞུ་བ་གཙོ་བོ་དེ་ཡིན། མི་མང་གི་ནང་ནས་ཡིན་ནའང་ང་ཚོ་སྤྱི་པར་བསམ་བློ་བཏང་སྟེ་བོད་ཕྱི་ནང་གཉིས་ཀྱི་བོད་མིའི་མངོན་འདོད་འགྲུབ་པའི་ཆེད་དུ་སྐུ་ལས་སྐྱོན་རྒྱུ་ཤིན་ཏུ་གལ་ཆེན་པོ་རེད། དེའི་སྒང་ལ་རྡོག་རྩ་ཆིག་སྒྲིལ་གྱིས་ནུས་པ་སྒྲིག་རོགས་གནང་ཞེས་ཞུ་བ་གཙོ་བོ་དེ་ཡིན། ཞེས་གསུངས་སོང་།

མཇུག་ཏུ་སྲིད་སྐྱོང་འོས་མི་སྤེན་པ་ཚེ་རིང་མཆོག་ནས་བོད་ནང་དུ་ཡོད་པའི་བོད་མི་ཚོ་ཐུགས་ཕམ་བྱུང་ཡོད་ན། ངེད་གཉིས་ཀྱི་ངོས་ནས་དགོངས་སེལ་ཞུ་བ་དང་། མ་འོངས་པར་བོད་ནང་དུ་ཡོད་པའི་བོད་མི་ཚོ་བློ་བདེ་བོ་བྱས་ནས་བཞུགས་རོགས་གནང་། ངེད་གཉིས་ཀའི་ཐོག་ནས་མཐུན་སྒྲིལ་ཡོང་བར་གང་ཐུབ་ཐུབ་ཀྱིས་འབད་བརྩོན་ཞུ་ཡི་ཡིན་ཞེས་ཞུ་བ་ཡིན། ཞེས་གསུངས་རྗེས། དྲི་བ་དྲིས་ལན་གྱི་དུས་ཚོད་མེད་པས་གསར་འགོད་ལྷན་ཚོགས་གྲོལ་སོང་།

གསར་འགོད་པ། པདྨ་མཚོ།