དེ་རིང་ནི་འཛམ་གླིང་དཔེ་ཀློག་གི་ཉིན་མོ་ཡིན་སྟབས་བོད་དཀར་མཛེས་ཁུལ་དར་མདོ་གྲོང་ཁུལ་གྱི་བོད་རིགས་སློབ་གྲྭ་ཁག་གིས་དཔེ་ཀློག་གི་བྱེད་སྒོ་ཞིག་སྤེལ་ཡོད་འདུག
བོད་ནང་གི་དྲ་ལམ་ཐོག་གནས་ཚུལ་ཐོན་པ་ལྟར་ན། ཟླ་བ་ ༤ པའི་ཚེས་ ༢༣ ཉིན་ནི་འཛམ་གླིང་དཔེ་ཀློག་གི་ཉིན་མོ་ཡིན་པ་ལྟར། ཁ་སང་ཚེས་ ༢༢ ཉིན་གྱི་ཕྱི་དྲོར་བོད་དཀར་མཛེས་དར་མདོ་གྲོང་ཁུལ་གྱིས་བོད་རིགས་མང་ཚོགས་ཁྲོད་དཔེ་ཀློག་དང་རྩོམ་འབྲིའི་བྱ་བར་ཞུགས་པའི་མི་ཇེ་མང་དུ་འགྲོ་ཕྱིར་དང་། མིའི་རིགས་ཀྱི་དཔལ་ཡོན་ལ་བྱས་རྗེས་བླ་མེད་བཞག་མཁན་གྱི་སྔོན་བྱོན་མཁས་དབང་དམ་པ་དག་ལ་དྲན་གསོ་དང་བཀའ་དྲིན་རྗེས་དྲན་ཞུ་ཆེད། ‘རིག་གནས་ཀྱིས་ཁྱབ་པའི་དར་མདོ་དང་དམངས་ཡོངས་དཔེ་ཀློག་ཏུ་ཞུགས་པ’ ཞེས་པའི་བརྗོད་གཞིའི་ཐོག དར་མདོ་གྲོང་གི་སློབ་གྲྭ་ཆུང་འབྲིང་དང་བྱིས་སློབ་ཁང་བཅས་ཀྱིས་མཛའ་གཞས་ཐང་ཆེན་དུ་མཉམ་འཛོམས་ཐོག་འཛམ་གླིང་དཔེ་ཀློག་ཉིན་མོ་སྲུང་གཙི་ཞུས་ཡོད་འདུག
དཔེ་ཀློག་སྐབས་སློབ་གྲྭ་སོ་སོའི་སློབ་མ་རྣམས་ཀྱིས་སྒྲ་གདངས་གསལ་ལ་སྐད་ངག་མཐོ་བ་དང་། མགྱོགས་དལ་རན་ཞིང་སྒྲོས་ཉམས་དོད་པ་སོགས་ཀྱི་ཁྱད་ཆོས་འབུར་དུ་ཐོན་ཞིང་། དྲིན་དྲན་དང་ཧུར་བརྩོན་གྱི་བརྗོད་སྙིང་ལྡན་པའི་གསུང་རབ་གྱེར་ཀློག་གི་འགྲན་བསྡུར་བྱས་ཏེ། མཐར་མི་ཉག་ཁྲོམ་ལམ་སློབ་ཆུང་གི་གསུང་རབ་གྱེར་ཀློག་ལ་ཨང་དང་པོའི་བྱ་དགའ་ཐོབ་པ་དང་། ཧུའེ་རིགས་སློབ་ཆུང་གི་གསུང་རབ་གྱེར་ཀློག་གཉིས་ལ་ཨང་གཉིས་པའི་བྱ་དགའ་ཐོབ། དེ་བཞིན། ཚོད་ལྟ་སློབ་ཆུང་དང་མི་ཉག་ཁྲོམ་ལམ་སློབ་ཆུང་། མི་རིགས་སློབ་ཆུང་བཅས་ཀྱི་གསུང་རབ་གྱེར་ཀློག་ལ་ཨང་གསུམ་པའི་བྱ་དགའ་ཐོབ་ཡོད་འདུག
བྱེད་སྒོ་དེ་དར་མདོ་གྲོང་ཁྱེར་སློབ་གསོ་ལུས་རྩལ་ཅུས་དང་གྲོང་ཁྱེར་དཔལ་ཡོན་གཞུང་ལས་ཁང་། གྲོང་ཁྱེར་རིག་གནས་ཡུལ་སྐོར་རྒྱང་སྒྲོག་བརྙན་འཕྲིན་ཅུས། དཀར་མཛེས་ཁུལ་དཔེ་མཛོད་ཁང་བཅས་ཀྱིས་གཙོ་འགན་ཁུར་བ་དང་། མི་རིགས་སློབ་འབྲིང་དང་མི་རིགས་སློབ་ཆུང་། ཧུའེ་རིགས་སློབ་ཆུང་། མི་ཉག་ཁྲོམ་ལམ་སློབ་ཆུང་ །ཚོད་ལྟ་སློབ་ཆུང་དང་བྱིས་སློབ་ཁང་དང་པོ་བཅས་མཉམ་ཞུགས་གནང་ཡོད་འདུག
རྒྱ་གར་ལྷོ་ཕྱོགས་ས་གནས་གསར་འགོད་པ་དོན་འགྲུབ་བཀྲ་ཤིས།
