དེ་རིང་སྔ་དྲོའི་ཆུ་ཚོད་ ༡༡ སྟེང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་བོད་མིའི་སྒྲིག་འཛུགས་ཀྱི་སྲིད་སྐྱོང་ལས་ཁུངས་སུ་ཆེད་ཕེབས་ཀྱིས་ཕྱི་ལོ་ད་ལོའི་འོས་བསྡུ་ཆེན་མོའི་ཁྲོད་སྲིད་སྐྱོང་ལས་ཐོག་བློ་བཟང་སེང་གེ་མཆོག་བསླར་ཡང་སྲིད་སྐྱོང་དུ་བདམས་ཐོན་བྱུང་བར་དགའ་བསུའི་འཚམས་འདྲི་ཞུས།
སྐབས་དེར་ཚོགས་གཙོ་མཆོག་གིས་སྲིད་སྐྱོང་ལ་མཇལ་དར་ཕུལ་རྗེས་གསུངས་དོན། ཁ་སང་ཚེས་ ༢༧ ཉིན་བོད་མིའི་སྒྲིག་འཛུགས་དབུས་འོས་བསྡུ་ལས་ཁང་ནས་གཞུང་འབྲེལ་སྐབས་ ༡༥ པའི་སྲིད་སྐྱོང་དང་། སྐབས་ ༡༦ པའི་བོད་མི་མང་སྤྱི་འཐུས་ཀྱི་འོས་བསྡུའི་གྲུབ་འབྲས་གསལ་བསྒྲགས་གནང་བ་རེད། ནམ་རྒྱུན་ང་ཚོའི་འགྲོ་ལུགས་ནང་བཞིན་རྒྱལ་ཁ་ཐོབ་མཁན་ཚོར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུའི་ཆེད་དང་། ལྷག་པར་ང་རང་སྲིད་སྐྱོང་འོས་མི་ཞིག་ཡིན་པའི་ཆ་ནས་ཐེངས་འདིའི་སྲིད་སྐྱོང་འོས་བསྡུའི་སྐབས་རྒྱལ་ཁ་ཐོབ་མཁན་སྲིད་སྐྱོང་ལས་ཐོག་བློ་བཟང་སེངྒེ་མཆོག་ལ་འཚམས་འདྲིའི་བཀྲ་ཤིས་བདེ་ལེགས་མཚོན་བྱེད་དུ་མཇལ་དར་འབུལ་ཆེད་བཅར་བ་ཡིན། དེ་བཞིན། སྤྱི་འཐུས་གསར་པ་ཐོབ་མཁན་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
ང་ཚོའི་འོས་བསྡུ་ལས་རིམ་ཁྲོད་ནས་སྤྱི་ཚོགས་ནང་གནས་ཚུལ་ལབ་གླེང་མང་པོ་ཞིག་བྱུང་ཡོད། ང་རང་ངོས་ནས་ཀྱང་ཐོག་མར་འོས་བསྡུའི་ནང་ལངས་པའི་སྐབས་ནས་འོས་བསྡུའི་ནང་བཞེངས་མཁན་གཞན་པ་ཚོར་མཚན་སྨད་མ་ཞུ་རྒྱུ་དང་། གཞི་མེད་ཀྱི་སྐྱོན་བརྗོད་མི་བྱེད་རྒྱུའི་དམ་བཅའ་བརྟན་པོ་བཞག་པ་ཡིན། འོས་བསྡུའི་བརྒྱུད་རིམ་འདིའི་ཐོག་ནས་བྱང་ཨ་རིའི་ས་ཁུལ་ཁག་བརྒྱད་ལ་འགྲོ་རྒྱུའི་གོ་སྐབས་བྱུང་། དེ་བཞིན་ཡུ་རོབ་ས་ཁུལ་ཁག་བཞི། རྒྱ་གར་ནང་ཆ་བཞག་ན། སྔོན་འགྲོའི་སྐབས་སུ་ས་ཁུལ་ཁག་ཉི་ཤུ་རྩ་བཞི་ཙམ་དང་། དངོས་གཞིའི་སྐབས་ས་ཁུལ་ཁག་སུམ་ཅུ་མན་ཙམ་གྱི་ནང་ཕྱིན་ཏེ། གང་ལྟར་ཆུ་ཚོད་གསུམ་ནས་ལྔ་བར་བཏང་ནས་སོ་སོའི་བྱེད་འཆར་སོགས་གང་ཅིའི་ཐོག་མི་མང་ལ་ཁ་གསལ་པོ་ཞུ་རྒྱུའི་གོ་སྐབས་དང་ཐུག་འཕྲད་བྱེད་རྒྱུའི་གོ་སྐབས་བྱུང་།
སྤྱིར་བཏང་གི་འོས་བསྡུའི་བརྒྱུད་རིམ་འདིའི་ཐོག་ནས་ལབ་གླེང་མང་པོ་ཞིག་བྱུང་བ་རེད། ཞན་པའི་ཆ་མང་པོ་ཞིག་བྱུང་བ་རེད་ལ་ལེགས་པའི་ཆའང་གང་ཙམ་བྱུང་སོང་། མི་མང་ལ་གོ་རྟོགས་སྤེལ་རྒྱུ་སོགས་གང་ཅིའི་ཐད་ནས་ཡག་པོ་བྱུང་སོང་། ཞན་པའི་ཆ་ནི། འོས་མི་ལང་མཁན་དང་རྒྱབ་སྐྱོར་བྱེད་མཁན་ནང་ཡིན་ནའང་རེད། སྤྱི་ཚོགས་དྲ་རྒྱའི་ནང་སྐད་ཆ་མང་པོ་བྱུང་ནས་ ༸གོང་ས་མཆོག་གིས་ད་བར་སྐུ་ངལ་སྐྱོན་ནས་བོད་ཆོལ་ཁ་གསུམ་གྱི་བོད་མི་ཡོངས་རྫོགས་ཆིག་སྒྲིལ་གྱི་ནུས་པ་གོང་བུ་བསྒྲིལ་རྒྱུའི་སླད་སྐུ་ལས་སྐྱོན་པ་འདིའི་ད་ལྟའི་འོས་བསྡུའི་ལས་རིམ་འདིའི་ནང་ཆོལ་ཁ་དང་། ལུང་ཚན་དེ་འདྲའི་འཐེན་འཁྱེར་གྱི་རྣམ་པ་ཤུགས་ཆེན་པོ་བྱུང་བར་བརྟེན། ༸རྒྱལ་བ་རིན་པོ་ཆེ་མཆོག་ཐུགས་བློ་མ་བབ་པ་དང་། ད་བར་སྐུ་ལས་སྐྱོན་པ་དེ་དག་མ་འོངས་པར་གང་འདྲ་ཆགས་ཡོང་བསམས་པའི་ཐུགས་འཚབ་བྱུང་བ་འདི་ང་ཚོས་བཅོས་ཐབས་བྱེད་དགོས།
དེར་བརྟེན། ང་རང་སྲིད་སྐྱོང་འོས་མི་ཞིག་ཡིན་པའི་ཆ་ནས་༸གོང་ས་མཆོག་གི་ཐུགས་ལ་མ་བབ་པ་དང་། ཐུགས་འཚབ་མཛད་པ། ང་ཚོས་ལས་དོན་བྱེད་ཕྱོགས་ཐོག་ནས་༸གོང་ས་མཆོག་ལ་ཐུགས་འཚབ་བྱུང་བ་འདི་སྙིང་ཁོངས་རུས་པའི་གཏིང་ནས་དགོངས་གསོལ་ཞུ་རྒྱུ་དང་། མ་འོངས་སླད་ཕྱིན་འདི་རིགས་རྩ་བ་ཉིད་ནས་མི་ཡོང་རྒྱུ། ལྷག་པར་སོ་སོ་རང་ཉིད་ངོས་ནས་ཀྱང་དམ་བཅའ་བཞག་རྒྱུ་དང་། སོ་སོར་རྒྱབ་སྐྱོར་བྱེད་མཁན་ཚོ་ཡིན་ནའང་། སོ་སོས་ལྟ་སྟངས་ལྟར་ན། དངོས་གནས་ལྷག་བསམ་རྣམ་དག་གིས་ང་རང་གིས་བསམ་ཡུལ་ལས་འདས་པའི་རྒྱབ་སྐྱོར་བྱས་པ་དང་། གཞི་མེད་སྐྱོན་བརྗོད་ལ་སོགས་པའི་སྒྲོ་འདོགས་བྱེད་རྒྱུ་དེ་འདྲ་བྱུང་མ་སོང་བསམས་པ་དེ་འདྲ་བྱུང་། འོན་ཀྱང་ང་ཚོ་མ་ཤེས་རྨོངས་པའི་འོག་ནས་གནས་ཚུལ་དེ་འདྲ་བྱུང་བ་ཡོད་ན། དེ་དག་ལ་ལྷག་བསམ་རྣམ་དག་ཐོག་ནས་བཟོད་གསོལ་ཞུ་བཞིན་ཡོད། དེ་རིང་ནས་གོང་དུ་ངས་དཔལ་ལྡན་སྲིད་སྐྱོང་ལས་ཐོག་མཆོག་ཡང་བསྐྱར་འོས་ཐོབ་པའི་འཚམས་འདྲི་ཞུས་པའི་སྐབས་སུའང་ཞུས་པ་ཡིན། དེ་རིང་ནས་བཟུང་སྟེ་ང་ཚོས་དེ་སྔའི་གནས་ཚུལ་གང་ཡིན་པ་ཡིན་ནའང་དེ་དག་ཕར་བཞག་སྟེ། ༸གོང་ས་མཆོག་གིས་བཀའ་དགོངས་གཞིར་བཟུང་བྱས་ནས་ལེའུ་གསར་པ་ཞིག་འཛུགས་དགོས་པའི་གནས་སྟངས་ཆགས་ཡོད།
དེ་བཞིན་ལས་ཀྱི་སྣེ་མོ་བ་ཚོ་ཡིན་ནའང་ཕྱག་ལས་གནང་ཕྱོགས་ཐོག་ནས་༸སྐུ་མདུན་གྱིས་དགོངས་པ་སྔ་རྗེས་ཚང་མ་བསྒྲུབ་རྒྱུ་དང་། ང་རང་ཚོའི་གནས་བབས་དང་མཐུན་པའི་ཐོག་ནས་ལས་ཀ་བྱེད་རྒྱུ། ༸རྒྱལ་བ་རིན་པོ་ཆེ་མཆོག་གི་ཐུགས་སུན་པོ་དང་། ཐུགས་འཚབ་མཛད་དགོས་པ་དེ་འདྲ་མི་ཡོང་རྒྱུ། མི་མང་ཚོའི་ངོས་ནས་ཡིན་ནའང་སྲིད་སྐྱོང་དང་བཀའ་ཤག སྤྱི་འཐུས། ལས་ཀྱི་སྣེ་མོ་བ་ཚོ་ཡིན་ནའང་ལས་དོན་ཧྲ་ཐག་ཐག་ཅིག་ཡོད་བསམས་པའི་ཡིད་ཆེས་རྙེད་པ་ཞིག་བསྐྲུན་དགོས་པ་དེ་ཧ་ཅང་གལ་ཆེན་པོ་རེད། འདི་བོད་ཕྱི་ནང་གཉིས་ཀྱི་བོད་མི་རྣམས་དང་། ལྷག་པར་བོད་དོན་ཐོག་རྒྱབ་སྐྱོར་དང་དོ་སྣང་གནང་མཁན་རྒྱལ་སྤྱིའི་སྤྱི་ཚོགས་བཅས་ལ་ང་ཚོས་གོ་བརྡ་གསལ་པོ་དང་ཡག་པོ་ཞིག་སྤྲོད་དགོས་པ་དེ་གནད་འགག་ཆེན་པོ་ཆགས་ཡོད།
དེར་བརྟེན། ང་རང་ངོས་ནས་ཡིན་ནའང་དེ་སྔོན་ནས་ཞུས་པ་གཞིར་བཟུང་རྒྱལ་ཁ་ཐོབ་མིན་ལ་མ་ལྟོས་པར་མི་ཚེ་ལྷག་མ་བོད་སྤྱི་པའི་རྩ་དོན་ཆེད་གོ་གནས་ཡོད་མིན་ལ་མ་ལྟོས་པར་ལས་ཀ་བྱ་རྒྱུའི་དམ་བཅའ་བརྟན་པོ་ཡིན། དེ་བཞིན། ༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་བསྒྲུབ་རྒྱུར་དབུ་འོག་དཔུང་འདེགས་གང་འདྲ་ཞིག་ཞུ་དགོས་ཡོད་ནའང་འདྲ། འཛིན་སྐྱོང་བཀའ་ཤག་གི་ལས་དོན་གང་འདྲ་ཞིག་གི་ཐོག་ལ་མཐུན་འགྱུར་གང་འདྲ་ཞིག་ཞུ་དགོས་ཡོད་ནའང་དེ་ལྟར་ཞུ་བརྩིས་ཡོད། ཅེས་ཞུ་རྒྱུ་ཡིན། མང་ཚོགས་ཡིན་ནའང་འདས་པའི་གནས་ཚུལ་གང་བྱུང་བ་རྣམས་ད་ཆ་འདས་ཟིན་པ་ཡིན་སྟབས། བསྐྱར་ལོག་བྱས་ནས་བཅོས་རྒྱུ་མེད། མ་འོངས་པར་དེ་རིགས་མི་ཡོང་ཆེད་དུ་ང་རང་ཚོ་ཚང་མས་དམ་ཚིག་བརྟན་པོའི་ཐོག་ནས་ལས་ཀ་བྱེད་དགོས་རྒྱུ་དང་དགོངས་པ་བཞེས་དགོས་པ་དེ་གལ་ཆེན་པོ་རེད། ངས་དེ་སྔོན་ནས་འབོད་སྐུལ་ཞུས་པ་བཞིན་ཚང་མས་ནུས་པ་མཉམ་སྤུངས་གནང་རོགས་གནང་ཞེས་སླར་ཡང་འབོད་སྐུལ་ཞུ་རྒྱུ་ཡིན། ད་ལྟའི་ ༸གོང་ས་མཆོག་གི་ཐུགས་དགོངས་དྭངས་པའི་ཆེད་དུ་འཛིན་སྐྱོང་བཀའ་ཤག་ངོས་ནས་འབད་བརྩོན་གནང་རྒྱུ་དེ་དག་ཏན་ཏན་གནང་གི་རེད་ལ། གནང་བའི་ཡིད་ཆེས་ཀྱང་བྱེད་ཀྱི་ཡོད། དེ་རིང་གནས་ཚུལ་འདི་བྱུང་ནས་སྤྱི་འཐུས་ཟུར་པ་རྣམ་པ་ཚོ་ཡིན་ནའང་རེད། དེ་བཞིན། ལས་བྱེད་བགྲེས་ཡོལ་ལ་ཕེབས་མཁན་གྱི་ལས་བྱེད་རྒན་པ་ཚོའི་ནང་ལ་ཧ་ཅང་གི་བློ་ཕམ་གནང་གི་འདུག དེའི་ཐོག་ལ་གོ་བསྡུར་སྦྱངས་བཤད་གནང་ནས་ཚང་མས་ནུས་པ་མཉམ་སྤུངས་གནང་རོགས་གནང་། ཞེས་སོགས་གསུངས་ཡོད་པ་བོད་མིའི་སྒྲིག་འཛུགས་ཀྱི་དྲ་བར་འཁོད་འདུག
དེ་རིང་འདིར་ལྟ་ཀློག་བྱས་པ་ཡིན་གང་ལྟར་བསམ་ཚུལ་གང་མང་བརྗོད་འདུག་དགའ་བསུ་ཡོད་ཡིན་ན་ཡང་སྲིད་སྐྱོང་མཆོག་མང་གཙོའི་འགྲོ་སྟངས་ཐོག་ནས་ཡང་སྐྱར་སྲིད་སྐྱོང་དུ་བཞེངས་པ་ཡིན་དུས་དགའ་བསུ་ཡོད། མ་ཟད་ཚོགས་གཙོ་མཆོག་ཡང་སྲིད་སྐྱོང་ལ་འཚམས་འདྲི་ཕེབས་པ་དེ་བས་དགའ་འོས་པ་ཞིག་རེད། གང་ཡིན་ཟེར་ན་ང་ཚོས་དུས་རྟག་ཏུ་༸གོང་ས་མཆོག་གི་གསུང་བརྩི་དགོས་པ་མཐུན་ལམ་དགོས་པ་མང་པོ་ཞིག་གླེང་བཞིན་ཡོད་པ་རེད་དོན་དངོས་ཐོགས་གང་འདྲ་བྱེད་ཡོང་བསམ་ནས་ཡོད། ཡིན་ན་ཡང་ཚོགས་གཙོས་སྲིད་སྐྱོང་ལ་འཚམས་འདྲ་བཅལ་བ་འདི་དགའ་འོས་པ་ཞིག་རེད། གང་ལྟར་འོས་བསྡུས་སྐབས་རང་ནུས་གང་ཡོད་ཀྱིས་ཕན་ཚུན་གཉིས་ཀྱི་གླེང་མོར་འདྲ་མིན་བྱས་ཡོད་པ་ཤེས་གསལ་རེད་ཡིན་ན་ཡང་དེ་སེམས་ལ་མ་བཟུང་བར་མང་གཙོའི་འགྲོ་སྟངས་ལྟར་སུ་ཞིག་རྒྱལ་ན་དེ་ངོས་ལེན་གནང་ཐུབ་པ་ཚོགས་གཙོའི་གཟི་བརྗིད་རེད་བཀྲིན་ཆེན། དབུར་བཞུགས་མཁན་ཚོས་འདི་འདྲ་མཐུན་ལམ་གནང་པ་ཡིན་ན་མིག་ལྟོས་ཡག་པོ་འཇོག་གི་རེད་བསམ་ནས་ཡོད་རྣམ་པ་གཉིས་ལ་གུས་ཞབས་ཡོད་པ་ཡིད་ཆེས་ཡོད་བོད་མི་རིགས་ཀྱི་བདེ་སྡུག་གིས་ཆེད་དུ་ཕྱག་ཡག་པོ་ཞིག་གནང་བས་རེ་བ་ཡོད་ཐུགས་རྗེ་ཆེ། མ་ཟད་གཞེས་བཞུགས་སྤུན་ཟླ་རྣམས་མེ་བསྲེགས་གནང་ནས་དགོས་འདུན་ག་རེ་གནང་གི་འདུག་དེའི་ཐོགས་ཤུགས་རྒྱབ་དགོས་པ་གལ་ཆེན་རེད།
བློ་སེང་ལ་སྤེན་ཚེ་བཀའ་བློན་བསྐོས་པའི་བློ་ཁོག་མེད་ལ་སྤེན་ཚེ་ཁས་ལེན་གྱིས་བཀའ་བློན་གྱི་ལས་སྣེ་བཞེས་ཀྱི་རེད་སྙམ་པའི་གདེངས་ཚོད་ཀྱང་བྲལ། སྤེན་ཚེ་ལ་བློ་སེང་གི་བཀའ་བློན་བསྐོས་པའི་རེ་སྨོན་མེད་ལ་ཡིད་ཆེས་ཀྱང་བྲལ། ཁོང་གཉིས་མཉམ་འབྲེལ་ཡོང་ཐབས་བྲལ་བ་དེ་སྔོན་འོས་བསྡུ་ཆེན་མོའི་བརྒྱུད་རིམ་ནང་འཁྲབ་པའི་ཟློས་གར་རིམ་པ་ལས་ཤེས་ཐུབ། གལ་སྲིད་བཀའ་བློན་བྱེད་ཀྱང་གང་ལྟར་རྩ་དགོངས་ཞུ་དགོས་པའི་གནད་དོན་ཡོང་ངེས་རེད། ཡོང་དགོས་པའི་གནད་དོན་རྣམས་བཀའ་ཟུར་བདེ་སྐྱིད་ཆོས་དབྱངས་ལྟར་ཆགས་སྲིད།
ཚོགས་གཙོ་མཆོག་2021 གི་སྲིད་སྐྱོང་རེད་ ཁོང་བློ་བཟང་སངས་རྒྱས་ཀྱི་ཕྱག་རོགས་བཀའ་བློན་ལ་རྩ་བ་ནས་ཡོང་གི་མ་རེད་ དེ་ནི་རྒྱལ་པོ་ཁྲི་ཐོག་ནས་མར་འཕབ་ཏེ་འབངས་ཀྱི་ཁོང་སུ་ཞག་པ་དང་གཅིག་མཚུངས་རེད་ མི་དབང་མཆོག་སྐུ་གྲག་གསར་པའི་ལམ་ལུགས་ལ་ནམ་ཡང་འཕེབས་ཀྱི་མ་རེད
ལགས
སེམས་རྣལ་དུ་ཕོབས་ནས་བཀའ་མོལ་གནང་དང་། ཚོགས་གཙོ་མཆོག་གིས་ཟུར་ཟའི་བཀའ་མོལ་གནང་སྟངས་ལ་གཟིགས་དང་སེམས་མཐུན་གྱི་ཕྱག་རོགས་ཞིག་ཡོང་ས་རེད་པས། ཡིན་ནའང་ངའི་ཚོར་སྣང་ལ་ཁོང་བཀའ་བློན་དུ་འདེམས་ངེས་རེད་སྙམ།
ཧ་ཧ་ཧ། དྲ་གྲོགས་ཚོ་རེ་སྟོང་མ་རྒྱགས། གལ་ཏེ་སློབ་སངས་ཀྱིས་སྤེན་ཚེ་བཀའ་བློན་ལ་བླངས་ན་སྐབས་དེར་གྲོས་ཚོགས་ཀྱིས་རྒྱབ་སྐྱོབ་ཇི་ལྟར་ཐོབ། སྐབས་དེར་བསྟན་པ་ཡར་འཕེལ་སོགས་ཀྱིས་མི་གསོད་ལག་དམར་རེད་ཟེར་ངེས་རེད། སྔོན་ཡང་སྤྱི་འཐུས་བསོད་སྟོབས་ཀྱིས་དེ་ལྟར་བཀག་པ་རེད། སླར་ཡང་བསྟན་འཕེལ་སོགས་དང་། དེའི་ཕྱོགས་གཏོགས་ཚོས་བཀག་ངེས་རེད་དོ། །
ཞབས་འདྲེན་རང་རེད་་་་སྔོན་གྱི་སྤྱི་འཐུས་བསོད་སྟོབས་དང་ཕྱི་ཚུལ་གྲ་གཟུགས་འཛིན་པའི་བསྟན་པ་ཡར་འཕེལ་བཀུར་འོས་ཚོགས་གཙོ་མཆོག་ལ་གཞི་མེད་བསྙན་འཛུགས་ཡིན་པ་གསལ་གསལ་ཐིང་ཐིང་རེད། ཁོང་བཀའ་བློན་ལ་བདམས་ན་་དེ་དང་དེའི་ཕྱོཊ་གཏོགས་ཚོས་སྨྱོ་ལབ་རྒྱབ་ན་་མི་སྟེ་ཕྱི་མི་ཚོས་ཁྲེལ་ཏེ་ཧ་བགོད་བྱ་ངེས་རེད།
མ་ཟད་ཉེ་ཆར་འོས་བསྡུས་མ་སླེབས་ཙམ་ནས་་་བེ་རི་དགེ་བཤེས་ཏེ་་་བེར་སྨྱོན་གྱིས་་ཚོགས་གཙོ་ལགས་་་མི་གསོད་ལག་དམར་ཡིན་རབས་་ངོ་དེབ་ནང་ཁ་ཡམ་ཡམ་བྱས་ནས་བཤད་པ་དེ་མཐོང་དུས་་་དགེ་བཤེས་ཀྱི་མིང་ཅན་དང་སྤྱི་ཟུར་ཞིག་གི་དེ་འདྲ་གསུངས་དུས་བགད་མོ་ཤོར་ཡ་རེད་འདུག་བཱ་་་་
སྲིད་་སྐྱོང་མཆོག་གིས་་་ཚོགས་གཙོ་ལགས་ཕྱག་རོགས་བཀའ་བློན་ལ་བདམ་ན་་་ཁོང་ནི་ནང་འཛིན་སྐྱོང་ལ་རྒ྄ུས་མངའ་ཆེ་བ་དང་ཉམས་མྱོང་གིས་ཕྱུག་པ། ཕྱི་མི་ཚོས་ཆེ་མཐོང་དང་ཆ་འཇོག་འཕཻར་ངེས་ཡོང་ངོ་། བཀའ་བློན་གསར་པ་སྤུས་དག་བདམ་རྒྱུ་རེད་དྲན་གྱི་་་་དེ་མིན་འཕྲོད་བསྟེན་བཀའ་བློན་འདྲ་ལྐོག་ཟ་ཡི་རུལ་དྲི་བྲོ་བ་དེ་འདྲ་བདམ་ན་སྔོ་ལོ་གསོན་པོ་དེ་འཕྱར་རྒྱུ་ཡིན་པམཉེ་བའི་ལོ་སྔོན་ལ་གཟིགས་ན་མ་མཁྱེན་པ་ཨ་ཡོད་་་་།།
སྤྱི་འཐུས་ཚོགས་གཙོ་ངེས་པར་དུ་བཀའ་ཤག་ཡོང་དགོས་པའི་རྒྱུ་མཚན་གཉིས།
༡༽ བཀའ་ཤག་ཚགས་ཚུད་དང་ལས་དོན་སྤྱི་ལ་ནུས་པ་འཕར་མ་ཞིག་ཡོང་ངེས་ཡིན།
༢༽ འོས་བསྡུའི་རྒྱུད་རིམ་ནང་སྟབས་མ་ལེགས་པའི་ཟང་ཟིང་མང་དག་བྱུང་བ་རྣམས་རང་བཞིན་གྱི་ལྷིང་འཇགས་ཡོང་ངེས་ཡིན།
ངས་བལྟས་ན་སྲིད་སྐྱོང་དང་ཚོགས་གཙོ་གཉིས་ལག་པ་གཏོང་རེས་བྱས་པ་འདི་ཕྱི་ཚུལ་ཙམ་མིན་ནམ་སྙམ། གང་ཡིན་ཟེར་ན་ཉེ་སྔོན་ལབ་རྒྱུ་མེད་ན་མ་གཏོགས་ལབ་སོང་། ད་གལ་སྲིད་དེ་འདྲ་བདེན་པ་ཡིན་ན། སྲིད་སྐྱོང་བློ་སེང་མཆོག་གིས་སྤེན་པ་ཚེ་རིང་ཕྱག་རོགས་བཀའ་བློན་ཞིག་ཏུ་འདེམས་ན་ད་གཟོད་ལྟ་རྒྱུ་ཡོད།
དཔལ་ལྡན་སྲིད་སྐྱོང་མཆོག་གིས་ཚོགས་གཙོ་མཆོག་ནང་སྲིད་བཀའ་དློན་ནམ་བཀའ་བློན་ཞིག་ཏུ་བསྐོས་བཞག་མཛད་དགོས་འདུག ཁོང་གིས་སྲིད་སྐྱོང་མཆོག་ལ་ཕྱག་་རོགས་སྤུས་དག་ཅིག་ཡོང་ངེས་ཡིན་པ་ཚང་མས་མཁྱེན་མཁྱེན་པ་རེད་་་དེས་ན་ཁོང་ཉིད་བཀའ་བློན་དུ་བདམ་པ་ན་་་དལྟ་ཕྱི་ནང་གང་སར་ཉམས་ཆག་སོང་བ་དེ་དག་སླར་གསོ་བྱ་བ་ལ་ཕན་ཐོགས་ཡོང་རྒྱུ་ཡིན་པར་གདོན་མི་ཟ་འོ།།
ཧཧཧཧཧ། སེང་གེ་ནི་སེང་གེ་རང་ཡིན། ད་ནི་སེང་གེས་སྤེན་ཚེ་དབང་དུ་བསྡུས་ཟིན་འདུག དཔའ་པོའི་ཁྱུ་མཆོག་ཟེར་བ་དེ་འདི་འདྲ་ཞིག་དགོས་པ་རེད།
བློ་བཟང་སེང་གེ་ལ་སྤེན་པ་ཚེ་རིང་ཕྱག་རོགས་བཀའ་བློན་ལ་བསྐོ་བཞག་བྱེད་པའི་བློ་ཁོག་གིས་འདང་གི་མ་རེད།
མཆོག་ཏུ་བཀུར་འོས་པའི་བོད་གཞིས་བྱེས་གཉིས་སུ་ཆེ་མཐོང་ལྡན་པའི་དཔལ་ལྡན་སྲིད་སྐྱོང་བློ་བཟང་སེང་གེ་མཆོག སྐུ་མཆོག་ཉིད་ཀྱིས་ཚོགས་གཙོ་སྤེན་པ་ཚེ་རིང་མཆོག་ཉིད་ཀྱི་ཕྱག་རོགས་བཀའ་བློན་སུ་བཞེས་གནང་རྒྱུའི་གུ་ཡངས་དཀྱིལ་ཆེ་དང་ཐུགས་སྤོབས་ལྷག་བསམ་མངའ་འམ། གལ་སྲིད་སྐུ་ཉིད་ལ་དེ་ལྟའི་དགོངས་པ་རྒྱ་ཆེན་ཡོད་ཚེ། ཤེས་འཇོན་ལྷག་བསམ་རླབས་ཆེན་ལྡན་པའི་ཚོགས་གཙོ་སྤེན་པ་ཚེ་རིང་མཆོག་གིས་སྐུ་ཉིད་ལ་ཕྱག་རོགས་དང་། བོད་སྤྱི་བར་ཞབས་ཞུ། ༧རྒྱལ་བ་རིན་པོ་ཆེ་མཆོག་ལ་དབུ་འོག་དཔུང་འདེགས་ཞུ་རྒྱུའི་ཐུགས་འདོད་ཡོད་པ་འདི་ལྟར་གསུངས་འདུག
“ང་རང་ངོས་ནས་ཡིན་ནའང་དེ་སྔོན་ནས་ཞུས་པ་གཞིར་བཟུང་རྒྱལ་ཁ་ཐོབ་མིན་ལ་མ་ལྟོས་པར་མི་ཚེ་ལྷག་མ་བོད་སྤྱི་པའི་རྩ་དོན་ཆེད་གོ་གནས་ཡོད་མིན་ལ་མ་ལྟོས་པར་ལས་ཀ་བྱ་རྒྱུའི་དམ་བཅའ་བརྟན་པོ་ཡིན། དེ་བཞིན། ༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་བསྒྲུབ་རྒྱུར་དབུ་འོག་དཔུང་འདེགས་གང་འདྲ་ཞིག་ཞུ་དགོས་ཡོད་ནའང་འདྲ། འཛིན་སྐྱོང་བཀའ་ཤག་གི་ལས་དོན་གང་འདྲ་ཞིག་གི་ཐོག་ལ་མཐུན་འགྱུར་གང་འདྲ་ཞིག་ཞུ་དགོས་ཡོད་ནའང་དེ་ལྟར་ཞུ་བརྩིས་ཡོད།”