ཕྱི་ཚེས་ ༢༧ ཉིན་ཨ་རིའི་ནེའུ་ཡོག་གྲོང་ཁྱེར་གྱི་ལོ་རྒྱུས་ནང་དོགས་ཡོད་ནག་ཚོང་བའི་གྲངས་འབོར་མང་ཤོས་དེ་འཛིན་བཟུང་བྱེད་ཐུབ་ཡོད་འདུག
ཨ་རིའི་ནེའུ་ཡོག་གྲོང་ཁྱེར་གྱི་ཉེན་རྟོག་ཁང་དང་རྒྱལ་ཕྲན་མཉམ་འབྲེལ་ཁང་གིས་མི་སྣ་ ༧༠༠ ཙམ་ཆེད་གཏོང་བྱས་ཏེ། ཟླ་འདིའི་ཕྱི་ཚེས་ ༢༦ ཉིན་གྱི་དགོང་མོ་ནས་ཚེས་ ༢༧ ཉིན་གྱི་སྔ་དྲོའི་བར་ཉེས་ཅན་འཛིན་བཟུང་གི་ཛ་དྲག་འགུལ་སྐྱོད་བྱས་པ་བརྒྱུད། ནེའུ་ཡོག་གྲོང་ཁྱེར་བྷ་རོན་སི་གྲོང་སྡེ་(Bronx)ཁུལ་གྱི་དོགས་ཡོད་ནག་ཚོང་བ་ ༡༢༠ འཛིན་བཟུང་བྱེད་ཐུབ་ཡོད་པ་དང་། དེ་ནི་ནེའུ་ཡོག་གྲོང་ཁྱེར་གྱི་ལོ་རྒྱུས་ནང་ནག་ཚོང་བ་འཛིན་བཟུང་བྱས་པའི་གྲངས་འབོར་མང་ཤོས་དེ་ཆགས་ཡོད་འདུག
ཉེན་རྟོག་ཕྱོགས་ནས་དོགས་ཡོད་ནག་ཚོང་བ་དེ་ཚོ་ནེའུ་ཡོག་གྲོང་ཁྱེར་གྱི་ཁ་གཏད་ནག་ཚོགས་( 2 Fly YGZ )དང་ (The Big Money Bosses )གཉིས་ཀྱི་ཚོགས་མི་དང་ལག་འབྲེལ་བ་ཡིན་ལ། འདས་པའི་ལོ་མང་རིང་ཁོ་ཚོས་ས་གནས་མི་མང་ལ་ཉེས་འདོགས་འཕྲོག་བཅོམ་དང་མི་མང་དམར་གསོད་བཏང་བ། སྨྱོ་རྫས་དང་མེ་མདའ་ནག་ཚོང་བྱས་པའི་ནག་ཉེས་ཡོད་པ་དང་། ད་ལན་ཁོ་ཚོ་འཛིན་བཟུང་བྱས་པ་དེས་བྷ་རོན་སི་གྲོང་སྡེ་ཁུལ་གྱི་སྡོད་མང་གི་དུས་ཡུན་རིང་པོའི་འཇིགས་སྣང་སེལ་ཏེ་བདེ་འཇགས་ངང་འཚོ་བ་སྐྱེལ་ཐུབ་པར་ཕན་འབྲས་ཆེན་པོ་ཐོན་ཡོད་སྐོར་བརྗོད་འདུག
ཡང་ནེའུ་ཡོག་ཉེན་རྟོག་ཁང་གི་མགོ་འཁྲིད་ཝེ་ལིམ་བྷ་རཱ་ཊོན་(William Bratton)ལགས་ཀྱིས། དོགས་ཡོད་ནག་ཚོང་བ་དེ་ཚོས་བྷ་རོན་སི་ཁུལ་གྱི་ཁྱིམ་ཚང་དང་སློབ་གྲྭ་ཁག་གི་ནང་སྨྱོ་རྫས་ལྐོག་ཚོང་བྱས་ཡོད་པ་མ་ཟད། ཁྲིམས་འགལ་ནག་ཚོང་གི་འགུལ་སྐྱོད་ཁྲོད་རྒན་མོ་ལོ་ ༩༢ ཅན་ཞིག་དང་བྱིས་པ་ལོ་ ༡༥ ཡིན་པ་ཞིག་ཚུད་པའི་ཉུང་མཐར་མི་གྲངས་༨ ལྐོག་གསོད་བྱས་ཡོད་སྐོར་དང་། དོགས་ཡོད་ནག་ཚོང་བ་དེ་ཚོ་མ་འོངས་པར་རྒྱལ་ཕྲན་མཉམ་འབྲེལ་གྱི་བཙོན་ཁང་དུ་ལོ་མང་བཙོན་འཇུག་བྱ་རྒྱུ་ཡིན་ལ། སྐབས་དེར་ཁོ་ཚོའི་ཉེ་འགྲམ་དུ་ལག་རོགས་དང་ཁྱིམ་མི་མེད་སྟབས། འཇིགས་སྐུལ་དྲག་སྤྱོད་རིགས་གང་ཡང་སྤེལ་ཐབས་མེད་སྐོར་བརྗོད་ཡོད་པ་རེད།
གསར་འགོད་པ། པདྨ་མཚོ།
