བོད་མིའི་འབྱུང་འགྱུར་བོད་མི་རང་ཉིད་མ་གཏོགས་གཞན་སུ་ལའང་ཐག་གཅོད་ཀྱི་ཐོབ་ཐང་མེད།

འདས་པའི་ཉིན་གསུམ་རིང་བཞུགས་སྒར་དུ་རྒྱ་ནག་དང་དམངས་གཙོའི་སྐོར་གྱི་བགྲོ་གླེང་ཚོགས་འདུ་ཞིག་དང་བསྟུན་ཏེ། ཁ་སང་ཚོགས་ཞུགས་པ་རྒྱ་རིགས་ཤེས་ཡོན་པ་སྐོར་ཞིག་དང་། ཁ་ན་ཌའི་མཛངས་མ་ཨ་ན་སི་ཊ་ཤེ་ཡ་ལེན་བཅས་ཀྱིས་མང་ཚོགས་ལ་གཏམ་བཤད་གནང་སོང་།

ཁ་སང་ཕྱི་ཚེས་ ༡ ཉིན་གྱི་དགོང་དྲོའི་ཆུ་ཚོད་ ༥།༣༠ སྟེང་དྷ་ས་མག་གྷན་གྱི་བྷག་སུ་སྐྱིད་སྡུག་ཚོགས་ཁང་དུ་བོད་རང་དབང་སློབ་ཕྲུག་ཚོགས་པའི་གོ་སྒྲིག་འོག བོད་རྒྱ་གསུམ་གྱི་སྤྱི་མང་བགྲོ་གླེང་ཚོགས་འདུ་ཞིག་ཚོགས་སོང་ལ། ཚོགས་ཐོག་ཏུ་རྒྱ་རིགས་དམངས་གཙོ་དོན་གཉེར་བ་ཡང་ཅིན་ལེ་ (Yang Jianli) དང་འགྲོ་བ་མིའི་ཐོབ་ཐང་ཁྲིམས་རྩོད་པ་ཐིང་པོ་ (Teng Biao) ལགས་དང་། ཧོང་ཀོང་གི་དམངས་གཙོ་དོན་གཉེར་ལྕམ་ཧང་ཏུང་ཆོ་ (Hang Tung Chow) དང་ཁ་ན་ཌའི་མཛངས་མ་ཨ་ན་སི་ཊ་ཤེ་ཡ་ལེན་ (Anastasia Lin) ལགས། ཉེ་ཆར་རྒྱ་ནག་གཞུང་གིས་ཕྱིར་ཕུད་བཏང་བའི་ཧྥ་རན་སིའི་གསར་འགོད་པ་ལྕམ་ཨོར་སུ་ལ་གྷུ་ཐེར་ (Ursula Gauthier) ལགས། དེ་བཞིན། འཛམ་གླིང་ནུབ་ནས་ཕེབས་པའི་བོད་དོན་ཐོག་དོ་ཁུར་ཅན་བོད་རྒྱ་དབྱིན་གསུམ་གྱི་མི་མང་ ༡༠༠ ལྷག་འཛོམས་འདུག

བགྲོ་གླེང་ཐོག་དམངས་གཙོ་དོན་གཉེར་བ་སྐུ་ཞབས་ཡང་ཅིན་ལེ་ (Yang Jianli)ལགས་ཀྱིས། དེ་རིང་ངས་འདིར་བོད་ཀྱི་མ་འོངས་པའི་ཐོག་ལ་བསམ་ཚུལ་ཁ་ཤས་ཞུ་རྒྱུ་ཡིན། གལ་སྲིད་ཁྱེད་རང་རྒྱ་ནག་དང་རྒྱ་ནག་གི་ཆབ་སྲིད་ལ་དོ་སྣང་བྱེད་མཁན་ཞིག་ཡིན་ན། ངས་འདིར་བསམ་འདོན་རྒྱུ་དེ་རྒྱ་ནག་ཕྱི་ནང་གི་རྒྱ་རིགས་མི་མང་གི་ཚབ་མཚོན་དེ་འདྲ་གང་ཡང་མིན། ཡིན་ནའང་འདས་པའི་ལོ་ངོ་ཁ་ཤས་རིང་རྒྱ་ནག་ནང་ང་དང་ངའི་བསམ་ཕྱོགས་མཐུན་པའི་རྒྱ་རིགས་ཇེ་མང་དུ་འགྲོ་བཞིན་འདུག

དོ་དགོང་ངས་འདིར་བཤད་རྒྱུའི་བསམ་ཚུལ་དང་པོ། རྒྱ་ནག་དམར་ཤོག་འོག་བོད་དང་བོད་མི་ཚོར་སྡུག་སྦྱོང་མནར་གཅོད་བཏང་བ་དང་། རྒྱ་རིགས་མང་པོས་དེ་ལ་རྒྱབ་སྐྱོར་གནང་གི་ཡོད་པ་ཞིག་ཏུ་མཐོང་གི་འདུག ང་རང་ཡང་རྒྱ་རིགས་ཤིག་ཡིན་སྟབས། འདས་པའི་མི་ལོ་ ༣༠ ཙམ་ནང་ང་རང་གིས་བཟོས་པའི་ནོར་འཁྲུལ་མང་པོ་ཞིག་ལ་ནོངས་འགྱོད་དང་། བོད་རང་དབང་གི་གནད་དོན་དང་བོད་རྒྱ་མི་རིགས་གཉིས་འཆམ་མཐུན་དང་ཞི་བདེ་ཡོང་ཐབས་སུ་ངས་རྒྱབ་སྐྱོར་དང་འབད་བརྩོན་བྱ་ངེས་ཡིན།

གཉིས་པ། བོད་ཀྱི་གནད་དོན་འདི་རྒྱ་ནག་སྲིད་གཞུང་དང་། ཡང་ན་རྒྱ་ནང་གི་དམངས་གཙོ་དོན་གཉེར་ང་རང་ལྟ་བུའི་རྒྱ་རིགས་མི་མང་གིས་ཐག་གཅོད་ཐུབ་པ་ཞིག་མ་རེད། བོད་དང་བོད་མིའི་འབྱུང་འགྱུར་དེ་བོད་མི་རང་ཉིད་མ་གཏོགས་གཞན་སུ་ལའང་ཐག་གཅོད་ཀྱི་ཐོབ་ཐང་ཡོད་པ་མ་རེད།

རྒྱ་ནག་གཞུང་གི་གླེང་སློང་ནང་བཞིན་བོད་རྒྱ་ནག་གི་ཆ་ཤས་མ་རེད། བོད་དང་བོད་མི་ཚོར་སོ་སོའི་སྐྱེས་ཁམས་ཁོར་ཡུག་དང་བྱུང་རབས་ལོ་རྒྱུས། ཡུལ་སྲོལ་རིག་གནས་སོགས་ཐུན་མོང་མ་ཡིན་པ་ཡོད་པ་རེད། བོད་མི་ཚོར་རང་ཐག་རང་གཅོད་ཀྱི་ཁེ་དབང་ཡོད་པ་རེད། ངས་བོད་མི་ཚོའི་རང་ཐག་རང་གཅོད་ཀྱི་ཐོབ་ཐང་ལ་བརྩི་མཐོང་བྱེད་ཀྱི་ཡོད། མ་འོངས་པར་ཆབ་སྲིད་སྒྲིག་གཞི་གང་འདྲ་ཞིག་གཏན་འབེབ་བྱས་ཀྱང་། བོད་མིའི་རང་ཐག་རང་གཅོད་ཀྱི་རྩ་འཛིན་འདི་ལ་རྒྱ་རིགས་མི་མང་གིས་ཀྱང་ངོས་ལེན་དགོས་པ་ཞིག་རེད།

གསུམ་པ། ངས་འདིར་གསལ་བོར་ཞུ་འདོད་པ་ཞིག་ལ། མི་ལོ་སྟོང་ཕྲག་མང་པོའི་གོང་ནས་བོད་རྒྱ་གཉིས་ཆབ་སྲིད་དང་ཆོས་ལུགས། བྱུང་རབས་ལོ་རྒྱུས་དང་ཡུལ་སྲོལ་རིག་གནས་སོགས་ཕྱོགས་གང་ཐད་ནས་འབྲེལ་བ་ཡོད་ཀྱང་། བོད་རྒྱ་ནག་གི་ཆ་ཤས་སུ་གླེང་བ་དེ་ནི་རྒྱ་ནག་མི་མང་གཅིག་པུ་ཙམ་མ་ཟད། འཛམ་གླིང་གི་དབུ་ཁྲིད་ཚོས་རྒྱུ་མཚན་གནས་ལུགས་ཇི་ལྟར་བགྲངས་ནའང་། དེ་ནི་ཐལ་དྲགས་པའི་ཧམ་འཛུལ་ཞིག་རེད་ལ། བོད་ཀྱི་གནད་དོན་དེ་བོད་མིའི་རེ་འདུན་གཞིར་འཛིན་རྒྱུ་ལས་སེལ་ཐབས་གཞན་ཡོད་པ་མ་རེད། བོད་མི་ཚོས་དཀའ་སྡུག་གི་བགྲོད་ལམ་རིང་མོ་ཞིག་བརྒྱུད་མཐར། རང་ཐག་རང་གཅོད་ཀྱི་ཐོབ་ཐང་ལོངས་སུ་སྤྱོད་པའི་སྐབས་སུ། ཁོ་ཚོ་རྒྱ་རིགས་མི་མང་དང་ལྷན་དུ་གོམ་པ་རིམ་འཛེག་གིས་མདུན་སྐྱོད་གནང་དགོས། དེ་བས་གཅིག་བྱས་ན་ཁྱེད་ལ་འདམ་ག་གཞན་མི་སྲིད་ནའང་། དཀའ་སྡུག་གང་མང་ཞིག་བརྒྱུད་མཐར། ཁྱེད་རང་རྒྱ་ནག་གི་དབང་སྒྱུར་འོག་ལས་ཐར་ཐུབ་པར་འདོད།

བཞི་བ། ང་རང་ཉིད་ཀྱི་ཉམས་མྱོང་ཐོག་ནས། ཏཱ་ལའི་བླ་མའི་གཉིས་ཕན་དབུ་མའི་ལམ་ནི་བོད་ཀྱི་གནད་དོན་སེལ་བའི་ཐབས་ཤེས་གལ་ཆེན་དང་ནུས་ལྡན་ཞིག་ཡིན་པ་དང་། ང་རང་འདུ་བའི་རྒྱ་རིགས་དམངས་གཙོ་དོན་གཉེར་བ་མང་པོས་རྒྱ་རིགས་མི་མང་ལ་བོད་ཀྱི་བྱུང་རབས་ལོ་རྒྱུས་དང་ཆོས་ལུགས་རིག་གནས། ཡུལ་སྲོལ་གོམས་གཤིས་སོགས་ངོ་སྤྲོད་དང་གླེང་མོལ་བྱེད་ཀྱི་ཡོད་པ་མ་ཟད། ལྷག་པར་དུ་བོད་མི་མང་གི་མངོན་འདོད་དང་དངོས་ཡོད་གནས་ཚུལ་སོགས་ལ་ངེས་ཤེས་སྐྱེད་ཀྱི་ཡོད། བོད་མིའི་ཁྲོད་དུ་གཉིས་སྨན་དབུ་མའི་ལམ་ཕྱོགས་ཐད་བསམ་ཚུལ་མི་འདྲ་འབྱུང་གི་ཡོད་ནའང་། དུས་ཡུན་རིང་བོར་རྒྱ་རིགས་མི་མང་གི་རྒྱབ་སྐྱོབ་འཐོབ་ཀྱི་ཡོད་སྟབས། ངས་བོད་རིགས་གྲོགས་པོ་གྲོགས་མོ་ཚོར་ཏཱ་ལའི་བླ་མའི་གཉིས་ཕན་དབུ་མའི་ལམ་ལ་ངེས་ཤེས་བསྐྱེད་པའི་རེ་འབོད་ཞུ་རྒྱུ་ཡིན།

ལྔ་བ། རྒྱ་རིགས་དམངས་གཙོ་དོན་གཉེར་བ་ཚོའི་ཁྲོད་དུ། གལ་ཏེ་རྒྱ་ནག་སྲིད་གཞུང་ལ་བཅོས་བསྒྱུར་མ་ཕྱིན་པ་ཡིན་ན། བོད་རང་དབང་ལ་རེ་བ་མེད་པའི་བསམ་ཚུལ་གཅིག་མཐུན་ཞིག་འདུག དེ་བས་ང་ཚོས་ཐོག་མར་རྒྱ་ནག་གི་དམངས་གཙོ་བཅོས་བསྒྱུར་ལ་འབད་བརྩོན་བྱེད་དགོས། རྒྱུ་མཚན། བསམ་ཚུལ་འདི་ལ་བདེན་པའི་ཆའང་ཡོད་མོད་ཀྱང་། ངས་ནི་རྒྱ་ནག་དཀྱིལ་སྙིང་དུ་འཛིན་པའི་ལངས་ཕྱོགས་འཛིན་མི་འདོད་ལ། རྒྱ་རིགས་མི་མང་ནང་རྒྱ་ནག་ཧན་མི་རིགས་ཀྱི་བསམ་ཕྱོགས་ཁྱབ་སྤེལ་བྱེད་མི་འདོད། བོད་ཀྱི་དཀའ་རྙོག་སེལ་རྒྱུ་ནི་ལས་སླ་བ་ཞིག་གཏན་ནས་མ་རེད། དེ་བས་རྒྱ་ནག་གི་དམངས་གཙོའི་ལམ་ལུགས་དགོས་མཁོ་ཞིག་ཡིན་ནའང་། དེ་དམངས་གཙོ་ཡང་དག་ཅིག་ཏུ་བཅོས་བསྒྱུར་གཏང་རྒྱུ་ནི་ད་དུང་ཐག་རིང་པོ་རེད། དེར་བརྟེན་ང་ཚོས་མུ་མཐུད་ནས་འབད་བརྩོན་བྱས་ཏེ་རྒྱ་ནང་གི་རྒྱ་རིགས་ཚོར་བོད་ཀྱི་དངོས་ཡོད་གནས་ཚུལ་ལ་ངེས་ཤེས་བསྐྱེད་དགོས་པ་དང་། བོད་རྒྱ་མི་རིགས་གཉིས་ཀྱི་མ་འོངས་པར་སེམས་གཏང་ནས་གྲོང་གླེང་གྲོས་མོལ་བྱེད་དགོས། འདས་པའི་མི་ལོ་ ༢༦ རིང་ངས་ལས་དོན་འདིའི་ཐོག་འབད་བརྩོན་བྱས་ཡིན་ལ། མ་འོངས་པར་ཡང་མུ་མཐུད་བོད་རྒྱ་མི་མང་ནང་ལས་དོན་འདི་རྒྱུན་འཁྱོངས་དང་བགྲོ་གླེང་གྲོས་བསྡུར་བྱ་རྒྱུ་ཡིན།

དྲུག་པ། དེང་སྐབས་མི་མང་གིས་ཏཱ་ལའི་བླ་མ་འཚོ་བཞུགས་མ་གནང་བའི་དུས་སྐབས་ཤིག་གླེང་སློང་བྱེད་བཞིན་འདུག ང་རང་སྒེར་ངོས་ནས་བལྟས་ན། དེ་ཡང་ལམ་ཐག་རིང་པོ་ཞིག་ཡིན་ནའང་། ཉི་འོད་ཁྲོད་རྩྭ་སྐམ་རྒྱུ་ནི་ཧ་ཅང་ལེགས་པར་མཐོང་། ཕྱིས་སུ་༧གོང་ས་མཆོག་འཚོ་བཞུགས་མ་གནང་ནའང་། སྐབས་དེར་ང་ཚོས་དྲང་བདེན་བརྩོན་ལེན་བྱ་ཐུབ། ང་རང་ལ་མཚོན་ན། དཀའ་རྙོག་འདི་སེལ་བའི་ཐབས་ལམ་ཡག་ཤོས་དེ་༧གོང་ས་མཆོག་གི་བཀའ་སློབ་ལམ་སྟོན་འོག་བཏོན་གནང་བའི་དམངས་གཙོའི་ལམ་ལུགས་འདི་ཕྱི་གསལ་ནང་གསལ་གྱི་སྒོ་ནས་འགན་སྲུང་དང་ལག་བསྟར་བྱ་རྒྱུ་དེ་རེད་འདོད།

བོད་ཀྱི་གནད་དོན་འདི་འགྲོ་བ་མིའི་རིགས་ལ་འཕྲད་བཞིན་པའི་དཀའ་སྡུག་ཅིག་ཡིན་ཞིང་། དེ་ཡང་བོད་རྒྱ་མི་རིགས་གཉིས་དང་འཛམ་གླིང་དབུ་ཁྲིད་ཚོ་གཙོས་པའི་འགྲོ་བ་མིའི་ཀུན་སྐྱོད་དང་དཔྱོད་ཤེས་ལ་ཚོད་རྒྱུགས་ཐེངས་གཅིག་བཏང་བ་ཞིག་རེད།

ངས་གོང་དུ་བཤད་པ་ཚང་མ་བོད་མིའི་རང་ཐག་རང་གཅོད་ཀྱི་ཐོབ་ཐང་ལ་བརྩི་མཐོང་དང་། གཉིས་སྨན་དབུ་མའི་ལམ་ནས་བོད་རྒྱ་འོག་ནས་ཐར་རྒྱུ། རྒྱ་ནག་དང་རྒྱལ་སྤྱིའི་སྤྱི་ཚོགས་དང་ལྷན་དུ་འཚེ་མེད་ཞི་བའི་ལམ་ནས་དྲང་བདེན་བརྩོན་ལེན་དང་། གཞིས་ལུས་བོད་མིའི་སྐད་ཡིག་རིག་གཞུང་དང་སྐྱེས་ཁམས་ཁོར་ཡུག་སྲུང་སྐྱོབ། ཡང་དག་པའི་དམངས་གཙོའི་ལམ་ལུགས་ལག་བསྟར་བྱེད་རྒྱུ་དང་། དེ་ཡང་ཐོག་མར་ང་ཚོ་ཚང་མིའི་ནུས་པ་མཉམ་སྤོང་གིས་རྒྱ་ནག་ནང་དམངས་གཙོ་བཅོས་བསྒྱུར་ཡོང་བར་འབད་བརྩོན་བྱེད་རྒྱུ་ནི་ཏཱ་ལའི་བླ་མ་འཚོ་བཞུགས་ཀྱི་སྔ་རྗེས་གང་དུའང་ང་ཚོས་ངེས་པར་སྒྲུབ་དགོས་པའི་ལས་འགན་ཡིན་སྐོར་བརྗོད་སོང་།

འགྲོ་བ་མིའི་ཐོབ་ཐང་གི་ཁྲིམས་རྩོད་པ་ཐིང་པོ་ (Teng Biao) ཡིས་བརྗོད་པ་ལྟར་ན། རྒྱ་ནག་དམར་ཤོག་ཚོགས་པའི་སྟངས་འཛིན་འོག་རྒྱ་ནང་དུ་དམངས་གཙོ་མེད་པའི་རྐྱེན་གྱིས། རྒྱ་ནག་གི་དཔོན་རིགས་ཚོར་རྒྱ་ནང་གི་སྤྱི་མང་བདེ་འཇགས་ཐད་སེམས་འཚབ་ཆེ་རུ་འགྲོ་བཞིན་པ་མངོན་གསལ་དོད་པོ་ཆགས་ཡོད་པ་དང་། རྒྱ་ནང་གི་དངོས་ཡོད་གནས་ཚུལ་རྟོགས་ཞིབ་བྱེད་ས་གཙོ་བོ་གནས་འཕྲིན་བརྒྱུད་ལམ་ཁག་ཆགས་ཀྱི་ཡོད་སྟབས། རྒྱ་ནག་གཞུང་གིས་སྤྱི་ཚོགས་གནས་འཕྲིན་བརྒྱུད་ལམ་ཁག་བཀག་སྡོམ་དང་དངོས་ཡོད་གནས་ཚུལ་ནག་བསུབ་གཏོང་གི་ཡོད་ཅིང་། རྒྱ་ནང་གི་ཆོས་འཁོར་རྩ་རླུང་སྒོམ་སྒྲུབ་ཚོགས་པ་དང་བོད་ཀྱི་གནད་དོན་བཅས་ནི་ཚོར་བ་སྐྱེན་ཤོས་ཀྱི་གནས་སྟངས་ཤིག་ཆགས་བསྡད་ཡོད་པ་དང་། ཁོ་རང་འགྲོ་བ་མིའི་ཐོབ་ཐང་གི་ཁྲིམས་རྩོད་པ་ཞིག་ཡིན་པའི་ཆ་ནས། ཁོང་ལ་གནད་དོན་དེ་ཚོའི་ཐོག་འགན་ཆེན་པོ་ཡོད་པ་དང་། ཕྱི་ལོ་ ༢༠༡༥ ལོར་རྒྱ་ནག་གཞུང་གིས་རྒྱ་ནང་གི་འགྲོ་བ་མིའི་ཐོབ་ཐང་ཁྲིམས་རྩོད་པ་ ༢༠༠ ལྷག་འཛིན་བཟུང་བཀག་བསྐྱིལ་བྱས་ཡོད་པ་དང་། དེ་བཞིན་བོད་དང་སོག་པོ། ཡུ་གུ་དང་ཧོང་ཀོང་། ཐའེ་ཝན་བཅས་མཉམ་འབྲེལ་གྱིས་ཐོག་རྒྱ་ནང་གི་དམངས་གཙོ་བཅོས་བསྒྱུར་བརྩོན་ལེན་བྱེད་དགོས་སྐོར་སོགས་བརྗོད་སོང་།

ཧྥ་རན་སིའི་གསར་འགོད་པ་ལྕམ་ཨོར་སུ་ལ་གྷུ་ཐེར་ (Ursula Gauthier) ལགས་ཀྱིས་བརྗོད་དོན་ལྟར་ན། རྒྱ་ནང་དུ་ལོ་རེའི་སུམ་ཅུ་དུས་དྲན་ཕུད་ཕྱི་གླེང་བ་དང་རྒྱ་རིགས་ཚོ་བོད་ཁུལ་དུ་འགྲོ་འོང་ཆོག་གི་ཡོད་ཀྱང་། ཕྱི་གླིང་གི་གསར་འགོད་པ་དང་རྟོགས་ཞིབ་ཚོགས་ཁག་བོད་ཁུལ་དུ་འགྲོ་འོང་བྱེད་རྒྱུ་ཁག་པོ་ཆགས་ཡོད་པ་དང་། ཁོ་མོ་ཐེངས་འགར་ཨ་མདོའི་ཕྱོགས་སུ་འགྲུལ་སྐྱོད་བྱས་ཡོད་ནའང་། གནད་འགག་གི་ལྟེ་གནས་དང་ས་ཁུལ་ཁག་ཏུ་འགྲོ་དུས་ནམ་ཡིན་ཡང་ཁོང་མོའི་རྗེས་སུ་རྒྱ་ནག་གཞུང་གིས་ཆེད་གཏོང་བྱས་པའི་ལྟ་རྟོག་བྱེད་མཁན་གྱི་རླངས་འཁོར་ཞིག་ཡོད་ཡོད་པ་ཡིན་པ་དང་། ཕྱི་གླིང་གི་གསར་འགོད་པ་ཚོ་རང་དབང་གི་སྒོ་ནས་བོད་ཁུལ་དུ་འགྲོ་འོང་དང་གནས་ཚུལ་རྒྱུས་ལོན་མི་ཆོག་པར། ཁོ་ཚོ་རྒྱ་རིགས་སྐད་སྒྱུར་བ་ཚོ་དང་མཉམ་དུ་ས་གནས་གང་དུ་འགྲོ་བ་དང་མི་སུ་ལ་ཐུག་འཕྲད་བྱེད་རྒྱུ་སོགས་རྒྱ་ནག་གཞུང་གིས་གོ་སྒྲིག་དོ་དམ་བྱེད་ཀྱི་ཡོད་པ་མ་ཟད། སྐད་སྒྱུར་བ་དེ་ཚོར་ཡང་འགན་ཆེན་པོ་སྤྲད་ཡོད་པ་དང་། བོད་ནང་དུ་ཞིབ་བཤེར་གྱི་ས་ཚིགས་ཧ་ཅང་མང་པོ་ཡོད་ཅིང་། ཞིབ་བཤེར་ས་ཚིགས་དེ་ཚོ་ཆུ་ཚོད་ག་ཚོད་སྟེང་བརྒལ་ཐུབ་ཀྱི་ཡོད་པ་དང་དེ་ཅི་ལྟར་བརྒལ་ཐུབ་ཀྱི་ཡོད་པ་སོགས་ཁོང་མོའི་ཉམས་མྱོང་གི་ཐོག་ནས་བརྗོད་སོང་།

ཧོང་ཀོང་གི་དམངས་གཙོ་དོན་གཉེར་བ་ལྕམ་ཧང་ཏུང་ཆོ་ (Hang Tung Chow) ལགས་ཀྱིས་བརྗོད་དོན། ཁོང་མོ་ཆུང་དུས་ཕ་མ་གཉིས་ཀྱིས་ཁྲིད་ནས་ཧོང་ཀོང་ནང་བཙན་བྱོལ་དུ་འགྲོ་དགོས་བྱུང་བ་དང་། བཙན་བྱོལ་དུ་འགྲོ་སྟངས་དེ་ཡང་བོད་པ་ཚོས་རི་བོ་ཧི་མ་ལ་ཡ་བརྒལ་ཏེ་བཙན་བྱོལ་དུ་འགྲོ་བ་ནང་བཞིན། སྐབས་དེར་ཁོ་ཚོས་ཀྱང་རྒྱ་ནག་གི་མཚོ་ཐོག་དམག་མིའི་མེ་དམའི་ཁ་ནས་རང་སྲོག་བློས་བཏང་སྟེ་འགྲོ་གི་ཡོད་པ་དང་། མཚོ་ཐོག་དམག་གི་མེ་མདའི་ཁ་ནས་མི་མང་པོའི་གཅེས་སྲོག་ཤོར་ཡོད་པ་དང་། ཧོང་ཀོང་བ་ཚོའི“ཉི་གདུག་འོག་གི་གསར་བརྗེ”སོགས་ཀྱི་ལས་འགུལ་ལ་བརྟེན་ནས་ཧོང་ཀོང་གི་རང་བཙན་བརྩོན་ལེན་བྱེད་ཀྱི་ཡོད་པ་དང་། ཁོ་ཚོས་ཧོང་ཀོང་གི་རང་བཙན་བརྩོན་ལེན་བྱེད་དོན་ནི་ཁོ་ཚོ་ཡང་བསྐྱར་རྒྱལ་ཁབ་གཞན་ཞིག་གི་ནང་སྐྱབས་བཅོལ་དུ་འགྲོ་འདོད་མེད་སྐོར་བརྗོད་སོང་།

ཁ་ན་ཌའི་མཛངས་མ་ཨ་ན་སི་ཊ་ཤེ་ཡ་ལིན་ (Anastasia Lin) ལགས་ཀྱིས། ཁོ་མོ་རྒྱ་ནང་དུ་སྐྱེས་ཤིང་སྔོན་ཆད་རྒྱ་ནང་གི་སློབ་གྲྭར་འགྲོ་སྐབས། འཛིན་གྲྭའི་རྒན་བདག་ཡིན་ཞིང་། སྐབས་དེར་ཁོ་མོས་སློབ་མ་ཚོར་དམར་ཤོག་ཚོགས་པའི་ཆབ་སྲིད་ཀྱི་གོ་རྟོག་སྤེལ་མྱོང་བ་དང་། སྐབས་དེར་ཁོ་མོས་བོད་ཀྱི་གནད་དོན་དང་ཆོས་འཁོར་རྩ་རླུང་སྒོམ་སྒྲུབ་ཚོགས་པའི་གནད་དོན་སོགས་ཅི་ཡང་མི་ཤེས་ནའང་། ཕྱིས་སུ་ཁོ་མོ་ཨ་ལགས་ཀྱིས་ཁྲིད་དེ་ཁ་ན་ཊར་ཕྱིན་རྗེས། ཨ་མ་ལགས་ཀྱིས་ཁོ་མོར་རྒྱ་ནག་གཞུང་གིས་རྒྱ་ནང་གི་ཆོས་འཁོར་རྩ་རླུང་སྒོམ་སྒྲུབ་ཚོགས་པར་དམ་དྲག་བྱས་པའི་སྐོར་ཀྱི་འོད་སྡེར་ཞིག་སྤྲད་ཡོད་པ་དང་། ཁོ་མོས་འོད་སྡེར་དེའི་ནང་གི་དངོས་ཡོད་གནས་ཚུལ་དང་རྒྱ་ནག་གཞུང་གིས་སྤྱི་ཚོགས་བརྒྱུད་ལམ་ཁག་ཏུ་དྲིལ་བསྒྲགས་བྱེད་པའི་གནས་ཚུལ་གཉིས་བར་གྱི་ཧེ་བག་མཐོང་བ་དང་། ཁོ་མོ་རྦད་དེ་ཧ་ལས་ཧ་སང་ཡོད་སྐོར་དང་། ཁ་ན་ཊ་རུ་ཁོ་མོས་རྒྱ་ནང་གི་འགྲོ་བ་མིའི་ཐོབ་ཐང་གླེང་སློང་བྱས་པར་བརྟེན། རྒྱ་ནག་གཞུང་དང་རྒྱ་ནང་གི་རྒྱ་རིགས་ཚོས་ཁོ་མོར་ཁ་རྡུང་དྲག་པོ་གཏོང་གི་ཡོད་པ་མ་ཟད། རྒྱ་ནང་གི་ཁོ་མོའི་ཨ་ཕ་ལགས་དང་ཁོ་མོ་གཉིས་བར་གྱི་ཕ་བུའི་འབྲེལ་བ་སྡུག་ཏུ་ཕྱིན་ཡོད་པ་དང་། དེ་ཡང་རྒྱ་ནང་གི་རྒྱ་རིགས་ཚོས་དངོས་ཡོད་གནས་སྟངས་མ་ཤེས་པའི་རྐྱེན་གྱིས་ཡིན་ཞིང་། རྒྱ་ནང་གི་རྒྱ་རིགས་ཚོར་དངོས་ཡོད་གནས་སྟངས་ཧ་གོ་བའི་ཐོབ་ཐང་མེད་སྐོར་སོགས་བརྗོད་སོང་།

མཇུག་ཏུ་དྲི་བ་དྲིས་ལན་སྐབས་སུ། གསར་འགོད་པ་ཞིག་གིས་འབུམ་རམ་པ་ཡང་ཅིན་ལེན་གྱིས་གཏམ་བཤད་སྐབས་སུ། ཁོས་བོད་རང་དབང་ཞེས་བརྗོད་པ་དེ་གང་འདྲ་ཞིག་ལ་ངོས་འཛིན་གནང་གི་ཡོད་མེད་དྲིས་སྐབས། ཡང་ཅིན་ལེན་གྱིས་བོད་རང་དབང་ཟེར་བ་དེ་ཁོས་དོན་དག་གཉིས་ཀྱི་ཐོག་ནས་ངོས་འཛིན་བྱེད་ཀྱི་ཡོད་པ་དང་། དང་པོ་དེ། བོད་མིའི་ཆོས་དང་རིག་གཞུང་། སྐད་ཡིག་སོགས་ཉིན་རེའི་འཚོ་གནས་ལ་རང་དབང་ཡོད་པ་ཞིག་དང་། གཉིས་པ་དེ། བོད་པ་ཡང་མི་ཡིན་པའི་ཆ་ནས། འཛིན་སྐྱོང་གི་སྒྲིག་གཞིའི་ཐད་ནས་བོད་རང་སྐྱོང་དང་བོད་རང་བཙན་གང་བྱ་མིན་དེ་བོད་མི་ཚོ་སོ་སོའི་རང་དབང་གི་འདམ་ག་ཞིག་ཡིན་སྐོར་བརྗོད་བྱུང་།

གསར་འགོད་པ། པདྨ་རྒྱལ།