མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

སྲིད་སྐྱོང་བློ་བཟང་སེང་གེ་མཆོག་གི་དམ་འབུལ་གསུང་བཤད།

བོད་ཀྱི་དུས་བབ།
༢༠༡༦/༠༥/༢༧
Share on FacebookShare on TwitterShare on EmailShare on Whatsapp

དེ་རིང་སྔ་དྲོའི་ཆུ་ཚོད་ ༩།༣༠ སྟེང་། དྷ་ས་ཐེག་ཆེན་ཆོས་གླིང་གཙུག་ལག་ཁང་གི་ཆོས་རྭར། སྐབས་བཅུ་བཅོ་ལྔ་པའི་བཀའ་ཤག་གི་སྲིད་སྐྱོང་བློ་བཟང་སེང་གེ་མཆོག་གིས་ལས་ཡུན་གཉིས་པའི་ལས་འཁུར་དམ་འབུལ་མཛད་སྒོ་ཚོགས་པའི་སྟེང་། སྐུ་མགྲོན་གཙོ་བོ་བོད་མི་ཡོངས་ཀྱི་སྐྱབས་མགོན་༧རྒྱལ་བ་རིན་པོ་ཆེ་མཆོག་དབུ་བཞུགས་ཐོག སྲིད་སྐྱོང་མཆོག་གིས་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གི་མདུན་དུ་དམ་འབུལ་དང་ལས་འཁུར་མཚན་རྟགས་བསྐྱོན།

tibettimes-3

སྲིད་སྐྱོང་བློ་བཟང་སེང་གེ་མཆོག་གིས་གསུང་བཤད་གནང་དོན། “གུས་ནས་དེ་རིང་སྲིད་སྐྱོང་གི་ལས་ཡུན་གཉིས་པ་དམ་འབུལ་ཞུས་པའི་སྐབས་འདིར། བོད་མིའི་བླ་ན་མེད་པའི་དབུ་འཁྲིད་༧སྤྱི་ནོར་གོང་ས་༧སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་བ་བཏབ་པ་ལྟར། བདག་ཅག་བོད་འབངས་རྣམས་ཐུགས་རྗེའི་སྐྱབས་འོག་ནས་ནམ་ཡང་འདོར་བ་མེད་པར་ཐུགས་བརྩེ་བ་ཆེན་པོས་དམ་འབུལ་གྱི་མཛད་སྒོའི་ཚོགས་མགོན་དུ་ཆིབས་སྒྱུར་བཀྲིན་བསྐྱངས་པར་གུས་ནས་ལྷ་ཕྱག་གྲངས་མེད་དང་བཅས་སྙིང་ཐག་པ་ནས་བཀའ་དྲིན་བླ་མེད་དུ་ཆེ་ཆེ་ཞེས་ལན་བརྒྱར་ཞུ་རྒྱུ་དང་། ༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་བརྒྱ་དང་བཅུ་གསུམ་བར་བཞུགས་རྒྱུའི་བཀའ་བཞེས་བཟང་པོ་ཡོད་པ་བཞིན་མགོན་པོ་གང་ཉིད་ཀྱི་སྐུ་ཚེའི་རིང་བོད་མིའི་མངོན་འདོད་འགྲུབ་ཐུབ་པ་ཡོང་ཆེད་བཀའ་ཤག་གི་ངོས་ནས་འབད་བརྩོན་ཞུ་སྒོ་ཅི་མཆིས་འཐུས་ཤོར་མེད་པ་ཞུ་རྒྱུའི་དམ་བཅའ་འབུལ་རྒྱུ་ཡིན།

འདས་པའི་མི་ལོ་དྲུག་ཅུ་ལྷག་རིང་བོད་ཀྱི་ལོ་རྒྱུས་ནང་ཛ་དྲག་གི་གནས་སྟངས་ཆུ་གཉེར་བཞིན་གཅིག་རྗེས་གཉིས་མཐུད་ཀྱི་རུ་འཛིངས་པའི་སྐབས་སུ་༧གོང་ས་༧སྐྱབས་མགོན་ཆེན་པོ་མཆོག་ནས་ཐུགས་བརྩེ་བ་ཆེན་པོའི་སྒོ་ནས་དཀའ་བ་བརྒྱ་ཕྲག་ཁྱད་དུ་བསད་ནས་བོད་མི་མང་ལ་ཡང་དག་པའི་དབུ་འཁྲིད་ལམ་སྟོན་གནང་བ་དང་། ཁྱད་པར་བཙན་བྱོལ་བོད་མིའི་མང་གཙོའི་ལམ་ལུགས་སྲོལ་གཏོད་གནང་བ་བཅས་ཀྱི་བཀའ་དྲིན་ནི་བསྐལ་བའི་བར་དུ་ཡང་གཞལ་ཐབས་བྲལ་བ་ཡིན།

བཙན་བྱོལ་རྒྱ་ཆེའི་མང་ཚོགས་ནས་གུས་པར་སྲིད་སྐྱོང་གི་ལས་ཡུན་གཉིས་པ་ཞབས་ཕྱི་ཞུ་རྒྱུའི་གོ་སྐབས་གནང་བར་གུས་བརྩིའི་སྒོ་ནས་སྙིང་ཐག་པ་ནས་ཐུགས་རྗེ་ཆེ་ཞུ་བ་དང་ཆབས་ཅིག རང་ནུས་གང་ལྕོགས་ལྷག་བསམ་རྣམ་དག་གི་སྒོ་ནས་ཞབས་ཞུ་བྱ་རྒྱུའི་ཁས་ལེན་ཞུ་རྒྱུ་ཡིན་ན། གཞིས་བྱེས་རྒྱ་ཆེའི་མང་ཚོགས་ནས་ཀྱང་བོད་རིགས་སྤྱི་བོ་གནམ་བསྟན་ཡོངས་སུ་རྫོགས་པ་ཆོལ་ཁ་དང་ལུང་ཚན་ཆོས་ལུགས་བཅས་ཀྱི་དབྱེ་བ་མེད་པར་ཕུགས་ཀྱི་བསམ་འདུན་གཅིག་གྱུར་ཡིན་པ་དང་། ཤ་ཁྲག་གཅིག་པའི་བོད་རིགས་སྤུན་ཟླ་ཡིན་པའི་འདུ་ཤེས་བརྟན་པོར་བཟུང་སྟེ་མུ་མཐུད་རྒྱབ་སྐྱོར་དང་ཕྱྭར་གྲུ་མཉམ་འདེགས་གནང་བའི་རེ་བ་དང་ཡིད་ཆེས་གཙང་མ་ཞུ་གི་ཡོད།

ཕྱི་ལོ་ ༡༩༥༩ ལོར་བཙན་བྱོལ་དུ་ཕེབས་རྗེས་༸གོང་ས་༸སྐྱབས་མགོན་ཆེན་པོ་མཆོག་ནས་ཆོལ་ཁ་དང་ཆོས་བརྒྱུད་དབྱེ་བ་མེད་པར་བཙན་བྱོལ་ནང་བོད་མིའི་སྒྲིག་འཛུགས་མུ་མཐུད་འཛུགས་རྒྱུའི་གསལ་བསྒྲགས་གནང་བ་མ་ཟད། རིམ་བཞིན་སློབ་གྲྭ་དང་། གཞིས་ཆགས། རིས་མེད་ཆོས་སྒར་ཁག་དང་བཅས་པ་གསར་འཛུགས་གནང་བ་དང་། ཆོལ་གསུམ་བོད་རིགས་ཡོངས་རྫོགས་དམ་ཚིག་རྡོག་རྩ་གཅིག་སྒྲིལ་ལྕགས་ཀྱི་གོང་བུ་ལྟ་བུར་གནས་གལ་ཆེ་བའི་བཀའ་སློབ་དང་ལམ་སྟོན་ཡང་ཡང་ཕེབས་པ་བཅས་ལ་བརྟེན་ནས། ད་བར་བོད་མིའི་གཅིག་སྒྲིལ་གྱི་ནུས་ཤུགས་ཇེ་ཆེར་འགྲོ་བཞིན་པ་ཡིན་ནའང་། རང་ཉིད་སྒེར་ངོས་ནས་བློ་ཕམ་ཆེན་པོའི་སྒོ་ནས་ཞུ་རྒྱུར། ད་ལན་སྲིད་སྐྱོང་དང་སྤྱི་འཐུས་ཀྱི་འོས་བསྡུ་ཆེན་མོའི་བརྒྱུད་རིམ་ཁྲོད་བོད་མི་ནང་ཁུལ་ཕན་ཚུན་སྐྱོན་བརྗོད་དང་། བོད་མིའི་ཡ་རབས་བཟང་སྤྱོད་དང་འགལ་བའི་བྱ་སྤྱོད་ཐལ་བ་སོགས་ལ་བརྟེན་ནས་༧གོང་ས་༧སྐྱབས་མགོན་ཆེན་པོ་མཆོག་གང་ཉིད་ལ་ཐུགས་དམ་སད་རྐྱེན་ཅི་ཆེར་བྱུང་བ་དང་། གུས་ཅག་རྣམས་ནས་མ་ཤེས་པ་དང་བག་མེད་པའི་དབང་གིས་ཉེས་འཛོལ་དང་ནོངས་འགལ་ཇི་བྱུང་ལ་གནོངས་འགྱོད་དྲག་པོས་སྙིང་ནས་བཟོད་གསོལ་དང་མཐོལ་བཤགས་ལན་བརྒྱར་ཞུ་རྒྱུ་ཡིན། སླད་ཕྱིན་ཐུགས་ཕམ་འགྱུར་གཞི་དེ་རིགས་གཏན་ནས་མི་ཡོང་བའི་ཁས་ལེན་དམ་བཅའ་བརྟན་པོ་ཞུ་རྒྱུ་དང་། བོད་མི་ནང་ཁུལ་ཆོལ་ཁ་དང་ཤོག་ཁག་ཕྱོགས་སྒྲིལ་མེད་པར་མཐུན་ལམ་རྡོག་རྩ་གཅིག་སྒྲིལ་དགོས་པའི་འབོད་སྐུལ་ཤུགས་དྲག་ཞུ་རྒྱུ་ཡིན། དེ་མཚུངས་མ་འོངས་པར་འོས་བསྡུའི་ཁྲིམས་སྒྲིག་ཁག་ལ་ལེགས་བཅོས་ཇི་དགོས་དབུས་འོས་བསྡུ་ལས་ཁང་དང་གོ་བསྡུར་གྱིས་བསྐྱར་བཅོས་ཡོང་ཐབས་འབད་བརྩོན་བྱ་རྒྱུ་ཡིན།

འདས་པའི་ལོ་ལྔའི་རིང་ལས་འཁྱུར་ཟིན་པའི་བཀའ་ཤག་སྐབས་བཅུ་བཞི་པའི་བཀའ་བློན་ལས་རོགས་རྣམས་ནས་ཆབ་སྲིད་དང་འཛིན་སྐྱོང་གི་ལས་དོན་གང་ཅིའི་ཐོག་ནུས་པ་མཉམ་སྤུངས་ཀྱི་སྒོ་ནས་ཕྱག་ལས་གནང་བ་དང་། བོད་བསྟན་སྲིད་མི་རིགས་གཉན་འཕྲང་ཆེ་བའི་དུས་སྐབས་འདིར་སྤྱི་པའི་རྩ་དོན་སྙིང་ལ་བཅང་སྟེ་ཐུགས་ཁུར་ཆེན་པོས་ཞབས་ཞུ་གནང་བར་ལེགས་གསོལ་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་ཉིན་རེའི་འཛིན་སྐྱོང་གི་ལས་དོན་འགན་ཁུར་རྐང་ལེན་ཞུ་མཁན་སྲི་ཞུ་ལས་བྱེད་རྣམས་ལའང་ཐུགས་རྗེ་ཆེ་ཞུ་འདོད་བྱུང་།

འབྱུང་འགྱུར་བཀའ་ཤག་སྐབས་བཅོ་ལྔ་པའི་ལས་ཡུན་རིང་སྔར་བཞིན་གཅིག་སྒྲིལ་དང་། གསར་གཏོད། རང་ཁ་རང་གསོ་བཅས་ཀྱི་གཞི་རྩའི་ལྟ་གྲུབ་གསུམ་རྒྱབ་རྟེན་དུ་བཟུང་སྟེ་བཀའ་ཤག་སྐབས་བཅུ་བཞི་པའི་རིང་ལས་འཆར་མང་དག་ཅིག་བསྒྲིགས་ཡོད་པ་རྣམས་མུ་མཐུད་མཇུག་སྐྱོང་ཐོག ཆབ་སྲིད་དང་འཛིན་སྐྱོང་གི་ལས་དོན་སྔར་ལྷག་ནུས་པ་ཐོན་པ་ཡོང་ཆེད་ལས་གཞི་གསར་པ་ཇི་དགོས་དུས་ནས་དུས་སུ་བརྟག་ཞིབ་ཟབ་ནན་གྱིས་འབད་བརྩོན་ཞུ་རྒྱུ་ཡིན།

ཉེ་སྔོན་༧གོང་ས་༧སྐྱབས་མགོན་ཆེན་པོ་མཆོག་ནས་བཙན་བྱོལ་བོད་མིའི་སྤྱི་ཚོགས་ནང་ནད་རིགས་སྔོན་འགོག་དང་ཉམ་ཐག་ལྟ་སྐྱོང་ཐད་འཐུས་ཤོར་ཕྱིན་གནས་བཀའ་སློབ་ལམ་སྟོན་ཕེབས་པ་ལྟར། འཐུས་ཤོར་ཕྱིན་པའི་རྐྱེན་ཇི་ཡིན་དང་། མ་འོངས་པར་ཡར་རྒྱས་གཏོང་ཕྱོགས་ཇི་དགེ་ཞིབ་འཇུག་སླད་ཆེས་མཐོའི་ཞིབ་འཇུག་ཚོགས་ཆུང་ཁག་གཉིས་བསྐོ་འཛུགས་ཟིན་པ་དང་། འཕྲོད་བསྟེན་སྐོར་དངོས་སུ་ལས་དོན་འགན་ཁུར་ཞུ་མཁན་སྨན་པ་དང་འགན་འཛིན་ལས་སྣེ་ཡོངས་ཀྱི་ཚོགས་ཆེན་ཞིག་ཀྱང་བསྐོང་ཚོགས་ཀྱིས་བསམ་འཆར་བསྡུ་ལེན་ཞུས་ཟིན་པ་ཡིན་ཞིང་། རིང་མིན་ཚོགས་ཆུང་ཁག་གི་སྙན་ཐོ་འབྱོར་འཕྲལ་བཀའ་ཤག་གི་ངོས་ནས་ལག་ལེན་དོན་འགེལ་ཞུ་སྒོ་གང་མཆིས་ཞུ་རྒྱུ་དང་། དེའི་ཆེད་འགྲོ་གྲོན་ཇི་དགོས་ཐབས་འཚོལ་ཞུས་ཏེ་ལས་གཞི་དེ་དག་ལེགས་འགྲུབ་ཐུབ་པ་ཞུ་རྒྱུ་ཡིན། དེ་མཚུངས་རང་རེའི་སྤྱི་ཚོགས་ནང་དོལ་རྒྱལ་རྗེས་འབྲང་བ་ཉུང་ཤས་ཤིག་ནས་ཆོས་ཁ་ལ་འཁྱེར་ནས་དོན་དུ་ཕ་རོལ་པོའི་གཡོ་བྱུས་འོག་ཚུད་དེ་གཞིས་བྱེས་བོད་མི་ཡོངས་ཀྱི་བླ་སྲོག་༧གོང་ས་༧སྐྱབས་མགོན་ཆེན་པོར་གཞི་མེད་སྒྲོ་སྐུར་གྱི་མཚན་སྨད་གང་བྱུང་ཞུ་བཞིན་པ་དང་། བོད་མི་ནང་ཁུལ་དང་བོད་རྒྱུད་ནང་བསྟན་གྱི་ཆོས་བརྒྱུད་ནང་ཕན་ཚུན་ཐུགས་སྣང་མི་མཐུན་པ་བཟོ་བཞིན་པ་བཅས་ལ་གདོང་ལེན་ཡན་པོར་མ་སོང་བ་བྱ་རྒྱུ་ཡིན།

ཁྱད་པར་༧གོང་ས་༧སྐྱབས་མགོན་ཆེན་པོའི་དགོངས་གཞི་ལྟར་བོད་མི་མང་སྤྱི་འཐུས་ལྷན་ཚོགས་ཀྱིས་སྤྱི་མོས་གྲོས་ཆོད་ཀྱི་ལམ་ནས་གཏན་ལ་ཕབ་པའི་གཉིས་སྨན་དབུ་མའི་ལམ་གྱི་སྲིད་བྱུས་མུ་མཐུད་ལག་བསྟར་ཞུ་རྒྱུ་བཀའ་ཤག་སྐབས་བཅོ་ལྔ་པའི་རྩ་དོན་གལ་འགངས་ཆེ་ཤོས་ལ་བརྩི་རྒྱུ་མ་ཟད། བོད་དོན་དཀའ་རྙོག་སེལ་ཐབས་སུ་གཉིས་སྨན་དབུ་མའི་ལམ་གྱི་ཐབས་བྱུས་ལས་ལྷག་མེད་པ་ད་བར་ལན་མང་ཞུས་ཟིན་པ་ལྟར། ཐབས་བྱུས་འདིའི་བརྒྱུད་རྒྱ་ནག་གཞུང་གི་སྐུ་ཚབ་དང་༧གོང་ས་༧སྐྱབས་མགོན་ཆེན་པོའི་སྐུ་ཚབ་དབར་གྲོས་མོལ་ཡོང་ཐབས་འབད་བརྩོན་སྔར་ལྷག་ཞུ་རྒྱུ་ཡིན། རྒྱ་ནག་གི་དབུ་འཁྲིད་ཚོས་བོད་དོན་དཀའ་རྙོག་སེལ་འདོད་དང་། བོད་རྒྱ་མི་རིགས་དབར་དོན་དམ་པའི་བརྟན་ལྷིང་དང་གཅིག་སྒྲིལ་ཡོང་ཐབས་བྱེད་ཀྱི་ཡོད་ན། གུ་དོག་མཁྲེགས་འཛིན་ཁོ་ན་མ་ཡིན་པར་བློ་རྒྱ་ཡངས་པོའི་སྒོ་ནས་དངོས་ཡོད་གནས་སྟངས་དང་འཚམས་པའི་སྲིད་བྱུས་ཡང་དག་པ་ཞིག་ལག་བསྟར་བྱ་རྒྱུའི་དུས་ལ་བབས་ཡོད།

ད་བར་བསྟན་སྲིད་མི་རིགས་ཀྱི་དོན་དུ་གཅེས་པའི་ལུས་སྲོག་ལོངས་སྤྱོད་བློས་བཏང་གནང་བའི་རྒྱལ་གཅེས་དཔའ་བོ་དཔའ་མོ་ཡོངས་དང་། ལྷག་དོན་བོད་ནང་ཕྱི་ལོ་ ༢༠༠༩ ནས་བཟུང་བོད་མི་ ༡༤༤ ཡིས་རང་ལུས་མེར་སྲེག་གནང་བའི་བློས་བཏང་རྣམས་མི་རབས་ནས་མི་རབས་བར་ང་ཚོས་ནམ་ཡང་བརྗེད་ཐབས་མེད་པ་དང་། ཁོང་རྣམས་ཀྱི་མངོན་འདོད་འགྲུབ་ཆེད་ཐབས་ཤེས་གང་ཐུབ་བྱ་རྒྱུ་ཡིན། དེ་མཚུངས་རྒྱ་ནག་གཞུང་གི་དམ་བསྒྲགས་འོག་རིས་མེད་ཆོས་སྒར་ཁག་ནང་ཡོད་པའི་ཆོས་བྱེད་གྲྭ་བཙུན་སྔགས་གསུམ་དང་། ཤེས་ཡོན་ཅན་དང་རྩོམ་པ་པོ། དགེ་རྒན་དང་སློབ་ཕྲུག གཞས་པ་དང་གཞས་མ། ཞིང་པ་དང་འབྲོག་པ་རྣམས་ནས་ཉིན་ལྟར་དཀའ་སྡུག་སྣ་ཚོགས་མྱོང་བཞིན་པར་ཇི་མི་སྙམ་པར་སྙིང་སྟོབས་ཞུམ་པ་མེད་པའི་སྒོ་ནས་མི་རིགས་ཀྱི་ལ་རྒྱ་བརྟན་པོ་འཛིན་བཞིན་པར་ཡི་རང་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། གྲངས་ཉུང་མི་རིགས་ཀྱི་རང་ཁྱིམ་རང་བདག་ཡང་དག་པ་ཞིག་ཡོང་བར་མི་རིགས་གཞན་དང་དཔུང་པ་མཉམ་གཤིབ་ཐུབ་པའི་ཤེས་ཡོན་གྱི་གནས་ཚད་ལོངས་ངེས་དགོས་སྟབས། མཐོ་སློབ་དང་གཙུག་ལག་སློབ་ཁང་ཁག་ནང་ཡོད་པའི་སློབ་ཕྲུག་རྣམས་གཙོ་བོར་གྱུར་པའི་བོད་རིགས་གཞོན་སྐྱེས་ཚོས་ཤེས་ཡོན་ཐོག་ནུས་ཤུགས་སྒྲིལ་དགོས་པའི་སྐུལ་མ་ཞུ་རྒྱུ་ཡིན།

མདོར་ན། རེ་བ་བཟང་ས་དང་གྲ་སྒྲིག་སྡུག་ས་ནས་བྱེད་དགོས་ཞེས་༧གོང་ས་༧སྐྱབས་མགོན་ཆེན་པོས་བཀའ་སློབ་ལམ་སྟོན་ཡང་ཡང་ཕེབས་པ་ལྟར། གུས་ནས་ནམ་རྒྱུན་ལོ་ལྔ་དང་ལྔ་བཅུའི་ཐབས་བྱུས་འགྲེལ་བརྗོད་ཞུས་པ་དྲན་སྐུལ་ཞུས་ན། འབྱུང་འགྱུར་ལོ་ལྔའི་ནང་གཉིས་སྨན་དབུ་མའི་ལམ་གྱི་སྲིད་བྱུས་ལ་བརྟེན་ནས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཐོབ་ཐབས་སུ་ཚང་མས་ནུས་ཤུགས་ཟོང་ཁ་གཅིག་ཏུ་བསྒྲིལ་ནས་འབད་བརྩོན་ཞུ་དགོས་པ་སྨོས་ཅི་དགོས། ཅི་སྟེ་ངེས་མེད་ཀྱིས་ལོ་མང་པོའི་བར་བོད་དོན་བདེན་མཐའ་གསལ་ཐབས་བྱ་དགོས་བྱུང་ན། འབྱུང་འགྱུར་ལོ་ལྔ་བཅུའི་བར་ང་ཚོའི་འཐབ་རྩོད་མུ་མཐུད་རྒྱུན་གནས་ཐུབ་པའི་ལས་འཆར་བསམ་ཞིབ་བྱ་གལ་ཆེ་བར་སོང་། ཕ་མེས་ནས་བརྒྱུད་པའི་བོད་མི་རིགས་ཀྱི་ཐུན་མོང་མ་ཡིན་པའི་ཆོས་རིག་གོམས་གཤིས་རྣམས་ཉམས་ཆག་མེད་པར་རྒྱུན་འཛིན་ཐུབ་པ་བྱ་རྒྱུ་དང་། ཤེས་ཡོན་དང་དཔལ་འབྱོར་གྱི་གནས་སྟངས་རང་རྐྱ་འཕེར་བའི་སྒོ་ནས་བོད་མིའི་སྒྲིག་འཛུགས་ཀྱི་ནུས་ཤུགས་གོང་འཕེལ་གཏོང་དགོས། སྔ་ཕྱི་མ་གཏོགས་རྒྱ་ནག་ནང་རིམ་བཞིན་འགྱུར་བ་འགྲོ་ངེས་ཡིན་པ་དང་། དེ་འདྲའི་འགྱུར་བ་བྱུང་མཚམས་བོད་མི་རྣམས་ལ་མ་མཐར་ཡང་རྨང་གཞིའི་རང་དབང་ལོངས་སུ་སྤྱོད་ཐུབ་པ་ཞིག་ཡོང་རྒྱུ་ཡིན། དེར་བརྟེན་འཕྲལ་ཕུགས་གཉིས་ཀའི་ལས་དོན་གལ་ཆེར་བརྩིས་ནས་འབད་བརྩོན་ཞུས་ན་འབྱུང་འགྱུར་ལོ་ལྔ་དང་ལྔ་བཅུ་གཉིས་ཀའི་གནས་སྐབས་སུ་རྒྱལ་ཁ་ལོན་ཐུབ་པ་ཡོང་རྒྱུ་ཡིན་པས་འདིའི་ཐད་ཚང་མས་ཐུགས་སྣང་གནང་རོགས་ཞེས་འབོད་སྐུལ་ཞུ་འདོད་བྱུང་།

བོད་མི་རིགས་ཀྱི་གནས་བབ་གཉན་འཕྲང་ཆེ་བའི་དུས་སྐབས་འདིར་རྒྱ་གར་གཞུང་མང་གཉིས་ནས་ད་བར་གཏོང་ཕོད་ཆེན་པོའི་སྒོ་ནས་མཐུན་འགྱུར་རོགས་རམ་གནང་བར་བཀའ་དྲིན་རྗེས་དྲན་ཞུ་རྒྱུ་དང་། དེ་མཚུངས་བོད་དོན་ལ་ཤ་ཚ་རྒྱབ་སྐྱོར་གནང་མཁན་གྱི་སྲིད་གཞུང་དང་། གྲོས་ཚོགས་ཀྱི་འཐུས་མི། ཚོགས་པ་དང་གང་ཟག་བྱེ་བྲག་པ་བཅས་ཡོངས་ལ་ཐུགས་རྗེ་ཆེ་ཞུས་པ་དང་ཆབས་ཅིག བོད་ཀྱི་གནད་དོན་ནི་བོད་མི་ས་ཡ་དྲུག་གི་བདེ་དོན་ཁོ་ན་ཙམ་མ་ཡིན་པར། དྲང་བདེན་དང་ཞི་བདེའི་གནད་དོན་གལ་ཆེན་ཞིག་ཀྱང་ཡིན་སྟབས་ཇི་སྲིད་བོད་དོན་བདེན་མཐའ་མ་གསལ་གྱི་བར་མུ་མཐུད་རྒྱབ་སྐྱོར་གནང་བའི་འབོད་སྐུལ་ཞུ་བཞིན་ཡོད།

མཐའ་དོན། ༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་ཅིང་། ཐུགས་བཞེད་མ་ལུས་ལྷུན་གྱིས་འགྲུབ་པ་དང་། བོད་དོན་བདེན་མཐའ་གསལ་ཏེ་གཞིས་བྱེས་མཉམ་འཛོམས་ཀྱི་སྐལ་བཟང་ཉི་མ་མགྱོགས་ནས་མྱུར་དུ་འཆར་བའི་སྨོན་འདུན་ཤུགས་དྲག་ཞུ་རྒྱུ་བཅས། སྲིད་སྐྱོང་བློ་བཟང་སེང་གེས་ཕྱི་ལོ་ ༢༠༡༦ ཟླ་ ༥ ཚེས་ ༢༧ ཉིན་སྤེལ།” ཞེས་འཁོད་འདུག

འབྲེལ་ཡོད་གསར་འགྱུར།

བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༩ པ་འཚོག་བཞིན་པ། ༢༠༢༥།༠༩།༢༩། དུས་བབ་ཀྱི་པར།
Mobile App

གཞོན་སྐྱེས་རྣམས་ཀྱིས་བོད་པ་གཅིག་ཡིན་བསམ་པའི་འདུ་ཤེས་ཀྱི་ཐོག་ནས་ནུས་པ་གཅིག་ཏུ་སྒྲིལ་བའི་འགན་འཁུར་དགོས་པའི་བཀའ་སློབ་བསྩལ།

ཆུ་ཚོད་ ༡༦ སྔོན་ལ།
Tibetan Children at China’s Colonial Boarding School in Nagchu area, Tibet
Mobile App

མི་རིགས་མཐུན་སྒྲིལ་གྱི་མིང་ཐོག་ནས་གྲངས་ཉུང་མི་རིགས་ཀྱི་སྐད་ཡིག་རིག་གཞུང་ལ་སྔར་ལས་བཙན་གནོན་བྱ་རྒྱུ་རེད།

ཆུ་ཚོད་ ༡༦ སྔོན་ལ།
China's former agriculture minister Tang Renjian (centre) received a suspended death sentence for bribery at a court in Jilin province on Sunday, Sep 28, 2025. (Photo: Changchun Intermediate People's Court)
Mobile App

རྒྱ་ནག་གི་ཞིང་ལས་བློན་ཆེན་ཟུར་བ་ཐང་རེན་ཅན་ལ་སྲོག་ཁྲིམས་བཅད།

ཆུ་ཚོད་ ༡༨ སྔོན་ལ།
Mobile App

རྒྱལ་སྤྱིའི་ནང་པའི་གླེང་སྟེགས་ཐོག་བོད་ཀྱི་བླ་ཆེན་དང་མཁན་པོ་ཁག་ཅིག་ཕེབས་ཐུབ་མི་འདུག

༢༠༢༥/༠༩/༢༨
Front Slider

In Conversation with Manuel Bauer — Photographer of His Holiness the Dalai Lama

༢༠༢༥/༠༩/༢༧
དགའ་ལྡན་ཁྲི་ཟུར་སྐྱབས་རྗེ་རྗེ་བཙུན་བློ་བཟང་བསྟན་འཛིན་མཆོག་དགོངས་པ་རྫོགས།
Mobile App

དགའ་ལྡན་ཁྲི་ཟུར་༸རྗེ་བཙུན་བློ་བཟང་བསྟན་འཛིན་མཆོག་དགོངས་པ་རྫོགས།

༢༠༢༥/༠༩/༢༦

མཆན། 8

  1. ལྷ་སའི་བུ་ says:
    ལོ་ 9 སྔོན།

    ༧སྐྱབས་མགོན་སྐུ་ཚེ་རིང་འཚོ་ཤོག། །སྲིད་སྐྱོང་བགེགས་མེད་ལམ་ལྷོང་ཤོག།
    །བདེན་ཉིད་མྱུར་དུ་རྒྱལ་བར་ཤོག། །གཞིས་བྱེས་མཉམ་འཛོམ་བཀྲ་ཤིས་ཤོག།

    Reply
  2. དཀར་ཆུང་། says:
    ལོ་ 9 སྔོན།

    མཆོག་གསུམ་དཔང་བརྩུགས་ཀྱིས་དམ་བཅའ་བརྟན་པོ་ཞུ་རྒྱུ་ཡིན། ཞེས་དམ་བཅའ་དེ་སྔའང་བཞག་པ་རེད། དཱ་འབྱུང་འགྱུར་ལས་ཡུན་རིང་མཐོལ་བཤགས་དང་། གནོང་འགྱོད། བཟོད་གསོལ་དང་ཐུགས་ཕམ་འགྱུར་གཞིའི་བྱ་ངན་རིགས་གཏན་ནས་མ་གནང་རོགས། དཱ་སྐུ་མཁྱེན་ཁྲ་ཁྲ་ཟིང་ཟིང་དེ་བཞག་ན་དགའ། དོན་ངོ་མ་སྐྱབས་རྗེ་ཟམ་གདོང་རིན་པོ་ཆེ་ནང་བཞིན་ལས་དོན་བྱ་མ་ཐུབ་ནའང་རྒྱལ་བའི་ཐུགས་དགོངས་དཀྲུག་གཞིའི་ལས་དོན་གཏན་ནས་མ་གནང་རོགས། ཤེས་པར་བགྱིས་དེ་ངེད་ཁ་ཏ་ཡིན།

    Reply
  3. དཀར་མེ། says:
    ལོ་ 9 སྔོན།

    རང་དབང་མེད་པར་མིག་ཆུ་འཆོར་གྱི་འདུག ང་ནོར་མེད་ན། ༸གོང་ས་མཆོག་ཐུགས་ཕམ་ཆེན་པོ་བྱུང་ཡོད་པ་རྟོགས་ནུས། སྔོན་དུས་རྒྱ་གར་མཁས་པ་ཚོས་ང་ཚོ་མི་རིགས་འདི་ལ་བོད་བ་གླང་ཞེས་མིང་བཏགས་ཡོད། དངོས་ནས་བོད་བ་གླང་ཚོ་ལ་སངས་རྒྱས་དངོས་སུ་བྱོན་ཡང་ཞལ་མི་མཇལ་བ་འདི་ཅི་ཡིས་ནོངས་པ་རེད་དམ། ༸གོང་ས་མཆོག་གིས་ང་ལ་གྲོགས་པོ་ཞིག་གི་འདུ་ཤེས་འཇོག་ན་ཞེས་གསུངས་འདི་བོད་མི་ཚོ་ལ། ད་ནས་སྤྱན་རས་གཟིགས་ཀྱི་ཐུགས་རྗེ་འཇུག་པའི་བསོད་ནམས་ཟད་བཞིན་པའི་མངོན་རྟགས་གསལ་བོ་ཞིག་རེད། ལས་ལན་འདི་ཆོལ་ཞེན་གྱི་སྨྱོ་ཆུ་འཐུང་མཁན་ཚོ་ལ་འཁོར་གྱི་རེད།

    Reply
  4. ཚེ་མདོ། says:
    ལོ་ 9 སྔོན།

    འདས་པའི་ལོ་ལྔ་དེ་གྲུབ་འབྲས་འདི་ཡིན་དེ་ཡིན་ཟེར་བ་མེད་པར་ཡལ་ཚར་བ་རེད། དེར་བཅོས་ཐབས་ཀྱང་གང་ཡང་ཡོད་པ་མ་རེད། མ་འོངས་པའི་ལོ་ལྔ་དེ་འཐུས་ཤོར་གྱི་ལོ་ལྔ་ཞིག་མ་ཆགས་པ་གནང་རོགས། རེ་བ་དེ་ཙམ་ལས་ཞུ་རྒྱུ་དྲན་མ་སོང་། ལས་ཀྱི་སྣེ་མོ་བ་རྣམ་པས་སྲིད་སྐྱོང་ལ་གཞོགས་འདེགས་གནང་རོགས།

    Reply
  5. ར་བང་བསྟན་འཛིན་ནོར་བུ། says:
    ལོ་ 9 སྔོན།

    བཀུར་འོས་སྲིད་སྐྱོང་མཆོག་ལ་འཚམས་འདྲིའི་བཀྲིས་བདེ་ལེགས་ཞུ།

    རང་ཅག་རྣམས་ཀྱི་དཔྲལ་བའི་མིག་དང་ཁོག་པའི་སྙིང་སྟེ་༧གོང་ས་མཆོག་གི་བཀའ་སློབ་ཇི་བཞིན་སྲིད་སྐྱོང་མཆོག་དབུས་པའི་མཛད་གཙོ་རྣམ་པའི་ལག་ལེན་དོན་འཁྱོལ་ཡོང་བར་རེ་སྨོན་ཡོད།།

    Reply
  6. ཤག་སྒང་པ་སངས་ཚེ་རིང་། says:
    ལོ་ 9 སྔོན།

    སྤྱི་ཚོགས་ཆུང་ཆུང་གི་གསེང་དང་འཁྲུག་ཆ་དོད་པོའི་ཁྲོད་ནས་སླར་ཡང་སྐུ་ཉིད་སྐབས་གཉིས་པའི་སྲིད་སྟེགས་སུ་བསྟུད་མར་མི་མང་གིས་བདམས་ནས་དེ་རིང་༧གོང་ས་མཆོག་དབུ་བཞུགས་ཀྱིས་གཞུང་འབྲེལ་དམ་འབུལ་གནང་བར་རྟེན་འབྲེལ་བཀྲིས་བདེ་ལེགས་ཕུན་སུམ་ཚོགས།

    Reply
  7. བློ་དགའ། says:
    ལོ་ 9 སྔོན།

    སྲིད་ཀྱོང་མཆོག་གིས་སྐབས་གཉིས་པའི་ལས་འགུལ་ཞུས་པར་བཀྲ་ཤིས་བདེ་ལེགས་ཞུ།།

    Reply
  8. ཚེ་རིང་བཀྲ་ཤིས། says:
    ལོ་ 9 སྔོན།

    བློ་བཟང་སེང་གེ་མཆོག་གིས་སྐབས་གཉིས་པའི་སྲིད་སྐྱོང་ལས་ཁུར་དམ་འབུལ་ཞུས་པར་བཀྲ་ཤིས་བདེ་ལེགས་ཞུ། ཁྱེད་ནི་བོད་མི་ས་ཡ་དྲུག་གི་རེ་ལྟོས་བཅོལ་ཡུལ་ཡིན་པའི་ཁྱེད་ཀྱི་བྱ་བཞག་ཐམས་ཅད་ཡིད་བཞིན་དུ་འགྲུབ་པའི་སྨོན་ལམ་འདེབས།

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese