བོད་ཀྱི་གསོ་རིག་དེ་ཚོང་གི་ངོ་བོར་མ་སོང་བར་འགྲོ་བ་མི་ལ་ཕན་ཐོག་ཡོང་ཐུབ་བྱེད་དགོས།

སྨན་རྩིས་མཐོ་སློབ་དབུ་བརྙེས་ཏེ་ལོ་ངོ་ ༥༥ འཁོར་བའི་མཛད་སྒོའི་སྟེང་བཀའ་ཟུར་ཀིརྟི་རིན་པོ་ཆེ་མཆོག་གིས་བོད་ཀྱི་གསོ་རིག་དེ་བཞིན་ཚོང་གི་ངོ་བོར་མ་སོང་བར་འགྲོ་བ་མི་སྤྱི་ལ་ཕན་ཐོག་ཡོང་ཐབས་གནང་རྒྱུ་གལ་ཆེན་པོ་ཡིན་སྐོར་གསུངས་སོང་།

དེ་རིང་སྔ་དྲོའི་ཆུ་ཚོད་ ༡༡ སྟེང་སྨན་རྩིས་མཐོ་སློབ་ཁང་གི་ཚོགས་ཁང་དུ་སྨན་རྩིས་མཐོ་སློབ་དབུ་བརྙེས་ཏེ་མི་ལོ་ ༥༥ འཁོར་བའི་མཛད་སྒོ་ཚོགས་སོང་ལ། སྐུ་མགྲོན་གཙོ་བོར་བཀའ་ཟུར་ཀིརྟི་རིན་པོ་ཆེ་མཆོག་དང་རྒྱ་གར་ཧི་མ་ཅལ་མངའ་སྡེའི་སྲིད་གཞུང་གི་སྨན་སློབ་ཁང་ (Rajendra prasad) གི་སློབ་སྤྱི་དང་སྨན་རིམ་པ་སྐུ་ཞབས་ཨ་ནེལ་ཆུ་ཧན་ (Dr. Anil chauhan) མཆོག་གཉིས་ཀྱི་གཙོས་པའི་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབས་དང་སྨན་རྩིས་ཁང་གི་སྨན་པ་རྣམས་དང་དགེ་སློབ་བཅས་མ་མིང་ ༡༥༠ ལྷག་འཛོམས་འདུག

མཛད་སྒོའི་ཐོག་མར་སྨན་རྩིས་མཐོ་སློབ་ཀྱི་སློབ་སྤྱི་གཞོན་པ་སྨན་རིམ་པ་ཡེ་ཤེས་དགེ་ལེགས་ཀྱིས་བོད་ཀྱི་གསོ་བ་རིག་པའི་བྱུང་རིམ་ལོ་རྒྱུས་དང་འབྲེལ་ཏེ་སྨན་རྩིས་མཐོ་སློབ་ཁང་དབུ་བརྙེས་ཏེ་མི་ལོ་ ༥༥ འཁོར་བའི་མཛད་རིམ་དང་ལས་སྡོམ་སྐོར་སྤྲོད་གནང་དོན། ༧གོང་ས་སྐྱབས་མགོན་རིན་པོ་ཆེ་མཆོག་བཙན་བྱོལ་དུ་ཕེབས་ཏེ་ཐོག་མར་བོད་ཀྱི་ཆོས་དང་རིག་གཞུང་མི་ཉམས་རྒྱུད་འཛིན་དང་ཉམས་པ་སོར་ཆུད་ཡོང་ཐབས་སུ་ཤེས་ཡོན་ཡར་རྒྱས་གཏོང་དགོས་པའི་དགོངས་གཞི་ལྟར་བོད་སློབ་འགའ་གསར་འཛུགས་གནང་བའི་ཁོངས་སུ་ ༡༩༦༡ ལོར་དྷ་སྟེང་བོད་ཁྱིམ་གྱི་ཉེ་འཁྲིས་ ༼ཅ་ར་ཧོ་སི་༽ཞེས་པའི་ས་ཁུལ་དུ་སྨན་ཁང་དང་སྨན་སློབ་གཅིག་ལྕོག་གསར་འཛུགས་གནང་བ་དང་། སྨན་པ་དང་སྨན་དགེ་གཅིག་ལྕོག་ཏུ་བླ་སྨན་ཡེ་ཤེས་དོན་ལྡན་ལགས་ཀྱིས་མཛད་འཁུར་བཞེས་ཏེ་རྣམ་རྒྱལ་གྲྭ་ཚང་གི་གྲྭ་རྒྱུན་ ༨ ཙམ་སློབ་མར་གཏོང་གནང་མཛད་པ་ལས་མཐར་ཕྱིན་སྨན་པ་ ༤ ཙམ་བྱུང་བ་རྣམས་ཀྱིས་བཙན་བྱོལ་དུ་བོད་ཀྱི་གསོ་རིག་བསྟན་པའི་རྨང་གཞི་འདིང་ཐུབ་པ་བྱུང་བ་དང་། དེའི་རྗེས་དུས་འཁོར་བ་བློ་གྲོས་རྒྱ་མཚོས་དཀར་ནག་དབྱངས་གསུམ་གྱི་ཐུགས་འགན་བཞེས་ཏེ་སྐབས་དང་པོར་རྩིས་སློབ་གྲངས་ ༦ དང་སྐབས་གཉིས་པར་སློབ་ཕྲུག ༡༤ ནས་མཐར་ཕྱིན་སྨན་སློབ་ ༨ དང་རྩིས་སློབ་ ༡༨། སྐབས་གསུམ་པར་སློབ་ཕྲུག་ ༡༨ བསྡུས་པ་ལས་སྨན་པ་ ༡༣ བྱུང་སྟེ། གཞིས་ཆགས་ཁག་ཏུ་སྨན་ཁང་གསར་འཛུགས་དང་སྨན་རྩིས་ཁང་རྒྱ་བསྐྱེད། སྐབས་བཞི་བར་སློབ་མ་ ༦ ཙམ་ཡོད་པ་ལས་རྗེས་སུ་སློབ་ཕྲུག་ ༢ ལས་མེད་སྟབས། སྐབས་ལྔ་བའི་ཁོངས་སུ་ཟླ་བསྒྲིལ་བཏང་བ་དང་། སྐབས་ལྔ་བའི་ཁོངས་ནས་མཐར་ཕྱིན་སྨན་སློབ་ ༣༡ དང་སྐབས་དྲུག་པར་སྨན་པ་ ༡༨། སྐབས་བདུན་པར་སྨན་པ་ ༢༣ དང་རྩིས་སློབ་ ༥། སྐབས་བརྒྱད་པར་སྨན་པ་ ༢༣ དང་སྐབས་དགུ་བར་སྨན་པ་ ༢༥། སྐབས་བཅུ་བར་སྨན་སློབ་ ༡༧ དང་རྩིས་སློབ་  ༡༢། སྐབས་བཅུ་གཅིག་པར་སྨན་སློབ་ ༢༣ དང་སྐབས་བཅུ་གཉིས་པར་སྨན་སློབ་ ༢༣ དང་རྩིས་སློབ་ ༧། སྐབས་བཅུ་གསུམ་པར་སྨན་སློབ་ ༢༤ དང་སྐབས་བཅུ་བཞི་བར་སྨན་སློབ་ ༢༡ དང་རྩིས་སློབ་ ༡༣། སྐབས་བཅོ་ལྔ་བར་སྨན་སློབ་ ༢༠ དང་སྐབས་བཅུ་དྲུག་པར་སྨན་སློབ་ ༢༥ དང་རྩིས་སློབ་ ༥ བཅས་ཁྱོན་སྨན་སློབ་ ༢༨༧ དང་རྩིས་སློབ་ ༦༠ སློབ་ཐོན་བྱུང་བ་དང་། ད་ཆར་སྐབས་བཅུ་བདུན་པར་སློབ་གཉེར་གནང་བཞིན་པའི་སློབ་མ་ ༢༡ ཡོད་པ་རྣམས་ལ་ལོ་རིམ་ལྔ་བའི་ཡིག་རྒྱུགས་གཏོང་ལ་ཉེ་ཞིང་། སྐབས་བཅོ་བརྒྱད་པའི་ལོ་རིམ་བཞི་བའི་སྨན་སློབ་ ༣༢ དང་རྩིས་སློབ་ ༥ ཡོད་པ་དང་། སྐབས་བཅུ་དགུ་བའི་ལོ་རིམ་གསུམ་པའི་སྨན་སློབ་ ༢༡ དང་རྩིས་སློབ་ ༡༧ ཡོད་པ་བཅས་ཁྱོན་སྨན་རྩིས་སློབ་ཕྲུག་ ༡༠༤ ལས་སྨན་སློབ་ ༨༢ དང་རྩིས་སློབ་ ༢༢ ཡོད་པ་མ་ཟད། སྐབས་ཉི་ཤུ་བའི་སློབ་མ་གསར་བསྡུས་ཟིན་ཏེ་ཕྱི་ཟླ་ ༧ པ་ནས་སློབ་འཁྲིད་གནང་འཆར་ཡོད་སྐོར་སོགས་བརྗོད་སོང་།

སྐུ་མགྲོན་གཙོ་བོ་སྨན་རིམ་པ་ཨ་ནེལ་ཆུ་ཧན་ལགས་ཀྱིས། བོད་ཀྱི་སྨན་རྩིས་ཁང་གསར་འཛུགས་སྐབས་སུ་མཐུན་རྐྱེན་ལེགས་པོ་མེད་ནའང་དེང་སྐབས་མཐུན་རྐྱེན་གང་ལེགས་ཡོད་སྟབས། སྔོན་ཆད་༧གོངས་ས་ཏཱ་ལའི་བླ་མ་མཆོག་གིས་གཙོས་པའི་མི་རབས་རྒན་པ་ཚོས་དཀའ་ལས་ཞེ་དྲགས་བསྐྱོན་གནང་སྟེ་བཙན་བྱོལ་སྤྱི་ཚོགས་ནང་སྨན་རྩིས་ཁང་གསར་འཛུགས་གནང་བ་དང་། ད་ཆར་སྨན་རྩིས་ཁང་གཙོས་པའི་བོད་ཀྱི་གསོ་བ་རིག་པའི་གཞུང་ལུགས་དེ་མི་ཉམས་རྒྱུན་འཛིན་དང་ཉམས་པ་སླར་གསོ་གནང་ཡོད་པ་དང་། མ་འོངས་པར་བོད་ཀྱི་གསོ་བ་རིག་པའི་གཞུང་ལུགས་རྩ་ཆེན་པོ་དེ་མི་ཉམས་རྒྱུན་འཛིན་གནང་བའི་འགན་དེ་ད་ལྟའི་སློབ་ཕྲུག་ཁྱོད་རང་ཚོར་ཡོད་པ་དང་། ད་ཆར་འཛམ་གླིང་གི་རྒྱལ་ཁབ་མང་པོས་བོད་ཀྱི་གསོ་རིག་སྐོར་ལ་དོ་སྣང་ཆེན་པོ་བྱེད་བཞིན་ཡོད་སྟབས། བོད་ཀྱི་གསོ་བ་རིག་པས་འཛམ་གླིང་སྤྱི་ལ་ཕན་ཐོག་ཡོང་ཐབས་དང་འཛམ་གླིང་སྤྱི་ལ་དར་སྤེལ་ཡོང་ཐབས་སུ་ཁྱོད་རང་ཚོར་འགན་ཡོད་སྟབས་ཁྱོད་རང་ཚོར་གྲ་སྒྲིག་དགོས་སྐོར་དང་། གཞན། ཁོང་སྨན་པ་བྱས་ནས་མི་ལོ་ ༤༠ ལྷག་འགྲོ་བཞིན་ཡོད་ནའང་། དེ་རིང་འདིར་སྨན་རྩིས་མཐོ་སློབ་ཁང་གི་སློབ་ཕྲུག་ཚོས་བོད་ཀྱི་གསོ་རིག་སྐོར་འགྲེམ་སྟོན་བྱས་པ་དེས་ཁོང་ལ་བོད་ཀྱི་གསོ་བ་རིག་པའི་སྨན་རྩིས་སྐོར་ལ་བློ་སྐྱེད་གསར་བ་མང་པོ་ཐོབ་སོང་། ཞེས་སོགས་བརྗོད་སོང་།

དེའི་རྗེས་བཀའ་ཟུར་ཀིརྟི་རིན་པོ་ཆེ་མཆོག་གིས་༧གོང་ས་སྐྱབས་མགོན་ཆེན་པོ་མཆོག་གིས་སྨན་རྩིས་ཁང་ལ་བཀའ་སློབ་རིམ་པར་ཕེབས་པ་དེ་ཚོ་ལག་ལེན་བསྟར་རྒྱུ་གལ་ཆེན་པོ་ཡིན་སྐོར་དང་། སྔོན་མར་སྨན་རྩིས་ཁང་གི་མཐུན་རྐྱེན་ཧ་ཅང་ཞན་ཡང་དེང་སྐབས་མཐུན་རྐྱེན་ཇེ་ལེགས་སུ་སོང་ཡོད་སྟབས། སྨན་རྩིས་སློབ་ཕྲུག་ཚོས་ཀུན་སློང་ཡག་པོ་ཞིག་གི་ཐོག་ནས་སློབ་གཉེར་གནང་དགོས་པ་གལ་འགེངས་ཆེ་སྐོར། སྨན་རྩིས་ཁང་གི་དགེ་སློབ་དང་སྨན་པ་ལས་བྱེད་ཚང་མས་ས་སོའི་ལས་འགན་གང་དེ་འཐུས་ཤོར་མ་འགྲོ་བ་ཞིག་གནང་རྒྱུ་གལ་ཆེན་པོ་ཡིན་པ་དང་། ལྷག་པར་དུ་བོད་ཀྱི་གསོ་རིག་དང་དེང་དུས་ཕྱི་ལུགས་གཉིས་ཟུང་འབྲེལ་ཡོང་རྒྱུ་དང་། སྨན་རྩིས་ཁང་གིས་སྔར་བས་བོད་ཀྱི་གསོ་རིག་སྨན་སྣ་མང་པོ་གསར་གཏོད་གནང་ཐུབ་པ་དགོས་རྒྱུ་དང་། བོད་ཀྱི་གསོ་རིག་དེ་ཚོང་གི་ངོ་བོར་མ་སོང་བར་འགྲོ་བ་མི་ལ་ཕན་ཐོག་ཡོང་དགོས་རྒྱུ་དང་། དེ་བཞིན་སྨན་སློབ་ཁང་གི་སློབ་ཕྲུག་ཚོས་འགྲོ་གྲོན་ཆུང་བའི་ཐོག་ནས་བོད་ཀྱི་གསོ་བ་རིག་པའི་གཞུང་ལུགས་འགྲེམ་སྟོན་གནང་བ་དེ་གསར་གཏོད་རང་བཞིན་ལྡན་པ་དེ་ཧ་ཅང་ལེགས་ཀྱང་། འགྲེལ་བརྗོད་དེ་བོད་དབྱིན་ཡིག་ངག་གཉིས་ཀྱི་ཐོག་ནས་འགྲེལ་བརྗོད་གནང་རྒྱུ་ཧ་ཅང་གལ་ཆེན་པོ་ཡིན་སྟབས། མ་འོངས་པར་བོད་ཀྱི་གསོ་རིག་འགྲེམ་སྟོན་དེ་ད་ཆར་ལས་འགྲོ་གྲོན་ཉུང་བ་དང་གསར་གཏོད་རང་བཞིན་ལྡན་ཞིག་གནང་རྒྱུ་གལ་འགེངས་ཆེ་སྐོར་སོགས་གསུང་སོང་།

གསར་འགོད་པ། པདྨ་རྒྱལ།