རིགས་ལམ་གྱི་འགྲོ་སྟངས་དེ་གྲྭ་བའི་སྡེ་ནས་མི་སྐྱའི་སྡེ་ལ་དར་སྤེལ་ཐོངས།

༧གོང་ས་མཆོག་གིས་བོད་རིགས་སློབ་ཕྲུག་ཚོར། སློབ་གྲྭ་ཁག་གི་དགེ་རྒན་ཚོས་རིགས་ལམ་གྱི་ཐོག་ནས་སློབ་ཁྲིད་བྱ་རྒྱུ་ཡོད་པ་ཞིག་དང་། སློབ་ཕྲུག་ཚོས་ཀྱང་རིགས་ལམ་གྱི་འགྲོ་སྟངས་ཤེས་ནས་བསམ་བྱུང་གི་ཤེས་རབ་སྤུས་དག་པོ་བྱུང་བ་ཡིན་ན་རྗེས་དཔག་ཚད་མ་སླེབས་ཡོང་གི་ཡོད་པས་ཕན་ཐོགས་ཆེན་པོ་ཡོད་པ་རེད་ཅེས་གསུངས།

དེ་རིང་སྔ་དྲོའི་ཆུ་ཚོད་ ༩ བའི་སྟེང་། དྷ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བར། བོད་མིའི་སྐྱབས་མགོན་༧རྒྱལ་བ་རིན་པོ་ཆེ་མཆོག་གིས། བོད་པའི་གཞོན་སྐྱེས་ཚོ་གཙོས་པའི་འཛམ་གླིང་ཤར་ནུབ་དད་ལྡན་མི་མང་ལ། འབྲོམ་སྟོན་རྒྱལ་བའི་འབྱུང་གནས་ཀྱིས་མཛད་པའི་<<རང་རྒྱུད་ལ་སྐུལ་མ་འདེབས་པའི་དད་པའི་ལྗོན་ཤིང་>>ཞེས་པའི་བརྗོད་གཞིའི་ཐོག ཉིན་གསུམ་རིང་གི་ནང་ཆོས་ངོ་སྤྲོད་དབུ་འཛུགས་གནང་ཡོད་པ་དང་། དེར་བཙན་བྱོལ་བོད་མིའི་སློབ་གྲྭ་ཁག་གི་སློབ་ཕྲུག་ཚོ་དང་འཛམ་གླིང་ཤར་ནུབ་ནས་ཕེབས་པའི་ཆོས་ཞུ་བ་ ༥༠༠༠ ཙམ་འཛོམས་འདུག

ནང་ཆོས་ངོ་སྤྲོད་ཀྱི་ཐོག་མར་དྷ་སྟེང་བོད་ཁྱིམ་སློབ་ཕྲུག་ཁག་ཅིག་གིས་ཚན་རིག་དང་ནང་པའི་ལྟ་གྲུབ་ཐོག་བགྲོ་གླེང་རྟག་གསལ་བཏང་དང་། ཤེས་རབ་དགའ་ཚལ་སློབ་གླེང་གི་སློབ་མ་ཁག་ཅིག་གིས་བདེན་བཞིའི་སྐོར་ལ་བགྲོ་གླེང་རྟག་གསལ་བཏང་རྗེས། ༧གོང་ས་སྐྱབས་མགོན་རིན་པོ་ཆེ་མཆོག་ནས་བཀའ་སློབ་ཕེབས་དོན། ནམ་རྒྱུན་བོད་ཁྱིམ་སློབ་གྲྭར་ཆོས་འབྲེལ་འཚོགས་ཀྱི་ཡོད་པ་རེད། རླངས་འཁོར་ལས་ཕར་ཚུར་འགྲོ་དུས་ཆུ་ཚོད་སྐར་མ་བཅུ་ཉི་ཤུ་སུམ་ཅུ་ལམ་ཁ་རང་ནས་འགོར་འགྲོ་གི་ཡོད་པས་དུས་ཚོད་འཕྲོ་བརླག་འདུག ཕྱོགས་གཅིག་ནས་ཐེག་ཆེན་ཆོས་གླིང་ནས་འཚོགས་པ་ཡིན་ན་འདིའི་ཉེ་འཁོར་ན་ཡོད་པའི་མི་མང་འདུ་འཛོམས་བྱེད་རྒྱུ་ལས་སླ་བོ་ཡོང་གི་ཡོད་པ་དང་། རྒན་རྒོན་ཚོ་ཡང་འདིར་ཡོང་བ་ལས་སླ་བོ་རེད། ཁྱོད་ཚོ་སློབ་ཕྲུག་རྣམས་ནི་བོད་ཁྱིམ་ནས་འདིར་ཡོང་རྒྱུར་དཀའ་ལས་ཡོད་པ་མ་རེད། རྩེད་མོ་རྩེད་ཞོར་རྒྱུགས་ཤར་གློད་ནས་སླེབས་པ་ཡིན་ན་དཀའ་ལས་ཁག་པོ་མི་འདུག འདིར་འཚོགས་པའི་རྒྱུ་མཚན་དེ་ལྟར་ཡིན།

སློབ་ཕྲུག་ཚོགས་ཁག་ནས་རྟགས་གསལ་བཏང་ནས་ལོ་ཁ་ཤས་ཕྱིན་པ་རེད། འདི་ནི་མིག་ལྟོས་གསར་པ་ལེན་ཆེད་འཛིན་གྲྭའི་ནང་སློབ་སྦྱོང་བྱས་ཏེ་དེབ་ཀློག་པ་དང་འགྲེལ་བཤད་ཉན་པ་གཅིག་པུ་མ་ཡིན་པར་ཐོས་བྱུང་གི་ཤེས་རབ་ཅེས་ཐོས་པ་དང་། དེ་ནས་བསམ་བློའི་ནང་ཡོད་པ་ལ་བསམ་བྱུང་གི་ཤེས་རབ་ཅེས་དཔྱད་པ་བྱས་ནས་འགྲོ་དགོས་ཀྱི་ཡོད། དཔྱད་པ་བྱེད་སྐབས་ལབ་ལབ་བཏང་ནས་དཔྱད་པ་བྱེད་རྒྱུ་ཡོད་ཀྱང་ཚིག་གི་བརྗོད་པ་གཙང་མ་ཞིག་གམ་སྒྲོས་གཙང་མ་ཞིག་གི་ནང་ལ་ཐལ་ཕྱིར་ཁྱབ་མ་ཁྱབ་ཅེས་པས་ཧ་ཅང་ཕན་ཐོགས་ཡོད། ང་ཚོར་དེ་ཡོད་པས་དགེ་འདུན་པ་ཚོ་དང་དེའི་ནང་ཚན་ནས་བཤད་གྲྭ་རྣམས་ཀྱིས་སྒེར་བདག་ལྟ་བུར་བཟུང་བསྡད་པ་མ་ཡིན་པར་རབ་བྱུང་ཕོ་མོ་ཚང་མས་ཤེས་ཡོན་སྦྱོང་ཐབས་ཀྱི་རིགས་ལམ་འགྲོ་སྟངས་འདི་ལ་སློབ་སྦྱོང་བྱེད་ཐུབ་པ་ཡིན་ན་དགེ་མཚན་ཡོད་པ་ཡིན་པས་དེ་སྔ་གཞུང་ཆེན་དང་རིགས་ལམ་སློབ་རྒྱུ་མེད་པའི་ཆོས་སྡེ་ཁག་ལ་བར་སྐབས་ནས་སློབ་གཉེར་ཚུགས་ཡོད། ལྷག་པར་དུ་རབ་བྱུང་མར་དེ་སྔ་གཞུང་ཆེན་ལ་བལྟ་བའི་ལུགས་སྲོལ་ཡོད་པ་མ་རེད། དེ་ལ་མིག་ལྟོས་སློག་ས་གསར་པ་ཞིག་བཟོས་ཏེ་རིགས་ལམ་གྱི་ཐོག་ནས་སློབ་སྦྱོང་བྱེད་རྒྱུ་བཙུགས་ཡོད་པ་དང་། དེ་ཙམ་དུ་མ་ཟད་སློབ་གྲྭ་ཁག་གི་ནང་དུ་སློབ་སྦྱོང་བྱེད་པའི་སྐབས་སུའང་ཐོས་བྱུང་གི་ཤེས་རབ་རྐྱང་རྐྱང་བྱས་ན་ནུས་པ་ཆེན་པོ་ཡོད་པ་མ་རེད། དགེ་རྒན་གྱིས་འགྲེལ་བཤད་རྒྱབ་པ་ལྟར་སློབ་དེབ་ནང་ལ་ཡོད་པ་དེ་ཙམ་ཤེས་པས་ཡིག་ཚད་གཏོང་བའི་སྐབས་སུ་བང་འགྲིག་པོ་དང་བརྗོད་བྱ་མཐུན་པོ་བྱུང་ན་འགྲིག་བསྡད་པར་ལྟ་བ་ནི་ཏག་ཏག་བསྡད་མེད། སློབ་སྦྱོང་བྱེད་པའི་དགོས་དོན་ནི་སེམས་ལ་ངེས་པ་གཏིང་ཟབ་རྙེད་བསྡད་པ་ཞིག་དགོས་ཀྱི་ཡོད། སེམས་ལ་ངེས་པ་གཏིང་ཟབ་སླེབས་ཚེ་ཡིད་ཆེས་རྙེད་ཀྱི་རེད། བཟང་པོའི་ཡོན་ཏན་ཡིན་ཚེ་སེམས་ལ་འགྱུར་བ་ཐེབས་པ་ནི་ཡིད་ཆེས་སླེབས་པའི་ཐོག་ནས་ཡོང་གི་རེད། སློབ་གྲྭ་ཁག་གི་དགེ་རྒན་ཚོས་རིགས་ལམ་གྱི་ཐོག་ནས་སློབ་ཁྲིད་བྱ་རྒྱུ་ཡོད་པ་ཞིག་དང་། སློབ་ཕྲུག་ཚོས་ཀྱང་རིགས་ལམ་གྱི་འགྲོ་སྟངས་ཤེས་ནས་བསམ་བྱུང་གི་ཤེས་རབ་སྤུས་དག་པོ་བྱུང་བ་ཡིན་ན་རྗེས་དཔག་ཚད་མ་སླེབས་ཡོང་གི་ཡོད་པས་ཕན་ཐོགས་ཆེན་པོ་ཡོད་པ་རེད།

སྤྱིར་དེ་སྔོན་ང་ཚོས་རིགས་ལམ་བསླབ་རྒྱུ་དེ་མ་སུ་རི་ནས་བཟུང་སློབ་གྲྭ་ཁག་ཏུ་རྟགས་གསལ་གཏོང་རྒྱུ་མགོ་བཙུགས་པ་རེད། རིམ་བཞིན་སློབ་གྲྭའི་ལས་སྣེ་ཚོས་དོ་སྣང་མ་ཆེན་པོ་མ་བྱུང་བ་ཡིན་ནའང་འདྲ་ལྷོད་ཡངས་ཤོར་བ་ཡིན་ནའང་འདྲ། བར་སྐབས་སློབ་ཕྲུག་ཚོས་ཆོས་དགེ་ཆོས་དགེ་ཞེས་བརྗོད་ཀྱི་འདུག ཆོས་དགེ་ཞེས་ཆོས་བཤད་མཁན་གྱི་དགེ་རྒན་བརྗོད་པ་ཡིན་ན་དེ་ཡེ་ཤུ་དང་ཁ་ཆེའི་སློབ་གྲྭ་ལའང་ཡོད་པ་རེད། དེ་དང་དེ་འདྲ་བའི་ཆོས་བརྒྱུད་སོ་སོ་དང་འབྲེལ་བའི་སློབ་གྲྭ་ཚང་མའི་ནང་ལ་ཡོད་པ་རེད། ང་ཚོ་ཕྱོགས་གཅིག་ནས་སངས་རྒྱས་པའི་ཆོས་བརྒྱུད་འཛིན་མཁན་ཞིག་ཡིན་པ་མ་ཟད། ཡང་སྒོས་ལྷག་པར་ཅན་དུ་དཔལ་ནཱ་ལེནྡྲའི་ཆོས་བརྒྱུད་འཛིན་མཁན་ཞིག་ཆགས་ཡོད་སྟབས། ནཱ་ལེནྡྲའི་འགྲོ་སྟངས་ཏེ་རིགས་ལམ་གྱི་ཐོག་ནས་ལྟ་གྲུབ་མང་པོ་ཞིག་བཤད་ཡོང་གི་ཡོད། ཁྱོད་རང་ཚོས་རྟགས་གསལ་གཏོང་བའི་སྐབས་སུའང་གྲུབ་མཐའ་སྨྲ་བ་བཞི་བཤད་ཡོང་དུས་བཅོམ་ལྡན་འདས་ཀྱི་རྗེས་འབྲང་དང་བསླབ་པ་གསུམ་ཉམས་ལེན་བྱེད་མཁན་གཅིག་མཚུངས་རེད། ཡིན་ནའང་ལྟ་གྲུབ་མང་པོ་ཞིག་ཐོན་པའི་རྩ་བ་བཅོམ་ལྡན་འདས་རང་ཉིད་ཀྱིས་གསུངས་པ་རེད། དེ་ནས་བཅོམ་ལྡན་འདས་ཀྱི་དགོངས་པ་གཞིར་བཞག་ནས་རིགས་པའི་ལམ་ནས་རང་རང་གི་ལྟ་གྲུབ་གཏན་ལ་ཕབ་པ་ནི་སྔོན་གྱི་རྒྱ་གར་མཁས་པ་སྤྱི་དང་ལྷག་པར་དཔལ་ནཱ་ལེནྡྲའི་མཁས་པ་ཚོས་མཛད་འདུག  དེར་བརྟེན་ཆོས་དགེ་ཞེས་པའི་མིང་གི་ཚབ་ལ་ལྟ་གྲུབ་ཀྱི་སློབ་དཔོན་ཞེས་བརྗོད་ན་ཡག་པོ་མེད་དམ། ཞེས་བསམ་འཆར་ཞུས་པ་ཡིན། ཆོས་དགེ་ཞེས་པ་དང་ལྟ་གྲུབ་ཀྱི་སློབ་དཔོན་ཞེས་པ་གཉིས་ལ་ཁྱད་པར་ཅིག་མི་འདུག་གམ། ལྟ་གྲུབ་ཀྱི་སློབ་དཔོན་ཞེས་ལྟ་བ་དང་གྲུབ་མཐའ་བརྗོད་དུས་མགོ་རྙོག་ཅུང་ཙམ་འདུག  སློབ་ཕྲུག་ཁྱེད་རང་ཚོས་སངས་རྒྱས་པའི་ཆོས་ཀྱི་ལྟ་གྲུབ་འདྲ་མིན་ཡོད་པ་དེ་དག་ལ་སློབ་སྦྱོང་བྱེད་ཐུབ་པ་བྱུང་ན་བློ་སྐྱེད་ཡོང་རྒྱུར་ཧ་ཅང་ཕན་ཐོགས་ཆེན་པོ་ཡོད། མི་ལ་ཀླད་པ་མི་འདྲ་བ་ཡོད་པའི་ནང་ནས་གཙོ་བོ་དེ་དཔྱད་པ་བྱ་རྒྱུ་དེ་རེད། མི་ལ་རང་བཞིན་ལྷན་སྐྱེས་ཀྱི་འཇོན་པོ་དང་འཁྲུག་པོ་ཧ་ཅང་བསམ་བློ་གཏོང་ཐུབ་པའི་ཀླད་པ་ཞིག་ཡོད་པས་དེའི་ནུས་པ་ཆ་ཚང་བེད་སྤྱོད་བྱེད་པར་ལྟ་གྲུབ་འདྲ་མི་འདྲ་དང་རིགས་ལམ་གྱི་ཐོག་ནས་དཔྱད་པ་བྱས་ནས་སོང་ཚེ་ཀླད་པ་འཁྲུག་པོ་ཡོད་པ་དེ་ཏག་ཏག་ཅིག་གི་ཐོག་འགྲོ་ཐུབ་རྒྱུར་ཁྱད་པར་ཆེན་པོ་འདུག

ང་རང་ཚོ་བོད་ལ་རྒྱ་གར་ནས་སངས་རྒྱས་ཀྱི་ཆོས་ཚུར་སྒྱུར་སྐབས་བཀའ་འགྱུར་པོ་ཏི་བརྒྱ་ལྷག་ཙམ་ཞིག་དང་། བསྟན་འགྱུར་པོ་ཏི་ཉིས་བརྒྱ་ལྷག་ཙམ་ཡོད་པ་དེ་དག་གི་ནང་རྩ་བ་བཀའ་འགྱུར་ནང་དུ་སྟོན་པས་འགྲེལ་བཤད་སྐྱོན་སྐབས་ཐལ་ཕྱིར་ཞེས་དངོས་སུ་གསུངས་མེད་ཀྱང་། དོན་དག་གཅིག་མཐུན་གྱིས་སྒྲུབ་བྱེད་བཀོད་ཡོང་གི་ཡོད། བཅོམ་ལྡན་འདས་ཀྱིས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་ཁོང་རང་གི་ཆོས་ཚུལ་འདི་བཅོམ་ལྡན་འདས་ལ་གུས་པ་དང་དད་པ་ཡོད་པའི་རྒྱུ་མཚན་དུ་བྱས་ནས་ཁས་བླང་དགོས་ཀྱི་མེད། བཅོམ་ལྡན་འདས་ཀྱིས་གསུངས་པ་དེ་ལ་བསྲེགས་བཅད་བརྡར་བའི་གསེར་བཞིན་དུ་དཔྱད་པ་བྱོས། དེ་ལ་རིག་པའི་གནོད་པ་ཡོད་མེད་དང་རིག་པའི་རྒྱབ་བརྟེན་ཡོད་མེད་དཔྱད་པ་བྱས་ནས་རྒྱབ་རྟེན་ཡོད་པ་དང་རིག་པས་གནོད་པ་མེད་པ་དེ་དག་ཁས་བླངས། བཅོམ་ལྡན་འདས་ཀྱི་བཀའ་ཡིན་ནའང་རིག་པས་གནོད་པ་ཡོད་ཚེ་ཁས་ལེན་དགོས་ཀྱི་མ་རེད། ཅེས་བཅོམ་ལྡན་འདས་རང་ཉིད་ཀྱིས་གསུངས་ཡོད། འཛམ་གླིང་འདིར་ཆོས་ཚུལ་སྟོན་མཁན་གྱི་སྟོན་པ་མང་པོ་བྱུང་ཡོད་ཀྱང་། ངའི་བསྟན་པ་འདི་ལ་ལམ་སེང་ཡིད་ཆེས་བྱེད་དགོས་ཀྱི་མ་རེད། ང་ལ་དགའ་པོ་དང་དད་པ་བྱས་ནས་ཡིད་ཆེས་བྱེད་མི་དགོས། དཔྱད་པ་བྱོས། ཚོད་ལྟ་བྱོས། ཞེས་གསུང་མཁན་བཅོམ་ལྡན་འདས་མ་གཏོགས་སུ་གཅིག་མེད་པའི་བཟོ་འདུག དེར་བརྟེན་ནཱ་ལེནྡྲའི་མཁས་པའི་དབང་པོ་ཚོའི་ནང་ནས་སློབ་དཔོན་ཕྱོགས་གླང་དང་ཆོས་གྲགས། མཁན་ཆེན་ཞི་བ་འཚོ་སོགས་ཀྱིས་རྒྱ་གར་ལ་ཡོད་པའི་ཆོས་བརྒྱུད་དང་ལྟ་གྲུབ་འདྲ་མིན་གྱི་མཁས་དབང་དག་གི་ཚད་མའི་གཞུང་ལ་གཤིབ་བསྡུར་བྱས་ཏེ་ཧ་ཅང་སྤུས་དག་གི་ཚད་མའི་གཞུང་མཛད་ཡོད། དེ་དག་དཔེ་ཆའི་ནང་དུ་ལྷག་བསྡད་ཚེ་ཕངས་པོ་རེད། ཅེས་གསུངས་སོང་།

དེ་རིང་ཕྱི་དྲོར་མཁས་དབང་ཟམ་གདོང་རིན་པོ་ཆེ་མཆོག་གིས་༧གོང་ས་སྐྱབས་མགོན་ཆེན་པོ་མཆོག་ནས་དམངས་གཙོའི་རང་དབང་དང་ལྷག་དོན་ཕྱི་ལོ་ ༢༠༡༤ ལོར་ཆབ་སྲིད་ཀྱི་འགན་དབང་ཡོངས་རྫོགས་མི་མང་གིས་འོས་བསྡུ་གནང་བའི་དབུ་ཁྲིད་རྣམས་ལ་རྩིས་སྤྲད་གནང་ནས་མི་ལོ་ ༥ འཁོར་བར་བོད་མི་སྤྱི་དང་དབུ་ཁྲིད་རྣམས་པར་དཀའ་སློབ་གནང་རྒྱུ་དང་། ཕྱི་ཚེས་ ༣ ཉིན་གྱི་སྔ་དྲོར་ནང་ཆོས་ངོ་སྤྲོད་ཚོགས་ཆུང་གིས་༧གོང་ས་སྐྱབས་མགོན་ཆེན་པོ་མཆོག་ནས་ཕྱི་ལོ་ ༢༠༠༧ ལོ་ནས་གཞོན་སྐྱེས་ཚོར་དམིགས་བསལ་ནང་ཆོས་ངོ་སྤྲོད་གནང་སྟེ་ལོ་ ༡༠ འཁོར་བར་བཀའ་དྲིན་རྗེས་དྲན་དང་རྟེན་བཞུགས་བསྟར་འབུལ་བཅས་གནང་རྒྱུ་ཡིན་འདུག

གཞན། ཕྱི་ཟླ་ ༦ པའི་ཚེས་ ༧ ནས་ ༩ བར་ན་ལན་ཌ་ཤཱག་ཤཱ་ (Nalanda Shiksha) དད་ལྡན་ཆོས་ཞུ་བར་རྒྱལ་སྲས་ཞི་བ་ལྷས་མཛད་པའི་<<སྤྱོད་འཇུག་ཆེན་མོའི་>>ལེའུ་བཞི་བའི་གསུང་ཆོས་འཕྲོ་སྐྱོང་གནང་རྒྱུ་ཡིན་འདུག

གསར་འགོད་པ། པདྨ་རྒྱལ།