ཡ་མཚན་ལྟད་མོ་གྲོས་ཚོགས་ནང་ན་འདུག

ཤར་ཕྱོགས་ཁུག་རྟ།

གུས་པས་༧རྒྱལ་བའི་དགོངས་གཞི་སྙིང་བཅངས་དང་མི་མང་གི་མངོན་འདོད་སྲུང་སྐྱོབ། རང་ཚུགས་གཏད་སོ་ཡོད་པ་བཅས་ཀྱི་བསམ་ཚུལ་བཏོན་པས། བཀུར་འོས་རྒྱ་ཆེ་མི་མང་གི་ངོས་ནས་ཚད་མཐོའི་རྒྱབ་སྐྱོར་གྱི་ལམ་ནས་གྲོས་ཚོགས་འཐུས་མའི་འགན་དབང་བསྐུར། འཐུས་མིའི་དམ་འབུལ་དང་སྐབས་བཅུ་དྲུག་པའི་གྲོས་ཚོགས་ཚོགས་དུས་དང་པོ་བཅས་པ་ཡོངས་སུ་གྲུབ། འདི་ནི་གུས་པར་མཚོན་ན་བསམ་གཞིགས་གཟབ་ནན་བྱ་རིན་ཡོད་པའི་ལས་དོན་ཞིག་ཏུ་གྱུར།

བཙན་བྱོལ་བོད་མིའི་སྤྱི་ཚོགས་ཁྱོན་ཡོངས་ཀྱི་འབུར་ཐོན་ཅན་གྱི་མི་སྣ་དག་དང་སྡིངས་ཆ་གཅིག་ཏུ་འཛོམས་པ་དང་། ཉིན་གསུམ་གྱི་གྲོས་ཚོགས་ཀྱི་ཕྱི་ནང་གང་སར་མངོན་པའི་གནས་ཚུལ་མང་པོ་ཞིག་དེ་རིང་བརྗོད་ཐབས་བྲལ། ཡིན་ནའང་། མི་རབས་གསར་པ་ཤུགས་ཆེ་བའི་སྐབས་བཅུ་དྲུག་པའི་སྤྱི་ལྷན་འདིའི་ནང་གུས་ནས་མི་མང་གིས་གནང་བའི་འོས་འགན་གང་འཚམ་ཞིག་བསྐྱལ་ཐུབ་ཡོད་པར་ཡིད་ཆེས་བྱེད་བཞིན་ཡོད།

གུས་པ། གྲོས་ཚོགས་ཀྱི་རྐུབ་སྟེགས་སྟེང་གསར་དུ་བསྡད་པ་ཡིན་རུང་། ཚོགས་དུས་མང་པོར་རྒྱུས་ཡོད་ཡིན་པ་དང་། ལྷག་པར་ཏུ་བཅའ་ཁྲིམས་གཙོས་སྒྲིག་གཞི་ཁག་ལ་འབྲེལ་བ་གསར་དུ་འཛུགས་མཁན་ཞིག་མིན་སྟབས། གཟུར་གནས་མང་དག་ཅིག་ལ་གྲོས་ཚོགས་འཐུས་མི་རྙིང་པ་ཞིག་ཡིན་པའི་མཐོང་སྣང་ཡང་བྱུང་འདུག་མོད། ངས་དོ་སྣང་ཞུ་འདོད་པ་ནི་དེ་དག་རྩ་བ་ནས་མ་རེད།

གྲོས་ཚོགས་རྭ་བར་སྙན་སྒྲོན་ཞུ་རྒྱུའི་སྐད་ཆའི་རྩ་དོན་ལ། སྤྱི་དོན་དང་རང་དོན་གཉིས་ཀ་སྲུང་སྐྱོབ་དགོས་པའི་ལངས་ཕྱོགས་དེ་ངས་སྔ་མོ་ནས་ཡག་པོ་མཐོང་གི་མེད། ང་ཚོའི་སྤྱི་ཚོགས་ནང་སྐད་ཆའི་ལངས་ཕྱོགས་དེ་འདྲ་ཡོད་མཁན་དག་རྣམ་དཔྱོད་ལྡན་པར་རློམ་གྱི་ཡོད་པ་འདྲ་ཡང་། དེང་གི་དུས་ནི་མི་མང་གི་གོ་རྟོགས་ཁྱོན་ཡོངས་ནས་སད་པའི་དུས་སྐབས་ཡིན་པས། བཀས་བཀོད་བརྒྱུད་འཛིན་ལམ་ལུགས་ཀྱི་མཐོ་རིམ་མི་སྣ་ནང་ཁུལ་ཁོ་ནར་སྤྱོད་བྱའི་སྐད་ཆའི་ལངས་ཕྱོགས་དེའི་དུས་ཚོད་རྫོགས་ཟིན་པ་གསལ་བོ་རེད་ལ། ཞི་བའི་སྤྱི་ཚོགས་ནང་གནས་པའི་ཤེས་ཡོན་པ་དང་རྩོམ་པ་པོ་མང་དག་ཅིག་གིས་དེ་རིགས་ལ་མགོ་གཉིས་མ་ཞེས་པའི་ཚིག་འདི་སྦྱོར་གྱི་ཡོད། ངེད་ནས་ཀྱང་མི་མང་ནང་འཁྲུགས་མི་ཐེབས་པ་དང་མི་མང་གིས་ལས་སླ་བོའི་ངང་འཐུས་མི་དེའི་ངོ་བོ་དང་དམིགས་ཡུལ་གསལ་བོ་གཟིགས་ཆེད། གྲོས་ཚོགས་རྭ་བའི་སྐད་ཆའི་རང་ཚུགས་ལ། སྤྱི་བ་སྲུང་སྐྱོབ་ཁོ་ནའི་རྣམ་པ་གསལ་དགོས་པའི་ལྟ་ཚུལ་གསལ་འདོན་བྱས་ཡོད་ལ། མ་འོངས་པར་ཡང་བརྟན་གནས་ཐུབ་ངེས་ཡིན།

ད་ཐེངས་གྲོས་ཚོགས་ནང་ལས་རིམ་རྙོག་འཛིང་ཅན་དང་མང་པོ་མེད་ནའང་། གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་འཆར་གྲོས་ཆོད་ཡིག་ཆ་ཨང་དྲུག་པ། བཀའ་བློན་འོས་འདེམས། གཞུང་འབྲེལ་གྲོས་འཆར་གྲོས་ཆོད་ཡིག་ཆ་ཨང་དགུ་བ་སྟེ་འོས་བསྡུའི་སྒྲིག་གཞི་བསྐྱར་བཅོས་ཀྱི་སྐོར། གཞན་ཡང་བཀའ་བློན་གྱི་འོས་ཆས་མ་ཚང་བའི་གནད་དོན་ལྷང་ལ་བུད་པ་སོགས་ཀྱི་ཐད་གླེང་སློང་ཚ་ནན་བྱུང་།

ངེད་ནས་རྒྱབ་སྐྱོར་པ་ཚོར་གྲོས་ཚོགས་ནང་གི་གནད་དོན་གལ་ཆེའི་སྐོར་དང་། རང་གི་ངོས་ནས་ཆ་ཤས་ཅི་ལྟར་བླངས་པ་རྣམས་དུས་ལྟར་སྙན་སྒྲོན་ཐུབ་རེ་ཡོད་བཅས་ཞུས་པ་བཞིན། གོང་འཁོད་ལས་རིམ་དེ་དག་གི་སྐོར་གནད་བསྡུས་སུ་ཞུས་ན། གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་ནི་བོད་ནང་གི་ཛ་དྲག་གནས་བབ་དྲན་གསོ་དང་དེ་ལས་སྐྱོབ་ཐུབ་ཡོང་རེ་གསལ་བའི་གྲོས་ཆོད་ཅིག་ཡིན་པ་ཀུན་ལ་གསལ་བས་རྒྱས་བཤད་དགོས་དོན་མེད་ཀྱང་། གུས་ནས་གྲོས་ཆོད་དེར་རྒྱབ་སྐྱོར་གྱི་སྤོབས་གཏམ་ཞུ་བ་དང་། རྒྱ་ནག་གི་བོད་ཐོག་འཛིན་པའི་སྲིད་བྱུས་ཡག་པོ་མི་ཤེས་བཞིན་དུ་ཚིག་གི་མཚོན་ཆར་ཚོད་དཔག་དང་འོལ་ཚོད་ཀྱི་གཤོག་པ་བཏགས་ནས་རང་སྣང་རྒྱ་ཡན་དུ་བཏང་མེད་ཁར། གཞིས་ལུས་རྒྱ་ཆེ་མི་མང་ལ་སྙིང་ཁོང་རུས་པའི་སྟེང་ནས་དགོངས་སེལ་ཞུས་ཡོད། གཞིས་ལུས་རྒྱ་ཆེ་མི་མང་གི་སྡུག་བསྔལ་སེལ་བའི་ཐབས་མཆོག་༧གོང་ས་ཐམས་ཅད་མཁྱེན་པའི་ལམ་སྟོན་འོག་ཤར་བསྐྱོན་བྱས་ཡོད་ན། བོད་མི་རིགས་ལ་དེ་རིང་གི་གནས་སྟངས་འདི་ལས་ཡག་པོ་ཡོང་ངེས་པ་གསལ་བོ་རེད་འདུག་སྙམ་ནས། སྐྱོ་སྣང་དང་འགན་བབ་ཀྱི་བརྗིད་ཁོག་ས་ཆེན་སྨུག་པས་བཏུམས་པ་ལྟ་བུའི་ཚོར་སྣང་ཀྱང་བྱུང་།

གཞུང་འབྲེལ་གྲོས་འཆར་གྲོས་ཆོད་ཡིག་ཆ་ཨང་དགུ་བ་ནི་འོས་བསྡུའི་སྒྲིག་གཞི་བསྐྱར་བཅོས་སྐོར་ཡིན་ཞིང་། དེ་ནི་༧གོང་ས་ཐམས་ཅད་མཁྱེན་པ་ཐུགས་ཕམ་བྱུང་བ་དང་འབྲེལ་ཏེ་འཛིན་སྐྱོང་བཀའ་ཤག་གིས་གྲོས་ཚོགས་རྭ་བར་བསྣམས་ཕེབས་པ་ཞིག་རེད། དེའི་ཐད་བདག་གིས་མི་མང་གི་དགོངས་ཚུལ་སྙིང་བོ་ཡིན་པའི་ལྟ་ཚུལ་བཏོན་པར། མི་མང་ལ་སེམས་ཚོར་ཤུགས་ཆེ་བྱུང་འདུག་པ་རིན་བྲལ་ཚེ་ནོམ་གྱི་ཆ་ཤས་སུ་གྱུར། ངས་བཙན་བྱོལ་བོད་མིའི་བྱུང་རབས་ལས་བསླབ་བྱ་བླངས་ཤིང་། བཀའ་ཤག་སྐབས་གོང་མ་གནད་དོན་མང་པོའི་ཐད་འཐུས་ཤོར་ཕྱིན་ཟིན་པ་ཕྱོགས་བསྡོམས་བྱས་དུས། ༧གོང་ས་ཐམས་ཅད་མཁྱེན་པ་ཐུགས་དགྱེས་མཉེས་ཡོང་བ་དང་། དེ་ཡོང་བ་ཡིན་ན་བོད་མི་རིགས་ལ་མདུན་ལམ་ཚད་ལྡན་ཞིག་ཡོད་པ་རྒྱུ་འབྲས་ལྟོས་གྲུབ་ཡིན་པའི་ཚུལ་ལ་བསམས་སྐབས།

གནད་དོན་གཉིས་ཁོ་ནར་བཤག་བཅོས་གཏོང་དགོས་པ་སྟེ། གྲོས་ཆོད་ཨང་དགུ་བ་དང་འབྲེལ་ཏེ། གཅིག དབུ་ཁྲིད་ཀྱི་ཁྱད་ཡོན་གྱིས་མ་འདང་བ་དང་། གཉིས། བཙན་བྱོལ་ལོ་རྒྱུས་ནང་གི་ངོ་ལོག་རང་བཞིན་གྱི་རྙོག་གྲ་རྙིང་པ་གཙང་སེལ་མ་ཐུབ་པའི་གནད་དོན་གཉིས་ཞུས་པ་ཡིན། དབུ་ཁྲིད་ཀྱི་ཁྱད་ཡོན་གྱིས་འདང་མེད་ས་གཙོ་བོ་ནི། རྒྱ་ནག་གི་བོད་ཐོག་འཛིན་པའི་སྲིད་བྱུས་སྐོར་ཞིབ་ཚགས་མཁྱེན་གྱི་མེད་པ་དེ་རེད། བསམ་ཚུལ་འདི་བོད་ཕྱི་ནང་གི་མཁས་དབང་ཁག་དང་། བོད་དོན་རྒྱབ་སྐྱོར་བ་རྒྱ་རིགས་དང་མགོ་སེར་མཁས་པ་མང་པོའི་བསམ་ཚུལ་དང་གཅིག་པ་ཆགས་ཀྱི་འདུག དཔལ་འབྱོར་དབྱེ་འབྱེད། ཁོར་ཡུག་གཏོར་བཤིག ཆོས་དད་དམ་དྲག  ཟེར་བ་ལྟ་བུའི་སྦོམ་ཚིག་ཁ་ཤས་ཀྱིས་རྒྱ་ནག་གིས་བོད་ཐོག་འཛིན་པའི་འཛིན་པའི་སྲིད་བྱུས་གསལ་འགྲེལ་ཐུབ་ཀྱི་མེད་པ་གསལ་བོ་རེད། ངས་གྲོས་ཚོགས་ནང་དཔེར་ན། བོད་ལ་རང་སྐྱོང་ཁུལ་དང་རྫོང་། དེ་དག་གི་མི་འབོར། དེའི་ནང་གི་ཆབ་སྲིད་བཙོན་པ། ས་ཁུལ་དེ་དག་ལ་མི་འདྲ་བའི་གནས་སྟངས་དང་རྒྱ་ནག་གི་སྲིད་བྱུས་ཅི་ཞིག་ལག་བསྟར་བྱེད་ཀྱི་ཡོད་མེད་སྐོར་དྲིས་པས། ང་ཚོའི་དབུ་ཁྲིད་ཀྱིས་ང་ལ་སྙིང་རྗེ་ཞེས་པའི་ཚིག་འདི་ལན་དུ་བཏབས་པ་རེད། དེས་ང་ལ་ཆེ་མཐོང་ཆེན་པོ་དང་། ངས་ཞུས་བཞག་པ་གནད་ལ་འཁེལ་བ། ཤེས་ཡོན་པའི་སྐད་ཆའི་འགྲོས་ལ་ཕྱིན་ཏེ། བསམ་ཚུལ་ཙམ་གྱིས་ལན་མི་ཐོབས་པ་བསྟན་ཡོད་ནའང་། ངའི་རེ་བ་ནི། ང་དང་དབུ་ཁྲིད་ཀྱི་ཁྱད་ཡོན་འགྲན་བསྡུར་བྱ་འདོད་རྩ་ནས་མིན་ཏེ། དབུ་ཁྲིད་ཀྱི་ངོས་ནས་རྒྱ་ནག་གིས་བོད་ཐོག་འཛིན་པའི་སྲིད་བྱུས་ཞིབ་ཚགས་ཆ་ཚང་ཞིག་མཁྱེན་ན་ཨང་སྙམ་པའི་ལྷག་བསམ་འགོག་མ་ཐུབ་པ་དེ་ཡིན། འོན་ཏང་། དབུ་ཁྲིད་ལ་ཏན་ཏན་སྐུལ་ལྕགས་ཤིག་ཐེབས་ཡོད་པ་མི་མང་གི་སེམས་ཚོར་ལ་བལྟས་ན་ཤེས་གསལ་རེད། ངས་ད་དུང་རང་སྲེག་སྐོར་ཞིབ་འཇུག་སྙན་ཐོ་མ་བཏོན་པ། རང་སྲེག་སྐོར་རྒྱལ་སྤྱིའི་རྒྱབ་སྐྱོར་ཕྱོགས་བསྡོམས་ཀྱིས་མི་མང་ལ་སྙན་སྒྲོན་མ་ཞུས་པ་སོགས་ཞུ་འཆར་ལ་ཚོགས་གཙོ་མཆོག་གི་ལམ་སྟོན་བཞིན་ཕྱིར་འཐེན་གནང་བ་ཡིན།

ཡང་གནད་དོན་གཞན་ཞིག་སྟེ། འོས་ཆས་མ་ཚང་བ་ལྷང་ལ་བུད་པའི་གང་ཟག་དེ་བཀའ་བློན་གནང་མ་ཐུབ་པའི་གནས་སྟངས་སྐོར་རེད། བཀའ་བློན་འོས་འདོན་སྐབས། འོས་མིའི་ལོ་རྒྱུས་གྲོས་ཚོགས་འཐུས་མིའི་མདུན་ཅོག་སྟེང་འཇོག་དགོས་ཀྱི་འདུག ལྷག་པར་བོད་ཡིག་མི་ཤེས་པའི་འཐུས་མི་ཚོར་དགོས་གལ་ཆེ་བའི་ལས་རིམ་རྣམ་བཞག་མང་ང་ཚོ་ཁག་ཅིག་གིས་བཏོན་པར་བརྟེན། མཐར་ལོ་རྒྱུས་བཀྲམས་དགོས་བྱུང་ཡང་། འོས་ཆས་ཞིབ་འཇུག་ཡག་པོ་མ་བྱས་པས་ཐོག་མ་ནས་ལས་དོན་ལམ་ལྷོང་མ་བྱུང་བའི་སྣང་ཚུལ་སྐྱོ་བོ་དེ་བོད་ཕྱི་ནང་གང་སར་ཁྱབ་དགོས་བྱུང་། བཀྲ་མི་ཤིས་པའི་རྟགས་མཚན་འདི་ལ་མངོན་དང་མི་མངོན་པའི་རྒྱུ་རྐྱེན་མང་པོ་བྱུང་ཡོད་ནའང་། ངས་ནི་ལྷ་སྲུང་ཁག་གི་བྱ་ར་མ་འདྲ་བ་ཞིག་འདུག་སྙམ་པའི་ཡིད་ཆེས་ཤིག་རྙེད།

འདི་ལ་ཕྱོགས་གང་ས་ནས་དབྱེ་ཞིབ་བྱ་རིན་ཤིན་ཏུ་ཆེ་ཡང་ཡིག་ཚོགས་ལ་འཇིགས་པ་དང་། ལས་བྲེལ་ཆེ་བས་སྙིང་བསྡུས་སུ་བརྗོད་ན། བཀའ་བློན་ནས་ཕྱིར་འཐེན་བྱས་ཆོག་པའི་ཚིག་གཅིག་བཅའ་ཁྲིམས་དང་སྒྲིག་གཞི་ཁག་གང་དུའང་མི་གསལ། བཅའ་ཁྲིམས་དོན་ཚན ༢༥ པ་སྲིད་སྐྱོང་དང་བཀའ་བློན་རྣམ་པའི་ལས་འཁུར་དམ་འཇོག་ནང་། ༼  འདེམས་ཐོན་སྲིད་སྐྱོང་དང་། བཀའ་བློན་རྣམ་པ་བཅས་ལས་འཁུར་དུ་མ་ཞུགས་གོང་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་མདུན་དུ་ཁྲིམས་ལུགས་སུ་གཏན་འབེབས་བྱས་པའི་ཚིག་གཞི་ལྟར་ལས་འཁུར་དང་གསང་རྒྱའི་དམ་བཅའམ། ཁས་ལེན་ཞུ་དགོས།   ༽ཞེས་གསལ་བ་ཕུད། དམ་བཅའ་བཞག་གྲུབ་རྗེས་ཕྱིར་འཐེན་བྱས་ཆོག་པ་ཞིག་རྩ་བ་ནས་འཁོད་མེད། ཕྱིར་འཐེན་ནི་སྲིད་སྐྱོང་དང་བཀའ་བློན་གང་རུང་ནས་གནང་ཆོག་པ་ལྟར་གོ་སྲིད་ཀྱང་། ཁྲིམས་སྒྲིག་ནང་བཀའ་བློན་ནས་འཁྱུར་བ་དང་། ཕུད་པ། རྩ་དགོངས་ཞུ་བ། སྐུ་གཤེགས་ན་མ་གཏོགས། ཕྱིར་འཐེན་ཞུ་རྐྱེན་གྱི་ལམ་ཁ་གང་ཡང་མེད་པ་མ་ཟད། གོང་དུ་ཞུས་པ་བཞིན་ཕྱིར་འཐེན་ཞེས་པའི་ཚིག་འདིའི་འོག་བཀའ་བློན་ལས་གནས་དང་བྲལ་ཆོག་པ་ཞིག་བཅའ་ཁྲིམས་རིན་པོ་ཆེ་གཙོས་སྒྲིག་གཞི་གང་དུའང་མི་འདུག

བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞིའི་དོན་ཚན་ཞེ་བཞི་པ། བཀའ་བློན་དགོངས་ཞུ་ཞེས་པའི་ནང་། ༼ བཀའ་བློན་དགོངས་པ་ཞུ་མཁན་བྱུང་སྐབས་སྲིད་སྐྱོང་ལ་སྙན་སེང་བཀའ་འཁྲོལ་བྱུང་རྗེས་རང་ཉིད་དགོངས་ཞུ་བྱེད་དགོས་པའི་གནད་དོན་སྐོར་སྤྱི་འཐུས་ལྷན་ཚོགས་སུ་ཚོགས་གཙོའི་བཀའ་འཁྲོལ་དང་སྦྲགས་གསལ་བཤད་བྱེད་ཆོག་པ་ཡིན། གལ་སྲིད་སྤྱི་འཐུས་ལྷན་ཚོགས་མ་ཚོགས་པའི་སྐབས་དགོངས་ཞུ་བྱས་པ་ཡིན་ན། སྤྱི་འཐུས་ལྷན་ཚོགས་ཚོགས་རྗེས་ཀྱི་ཉིན་བདུན་ནང་ཚུན་སྲིད་སྐྱོང་ངམ་བཀའ་བློན་གཞན་ཞིག་གིས་འགྲེལ་བརྗོད་གསལ་བཤད་བྱེད་ཆོག ༽ཅེས་འཁོད་ཡོད་པ་ལས། ཕྱིར་འཐེན་ཞུས་ཆོག་པའི་ཆ་རྐྱེན་གང་ཡང་མི་གསལ།

ཡང་བཅའ་ཁྲིམས་རིན་པོ་ཆེའི་དོན་ཚན་ཉེར་དགུ་བ། བཀའ་ཤག་གི་འགན་འཁུར་དང་འཕོ་འགྱུར་ཞེས་པའི་ནང་གསེས་བཞི་པར། ༼ སྲིད་སྐྱོང་གིས་བཀའ་བློན་བྱེ་བྲག་པ་སུ་རུང་དགོངས་ཞུ་བྱེད་དགོས་ཀྱི་བསམ་འཆར་བཏོན་ཚེ་བཀའ་བློན་དེས་ངེས་པར་དུ་དགོངས་པ་ཞུ་དགོས། སྲིད་སྐྱོང་གིས་དེ་འདྲའི་བཀའ་བློན་སུ་ཞིག་དགོངས་པ་ཞུ་དགོས་ཀྱི་བསམ་འཆར་འདོན་དགོས་བྱུང་རྐྱེན་རྒྱུ་མཚན་གྲོས་ཚོགས་སུ་འཚོགས་མུས་ཡིན་ན་དེ་རང་དང་། དེ་མིན་ཚོགས་དུས་རྗེས་མར་གསལ་བཤད་ཞུ་དགོས། ༽ཞེས་གསལ་ཡོད་པ་སོགས་ཕྱོགས་བསྡོམས་ཞུས་ན།

བཀའ་བློན་ཞིག་གིས་ལས་འཁུར་དམ་འབུལ་གྲུབ་རྗེས། སྐུ་གཤེགས་པ། ལས་དུས་རྫོགས་པ། སྲིད་སྐྱོང་གིས་དགོངས་པ་ཞུ་དགོས་པའི་དགོངས་ཚུལ་བཏོན་ཏེ་རྩ་དགོངས་ཞུས་པ། བཀའ་བློན་རང་ངོས་ནས་རྩ་དགོངས་ཞུས་པ། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱིར་ཕུད་བཏང་བ་ཁག་ཕུད། བཀའ་བློན་ལས་འཁུར་དང་འབྲལ་གཞིའི་ལམ་ཁ་གང་ཡང་མེད་པ་གསལ་བོ་ཡིན་སྟབས། ཕྱིར་འཐེན་ཞུས་པ་ཡིན་ཟེར་བ་ནི་བཅའ་ཁྲིམས་རིན་པོ་ཆེ་གཙོས་ཁྲིམས་སྒྲིག་ཁག་ལ་བརྩི་བཀུར་མ་གནང་བའི་དན་རྟགས་བསུབ་མེད་ཅིག་ཡིན་པ་སུས་ཀྱང་བསྙོན་དུ་མེད་པས། ཁྲིམས་འགལ་ཡིན་པ་གསལ་བོ་རེད། ངས་མ་འོངས་ལོ་རྒྱུས་ལ་འགན་འཁུར་ཏེ། གྲོས་ཚོགས་ནང་ཆུ་ངན་ལམ་ཤོར་མི་ཡོང་ཆེད་འདིའི་ཐད་ཁྲིམས་སྒྲིག་ཁག་བགྲང་ནས་ཐ་ཚིག་བསྒྲགས་པ། ལས་རིམ་བརྙན་ལེན་ལས་བྱེད་པར་གོང་ནས་བཀའ་བཀོད་སླེབས་ཏེ་གཏུབ་འདུག་པ་མི་མང་ལ་དོ་སྣང་བྱུང་འདུག

དོ་བདག་༼ བཀའ་བློན་ཁྲིམས་འགལ་བ། ༽ནས་ཁྲིམས་འགལ་ཆགས་པ་གསར་འགྱུར་བརྒྱུད་ལམ་ཐོག་བཟང་སྤྱོད་དང་ལྡན་པའི་ངང་ཞལ་བཞེས་གནང་འདུག་པ་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོས་བཀའ་བློན་གྱི་ལོ་རྒྱུས་ཞིབ་ཚགས་ཚོགས་གཙོ་སྦྲེལ་པོ་ལའང་སྲིད་སྐྱོང་གིས་ཕུལ་མེད་པ་བཀའ་གནང་གྲུབ་པ། སྤྱི་འཐུས་རྣམ་པ་ཚོས་དཔྱ་ཁྲལ་ལག་དེབ་ཀྱིས་མཚོན་ལོ་རྒྱུས་ཁ་གསལ་དགོས་སྐོར་གྲོས་ཚོགས་ནང་ནན་འདྲི་གནང་བ། དེ་ལ་སྲིད་སྐྱོང་ལགས་ནས་ཡིད་ཆེས་བློས་འགལ་བྱས་ཆོག་ཅེས་གསུངས་བ་དང་། གནད་དོན་ལྷག་རྗེས། བཀའ་ཤག་གོང་མ་ཚོར་ཁ་དཀྲིས་ཏེ་བཀའ་བློན་འོས་མིའི་ལོ་རྒྱུས་ནང་སྐྱེས་ལོ་གཅིག་པུ་འཁོད་པ་གྲོས་ཚོགས་ནང་བསྣམས་འདུག་ཅེས་ལན་གནང་བ་ལས། སྲིད་སྐྱོང་རང་གིས་བཀའ་ཤག་གོང་མ་རྣམས་ལྟར་ཞིབ་འཇུག་ནན་ཏན་གྱིས་ཁྲིམས་ལུགས་བརྩི་སྲུང་གི་རང་ཚུགས་དོར་བའམ། ཡང་ན་མཁྱེན་བཞིན་སྤྱང་གྲུང་གི་རྣམ་པས་བསྣམས་ཕེབས་པ་གང་ཡིན་བཟང་སྤྱོད་ལྡན་པའི་ཞལ་བཞེས་གནང་མེད་པ་བཅས་ཀྱི་གནས་སྟངས་ཕྱོགས་བསྡོམས་བྱས་ན། བཅའ་ཁྲིམས་རིན་པོ་ཆེ་དོན་ཚན་ཉེར་དགུ་པའི། ནང་གསེས་གཉིས་པའི་ཀ་བ། ༼  སྤྱི་འཐུས་ལྷན་ཚོགས་ཀྱི་སྤྱི་འཐུས་ངོ་ཡོད་གསུམ་ཆ་གཉིས་ཡན་གྱིས་མོས་མཐུན་བྱུང་ན་སྲིད་སྐྱོང་དང།་ བཀའ་བློན་བྱེ་བྲག་པ། བཀའ་ཤག་ཡོངས་རྫོགས་འཕོ་འགྱུར་གཏོང་འཐུས།  ༽ཞེས་པ་ལག་བསྟར་ལས་ལམ་ཁ་གཞན་མེད་པ་གསལ་བོ་རེད།

བོད་ཀྱི་གཏམ་དཔེར། དགུང་ཉི་མས་མཐོ་ཚད་མ་ཟིན་ན། གཟའ་ཁྱབ་འཇུག་ཟེར་བའི་དགྲ་ཞིག་ཡོད། སྤྲིན་དཀར་པོས་མཐོ་ཚད་མ་ཟིན་ན། རླུང་སྤུ་གྲི་ཟེར་བའི་དགྲ་ཞིག་ཡོད། ཟེར་བ་ལྟར། ཁྲིམས་ཀྱི་མདུན་སར་མགོ་བོ་ཚད་མེད་མཐོ་མི་ཆོག་པ་ཞིག་ཡིན་ནའང་། ཁྲིམས་ཀྱི་བདག་པོ་ཚོས་ཁྲིམས་ལུགས་ལག་བསྟར་དོན་འཁྱོལ་ཞིག་ཡོང་ན། བོད་ཀྱི་མདུན་ལམ་ལ་སྐྱིད་པའི་ཉི་མ་ལོས་ཤར་སྙམ།།

༢༠༡༦། ༦། ༤། ཉིན་གྱི་ཐོ་རངས་ཤར་མར།།